1, 2. Ino ngumwiipusho nshi ngomweelete kuliipusha nobeene, alimwi ino nceebonshi ncociyandikila?

KWIIYA Baibo kwamucafwa kushiba kwaamba ayi bantu baanji balyaamba ayi balapaila Lesa, balaiisha akucita shintu Lesa nshaapatite. (2 Bene Kolinto 6:17) Nceceeco Yehova ncaatulwiitila ayi tuswe mubupailishi bwakubeca, “Babiloni munene.” (Ciyubululo 18:2, 4) Ino mwebo mulaakucita buyani? Uli woonse wandiswe alyeelete kulisalila cakucita, alimwi tulyeelete kuliipusha ayi, ‘Sa ndisuni kulambila Lesa munshila njaasuminisha, na ndisuni kutolelela kupaila nkondakashibila?’

² Na mwakaswa kale mubupailishi bwakubeca, nkokwaamba ayi mwakacita kabotu. Nacibi boobo mpashi mukati kamoyo wanu muli micito imwi na milawo yaku bupailishi bwakubeca njomucisuni. Ano atubandike micito amilawo imwi payeeyo akubona ncociyandikila kwiibona mbuli Yehova mbwaibona.

3. (a) Ino nceebonshi inga caba ciyumu kubamwi kucileka kusebensesha shikoshanyo pakupaila? (b) Ino Baibo ilatwaambila nshi pamakani akusebensesha shibumbwabumbwa ndyetutoolambila Lesa?

³ Bantu bamwi bakalinga kusebensesha shikoshanyo na shibumbwa pakupaila mumaanda abo na mushoonde kwa myaaka iinji. Na amwebo mbomwakalinga kucita, mpashi inga caba ceensu na ciyumu kupaila kwakubula shintu isho. Sombi amwiibaluke kwaamba ayi Yehova ngootwiisha mbotweelete kumulambila. Alimwi Baibo ilatwaambila patuba ayi Yehova taasuminishi  kusebensesha shibumbwabumbwa ndyetutoomulambila.—Amubelenge Kulonga 20:4, 5; Kulumbaisha 115:4-8; Isaya 42:8; 1 Joni 5:21.

4. (a) Ino nceebonshi tatweelete kupaila mishimu? (b) Ino nceebonshi Yehova ncaakakashila bantu bakwe kweelesha kwaamba abafu?

⁴ Bantu bamwi balacita shiinji kwaamba ayi basangalashe mishimu yabaabo bakafwa. Mpashi akupaila baabo bakafwa. Ano twakeeya ayi bafu inga tabatucafwiiwo nabi kutupensha. Tabatoleleli kuba abuumi kumusena kumwi sobwe. Alimwi ncibiibi kunokweelesha kubandika abantu bakafwa kale, mukwiinga maswi eenga anyumfwika anga aswa kuli shikamukowa wesu wakafwa kale, alaswa kubashikaswa. Nceceeco Yehova ncaakakashila bene Isilaeli ayi tabeelete kweelesha kwaamba abafu na kupaila mishimu.—Dutolonomi 18:10-12; amubone Makani Aamwi 26 a 31.

5. Ino nciinshi ceenga camucafwa kucileka kusebensesha shikoshanyo ndyemutopaila Lesa akucileka kupaila mishimu?

⁵ Ino nciinshi ceenga camucafwa kucileka kusebensesha shikoshanyo na kupaila mishimu? Mulyeelete kubelenga Baibo akuyeeya Yehova mbwaashibona shintu isho. Alashibona kuba shintu “shilensha bunya.” (Dutolonomi 27:15) Amupaile kuli Yehova bushiku abushiku kwaamba ayi amucaafwe kubona shintu mbuli mbwaashibona akumulambila munshila njaasuni. (Isaya 55:9) Inga mwashooma kwaamba ayi Yehova alaakumucafwa kucileka kucita cili coonse cikumite bupailishi bwakubeca.

