1, 2. Nge kore ta ace bua co eto bua ko? Ka wen’ ore nge nidi ace ke bua co eto bua ko?

WENE ri ta yeno nore Tusi Hmijoc, bua hna yenone ko, hmaiai kore ngome ci ie ko, buice ci thidilu du Madaru. Ke nianedi ko, buice ci pule ne ci rue ore ta ace ci kecone kei Nubonengo. (2 Korinito 6:17) Wen’ omelei, Iehova ci awa eje co okonebuti sere ri hmi me waiao, “Babulona me hmaiai.” (Ahngabot 18:2, 4) Nge di kore bua co rue? Eje ileodene co ureie ore hmi so ej. Eje co eto eje ko ko: ‘Ilo, inu ci alane co thidilu du Madaru inom’ ore alatone ni Nubonengo, ca nge inu co rue ko ore hmi inu hna acidanon?’

² Ngei bua ma okonebuti wene ri hmi me waiao, melei nidi roi. Ke numu ngei ta hna acidanone wene ri hmi me waiao bua ci hnorone ko. Ule sesonelo ke ej’ ore ta hna acidanon’ omelei. Ile bua co carajewe ore tane me nidi ace co ule ore ta hna acidanon’ omelei, inom’ ore la ule ni Iehova.

3. (a) Numu ta ngome ci uane ko, ushiwa kore co thidilu du Madaru ngei me deko ta wangom. Wen’ ore nge? (b) Ci ie ko nge kei Tusi Hmijoc ri pon’ ore ci yose ore ta wangome bane hmi?

³ Ha hmaiai kore ta kenereken, ta ngome ci yose ore ta wangom, ta hna ca wangom, ca ta atarau bane thidilu du Madaru. Bua ngei ci rue inomelei? Ngei  bua ma cedi ko, egewa, melei du bua ngei se pengen, ca nia kore co thidilu du Madaru, ngei me tako kore ta ac’ omelei. Ke ua roionelo ke bua ko: Iehova kore ci musion’ ore la thidilu du Nubonengo. Ka Tusi Hmijoc ci ie netitone ko: Iehova deko ma alane ko, eje co thidilu du Nubonengo lene sen’ ore ta wangom.​—Ieielo Esodo 20:4, 5; Ta Salamo 115:4-8; Isaia 42:8; 1 Ioane 5:21.

4. (a) Deko co thidilu du ta re pa. Wen’ ore nge? (b) Iehova hna awan’ ore nodei sinemenenge ni Nubonengo ko, deko lo co tubuhnidi co enengoco ne nodei tango. Wen’ ore nge?

⁴ Numu ta ngome ci nidi luzio ezien, ci luzio engetac, ne ci luzio mane bane aopodoneni ore ta re papani buic. Se ta ran, buice ci hmi du ta re papani buic. Ke eje hna yenone ko, nodei tango tha thuni ko co konekatu ej, ka se tha thuni ko co rue ore nia du ej. Buice deko ma ci menenge ri se guhne. Ka se nidi nia kore co tubuhnidi co enengoco ne nodei tango, wen’ ore ta nata wene buic, melei ta nata wenei nodei demoni. Tan’ omelei, Iehova hna awa si Iseraela ko, deko lo co tubuhnidi co enengoco ne nodei tango. Deko lo joko ke buice co rue o se ace ci aehngeni ore ci ru kaze.​—Deuteronomi 18:10-12; ule ore so Notes 26 ne 31, ri pages 252 ne 255.

5. Ngei bua me ci yose ore ta wangome bane thidilu du Madaru, ca ngei bua me ci hmi du ta re pa, nge kore co konekatu bua ha thu haroilu hna rue inomelei?

⁵ Ngei bua me ci yose ore ta wangome bane thidilu du Madaru, ca ngei bua me ci hmi du ta re pa, nge kore co konekatu bua ha thu haroilu hna rue inomelei? Bua co ieie ore Tusi Hmijoc, ne co  nidi ua hmaiaion’ ore uane ni Madaru: du Nubonengo, nidi “kogo,” ne nidi nia komelei. (Deuteronomi 27:15) Ri nodei ran, hnelo du Iehova ha thu konekatu bua kei Nubonengo co ule ore nodei ace inom’ ore Nubonengo ci ule, ne co thidilu du Nubonengo inom’ ore alatone ni Nubonengo. (Isaia 55:9) Bua thuni co ua sesekone ko, Nubonengo co kanu bua ore engetace me kueil, bane konekatu bua co nua cil’ ore nodei ace ci aehngeni ore nodei hmi me waiao.

