1, 2. ¿Toni moneki tiknemiliskej tinochin?

IJKON kemej tionmomachtijtiuj Biblia, tikonmatini ke miakej kijtouaj ke kiueyichiuaj Dios, sayoj ke tein melauj kichiuaj oso tamachtiaj tein yejuatsin kitauelita (2 Corintios 6:17). Yejua ika, Jiova technauatia maj tikauakan taneltokalis tein amo melauak, oso ‘Ueyi Babilonia’ (Apocalipsis 18:2, 4). Tinochin moneki tiknemiliskej toni tikchiuaskej, ox tiktekitiliskej Dios kemej yejuatsin kineki oso kemej tejuan tiknekij.

² Komo tikonkauakya se taneltokalis tein amo melauak oso tikonijkuilojya se amat kampa tikonijtoj ke amo ompa tionyasok, semi kuali tein tikonchiuak. Sayoj ke xa tikonnekiok tikonchiuas seki iluimej oso xa tikonchiaok tonal keman mochiuaj. Axkan maj ika titajtokan seki taman tein kichiuaj itech taneltokalis tein amo melauak, uan maj tikitakan keniuj kinita Jiova uan keyej moneki titanemiliskej kemej yejuatsin.

3. 1) ¿Keyej sekin ouij kinkisa amo kikuiskejok tiotsitsin? 2) ¿Keniuj kiita Jiova keman se kiueyichiua ika tiotsitsin?

³ Sekin uejkaujya kipianij tiotsitsin ininchan uan ika kiueyichiuaj Dios. Komo uejkaujya ijkon tikonueyichiua Dios, xa amo kuali tionmomachilia oso hasta tikonnemilia ke amo kuali yetok amo ijkon xikonueyichiuaok. Sayoj ke xikonelnamiki ke Jiova techmachtia keniuj kineki maj tikueyichiuakan. Uan Biblia senkis kijtoua ke Jiova amo kineki maj tikueyichiuakan ika tiotsitsin (xikonixtajtolti Hechos 17:29, 30; Salmo 115:4-8; Isaías 42:8; 1 Juan 5:21).

4. 1) ¿Keyej amo tiktajtaniaj Dios maj kinpaleui mikemej? 2) ¿Keyej Jiova kinnauatij israelitas maj amo kitemouanij tajtoskej iniuan mikemej?

⁴ Itech miak altepemej kichiuaj miak taman tein ika kinelnamikij  mikemej. Xa sekin kikuij miak tonalmej, chikaualis uan tomin keman kichiuaj seki taman tein ika kitemouaj maj mikemej kuali yetokan, kemej ijkuak kitataujtiaj Dios maj kinpaleui. Uan uelis kitemoskej kinyolpaktiskej uan kintajtaniskej nepaleuil. Sayoj ke timomachtijkejya ke moneki amo tikchiuaskej nejon, porin mikemej amo ueli techpaleuiaj nion techchiuiliaj tein amo kuali. Amo no nemitij okseko. Tein melauj, tamouilil se kitemos iniuan se tajtos, porin tein yeski tein tiknemiliskej ke techmatiltia se tochankauj akin momikilijya, tein melauj techmatiltijtokej amokuali ejekamej. Yejua ika, Jiova kinnauatij israelitas maj amo kitemouanij tajtoskej iniuan mikemej uan maj kiixtopeuanij tein yeski taman tein kikuij amokuali ejekamej (Deuteronomio 18:10-12). (Xikonita tajtolmelaualismej 25 uan 30.)

5. ¿Toni uelis mitsonpaleuis amo xikonkuiok tiotsitsin nion xikontemook maj mikemej kuali yetokan?

⁵ Komo tejuatsin tikonueyichiua Dios ika tiotsitsin oso tikonchiua seki taman tein ika tikontemoua maj mikemej kuali yetokan, ¿toni uelis mitsonpaleuis amo xikonchiuaok? Moneki tikonixtajtoltis Biblia uan tikonnemilis keniuj kiita Jiova nejon taman. Yejuatsin kiita ke pitsotik (Deuteronomio 27:15). Mojmostaj xikontajtani Jiova maj mitsonpaleui xiontanemili kemej yejuatsin uan xikonueyichiua kemej kineki (Isaías 55:9). Jiova mitsonpaleuis amo xikonchiuaok nochi tein momattokej kichiuaskej itech taneltokalis tein amo melauak.

