ບົດທີ 16
ເລືອກນະມັດສະການພະເຈົ້າໃນແບບທີ່ພະອົງຍອມຮັບ
1, 2. ເຈົ້າຕ້ອງຖາມຕົວເອງແນວໃດ? ແລະເປັນຫຍັງຈຶ່ງຖາມແບບນັ້ນ?
ເມື່ອຮຽນຄຳພີໄບເບິນ ເຈົ້າໄດ້ຮູ້ວ່າມີຫຼາຍຄົນທີ່ອ້າງວ່ານະມັດສະການພະເຈົ້າ ແຕ່ແທ້ໆແລ້ວພັດສອນແລະເຮັດສິ່ງທີ່ພະເຈົ້າກຽດຊັງ. (2 ໂກຣິນໂທ 6:17) ນີ້ເປັນເຫດຜົນທີ່ພະເຢໂຫວາສັ່ງເຮົາໃຫ້ອອກຈາກສາສະໜາປອມຫຼືທີ່ຄຳພີໄບເບິນເອີ້ນວ່າ “ບາບີໂລນໃຫຍ່.” (ພະນິມິດ 18:2, 4) ເຈົ້າເດຈະເຮັດແນວໃດ? ເຮົາແຕ່ລະຄົນຕ້ອງໄດ້ເລືອກ ແລະຕ້ອງຖາມຕົວເອງວ່າ ‘ຂ້ອຍຢາກນະມັດສະການພະເຈົ້າໃນແບບທີ່ພະອົງຍອມຮັບຫຼືໃນແບບທີ່ຂ້ອຍມັກ?’
2 ຖ້າເຈົ້າເຊົາຫຍຸ້ງກ່ຽວຫຼືລາອອກຈາກສາສະໜາປອມ ເຈົ້າກໍເຮັດດີແລ້ວ. ແຕ່ເລິກໆໃນໃຈຂອງເຈົ້າອາດຍັງມັກກິດຈະກຳຫຼືປະເພນີບາງຢ່າງທີ່ມີຕົ້ນຕໍມາຈາກສາສະໜາປອມບໍ? ໃຫ້ເຮົາມາເບິ່ງວ່າມີກິດຈະກຳຫຼືປະເພນີຫຍັງແດ່ທີ່ຜູ້ຄົນມັກເຮັດ ແລະເປັນຫຍັງຈຶ່ງສຳຄັນທີ່ເຈົ້າຈະເບິ່ງເລື່ອງນີ້ຄືກັບທີ່ພະເຢໂຫວາເບິ່ງ.
ການຂາບໄຫວ້ຮູບບູຊາແລະບັນພະບຸລຸດ
3. (ກ) ເປັນຫຍັງບາງຄົນຮູ້ສຶກວ່າຍາກຖ້າຈະເຊົາໃຊ້ຮູບບູຊາໃນການນະມັດສະການ? (ຂ) ຄຳພີໄບເບິນບອກແນວໃດກ່ຽວກັບການໃຊ້ຮູບບູຊາໃນການນະມັດສະການພະເຈົ້າ?
3 ບາງຄົນມີຮູບບູຊາຫຼືຮ້ານພະໃນເຮືອນເພື່ອສວດມົນແລະບູຊາມາຫຼາຍປີ. ແລ້ວເຈົ້າເດ ເຈົ້າຍັງມີຮູບບູຊາຫຼືຮ້ານພະຢູ່ໃນເຮືອນບໍ? ເຈົ້າອາດຮູ້ສຶກຜິດຫຼືບໍ່ສະບາຍໃຈຖ້າຈະເຊົາໃຊ້ສິ່ງເຫຼົ່ານີ້. ແຕ່ຂໍໃຫ້ຈື່ໄວ້ວ່າພະເຢໂຫວາເປັນຜູ້ບອກເຮົາວ່າຈະນະມັດສະການພະອົງແນວໃດ ແລະຄຳພີໄບເບິນກໍບອກຢ່າງຈະແຈ້ງວ່າພະເຢໂຫວາຫ້າມໃຊ້ຮູບບູຊາໃນການນະມັດສະການພະອົງ.—ອ່ານອົບພະຍົບ 20:4, 5; ຄຳເພງ 115:4-8; ເອຊາອີ 42:8; 1 ໂຢຮັນ 5:21
4. (ກ) ເປັນຫຍັງເຮົາບໍ່ຄວນຂາບໄຫວ້ບູຊາບັນພະບຸລຸດ? (ຂ) ເປັນຫຍັງພະເຢໂຫວາຫ້າມປະຊາຊົນຂອງພະອົງບໍ່ໃຫ້ຕິດຕໍ່ເວົ້າລົມກັບຄົນຕາຍ?
