1, 2. Mubvunjo wapi wamunodikana kujiita mwega, zve ngenyi izvi zvinosisira?

KUBVIRA pa jijo yenyu yo Bhaibheri, makajija kuti vandhu vazinji vanonanga kuti vanonamata Mwari, kasike vanojijisa no kuita zvinonyenywa kamare ndi Mwari. (2 VaKorinto 6:17) Ngo zvinoitisa kuti Jehovha atibvunje kuti tibude mu zviara zvo manyepo, ‘Bhabhironi Guru.’ (Apokalipsi 18:2, 4) Munozoitenyi? Tese tino zvivaringo zvo kutema, zve tinodikana kujibvunjisa kudari: ‘Ndinoda kunamata Mwari munjira yaanoda kuti tiite here, kana kuti ndinoda kumunamata mu njira yandaiita kare?’

² Kudari makasiya kare ciara co manyepo, makaita zvakanaka maningi. Asi kangaije ngo mukati menyu muciri kushandisa zviro pomwe no zvirovejeso zvo ciara co manyepo. Imanyi tipopore zviro no zvirovejeso izvi zve tivone kuti ngenyi zvinosisira maningi kuzvivona inga Jehovha mavonere aanozviita.

3. (a) Ngenyi vamweni vanganesehwa kuregera kushandisa mufananijo pa kunamata kwavo? (b) Bhaibheri rinonangenyi ngo pamusoro po kushandisa mufananijo pa kunamata Mwari?

³ Vamweni vaishandisa mufananijo no zvidandiro mu nyumba mavo kuti vanamate Mwari kubvira kare. Kudari maizviita, zvingamunesa, pikija kutozvivona zvakashata kunamata mucina zviro izvi. Asi mucakanganwa, Jehovha anotijijisa manamatire atingamuita. Bhaibheri rinotibvunja pambhene kuti Jehovha aadi kuti tishandise mufananijo pa kunamata kwedu.—Verenganyi Exodo 20:4, 5; Nduyo 115:4-8; Isaia 42:8; 1 Johani 5:21.

4. (a) Ngenyi ticikadikani kunamata majicekuru edu? (b) Ngenyi Jehovha anobvunja vandhu vake kuti vatame kueja kubhuya no vakafa?

 ⁴ Vandhu vamweni vangatopeja nguva zinji no simba ravo vecieja kudakajisa majicekuru avo akafa kare. Ivona vangatovanamata. Asi takajija kuti vakafa avakwanisi kutibesera nee avatikhuvazi. Avaripi kurarama kumwenizve. I zviro zvakashata maningi kueja kubhuya navo ngo kuti masoko ese angaita inga ari kubva ku majicekuru akafa, anonga ecibva ku madhimoni kamare. Ngo zvakaitisa kuti Jehovha abvunje vaIziraeri kuti vatame kueja kubhuya no majicekuru akafa kana kunghwina mu ciricese cakabatana no madhimoni.—Deuteronòmio 18:10-12; vonanyi Masoko o Kupejisira zviverengo 26 na 31.

5. Zvicinyi zvingamubesera kuti mutame kushandisa mufananijo pa kunamata Mwari kana kuregera kunamata majicekuru enyu?

⁵ Zvicinyi zvingamubesera kuti mutame kushandisa mufananijo pa kunamata Mwari kana kuregera kunamata majicekuru enyu? Munodikana kuverenga Bhaibheri zve morangarijisisa mavonere azvinoithwa ndi Jehovha. Iyena anozvivona inga “cinyangajiso.” (Deuteronòmio 27:15) Itanyi mukumbiro kuna Jehovha njiku jese kuti amubesere kuvona zviro inga mavonere aanozviita zve kuti amubesere kunamata iyena mu njira yaanoda. (Isaia 55:9) Ivanyi no cokwadi co kuti Jehovha anozomupa simba ro kubvisa zviri zvese zvakabatana no manamatire o kunyepa.

6. Ngenyi njiku 25 ya Mbuji yakakhethwa inga njiku yo kubahwa ka Jesu?

⁶ Munyika yese, Khisimuso ndi imwe yo njiku inoreremejwa maningi ngo vandhu, zve vandhu vazinji vanorangarira kuti vari kucerekeja njiku yo kubahwa  ka Jesu. Asi Khisimuso rinobva ku zviara zvo manyepo. Encyclopedia imweni yakadurujira kuti vahedheni vo ku Roma vaiceukija njiku yo kubahwa ko mwana mu njiku 25 ya Mbuji. Vatungamiriri vo maceci vaida kuti vahedheni vaite maKristu, ngo kudaro ivona vaiceukija njiku iyi inga njiku yakabahwa Jesu pikija acizivi kubahwa mu njiku 25 ya Mbuji. (Luka 2:8-12) Vajiji va Jesu avacaiceukijepi Khisimuso. Bhuku Sacred Origins of Profound Things, rinodurujira kuti mu 200 o makore Jesu naapera kubahwa, “apana waiziva njiku yaakabahwa, zve vainga vashoma vaidakarira kuiziva.” Kuceukijwa ko Khisimuso, kwakatanga kare hako Jesu acito aviya pasi pano.

