1, 2. Lwihwinyi lumwatela kudihula, nawa muloñadi chitwatelela kudihwila?

CHIMWADIZAÑA Bayibolu, mweluka nenu antu amavulu ahoshaña nawu adifukulaña kudi Nzambi adizishaña hela kwila yuma yahelayi Nzambi. (2 Akorinda 6:17) Dichatulejelañayi Yehova nindi tufumi munsakililu yakutwamba, “Babiloni Muneni.” (Chimwekeshu 18:2, 4) Chumanyi chimukwila? Wejima wetu twatela kudifuukwila nawa twatela kudihula netu, ‘Nakeñaña kudifukula kudi Nzambi munjila yinakukeñayi nindi nidifukuleña, tahindi inakukeña kudifukula kwesekeja nachinadifukulaña?’

² Neyi munafumi munsakililu yakutwamba, muneli chiwahi. Ilaña, hadaha mumuchima wenu muchidi yaaku nitushidikilu tumwadiña natu munsakililu yakutwamba. Tuhanjekenu hayaaku nitushidikilu twamuchidiwu kulonda twiluki chichawahila kumona yuma neyi chayimonañayi Yehova.

3. (a) Muloñadi chichayikalilaña antu amakwawu kuleka kuzatisha yifwikija hakudifukula? (b) Bayibolu yahosha nawudi hansañu yakuzatisha yifwikija hakudifukula kudi Nzambi?

³ Antu amakwawu anadifukuli kudi Nzambi kuzatisha yifwikija hela nyiyombu mumatala awu hadi yaaka yayivulu. Neyi dichimwelaña, hadaha chinateli kuyikalila kudifukula kudi Nzambi chakadi yumiyi. Ilaña anukenu nenu, Yehova watulejaña chakudifukula kudi yena. Bayibolu yatulejaña nawu Yehova hakeñaña nindi tuzatisheña  yifwikija hakudifukulaku.—Tañenu Kwidika 20:4, 5; Masamu 115:4-8; Isaya 42:8; 1 Yowanu 5:21.

4. (a) Muloñadi chitwatelela kubula kudifukula kudi ankakulula? (b) Muloñadi Yehova chayikaanishililiyi antu jindi kubula kuhosha nawafu?

⁴ Antu amakwawu ombaña mpinji yeneni niñovu kulonda azañaleshi ankakulula. Adifukulaña nikudi wena. Ilaña tunadizi netu antu afwa dehi hiyakutwesha kutukwasha hela kutukatishaku. Hiyatwalekañahu nakuhanda kwiluña dacheñiku. Kuhanjeka nawantu afwa dehi kwafwana, muloña nsañu yejima yatiyakanaña neyi yinakuhosha ntaña yenu wafwa yafumaña kudi andemoni. Dihafumini Yehova hakuleja aIsarela nindi bayi eseka kuhosha nawafu hela kupeshaku.—Kuhituluka 18:10-12; talenu Mazu Adi Kunsa 26 ni 31.

5. Yumanyi yikuyikwasha kuleka kuzatisha yifwikija hakudifukula kudi Nzambi nikudi ankakulula?

⁵ Yumanyi yikuyikwasha kulonda muleki kuzatisha yifwikija hakudifukula kudi Nzambi hela kudi ankakulula? Tañenu Bayibolu, nawa toñojokenu chiwahi kulonda mwiluki Yehova chamonañayi yumiyi. Wayimonaña nindi “hikushimana” hela hiyishimashima. (Kuhituluka 27:15) Lombenuña kudi Yehova mafuku ejima kulonda yayikwashi kumona yuma neyi chayimonañayi nawa mudifukuleña munjila yamutiyishaña kuwaha. (Isaya 55:9) Chimwela mwenimu, Yehova wukuyikwasha kuleka yuma yejima yakundama kukudifukula kwakutwamba.

6. Muloñadi antu chanakaninañawu kuvwalika kwaYesu haDecember 25?

⁶ Krisimansi hifuku danakanañawu nankashi mukaayi, nawa antu amavulu atoñojokaña nawu anakanaña kuvwalika kwaYesu. Ilaña Krisimansi yakundama kukudifukula kwakutwamba. Mukanda wumu washimuna nawu  akwakusekesha amuRoma adiña nakwanakana ifuku davwalikili itena haDecember 25. Akulumpi jamachechi akeñeleña akwakusekesha amavulu ekali akwaKristu, hela chakwila Yesu wavwalikili haDecember 25 wanyi, atachikili kwanakana kuvwalika kwaYesu hanidi ifuku. (Luka 2:8-12) Atumbanji twaYesu hiyadiña nakwanakana Krisimansiku. Mukanda wumu washimuna nawu chimwahitili yaaka 200 kufuma havwalikiliyi Yesu, “kwosi welukili, nawa antu antesha diwu ashiliku maana, kwiluka mpinji yayeni yavwalikiliyi.” (Sacred Origins of Profound Things) Antu atachikili kwanakana Krisimansi kumashiita kwakweni henohu Yesu kanda yenzi.

