1, 2. Chihula muka watela kulihulisa, kaha mwomwo ika chapwila chachilemu kulinga ngocho?

OMU unalinangula Mbimbiliya, unamono jino ngwove vatu vavavulu vaze valivuluka ngwavo veji kulemesanga Kalunga, vanangula vyuma ahunga Kalunga nakulinga vyuma kana. (Wavaka-Kolinde 2, 6:17) Evi vikiko Yehova atulwezela tufume mukwitava chamakuli, kulumbununa “Mbavilone Yayinene.” (Kusoloka 18:2, 4) Vyuma muka watela kulinga? Tuvosena tukwechi lisesa lyakulisakwila vyakulinga. Oloze twatela kulihulisa ngwetu, ‘Kutala ngwasaka kulemesa Kalunga mujila yize asaka ngumulemeselengamo tahi, nyi ngwasaka kumulemesa mujila yize ngwasaka ami ivene?’

² Nge unafumu lyehi mukwitava chamakuli, kaha unalingi kanawa. Oloze kunahase kupwa vilika navisemwa vimwe vyamukwitava kana vize wazanga noholyapwa. Ngocho tushimutwile jino havilika navisemwa kana mangana tumone ovyo chapwila chachilemu kuvimona ngana muze avimona Yehova.

3. (a) Mwomwo ika chinahase kupwila chachikalu kuli vatu vamwe kulitwamina kuzachisa makombelo hakulemesa Kalunga? (b) Mbimbiliya yahanjika vyuma muka kutalisa kukuzachisa makombelo hakulemesa Kalunga?

³ Vatu vamwe vanazachisanga makombelo chipwe tujizuvo twakukombelelamo hamyaka yayivulu hakulemesa Kalunga. Nge nayove mukiko unalinginga, kaha unahase kumona kulemesa Kalunga chakuzeneka kuzachisa vyuma kana kupwa chaungeji chipwe chakuhenga. Oloze anuka ngwove Yehova eji kutunangulanga jila yakumulemeselangamo. Kaha Mbimbiliya yatulweza ngwayo Yehova kasaka etu tuzachisenga makombelo  hakumulemesako.—Tanga Kulovoka 20:4, 5; Samu 115:4-8; Isaya 42:8; WaYowano 1, 5:21.

4. (a) Mwomwo ika katwatela kulemesa vakakulukako? (b) Mwomwo ika Yehova akanyishilile vatu jenyi kuhanjikanga navafu?

⁴ Vatu vamwe veji kwenyekanga lwola lwaluvulu nakuzachisa ngolo javo hakufwila kusuulwisa vakakuluka javo vaze vafwa nakuvalemesa. Oloze tunalinangula ngwetu vafu kaveshi kuhasa kutukafwa chipwe kutulemekako. Kaveshi nakuyoyela kumweko. Ngocho tachikiza ngwove chapwa chaponde kweseka kuhanjika navo, mwomwo yeshoyo mijimbu natutambula yize nayisoloka nge yinafumu kuli kausoko ketu uze afwa, yeji kufumanga kuli vandemone. Shikaho Yehova akanyishilile vaIsalele kuhanjikanga navafu chipwe kwazana mukala vilinga vyavandemone.—Lushimbi lwamuchivali 18:10-12; tala Chinyikilo chakusongo 26 na 31.

5. Vyuma muka navikukafwa ulitwamine kuzachisa makombelo hakulemesa Kalunga chipwe kulitwamina kulemesa vakakuluka jove?

⁵ Vyuma muka navikukafwa ulitwamine kuzachisa makombelo hakulemesa Kalunga chipwe kulitwamina kulemesa vakakuluka jove? Watela kutanganga Mbimbiliya nakushinganyekanga chikuma omu Yehova amona vyuma kana. Avimona kupwa ‘vyaunyengwe.’ (Lushimbi lwamuchivali 27:15) Lombanga kuli Yehova hakumbi hakumbi akukafwe umonenga vyuma ngana muze avimona ikiye nakumulemesa mujila yize asaka. (Isaya 55:9) Tachikiza ngwove Yehova mwakukafwa umbile vyuma vyosena vize vyapandama kukwitava chamakuli.

