တၢ်မၤလိ ၁၆
ဆၢတဲာ်လီၤနသး လၢနကဘူၣ်ထီၣ်ဘါထီၣ် ကစၢ်ယွၤတက့ၢ်
၁, ၂. ပကဘၣ်သံကွၢ် လီၤက့ၤပသးဒ်လဲၣ်. ဒီးဘၣ်မနုၤအဃိ အရ့ဒိၣ်လၢပကမၤဒ်န့ၣ်လဲၣ်.
ခီဖျိလၢနမၤလိ လံာ်စီဆှံအဃိ နသ့ၣ်ညါဘၣ်လၢ ပှၤအါဂၤန့ၣ်စံးလီၤအသး လၢအဝဲသ့ၣ်ဘါယွၤဘၣ်ဆၣ် သိၣ်လိဝဲ မ့တမ့ၢ် မၤဝဲတၢ်လၢ ကစၢ်ယွၤသးဟ့ဝဲတဖၣ်န့ၣ်လီၤ. (၂ ကရံၣ်သူး ၆:၁၇) လၢတၢ်န့ၣ်အဃိ ယဟိဝၤယွၤမၤလိာ်ပှၤလၢ ပကဟးထီၣ်ကွံာ်လၢ “ဘၤဘူၤလိၣ်ဖးဒိၣ်” လၢအမ့ၢ်တၢ်ဘူၣ်တၢ်ဘါ အကမၣ်အပူၤန့ၣ်လီၤ. (လီၣ်ဖျါ ၁၈:၂, ၄) နကမၤဒ်လဲၣ်. ပဝဲကိးဂၤဒဲးန့ၣ် ပအိၣ်ဒီးပနီၢ်ကစၢ်အတၢ်ဃုထၢလီၤ. လၢတၢ်န့ၣ်အဃိ ပကဘၣ်သံကွၢ်လီၤက့ၤပသးလၢ ‘မ့ၢ်ယသးအိၣ် ဘူၣ်ထီၣ်ဘါထီၣ်ယွၤ ဒ်တၢ်ဘၣ်အသးအသိးဧါ မ့တမ့ၢ်ဘၣ်န့ၣ် မ့ၢ်ယအဲၣ်ဒိးဘူၣ်ထီၣ်ဘါထီၣ်အီၤ ဒ်ယမၤတ့ၢ်အီၤလၢညါအသိးဧါ.’
၂ နဟးထီၣ်ကွံာ်လၢ တၢ်ဘူၣ်တၢ်ဘါအကမၣ်အပူၤ မ့တမ့ၢ် ထုးထီၣ်ကွံာ်နမံၤ မ့ၢ်ဝံၤလံန့ၣ် မ့ၢ်တၢ်လၢအဂ့ၤဒိၣ်မးန့ၣ်လီၤ. ဘၣ်ဆၣ်သနာ်က့ တၢ်လၢနမၤတ့ၢ်အီၤလၢညါ ဒ်သိးဒီးတၢ်ဘူၣ်တၢ်ဘါအကမၣ် အလုၢ်အလၢ်တဖၣ်န့ၣ် ဘၣ်သ့ၣ်သ့ၣ် နကအဲၣ်ဒိးမၤအီၤဒံးလီၤ. လုၢ်လၢ်သ့ၣ်တဖၣ်အံၤ ဘၣ်မနုၤအဃိ အရ့ဒိၣ်လၢ ပကထံၣ်အီၤဒ် ယဟိဝၤယွၤထံၣ်အီၤလဲၣ်န့ၣ် ပကသမံသမိးကွၢ် တၢ်ဂ့ၢ်သ့ၣ်တဖၣ်အံၤန့ၣ်လီၤ.
တၢ်ဘူၣ်ထီၣ်ဘါထီၣ် တၢ်ဂီၤတၢ်ဖှီၣ် ဒီးမိၢ်ပၢ်ဖံဖု
၃. (က) ပှၤတနီၤနီၤ တသူလၢၤတၢ်ဂီၤတၢ်ဖှီၣ် လၢတၢ်ဘူၣ်ထီၣ်ဘါထီၣ်အပူၤန့ၣ် ဘၣ်မနုၤအဃိ ကီလၢအဝဲသ့ၣ်အဂီၢ်လဲၣ်. (ခ) ဘၣ်ဃးဒီး တၢ်သူတၢ်ဂီၤတၢ်ဖှီၣ် လၢတၢ်ဘူၣ်ထီၣ်ဘါထီၣ်ယွၤအဂီၢ်န့ၣ် လံာ်စီဆှံစံးဝဲဒ်လဲၣ်.
၃ ပှၤတနီၤနီၤန့ၣ် သူတ့ၢ်ဝဲတၢ်ဂီၤတၢ်ဖှီၣ် မ့တမ့ၢ် တၢ်လုၢ်လီၢ်တဖၣ်လၢအဟံၣ်ပူၤ ဒ်သိးကဘူၣ်ထီၣ်ဘါထီၣ်ဝဲ ကစၢ်ယွၤအဂီၢ်လီၤ. လၢညါန့ၣ် မ့ၢ်နမၤတ့ၢ်ဒ်န့ၣ်ဧါ. ဘၣ်သ့ၣ်သ့ၣ် ခဲအံၤ ဖဲနဘူၣ်ထီၣ်ဘါထီၣ်တၢ် အဆၢကတီၢ် တၢ်ဂီၤတၢ်ဖှီၣ် မ့ၢ်တပၣ်ဘၣ်န့ၣ် နကတူၢ်ဘၣ်လၢ တၢ်လီၤဟိအိၣ်ဝဲတခါလီၤ. ဘၣ်ဆၣ် သ့ၣ်နီၣ်ထီၣ်က့ၤလၢ ယဟိဝၤယွၤ သိၣ်လိပှၤလၢ ပကဘၣ်ဘူၣ်ထီၣ်ဘါထီၣ်အီၤ ဒ်လဲၣ်အဂ့ၢ်န့ၣ်လီၤ. ဒီးလံာ်စီဆှံသိၣ်လိပှၤ လီၤတံၢ်လီၤဆဲးလၢ ယဟိဝၤယွၤတအဲၣ်ဒိးလၢ ပကသူတၢ်ဂီၤတၢ်ဖှီၣ်ဒ်သိး ပကဘူၣ်ထီၣ်ဘါထီၣ်အီၤအဂီၢ်ဘၣ်.—ဖး ၂ မိၤၡ့ ၂၀:၄, ၅ တက့ၢ်; စံးထီၣ်ပတြၢၤ ၁၁၅:၄-၈; ယၡါယၤ ၄၂:၈; ၁ ယိၤဟၣ် ၅:၂၁.
