1, 2. (a) Enohoweleya kadda muthu ikohege aavi? (b) Ohiya okumamove bahi mugereja enafuneya ddi emodhaya?

MBIBLIYANI, ohusuza wi athu owinjhiva enihina nnamwebedha Mulugu eebaribari, mbwenye enowerana dhego obe enohudhiha dhego dhinamutakalela Mulugu. (2 Coríntios 6:17) Museluya buyoyo omuthukulele Yehova oniruma wi nirabele dhigereja dhowoota obe ‘Babiloniya munddimuwa.’ (Apocalipse 18:2, 4) Kivano, we onafuna were ddiniyani? Enohoweleya iyo atene osakula nnafunihu. Kadda muthu ikohege: ‘Ginere omwebedha Mulugu ni makalelo onafuniye obe gineerege madhowa ndala geeragana dhego gilemeelimi?’

² Akala gereja ele yowoota wayesiwemo ohukumamo, obe ohuloba wi eethimihemo ndina nawo, oherana ethu yapama. Mbwenye, podi wera ohuhalana mmurimani dhego obe dhilemelelo dhimodha dhinaharana ni gereja yowoota. Vano nnafuna noone vang’ono dhego dhimodha ni dhilemelelo dhimodha ni mwahaya bwaddi egafuneya nihiyoya okanna moonelo wa Yehova.

3. (a) Mwahaya bwaddi athu amodha ehiwedhaga omwebedha Mulugu ehinna ekwamuthu yosema? (b) Bibliya onasoriha ddi wodhela dhikwamuthu dhosema?

³ Athu amodha enihina omwebedha Mulugu ohulabihedhe ekwamuthu, yotheega. Mwaha eromile olabihedha dhikwamuthu egali ahimeene. We onubuwela ndo? Wubuwele nde dhihudheriwe mBibliyani. Bibliya onasoriha  wi makalelo oomwebedha Mulugu, kahiyo olabihedha dhikwamuthu.—Omwileri Êxodo 20:4, 5; Salmos 115:4-8; Isaías 42:8; 1 João 5:21.

4. (a) Ekalele ddi yowopiha owoga ni anookwa? (b) Mwahaya bwaddi Yehova adhe awadelihege Amwaana Izarayeli owoga ni anookwa?

⁴ Athu owinjhiva enononga mudhidhi ni kopolo dhewa wihina yahagalalihe amudhiwa ekwile. Amodhaya enofiyedha wawebedha anookwa. Mbwenye iyo kannanganyedha wi anookwa kinaakavihera athu newene kinanoniha goyi. Kawo mburo mmodha winayiwa ekalagawove. Owoga ni anookwa, yego yowopiha mwaha wi makalelo atene owawogana anookwa, annyaya bademoniyu. Bumwahaya Yehova adhe awadelihege Amwaana Izarayeli owoga ni anookwa. Muladduya bowi, muthu eragana ndo onaakela muthenga dhinadhela wa Ademoniyu.—Deuteronómio 18:10-12; osugwe Wonelamo 26 ni 31.

5. Wamwebedhaga Mulugu, enuukavihere ddi ohulabihedha dhikwamuthu obe ohawebedha anookwa?

⁵ Wamwebedhaga Mulugu, enuukavihere ddi ohulabihedha dhikwamuthu obe ohawebedha anookwa? Enafuneya fumwileri Bibliya ni onona mubuwelo wa Yehova wodhela muselu yola. Oliye anoona ninga dhego ‘dhotakala.’ (Deuteronómio 27:15) Malabo amatene walobelaga omulobege Yehova wihina ukavihere omwebedha oliye ni makalelo enarumedhiye. (Isaías 55:9) Okanne ebaribari wi Yehova onere wuvaha kopolo wihina orabele dhego dhatedhene dhiniwanana ni webedha wowoota.

6. 25 a Dezemburu walewa amujhesa baani? Ohukalawo muthu onone labo nibaliwe Yesu?

⁶ Wapeela elabo yatene, Natali ononiwe ninga nlabo nathima. Athu owinjhiva enomujha Natali yubuwelaga  wi Yesu abaliwe nlabo nenna. Ebaribariya sowi Natali, onokosa epaddi yowebedha wowoota. Encyclopedia dhaala onihina 25 a Dezemburu naali nlabo nathabelesa akudda Roma, yubuwelaga okuma wa nduwa wereye labo na 25 a Dezemburu. Anamaholela gereja yivahesa ndina neekiristawu, yahinona pamadhene wi Yesu kabaliwe nlabo na 25 a Dezemburu. Podive eganonne yojha festa labo nenna ninga labo nibaliwe Yesu. (Lucas 2:8-12) Anamahara a Yesu kiyamujha Natali. Livuru dhala nnotapulela wi dhigavinre yaka 200 Yesu agabaliwe, “kaavo anonne labona, athu vang’no bavedesa onona labo Yesu nibaliwiye.” (Sacred Origins of Profound Things) Natali ambele ojhiwa dhigavinre yaka 300, Yesu numala odhowa odhulu.