6. Mwomwo ika likumbi lyaDecember 25 valisakwilile kupwa likumbi lyakulinga chilika chakwanuka kusemuka chaYesu?

⁶ Kulisimasi hilikumbi limwe lyakunoka lize lyaya puho chikuma mukaye kosena, kaha vatu vavavulu vashinganyeka ngwavo lyapwa likumbi lyakwanuka kusemuka chaYesu. Oloze chilika chaKulisimasi chafuma mukwitava chamakuli. Mukanda umwe waEncyclopedia wahanjika ngwawo vatu  vamuLoma vaze kavalemeselenga Kalungako valingilenga chilika chakwanuka kusemuka chalikumbi lyangolo haDecember 25. Kaha vatwamina vamujichachi vasakile vatu kana vapwenga vaka-Kulishitu. Ngocho ava vatwamina vaputukile kulinga chilika chakwanuka kusemuka chaYesu haDecember 25, numba tuhu Yesu kasemukile halikumbi kanako. (Luka 2:8-12) Oloze tumbaji twaYesu kavalingilenga chilika chaKulisimasiko. Mukanda umwe wamba ngwawo, omu mwahichile myaka 200 kufuma hakusemuka chaYesu, “naumwe wauchi atachikijile likumbi asemukileko kaha nawa vatu vavavulu kavahakile muchima kukutachikiza likumbi kanako.” (Sacred Origins of Profound Things) Mwahichile myaka yayivulu kufuma haze Yesu apwile hano hamavu numba chilika chaKulisimasi chiputuke.

7. Mwomwo ika vaka-Kulishitu vamuchano kaveshi kulingila chilika chaKulisimasiko?

⁷ Vatu vavavulu vatachikiza ngwavo chilika chaKulisimasi navyuma veji kulinganga halikumbi kana vyakufwana nge kulihizumuna nakulihana mawana vyafuma kuvatu vaze kavalemeselenga Kalungako. Chakutalilaho, lwola lumwe muEngland namujingalila jimwe jamuAmerica, vatu vavakanyishile kulinga chilika chaKulisimasi mwomwo ngwavo chafuma kuvatu vaze kavalemeselenga Kalungako. Ngocho weshowo alingilenga chilika kana vamuzangamishilenga. Oloze kutwala muze, vatu vaputukile cheka kulinga chilika chaKulisimasi. Jino mwomwo ika vaka-Kulishitu vamuchano kaveshi kulingila chilika chaKulisimasiko? Mwomwo vasaka kwivwisa Kalunga kuwaha muvyuma vyosena veji kulinganga.

8, 9. Mwomwo ika vaka-Kulishitu vakulivanga kavalingilenga vilika vyakwanuka makumbi akusemukako?

⁸ Vatu vavavulu veji kulinganga nawa chilika chikwavo chize chaya fuma chakwanuka likumbi lyavo vasemukile. Kutala vaka-Kulishitu vatela kulinga chilika kana tahi? MuMbimbiliya vavulukamo kaha vilika vyakwanuka makumbi vasemukile  vatu vaze kavalemeselenga Yehovako. (Kuputuka 40:20; Mako 6:21) Chilika chakwanuka likumbi lyakusemuka vachilingilenga mangana valemese tulunga vamakuli. Mukanda umwe wahanjika nge, echi chikiko chalingishile vaka-Kulishitu vakulivanga “vamone chilika chakwanuka likumbi lyakusemuka kupwa hichilika chize chafuma kuvatu vaze kavalemeselenga Kalungako.”—The World Book Encyclopedia.

⁹ Kushikulu, vaLoma navaHelase vafwelelele ngwavo mutu atwama nashipilitu uze eji kumukinganga hakusemuka chenyi nakumulama mukuyoya chenyi chosena. Mukanda umwe wamba ngwawo: “Ou shipilitu apwilenga nausoko umwe wakulipwila nakalunga uze akingilenga mutu uze asemukile halikumbi kana.”—The Lore of Birthdays.

10. Mwomwo ika vaka-Kulishitu makumbi ano kaveshi kulingila vilika vyakwanuka makumbi akusemukako?

¹⁰ Uno washinganyeka ngwove Yehova eji kwivwilanga kuwaha vilika vize vyapandama kukwitava chamakuli tahi? Nduma. (Isaya 65:11, 12) Evi vikiko vyatulingisa tuhone kulinga vilika vyakwanuka makumbi akusemuka navilika vyamakumbi akunoka vize vyapandama kukwitava chamakuli.