6. Ino nceebonshi ncobakasalila December 25 kuba bushiku bwakusekelela kushalwa kwakwe Yesu?

⁶ Bantu baanji pacishi ca panshi balasekelela Kilisimasi, alimwi baanji balayeeya ayi uku nkusekelela kushalwa kwakwe Yesu. Nacibi boobo, Kilisimasi yakaswa kubupailishi bwakubeca. Libuku limwi lyakaamba ayi bene Loma batapaili Lesa bakalinga kusekelela kushalwa kwa  lisuba pabushiku bwa December 25. Bamatanjilili bama Ceeci bakalinga kusuni ayi bantu aba batapaili Lesa babe Beneklistu, aboobo nabi kwaamba ayi Yesu taakwe kushalwa pa 25 December, bakasala kusekelela kushalwa kwakwe Yesu pabushiku ubu. (Luka 2:8-12) Bashikwiiya bakwe Yesu tabakalinga kusekelela Kilisimasi. Libuku limwi lyakaamba ayi ndipakeenda myaaka 200 kuswa ciindi Yesu ndyaakashalwa, “taakuwo muntu nabibo womwi wakalinga kucishi bushiku bwiine bwiine Yesu ndyaakashalwa.” (Sacred Origins of Profound Things) Kusekelela Kilisimasi kwakatalika ndipakeenda myaaka iinji kuswa ciindi Yesu ndyaakalinga pacishi ca panshi.

7. Ino nceebonshi Beneklistu bancine ncobatasekeleli Kilisimasi?

⁷ Bantu baanji balishi ayi Kilisimasi amilawo yanjiyo, mbuli kusekelela akupaana shipo, shakaswa kubantu batakalinga kupaila Lesa. Kucakubonenaako, kuEngland ambasu shimwi sha kuAmerica, kwakalinga ciindi kusekelela Kilisimasi ndyekwakakashikwa ceebo cakwaamba ayi kwakaswa kubantu batapaili Lesa. Uli woonse ngobakacana kaasekelela bakalinga kumwaanisha. Ono mukuya kwaciindi bantu bakatalika alimwi kusekelela Kilisimasi. Ino nceebonshi Beneklistu bancine ncobatasekeleli Kilisimasi? Mukwiinga balisuni kusangalasha Lesa mushintu shoonse nshobacita.

8, 9. Ino nceebonshi Beneklistu bakutaanguna ncobatakalinga kusekelela bushiku bwakushalwa?

⁸ Cintu cimwi bantu ncobasuni kusekelela mbushiku bwakushalwa. Sa Beneklistu balyeelete kusekelela bushiku bwakushalwa? Bantu bakasekelela bushiku bwabo bwakushalwa baambwa mu Baibo mbaabo batakalinga kulambila Yehova. (Matalikilo 40:20; Maako 6:21) Kusekelela bushiku  bwakushalwa kwakalinga kusebenseshekwa kulemeka balesa bakubeca. Nceceeco Beneklistu bakutaanguna “bakalinga kushoma ayi kusekelela bushiku bwakushalwa cakalinga cilabo ca bantu batakalinga kupaila Lesa.”—The World Book Encyclopedia.

⁹ Bene Loma aba Giliki bakale kale bakalinga kushoma ayi na muntu washalwa kwakalinga kusa mushimu, alimwi mushimu uyo wakalinga kumushitilisha mubuumi bwakwe boonse. Libuku litwa ayi The Lore of Birthdays lyakaamba ayi; “Mushimu uyu wakalinga kunyumfwana a lesa uyo wakashalwa pabushiku bweenka bulya muntu uyo mbwaakashalwa.”

10. Ino nceebonshi Beneklistu ncobateelete kusekelela inshiku shakushalwa?

¹⁰ Sa Yehova inga wasuminisha kusekelela kwakaswa kubupailishi bwakubeca? (Isaya 65:11, 12) Sobwe napaceyi. Nceceeco ncotutasekeleli inshiku shakushalwa na kusekelela kuli koonse kukumite bupailishi bwakubeca.

