1, 2. Nĩ kĩũria kĩrĩkũ ũbuĩrĩte gũciũria, na nĩkĩ bũu nĩ bwa gĩtũmi?

 GŨKŨRŨKĨĨRA wiritani bwaku bwa Bibiria, nĩ wiritanĩte babaingĩ barĩa baugaga nĩbathathaagia Mũrungu, kamma baritanaga kana bakathithia mantũ jarĩa Mũrungu athwĩre. (2 Akorintho 6:17) Nĩkĩo Jehova agũtwĩra tuume kĩrĩ ndini ya ũrongo, “Babiloni iria nene.” (Kugwurirwa 18:2, 4) Ũkathithia atĩa? O ũmwe weetũ arĩ na ĩtua rĩa kũthithia, na no mwanka tũciũrie, ‘Nĩnkwenda kũthaathayia Mũrungu na njĩra ĩrĩa akwenda, kana ndĩrĩenda kũmũthaathayia ũrĩa ntwĩre menyeretie?’

² Kethĩra nũrĩĩkĩtie kuuma ndinine ya ũrongo nũthithĩtie bwega. Ĩndĩ no kwĩthĩrwe nkorone kũrĩ na mantũ na mĩtugo ya ndini ya ũrongo ũgwĩragĩrua. Tiga twarĩĩrie jamwe ja mantũ na mĩtugo ĩu twone nĩkĩ bũrĩ ũntũ bwa gĩtũmi mono kwona mantũ ũrĩa Jehova ajonaga.

3. (a) Nĩkĩ bamwe boomba kwona kũũmi gũtiga gũtumĩra mĩng’uanano ũthaathayiene bwao? (b) Nĩatĩa Bibiria yugaga bwegiĩ gũtumĩra mĩng’uanano kũthaathayia Mũrungu?

³ Antũ bamwe nĩbatumĩrĩte mĩng’uanano kana antũ aathũrĩtwe ndeene ya mĩciĩ yaao mĩaka ĩmiingĩ kũthaathayia Mũrungu. Kethĩra nĩu ũthithagia, no wone bũrĩ ũntũ ũgeni kana ũntũ bũtĩbuui kũthaathayia Mũrungu ũtĩgũtumĩra into biu. Ĩndĩ riikana Jehova natũritanaga  ũrĩa tũkamũthaathayia. Na Bibiria nĩtwĩraga carũrũkũ Jehova atĩendaga tũtumĩra mĩng’uanano ũthaathayiene bwetũ.—Thooma Kuuma 20:4, 5; Zaburi 115:4-8; Isaya 42:8; 1 Johana 5:21.

4. (a) Nĩkĩ tũtĩbuĩrĩte kũgeria kũgwĩria biũjũũjũ bietũ birĩa biaakuĩre? (b) Nĩkĩ Jehova eerĩre antũ baawe batĩkaagerie kwaranĩria na akuũ?

⁴ Antũ bamwe no batumĩre inya ĩnyiingĩ na kagiita bakĩgeria kũgwĩria biũjũũjũ biao birĩa biaakuĩre. Kinya no babithaathayie. Ĩndĩ nĩtwiritanĩte akuũ batĩũmba gũtũteethia kana gũtũthithĩria bũthũũku. Batĩgũtũũra gũntũ kũngĩ. Na mma, nĩ ũgwati kũgeria kwaranĩria nabo tontũ ũntũ bunthe bũũmba kwoneka teka buumĩte kĩrĩbo bwĩthagĩrwa buumĩĩte kĩrĩ irundu bithũũku. Nĩkĩo Jehova eerĩre Aisraeli batĩkaagerie kwaranĩria na akuũ kana gwitonyithania na njĩra ingĩ cia irundu bithũũku.—Kuriikanithia Maathana 18:10-12; tega Nteto Irĩa irĩ Mũthia, 26 na 31.

5. Nĩmbi yũũmba gũgũteethia ũtiga gũtumĩra mĩng’uanano kũthaathayia Mũrungu na ũreka kũgeria kũgwĩria biũjũũjũ biaku birĩa biaakuĩre?