6. ¿Keyej moixtalij maj itech tonal 25 metsti diciembre moelnamiki keman Jesús yolik?

⁶ Itech nochi taltikpak, Navidad yejua iluit tein okachi mochiua, uan miakej kinemiliaj ke ijkuak kielnamikij keman Jesús yolik. Sayoj ke Navidad ualeujtok itech taneltokalis tein amo melauak. Se amatajkuilol kimelaua ke ompa Roma, akin amo kitojtokayaj Cristo iluichiuayaj itech tonal 25  metsti diciembre porin kijtouayaj ke ijkuak yolik Tonaltsin. Akin taixyekanayaj itech taneltokalis kinekiaj maj miakej akin amo kitojtokayaj Cristo mochiuanij itatojtokakauan. Yejua ika kiixtalijkej kiiluichiuiliskej Jesús itech tonal 25 metsti diciembre, maski amo yolik itech nejon tonal (Lucas 2:8-12). Imomachtijkauan Jesús amo kichiuayaj Navidad. Amatajkuilol Los orígenes sagrados de las cosas profundas kijtoua ke itech 200 xiujmej satepan ke yolik Jesús, “amo akin kimatia, uan amo miakej kinekiaj kimatiskej, kemanian yekmelauj yolik Jesús”. Tein melauj, Navidad peuak mochiua panoua 300 xiujmej satepan ke Jesús momikilij.

7. ¿Keyej akin yekmelauj kichiuaj kemej Cristo amo kichiuaj Navidad?

⁷ Miakej kimatij keniuj peuak Navidad uan tein ijkuak kichiuaj, kemej sentakuaskej kalyetouanij uan motayokoliskej teisa. Kemej neskayot, kemej 350 xiujmej achtoya moixtalijka ompa Inglaterra uan seki xolalmej ompa Norteamérica maj amo akin kichiuani Navidad porin ualeua itech inintaneltokalis akin amo kitojtokayaj Cristo. Akin kichiuaya kitatsakuiltiayaj. Sayoj ke satepan, taltikpakneminij oksepa peuak kichiuaj Navidad. ¿Keyej akin yekmelauj kichiuaj kemej Cristo amo kichiuaj Navidad? Porin kinekij kiyolpaktiskej Dios itech nochi tein kichiuaj.

8, 9. ¿Keyej akin yekinika mochiujkej itatojtokakauan Cristo amo iluichiuayaj keman xiuajsiaj?

⁸ Okse iluit tein no miakej kichiuaj yejua keman xiuajsij. Itech Biblia moijtoua ke iluichiujkej keman xiuajsikej sayoj akin amo kiueyichiuayaj Jiova (Génesis 40:20; Marcos 6:21). Keman iluichiuayaj porin xiuajsiaj kinueyichiuayaj tiotsitsin. Itech amatajkuilol Las cosas nuestras de cada día moijtoua ke akin yekinika mochiujkej itatojtokakauan Cristo kiitayaj ke katka se taman tein kichiuayaj akin amo kineltokayaj Cristo. Yejua ika, amo iluichiuayaj keman xiuajsiaj.

 ⁹ Ne uejkauj, romanos uan griegos kineltokayaj ke keman se konetsin yolia, se tiotsin xiuajsia. Kineltokayaj ke nejon tiotsin kipaleuiskia nochi inemilis komo iluichiuaya itech tonal keman xiuajsia. Yejua ika, akin amo kitojtokayaj Cristo kineltokayaj ke monekia iluichiuaskej keman xiuajsiaj uan ijkon amo teyi kinpanoskia.

10. ¿Keyej akin axkan kichiuaj kemej Cristo amo moneki iluichiuaskej keman xiuajsij?

¹⁰ Jiova amo kiyolpaktia iluimej tein ualeuaj itech taneltokalis tein amo melauak (Isaías 65:11, 12; 1 Corintios 10:20). Yejua ika, akin axkan kichiuaj kemej Cristo amo moneki iluichiuaskej keman xiuajsij nion kichiuaskej okseki iluimej tein ualeuaj itech taneltokalis tein amo melauak.

11. 1) ¿Keyej sekin kichiuaj iluimej tein ualeuaj itech taneltokalis tein amo melauak? 2) ¿Toni moneki tikonitas ke okachi moneki?