7. AkwaKristu alala abulilañadi kwanakana Krisimansi?

⁷ Antu amavulu eluka nawu Krisimansi yafuma kudi akwakusekesha niyidika yidi neyi mapati nikuhana yawaana. Chakutalilahu, muEngland nimaluña amakwawu muAmerica, kwadiña mpinji yayilekesheliwu antu kwanakana Krisimansi muloña yafuma kudi akwakusekesha. Neyi muntu amuwana nakwanakana amubabesheleña. Ilaña mukuhita kwampinji, antu atachikili kwanakana cheñi. AkwaKristu alala abulilañadi kwanakana Krisimansi? Muloña akeñaña kumuzañalesha Nzambi muyuma yejima yelañawu.

8, 9. AkwaKristu atachi abulilileñadi kwanakana mafuku akuvwalika?

⁸ Chidika chanakanañawu antu nankashi hiifuku davwalikiliwu. Komana akwaKristu atela kwanakana mafuku akuvwalika? Mafuku akuvwalika anakanineñawu ashimunawu muBayibolu akundama kudi antu abulileña kudifukula kudi Yehova. (Kutachika 40:20; Maku 6:21) Antu alemesheleña anzambi akutwamba kuhitila mukwanakana  mafuku akuvwalika. Dihafumini akwaKristu atachi “kutoñojoka nawu kwanakana ifuku dakuvwalika kwamuntu hichaaku chawakwakusekesha.”—The World Book Encyclopedia.

⁹ A Roma niaGiriki akushankulu atoñojokeleña nawu spiritu yenjileña neyi muntu nakuvwalika nawa iyi spiritu yikumukiña ona muntu mukuhanda kwejima. Mukanda wa The Lore of Birthdays washimuna nawu: “Iyi spiritu yadiña nakufuta kakwatankana hamu nanzambi wukweti ifuku davwalikiliyi owu muntu.”

10. Muloñadi akwaKristu makonu chabulilañawu kwanakana mafuku akuvwalika?

¹⁰ Munakutoñojoka nenu Yehova wetejaña yidika yakundama kunsakililu yakutwamba? (Isaya 65:11, 12) Inehi, hayitejañaku. Dichitwabulilaña kwanakana mafuku akuvwalika hela mafuku akunooka akundama kunsakililu yakutwamba.

11. Muloñadi antu amakwawu chanakaninañawu mafuku akunooka? Chumanyi chimukusweja kulemesha?

¹¹ Antu amakwawu eluka nawu Krisimansi nimafuku amakwawu akunooka afuma kudi akwakusekesha, ilaña ayanakanaña. Atoñojokaña nawu mafuku akunooka himpinji yayiwahi yakushakama hamu nayisaka yawu. Dichimwatoñojokaña? Kushakama hamu nachisaka chenu kwatama wanyi. Yehova diyi watuñili chisaka, nawa wakeñaña nindi tuhanjekeña chiwahi. (Aefwesesa 3:14, 15) Ilaña, twatela kusha muchima hakwikala nawubwambu wawuwahi naYehova chatela tuzañalesheña antaña jetu kuhitila mukwanakana mafuku akundama kunsakililu yakutwamba. Dihafumini kapostolu Pawulu kuhosha nindi: “Twalekenuhu kwiluka yuma yetejañayi Mwanta.”—Aefwesesa 5:10.

12. Chumanyi chaleteshaña ifuku dakunooka dibuli kwikala detejewa kudi Yehova?

 ¹² Antu amavulu atoñojokaña nawu ntachikilu yefuku dakunooka yalema wanyi, ilaña Yehova wayimonaña kulema. Hetejaña mafuku akunooka afuma kunsakililu yakutwamba hela alemeshaña antu hela ituñaku. Chakutalilahu, aEjipitu adiña nayidika yayivulu yawanzambi akutwamba. Chedikiliwu aIsarela muEjipitu, atachikili kwanakana chidika chimu chawaEjipitu nawa achiteneni nawu “chawija chaYehova.” Ilaña Yehova wayibabesheli nachuma cheliliwu. (Kwidika 32:2-10) Neyi chahosheli kaprofwetu Isaya, bayi ‘tukunka kuchuma chamajiluku.’—Tañenu Isaya 52:11.

13. Malwihwinyi imunateli kudihula neyi munakukeña kuleka kwanakana mafuku akunooka?

¹³ Neyi munatoñojoki nenu mukuleka kwanakana mafuku akunooka, mukutachika kudihula malwihu. Chakutalilahu: Natela kwiladi neyi akwetu mutwazatilaña añihula chinabulilaña kwanakana Krisimansi hamu nawena? Nukwila ñahi neyi kudi wunanyinki chawaana chaKrisimansi? Nateli kwila ñahi neyi mwinikwami nakukeña nindi nanakaneña ifuku dakunooka? Nukukwasha ñahi anyanami kulonda abuli kuneña muloña wakubula kwanakana mafuku akunooka hela avwalikiliwu?