4 ບາງຄົນອາດທຸ່ມເທກຳລັງ ເວລາ ແລະເງິນຄຳເພື່ອເຮັດຫຼາຍຢ່າງໃຫ້ບັນພະບຸລຸດທີ່ຕາຍໄປແລ້ວພໍໃຈຫຼືເຖິງຂັ້ນບູຊາພວກເຂົາ. ແຕ່ເຮົາໄດ້ຮຽນແລ້ວວ່າຄົນຕາຍຊ່ວຍເຫຼືອຫຼືທຳຮ້າຍເຮົາບໍ່ໄດ້ ເພາະວ່າເມື່ອພວກເຂົາຕາຍກໍບໍ່ມີວິນຍານຫຼືສິ່ງໃດເຫຼືອຢູ່. ທີ່ຈິງ ການພະຍາຍາມຕິດຕໍ່ເວົ້າລົມກັບຄົນຕາຍຜ່ານທາງໝໍຜີເປັນອັນຕະລາຍຫຼາຍ ເຮົາອາດຄິດວ່າເຮົາກຳລັງເວົ້າລົມກັບຄົນຕາຍ ແຕ່ແທ້ໆແລ້ວເຮົາກຳລັງຕິດຕໍ່ກັບພວກປີສາດ. ພະເຢໂຫວາຈຶ່ງຫ້າມຊາວອິດສະຣາເອນບໍ່ໃຫ້ຕິດຕໍ່ເວົ້າລົມກັບຄົນຕາຍ ຫຼືເຂົ້າໄປກ່ຽວຂ້ອງກັບພວກປີສາດບໍ່ວ່າຈະໂດຍທາງໃດກໍຕາມ.—ພະບັນຍັດ 18:10-12; ເບິ່ງຄຳອະທິບາຍເພີ່ມເຕີມ 26 ແລະ 31
5. ສິ່ງໃດຈະຊ່ວຍເຈົ້າໃຫ້ເຊົາຂາບໄຫວ້ຮູບບູຊາແລະບັນພະບຸລຸດ?
5 ສິ່ງໃດຈະຊ່ວຍເຈົ້າໃຫ້ເຊົາຂາບໄຫວ້ຮູບບູຊາແລະບັນພະບຸລຸດ? ເຈົ້າຕ້ອງອ່ານຄຳພີໄບເບິນແລະຄິດດີໆວ່າພະເຢໂຫວາເບິ່ງເລື່ອງເຫຼົ່ານີ້ແນວໃດ. ຄຳພີໄບເບິນບອກວ່າ ພະອົງ “ໜ່າຍແໜງ” ແລະຂີ້ດຽດສິ່ງເຫຼົ່ານີ້. (ພະບັນຍັດ 27:15) ດັ່ງນັ້ນ ໃຫ້ເຈົ້າອະທິດຖານເຖິງພະເຢໂຫວາທຸກໆມື້ເພື່ອຂໍພະອົງຊ່ວຍເຈົ້າໃຫ້ເບິ່ງເລື່ອງຕ່າງໆໃນແບບທີ່ພະອົງເບິ່ງ ແລະຊ່ວຍເຈົ້າໃຫ້ນະມັດສະການພະອົງໃນແບບທີ່ພະອົງຍອມຮັບ. (ເອຊາອີ 55:9) ຖ້າເຈົ້າເຮັດແບບນີ້ ເຈົ້າກໍໝັ້ນໃຈໄດ້ວ່າພະເຢໂຫວາຈະໃຫ້ເຈົ້າມີກຳລັງທີ່ຈະກຳຈັດທຸກສິ່ງທີ່ກ່ຽວຂ້ອງກັບສາສະໜາປອມ.
ເຮົາຄວນສະຫຼອງຄລິດສະມາດຫຼືເທດສະການຕ່າງໆບໍ?