၄. (က) ဘၣ်မနုၤအဃိ ပတကြၢးဘူၣ်ထီၣ်ဘါထီၣ် ဖံဖုလၢ အသံတ့ၢ်တဖၣ်လဲၣ်. (ခ) ဘၣ်မနုၤအဃိ ယဟိဝၤယွၤ မၤလိာ်အခ့အပှၤတဖၣ် ဒ်သိးအသုတဂုာ်ကျဲးစၢးကတိၤတၢ် ဒီးပှၤသံတဂ့ၤအဂီၢ်လဲၣ်.
၄ ပှၤအါဂၤန့ၣ် သူဝဲအတၢ်ဆၢကတီၢ် ဒီးအဂံၢ်အဘါဒ်သိး ကမၤမုာ်ထီၣ်က့ၤ မိၢ်ပၢ်ဖံဖုလၢ အသံတ့ၢ်တဖၣ်အသးန့ၣ်လီၤ. ဒီးဘၣ်သ့ၣ်သ့ၣ် ပှၤသ့ၣ်တဖၣ်အံၤ ကဘူၣ်ထီၣ်ဘါထီၣ်ဝဲ မိၢ်ပၢ်ဖံဖုလၢ အသံတ့ၢ်တဖၣ်န့ၣ်လီၤ. ဘၣ်ဆၣ် ပမၤလိဘၣ်လၢ ပှၤလၢအသံတ့ၢ်တဖၣ်န့ၣ် မၤစၢၤပှၤဒီး မၤဘၣ်ဒိပှၤတသ့ဝဲဘၣ်. ဒီးအဝဲသ့ၣ် တလဲၤအိၣ်မူလၢ တၢ်လီၢ်အဂၤ နီတတီၤလၢၤဘၣ်. ပမ့ၢ်ဂုာ်ကျဲးစၢး ဆဲးကျိးဒီးအဝဲသ့ၣ်န့ၣ် မ့ၢ်တၢ်လၢ အလီၤဘၣ်ယိၣ်ဒိၣ်မးလီၤ. နီၢ်နီၢ်န့ၣ် တၢ်ဆဲးကျိးအံၤ တမ့ၢ်ပဆဲးကျိးဒီး မိၢ်ပၢ်ဖံဖုလၢ အသံတ့ၢ်တဖၣ်ဘၣ် မ့ၢ်ဒၣ်ပဆဲးကျိးဒီး တၢ်ဝံတၢ်နါတဖၣ်န့ၣ်လီၤ. လၢတၢ်န့ၣ်အဃိ ယဟိဝၤယွၤမၤလိာ်ဝဲ ပှၤအံၣ်စရ့လးဖိတဖၣ် ဒ်သိးအသုတဂုာ်ကျဲးစၢးကတိၤတၢ် ဒီးပှၤသံတ့ၢ်တဖၣ် မ့တမ့ၢ် မၤတၢ်ဝံတၢ်နါ အတၢ်ဖံးတၢ်မၤလၢအဂၤ နီတမံၤတဂ့ၤန့ၣ်လီၤ.—၅ မိၤၡ့ ၁၈:၁၀-၁၂; ကွၢ်တၢ်ဂ့ၢ် ၂၅ ဒီး ၃၀ လၢလံာ်အကတၢၢ်တက့ၢ်.
၅. ဒ်သိးနကပာ်တ့ၢ်ကွံာ် တၢ်ဂီၤတၢ်ဖှီၣ်လၢ တၢ်ဘူၣ်ထီၣ်ဘါထီၣ် ကစၢ်ယွၤအဂီၢ်န့ၣ် တၢ်မနုၤမၤစၢၤနၤသ့ဝဲလဲၣ်. ဒီးဒ်သိးနသုတဘူၣ်ထီၣ်ဘါထီၣ် မိၢ်ပၢ်ဖံဖုလၢ အသံတ့ၢ်လၢၤတဂ့ၤအဂီၢ် တၢ်မနုၤမၤစၢၤနၤသ့ဝဲလဲၣ်.
၅ ဒ်သိးနကပာ်တ့ၢ်ကွံာ် တၢ်ဂီၤတၢ်ဖှီၣ်လၢ တၢ်ဘူၣ်ထီၣ်ဘါထီၣ် ကစၢ်ယွၤအဂီၢ်ဒီး လၢနကပတုာ်ကွံာ်တၢ်ဘူၣ်ထီၣ်ဘါထီၣ် မိၢ်ပၢ်ဖံဖုလၢအသံတ့ၢ်တဖၣ်အဂီၢ် တၢ်မနုၤမၤစၢၤနၤသ့ဝဲလဲၣ်. နကဘၣ်ဖးလံာ်စီဆှံဒီး ဆိကမိၣ်ထံလၢ မ့ၢ်ယဟိဝၤယွၤ ထံၣ်ဝဲတၢ်သ့ၣ်တဖၣ်အံၤ ဒ်လဲၣ်အဂ့ၢ်န့ၣ်လီၤ. ကစၢ်ထံၣ်ဝဲတၢ်သ့ၣ်တဖၣ်အံၤ ဒ်တၢ်လၢအလီၤ “သးဘၣ်အၢ” တဖၣ်န့ၣ်လီၤ. (၅ မိၤၡ့ ၂၇:၁၅) ပမ့ၢ်အဲၣ်ဒိးထံၣ် တၢ်သ့ၣ်တဖၣ်အံၤ ဒ်ကစၢ်ယွၤထံၣ်ဝဲအသိးန့ၣ် ပကဘၣ်ဃ့ဘါထုကဖၣ်ဆူ ယဟိဝၤယွၤအအိၣ် ကိးနံၤဒဲးလီၤ. ပမ့ၢ်မၤဒ်န့ၣ်န့ၣ် ပကဒိးန့ၢ်ဘၣ် တၢ်မၤစၢၤလၢ ပကဘူၣ်ထီၣ်ဘါထီၣ်အီၤ ဒ်တၢ်ဘၣ်အသးအသိးလီၤ. (ယၡါယၤ ၅၅:၉) နနာ်သ့သပှၢ်ကတၢၢ်လၢ ယဟိဝၤယွၤ ကဟ့ၣ်နၤတၢ်ဂံၢ်တၢ်ဘါ လၢနလိၣ်ဘၣ်ဒ်သိး နကစူးကွံာ်ညိကွံာ်တၢ်လၢ အဘၣ်ထွဲလိာ်သးဒီး တၢ်ဘူၣ်တၢ်ဘါလၢ အကမၣ်တဖၣ်န့ၣ်လီၤ.
