1, 2. Kansi ni konsho yotyani yamuwamila kulikonsha, soti ndaŵa yanji muwamila kulikonsha konsho yamene iyo?

PA KUPHUNZILA kwanu Baibolo, mwaziŵa kuti ŵanthu anyinji amene olaŵila kuti olambila Mulungu, ophunzisa komasoti ochita vinthu vakuzonda Mulungu. (2 Akorinto 6:17) N’chifukwa chake, Yehova otilamula kuti tifumemo m’chipembezo chawenye, olo kuti “Babulo Nkulu.” (Chivumbulutso 18:2, 4) Kansi mwewo muchite chinji? Aliyense wa sewo ali na chosankha chakufunika kuchita, soti tufunika kulikonsha kuti, ‘Kansi nufuna kulambila Mulungu m’njila yakuvomekeja, olo nipitilije kumulambila m’njila yanilidjaile nthawe zonse?’

² Keno mwafumamo kale m’chipembezo chawenye, niye kuti mwachita bwino ngako. Koma payakine pangankhale miyambo na vochita viyakine va kuchipembezo chamene icho vamene vingankhale vikali kuwamijani. Tiyeni tikambilane iyakine mwa miyambo yamene iyi kuti tiwone chifukwa chake tufunikila kuiwona mwakuiwonela Yehova.

3. (a) Ndaŵa yanji ŵanthu ayakine angawone kuti ni kovuta kuleka kukatishila ntchito mafano polambila Mulungu? (b) Kansi Baibolo yunena chinji pankhani yokatishila ntchito mafano polambila Mulungu?

³ Ŵanthu anyinji ankhala okatishila ntchito mafano polambila Mulungu kwa vyaka vinyinji m’mang’anda mwawo. Keno namwe mukatishila ntchito vinthu vamene ivi, mungawone kuti ni kuifya kulambila Mulungu paliye kukatishila ntchito mafano. Koma mufunika kukumbukila kuti Yehova niye otiphunzisa mwatingamulambilile. Komasoti Baibolo yutiuja mosapita m’mbali kuti Yehova ofunalini kuti tikokatishila ntchito mafano pomulambila.—Ŵelengani Ekisodo 20:4, 5; Salimo 115:4-8; Yesaya 42:8; 1 Yohane 5:21.

4. (a) Ndaŵa yanji tufunikalini kulambila mizimu ya makolo echifwa kale? (b) Ndaŵa yanji Yehova euja ŵanthu ŵake kuti osati akolaŵila na ŵanthu akufwa?

 ⁴ Ŵanthu ayakine angataye nthawe ikulu komasoti mphamvu zinyinji poyeja kukondwelesha mizimu ya makolo ŵawo echifwa kale. Angafwike mpaka poilambila mizimu yamene iyo. Koma tiphunzila kuti ŵala echifwa kale angatiyavyelini olo kutiwononga. Alilini moyo ku malo ayakine. Ndipo ni chinthu choyofya kuyesa kulaŵila nawo chifukwa chakuti uthenga uliwonse wamene ungaoneke kuti ufumila kuli enekwasu echifwa, ufumila ku viŵanda. N’chifukwa chake Yehova elamula Aisiraeli kuti osati akoyesa kulaŵila na ŵanthu akufwa olo kuchita chinthu chilichonse chukatijana na vamizimu.—Deuteronomo 18:10-12; onani Mawu Akumapeto 26 na 31.

5. Kansi n’chinji chingakuyavyeni kuti muleke kukatishila ntchito mafano polambila Mulungu olo kuleka kulambila mizimu ya makolo echifwa kale?

⁵ Kansi ni chinji chingakuyavyeni kuleka kukatishila ntchito mafano polambila Mulungu olo kuleka kulambila mizimu ya makolo echifwa kale? Mufunikila kuŵelenga Baibolo nosinkha-sinkha mosamala ngako kuti muwone mwakuwonela Yehova vinthu vamene ivi. Yove oviwona kunkhala vinthu “vonyansa.” (Deuteronomo 27:15) Mufunikila kupemphela kwa Yehova nsiku iliyonse kuti akuyavyeni kuwona vinthu mwakuviwonela yove na kuti akuyavyeni kumulambila mu njila yakufuna. (Yesaya 55:9) Mufunika kusimikijila kuti Yehova akupaseni mphamvu zamufunikila kuti mutaye chilichonse chukatijana na kulambila kwawenye.

6. Ndaŵa yanji nsiku ya December 25 isankhiwa kunkhala nsiku yokondwelela kuvyalika kwa Yesu?

⁶ Khisimisi ni imozi mwa maholide otchuka pachalo chonse, soti ŵanthu anyinji oganiza kuti ni nsiku yokondwelela kuvyalika kwa Yesu. Koma Khisimisi ni mwambo wamene ukatijana na kulambila kwawenye. Buku iyakine ya encyclopedia yufotokoza kuti Aroma achikunja enzekondwelela kuvyalika  kwa zuŵa pa nsiku ya December 25. Asogoleli achipembezo enzefuna kuti ŵanthu achikunja ankhale Akhilisitu, tetyo olo kuti Yesu aliye vyalike pa December 25, ove esankha kuti akokondwelela kuvyalika kwa Yesu pa nsiku yamene iyi. (Luka 2:8-12) Ophunzila a Yesu enzekodwelelalini Khisimisi. Buku iyakine yufotokoza kuti kwa vyaka pafupi-fupi 200 pavuli pakuti Yesu wavyalika, “paliye munthu enzeziŵa nsiku ngayo-ngayo yechivyalika, soti ni ŵanthu tyala atontho enzefuna kuiziŵa.” (Sacred Origins of Profound Things) Chikondwelelo cha Khisimisi chiyamba papita vyaka mahandiledi anyinji pavuli pakuti Yesu wafwa nojokela kululu.

