1, 2. Nikoho taani munaphwanelaanyu wiipakela, nave ntakhara heeni ti woochuneya?

MOORWEELA wa yoohuserya anyu ya Piipiliya, mohoona wi achu ancipale yaawo aniiseera wi annamurumeela Muluku anneerano naari ohusiha ichu seiho sinamunanara Muluku. (2 Korinto 6:17) Ti nthowa nene Yehova onanceenyeryeiye okhumamo mu malapelo atheru, “Babilónia, mutokotoko.” (Wupulula 18:2, 4) Tiheeni munaphwanelaanyu weera? Muchu ti muchu a hiyo ookhalano yoothanla, nave nnaphwanela wiikoha mukhatiihu: ‘Apwanne kinnachuna omurumeela Muluku mmukhalelo owo onachuneiye, naari kinachuna omurumeelaka ntoko kaakhovelenlaaka weera?’

² Wakhala wi nyuwaano mookhumamo mmalapelo atheru, eyo ti yaphaama. Nyenya akhweya aakhalavo meerelo ni sookhovelela nlelo muneeranyuno. Hankooni nthokororye saweera ni sookhovelela seiho nave noone ntakhara heeni ti woochuneya woonaka mmukhalelo Yehova onooneiye.

3. (a) Ntakhara heeni akina anoonaaya okhala woovila ohiya opharihela soophwaniherya mmalapelo aya? (b) Tiheeni Piipiliya onaloceiye sa opharihela soophwaniherya wi nimulapele Muluku?

³ Achu akina aakhalano soophwaniherya mmavaate mwaya mu iyaakha sincipale seiho anapharihelaaya wi emulapele Muluku. Wakhala wi nyuwaano mookhalano, akhweya munamoona okhala woovila naari woonanara omurumeela Muluku muhirino ichu seiho. Nyenya muupuwele, Yehova onnanihusiha mukhalelo wa omurumeela. Nave tho, Piipiliya onanleela mwawiiweya wi Yehova hanachuna wi niphariheleke soophwaniherya mmalapelo ahu. —Mwaalakhanye Mukwaha 20:4, 5; Salumu 115:4-8; Isaiya 42:8; 1 Yohani 5:21.

4. (a) Ntakhara heeni hannaphwanela waalapela makholo ahu akhwile? (b) Ntakhara heeni Yehova aahaahiiha achu awe wi ehiloceke ni alipa ookhwa?

⁴ Achu ancipale annamaliha elukuluku yincipale ni ikuru saya wi yaahakalalihe makholo aya akhwile. Ophiyerya tho ennaalapela yaawo. Nyenya noohuserya wi yaale akhwile hanawerya onikhaviherya naari onihooxa. Tahi wi aakhalano ekumi nipuro nikina. Chiryene, ti yawoopiha weererya oloca ni yaawo, ntakhara sooleeliherya pure sinakhala ntoko ti sa makholo akhwile, sinarweela wa masololo. Ti nthowa nene Yehova aahaahiiha Aisarayeli weererya oloca ni alipa ookhwa naari opaka makupa a echu pure eniiwanana ni onamulosiwe.—Malamulo 18:10-12; moone Sooleeliherya 26 ni 31.

5. Tiheeni enii yookhaviheryeeni ohiya opharihela soophwaniherya naari waalapela makholo akhwile?

⁵ Tiheeni enii yookhaviheryeeni ohiya opharihela soophwaniherya naari waalapela makholo akhwile? Munaphwanela omwaalakhanyaka Piipiliya, ni wuupuwelele mukhalelo Yehova onooneiye ichu seiho. Vamiithoni va Muluku ichu iho “ti sothanyeya,” naari soonanara. (Malamulo 27:15) Mvekeleke wa Yehova nihiku nnihiku wi ookhaviheryeeni woonaka ichu mmukhalelo owo onooneiye wi mmurumeele mwaweemereryeya. (Isaiya 55:9) Muroromele wi Yehova onahaala woovahaani ikuru munachunaanyu wi muhiye echu eri yoothene eniiwanana ni malapelo atheru.