မ့ၢ်ပကြၢးမၤ ခရံာ်အိၣ်ဖျဲၣ်အမူးပွဲဧါ
၆. ဘၣ်မနုၤအဃိ ပှၤပာ်ပနီၣ်ဝဲ လါဒံၣ်စဲဘၢၣ် ၂၅ သီ လၢယ့ၣ်ၡူးအိၣ်ဖျဲၣ်ဆၢက့ၤအလီၢ်လဲၣ်.
၆ ခရံာ်အိၣ်ဖျဲၣ်အမူးပွဲန့ၣ် မ့ၢ်နံၤသဘျ့လၢ အမံၤဟူသၣ်ဖျါအဒိၣ်ကတၢၢ်တဖၣ် အကျါတခါလီၤ. ဒီးပှၤအါတက့ၢ်န့ၣ် ဆိကမိၣ်ဝဲလၢ အဝဲသ့ၣ်မၤလၤကပီၤဝဲ ယ့ၣ်ၡူးအတၢ်အိၣ်ဖျဲၣ်ဆၢက့ၤ အမုၢ်နံၤန့ၣ်လီၤ. ဘၣ်ဆၣ် ပမ့ၢ်တဲလိၤလိၤန့ၣ် ခရံာ်အိၣ်ဖျဲၣ်အမူးပွဲန့ၣ် ဘၣ်ထွဲလိာ်အသးဒီး တၢ်ဘူၣ်တၢ်ဘါအကမၣ်န့ၣ်လီၤ. လံာ်ခီယ့ၤ (encyclopedia) တဘ့ၣ် ပာ်ဖျါထီၣ်ဝဲလၢ ပှၤရိမ့ၤဖိလၢအမ့ၢ် ပှၤသူခိၣ်ဖိတဖၣ်န့ၣ် မၤဝဲမူးပွဲလၢအမ့ၢ် မုၢ်အတၢ်အိၣ်ဖျဲၣ်ဆၢက့ၤအနံၤ ဖဲလါဒံၣ်စဲဘၢၣ် ၂၅ သီန့ၣ်လီၤ. ယ့ၣ်ၡူးတအိၣ်ဖျဲၣ်ထီၣ်လၢ လါဒံၣ်စဲဘၢၣ် ၂၅ သီဘၣ်. ဘၣ်ဆၣ် ခီဖျိလၢတၢ်ဘူၣ်တၢ်ဘါခိၣ်နၢ်တဖၣ် အဲၣ်ဒိးဝဲလၢ ပှၤသူခိၣ်ဖိတဖၣ် ကကဲထီၣ်ခရံာ်ဖိအဃိ အဝဲသ့ၣ်ဆၢတဲာ်လီၤအသးလၢ ကမၤဝဲခရံာ်အိၣ်ဖျဲၣ်လၢ လါဒံၣ်စဲဘၢၣ် ၂၅ သီန့ၣ်လီၤ. (လူၤကၣ် ၂:၈-၁၂) ယ့ၣ်ၡူးအပျဲၢ်အဘီၣ်လၢညါတဖၣ် တမၤဝဲခရံာ်အိၣ်ဖျဲၣ်အမူးပွဲဘၣ်. လံာ်တဘ့ၣ်လၢအမ့ၢ် (Sacred Origins of Profound Things) ပာ်ဖျါထီၣ်ဝဲလၢ ယ့ၣ်ၡူးအိၣ်ဖျဲၣ်ထီၣ် ပူၤကွံာ်အနံၣ်ခံကယၤ ဝံၤအလီၢ်ခံန့ၣ် “အဝဲအိၣ်ဖျဲၣ်အမုၢ်နံၤမုၢ်သီန့ၣ် ပှၤတသ့ၣ်ညါနီတဂၤဘၣ်” ဒီးပှၤအါတက့ၢ်န့ၣ် တထံၣ်ဝဲဒ်အမ့ၢ် တၢ်လၢအရ့ဒိၣ်ဝဲဘၣ်. ဖဲယ့ၣ်ၡူးက့ၤထီၣ်ဆူမူခိၣ် ပူၤကွံာ်အနံၣ်လၢအကယၤတဖၣ် ဝံၤအလီၢ်ခံန့ၣ် ပှၤစးထီၣ်မၤဝဲ ခရံာ်အိၣ်ဖျဲၣ်အမူးပွဲလီၤ.
၇. ဘၣ်မနုၤအဃိ ခရံာ်ဖိလၢအမ့ၢ်အတီတဖၣ် တမၤဝဲယ့ၣ်ၡူးအတၢ်အိၣ်ဖျဲၣ်ဆၢက့ၤ အမူးပွဲလဲၣ်.