6. Ore ta naca hmi hna alane co la feton’ ore rane hna hnapo Iesu ri 25 diseba. Wen’ ore nge?

⁶ Ri ten’ ore aw’ ileoden, ore Noël melei se la fête me nidi mec. Hmaiaiil’ ore ngome ci uane ko, melei ci uan’ ore rane hna hnapo Iesu. Ke nianedi ko, Noël melei se la fête me ci aehngeni ore hmi me waiao. O se encyclopédie ci ie ahngane ko, ta si Rome, ta ngome me ci hmi waiao (ta ngome ci thidilu jeu’ ore hmaiai kore makaze), ci la feton’ ore rane hna hnapon’ ore du, ri 25 diseba. Ta naca hmi hna alane ko, hmaiai kore ta ngome ri hmi me waiao co kerisiano. Ile buice me uanelo co la feton’ ore rane hna hnapo Iesu ri 25 diseba, kacene ko Iesu deko ma hna hnapo ri ran’ omelei. (Luke 2:8-12) Ore nodei re kokonieni Iesu deko sa te ko hna la feton’ ore Noël. O se gu tusi ci ie ahngane ko, 200 kore kenerekene thubenelo ore hna hnapo Iesu, “deko se ngome me ule ore rane hna hnapo Iesu, ka wakaredo so kore ngome ci nidi acon’ ore ran’ omelei.” (Sacred  Origins of Profound Things) Ore Noël hna whane co la fetone 100 kore ta kenerekene thubenelo ore hna hnapo Iesu.

7. Wen’ ore nge nodei kerisiano me seseko deko ci la feton’ ore Noël?

⁷ Hmaiai kore ngome ha ule ko, ore Noël ne ta hna acidanone ri pon’ ore Noël (inom’ ore ci ethawa kado, ne ci kodraru sese), melei wene ri hmi me waiao. Ri se ezien, i Angleterre ne ri se ta menenge i Amerika, hna wathebon’ ore co la feton’ ore Noël, wen’ ore Noël wene ri hmi me waiao. Ka ta ngome deko ma ninen’ ore wathebo omelei, co kalabuson. Ke ma iwebuti kore ezien, ile buice me whanelo yawe co la feton’ ore Noël. Wen’ ore nge nodei kerisiano me seseko deko ci la feton’ ore Noël? Wen’ ore buice ci alane co aopodoneni Madaru.

8, 9. Ore nodei kerisiano me hna dane deko hna la feton’ ore anniversaire ni buic. Wen’ ore nge?

⁸ Hmaiai kore ngome ci la feton’ ore anniversaire ni buic. Ilo, nodei kerisiano me seseko ci la feton’ ore anniversaire ni buic? Ore ta anniversaires hna ie ri Tusi Hmijoc, melei hna la fetone hnen’ ore ta ngome me deko ci thidilu du Iehova. (Genese 40:20; Mareko 6:21) Sei buic’ ore ci ru hmi me waiao, ore ci la feton’ ore anniversaire, melei bane ahmani ore ta makaze me waiao. Wen’ omelei, du nodei kerisiano me hna dan, “ore ci la feton’ ore anniversaire, melei wene ri se hna acidanon’ ore hmi me waiao.”​—The World Book Encyclopedia.

 ⁹ Ta si Rome ne ta si Grèce hna ua sesekone ko, ore rane hna hnapon’ o se ngom, melei netitiluko ne il’ ore rane hna hnapon’ o se makaze me waiao. Buice hna uane ko, o se uieni me ci hue sa ne il’ ore makaze omelei, hna melei ri ezien’ ore hna hnapon’ ore ngom. Ka ngei me co cagoren’ ore ngom’ omelei kore uieni, roi kore ngom’ omelei co la feton’ ore anniversaire nore makaze me waiao.

10. Ore nodei kerisiano me seseko deko ci la feton’ ore anniversaire ni buic. Wen’ ore nge?

¹⁰ Du bua, Iehova ci kedi ore ta la fête ci aehngeni ore hmi me waiao? (Isaia 65: 11, 12) Tangoko. Wen’ omelei, ore nodei kerisiano me seseko deko ci la feton’ ore anniversaire ni buic, ka se deko ci ahmani o se la fête ci aehngeni ore hmi me waiao.

11. (a) Wen’ ore nge hmaiai kore ngome ci ahmani ore nodei la fête nore hmi me waiao? (b) Ke nge kore co nidi ace du bua?

