1, 2. Шке деч мо нерген йодшаш улына да молан?

БИБЛИЙЫМ шымлен, те ужында: шукышт шкеныштым ӱшанышылан шотлат, но нунын паша ден туныктымашышт Юмылан йӧрдымӧ улыт (2 Коринфян-влаклан 6:17). «Кугу Вавилон» гыч, шоя религий гыч, лекташ кӱлеш манын, Иегова кӱшта (Почмаш 18:2, 4). Те мом ышташ таратыме улыда? Кажне шке дечын йодшаш: «Юмылан йӧрышӧ лийнем гын, мый шке семынем але Юмылан келшышын илышаш улам?»

² Те шоя религий гыч уже лектында гын, пеш сай. Но тыланда, очыни, шоя религий ден кылдалтше южо йӱла-влак кызытат келшат. Айста икмыняр йӱлам да пайремым ончен лектына да нунын шотышто Юмын ончалтышыжым пален налына.

3. а) Молан южыштлан юмоҥа деч посна Юмылан кумалаш йӧсӧ? б) Юмылан кумалмаште сӱретым кучылтмо нерген Библийыште мом возымо?

³ Южо еҥ-влак Юмылан кумалмаште юмоҥам кучылташ тунемыныт. Очыни, теат туге ыштенда да тиддеч посна кумалмаш тыланда Юмылан кумалме гаяк ок чуч. Но шарныза: Юмо гына каласен кертеш, кузе тудлан кумалаш кӱлеш.  Кумалмаште тӱрлӧ сӱретым кучылтмым Иегова йӧрдымылан шотла манын, Библийыште раш возымо. (Лудын лекса Исход 20:4, 5 *; Псалом 113:12—16; Исаия 42:8; 1 Иоаннын 5:21.)

4. а) Колышо родо-влаклан йӧрышӧ лияш молан огеш кӱл? б) Израиль калыклан колышо-влак дене кылым кучаш Иегова молан чарен?

⁴ Южо еҥ-влак, колышо родо-влаклан йӧрышӧ лияш манын, шуко жап ден вийым пытарат. Нуно колышо-влаклан эсогыл кумалын кертыт. Но пален налмына дене келшышын, колышо-влак мыланна ни полшен, ни зияным ыштен огыт керт. Нуно ала-кушто вес вере умбакыжат огыт иле. Нунын дене кеч-могай кылым кучаш лӱдыкшӧ, вет колышо-влак деч кеч-могай «увер» чынжымак демон-влак деч улеш. Теве молан Иегова Израиль калыкшым колышо-влак дене кылым кучымо деч чарен. Нуно демонизм дене кылдалтше чыла паша ден ӱзгар деч кораҥшаш улыт ыле (Второзаконие 18:10—12; 26-шо да 31-ше ешартыш статьялам ончыза).

5. Юмылан кумалмаште юмоҥам кучылтмым да колышылан кумалмашым чарнаш мо полша?

⁵ Тугеже, Юмылан кумалмаште юмоҥам кучылташ да тыгак колышылан кумалаш — чын огыл.  Тыгай пашам кодаш тыланда мо полшен кертеш? Библийым лудса да шоналтыза: тыгай кумалмаш Иеговалан келша мо? Мутат уке, огеш келше. Тыгай кумалмашым Иегова шакшылан шотла (Второзаконие 27:15). Кумалмаш шотышто ончалтышда Иегован гаяк лийже манын, кажне кечын Иегова деч полышым йодса, тудлан келшышын кумалаш тыланда вийым пуыжо манын кумалза (Исаия 55:9). Иегова тыланда шоя религий дене кылдалтше чыла паша ден ӱзгар деч утлаш вийым пуа манын, пеҥгыдын ӱшаныза.

6. Иисус Христосын шочмо кечыжым молан 25-ше декабрьыште палемдаш тӱҥалыныт?

⁶ Рошто пайрем — тиде кумдан палыме пайрем. Тиде кечын еҥ-влак Иисус Христосын шочмо кечыжым палемдат. Но чынжымак Рошто пайрем шоя религий ден кылдалтын. Ик энциклопедийыште возымо дене келшышын, Рим империйыште илыше язычник-влак 25-ше декабрьыште кечын шочмо кечыжым палемденыт. Язычник-влакым христиан вераш савыраш манын, религиозный вуйлатыше-влак тиде кечым Иисус Христосын шочмо кечыже семын палемдаш тӱҥалыныт. Но чынжымак Иисус тиде кечын шочын огыл * (Лукан 2:8—12). Иисусын икымше тунемшыже-влак Рошто пайремым палемден огытыл. Ик  книган каласымыж почеш Христосын шочмыж деч вара 200 ий жапыште «тудын шочмо кечыжым шагал еҥын палымыже шуын, да чынжымак кунам тудо шочын нигӧат пален огыл» (Sacred Origins of Profound Things). Рошто пайремым Иисусын колымыж деч вара икмыняр шӱдӧ ий эртымеке гына палемдаш тӱҥалыныт.