၇ ပှၤအါဂၤန့ၣ်သ့ၣ်ညါဝဲလၢ ခရံာ်အိၣ်ဖျဲၣ်အမူးပွဲ အလုၢ်အလၢ်တဖၣ် ဒ်သိးဒီး တၢ်ဟ့ၣ်လိာ်သးတၢ်ဟ့ၣ် ဒီးတၢ်သူၣ်ဖှံသးညီအမူးန့ၣ် ဟဲလီၤစၢၤလီၤသွဲၣ်လၢ ပှၤသူခိၣ်ဖိအလုၢ်အလၢ်န့ၣ်လီၤ. အဒိ လၢညါကီၢ်အဲကလံး ဒီးကီၢ်အမဲရကၤ တၢ်လီၢ်တနီၤန့ၣ် ပဒိၣ်တဟ့ၣ်အခွဲးလၢ ပှၤကမၤဝဲမူးပွဲတဖၣ်အံၤဘၣ်. မ့ၢ်လၢအဟဲလီၤစၢၤလီၤသွဲၣ်လၢ ပှၤသူခိၣ်ဖိအလုၢ်အလၢ်အဃိလီၤ. ပှၤလၢအမၤဝဲ ခရံာ်အိၣ်ဖျဲၣ်အမူးပွဲန့ၣ် ဘၣ်တၢ်စံၣ်ညီၣ်အဝဲသ့ၣ်လီၤ. ဘၣ်ဆၣ် ဒ်တၢ်ဆၢကတီၢ် လဲၤပူၤကွံာ်ဝဲအသိး ပှၤစးထီၣ်မၤကဒီး ခရံာ်အိၣ်ဖျဲၣ်အမူးပွဲန့ၣ်လီၤ. ဘၣ်မနုၤအဃိ ခရံာ်ဖိလၢအမ့ၢ်အတီတဖၣ် တမၤဝဲခရံာ်အိၣ်ဖျဲၣ်အမူးပွဲလဲၣ်. ခီဖျိလၢ အဝဲသ့ၣ်အဲၣ်ဒိးမၤဝဲ တၢ်ဘၣ်ယွၤအသးလၢ တၢ်ကိးမံၤဒဲးအပူၤန့ၣ်လီၤ.
မ့ၢ်ပကြၢးမၤ နံၤအိၣ်ဖျဲၣ်အမူးပွဲတဖၣ်ဧါ
၈, ၉. ဘၣ်မနုၤအဃိ ခရံာ်ဖိလၢညါတဖၣ် တမၤဝဲတၢ်အိၣ်ဖျဲၣ်ဆၢက့ၤအမူးပွဲတဖၣ်လဲၣ်.
၈ မူးပွဲလၢအဂၤတခါ လၢပှၤအါဂၤမၤဝဲန့ၣ် မ့ၢ်ဝဲဒၣ်နံၤအိၣ်ဖျဲၣ်ဆၢက့ၤအမူးပွဲန့ၣ်လီၤ. တၢ်အိၣ်ဖျဲၣ်ဆၢက့ၤအမူးပွဲ လၢလံာ်စီဆှံပာ်ဖျါထီၣ်ဝဲန့ၣ် အိၣ်ထဲခံဘျီလီၤ. ဒီးပှၤလၢအမၤဝဲ တၢ်အိၣ်ဖျဲၣ်ဆၢက့ၤအမူးပွဲတဖၣ်အံၤန့ၣ် တမ့ၢ်ပှၤလၢအဘူၣ်ထီၣ်ဘါထီၣ် ယဟိဝၤယွၤဘၣ်. (၁ မိၤၡ့ ၄၀:၂၀; မၢ်ကူး ၆:၂၁) လၢညါန့ၣ် တၢ်အိၣ်ဖျဲၣ်ဆၢက့ၤအမူးပွဲတဖၣ် ဘၣ်တၢ်မၤအီၤလၢ ပှၤကမၤလၤကပီၤဝဲယွၤလၢ အကမၣ်တဖၣ်အဂီၢ်န့ၣ်လီၤ. လၢတၢ်န့ၣ်အဃိ လံာ်လၢအမ့ၢ် The World Book Encyclopedia တဘ့ၣ်ပာ်ဖျါထီၣ်ဝဲလၢ ခရံာ်ဖိလၢညါတဖၣ် “နာ်ဝဲလၢ တၢ်အိၣ်ဖျဲၣ်ဆၢက့ၤအမူးပွဲန့ၣ် မ့ၢ်ပှၤသူခိၣ်ဖိအလုၢ်အလၢ်” န့ၣ်လီၤ.
၉ လၢပျၢၤန့ၣ် ပှၤရိမ့ၤဖိဒီး ပှၤကြံးဖိတဖၣ် နာ်ဝဲလၢဖဲပှၤတဂၤဂၤအိၣ်ဖျဲၣ်အနံၤန့ၣ် မုၢ်ဃါတဂၤအိၣ်ဝဲဒီးအီၤလီၤ. ဒီးမုၢ်ဃါတဂၤအံၤ ကဒီသဒၢအီၤလၢ အသးသမူဒီတစိၤလီၤ. လံာ်လၢအမ့ၢ် The Lore of Birthdays ပာ်ဖျါထီၣ်ဝဲလၢ “ဖဲန့ၣ်အဆၢကတီၢ် ပှၤလၢအတမ့ၢ်ခရံာ်ဖိတဖၣ် မၤဝဲနံၤအိၣ်ဖျဲၣ်ဆၢက့ၤ အမူးပွဲတဖၣ် မ့ၢ်လၢအဝဲသ့ၣ်အိၣ်ဒီးတၢ်နာ်လၢ အကမၣ်အဃိန့ၣ်လီၤ. အဝဲသ့ၣ် ဆိကမိၣ်ဝဲလၢ ပှၤတဂၤဂၤ မ့ၢ်မၤဝဲတၢ်အိၣ်ဖျဲၣ်ဆၢက့ၤမူးပွဲန့ၣ် အကစၢ်ယွၤတဖၣ် ကဒီသဒၢအဝဲသ့ၣ်လီၤ.”
၁၀. ဘၣ်မနုၤအဃိ ခရံာ်ဖိလၢမုၢ်မဆါတနံၤညါအံၤတမၤ တၢ်အိၣ်ဖျဲၣ်ဆၢက့ၤအမူးပွဲလဲၣ်.
၁၀ မ့ၢ်နဆိကမိၣ်လၢ ယဟိဝၤယွၤဘၣ်သူၣ်ဘၣ်သးဝဲ မူးပွဲလၢအဘၣ်ထွဲလိာ်အသးဒီး တၢ်ဘူၣ်တၢ်ဘါလၢ အကမၣ်န့ၣ်ဧါ. (ယၡါယၤ ၆၅:၁၁, ၁၂) တဘၣ်အသးလ့ၤတက့ၤဘၣ်. လၢတၢ်န့ၣ်အဃိ ပတမၤတၢ်အိၣ်ဖျဲၣ်ဆၢက့ၤအမူးပွဲတဖၣ် ဒီးနံၤသဘျ့လၢ အဘၣ်ထွဲလိာ်သးဒီး တၢ်ဘူၣ်တၢ်ဘါလၢအမၣ်တဖၣ်ဘၣ်.