7. Makiristawu eebaribari ehinamujhela ddi Natali?

⁷ Athu owinjhiva ehinona wi mweddelo wa Natali fuvahana mukono podive eganonne wi emwambelena Natali kahiyo Makiristawu eebaribari. Motajhiha Winglatera dhahikalawo murudda, dhera afwanyiwa muthu amujhaga Natali, muthu yoyo owogiwa muladdu mwaha woononiwa wi Natali festa yamalabo. Athu ninga yayo yera osinyusiwa pamadhene. Mbwenye ogavinre mudhidhi vang’no wewule wakoddihiwesa, ohogoloweliwa ojhiwa Natali. Makiristawu eebaribari ehinamujhela ddi Natali? Aliwa esakunle omuhagalasa Mulugu mwa dhatedhene dhinapariwa.

8, 9. Mwahaya bwaddi Makiristawu oobajha kiyathabela nlabo nibaliwiwa?

⁸ Nlabo nimodha athu enavahesiwa thima, thinlabo nibaliwiwa. Makiristawu eebaribari enohara mweddelo yola? Muthupo woothabela nlabo noobaliwa Bibliya onasorihiye, thaathu abili yahali adhari a Yehova. (Génesis  40:20; Marcos 6:21) Athu yawebedhega aMulugu owoota, yothabelesa nlabo nibaliwiwa. Bumwahaya Makiristawu oobajha “egoona nlabo nna nothabela nlabo noobaliwa ninga mweddelo waathu ehiri Makiristawu.”—The World Book Encyclopedia.

⁹ Makolo aakudda Roma ni Agerego, yorumedha wi kadda muthu onabaliwa, onokanna muzimu onamukavihera egumaye yatene. Livuru na The Lore of Birthdays nnihina: “Muzimu oyo wowiwanana mwamakalelo ootikiniha ni mulugu wi omukaviherege muthu yole obaliwe.”

10. Mwahaya bwaddi Makiristawu a peeno ehithabelaga nlabo nibaliwiwa?

¹⁰ We onowubuwela wi Yehova kanarumedha muthupo dhiniwanana ni webedha wowoota? (Isaías 65:11, 12) Hee, oliye kanarumedha. Bumwahaya Makiristawu eebaribari ehijhaga festa dhiniwanana ni webedha wowoota.

11. (a) Mwahaya bwaddi athu egadidela othabela muthupo dhinamutakalela Yehova? (b) Ethu baani enahoweleya wi nivahe thima?

¹¹ Naari athu eganonne wi Natali ni festa dhimodha dhinadhela mugereja yowoota, athu amodha kinaselela ojha muthupo ndha. Monelo wewa bowi, ola mudhidhi wohagalala naamudhaga. Ki we, onubuwela ndo? Kahiyo yothega okala vamodha naanamudhi othapanyaga nuuhagalala. Opaddusile murala di Yehova, oliye onoofuna anaamudhi avamuralani ekale owiwanana ni ehagalalege. (Efésios 3:14, 15) Mbwenye Yehova onofuna wi nikale owiwelela, bumwahaya iyo kannafuna othabela muthupo dhihinarumedha Yehova. Kannafuna omuukula Yehova ni munigwa wowahagalasa amudhihu. Ethu yobajha mwigumini mwehu, fumuhagalasa Yehova. Bumwahaya murumiwi Pawulo adhe awogege: ‘Mweregena ndhe dhinamudhivela Nabwiya.’ — Efésios 5:10.

12. Feriyado baani Yehova ohunarumedhiye?

 ¹² Athu owinjhiva kinapwatha akala feriyado ndha dhihikanna widheliwa obe naari, mbwenye moonelo wa Yehova kahiyo oyene. Yehova kanarumedha feriyado dhiniwanana ni dhigereja dhowoota obe dhinaathithimiha athu obe elabo. Motajhiha, akudda Egipitu yahikanna feriyado dhowinjhiva, dhawebedhesiwana amulugu ewa owoota. Mudhidhi Amwaana Ezarayeli egoobowile mmadani mwakudda Egipitu, yahikungaga muthupo waharana ni webedha wowoota. Mbwenye annya yera, ola ‘muthupo wa Yehova.’ Egerilena muthupo ole, vasogolova Yehova, wasinyusa mwaha wa yothega yeriliwana. (Êxodo 32:2-10) Namavuhulela Izayiya, ohusoriha egi: ‘Kamupare yego siyego eri yonyakavala!’—Omwileri Isaías 52:11.