6. (ກ) ເປັນຫຍັງຈຶ່ງມີການເລືອກວັນທີ 25 ທັນວາໃຫ້ເປັນມື້ສະຫຼອງວັນເກີດຂອງພະເຢຊູ? (ຂ) ເປັນຫຍັງຄລິດສະຕຽນແທ້ບໍ່ສະຫຼອງຄລິດສະມາດ?
6 ຄລິດສະມາດເປັນເທດສະການໜຶ່ງທີ່ຜູ້ຄົນນິຍົມສະຫຼອງຢູ່ທົ່ວໂລກ ຄົນສ່ວນຫຼາຍຄິດວ່າຄລິດສະມາດເປັນການສະຫຼອງວັນເກີດຂອງພະເຢຊູ. ແຕ່ແທ້ໆແລ້ວຄລິດສະມາດກ່ຽວຂ້ອງກັບການນະມັດສະການປອມ. ສາລານຸກົມຫົວໜຶ່ງອະທິບາຍວ່າ ວັນທີ 25 ທັນວາເປັນມື້ທີ່ຄົນໂຣມເຊິ່ງບໍ່ໄດ້ເປັນຄລິດສະຕຽນສະຫຼອງວັນເກີດຂອງເທບພະເຈົ້າແຫ່ງດວງຕາເວັນ ແຕ່ພວກຜູ້ນຳຂອງຄລິດຕະຈັກຢາກໃຫ້ຄົນໂຣມເຂົ້າມາເປັນຄລິດສະຕຽນຫຼາຍຂຶ້ນ ພວກເຂົາຈຶ່ງຕັດສິນໃຈເອົາວັນທີ 25 ທັນວາເປັນມື້ສະຫຼອງວັນເກີດຂອງພະເຢຊູທັງໆທີ່ເພິ່ນບໍ່ໄດ້ເກີດໃນມື້ນັ້ນ. (ລູກາ 2:8-12) ລູກສິດຂອງພະເຢຊູບໍ່ເຄີຍສະຫຼອງຄລິດສະມາດເລີຍ. ປຶ້ມອ້າງອີງຫົວໜຶ່ງຊື່ຕົ້ນກຳເນີດອັນສັກສິດຂອງສິ່ງທີ່ເລິກເຊິ່ງ (Sacred Origins of Profound Things) ບອກວ່າຕັ້ງແຕ່ພະເຢຊູເກີດຈົນຜ່ານໄປ 200 ປີກໍ “ບໍ່ມີໃຜຮູ້ວ່າພະເຢຊູເກີດມື້ໃດແທ້ໆ ແລະຄົນສ່ວນຫຼາຍກໍບໍ່ໄດ້ສົນໃຈເລື່ອງນີ້.” ທີ່ຈິງແລ້ວເລີ່ມມີການສະຫຼອງຄລິດສະມາດຫຼັງຈາກພະເຢຊູຕາຍໄປແລ້ວຫຼາຍກວ່າ 300 ປີ. ເປັນຫຍັງຄລິດສະຕຽນແທ້ບໍ່ສະຫຼອງຄລິດສະມາດ? ຍ້ອນພວກເຂົາຢາກເຮັດທຸກສິ່ງທີ່ເຮັດໃຫ້ພະເຈົ້າພໍໃຈ.
7. ເຮົາຈະຮູ້ໄດ້ແນວໃດວ່າເທດສະການໃດທີ່ເຮົາບໍ່ຄວນເຂົ້າໄປກ່ຽວຂ້ອງ?
7 ນອກຈາກຄລິດສະມາດແລ້ວຍັງມີອີກຫຼາຍເທດສະການທີ່ຄລິດສະຕຽນບໍ່ຄວນສະຫຼອງ. ແຕ່ເຮົາຈະຮູ້ໄດ້ແນວໃດວ່າເທດສະການໃດທີ່ເຮົາບໍ່ຄວນເຂົ້າໄປກ່ຽວຂ້ອງ? ຄລິດສະຕຽນຈະບໍ່ເຂົ້າຮ່ວມກັບເທດສະການທີ່ມີຕົ້ນຕໍມາຈາກສາສະໜາປອມ ເທດສະການທີ່ກ່ຽວຂ້ອງກັບການຖືໂຊກລາງຫຼືໂຫລາສາດ. ດັ່ງນັ້ນ ເຮົາຕ້ອງເບິ່ງວ່າເທດສະການຕ່າງໆມີຕົ້ນຕໍມາຈາກໃສ ເຊັ່ນ: ເທດສະການສົງການ ສະຫຼອງປີໃໝ່ ຮາລາວີນ ລອຍກະທົງ. ຖ້າເຮົາຢາກເຮັດໃຫ້ພະເຢໂຫວາພໍໃຈ ເຮົາຕ້ອງບໍ່ເຂົ້າໄປກ່ຽວຂ້ອງກັບການສະຫຼອງເທດສະການທີ່ມີຕົ້ນຕໍມາຈາກສາສະໜາປອມ.