လုၢ်လၢ်အတၢ်ဟဲလီၤစၢၤလီၤသွဲၣ်န့ၣ် မ့ၢ်တၢ်လၢအရ့ဒိၣ်ဧါ
၁၁. ဘၣ်မနုၤအဃိ ပှၤတနီၤမၤဝဲမူးပွဲတဖၣ်လဲၣ်. ဒီးတၢ်လၢ ပကြၢးသးစၢၢ်ဆၢအဒိၣ်ကတၢၢ်န့ၣ် မ့ၢ်တၢ်မနုၤလဲၣ်.
၁၁ ပှၤတနီၤသ့ၣ်ညါဝဲလၢ ခရံာ်အိၣ်ဖျဲၣ်အမူးပွဲ ဒီးနံၤသဘျ့အဂၤတဖၣ်န့ၣ် ဟဲလီၤစၢၤလီၤသွဲၣ်လၢ ပှၤသူခိၣ်ဖိအလုၢ်အလၢ် ဘၣ်ဆၣ်အဝဲသ့ၣ်ဆဲးမၤဒံးဝဲလီၤ. အဝဲသ့ၣ်ဆိကမိၣ်ဝဲလၢ နံၤသဘျ့သ့ၣ်တဖၣ်န့ၣ် မ့ၢ်ဒၣ်တၢ်ခွဲးတၢ်ယာ်လၢ ပကထံၣ်လိာ်ဘၣ်ပသးဒီး ပဟံၣ်ဖိဃီဖိန့ၣ်လီၤ. မ့ၢ်နတူၢ်ဘၣ်ဒ်န့ၣ်စ့ၢ်ကီးဧါ. နကရ့လိာ်မုာ်လိာ်နသးဒီး နဟံၣ်ဖိဃီဖိန့ၣ် တမ့ၢ်တၢ်လၢအကမၣ်ဝဲဘၣ်. ယဟိဝၤယွၤဒုးအိၣ်ထီၣ်ဝဲ ဟံၣ်ဖိဃီဖိဒီးကစၢ်ယွၤအဲၣ်ဒိးဝဲလၢ ပကအိၣ်ဒီးတၢ်ရ့လိာ်မုာ်လိာ်သးလၢအဂ့ၤလီၤ. (အ့းဖ့းစူး ၃:၁၄, ၁၅) ဘၣ်ဆၣ် ပတကြၢးဆိကမိၣ်လၢ ပကဘၣ်မၤနံၤသဘျ့အမူးပွဲတဖၣ် လၢအဘၣ်ထွဲလိာ်အသးဒီး တၢ်ဘူၣ်တၢ်ဘါအကမၣ်ဒ်သိး ပကမၤမုာ်ထီၣ်ပဘူးပတံၢ်အသးဘၣ်. လၢတၢ်န့ၣ်အလီၢ် ပကဘၣ်သးစၢၢ်ဆၢလၢ ပကမၤတၢ်ဘၣ် ယဟိဝၤယွၤအသးန့ၣ်လီၤ. တၢ်မၢဖိပီလူးစံးဝဲလၢ– “ဂုာ်ဃုသ့ၣ်ညါ တၢ်လၢအဘၣ်ကစၢ်အသးတက့ၢ်.”—အ့းဖ့းစူး ၅:၁၀.
၁၂. ယဟိဝၤယွၤ တဘၣ်သူၣ်ဘၣ်သး နံၤသဘျ့မနုၤသ့ၣ်တဖၣ်လဲၣ်.
၁၂ ပှၤအါဂၤဆိကမိၣ်ဝဲလၢ နံၤသဘျ့တဖၣ် ဟဲအိၣ်ထီၣ်အသးဒ်လဲၣ်ဒ်လဲၣ်န့ၣ် တမ့ၢ်တၢ်လၢအရ့ဒိၣ်ဝဲဘၣ်. ဘၣ်ဆၣ် နံၤသဘျ့တဖၣ် လၢအဟဲလီၤစၢၤလီၤသွဲၣ်လၢ တၢ်ဘူၣ်တၢ်ဘါအကမၣ်တဖၣ် ဒီးနံၤသဘျ့လၢ အမၤလၤကပီၤပှၤဟီၣ်ခိၣ်ဖိ မ့တမ့ၢ် ထံကီၢ်အတၢ်ပနီၣ်တဖၣ်န့ၣ် ကစၢ်ယွၤတဘၣ်သူၣ်ဘၣ်သးဝဲဘၣ်. အဒိ လၢညါပှၤအဲၤကူပတူးဖိတဖၣ် အိၣ်ဒီးမူးပွဲအါမးလၢ ကမၤလၤကပီၤဝဲ အဝဲသ့ၣ်အယွၤလၢအကမၣ်တဖၣ်အဂီၢ်န့ၣ်လီၤ. ဖဲပှၤအံၣ်စရ့လးဖိတဖၣ် ထူၣ်ဖျဲးထီၣ်လၢ ကီၢ်အဲၤကူပတူးဝံၤအလီၢ်ခံန့ၣ် အဝဲသ့ၣ်မၤဒိးဝဲပှၤသူခိၣ်ဖိတဖၣ်အံၤ အမူးပွဲတခါဒီးကိးဝဲလၢ “တၢ်မၤဘူၣ်လၢယွၤလီၤ.” ဘၣ်ဆၣ်သနာ်က့ မ့ၢ်လၢပှၤအံၣ်စရ့လးဖိတဖၣ် မၤဝဲဒ်အံၤအဃိ ယဟိဝၤယွၤစံၣ်ညီၣ်အဝဲသ့ၣ်လီၤ. (၂ မိၤၡ့ ၃၂:၂-၁၀) ဒ်ဝံယၡါယၤစံးဝဲအသိး “တၢ်တကဆှီဘၣ်န့ၣ် ထိးဘၣ်အီၤနီတမံၤတဂ့ၤ.”—ဖး ယၡါယၤ ၅၂:၁၁ တက့ၢ်.