⁵ Nĩmbi yũũmba gũgũteethia kũreka gũtumĩra mĩng’uanano kũthaathayia Mũrungu kana kũgeria kũgwĩria biũjũũjũ biaku birĩa biaakuĩre? Nũkũbatara kũthooma Bibiria na ũthũgaanĩrie bwega ũrĩa Jehova oonaga mantũ jau. Ajoonaga jarĩ “mpanga,” kana mantũ athwĩre. (Kuriikanithia Maathana 27:15) Romba Jehova ntukũ cionthe agũteethie kwona mantũ o ta ũrĩa ajoonaga, na agũteethie kũmũthaathayia na njĩra ĩrĩa endaga. (Isaya 55:9) Womba gwĩtĩkia Jehova agakwaa inya ĩrĩa ũkũbatara nĩ kenda weberia ũtũũrone bwaku into bionthe biegiĩ ũthaathayia bwa ũrongo.

6. Nĩkĩ ntukũ ya Dicemba 25 yaathuurĩrwe ĩrĩ ya gũkũngũĩra gũciarwa kwa Jesũ?

⁶ Nthĩgũrũne, Kĩrĩsimasi nĩ ĩmwe ya thigũnkũ irĩa ciijĩkene mono, na babaingĩ bathũgaanagia nĩ thigũnkũ ya gũciarwa kwa Jesũ. Ĩndĩ mma nĩ atĩ Kĩrĩsimasi ĩgwetanagĩrua na ũthaathayia bwa ũrongo. Iuku rĩmwe rĩa encyclopedia rĩtaaragĩĩria apagani ba Roma baakũngũagĩra gũciarwa kwa riũa Dicemba 25. Atongeeria ba kanisa beendaga apagani babaingĩ baa Akristũ, kwou kinya kethĩra Jesũ ataaciarĩrwe Dicemba 25, baatuĩre bakũngũagĩre gũciarwa kwa Jesũ tarĩki ĩu. (Luka 2:8-12) Aritwa ba Jesũ gũtĩrĩo baakũngũĩra Kĩrĩsimasi. Iuku rĩmwe rĩa gũtaarĩria mantũ riugaga mĩaka 200 nyuma ya gũciarwa kwa Jesũ, “gũtĩwe waijĩ, na nĩ baakai bendaga kũmenya, rĩrĩa rĩongwa aaciarĩrwe.” (Sacred Origins of Profound Things) Thigũnkũ ya Kĩrĩsimasi yaambĩrĩrie mĩaka ĩmiingĩ nyumene, Jesũ akuuma nthĩgũrũne.

7. Nĩkĩ Akristũ ba mma batĩkũngũagĩra Kĩrĩsimasi?

⁷ Antũ babaingĩ nĩbaijĩ Kĩrĩsimasi yumanĩtie na apagani na kinya mantũ jarĩa jathithagua ntukũ ĩu ta, biatho na kwejana biewa. Ngerekano, nthĩgũrũ ya Ngeretha na kũmwe Amerika kwĩrĩo gũkũngũĩra Kĩrĩsimasi gwakaanĩtue nĩũntũ bwa kaumo kayo ka ũpagani. Ũrĩa wonthe ũrĩngĩkũngũĩra naakanũkagua. Ĩndĩ nyumene antũ nĩbaambĩrĩrie kaĩrĩ gũkũngũĩra Kĩrĩsimasi. Nĩkĩ Akristũ ba mma batĩkũngũagĩra Kĩrĩsimasi? Tontũ bendaga kũgwĩria Mũrungu mantũũne jarĩa jonthe bathithagia.

8, 9. Nĩkĩ Akristũ ba mbere bataakũngũagĩra ntukũ cia gũciarwa?