11. Mwomwo ika vatu vamwe veji kulingilanga vilika vyamakumbi akunoka? Oloze ove watela kufwila kulinga vyuma muka?

¹¹ Vatu vamwe vatachikiza ngwavo Kulisimasi namakumbi eka akunoka vyafuma kuvatu vaze kavalemeselenga Kalungako, oloze veji kutwalangaho lika kulinga vilika kana. Vashinganyeka ngwavo yapwa hijila yamwaza yakuwanyinaho lwola lwakupwa hamwe najitanga javo. Uno omu mukiko washinganyeka nayove tahi? Kachapwa chakuhenga kupwa hamwe natanga yoveko. Yehova uze ahakileko tanga, asaka tutwamenga kanawa navaka-tanga yetu nakulivwisa kuwaha. (Wavaka-Efwesu 3:14, 15) Chipwe ngocho, twatela kufwila kupwa nausoko wamwaza naYehova muchishishisa chakufwila kusuulwisa kaha vausoko wetu hakulinga vilika vyamakumbi akunoka vyamukwitava chamakuli. Kaposetolo Paulu asonekele ngwenyi:  “Twalenuho lika kukekesanga mumone vyuma vize etavila Mwata.”—Wavaka-Efwesu 5:10.

12. Vyuma muka vyalingisa Yehova azeneke kwitavisa vilika vyamakumbi akunoka?

¹² Vatu vavavulu vashinganyeka ngwavo kutachikiza kwafuma makumbi akunoka kachapwa chachilemuko. Oloze Yehova kashinganyeka ngochoko. Ketavisa makumbi akunoka aze afuma mukwitava chamakuli chipwe kuzezula vatu chipwe vifwanyisa vyalifuchiko. Chakutalilaho, vaEjipitu valingilenga vilika vyavivulu hakulemesa tulunga twavo vamakuli. Kahomu vaIsalele vafumine muEjipitu, valingile chilika chimwe chavaEjipitu nakuchivuluka ngwavo ‘chiwanyino chaYehova.’ Ngocho Yehova avazangamishile hakulinga chilika kana. (Kulovoka 32:2-10) Kapolofweto Isaya ahanjikile ngwenyi, katwatela “kukwata kuchuma chimwe chachipiko.”—Tanga Isaya 52:11.

13. Vihula muka unahase kulihulisa nge unalitwamina kulinga vilika vyamakumbi akunoka?

¹³ Unahase kulihulisa vihula vyavivulu nge unalitwamina kulinga vilika vyamakumbi akunoka. Chakutalilaho, unahase kulihulisa ngwove: Nangulinga ngachilihi nge vakwetu ngwazata navo navanguhulisa ovyo kangweshi kulingila chilika chaKulisimasi hamwe navakikoko? Nangulinga ngachilihi nge mutu mwanguhana wana waKulisimasi? Nangulinga ngachilihi nge muka-mahyami nangulweze kulinga chilika chalikumbi lyakunoka? Nangukafwa ngachilihi vana vami vahone kwivwa kupihya hakuhona kulinga chilika chalikumbi lyakunoka chipwe chakwanuka makumbi avo akusemuka?

14, 15. Naulinga ngachilihi nge mutu mwakumeneka namazu aze veji kuzachisanga hamakumbi akunoka chipwe kukuhana wana?

¹⁴ Chapwa chachilemu kupwa vakunangakana numba tutachikize mwakukumbulwila chipwe mwakulingila hakulitalasana naukalu kana. Chakutalilaho, nge mutu mwakumeneka namazu aze veji kuzachisanga hamakumbi akunoka, kaha kawatela kumuliulako. Unahase kumukumbulula ngwove, “Mwane.” Oloze nge mutu mwasaka kutachikiza vyavivulu,  kaha unahase kumulumbunwina ovyo kaweshi kulingila vilika vyamakumbi akunokako. Chipwe ngocho, watela kulinga ngocho mujila yalikoji, mukuzangama kaha nawa mukalemesa. Mbimbiliya yamba ngwayo: “Mazu enu apwenganga akukokweza shimbu yosena, akutova mungwa, mangana mutachikize omu mwatela kukumbulula mutu himutu.” (Wavaka-Kolose 4:6) Unahase nawa kuhanjika ngwove weji kwivwanga kuwaha kupwa hamwe navakwenu nakulihana mawana, oloze kawasaka kukundwiza vilika vyamakumbi akunokako.