ເຮົາຄວນສະຫຼອງວັນເກີດບໍ?
8, 9. ເປັນຫຍັງຄລິດສະຕຽນລຸ້ນທຳອິດບໍ່ສະຫຼອງວັນເກີດ?
8 ການສະຫຼອງອີກແບບໜຶ່ງທີ່ຜູ້ຄົນມັກກໍຄືການສະຫຼອງວັນເກີດ. ຄລິດສະຕຽນຄວນສະຫຼອງວັນເກີດບໍ? ໃນຄຳພີໄບເບິນເວົ້າເຖິງການສະຫຼອງວັນເກີດຄືກັນ ແຕ່ເປັນວັນເກີດຂອງຄົນທີ່ບໍ່ໄດ້ນະມັດສະການພະເຢໂຫວາ. (ຕົ້ນເດີມ 40:20; ມາຣະໂກ 6:21) ໃນສະໄໝກ່ອນ ມີການສະຫຼອງວັນເກີດເພື່ອຍົກຍ້ອງໃຫ້ກຽດພະປອມ. ຄລິດສະຕຽນລຸ້ນທຳອິດບໍ່ສະຫຼອງວັນເກີດກໍຍ້ອນວ່າ “ການສະຫຼອງວັນເກີດເປັນທຳນຽມຂອງຄົນທີ່ບໍ່ແມ່ນຄລິດສະຕຽນ.”—ສາລານຸກົມ ເດິ ເວີນ ບຸກ ເອັນຊາຍໂຄພິເດຍ
9 ໃນສະໄໝບູຮານ ຄົນກຣີກແລະຄົນໂຣມທີ່ບໍ່ແມ່ນຄລິດສະຕຽນເຊື່ອວ່າມະນຸດແຕ່ລະຄົນທີ່ເກີດມາຈະມີວິນຍານເຝົ້າປົກປ້ອງເບິ່ງແຍງ. ວັນເກີດຂອງແຕ່ລະຄົນກ່ຽວຂ້ອງກັບວັນເກີດຂອງເທບພະເຈົ້າ ພວກເຂົາເຊື່ອວ່າຖ້າສະຫຼອງວັນເກີດພວກເຂົາຈະໄດ້ຮັບການປົກປ້ອງຄຸ້ມຄອງຕະຫຼອດຊີວິດ. ຫຼາຍຄົນໃນທຸກມື້ນີ້ກໍຄືກັນ ພວກເຂົາເຊື່ອວ່າທຸກຄົນທີ່ເກີດມາຈະມີພະປະຈຳວັນເກີດ.
10. ເປັນຫຍັງຄລິດສະຕຽນແທ້ໃນທຸກມື້ນີ້ບໍ່ສະຫຼອງວັນເກີດ?
10 ເຈົ້າຄິດວ່າພະເຢໂຫວາຍອມຮັບການສະຫຼອງທີ່ກ່ຽວຂ້ອງກັບສາສະໜາປອມບໍ? (ເອຊາອີ 65:11, 12) ພະອົງບໍ່ຍອມຮັບແນ່ນອນ. ດັ່ງນັ້ນ ເຮົາຈຶ່ງບໍ່ຄວນສະຫຼອງວັນເກີດ ບຸນແລະວັນພັກຕ່າງໆທີ່ກ່ຽວຂ້ອງກັບສາສະໜາປອມ.
ຕົ້ນຕໍຂອງການສະຫຼອງເປັນເລື່ອງສຳຄັນແທ້ໆບໍ?
11. ເປັນຫຍັງບາງຄົນຈຶ່ງສະຫຼອງເທດສະການຕ່າງໆ? ແຕ່ອັນໃດເປັນສິ່ງສຳຄັນທີ່ສຸດທີ່ເຈົ້າຄວນຄິດເຖິງ?