11. Ino nciinshi bantu bamwi ncobasekelela nshiku shimwi? Ino nciinshi ncotweelete kubikilaako maano?

¹¹ Bantu bamwi balicishi ayi kusekelela Kilisimasi amaholide amwi shakaswa kubantu batapaili Lesa, sombi balatolelela kusekelela. Balayeeya ayi kusekelela uku kulabapa coolwe cakuba pomwi amukwashi wabo. Sa amwebo mbomuyeeya? Cilibo kabotu kusuna kuba pomwi amukwashi wanu. Yehova ngowakalenga mukwashi alimwi alisuni ayi tunoonyumfwana mumukwashi. (Bene Efeso 3:14, 15) Nacibi boobo, tulyeelete kubikila maano kukuba abushicibusa bubotu a Yehova muciindi cakusangalasha beshikamukowa kwiinda mukukonkela kusekelela kwakaswa kubupailishi bwakubeca. Nceceeco mutumwi Paulo ncaakaambila ayi: “Lyoonse kamutaanguna kushinisha na ncomutoocita cilasangalasha ku Mwaami.”—Bene Efeso 5:10.

12. Ino nciinshi ceenga calengesha ayi maholide atasangalashi Yehova?

 ¹² Bantu bamwi balabona ayi kwakaswa maholide takucite mulandu, ono Yehova teshi mbwaabona ubo. Taasangalaliwo amaholide akaswa kubupailishi bwakubeca nabi maholide alumbaisha bantu bamwi na shitondesho sha cishi. Kucakubonenaako, bene Ijipiti bakalinga kucite shakusekelela shiinji shakulumbaisha balesa babo bakubeca. Bene Isilaeli ndibakaswa mucishi ca Ijipiti, bakeeya kusekelela kumwi kwa bene Ijipiti batakalinga kupaila Lesa akukwiita ayi “kusekelela kwakwe Yehova.” Ono Yehova wakabaanisha ceebo cakucita boobo. (Kulonga 32:2-10) Bweenka mbuli mushinshimi Isaya mbwakaamba, tatweelete kucata “cintu citasalalite!”—Amubelenge Isaya 52:11.

13. Ino njimiipusho nshi njeenga mwabaayo na mwasala kucileka kusekelela maholide?

¹³ Na mwasala kucileka kusekelela maholide, mpashi inga mwaba amiipusho iinji mbuli: Ino inga ndacita buyani na mbonsebensaabo banjiipusha ncontasekeleli Kilisimasi? Ino inga ndacita buyani na umwi wampa cipo ca Kilisimasi? Ino inga ndacita buyani na beebangu nabi bakaangu balisuni ayi noosekelela holide? Ino bana bangu inga ndabacafwa buyani kwaamba ayi batanoolinyumfwa anga batokwiindwa ceebo cakutasekelela holide na bushiku bwakushalwa?

14, 15. Ino inga mwacita buyani na muntu wamwaansha kweelana aholide imwi na kumupa cipo?

¹⁴ Mubukaalo buli boonse tulyeelete kushiba kabotu shakucita abwakukumbula. Kucakubonenaako, na muntu wamwaansha kweelana aholide imwi, tamweelete kumusuula. Mpashi inga mwakumbula ayi, “Twalumba.” Ano na muntu alisuni kushiba shiinji, inga mwamusansulwita ncomutasekeleli holide iyo. Nacibi boobo, lyoonse mulyeelete  kusebensesha maswi abotu, kuyeyelaako bamwi, akwaamba cabulemu. Baibo ilaamba ayi: “Ciindi coonse myaambo yanu ibe ya luse iyaka bamwi alimwi mulyeelete kushiba bwakukumbula kabotu muntu uli woonse.” (Bene Kolose 4:6) Mpashi inga mwasansulula ayi amwebo mulakondwa kuba pomwi abamwi akupa shipo, sombi mulasala kutacita boobo pabushiku bwa maholide.