7. Чын христиан-влак Рошто пайремым молан огыт палемде?

⁷ Шукышт палат: Рошто пайрем дене кылдалтше йӱла-влак, мутлан, пӧлекым пӧлеклымаш але кочмаш-йӱмашым эртарымаш, язычестве гыч толыныт *. Тиде амаллан кӧра Английыште да Америкын южо верлаштыже тиде пайремым палемдаш ик жаплан чарненыт улмаш. Тиде пайремым палемдыше-влаклан тунам штрафымат тӱлыктеныт. Но вара еҥ-влак тиде пайремым угыч палемдаш тӱҥалыныт. Чын христиан-влак Юмым колыштынешт, сандене нуно Рошто пайремым огыт пайремле.

8, 9. Икымше христиан-влак шочмо кечым молан пайремлен огытыл?

⁸ Эше ик кумдан палыме пайрем — тиде шочмо кече. Христиан-влаклан тиде пайремым пайремлаш лиеш мо? Библийыште кок еҥын шочмо кечым пайремлымыже нерген возымо. Но нуно  Юмын служитлышыже лийын огытыл (Тӱҥалтыш 40:20; Маркын 6:21). Ту пайрем годым еҥ-влак шоя юмо-влакым чапландареныт улмаш. Сандене ик энциклопедийыште ойлымо почеш икымше христиан-влак «кеч-могай шочмо кечым пайремлымым язычестве дене кылдалтше йӱлалан шотленыт» (The World Book Encyclopedia).

⁹ Акрет римлян ден грек-влак ӱшаненыт, пуйто айдеме шочмо годым тудын дене пырля тыгай шӱлыш уло, кудо вара саде айдемым ӱмыр мучко арала. Ик книгаште ойлалтеш: «Калык шотлен, пуйто тиде шӱлыш тыгай юмо дене кылдалтын, кудын шочмо кечынже айдеме шочын» (The Lore of Birthdays).

10. Христиан-влак шочмо кечым молан палемдышаш огытыл?

¹⁰ Шоя религий дене кылдалтше пайрем-влакым Иегова кузе онча? (Исаия 65:11, 12). Нине пайремым тудо йӧрдымылан шотла. Сандене ме ни шочмо кечым, ни моло пайремым, кудо шоя религий дене кылдалтыт, она палемде.

11. Южо еҥ-влак пайремым молан пайремлат? Эн тӱҥжӧ мыланна мо лийшаш?

¹¹ Южо еҥ-влак Рошто ден вес пайрем-влакын шоя религий гыч лекмыштым палат гынат, тиде пайремым палемдымым огыт чарне. Нуно пайрем-влакым еш дене пырля жапым эртараш сай йӧнлан шотлат. А тендан шонымашда могай? Мутат уке, еш дене пырля жапым эртараш кӱлеш.  Иегова ешлан тӱҥалтышым пыштен, сандене еш коклаште лишыл кыл кучымашым ужнеже (Ефесян-влаклан 3:14, 15). Чынжымак, шоя религий дене кылдалтше иктаж-могай пайремым родо-влак дене ышташ келшена гын, ме нуным куандарена. Но мыланна эн тӱҥжӧ — Иеговам куандараш да тудын дене лишыл кыл кучымашым арален кодаш. Апостол Павел каласен: «Юмылан мо келшымым эре терген шогыза» (Ефесян-влаклан 5:10).

12. Могай пайрем-влак Иеговалан йӧрдымӧ улыт?

¹² Шуко еҥ шона, пуйто пайремын кушеч лекмыжым палаш огеш кӱл. Но Иегова тыге огеш шоно. Тыгай пайрем-влак, кудо шоя религий дене кылдалтыт, айдемым але элым чапландарат, Иеговалан йӧрдымӧ улыт. Теве ик пример. Египтян-влакын шоя юмышт лӱмеш шуко пайрем лийын. Египет гыч лекмеке, Израиль калык египтян-влакын пайремышт гыч иктыжым пайремлаш тӱҥалын. Нуно тиде пайремым «Иегова лӱмеш» ыштеныт гынат, Иегова нуным наказатлен (Исход 32:2—10). Библийыште возымо: «Ару огыл деке ида тӱкнӧ». (2 Коринфян-влаклан 6:17 лудын лекса.)

13. Пайрем-влакым пайремлымым чарнаш лийында гын, тендан могай йодышда лийын кертыт?

¹³ Те пайрем-влакым палемдымым чарнаш лийында гын, тендам, очыни, теве мо тургыжландара:  «Пайремым молан ом пайремле пашаште йодышташ тӱҥалыт гын, мый мом вашештем? Пайрем лӱмеш пуымо пӧлекым налаш але уке? Пелашем тудын дене пайремым пайремлаш йодеш гын, мом ышташ? Ешыштына шочмо кечым але вес пайремым она эртаре гын, йоча-влак ынышт ойгыро манын, мом ышташ лиеш?»