11 ບາງຄົນຮູ້ວ່າທີ່ມາຂອງຄລິດສະມາດ ບຸນແລະວັນພັກຕ່າງໆມາຈາກສາສະໜາປອມ ແຕ່ພວກເຂົາກໍຍັງສະຫຼອງເທດສະການເຫຼົ່ານັ້ນຢູ່. ພວກເຂົາຖືວ່າບຸນຫຼືວັນພັກເຫຼົ່ານັ້ນເປັນໂອກາດດີທີ່ຄອບຄົວຈະໄດ້ຢູ່ນຳກັນ. ເຈົ້າຄິດແບບນັ້ນຄືກັນບໍ? ແທ້ໆແລ້ວການພົບປະສັງສັນກັບຄົນໃນຄອບຄົວບໍ່ຜິດ ພະເຢໂຫວາເປັນຜູ້ສ້າງຄອບຄົວຂຶ້ນມາ ພະອົງຢາກໃຫ້ເຮົາມີສາຍສຳພັນທີ່ດີກັບຄົນໃນຄອບຄົວ. (ເອເຟໂຊ 3:14, 15) ແຕ່ເຮົາຕ້ອງຄິດເຖິງສາຍສຳພັນຂອງເຮົາກັບພະເຢໂຫວາກ່ອນສິ່ງອື່ນ ບໍ່ແມ່ນຢາກເອົາໃຈຍາດພີ່ນ້ອງ ແລ້ວໄປຮ່ວມກັບພວກເຂົາເພື່ອສະຫຼອງບຸນແລະວັນພັກຕ່າງໆທີ່ມີຕົ້ນຕໍມາຈາກສາສະໜາປອມ. ນີ້ເປັນເຫດຜົນທີ່ອັກຄະສາວົກໂປໂລບອກເຮົາໃຫ້ “ກວດເບິ່ງໃຫ້ແນ່ໃຈຢູ່ສະເໝີວ່າສິ່ງໃດທີ່ຜູ້ເປັນນາຍພໍໃຈ.”—ເອເຟໂຊ 5:10
12. ພະເຢໂຫວາບໍ່ເຫັນດີກັບການສະຫຼອງບຸນແລະວັນພັກແບບໃດ?
12 ຫຼາຍຄົນຄິດວ່າເທດສະການ ບຸນແລະວັນພັກຕ່າງໆຈະມີຕົ້ນຕໍມາຈາກໃສກໍບໍ່ສຳຄັນ. ແຕ່ພະເຢໂຫວາບໍ່ໄດ້ຄິດແບບນັ້ນ ພະອົງບໍ່ເຫັນດີກັບການສະຫຼອງບຸນແລະວັນພັກຕ່າງໆທີ່ເປັນການຍົກຍ້ອງມະນຸດ ເຊີດຊູປະເທດຊາດ ຫຼືມີຕົ້ນຕໍມາຈາກສາສະໜາປອມ. ຕົວຢ່າງເຊັ່ນ: ຫຼັງຈາກທີ່ຊາວອິດສະຣາເອນອອກຈາກເອຢິບ ພວກເຂົາຮຽນແບບການສະຫຼອງຢ່າງໜຶ່ງຂອງຊາວເອຢິບເຊິ່ງເປັນການສະຫຼອງທີ່ກ່ຽວຂ້ອງກັບພະປອມ ພວກເຂົາເອີ້ນການສະຫຼອງນັ້ນວ່າ “ເທສະການລ້ຽງກັນແກ່ພະເຢໂຫວາ.” ແຕ່ພະເຢໂຫວາບໍ່ຍອມຮັບການສະຫຼອງນີ້ແລະລົງໂທດພວກເຂົາ. (ອົບພະຍົບ 32:2-10) ຜູ້ພະຍາກອນເອຊາຢາບອກເຮົາວ່າ “ຢ່າຊູ່ບາຍສິ່ງຂອງອັນຖ່ອຍຮ້າຍ.”—ອ່ານເອຊາອີ 52:11
ເວົ້າດີໆຕອນອະທິບາຍເຫດຜົນ
13. ເມື່ອຕັດສິນໃຈເຊົາສະຫຼອງວັນເກີດແລະເທດສະການຕ່າງໆເຈົ້າອາດກັງວົນເລື່ອງຫຍັງແດ່?