¹¹ Hmaiai kore ngome ha ule ko, ore Noël ne osoten’ ore ta la fête wene ri hmi me waiao. Ke nianedi ko, buice ci tacebuti ko co la feton. Buice ci ie ko, ore nodei la fête omelei, melei se ta eziene bane kodraru sese ne fami ni buic. Ka bua, nge di kore uane ni bua? Deko ma nia kore co ile sese ne ta fami ni ej. Iehova kore thu pupul’ ore fami; ka Nubonengo ci alane ko, eje co menenge roi ne il’ ore nodei ngome ri fami ni ej. (Efeso 3:14, 15) Ke eje deko co there co aopodoneni buice lene sen’ ore nodei la fête nore hmi me waiao. Ore nidi ace ko, co there co iara roi kore ci eala eje ne Iehova. Wen’ omelei,  Paulo aposetolo hna ie ko: “Ci aehngeni ore bane aopodoneni o re Doku.”​—Efeso 5:10.

12. Wen’ ore nge, numu ta la fête me deko ma kedi kei Iehova?

¹² Hmaiai kore ngome ci uane ko, deko ma nidi ace kore ceden’ ore ta la fête omelei. Ke nianedi ko, melei deko ma uane ni Iehova. Nubonengo deko ma kedi ore nodei la fête wene ri hmi me waiao, ca ta la fête ci ahmani ore ngom, ca ta la fête ci ahmani o se co nod. Inomei si Aigupito, buice hna nidi hmaiai kore ta la fête son’ ore ta makaze ni buice me waiao. Thubenelo ore hna okonebuti sere i Aigupito, si Iseraela hna rue inomei si Aigupito. Buice hna ahmani o se la fête, ka hna ie di ko, melei la fête “bane so Iehova.” Ke Iehova hna hnaelo buic. (Esodo 32:2-10) Perofeta Isaia hna ie ko, deko lo ke eje co “rue o re ace me kogo.”​—Ieielo Isaia 52:11.

13. Ri rane bua co uane ko, bua ha deko yawe co ahmani ore ta la fête nore hmi me waiao, nge kore ta ace bua co eto bua ko?

¹³ Ri rane bua co uane ko, bua ha deko yawe co ahmani ore ta la fête nore hmi me waiao, bua ngei co eto bua ko ko: ‘Inu co rue ore nge, ngei ma eto inu kore ta ngome ci ruace ne inu ore tane inu ha deko ci la feton’ ore Noël ne buic? Inu co rue ore nge, ngei o se ngome ma kanu inu o se kado son’ ore Noël? Inu co rue ore nge, ngei ore cahmanieni inu, ca ore hmenueni inu ma alane ko, inu co ahmani o se la fête nore hmi me waiao? Inu co rue ore nge, ha thu deko co sheusheu kore re tenego, ngei buice ma deko te ma ahmani ore ta la fête nore  hmi me waiao, ca deko te ma ahmani ore anniversaire ni buic?’

14, 15. Ngei o se ngome ma ie du bua ko, “bonne fête”, ca ngei o se ngome ma kanu kado du bua, bua co rue ore nge?

¹⁴ Ngei bua ma co uane co ie, ca co rue o se ac, ngome nata but. Inome ngei o se ngome ma ie du bua ko, “bonne fête”, deko lo ke bua co wabahnedon. Bua ielo so du bone ko, ci oreon. Ke se rane ngei, numu ta ngome ci alane co carajewe hmaiaion. Hale me bua thuni co ie ahngane du buic’ ore tane bua deko ci ahmani ore nodei la fête omelei. Bua co iara lata me roi, ne lata me hmijoc, ka deko co nengoce nia me da ajoni buic. Tusi Hmijoc ci ie ko: “Roi ke buhnije co iara enengoco ne il’ o re cenge era, hna aroini hnen’ o re alasi (sool), thu ule ke buhnij’ o re ekowe co cedi o re ngom’ ileoden’ etha xara sa.” (Kolose 4:6) Inome ngei ko, bua thuni co ie ahngane du buice ko, alaieni bua kore co ile sese ne il’ osoten, ne co kanu kado du buic, ke deko ma ri ezien’ ore ta ci la fête, inom’ ore ci Noël, ne ci anniversaire.

