1, 2. Ko e heigoa e hūhū kua lata ke hūhū hifo ki a koe, mo e ko e ha kua aoga e mena nei?

MAI he haau a fakaako ke he Tohi Tapu, iloa e koe kua tokologa e tagata ne talahau kua tapuaki a lautolu ke he Atua, ka kua fakaako mo e taute e lautolu e tau mena ne vihiatia he Atua. (2 Korinito 6:17) Kakano ia ati poaki a Iehova ki a tautolu ke o kehe mai he lotu fakavai, ko ‘Papelonia Lahi.’ (Fakakiteaga 18:2, 4) Ko e heigoa haau ka taute? Igatia a tautolu mo e fifiliaga ke taute, ti lata a tautolu ke hūhū hifo, ‘Manako nakai au ke tapuaki ke he Atua he puhala ne manako a ia ke taute e au, po ke manako au ke tapuaki ke he Atua he puhala kua leva e mahani au ki ai?’

² Ka fitā a koe he toka po ke fano kehe mai he lotu fakavai, ko e mena mitaki a ia. Ka e he loto haau, liga fai matagahua mo e tau aga mau he lotu fakavai ne fiafia agaia a koe ki ai. Fakatutala a tautolu mogonei ke he falu he tau matagahua mo e tau aga mau ia ke kitia e kakano aoga lahi kua lata a tautolu ke onoono ke he tau mena ia he puhala ne onoono a Iehova ki ai.

3. (a) Ko e ha kua liga uka ma e falu ke tiaki e tau tupua tā he tapuakiaga ha lautolu? (e) Ko e heigoa ne talahau he Tohi Tapu ke he fakaaoga he tau tupua tā ke tapuaki ke he Atua?

³ Falu tagata ne fakaaoga e tau tupua tā po ke tau mena fakatapu (shrine) he tau kaina ha lautolu ke tapuaki ke he Atua he loga e tau tau. Ka pihia foki a koe, liga matakehe e logonaaga haau po ke tuga kua hepe ke tapuaki ke he Atua ka e nakai fakaaoga e tau mena ia. Ka e manatu, kua fakaako e Iehova a tautolu ke he puhala ke tapuaki a ia. Ti talahau fakamaaliali mai he Tohi Tapu kua nakai manako a Iehova  ki a tautolu ke fakaaoga e tau tupua tā he tapuakiaga ha tautolu.​—Totou Esoto 20:4, 5; Salamo 115:4-8; Isaia 42:8; 1 Ioane 5:21.

4. (a) Ko e ha kua nakai lata a tautolu ke tapuaki ke he tau tupuna ha tautolu? (e) Ko e ha ne tala age a Iehova ke he tau tagata haana ke aua neke lali ke tutala mo e tau tagata mamate?

⁴ Falu tagata ne liga lahi e magaaho mo e malolō ne fakaaoga he lali ke fakafiafia e tau tupuna ha lautolu ne mamate. Liga tapuaki foki a lautolu ke he tau tupuna ia. Ka kua fakaako e tautolu ko lautolu ne mamate kua nakai maeke ke lagomatai po ke fakamamahi a tautolu. Nakai momoui a lautolu he taha matakavi. Ti hagahaga kelea mooli he lali ke matutaki mo lautolu ha ko e tau fekau ne tuga kua moua mai he magafaoa ne kua mate, kua puna mai he tau temoni. Kakano haia ne poaki a Iehova ke he tau Isaraela ke ua lali ke tutala mo e tau tagata mamate po ke putoia ke he ha mena fakatemoni.​—Teutaronome 18:10-12; kikite Tala he Matahiku 25 mo e 30.

5. Ko e heigoa ka lagomatai a koe ke oti e fakaaoga he tau tupua tā ke tapuaki ke he Atua mo e ke oti e tapuaki ke he tau tupuna haau?

⁵ Ko e heigoa ka lagomatai a koe ke oti e fakaaoga he tau tupua tā ke tapuaki ke he Atua po ke oti e tapuaki ke he tau tupuna haau? Lata a koe ke totou e Tohi Tapu mo e manamanatu fakahokulo ke he onoonoaga ha Iehova ke he tau mena ia. Onoono a ia ki ai ko e “tau mena fakalialia.” (Teutaronome 27:15) Liogi ki a Iehova he tau aho takitaha ma e lagomatai ke onoono ke he tau mena he puhala Haana mo e lagomatai ke tapuaki a Ia he puhala ne manako a Ia. (Isaia 55:9) Maeke a koe ke mauokafua to foaki atu e Iehova e malolō kua lata ke utakehe mai he moui haau ha mena ne matutaki ke he tapuakiaga fakavai.