14, 15. Mwatela kwiladi neyi muntu nayili nindi mudiluñishi ifuku dakunooka hela nayinki chawaana?

¹⁴ Twatela kwikala asoñama kulonda twiluki chakuhosha nikwila nakukala kwamuchidiwu. Chakutalilahu, neyi antu ayimusha kwimusha kwahefuku dakunooka, bayi muyidiwulaku. Munateli kuhosha nenu, “Kusakililaku.” Ilaña neyi owu muntu nakukeña kwilukilahu jikwawu, munateli kumulumbulwila chitwabulilaña kwanakana mafuku akunooka. Hela chochu, mwatela kuhosha  chiwahi nakubabala nikalemesha. Bayibolu yatulejaña nawu: ‘Kuhosha kwenu kwikali naluwi, kwakutoweja namuñwa mafuku ejima, kulonda mwiluki mwakwakwila antu ejima.’ (Akolosi 4:6) Hadaha mukulumbulula nenu mwakeña kudikunda nawakwenu nikuyinka yawaana ilaña nenu mwakeñaña wanyi kwila yumiyi yinakundami kumafuku akunooka.

¹⁵ Mwatela kwiladi neyi muntu nayinki chawaana? Bayibolu hiyatwinka nshimbi jejimaku, ilaña yatuleja nawu twatela kwikala nachinleji chitooka. (1 Timotewu 1:18, 19) Hadaha muntu wunakuyinka chawaana neluki wanyi nindi himwanakanaña mafuku akunookaku. Hekwawu wukuhosha nindi, “Neluki nami mwanakanaña mafuku akunooka wanyi, ilaña inakukeña kuyinka ichi chawaana.” Neyi chumichi chinamwekani, enu aweni munateli kwiteja hela kukaana. Mwejima mumukufuukula, babalenu kulonda mwikali nachinleji chitooka. Kwila twila chuma chikutamisha wubwambu wetu naYehova nehi.

16. Mwatela kwiladi neyi chisaka chenu chinakukeña nawu mwanakani ifuku dakunooka?

¹⁶ Mwatela kwiladi neyi chisaka chenu chinakukeña nawu mwanakani ifuku dakunooka? Bayi mutachika kutadeka nawuku. Ilukenu nenu, akweti wuswa wakufuukula yuma yinakukeña kwilawu. Dichi hoshenu chiwahi nakulemesha munafuukuliwu neyi chochimukukeña ninenu nenu alemeshi mumunafuukuli. (Tañenu Matewu 7:12.) Indi neyi chisaka chenu chinakukeña nawu mwikali nawu hefuku dakunooka, mukwiladi? Henohu kanda mufuukuli, lombenu kudi Yehova kulonda yayikwashi kufuukula chiwahi. Toñojokenu hanoku kukala, nawa sandujolenu. Anukenu nenu, mwatela kumuzañalesha Yehova mpinji yejima.

17. Munateli kukwasha ñahi anyanenu kulonda abuleña kutoñojoka nawu anakushalahu yuma yayiwahi yahamafuku akunooka?

 ¹⁷ Munateli kukwasha ñahi anyanenu neyi anamoni akwawu anakwanakana mafuku akunooka? Mumpinji mumpinji, mwatela kuyilila anyanenu yuma yikuyizañalesha. Cheñi munateli nikuyinka yawaana. Chawaana cheneni chimunateli kuyinka anyanenu himpinji nikuyileja nenu mwayikeña.

18. Muloñadi chitwatelela kuya kukupompa kwawakwaKristu?

¹⁸ Hakwila tumuzañaleshi Yehova, twatela kufuma munsakililu yakutwamba, kuleka yaaku nimafuku akunooka akundama kunsakililu yakutwamba. Twatela kwikala cheñi munsakililu yalala. Munjilanyi? Njila yatachi, twatela kuya kukupompa kwetu kwawakwaKristu. (Tañenu Aheberu 10:24, 25.) Kupompa kwekala kwalema nankashi mukudifukula kwalala. (Masamu 22:22; 122:1) Neyi tuya nakupompa twadikoleshaña wumu namukwawu.—Aroma 1:12.

19. Muloñadi chimwatela kulejela antu chalala chamuBayibolu chimunadizi?

¹⁹ Njila yikwawu yimukumwekeshelamu nenu mudi mukudifukula kwalala hikuleja antu nsañu yimunakudiza muBayibolu. Antu amavulu anakuneña nayuma yatama yinakumwekana hamaseki. Hadaha munelukihu antu amuchidiwu. Yilejenu yuma yayiwahi yimwachiñejaña yakamwekana kumbidi. Chimukuyaña nakupompa nichimukulejaña antu chalala chamuBayibolu, mukumona nenu himukwikala nampwila yakwikala munsakililu yakutwamba niyaaku yachuku. Chumichi chikuyizañalesha nawa Yehova wakayikiswila chikupu neyi mukudifukulaña kudi yena munjila yayiwahi.—Malaki 3:10.