¹¹ Sekin akin kimatij keniuj peuak Navidad uan okseki iluimej kisentokaj kichiuaj. Kinemiliaj ke sayoj itech nejon iluimej ueli yetokej iniuan ininchankauan. ¿No ijkon tikonnemilia tejuatsin? Kuali yetok maj se kineki se yetos iniuan se ichankauan. Jiova kichiuak maj moajsikan kalyetouanij uan kineki maj kuali timouikakan iniuan. Sayoj ke okachi moneki kuali timouikaskej iuan Jiova uan amo tiktemoskej tikinyolpaktiskej tochankauan ika iluimej tein ualeuaj itech taneltokalis tein amo melauak. Yejua ika, tatitanil Pablo kijtoj: “Ximomachtikan de ne chipaukanemilis tenika tikyolpaktiaj Totekotsin” (Efesios 5:10).

12. ¿Katiyejua iluimej amo kiyolpaktia Jiova?

¹² Miakej kinemiliaj ke amo moneki techtekipachos keniuj peuak mochiua se iluit. Sayoj ke Jiova amo ijkon tanemilia. Yejuatsin amo kiyolpaktia iluimej tein ualeuaj itech taneltokalis tein amo melauak nion iluimej tein ika kinueyitaliaj taltikpakneminij oso se altepet. Kemej neskayot,  akin nemiaj Egipto kichiuayaj miak iluimej tein ika kinueyichiuayaj inintiotsitsin. Satepan ke israelitas kiskej Egipto, kichiujkej se iluit kemej tein kichiuayaj egipcios uan kijtojkej ke kiiluichiuilijtoyaj Jiova. Sayoj ke Jiova kintatsakuiltij (Éxodo 32:2-10). Tejuan moneki tikchiuaskej tein kijtoj tatitanil Pablo: “Amo ximokalakijtinemikan ok tech ninpitsotiknemilis” (xikonixtajtolti 2 Corintios 6:17).

13. ¿Toni xa tionmotajtanis keman amo tikonchiuasok iluimej tein ualeuaj itech taneltokalis tein amo melauak?

¹³ Keman amo tikonchiuasok iluimej tein ualeuaj itech taneltokalis tein amo melauak, xa tionmotajtanis miak taman. Kemej neskayot: “¿Toni nikchiuas komo akin iniuan nitekiti nechtajtaniaj keyej amo nikchiua Navidad? ¿Toni nikchiuas komo nechtayokoliaj teisa itech Navidad? ¿Toni nikchiuas komo nonamik kineki maj nikchiua se iluit tein Dios amo kiyolpaktia? ¿Keniuj uelis nikinpaleuis nokoneuan maj amo motayokoltikan porin amo tikchiuaj se taman iluit oso amo tiiluichiuaj keman xiuajsij?”.

14, 15. 1) ¿Toni uelis tikonchiuas komo mitsoniluiaj “¡Feliz Navidad!” oso “¡Feliz Año Nuevo!”? 2) ¿Toni uelis tikonchiuas komo mitsontayokoliaj teisa itech Navidad oso keman tionxiuajsi?

¹⁴ Moneki kuali tikixejekoskej toni tikijtoskej uan toni tikchiuaskej keman panos seki taman. Kemej neskayot, keman se taltikpaknenkej mitsoniluis “¡Feliz Navidad!” oso “¡Feliz Año Nuevo!”, amo xikonchiua ke amo tikonkakik, ta uelis sayoj tikoniluis “tasojkamatik”. Uan komo kineki kimatis okachi, uelis tikoniluis keyej amo tikonchiua nejon iluit. Sayoj ke nochipa xionkualtakat uan xikonpoujkaita oso xikonmouiskaita. Biblia kijtoua: “Namotajtolis nachipa ma monextijtiu ika ne iteiknelilis, uan amo aken xikinyolxokolijtiyakan. Uan ijkon nankimatiyaske de keniu uelis nankinankilijtiyaske  cada se” (Colosenses 4:6). Xa uelis tikoniluis ke tikonuelita tionyetos iniuan oksekin uan tikontayokolis teisa, sayoj ke amo tikonchiua itech nejon tonalmej.