6. Ntakhara heeni noothanliwa nihiku na 25 a Tesempuru wi achu echapeleke oyariwa wa Yesu?

⁶ Mu elapo yoothene efesta ya Nataale yoosuweliwa, nave achu ancipale anuupuwela wi nihiku aayariwe Yesu. Nyenya Nataale onarweela mmalapelo atheru. Liivuru mmoha a encyclopedia onnathariha wi Aroma yaahaamweemererya  Muluku yaanachapela oyariwa wa nsuwa nihiku na 25 a Tesempuru. Ahooleli a Ikerexa yaachuna wi amalapo ale ekhale Akiristu, mwawiihiiha naamwi esuwelaka wi Yesu haayariwe nihiku na 25 a Tesempuru, awo yaalakelela opaka efesta ya oyariwa wa Yesu mu nihiku nenla na 25 a Tesempuru. (Luka 2:8-12) Oohuserya a Yesu hiyaantonko opaka efesta ya Nataale. Liivuru Sacred Origins of Profound Things onnaloca wi mu iyaakha 200 Yesu amanle oyariwa, “haavo aasuwenle, nave haavo apwacha, sa nihiku owo aayariweiye.” Nataale opacenre ivinrevo iyaakha sincipale Yesu amanle owela wirimu.

7. Ntakhara heeni Akiristu eeparipari hanamuthokororya Nataale?

⁷ Achu ancipale aasuwela maphacuwelo a Nataale ni mihapo sineeriwa, ntoko ovahana samahala ni ifesta. Ntoko yootakiherya, o Inklatera ni makupa makina a Amerika, yaakhalavo elukuluku yaakhwatiihiwaaya opaka efesta ya Natale nthowa na maphacuwelo aya. Muchu yoole apaka efesta aanathorihiwa ni olakiwa. Naamwi hiiha, achu yaakookela opaka efesta ya Nataale. Ntakhara heeni Akiristu eeparipari hanamuthokororya Nataale? Ntakhara awo anachuna omuhakalaliha Muluku mu soothene aneeraaya.

8, 9. Ntakhara heeni akiristu a nsana noopacerya hiyaathokororya nihiku na oyariwa?

⁸ Meerelo makina ari a wunlaana wa achu ancipale ori ochapela nihiku ayariwaaya. Apwanne Akiristu annaphwanela ochapela nihiku na oyariwa? Ochapela nihiku na oyariwa onalociwa Mpiipiliyani, weeriweno ni achu yahaamurumeela Yehova. (Maphatxuwelo 40:20; Marko 6:21) Ochapela nihiku na oyariwa yaacicimihiwa amuluku atheru. Ti nthowa nene Akiristu a nsana noopacerya yoonaaya wi “ochapela nihiku na oyariwa yaari yookhovelela ya amalapo.”—The World Book Encyclopedia.

 ⁹ Aroma akhalai ni Akriki yuupuwela wi wakhala wi muchu ooyariwa, waanayariwa tho munepa yoowo onamwaakiha muchu owo mu ekumi awe yoothene. Liivuru The Lore of Birthdays onnaloca wi “munepa owo onnapaka onthamwene ni muluku yoowo okhavihenrye wi muchu owo ayariwe.”

10. Ntakhara heeni Akiristu olelo hanathokororya nihiku na oyariwa?

¹⁰ Nyuwaano munuupuwela wi Yehova onneemererya ifesta seiho inarweela mmalapelo atheru? (Isaiya 65:11, 12) Hooye, owo haneemererya. Ti nthowa nene hiyaano nihinathokororyaahu nihiku na oyariwa naari efesta ekina enarweela mmalapelo atheru.