14, 15. Тендам пайрем дене саламлат але пӧлекым пӧлеклат гын, мом ыштыман?

¹⁴ Ситуаций тӱрлӧ лийын кертеш. Сандене мом каласаш але мом ышташ кажне гана сайын шонкалыман. Мутлан, иктаж-кӧ тендам пайрем дене саламла гын, те тудлан таум каласен кертыда. Но тиде пайремым молан ода пайремле айдемын палымыже шуэш гын, тендан ӱшанымашда нерген каласкален кертыда. Эре порын ойлыза да айдемын шижмашыжым шотыш налза. Библий тыгай каҥашым пуа: «Мутда эре поро, шинчал дене саемдыме лийже, кажнылан кузе вашешташ пален шогышаш улыда» (Колоссян-влаклан 4:6). Мутлан, тыге каласен кертыда: «Йолташ-влак дене жапым эртараш да пӧлекым пӧлеклаш мыланем келша, но лачак тиде пайрем лӱмеш мый пӧлекым ынем ыште».

¹⁵ Пӧлекым пӧлеклат гын, мом ыштыман? Библийыште тиде шотышто тура кӱштымаш уке. Но, совестьна яндар лийшаш манын, тушто возымо (1 Тимофейлан 1:18, 19). Пӧлекым пӧлеклыше айдеме тендан ончалтышда нерген, очыни,  нимомат огеш пале. Але, мӧҥгешла, пала да ойла: «Тый тиде пайремым от палемде гынат, мый тыланет пӧлекым ыштынем». Пӧлекым налаш але уке, те шке шонышаш улыда. Тыгодым эн тӱҥжӧ — совесть ваштареш каяш огыл. Иегова деч кораҥден кертше пашам ыштымына огеш шу.

16. Ешда иктаж-могай пайремым палемдынеже гын, кузе лийман?

¹⁶ Тендан ешдан иктаж-могай пайремым палемдымыже шуэш гын, кузе лийман? Ӱчашаш огеш кӱл. Шарныза: кажне еҥын шке решенийжым лукташ права уло. Шке шонымыдам тушкаш ида тырше. Нунын решенийыштым пагаледа гын, тунам нунат тендан решенийдам пагалаш тӱҥалыт. (Матфейын 7:12 лудын лекса.) Ешда нунын дене пырля пайремым палемдымыдам вуча гын, мом ыштыман? Эн ончыч Иеговалан кумалза. Чын решенийым лукташ тудын деч полышым йодса. Тыгак тиде пайрем нерген шукырак пален налаш тыршыза, кузе тудым эртарат пален налза. Пайремыш каяш але уке шонымыда годым шарныза: эн тӱҥжӧ — решенийна дене Иеговам ойгандараш огыл.

17. Пайрем деч посна кодмыштлан йоча-влак ынышт ойгыро манын, кузе нунылан полшаш лиеш?

¹⁷ Весе-влакын пайремым пайремлымыштым ужын, йочада-влак ынышт ойгыро манын, мом ышташ лиеш? Жапын-жапын йоча-влак дене пырля погынен, жапым веселан эртараш да  нунылан пӧлекым вучыдымын ышташ лиеш. Пӧлек-влак гыч эн сайже — тиде тендан жап ден йӧратымаш.

18. Христианысе вашлиймашыш кошташ молан кӱлешан?

¹⁸ Иеговам куандараш манын, шоя религий гыч лекташ да тудын дене кылдалтше йӱла ден пайремым палемдымым чарнаш кӱлеш. Но Юмылан йӧрышӧ лияш манын, тидым гына ышташ ок сите. Тудлан эше чын кумалаш тӱҥалман. Кузе тидым ышташ? Мутлан, христианысе вашлиймашыш эре кошташ. (Еврей-влаклан 10:24, 25 лудын лекса.) Вашлиймаш-влак Юмылан кумалмаште кугу рольым модыт (Псалом 21:23; 121:1). Тыгай вашлиймаште ме икте-весынам кумылаҥден кертына (Римлян-влаклан 1:12).

19. Библийысе чын нерген каласкалаш молан кӱлешан?

¹⁹ Тылеч посна Библий гыч пален налмыдам весе-влаклан каласкалаш кӱлеш. Шуко еҥ, тӱняште тынар шуко осал ыштымым ужын, чот ойгыра. Очыни, тенданат тыгай палымыда-влак улыт. Нунылан ончыкылыклан сай ӱшан нерген каласкалыза. Христианысе вашлиймашыш кошташ да библийысе чын нерген весе-влаклан каласкалаш тӱҥалын, жап эртымеке, те шке шижыда: шоя религий ден кылым кучымыда тендан уже огеш шу. Иеговалан чын кумалаш тӱҥалыда гын, Иегова тыланда шуко куан ден суапым пуа. Тидлан пеҥгыдын ӱшанен кертыда! (Малахия 3:10).