ဖဲနရ့ဒီးပှၤဂၤအခါ ကတိၤတၢ်မုာ်မုာ်တက့ၢ်
၁၃. ဖဲနဆၢတဲာ်လီၤနသးလၢ နတမၤလၢၤနံၤသဘျ့တဖၣ်အခါ ဘၣ်သ့ၣ်သ့ၣ် နကအိၣ်ဒီးတၢ်သံကွၢ်မနုၤတဖၣ်လဲၣ်.
၁၃ ဖဲနဆၢတဲာ်လီၤနသးလၢ နတမၤလၢၤနံၤသဘျ့မူးပွဲတဖၣ်အခါ ဘၣ်သ့ၣ်သ့ၣ် နကအိၣ်ဒီးတၢ်သံကွၢ်အါမးလီၤ. အဒိ ပှၤလၢအမၤသကိးတၢ်ဒီးနၤတဖၣ် မ့ၢ်သံကွၢ်နၤလၢ ဘၣ်မနုၤအဃိ နတမၤခရံာ်အိၣ်ဖျဲၣ် အမူးပွဲဒီးပှၤလဲၣ်န့ၣ် နကြၢးစံးဆၢအဝဲသ့ၣ်ဒ်လဲၣ်. ပှၤတဂၤဂၤ မ့ၢ်ဟ့ၣ်နၤခရံာ်အိၣ်ဖျဲၣ်အတၢ်ဟ့ၣ်န့ၣ် နကဘၣ်မၤဒ်လဲၣ်. နသးသမူအတံၤသကိး မ့ၢ်မုၢ်လၢ်ဝဲလၢ နကမၤနံၤသဘျ့မူးပွဲဒီးအီၤန့ၣ် နကဘၣ်မၤဒ်လဲၣ်. မ့ၢ်လၢနတမၤလၢၤ နံၤသဘျ့ဒီးတၢ်အိၣ်ဖျဲၣ်ဆၢက့ၤမူးပွဲအဃိ ဒ်သိးနဖိတဖၣ်အသးသုတဘၣ်ဒိတဂ့ၤအဂီၢ် နကဘၣ်မၤစၢၤအဝဲသ့ၣ်ဒ်လဲၣ်န့ၣ်လီၤ.
၁၄, ၁၅. ပှၤတဂၤဂၤ မ့ၢ်ဆၢဂ့ၤဆၢဝါနၤ လၢနံၤသဘျ့အတၢ်ဆၢဂ့ၤ ဒီးဟ့ၣ်နၤတၢ်ဟ့ၣ်န့ၣ် နမၤသ့ဒ်လဲၣ်.
၁၄ ပကဘၣ်မၤဒ်လဲၣ်ဒီး ပကဘၣ်တဲတၢ်ဒ်လဲၣ်န့ၣ် အရ့ဒိၣ်လၢပကဘၣ်ကွၢ် ပှၤဂၤအတၢ်အိၣ်သးဒီး သူပခိၣ်နူာ်န့ၣ်လီၤ. အဒိ ပှၤတဂၤဂၤမ့ၢ်ဆၢဂ့ၤဆၢဝါနၤလၢ နံၤသဘျ့အတၢ်ဆၢဂ့ၤန့ၣ် နတဲဆၢက့ၤအီၤ ယိယိဖိလၢ “တၢ်ဘျုး” သ့ဝဲလီၤ. ဘၣ်ဆၣ် နမ့ၢ်ထံၣ်ဘၣ်လၢ ပှၤတဂၤဂၤမ့ၢ်အဲၣ်ဒိးသ့ၣ်ညါအါထီၣ် ပဂ့ၢ်ပကျိၤန့ၣ် ဘၣ်သ့ၣ်သ့ၣ် နကတဲနၢ်ပၢၢ်အီၤလၢ ဘၣ်မနုၤအဃိ နတမၤနံၤသဘျ့အမူးပွဲအံၤလဲၣ်န့ၣ်လီၤ. ဖဲနတဲနၢ်ပၢၢ်အီၤအဆၢကတီၢ် နကဘၣ်အိၣ်ဒီးတၢ်ကူၣ်သ့, ကတိၤတၢ်မုာ်မုာ်ဒီး ပာ်ဖျါထီၣ်တၢ်ပာ်ကဲထီဘိန့ၣ်လီၤ. လံာ်စီဆှံစံးဝဲလၢ– “သုဂ့ၤစံးဆၢ ပှၤတဂၤလၢ်လၢ် ဒ်လဲၣ်ဒ်လဲၣ်, ဒ်သိးသုကသ့ၣ်ညါဒီး, မ်သုကလုၢ်ကထါအိၣ်ဒီး တၢ်ဘျုးတၢ်ဖှိၣ်ဒီး ဟီဒီးအံသၣ်, တဘိယူၢ်ဃီတက့ၢ်.” (ကလီးစဲ ၄:၆) နတဲနၢ်ပၢၢ်အဝဲသ့ၣ်လၢ နသးအိၣ်သူတၢ်ဆၢကတီၢ်လၢ နကရ့ဒီးပှၤဂၤဒီး ဟ့ၣ်ပှၤဂၤလၢတၢ်ဟ့ၣ်တဖၣ်ဘၣ်ဆၣ် နတအဲၣ်ဒိးမၤအီၤဖဲ နံၤသဘျ့တဖၣ်အဆၢကတီၢ်ဘၣ်.