¹⁵ Ino inga mwacita buyani na muntu wamupa cipo? Baibo taitupi mulongo wa milawo njotweelete kukonkela, sombi ilatwaambila ayi tulyeelete kuba anjeelacaamba ibotu. (1 Timoti 1:18, 19) Mpashi muntu wamupa cipo taacishiwo ayi tamusekeleli holide iyo. Na mpashi inga waamba ayi, “Ndicishi ayi toosekeleli holide, sombi ndisunibo kukupa cipo ici.” Na caba boobo, cili kuli ndimwe kusala kucitambula na sobwe. Ono cili coonse nceshi musale, cilyeelete kumushiya anjeelacaamba isalalite. Tatusuniwo kucita cili coonse ceenga canyonyoola bushicibusa bwesu a Yehova.

16. Ino inga mwacita buyani na bamumukwashi wanu balisuni kusekelela holide?

¹⁶ Ino inga mwacita buyani na bamumukwashi wanu balisuni kusekelela holide? Tamweelete kupikishanya ambabo. Amwiibaluke kwaamba ayi balicite nkusu shakulisalila beene. Amwaambe abo kabotu akulemeka nshobasala bweenka mbomusuni ayi balemeke kusala kwanu. (Amubelenge Mateyo 7:12.) Ano ino inga mwacita buyani na bamumukwashi wanu balisuni ayi musekelele pomwi ciindi ca holide? Kamutana kusala nceshi mucite amupaile kuli Yehova kwaamba ayi amucaafwe kusala kabotu. Amuyeeyewo kabotu akulangoola makani aamwi. Mutalubi kwaamba ayi mulyeelete kusangalasha Yehova mushintu shili shoonse nshemutoocita.

17. Ino inga mwacita buyani kwaamba ayi bana banu batanoolinyumfwa anga batokwiindwa bamwi ndyebatosekelela maholide?

 ¹⁷ Ino inga mwacita buyani na bana banu batookumbwa na babona bamwi kabasekelela maholide? Inga cabota na ciindi aciindi kamubaako akusekelela kulibetele. Cimwi ciindi inga mwaboolilako shipo nshobatalinga kulangila. Alimwi cipo cibotu kwiindaawo nceenga mwapa bana banu nkucana ciindi cakuba pomwi ambabo akubasuna.

18. Ino nceebonshi tulyeelete kucanika kumabungano?

¹⁸ Kwaamba ayi tusangalashe Yehova, tulyeelete kushiya milawo amaholide akumite bupailishi bwakubeca. Nacibi boobo tulyeelete kupaila Lesa kweelana ambwaasuni. Munshila nshi? Nshila yomwi nkwiinda mukucanika kumabungano a Bwineklistu lyoonse. (Amubelenge Bene Ebulu 10:24, 25.) Mabungano ndubasu luyandika abuumbi mukupaila kwancine. (Kulumbaisha 22:22; 122:1) Kubungana pomwi kulatupa coolwe cakuyuminishanya.—Bene Loma 1:12.

19. Ino nceebonshi ncociyandikila kulwiitaako bamwi cancine camu Baibo ncomweeya?

¹⁹ Cintu cimwi nceenga mwaciita kwaamba ayi munopaila Lesa kweelana ambwaasuni, nkulwiitako bamwi nshemutokwiiya kuswa mu Baibo. Bantu baanji balipengete mumyoyo ceebo ca shintu shibiibi shitoocitika pacishi ca panshi. Mpashi kuli bamwi mbomushiiko balinyumfwa boobo. Inga mwabalwiitaako sha bulindilishi bubotu mbomucite bwa buumi bubotu kunembo. Kucanika kumabungano akulwiitaako bamwi cancine camu Baibo, kulaakumucafwa kukaka cakumaninina kuba kulubasu lwa bupailishi bwakubeca amilawo ya mbubo. Na mwasebensa cankusu kupaila Lesa munshila njaasuminisha, mulaakucana lusangalalo lwancinencine alimwi Yehova alaakumupa shoolwe shiinji.—Malaki 3:10.