11. Ntakhara heeni achu akina annapaka makupa mu ifesta? Tiivi enaphwanela okhala yoochuneyaxa wa nyuwaano?

¹¹ Achu akina aasuwela wi Nataale naari ifesta ikina inarweela wa amalapo, nyenya annatitelela opaka makupa. Awo anuupuwela wi ekari ya okhala vamoha ni amusi aya. Nyuwaano tho munuupuwela hiiha? Tahi yoonanara ochuna okhala vamoha ni amusi anyu. Yehova topatunxe emusi, nave onachuna wi nipake onthamwene waphaama ni amusi ahu. (Éfeso 3:14, 15) Nyenya, hiyaano nnaphwanela oteteiwa wi nikhaleno onthamwene waphaama ni Yehova ohiya waahakalaliha amusi ahu moorweela wa opaka makupa a ifesta sa malapelo atheru. Ti nthowa nene murummwa Paulo aalonceiye ariki: “Mwasyeke yeyo eri yowasivela Apwiya.”—Éfeso 5:10.

12. Tiheeni eneeriha wi efesta ehineemereryiwa ni Yehova?

¹² Achu akina anuupuwela wi maphacuwelo tahi echu yoochuneya, nyenya Yehova onuupuwela mmukhalelo woohiyana. Owo haneemererya ifesta inarweela mmalapelo atheru, omucicimiha muchu naari eneneeryo ya elapo. Ntoko yootakiherya, achu a o Yiikuputu yaanapaka isatakha sincipale  wi yaacicimihe amuluku aya atheru. Aisarayeli emanle okhuma o Yiikuputu, awo yaakuxa meerelo aya, ophiyerya eniichana ‘efesta ya watxitximihano Apwiya.’ Nyenya Yehova aahaathoriha vanthowa na yeeyo yeenraaya. (Mukwaha 32:2-10) Hiiha ntoko mulipa a miririmu aalonceiye, nnaphwanela osepa ophara “etxhu ya mwikho.”—Mwaalakhanye Isaiya 52:11.

13. Makoho taani munahaalaanyu okhalano vaavaa munalakelelaanyu ohipaka makupa a ifesta?

¹³ Vaavaa munalakelelaanyu ohipaka makupa mu ifesta seiha, munahaala okhalano makoho mancipale. Ntoko yootakiherya: Tiheeni kinahaalaaka weera wakhala wi nthamwene aka a omuteko ookikoha ntakhara heeni kihinapakaaka makupa mu ifesta ni yaawo? Tiheeni kinaphwanelaaka weera wakhala wi koovahiwa yamahala ya Nataale? Tiheeni kinaphwanelaaka weera wakhala wi oothelana aka onachuna wi nikhale vamoha va efesta? Kinii kaakhaviherye hai anamwane aka ohiisoona wi annayeleela nthowa na ohithokororya nihiku na oyariwa waya naari mahiku makina?

14, 15. Tiheeni munaphwanelaanyu weera wakhala wi muchu onachuna wi mukhale vamoha va efesta?

¹⁴ Ti woochuneya wuupuwelela phaama vaavaa nnalakelelaahu waakhula mmikhalelo soothene. Ntoko yootakiherya, Wakhala wi muchu ohoovahaani moofesta, hiwaahaala okhala yaphaama ohimpwacha. Nyuwaano munanwerya pahiru waakhula, “Koothamalela.” Nyenya wakhala wi muchu owo onnachuna osuwela sincipale wa nyuwaano, yaahaala okhala yaphaama omuleela mathowa ene a ohipaka wanyu makupa a efesta eyo. Nyenya, mweereno eyo moocicimiha, mweepewe, ni moomaaleleya. Piipiliya onii: “Malotxelo anyu mahiku othene ekhaleke òsivela, òweleliwa ni màkha, nave musuwele omwakhula mutxhu ti mutxhu ntoko onaphwaneleliyevo.”  (Kolosi 4:6) Akhweya nyuwaano munanwerya oloca wi munnasiveliwa okhala vamoha ni akina ni ovaha samahala, nyenya wi muneerano eyo nihiku nihiri na efesta.