¹⁵ ¿Toni moneki tikonchiuas komo mitsontayokoliaj teisa itech Navidad oso keman tionxiuajsi? Biblia amo kijtoua toni uelis tikchiuaskej uan toni amo. Sayoj ke komo tikonchiua teisa tein tikonnemilia ke amo kiyolpaktia Jiova, uelis tikonchiuas maj motanemilil amo yektekitiok. Yejua ika Biblia kijtoua ke moneki amo tikchiuaskej nejon (1 Timoteo 1:18, 19). Xa akin kineki mitsontayokolis teisa amo kimati ke tejuatsin amo tikonchiua nejon iluit. Oso xa mitsoniluis: “Nikmati ke amo tikchiua nejin iluit, sayoj ke nikneki nimitstayokolis nejin”. Itech sejse taman tein panos, tejuatsin moneki tikonixejekos ox tikonselis inetetayokolil oso amo. Sayoj ke moneki tikonitas maj motanemilil kisentoka yektekiti. Amo tiknekij tikchiuaskej nion teyi tein kichiuas maj amo kuali timouikakanok iuan Jiova.

16. ¿Toni moneki tikonchiuas komo mochankauan kinekij kichiuaskej se iluit tein ualeua itech taneltokalis tein amo melauak?

¹⁶ ¿Toni moneki tikonchiuas komo mochankauan kinekij kichiuaskej se iluit tein ualeua itech taneltokalis tein amo melauak? Amo iniuan xionmotajtolteui. Xikonelnamiki ke yejuan uelis kiixtaliskej toni kichiuaskej. Xionkualtakat uan amo xikonixnamiki, ijkon kemej tejuatsin no tikonneki maj amo mitsonixnamikikan (xikonixtajtolti Mateo 7:12). Sayoj ke ¿toni tikonchiuas komo kinekij iniuan xionyeto keman kichiuaskej iluit? Achto ke tikonixejekos toni tikonchiuas, xikontajtani Jiova maj mitsonpaleui xikonchiua tein moneki. Xikonnemili keniuj kiita Dios nejon iluit, uan xikontemo keniuj peuak mochiua itech amaixmej tein ika tajtouaj Biblia uan okseki taman  amatajkuilolmej. Xikonelnamiki ke tejuatsin tikonneki nochipa tikonchiuas tein Jiova kiyolpaktia.

17. ¿Keniuj uelis tikonpaleuis mokoneuan maj amo kinemilikan ke mopolouilijtokej teisa tein kuali porin amo naniluichiuaj?

¹⁷ ¿Keniuj uelis tikonpaleuis mokoneuan maj amo kinemilikan ke mopolouilijtokej teisa tein kuali keman kiitaj ke oksekin kichiuaj iluimej? Kemansa xikonchiua teisa kampa yejuan uelis moyolpaktiskej. No uelis tikonmakas se netetayokolil keman amo kimattoskej. Se netetayokolil tein okachi kipia ipatiuj yejua tikontemos iniuan tionyetos uan tikontasojtas.

18. ¿Keyej moneki tiyaskej ininnechikoluan itaixpantijkauan Jiova?

¹⁸ Komo tiknekij tikyolpaktiskej Jiova, moneki tikauaskej taneltokalis tein amo melauak uan amo tikchiuaskej iluimej uan okseki taman tein ompa mochiuaj. Sayoj ke no moneki tikueyichiuaskej Dios kemej yejuatsin kineki. ¿Keniuj? Se taman yejua komo tiyouij ininnechikoluan itaixpantijkauan Jiova nochi semanas (xikonixtajtolti Hebreos 10:24, 25). Nechikolmej semi monekij porin ika tikueyichiuaj Jiova (Salmo 22:22; 122:1). Uan ompa no timosenyolchikauaj (Romanos 1:12).

19. ¿Keyej moneki tikontapouis oksekin tein tionmomachtijtok itech Biblia?

¹⁹ No tikueyichiuaj Dios kemej yejuatsin kineki komo tikintapouiaj oksekin tein timomachtijtokej itech Biblia. Miakej kintekipachoua tein panotok itech taltikpak. Xa tikonixmati sekin akin ijkon momachiliaj. Komo ijkon, xikontapoui toni tatiochiualismej tikonchia tikonselis satepan. Ijkon kemej okachi tionyas nechikolmej uan tikontapouis oksekin tein kijtoua Biblia, amo tikonnekisok tikonsentokas itech taneltokalis tein amo melauak nion tikonchiuasok tein ompa kichiuaj. Semi tionyolpakis uan Jiova mitsontatiochiuis porin tionmochikaua tikonueyichiuas kemej yejuatsin kineki (Malaquías 3:10).