⁸ Ũntũ bũngĩ antũ bakũngũagĩra mono nĩ ntukũ yaao ya gũciarwa. Akristũ nĩbabati gũkũngũĩra ntukũ  cia gũciarwa? Biatho birĩa akĩ bigweti Bibiriene bia gũkũngũĩra ntukũ ya gũciarwa, biathithĩtue nĩ antũ barĩa bataarĩ athaathayia ba Jehova. (Kiambiriria 40:20; Mariko 6:21) Biatho bia kũriikana ntukũ cia gũciarwa biatumagĩrwa gũtĩĩa mĩrungu ya ũrongo. Nĩkĩo Akristũ ba au mbere “baajũkagia biatho bia kũriikana ntukũ ya gũciarwa ya muntũ kinya ũrĩkũ birĩ bia gĩpagani.”—The World Book Encyclopedia.

⁹ Aroma na Agiriki ba tene beetĩkĩtie atĩ kwĩna kĩrundu kĩarĩ-o rĩrĩa o muntũ aaciaragwa, na atĩ kĩrundu kĩu kĩrĩngĩmũkaria ũtũũrone bwawe. Barĩa bataarĩ Akristũ ĩgiita rĩu bakũngũagĩra ntukũ cia gũciarwa tontũ baathũgaanagia kũthithia ũu kũrĩngĩtũma mĩrungu yaao ĩkaria ũrĩa ntukũ yaawe ya gũciarwa yaakũngũagĩrwa.

10. Nĩkĩ Akristũ naarua batĩbuĩri gũkũngũĩra ntukũ cia gũciarwa?

¹⁰ Ũrĩthũgaania Jehova netĩkagĩĩria thigũnkũ irĩa ciumanĩtie na ndini ya ũrongo? (Isaya 65:11, 12) Arĩ, atĩĩtĩkagĩĩria. Nĩkĩo tũtĩkũngũagĩra ntukũ cia gũciarwa kana thigũnkũ ingĩ irĩa igwetanagĩrua na ndini ya ũrongo.

11. Nĩkĩ antũ bamwe bakũngũagĩra thigũnkũ? Kĩrĩ gwe nĩmbi ĩbuĩri kwĩthĩrwa ĩrĩ ya gĩtũmi mono?

¹¹ Antũ bamwe nĩbaijĩ Kĩrĩsimasi na thigũnkũ ingĩ ciumanĩtie na ũpagani, ĩndĩ no bacikũngũagĩra. Boonaga thigũnkũ irĩ kagiita gakeega ga kwĩthĩrwa barĩ amwe na antũ baao ba nja. Nĩu wonaga? Tĩ bũthũũku kwenda kwĩthĩrwa ũrĩ amwe na antũ ba nja. Jehova nĩwe waambĩrĩrie nja na endaga twĩthĩrwa na ngwatanĩro ĩnjega nabo. (Aefeso 3:14, 15) Ĩndĩ tũbuĩri kũthingatĩĩra ngwatanĩro yeetũ ĩnjega na Jehova, antũ-a kũgwĩria antũ beetũ ba nja na njĩra ya gũkũngũĩra thigũnkũ cia ũrongo cia kĩndini. Nĩkĩo mũtũmwa Paũlo aaugĩre: “Bwatua  kuthithagia uu, bukoonanagia mantu jaria Mwathani agwiragua nijo.”—Aefeso 5:10.

12. Nĩmbi yũũmba gũtũma thigũnkũ ĩtĩgetĩkĩrĩke nĩ Jehova?

¹² Antũ babaingĩ bonaga gũtĩkũmakania naarĩa thigũnkũ yaambĩrĩrie, ĩndĩ tĩu Jehova onaga. Atĩĩtĩkagĩĩria thigũnkũ irĩa ciumanĩtie na ũthaathayia bwa ũrongo kana irĩa ikumagia antũ kana ndwano cia nthĩgũrũ. Ngerekano, Amisri nĩ baarĩ na thigũnkũ inyiingĩ cia mĩrungu yaao ya ũrongo. Nyuma ya Aisraeli kwonoka kuuma Misri, nĩbaakooberie ĩmwe ya thigũnkũ iu ciao cia kĩpagani na baramĩĩta ‘kĩatho nĩũntũ bwa gũkumia Mwathani.’ Ĩndĩ Jehova naabakanũkĩrie nĩũntũ bwa kũthithia ũu. (Kuuma 32:2-10, Kimeru Bible, 2010) O ta ũrĩa kĩroria Isaya aaugĩre, tũtĩbuĩrĩte gũtonga “gantu karia gati gakatheru.”—Thooma Isaya 52:11.