6. Ko e ha ne fifili e Tesemo 25 ko e aho ke fakamanatu e fanauaga ha Iesu?

⁶ Ke he lalolagi katoa, ko e Kirisimasi e taha he tau  aho okioki mahuiga lahi, ti tokologa e tagata ne manatu ko e fakamanatuaga a ia he aho ne fanau a Iesu. Ka ko e Kirisimasi kua matutaki ke he tapuakiaga fakavai. Taha e encyclopedia ne fakamaama ko e tau tagata pouliuli Roma ne fakamanatu e aho fanau he laā ia Tesemo 25. Manako e tau takitaki lotu ke tokologa e tau tagata pouliuli ke hiki mo tau Kerisiano, ti pete kua nakai fanau a Iesu ia Tesemo 25, ne fifili a lautolu ke fakamanatu e fanauaga ha Iesu he aho ia. (Luka 2:8-12) Nakai fakamanatu he tau tutaki ha Iesu e Kirisimasi. Taha e tohi ne fakamaama he 200 e tau he mole e fanau a Iesu, “ne nakai fai tagata ne iloa, mo e gahoa ni ne manamanatu ke he aho tonu ne fanau a ia.” (Sacred Origins of Profound Things) Ne kamata e tau fakamanatuaga he Kirisimasi he loga e tau tau he mole e moui a Iesu he lalolagi.

7. Ko e ha e tau Kerisiano mooli ne nakai fakamanatu e Kirisimasi?

⁷ Tokologa e tagata ne iloa e kamataaga pouliuli he Kirisimasi mo e tau aga tuai ne putoia ai, tuga e tau fakafiafia mo e taute hoka. Ma e fakatai, i Igilani mo e falu vala i Amerika, ne fai magaaho ne nakai fakaatā ke fakamanatu e Kirisimasi ha kua pouliuli e kamataaga. Ko e ha tagata ne fakamanatu e Kirisimasi kua fakahala. Ka e fakahiku ni, ne liliu foki e tau tagata fakamanatu e Kirisimasi. Ko e ha e tau Kerisiano mooli ne nakai fakamanatu e Kirisimasi? Ha kua manako a lautolu ke fakafiafia e Atua ke he tau mena oti ne taute e lautolu.

8, 9. Ko e ha e tau Kerisiano fakamua atu ne nakai fakamanatu e tau aho fanau?

⁸ Taha fakamanatuaga mahuiga foki he tau tagata tokologa ko e aho fanau ha lautolu. Lata nakai e tau Kerisiano ke taute tū tau, po ke fakamanatu e tau aho fanau? Ko e tau fakamanatuaga ni he aho fanau ne totoku he Tohi Tapu ne  taute ai he tau tagata ne nakai tapuaki ki a Iehova. (Kenese 40:20; Mareko 6:21) Taute e tau fakamanatuaga he aho fanau ke fakaheke e tau atua fakavai. Kakano haia he tau Kerisiano fakamua ne “manamanatu ko e fakamanatu he aho fanau he tagata ko e aga pouliuli.”​—The World Book Encyclopedia.

⁹ Kua talitonu e tau Roma mo e tau Heleni i tuai, kua ha ha i ai e agaaga he magaaho ka fanau e tau tagata takitaha, mo e to puipui he agaaga nei e tagata he moui haana. “Ko e agaaga nei ne matutaki he puhala mana mo e atua he aho ia ne fanau e tagata,” he fakamaama he tohi The Lore of Birthdays.

10. Ko e ha e tau Kerisiano he vahā nei kua nakai lata ke fakamanatu e tau aho fanau?

¹⁰ Manatu nakai a koe kua talia e Iehova e tau fakamanatuaga ne matutaki ke he lotu fakavai? (Isaia 65:11, 12) Nakai talia e ia. Kakano haia ne nakai fakamanatu e tautolu e tau aho fanau po ke ha aho okioki ne matutaki ke he lotu fakavai.