13 ເມື່ອເຈົ້າຕັດສິນໃຈວ່າຈະເຊົາສະຫຼອງວັນເກີດແລະເທດສະການຕ່າງໆ ເຈົ້າອາດກັງວົນວ່າ ຂ້ອຍຈະເຮັດແນວໃດຖ້າໝູ່ຖາມວ່າເປັນຫຍັງຈຶ່ງບໍ່ໄປງານວັນເກີດ? ຂ້ອຍຈະເຮັດແນວໃດຖ້າໝູ່ໃຫ້ຂອງຂວັນວັນເກີດ? ຂ້ອຍຈະເຮັດແນວໃດຖ້າຄູ່ຂອງຂ້ອຍຢາກໃຫ້ໄປສະຫຼອງເທດສະການຕ່າງໆນຳກັນ? ຂ້ອຍຈະເຮັດແນວໃດເພື່ອບໍ່ໃຫ້ລູກເສຍໃຈທີ່ບໍ່ຈັດງານວັນເກີດໃຫ້ພວກເຂົາ?
14, 15. ຖ້າມີຄົນເວົ້າອວຍພອນຫຼືໃຫ້ຂອງຂວັນເຈົ້າໃນໄລຍະເທດສະການ ເຈົ້າຈະເຮັດແນວໃດ?
14 ເປັນເລື່ອງສຳຄັນທີ່ເຈົ້າຕ້ອງໃຊ້ໄຫວພິບວ່າຄວນຕອບແນວໃດໃນແຕ່ລະສະຖານະການ. ຕົວຢ່າງເຊັ່ນ: ຖ້າມີຄົນເວົ້າກັບເຈົ້າວ່າ “ສະບາຍດີປີໃໝ່” ຫຼື “ສຸກສັນວັນເກີດ.” ເຈົ້າຂອບໃຈລາວໄດ້ ບໍ່ຕ້ອງເຮັດເສີຍໆແບບບໍ່ຮູ້ບໍ່ເຫັນຫຼືຍ່າງໜີ. ແຕ່ຖ້າມີຄົນຢາກຮູ້ຫຼາຍຂຶ້ນວ່າເປັນຫຍັງເຈົ້າບໍ່ສະຫຼອງເທດສະການເຫຼົ່ານັ້ນ ເຈົ້າກໍອະທິບາຍໃຫ້ລາວຟັງໄດ້. ແຕ່ບໍ່ວ່າຈະເວົ້າແນວໃດ ຂໍໃຫ້ເຈົ້າເວົ້າກັບລາວດີໆ ໃຊ້ໄຫວພິບ ແລະສະແດງຄວາມນັບຖື. ຄຳພີໄບເບິນບອກວ່າ: “ໃຫ້ຄຳເວົ້າຂອງພວກເຈົ້າເປັນຄຳເວົ້າທີ່ກະລຸນາສະເໝີຄືກັບອາຫານທີ່ປຸງດ້ວຍເກືອ ພວກເຈົ້າຈະໄດ້ຮູ້ວ່າຄວນຕອບແຕ່ລະຄົນແນວໃດ.” (ໂກໂລຊາຍ 4:6) ບາງເທື່ອເຈົ້າອາດບອກລາວວ່າເຈົ້າກໍມັກສັງສັນແລະມັກໃຫ້ຂອງຂວັນຄືກັນ ແຕ່ບໍ່ໄດ້ໃຫ້ໃນໄລຍະເທດສະການເທົ່ານັ້ນ.