¹⁵ Naulinga ngachilihi nge mutu mwakuhana wana waKulisimasi? Mbimbiliya kayavuluka hatoma jishimbi josena jize twatela kukavangiza hachihande kanako, oloze yatulweza ngwayo twatela kupwa nachivezu chamwaza. (WaChimoteu 1, 1:18, 19) Pamo mutu uze mwakuhana wana kana katachikiza ngwenyi kaweshi kulinga vilika vyamakumbi akunokako. Nyi pamo nahase kukulweza ngwenyi, “Ngwatachikiza ngwami kaweshi kulinga vilika vyamakumbi akunokako, oloze nguli nakusaka kaha kukuhana wana.” Shikaho chili kuli ove ivene kutambula wana kana chipwe chiku. Oloze cheshocho musakula kulinga chatela kukulingisa upwenga nachivezu chamwaza. Katwatela kulinga vyuma vize navyenyeka usoko wetu naYehovako.

16. Naulinga ngachilihi nge vaka-tanga yove navasaka kulinga chilika chalikumbi lyakunoka?

¹⁶ Naulinga ngachilihi nge vaka-tanga yove navasaka kulinga chilika chalikumbi lyakunoka? Kawatela kulipula navo jipamiko. Tachikiza ngwove vakwechi lisesa lyakulisakwila vyuma vanasake kulinga. Ngocho watela kuhanjika navo mujila yalikoji nakuvumbika vyuma vali nakusaka kulinga ngana muze nausaka nayove vavumbike vyuma nausaka kulinga. (Tanga Mateu 7:12.) Jino naulinga ngachilihi nge vaka-tanga yove vali nakusaka upwenga navo hamwe hachilika kana? Shimbu kanda usakule vyakulinga, watela kulomba kuli Yehova akukafwe ulinge mwakwoloka. Shinganyeka hachihande kana nakuhehwojola vyuma vahanjikaho. Anuka ngwove watela kwivwisa Yehova kuwaha lwola lwosena.

17. Naukafwa ngachilihi vana vove vaze navamona vakwavo vali nakulinga vilika vyamakumbi akunoka nakuputuka kushinganyeka ngwavo kaveshi nakulivwisa kuwaha kuyoyako?

 ¹⁷ Naukafwa ngachilihi vana vove vaze navamona vakwavo vali nakulinga vilika vyamakumbi akunoka nakuputuka kushinganyeka ngwavo kaveshi nakulivwisa kuwaha kuyoyako? Watela kuvawahishilangako vilika vyakulihizumuna. Unahase nawa kuvalanjilako vyuma vimwe nakuvahana kupwa wana. Kaha wana waulemu uze unahase kuhana vana vove shina kutwamanga navo nakuvazanga chikuma.

18. Mwomwo ika twatela kupwila kukukunguluka chavaka-Kulishitu?

¹⁸ Hakusaka twivwise Yehova kuwaha, twatela kuseza kwitava chamakuli, navisemwa navilika vyamakumbi akunoka vize vyapandama kukwitava kana. Oloze twatela nawa kupwa mukwitava chamuchano. Mujila muka? Jila yimwe shina kupwanga kukukunguluka chavaka-Kulishitu lwola lwosena. (Tanga WavaHepeleu 10:24, 25.) Kukunguluka chapwa chachilemu chikuma mukwitava chamuchano. (Samu 22:22; 122:1) Kulikungulwila hamwe cheji kutulingisanga tulikolezeze navakwetu.—Wavaka-Loma 1:12.

19. Mwomwo ika chapwila chachilemu kulwezako vakwenu vyuma vyamuchano unalinangula muMbimbiliya?

¹⁹ Jila yikwavo yakusolwelamo ngwove watwama mukwitava chamuchano shina kulwezako vakwenu vyuma unalinangula muMbimbiliya. Vatu vavavulu veji kwivwanga kupihya hakumona vyuma vyavipi vili nakusoloka hano hamavu. Pamo watachikizako vatu vamwe vaze veji kwivwanga ngocho. Valweze vyuma vyamwaza watalilila kulutwe. Kuyanga kukukunguluka nakulwezako vakwenu vyuma vyamuchano unalinangula muMbimbiliya, nachikukafwa useze kwitava chamakuli nakuhona kufwila vilika vyapandama kukwitava kana. Tachikiza ngwove nauwahilila hakusakula kulemesa Yehova mujila yakwoloka kaha nawa mwakukisula.—Malaki 3:10.