13. Nĩ biũria birĩkũ ũũmba kwĩthĩrwa nabio rĩrĩa watua ũtĩkũngũĩra thigũnkũ kaĩrĩ?

¹³ Rĩrĩa watũa ũtĩkũngũĩra thĩgũnkũ, womba kwĩthĩrwa na biũria bibiingĩ. Ngerekano: Nĩatĩa mbuĩrĩte kũthithia rĩrĩa ariti ngũgĩ bangĩ bambũũria nĩkĩ ntĩkũngũagĩra Kĩrĩsimasi amwe nabo? Nĩatĩa mbuĩrĩte kũthithia rĩrĩa muntũ ampa kĩewa kĩa Kĩrĩsimasi? Nĩatĩa mbuĩri kũthithia rĩrĩa ũrĩa tũgũrene nawe akwĩrĩgĩĩra nkũngũĩra thigũnkũ? Nĩatĩa mpũmba kũthithĩria aana bakwa batĩkaigue bũthũũku tontũ batĩgũkũngũĩra thigũnkũ kana ntukũ yaao ya gũciarwa?

14, 15. Nĩatĩa ũũmba kũthithia rĩrĩa muntũ akwĩra wĩthĩrwe na thigũnkũ ĩnjega kana akwaa kĩewa?

¹⁴ Nĩ ũntũ bwa bata kũthũgaania bwega rĩrĩa tũgũtua ũrĩa tũkauga na ũrĩa tũkathithia kĩrĩ o ĩgiita. Ngerekano, antũ bakwĩra wĩthĩrwe na thigũnkũ ĩnjega, to mwaka  ũbakirĩre. No uuge atĩrĩ, “Nĩbwega.” Ĩndĩ rĩrĩa muntũ akwenda kũmenya nkũrũki, no ũthuure kũmũtaarĩria nĩkĩ ũtĩkũngũagĩra thigũnkũ. Ĩndĩ, rĩonthe wĩthĩrwe na kĩao, ũtea, na gĩtĩĩo. Bibiria yugaga: “Mantu jaria bukwaria jeethagirwe jari jameega ta gantu geekiri cumbi, nikenda bukamenyaga gucokeria muntu o muntu untu buria abuurikia.” (Akolosai 4:6) Mbuga no ũbeere nũgwĩragĩrua gũtumĩra ĩgiita na bangĩ na kwejana biewa, ĩndĩ neka ũthuurĩte ũtĩthithia u, rĩrĩa gũkũgwatanĩra na thigũnkũ iu.

¹⁵ Muntũ akeeja gũkwaa kiewa nĩatĩa ũbuĩrĩte kũthithia? Bibiria ĩtĩgũtwaa mawaatho kĩrĩ o ũntũ, ĩndĩ yugaga tũbuĩri kwĩthĩrwa na thamiiri ĩntheru. (1 Timotheo 1:18, 19) Kwombĩka muntũ ũrĩa ũgũkwaa kĩewa atiijĩ ũtĩkũngũagĩra thigũnkũ. Kana no auge, “Nĩmbijĩ ũtĩkũngũagĩra thigũnkũ, ĩndĩ nĩkwenda gũkwaa kĩewa gĩkĩ.” Tũgiitene ta tũu, no ũthuure kethĩra ũgetĩkĩĩria kĩewa kana arĩ. Ĩndĩ o ĩtua rĩonthe rĩrĩa ũkathithia, ũtigĩĩre ũrĩ na thamiiri ĩnjega. Tũtĩngĩenda kũthithia ũntũ kinya bũrĩkũ bũrĩa bũũmba kũthũũkia ngwatanĩro yeetũ na Jehova.