11. Ko e ha e falu tagata ne fakamanatu e tau aho okioki? Ko e heigoa kua lata ke mua e aoga ki a koe?

¹¹ Falu tagata ne iloa e kamataaga pouliuli he Kirisimasi mo e falu aho okioki, ka e matutaki ni a lautolu ke fakamanatu e tau mena ia. Logona hifo e lautolu ko e tau aho okioki ko e magaaho mitaki ke fakalataha mo e magafaoa ha lautolu. Pihia nakai e logonaaga haau? Kua nakai kelea ke manako ke fai magaaho mo e magafaoa haau. Tufugatia e Iehova e magafaoa, ti manako a ia ke mitaki e fakafetuiaga ha tautolu mo lautolu. (Efeso 3:14, 15) Ka e lata ke eketaha ke moua e fakafetuiaga mitaki mo Iehova ka e nakai ke fakafiafia e tau magafaoa ha tautolu he fakamanatu e tau aho okioki he lotu fakavai. Kakano haia ne pehē e aposetolo  ko Paulo: “Kia kumikumi a mutolu e tau mena kua fiafia e Iki ki ai.”​—Efeso 5:10.

12. Ko e heigoa ka taute e aho okioki ke nakai talia e Iehova?

¹² Tokologa ne fakateaga ke he kamataaga he aho okioki, ka e nakai pihia e logonaaga ha Iehova. Nakai talia e ia e tau aho okioki ne puna mai he tapuakiaga fakavai po ke fakahakehake e tau tagata po ke tau fakamailoga he motu. Ma e fakatai, loga e fakamanatuaga he tau Aikupito ke he tau atua fakavai ha lautolu. He mole e o kehe mai e tau Isaraela i Aikupito, ne fifitaki e lautolu e taha he tau fakamanatuaga pouliuli he tau Aikupito ti fakahigoa ai “ko e aho galue kia Iehova.” Ka kua fakahala e Iehova a lautolu he taute e mena ia. (Esoto 32:2-10) Tuga ne talahau he perofeta ko Isaia, lata a tautolu ke “aua neke pipiki atu . . . ke he mena kelea.”​—Totou Isaia 52:11.

13. Ko e heigoa e tau hūhū haau ka fifili a koe ke nakai fakamanatu e tau aho okioki?

¹³ Ka fifili a koe ke nakai fakamanatu e tau aho okioki, liga loga e hūhū haau. Ma e fakatai: Ko e heigoa haaku ka taute ka hūhū e tau kapitiga gahua ko e ha ne nakai fakamanatu e au e Kirisimasi mo lautolu? Ko e heigoa haaku ka taute ka foaki mai he taha tagata e mena fakaalofa Kirisimasi? Ko e heigoa haaku ka taute ka amanaki e hoa mau haaku ke fakamanatu e au e aho okioki? Lagomatai fēfē e au e tau fanau haaku ke ua momoko ha kua nakai fakamanatu e aho okioki po ke tū e tau ha lautolu?

14, 15. Ko e heigoa haau ka taute ka tala atu taha tagata ki a koe ke monuina e Kirisimasi po ke atu e mena fakaalofa ma haau?

¹⁴ Kua aoga ke fakaaoga e loto manamanatu ka fifili e koe e tau mena ke talahau mo e taute he tau tuaga takitaha. Ma e fakatai, ka tala atu e tau tagata ki a koe ke monuina e Kirisimasi, ua fakaheu a lautolu. Tala age ni, “Fakaaue.” Ka e he tau tuaga ka manako e tagata ke iloa atu foki, liga fifili a koe  ke fakamaama e kakano ne nakai fakamanatu e koe e aho okioki. Kia fakatumau ke totonu, fakailoilo, mo e fakalilifu. Pehē e Tohi Tapu: “Aua neke noa ha mutolu a tau kupu mo e fakaalofa, kia fakamasima ke he masima, kia iloa e mutolu ke tali fakatonu atu ke he tau tagata oti kana.” (Kolose 4:6) Liga maeke a koe ke fakamaama na fiafia a koe ke fakalataha mo e falu ti foaki e tau mena fakaalofa ka e nakai fifili a koe ke taute he tau aho okioki nei.