၁၅ ပှၤတဂၤဂၤ မ့ၢ်ဟ့ၣ်နၤတၢ်ဟ့ၣ်န့ၣ် နကမၤဒ်လဲၣ်. ဘၣ်ဃးဒီး တၢ်ဂ့ၢ်သ့ၣ်တဖၣ်အံၤန့ၣ် လံာ်စီဆှံတပာ်ဖျါထီၣ်ဝဲ တၢ်သိၣ်တၢ်သီလီၤတံၢ်လီၤဆဲးဘၣ်. ဘၣ်ဆၣ် လံာ်စီဆှံစံးဝဲလၢ ပကဘၣ်ပၢၤဃာ်ပသး လၢအသ့ၣ်ညါဒၣ်တၢ် လၢအကဆှီန့ၣ်လီၤ. (၁ တံၤမသ့း ၁:၁၈, ၁၉) ဘၣ်သ့ၣ်သ့ၣ် ပှၤလၢအကဟ့ၣ်နၤတၢ်ဟ့ၣ်တဂၤ ကစံးဝဲလၢ “ယသ့ၣ်ညါလၢ နတမၤနံၤသဘျ့မူးပွဲသနာ်က့ ယအဲၣ်ဒိးဟ့ၣ်နၤတၢ်ဟ့ၣ်လီၤ.” မ့တမ့ၢ်ဘၣ်န့ၣ် ဘၣ်သ့ၣ်သ့ၣ် အဝဲတသ့ၣ်ညါဝဲလၢ နတမၤနံၤသဘျ့အမူးပွဲဘၣ်. ဒ်လဲၣ်ဂ့ၤဒ်လဲၣ်ဂ့ၤ မ့ၢ်နကတူၢ်လိာ်တၢ်ဟ့ၣ်အံၤဧါ တတူၢ်လိာ်ဧါန့ၣ် နဘၣ်ဆၢတဲာ်လီၤနသး လၢနနီၢ်ကစၢ်န့ၣ်လီၤ. ဘၣ်ဆၣ်သနာ်က့ လၢနတၢ်ဃုထၢအဖီခိၣ်န့ၣ် နကဘၣ်အိၣ်ဒီး သးလၢအသ့ၣ်ညါဒၣ်တၢ် လၢအကဆှီန့ၣ်လီၤ. ပတအဲၣ်ဒိးမၤတၢ်လၢ အကမၤဘၣ်ဒိ ပတၢ်ရ့လိာ်သးဒီးယဟိဝၤယွၤဘၣ်.
နၤဒီးနဟံၣ်ဖိဃီဖိ
ပှၤလၢအမၤ ယဟိဝၤယွၤအတၢ်မၤန့ၣ် ကပှဲၤဒီးတၢ်သူၣ်ဖှံသးညီ
၁၆. နဟံၣ်ဖိဃီဖိ မ့ၢ်အဲၣ်ဒိးမၤနံၤသဘျ့မူးပွဲတဖၣ်န့ၣ် နကြၢးမၤဒ်လဲၣ်.
၁၆ နဟံၣ်ဖိဃီဖိ မ့ၢ်အဲၣ်ဒိးမၤဝဲ နံၤသဘျ့အမူးပွဲန့ၣ် နကဘၣ်မၤဒ်လဲၣ်. တလိၣ်နတဲအါလိာ်သးဒီးအဝဲသ့ၣ်ဘၣ်. သ့ၣ်နီၣ်ထီၣ်က့ၤလၢ အဝဲသ့ၣ်အိၣ်ဒီးအနီၢ်ကစၢ်အတၢ်ဆၢတဲာ် လၢအကမၤဝဲန့ၣ်တက့ၢ်. ကတိၤတၢ်ဒီးအဝဲသ့ၣ်မုာ်မုာ် ဒီးပာ်ကဲအဝဲသ့ၣ်အတၢ်ဆၢတဲာ် ဒ်နမုၢ်လၢ်တၢ်လၢ အဝဲသ့ၣ်ကပာ်ကဲ နတၢ်ဆၢတဲာ်အသိးန့ၣ်တက့ၢ်. (ဖး မးသဲ ၇:၁၂ တက့ၢ်.) ဘၣ်ဆၣ် ဖဲနံၤသဘျ့ဘၣ်ဝဲအဆၢကတီၢ် နဟံၣ်ဖိဃီဖိမ့ၢ်အဲၣ်ဒိးလၢ နကသူတၢ်ဆၢကတီၢ် ဒီးအဝဲသ့ၣ်ဒ်သိးသိးန့ၣ် နကြၢးမၤတၢ်မနုၤလဲၣ်. တချုးလၢနဆၢတဲာ်လီၤနသး လၢနကမၤတၢ်တမံၤမံၤန့ၣ် ဃ့ဘါထုကဖၣ်လၢ ယဟိဝၤယွၤအအိၣ် ဒ်သိးအဝဲကမၤစၢၤနၤလၢ နကဆၢတဲာ်တၢ်လၢအဘၣ်အဂီၢ်တက့ၢ်. ဆိကမိၣ်ထံတၢ်အိၣ်အသးတဖၣ် ဒီးဃုသ့ၣ်ညါအါထီၣ် တၢ်ဂ့ၢ်တၢ်ကျိၤတက့ၢ်. ဒီးသ့ၣ်နီၣ်ထီၣ်က့ၤလၢ နအဲၣ်ဒိးမၤယဟိဝၤယွၤ အတၢ်ဘၣ်သးထီဘိန့ၣ်တက့ၢ်.
၁၇. ဖဲနဖိထံၣ်ဘၣ် ပှၤဂၤမၤဝဲ နံၤသဘျ့မူးပွဲတဖၣ်အခါ ဒ်သိးအသုတတူၢ်ဘၣ်တၢ်သးအုးတဂ့ၤအဂီၢ် နမၤစၢၤအဝဲသ့ၣ်ကသ့ဒ်လဲၣ်.
၁၇ နဖိကထံၣ်ဘၣ်လၢ ပှၤဂၤတဖၣ်မၤဝဲ နံၤသဘျ့မူးပွဲတဖၣ်န့ၣ်လီၤ. လၢတၢ်န့ၣ်အဃိ နမၤစၢၤအဝဲသ့ၣ်ကသ့ဒ်လဲၣ်. အဒိ တဘျီတခီၣ်န့ၣ် နပာ်လီၤတၢ်ဆၢကတီၢ်လၢ နကမၤသးခုနဖိတဖၣ် အသးသ့ဝဲလီၤ. ဖဲနဖိသ့ၣ်တဖၣ် တပာ်သူၣ်ပာ်သးအဆၢကတီၢ်န့ၣ် နဟ့ၣ်အဝဲသ့ၣ် တၢ်ဟ့ၣ်သ့ဝဲလီၤ. ဒီးတၢ်ဟ့ၣ်လၢအဂ့ၤကတၢၢ်တခါ လၢနဟ့ၣ်နဖိသ့န့ၣ် မ့ၢ်ဝဲနတၢ်ဆၢကတီၢ်ဒီး နတၢ်အဲၣ်န့ၣ်လီၤ.