16. Nĩatĩa ũbateere kũthithia kethĩra antũ ba nja yaaku barĩenda gũkũngũĩra thigũnkũ?

¹⁶ Nĩatĩa ũbateere kũthithia kethĩra antũ ba nja yaaku nĩbakwenda gũkũngũĩra thigũnkũ? Ũtĩkũbatara gũkararania nabo. Riikana, barĩ na ũciathi bwa gũtua ũrĩa bakwenda kũthithia. Ĩthĩrwa na kĩao na ũtĩĩe matua jaao o ta ũrĩa wendaga batĩĩa jaaku. (Thooma Mathayo 7:12.) Ĩndĩ kethĩra nja yaaku ĩrĩenda bwĩthĩrwa bũrĩ amwe ĩgiitene rĩa thigũnkũ ũbuĩrĩte kũthithia atĩa? Mbere ũtua bwa kũthithia, romba Jehova ũteethio kenda ũthithia ĩtua rĩagĩrĩte.  Thũgaanĩria ũrĩa mantũ jakari na ũjathithĩrie ũcũnkũũni. Riikana rĩonthe ũrĩenda kũgwĩria Jehova.

17. Nĩatĩa ũũmba kũthithĩria aana baaku kenda batĩkaigue gwĩkĩo bakwaga rĩrĩa bangĩ bagũkũngũĩra thigũnkũ?

¹⁷ Nĩatĩa ũũmba kũthithĩria aana baaku rĩrĩa bakwona bangĩ bagĩkũngũĩra thigũnkũ? Womba kũbathuranĩĩra gĩntũ kĩa mwanya ĩgiita na ĩgiita. Kinya no ũbae biewa batĩĩrĩgĩĩrĩte. Kĩmwe kĩa biewa bibiega buru ũũmba kwaa aana baaku nĩ wendo na ĩgiita rĩaku.

18. Nĩkĩ tũbuĩrĩte gwĩta mĩcemanione ya Gĩkristũ?

¹⁸ Kenda tũgwĩria Jehova, nĩtũkũbatara kuuma ndinine ya ũrongo na gũtiga mĩtugo na thigũnkũ ciayo. Na kinya nĩtũkũbatara kũthaathayia Mũrungu ũrĩa kwagĩrĩte. Atĩa? Njĩra ĩmwe nĩ gwĩta mĩcemanione ya Gĩkristũ ũtĩgũtĩĩra. (Thooma Ahibirania 10:24, 25.) Mĩcemanio nĩ ũntũ bũmwe bwa bata mono kĩrĩ ũthaathayia bwa mma. (Zaburi 22:22; 122:1) Rĩrĩa twacemania amwe twomba gwĩkanĩra inya.—Aroma 1:12.

19. Nĩkĩ nĩ ũntũ bwa gĩtũmi kwĩra bangĩ mma cia Bibiria irĩa wiritanĩte?

¹⁹ Njĩra ĩngĩ ya kũthuura ũthaathayia bwa mma nĩ kwaria na bangĩ bwegiĩ jarĩa wiritene Bibiriene. Antũ babaingĩ nĩbakwigua bũbũũĩ nĩ mantũ jamathũũku jarĩa jagũkarĩka nthĩgũrũne. (Ezekieli 9:4) Mbuga nĩ wiijĩ antũ bamwe baigagua ũu. Beere bwegiĩ wĩrĩgĩĩro bwaku bwa kũrigaria bwa ĩgiita rĩĩjĩte. O ũrĩa ũgeeta na mbere gwĩta mĩcemanione na kwĩra bangĩ ũmma bwa Bibiria, ũkona ũtiirĩrĩĩria rĩngĩ kwĩthĩrwa ũrĩ ndinine ya ũrongo na kũthingata mĩtugo yaayo. No wĩtĩkie buru ũkagwĩrua na Jehova akatharima mono gũciũmia gwaku rĩrĩa ũkũthuura kũmũthaathayia ũrĩa kwagĩrĩte.—Malaki 3:10.