15 ຖ້າມີຄົນໃຫ້ຂອງຂວັນເຈົ້າໃນວັນເກີດຫຼືໃນໄລຍະເທດສະການເດ ເຈົ້າຈະເຮັດແນວໃດ? ບໍ່ມີກົດຕາຍຕົວໃນເລື່ອງເຫຼົ່ານີ້ ແຕ່ຄຳພີໄບເບິນສອນວ່າຢ່າເຮັດສິ່ງທີ່ເຮັດໃຫ້ເຈົ້າຮູ້ສຶກຜິດຕໍ່ພະເຈົ້າຫຼື “ລົບກວນໃຈຮູ້ຜິດຮູ້ຖືກ” ຂອງເຈົ້າເອງ. (1 ຕີໂມທຽວ 1:18, 19) ບາງທີຄົນທີ່ໃຫ້ຂອງຂວັນອາດບໍ່ຮູ້ວ່າເຈົ້າບໍ່ສະຫຼອງເທດສະການນັ້ນ ຫຼືບາງຄົນຮູ້ວ່າເຈົ້າບໍ່ສະຫຼອງເທດສະການແຕ່ກໍຍັງຢາກໃຫ້ຂອງຂວັນເຈົ້າ. ບໍ່ວ່າຈະເປັນກໍລະນີໃດກໍຕາມເຈົ້າຕ້ອງຕັດສິນໃຈເອງວ່າຈະເອົາຫຼືບໍ່ເອົາ ແລະບໍ່ວ່າເຈົ້າຈະຕັດສິນໃຈແນວໃດ ເຈົ້າຕ້ອງໝັ້ນໃຈແທ້ໆວ່າການຕັດສິນໃຈນັ້ນຈະບໍ່ລົບກວນໃຈຮູ້ຜິດຮູ້ຖືກຂອງເຈົ້າ. ເຮົາບໍ່ຢາກເຮັດສິ່ງໃດກໍຕາມທີ່ຈະກະທົບໃສ່ສາຍສຳພັນຂອງເຮົາກັບພະເຢໂຫວາ.
ຖ້າຄອບຄົວຢາກສະຫຼອງເດ?
ຄົນທີ່ນະມັດສະການພະເຢໂຫວາມີຄວາມສຸກ
16. ເຈົ້າຈະເຮັດແນວໃດຖ້າຄອບຄົວຂອງເຈົ້າຢາກສະຫຼອງເທດສະການ?
16 ເຈົ້າຈະເຮັດແນວໃດຖ້າຄອບຄົວຂອງເຈົ້າຢາກສະຫຼອງເທດສະການ? ຢ່າຖຽງຫຼືຫ້າມພວກເຂົາ. ຍ້ອນພວກເຂົາມີສິດຕັດສິນໃຈເອງວ່າຈະເຮັດຫຍັງ? ເຈົ້າຕ້ອງເຂົ້າໃຈແລະນັບຖືການຕັດສິນໃຈຂອງພວກເຂົາຄືກັບທີ່ເຈົ້າຢາກໃຫ້ພວກເຂົານັບຖືການຕັດສິນໃຈຂອງເຈົ້າ. (ອ່ານມັດທາຍ 7:12) ແຕ່ຖ້າຄອບຄົວຢາກໃຫ້ເຈົ້າໃຊ້ເວລານຳກັນໃນໄລຍະເທດສະການເດ ເຈົ້າຈະເຮັດແນວໃດ? ກ່ອນຈະຕັດສິນໃຈ ໃຫ້ເຈົ້າອະທິດຖານເຖິງພະເຢໂຫວາເພື່ອຂໍພະອົງຊ່ວຍເຈົ້າໃຫ້ຕັດສິນໃຈໄດ້ຢ່າງຖືກຕ້ອງ. ໃຫ້ຊອກຫາຂໍ້ມູນໃນປຶ້ມຕ່າງໆຂອງອົງການແລະປຶ້ມອື່ນໆທີ່ເວົ້າເຖິງຕົ້ນຕໍຂອງການສະຫຼອງນັ້ນ ແລະລອງຄິດເບິ່ງວ່າໃນສະຖານະການນັ້ນຈະມີການເຮັດຫຍັງແດ່. ສິ່ງທີ່ສຳຄັນ ຢ່າລືມວ່າເຈົ້າຢາກໃຫ້ພະເຢໂຫວາພໍໃຈສະເໝີບໍ່ວ່າເຈົ້າຈະເຮັດຫຍັງ.
17. ເຈົ້າຈະເຮັດແນວໃດເພື່ອບໍ່ໃຫ້ລູກເສຍໃຈຫຼືອິດສາທີ່ເຫັນຄອບຄົວອື່ນສະຫຼອງເທດສະການບາງຢ່າງ?