¹⁵ Tiheeni munaphwanelaanyu weera wakhala wi muchu ohoovahaani yamahala? Piipiliya haano malakiheryo ookwakwaleya, nyenya onnaloca wi nnaphwanela otitelela okhapelela yawuupuxerya-ya-murima yaphaama. (1 Timóteo 1:18, 19) Akhweya muchu onoovahaani yamahala eyo hanasuwela wi nyuwaano hamunapaka makupa mu ifesta seiho. Naari onnaloca ariki: “Koosuwela wi hamunapaka makupa a efesta, nyenya naamwi hiiha kinachuna woovahaani echu ela.” Mmukhalelo yoowo akhweya, nyuwaano munaphwanela olakelela waakhela yamahala naari hooye. Nyenya yoolakelela eri yoothene munapakaanyu, mwaakihe yawuupuxerya-ya-murima yaphaama. Hinnachuna weera echu enahaala ovolowela onthamwene ahu ni Yehova mmukhalelo woonanara.

16. Tiheeni munaphwanelaanyu weera wakhala wi amusi anyu anachuna wi mutakaahane ni yaawo va efesta?

¹⁶ Tiheeni munaphwanelaanyu weera wakhala wi emusi anyu enachuna opaka efesta? Hamunaphwanela waakhulana. Muupuwele wi awo aakhalano othanla wootaphuwa weera yeeyo anachunaaya weera. Mukhale oopixa murima ni oocicimiha soothanla saya hiiha ntoko nyuwaano munachunaanyu wi awo ecicimiheke soothanla sanyu. (Mwaalakhanye Mateu 7:12.) Nyenya wakhala wi awo anachuna wi mutakaahane ni yaawo, tiheeni munaphwanelaanyu weera? Muhaakumve olakelela echu yaweera, mvekele wa Yehova wi ookhaviheryeeni opaka soolakelela saphaama. Muupuwelele mwaha ene, nave mutholathole soorepa vooloca sa mwaha yoowo. Muupuwele wi nyuwaano munachuna omuhakalaliha Yehova elukuluku yoothene.

17. Tiheeni munaphwanelaanyu weera wi anamwane anyu esepe wuupuwela wi annayeleela vaava akina anachapelaaya nihiku na efesta?

 ¹⁷ Tiheeni munaphwanelaanyu weera wi mwaakhaviherye anamwane anyu ohuupuwela wi annayeleela? Ti yaphaama waavaha yamahala mu nihiku nikina naari orehererya echu yavameekhaaya wa yaawo. Nave yamahala yaphaamaxa nyuwaano munaphwanelaanyu waavaha anamwane anyu eri elukuluku ni osivela wanyu.

18. Ntakhara heeni ti yaphaama ophiya mmithukumano?

¹⁸ Wi nimuhakalalihe Yehova, ti woochuneya ohiya malapelo atheru vamoha ni sookhovelela saya. Nyenya tho ti yaphaama opaka makupa a malapelo eeparipari. Mwawiihai? Mukhalelo mmoha ori ohihiya ophiya mmithukumano. (Mwaalakhanye Ahebri 10:24, 25.) Muthukumano makupa oochuneya a malapelo eeparipari. (Salumu 22:22; 122:1) Nnanwerya olipihana mukina ni mukhwaawe wakhala wi ninnathukumana vamoha.—Aroma 1:12.

19. Ntakhara heeni ti woochuneya waaleela akina yeeyo munahuseryaanyu Mpiipiliyani?

¹⁹ Mukhalelo mukina wa othanla malapelo eeparipari ori waaleela akina yeeyo nnahuseryaahu orweela Mpiipiliya. Achu ancipale annuukhuwa nthowa na ichu soonanara sineereya veelaponi yavathi. (Ezekiyeli 9:4) Akhweya nyuwaano moohaasuwela achu anuukhuwa. Mwaaleele vooloca sa yoowehererya yoohakalaliha ya omwaahiyu. Vaavaa munaphiyaanyu mmithukumano sa Anamoona a Yehova ni waaleela akina iparipari sa Mpiipiliyani, onahaala okhala wookhweya ohiya malapelo atheru ni sookhovelela saya. Muroromele wi munahaala okhala oohakalala nave wi Yehova onamureeliha wiilipixerya wanyu wa othanla omurumeela yoowo mmukhalelo wawookololowa.—Malakiya 3:10.