13. Makoho baani onakanniwe, wahiya mweddelo wohara feriyado?

¹³ Wahiya mweddelo wohara feriyado ndha, onere okanna makoho owinjhiva. Motajhiha: Akwaga oomabasani yagikoha, mwahaya bwaddi gihimujhaga Natali ginawakule addi? Ki gavahiwa mukono wanatali, ginasorihe ddi? Akala mwaraga obe mamunaga onogiwaddihedha ojha festa ginere ddi? Ginaakavihere addi anaaga ohuyelela murenddele mwaha iyo ohujha festa obe othabela nlabo nibaliwihu?

14, 15. Muthu di muthu eera okanne Natali apama obe onuvaha mukono wa Natali, onere ddi?

¹⁴ Wubuwela pama labo thilabo naferiyado nihinafiye, winere wukavihera. Motajhiha, muthu di muthu podi owoga egi, okanne Natali apama, dhereya ndo kahi omuukula. Ni madhu mang’nove we podi wera: “Ginotamalela”. Akala mudhidhi yole muthuya onafuna  anone mwahaya bwaddi ohumujhaga Natali, we podi omwaddela mwahaya. Mbwenye kudduwale owoga ni makalelo apama ni nriho. Bibliya onawoga egi: ‘Madhu enyu ekalege oodhiva, ninga yekiwe mwinnyu, wi mwandege omwakula kadda muthu.’ (Colossenses 4:6) Wafuna we podi owoga wi onodhiveliwa waredha naakwawo ni ovaha mukono wakanna, mbwenye kunajhehera werana nlabo na festa.

¹⁵ Ki akala muthu di muthu onowuvaha mukono wa Natali? Bibliya kawogile magano amatene akadda ethu enereyege, mbwenye enafuneya fuwerena ethu ehinahiya mubuwelo wunyemelaga. (1 Timóteo 1:18, 19) Podi wera muthu ole onuvaha mukono, kanonile wi kunamujha Natali. Obe oliye podi wera: ‘Miyo gihinona wi kunamujha Natali, mbwenye ginuvaha ni murima waga watene.’ Podive dhigari ndo, we dinasakula akala onafuna othukule obe naari. Yapama furumedha wakela akala mubuwelo wawo kunuunyemela. Kannafuna werena ethu sithu enaatakalihe webedha wehu obe enamuukula Yehova.

16. Onere ddi akala amudhawo enafuna ekunge festa nlabo naferiyado?

¹⁶ Onere ddi akala amudhawo enafuna ekunge festa nlabo naferiyado? Yereya ndo kukangane naaliwa. Kudduwale wi kadda muthu, podi osakula werena enafuniye. Ebaribari sowi onofuna wi aliwa erihege dhosakula dhawo. (Omwileri Mateus 7:12.) Onere ddi amudhawo yera, nnafuna njhe vamodha festa nnafunihu okanna? Ohunathi orumedha akala onere okalavo obe naari, orajhihe omuloba Yehova wi uvahe zelu yowedha osakula pama. Vano wubuwele, dhego baani dhinavolowelavo ni osayele dhoholela dhinawoga muselu yola. Ethu  enuukavihere, fuusakula wubuwelaga wi Yehova onere odhiveliwa.

17. Onakavihere addi anawo ohuyelela murenddele ni ohukanna murogo akwiwa yajhaga festa?

¹⁷ Onaakavihere addi anawo ohukanna murogo akwiwa yajhaga festa? Mudhidhi bumudhidhi, we podi okunga festa yohagalasa ni anawo, wakanna mukono, wavahege ohujhehaga labo na festa. Mukono wathima enajhehera anawo, bumudhidhi wawo ni odhivela.

18. Natugumanaga malabwene, nnapuravo ddi?

¹⁸ Omulobe Yehova, wi ukavihere orabela makalelo amatene eniwanana ndhigereja dhowoota ni festadha. Mbwenye enofuneya ohara webedha webaribari. Nnande addi? Wihina yereye ndo, enofuneya otugumana malabo amatene. (Omwileri Hebreus 10:24, 25.) Mutugumano makalelo oomwebedha Yehova. (Salmos 22:22; 122:1) Natugumana nnolibihana mmodha ni mukwaye.—Romanos 1:12.

19. Mwahaya bwaddi egahoweleya wawaddela athu ndhe dhinahudheriwe mBibliyani?

¹⁹ Makalelo mamodha osakula okosa epaddi yowebedha webaribari, fuwawaddela akwawo nde onahudheriwe mBibliyani. Athu owinjhiva kinahagalala mwaha wa goyi eri mwilaboni. Podi wera ohumunona muthu onoona goyi. Omwaddela muthu yoyo ejhehedhelo yosogolo enere omuhagalasa. Watugumanaga malabwene ni wawaddelaga athu amodha dhinahudheriwe wodhela ebaribari ya mBibliyani, onere owedha opa munigwa watene wanniwena waharana ni webedha wowoota. Wasakula webedha winarumedha Yehova, mohanganyedha oliye onere wureeliha ni onere wuvaha egumi yohagalasa mwaha wilibihera wawo.—Malaquias 3:10.