7. Ngenyi maKristu okadi-kadi aaceukiji Khisimuso?

⁷ Vandhu vazinji vanoziva pakatangira Khisimuso no zvimutango-mutango zvayo, zvakadari inga kuita mabiko no kuita zvipo. Inga muezaniso, ku Ingaratera no mativi o ku Amerika, kwainga kuno mukuvo wairambijwa kuceukijwa Khisimuso ngo kuti yakabva ku cihedheni. Wese waiiceukija waipanicwa. Asi vakazovona vandhu votangazve kuceukija Khisimuso. Ngenyi maKristu okadi-kadi aaceukiji Khisimuso? Ngokuti vanoda kudakajisa Mwari mu zvese zvaanoita.

8, 9. Ngenyi maKristu okare aacaiceukijepi njiku jo kubahwa?

⁸ Cimwenizve cinoceukijwa ngo vandhu i njiku yo kubahwa kwavo. MaKristu anodikana kuceukija njiku yo kubahwa kwao here? Kuceukijwa ko njiku yo kubahwa inonangwa mu Bhaibheri yaiithwa ngo vandhu vacikanamati Jehovha. (Genesi 40:20; Marco 6:21) Kuceukija njiku yo kubahwa zvaishandisihwa kuitira kukuja zvimwari zvomanyepo. Ngo zvaiitisa kuti  maKristu okare “vavone kuceukijwa ko njiku yo kubahwa ko ari wese inga zvirovejeso zvo cihedheni.”—The World Book Encyclopedia.

⁹ VaRoma no vaGiriki vokare, vaidavira kuti pano mujimu unonga uripo pa njiku yo kubahwa ko mundhu umwe nga umwe, zve waimujivirira pa upenyu hwake hwese. Bhuku The Lore of Birthdays rinodurujira kuti: “Mujimu uwu, wainga no ushamwari wo masaramuso na mwari wakabahwa mu njiku yondhoyo no yo kubahwa ko mundhu umwe nga umwe.”

10. Ngenyi maKristu nyamasi uno aaceukiji njiku yo kubahwa?

¹⁰ Munorangarira kuti Jehovha anotendera kuceukijwa kwakabatana no zviara zvo manyepo here? (Isaia 65:11, 12) Haiwa, aatenderi. Ngo zvinoitisa kuti titame kuceukija njiku yo kubahwa kana njiku jinoreremejwa jakabata no zviara zvo manyepo.

11. Ngenyi vandhu vamweni vanoceukija mafiriyadho? Asi ngo capi cinodikana kuva cinosisira maningi kwamuri?

¹¹ Vamweni vanoziva kuti Khisimuso no mafiriyadho amweni anobva ku cihedheni, asi ivona vanoramba vecijiceukija. Vanorangarira kuti njiku iji i mukana wakanaka wo kupeja nguva no mbhuri. Ngo zvamunorangariravo here? Azvizivi kushata kudakarira kupeja nguva no mbhuri yenyu. Jehovha wakaita mbhuri, zve iyena anoda kuti tive no ushamwari hwakanaka nayo. (VaEfeso 3:14, 15) Asi tinodikana kubatikana maningi ngo kuva no ushamwari hwakanaka na Jehovha kuciripi kudakajisa ukama hwedu ngo kuceukija mafiriyadho o cihedheni. Ngo zvakaitisa kuti mupostori Pauro anange kuti: “Psanganyi kuziva ibzo bzinonakira Tenji.”—VaEfeso 5:10.

12. Zvicinyi zvingaitisa kuti mafiriyadho atame kudavihwa ndi Jehovha?

 ¹² Vandhu vazinji vanorangarira kuti kunobva mafiriyadho akuna basa, asi andiwopi mavonero a Jehovha. Iyena aatenderi mafiriyadho anobva ku manamatire o manyepo kana anokuja vandhu, zvitatijo zvo nyika. Inga muezaniso, vaEjipita vainga no zviceukijo zvakawanda zvo zvimwari zvo manyepo. Pa kupera kutiza ko vaIziraeri kubva mu Ejipita, ivona vakatora ciceukijo cimwe cavo co cihedheni vocidaninja kuti ‘kubusira [Jehovha] Mwari.’ (Exodo 32:2-10) Inga zvakananga muporofeti Isaia, itisu atidikani ‘kupsasa bziro bzakangora!’—Verenganyi Isaia 52:11.

13. Mubvunjo japi jamungava najo pamunosunga kuregera kuceukija mafiriyadho?

¹³ Pamunosunga kuregera kuceukija mafiriyadho, mungava no mubvunjo jakawanda. Inga muezaniso: Ndinodikana kuitenyi, kudari mudoni wangu wo kubasa akandikumbira kuti ticeukije tese Khisimuso? Ndinodikana kuitenyi, kudari mundhu akandipekeja mabofesta o Khisimuso? Ndinodika kuitenyi, kudari wandakarovorana nae ecida kuti ndiceukije mafiriyadho? Ndingabeseresa kudini vana vangu kuti vatame kunyangajwa ngo pamusoro po kutama kuceukija mafiriyadho kana njiku jo vakabahwa?