¹⁵ Ko e heigoa haau ka taute ka foaki atu he taha tagata e mena fakaalofa? Nakai tohi mai he Tohi Tapu e tau matafakatufono loga, ka e talahau kua lata a tautolu ke tumau e loto manamanatu hifo mitaki. (1 Timoteo 1:18, 19) Liga ko e tagata ne foaki atu e mena fakaalofa ne nakai iloa kua nakai fakamanatu e koe e aho okioki. Po ke pehē a ia, “Iloa e au mena nakai fakamanatu e koe e aho okioki, ka e manako agaia ni au ke atu e mena fakaalofa nei ma haau.” He tau tuaga ia, maeke a koe ke fifili ke talia e mena fakaalofa po ke nakai. Ka ko e heigoa ni e fifiliaga haau, ki a tumau e loto manamanatu hifo mitaki. Nakai manako a tautolu ke taute ha mena ka fakakelea e fakafetuiaga ha tautolu mo Iehova.

16. Ko e heigoa ka taute e koe ka manako e magafaoa haau ke fakamanatu e tau aho okioki?

¹⁶ Ko e heigoa haau ka taute ka manako e magafaoa haau ke fakamanatu e aho okioki? Nakai lata a koe ke latau mo lautolu? Manatu, ha ha ia lautolu e tonuhia ke fifili e mena ha lautolu ne manako ke taute. Kia mahani totonu mo e fakalilifu e tau fifiliaga ha lautolu tuga ni he manako a koe ke fakalilifu e lautolu e tau fifiliaga haau. (Totou Mataio 7:12.) Ka manako e magafaoa haau ke fakalataha a koe mo lautolu he aho okioki, ko e heigoa haau ka taute? Ato fifili e koe e mena ka taute, liogi ki a Iehova ma e lagomatai ke taute e fifiliaga hako. Manamanatu ke he tuaga, ti  kumikumi hagaao ki ai. Manatu, kua manako tumau a koe ke fakafiafia a Iehova.

17. Ko e heigoa haau ka taute ke lagomatai e tau fanau ke ua momoko ka fakamanatu he falu e tau aho okioki?

¹⁷ Ko e heigoa haau ka taute ke lagomatai e tau fanau ka kitia e lautolu e falu kua fakamanatu e tau aho okioki? Maeke a koe ke fakatokatoka tumau e taha mena pauaki ma lautolu. Liga fakaofo a lautolu he age e tau mena fakaalofa. Ti taha mena fakaalofa ne mua e mitaki ka age e koe ke he tau fanau ko e magaaho mo e fakaalofa haau.

18. Ko e ha kua lata a tautolu ke o atu ke he tau feleveiaaga Kerisiano?

¹⁸ Ke fakafiafia a Iehova, lata a tautolu ke tiaki e lotu fakavai mo e tau puhala tuai mo e tau aho okioki ne matutaki ki ai. Ka e lata foki a tautolu ke taute e tapuakiaga mooli. Puhala fe? Taha puhala ko e o atu tumau he tau feleveiaaga Kerisiano. (Totou Heperu 10:24, 25.) Ko e tau feleveiaaga ko e vala aoga lahi he tapuakiaga mooli. (Salamo 22:22; 122:1) Maeke a tautolu ke fefakamafanaaki ka feleveia auloa.​—Roma 1:12.

19. Ko e ha kua aoga ke tala age ke he falu e tau kupu mooli he Tohi Tapu ne fakaako e koe?

¹⁹ Taha vala he fifili e tapuakiaga mooli ko e tutala ke he falu hagaao ke he tau mena haau ne fakaako mai he Tohi Tapu. Tokologa kua tupetupe he tau mena kelea kua tutupu he lalolagi. Liga fai tagata a koe ne iloa kua pihia e logonaaga. Tala age ki a lautolu e amaamanakiaga mitaki lahi ma e vahā anoiha. He fano a koe ke he tau feleveiaaga Kerisiano mo e tala age ke he falu e kupu mooli he Tohi Tapu, to logona hifo e koe kua nakai manako a koe ke fai vala he lotu fakavai mo e tau puhala tuai he lotu ia. Maeke a koe ke mauokafua to fiafia mo e to fakamonuina lahi e Iehova e tau laliaga haau he fifili a koe ke tapuaki a ia he puhala hako.​—Malaki 3:10.