မၤသကိးတၢ်ဒီး တၢ်ဘူၣ်တၢ်ဘါ အမ့ၢ်အတီတက့ၢ်
၁၈. ဘၣ်မနုၤအဃိ ပကြၢးထီၣ်ခရံာ်ဖိ တၢ်အိၣ်ဖှိၣ်ရိဖှိၣ်လဲၣ်.
၁၈ ဒ်သိးပကမၤတၢ်ဘၣ် ယဟိဝၤယွၤအသးအဂီၢ် ပကဘၣ်ပာ်တ့ၢ်ကွံာ် တၢ်ဘူၣ်တၢ်ဘါအကမၣ်ဃုာ်ဒီး အလုၢ်အလၢ်ဒီးနံၤသဘျ့မူးပွဲတဖၣ် လၢအဘၣ်ထွဲဒီးအီၤန့ၣ်လီၤ. တကးဒံးဘၣ် ပကဘၣ်မၤသကိးတၢ်ဒီး တၢ်ဘူၣ်တၢ်ဘါလၢ အမ့ၢ်အတီန့ၣ်လီၤ. ပကဘၣ်မၤဒ်လဲၣ်. အဆိကတၢၢ်န့ၣ် ပကဘၣ်လဲၤထီၣ် ခရံာ်ဖိတၢ်အိၣ်ဖှိၣ်ရိဖှိၣ် ဘၣ်ဆၢဘၣ်ကတီၢ်န့ၣ်လီၤ. (ဖး ဧ့ၤဘြံၤ ၁၀:၂၄, ၂၅ တက့ၢ်.) တၢ်အိၣ်ဖှိၣ်ရိဖှိၣ်န့ၣ် မ့ၢ်တၢ်အရ့ဒိၣ်လၢ တၢ်ဘူၣ်ထီၣ်ဘါထီၣ်အမ့ၢ်အတီအဂီၢ်လီၤ. (စံးထီၣ်ပတြၢၤ ၂၂:၂၂; ၁၂၂:၁) ဖဲပအိၣ်ဖှိၣ်ရိဖှိၣ် အဆၢကတီၢ်န့ၣ် ပဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤသ့ဝဲလီၤ.—ရိမ့ၤ ၁:၁၂.
၁၉. ဘၣ်ဃးဒီး တၢ်မ့ၢ်တၢ်တီလၢ နမၤလိဘၣ်လၢ လံာ်စီဆှံအပူၤန့ၣ် ဘၣ်မနုၤအဃိ အရ့ဒိၣ်လၢ နကတဲဘၣ်ပှၤဂၤလဲၣ်.
၁၉ တၢ်ဂ့ၢ်ခံခါတခါန့ၣ် ဒ်သိးနမၤသကိးတၢ်ဒီး တၢ်ဘူၣ်တၢ်ဘါ အမ့ၢ်အတီကသ့အဂီၢ် နကဘၣ်တဲဘၣ်ပှၤဂၤ တၢ်ဂ့ၢ်လၢ နမၤလိဘၣ်လၢ လံာ်စီဆှံအပူၤန့ၣ်လီၤ. ပှၤအါဂၤန့ၣ် တူၢ်ဘၣ်ဝဲ တၢ်သူၣ်ကိၢ်သးဂီၤ မ့ၢ်လၢအဝဲသ့ၣ် ထံၣ်ဘၣ်ဝဲတၢ်အၢတၢ်သီတဖၣ် လၢအဟဲကဲထီၣ်အသး လၢဟီၣ်ခိၣ်ချၢအံၤန့ၣ်လီၤ. ဘၣ်သ့ၣ်သ့ၣ် နကသ့ၣ်ညါဘၣ် ပှၤတဂၤဂၤလၢအတူၢ်ဘၣ် တၢ်သူၣ်ကိၢ်သးဂီၤဒ်န့ၣ်လီၤ. ဘၣ်ဃးဒီး နတၢ်မုၢ်လၢ်လၢ ခါဆူညါအဂီၢ်န့ၣ် တဲဘၣ်အဝဲသ့ၣ်တက့ၢ်. ခီဖျိလၢနလဲၤထီၣ် တၢ်အိၣ်ဖှိၣ်ရိဖှိၣ်ဒီး တဲဘၣ်ပှၤဂၤလၢ လံာ်စီဆှံ တၢ်မ့ၢ်တၢ်တီအဃိ နကတူၢ်ဘၣ်လၢ နတအဲၣ်ဒိးမၤဃုာ် တၢ်ဘူၣ်တၢ်ဘါ အကမၣ် ဒီးအလုၢ်အလၢ်တဖၣ်လၢၤဘၣ်. နမ့ၢ်ဆၢတဲာ်လီၤနသးလၢ နကဘူၣ်ထီၣ်ဘါထီၣ် ကစၢ်ယွၤလၢ ကျဲမ့ၢ်ကျဲတီန့ၣ် နနာ်သ့သပှၢ်ကတၢၢ်လၢ နကအိၣ်ဒီးတၢ်သးခု ဒီးကစၢ်ယွၤကဆိၣ်ဂ့ၤ နတၢ်ဂုာ်ကျဲးစၢးန့ၣ်လီၤ.—မၤလကံ ၃:၁၀.
တၢ်ဂ့ၤအဂၤလၢ နကဘၣ်သး
တၢ်ဂ့ၢ်နီၢ်ကီၢ်
ပဒီပုၢ်ဝဲၢ်ခဲလၢာ် အတၢ်ကရၢကရိ
ဟီၣ်ခိၣ်လၢတၢ်အဲၣ်တၢ်ကွံ တအိၣ်အံၤအပူၤန့ၣ် ယဟိဝၤပှၤအုၣ်အသးတဖၣ် ပၢၤဃာ်ဝဲ ဟီၣ်ခိၣ်ဒီဘ့ၣ် ဒီပုၢ်ဝဲၢ်တၢ်ကရၢကရိဒ်လဲၣ်.