17 ເຈົ້າຈະເຮັດແນວໃດເພື່ອບໍ່ໃຫ້ລູກເສຍໃຈຫຼືອິດສາທີ່ເຫັນຄອບຄົວອື່ນສະຫຼອງເທດສະການບາງຢ່າງ? ເຈົ້າອາດເຮັດບາງສິ່ງທີ່ພິເສດໃຫ້ລູກຫຼືໃຫ້ຂອງຂວັນໃນໂອກາດອື່ນກໍໄດ້. ຂອງຂວັນທີ່ດີທີ່ສຸດຢ່າງໜຶ່ງທີ່ເຈົ້າຈະໃຫ້ລູກໄດ້ກໍແມ່ນເວລາແລະຄວາມຮັກຂອງເຈົ້າ.
ນະມັດສະການພະເຈົ້າໃນແບບທີ່ພະອົງຍອມຮັບ
18. ເປັນຫຍັງເຮົາຄວນໄປປະຊຸມ?
18 ເພື່ອເຮັດໃຫ້ພະເຢໂຫວາພໍໃຈ ເຮົາຕ້ອງບໍ່ຫຍຸ້ງກ່ຽວກັບສາສະໜາປອມ ບໍ່ຫຍຸ້ງກ່ຽວກັບຮີດຄອງປະເພນີແລະການສະຫຼອງຕ່າງໆທີ່ກ່ຽວຂ້ອງກັບສາສະໜາປອມ. ເຮົາຕ້ອງນະມັດສະການພະເຢໂຫວາໃນແບບທີ່ພະອົງຍອມຮັບ. ແຕ່ເຮົາຈະເຮັດແບບນັ້ນໄດ້ແນວໃດ? ວິທີໜຶ່ງແມ່ນເຂົ້າຮ່ວມການປະຊຸມຂອງພະຍານພະເຢໂຫວາເປັນປະຈຳ. (ອ່ານເຮັບເຣີ 10:24, 25) ການປະຊຸມເປັນສ່ວນທີ່ສຳຄັນຫຼາຍໃນການນະມັດສະການພະເຢໂຫວາ. (ຄຳເພງ 22:22; 122:1) ຢູ່ການປະຊຸມ ເຮົາໄດ້ເຈິກັບພີ່ນ້ອງແລະເວົ້າລົມໃຫ້ກຳລັງໃຈກັນ.—ໂຣມ 1:12
19. ເປັນຫຍັງການບອກຄົນອື່ນໃຫ້ຮູ້ຄວາມຈິງໃນຄຳພີໄບເບິນຈຶ່ງສຳຄັນ?
19 ອີກວິທີໜຶ່ງທີ່ເຈົ້າຈະນະມັດສະການພະເຢໂຫວາໃນແບບທີ່ພະອົງຍອມຮັບກໍຄື ການເວົ້າກັບຄົນອື່ນໃນສິ່ງທີ່ເຈົ້າໄດ້ຮຽນຈາກຄຳພີໄບເບິນ. ຫຼາຍຄົນຮູ້ສຶກທຸກໃຈທີ່ເຫັນເລື່ອງຊົ່ວຮ້າຍຫຼາຍຢ່າງເກີດຂຶ້ນໃນໂລກ. ບາງທີເຈົ້າອາດຮູ້ຈັກຄົນທີ່ກຳລັງຮູ້ສຶກແບບນີ້ຢູ່ ລອງບອກພວກເຂົາເລື່ອງຄວາມຫວັງທີ່ດີໃນອະນາຄົດເບິ່ງແມ້. ເມື່ອເຈົ້າເຂົ້າຮ່ວມການປະຊຸມຂອງພະຍານພະເຢໂຫວາແລະບອກຄົນອື່ນໃຫ້ຮູ້ຄວາມຈິງໃນຄຳພີໄບເບິນ ເຈົ້າກໍຈະຮູ້ສຶກວ່າບໍ່ຢາກຫຍຸ້ງກ່ຽວກັບສາສະໜາປອມແລະທຳນຽມຕ່າງໆອີກຕໍ່ໄປ. ຖ້າເຈົ້າເລືອກນະມັດສະການພະເຢໂຫວາໃນແບບທີ່ພະອົງຍອມຮັບ ເຈົ້າກໍໝັ້ນໃຈໄດ້ວ່າເຈົ້າຈະມີຄວາມສຸກ ແລະພະອົງຈະອວຍພອນເຈົ້າທີ່ພະຍາຍາມເຮັດແບບນັ້ນ.—ມາລາກີ 3:10