¹⁵ Ka ngei o se ngome ma kanu bua o se kado ri ezien’ o se la fête nore hmi me waiao? Tusi Hmijoc deko ci ie ko, nge kore ta la fête me roi, ca nge kore ta la fête me nia. Roidi, Tusi Hmijoc ci awa eje ko, co cumo roion’ ore ua anetitini ni ej. (1 Timothi 1:18, 19) Ore ngome ci kanu kado du bua tha ule ko ngei ko, bua deko ci ahmani ore la fête omelei. Ca nge, bone thuni co ie ko: ‘Inu ha ule ko bua deko ci ahmani ore la fête om, ke inu ci alane ko co kanu bua ore kado om.’ Ngei o se ngome me tha ule ko,  ca ngei bone me ci alane ko co kanu bua ore kado, ke pani bua co ureie co kedi ore kado, ca deko. Ke ngei bua ma ureie co kedi, ca deko, cumo roionelu ore ua anetitini ni bua. Eje ci ke co rue o se ace me nia, ngei me da aniani ore eala eje ne Iehova.

16. Bua co nge di, ngei ore fami ni bua ma alane co ahmani o se la fête nore hmi me waiao?

¹⁶ Bua co rue ore nge, ngei ore fami ni bua ma alane co ahmani o se la fête nore hmi me waiao? Hage isesero ne buic. Netiti du buice co rue ore alaieni buic. Lata me roilo du buice ne hmijoconelo ore uane ni buic, inom’ ore bua ci alane ko, buice co hmijocon’ ore uane ni bua. (Ieielo Mataio 7:12.) Ka onom, bua co nge di, ngei ore fami ni bua ma alane ko, bua co ile sese ne buice ri se la fête nore hmi me waiao? Hna dan, hnelo du Iehova ha thu konekatu bua co yose ore uane me roi. Aselo, ua hmaiaionelu ri pon’ ore la fête omelei, ne therelo ore ci ie kei Tusi Hmijoc, ne ore ci ie kore ta gu tusi hna xiwamomone hnei ta Témoins ni Iehova. Ua roionelo ke bua ko: ore alaieni bua, melei co aopodoneni Iehova.

17. Korione ke bua co konekatuon’ ore ta re tei bua, thu deko co sheusheu ke buic, ma ci ule osotene ci ahmani o se la fête nore hmi me waiao?

¹⁷ Korione di ke bua co konekatuon’ ore ta re tei bua, thu deko co sheusheu ke buic, ma ci ule osotene ci ahmani o se la fête nore hmi me waiao? Ri se ta ezien, bua thuni co hngoronatan’ o se ta ace me roi bane aopodoneni buic. Bua thuni joko co kanu kado du buic. Ke ore kado me nidi ace bua co kanu  buic, melei co ile sese ne buic, ne co aehngeni du buice ko, bua ci nidi hnoro buic.

18. Wen’ ore nge nidi ace kore co sanelo ne nodei kerisiano me seseko?

¹⁸ Thu co opodone kei Iehova, melei bua co okonebuti sere ri hmi me waiao, ne co cicilebut’ ore nodei la fête, ne nodei hna acidanon’ ore hmi omelei. Ka co rue di ore hmi me seseko. Korion? Inome ko, co iara sanelo ne nodei kerisiano me seseko. (Ieielo Hebera 10:24, 25.) Ore nodei sanelo omelei nidi ac, wen’ ore ci kan’ ore la rue ore hmi me seseko. (Ta Salamo 22:22; 122:1) Melei se ta eziene joko bane etha eamo ko ej.​—Rome 1:12.

19. Wen’ ore nge nidi ace ke bua co nengocon’ ore hnei bua hna yenone ri Tusi Hmijoc jeu’ osoten?

¹⁹ Co nengocon’ ore nodei ace hnei bua hna yenone ri Tusi Hmijoc jeu’ osoten, melei joko ko se la rue ore hmi me seseko. Hmaiai kore ngome ci unia, wen’ ore nidi hmaiai kore nia ome ri ten. (Ezekiela 9:4) Bua ngei ha ule ore ta ngome ci unia inomelei. Pulonelo du buic’ ore ci uroi ni bua me shed. Ngei bua ma kanete co sanelo ne nodei kerisiano me seseko, ka ngei bua ma pulon’ ore nodei yeno me seseko wene ri Tusi Hmijoc, melei bua ha co kecon’ ore hmi me waiao, ne nodei hna acidanon’ ore hmi omelei. Ua sesekonelo ko: ngei bua ma ureie co sinemenenge netiti du Iehova, melei Nubonengo co hnahneon’ ore ta ruace ni bua, ka bua co opodon.​—Malaki 3:10.