14, 15. Mungaitenyi kudari mundhu akamubvunja kuti muve no firiyadho yakanaka kana akamupekeja cipo?

¹⁴ Zvinosisira maningi kuva no mazwiro o vamweni pamunopsaka zvokubhuya no kuita pa shwiro imwe nga imwe. Inga muezaniso, kudari mundhu akamubvunja kuti muve no firiyadho yakanaka, amudikani kumushora. Nanganyi henyu kuti, “Tabonga.” Kaveta mukavona kuti mundhuwo ari kuda kuziva zvizinji, mungada  kumudurujira kuti ngenyi mucikaceukiji mafiriyadho. Asi nguva jese ivanyi vakanaka, vanongwarira zve vanonderemejo. Bhaibheri rinoti: “Izwi renyu ngariite rakanaka nguva jese, rakarungwa ngo munyu, kuti muzive kupingura ariwese inga bzaanofanera.” (VaKolosi 4:6) Kangaije mungatodurujira kuti munodakarira kupeja nguva no vamweni zve no kupekeja zvipo, asi wari uno mungatoramba kuzviita ngo kuti zvakabatana no mafiriyadho.

¹⁵ Mungaitenyi kudari mundhu akamupekeja cipo? Bhaibheri aripekeji nda-nda-nda yo mutemo, asi irona rinonanga kuti tinodikana kuva no hana yakanaka. (1 Timoti 1:18, 19, Shanduro yeNyika Itsva) Kangaije mundhu ari kumuparo cipo aazvizivi kuti amuceukiji firiyadho. Kana kuti nguva jimweni angati, “Ndinozviziva kuti amuceukiji firiyadho, asi ndiri kuda hangu kumupekeja ici.” Mu shwiro mbiri iji, mungakheta kuashira kana kutama kuashira cipo ici. Asi azvinenyi no cisungo cenyu, munodikana kuva no cokwadi co kuramba muno hana yakanaka. Atidikani kuita ciricese cinoshatisa ushamwari hwedu na Jehovha.

16. Zvicinyi zvamungaita kudari mbhuri yenyu yecida kuceukija mafiriyadho?

¹⁶ Mungaitenyi kudari mbhuri yenyu yecida kuaceukija mafiriyadho? Macadotakana navo. Ceujanyi kuti ivona vanotendehwa kusunga zvavanoda kuita. Ivanyi vakanaka zve vanoreremeja zvavanokheta inga zvamunodavo kuti vareremeje zvamunokheta. (Verenganyi Mateu 7:12.) Asi kudari mbhuri yenyu yecida kuti mupeje nguva navo pa firiyadho, mungaitenyi? Mucito masunga kuti mungaitenyi, itanyi mukumbiro kuna  Jehovha kuti amubesere kuita cisungo cakanaka. Rangariranyi shwiroyo, zve ipsakisisenyi. Mucakanganwa kuti munodikana kudakajisa Jehovha.

17. Zvicinyi zvamungaita kuti mubesere vana venyu kuti vatame kuzwa inga vari kuruza, vamweni pavanoceukija mafiriyadho?

¹⁷ Mungaitenyi kuti mubesere vana venyu pavanovona vamweni veciceukija mafiriyadho? Nguva no nguva varongerenyi mukuvo wakanaka. Mecivapekejavo zvipo. Zve cipo cakanaka camungapa vana venyu inguva yenyu no rudo hwenyu.

18. Ngenyi tinodika kwenda ku musongano jo ciKristu?

¹⁸ Kuti tidakajise Jehovha, tinodikana kutiza zviara zvo manyepo no zvirovejeso zvazvo no mafiriyadho azvo. Kuitisa kudini? Njira imwe, ngo yo kwenda ku musongano jo ciKristu nguva jese.(Verenganyi Vaheberi 10:24, 25.) Musongano, i divi rinosisira maningi ro kunamata ko cokwadi. (Nduyo 22:23; 122:1) Tingavangisana patinosongana pamwepo.—VaRoma 1:12.

19. Ngenyi zvinosisira maningi kubvunja vamweni zvokadi yo Bhaibheri yamakajija?

¹⁹ Divi rimweni ro kukheta kunamata kokadi-kadi, ngo ro kubhuya no vamweni ngo zvatakajija mu Bhaibheri. Vandhu vazinji vari kutamba nyathwa ngo zviro zvakashata zviri kuitika pasi pano. Kangaije munoziva vandhu vari kutamba nyathwa! Vabvunjenyi vetero yenyu yo kumbeji. Pamunoenda ku musongano jo ciKristu, mecibvunja vamweni cokwadi co Bhaibheri, munozovona kuti amuzodakaririzve kuva divi ro zviara zvo manyepo no zvirovejeso zvazvo. Ivanyi no cokwadi kuti munozova anodakara zve kuti Jehovha anozokomborera maningi kuvangisira kwenyu kukheta kumunamata ngo njira yakanaka.—Malakia 3:10.