7. Ndaŵa yanji Akhilisitu achendi okondwelelalini Khisimisi?

⁷ Ŵanthu anyinji oziŵa kuti Khisimisi komasoti miyambo yake yamene yuchitika pa nsiku yamene iyi, monga kupasana mphaso na kuchita maphwando, iyambila ku chipembezo chawenye. Mwachisanzo, pa nthawe iyakine ku England na madela ayakine a ku America, chikondwelelo cha Khisimisi chenze choleshewa chifukwa chakuti mwambo wamene uyu wiyambila kuchikunja. Munthu aliyense wapezeka kuti ochita chikondwelelo chamene ichi enzemupasa chilango. Koma m’kupita kwa nthawe, ŵanthu eyamba soti kukondwelela Khisimisi. Ndaŵa yanji Akhilisitu achendi okondwelela lini Khisimisi? Ndaŵa yakuti ofuna kukondwelesha Mulungu mu chilichonse chakuchita.

8, 9. Ndaŵa yanji Akhilisitu oyambilila enzekondwelelalini masiku ovyalika?

⁸ Kukondwelela nsiku yovyalika ni chikondwelelo chiyakine chotchuka ku ŵanthu anyinji. Kansi Akhilisitu ofunikila kukondwelela nsiku yovyalika? Vikondwelelo va masiku ovyalika vutomolewa m’Baibolo ni va ŵanthu amene enzelambilalini Yehova. (Genesis 40:20; Maliko 6:21) Ŵanthu enzekondwelela masiku ovyalika pofuna kulemekeza milungu yawenye. N’chifukwa chake Akhilisitu oyambilila “enzewona  chikondwelelo cha nsiku yovyalika cha munthu aliyense kunkhala chachikunja.”—The World Book Encyclopedia.

⁹ Aroma na Agiriki akale enzekhulupilila kuti pa nthawe yovyalika munthu aliyense, penzenkhala mzimu ndipo mzimu wamene uyo wenzeteteza munthu wamene uyo kwa moyo wake wonse. Buku iyakine yakuti The Lore of Birthdays yufotokoza kuti: “Mzimu wamene uyu wenzenkhala pa ushamwali na mulungu wamene evyalika pa nsiku imozi na munthu wamene uyo.”

10. Ndaŵa yanji Akhilisitu a masiku ŵano okondwelelalini masiku ovyalika?

¹⁰ Kansi muganiza kuti Yehova ovomekeja vikondwelelo vukatijana na kulambila kwawenye? (Yesaya 65:11, 12) Yayi, ovomekejalini. N’chifukwa chake tukondwelelalini masiku ovyalika olo holide iliyonse yukatijana na chipembezo chawenye.

11. Ndaŵa yanji ŵanthu ayakine okondwelela maholide? Soti ni chinji chufunika kunkhala chinthu chofunika ngako kuli mwewo?

¹¹ Ŵanthu anyinji oziŵa kuti Khisimisi na maholide ayakine eyambila kuchipembezo chawenye, koma olo n’tetyo ove opitilija kuchita vikondwelelo vamene ivi. Ove, owona kuti maholide amene aŵa oŵapasa mpata wakuti ankhale na nthawe yotandala pamozi na enekwawo. Kansi namwe muwona teti? Ni kuifyalini kupatula nthawe yotandala na banja yanu. Yehova niye eyambisha banja, soti ofuna kuti tinkhale pa ushamwali uweme na abanja ŵasu. (Aefeso 3:14, 15) Koma, tufunika kuika maganizo ŵasu pa kunkhala pa ushamwali uweme na Yehova m’malo moika maganizo pa kukondwelesha abanja ŵasu pochita vikondwelelo vukatijana na chipembezo chawenye. N’chifukwa chake ntumwi Paulo elaŵila kuti: “Nthawe zonse mukosimikijila kuti chovomelejeka kwa Ambuye ni chini.”—Aefeso 5:10.

12. Kansi ni chinji chingachitishe kuti chikondwelelo chinkhale chosavomekejeka kwa Yehova?

¹² Ŵanthu anyinji owona kuti paliye vuto na mwechiyambila  maholide, koma Yehova owonalini teti. Yove ovomekejalini maholide amene okatijana na kulambila kwawenye olo maholide amene olemekeza magulu a ŵanthu olo vizindikilo va chalo. Mwachisanzo, Aiguputo enzechita vikondwelelo vinyinji va milungu yawo yawenye. Pavuli pakuti Aisiraeli afuma ku Iguputo, etolelako mwambo uyakine wachikunja waku Iguputo ndipo eupasa zina yakuti “chikondwelelo cha Yehova.” Koma Yehova ekalipa ndipo eŵalanga chifukwa chochita vamene ivi. (Ekisodo 32:2-10) Mokatijana na malangizo a mneneli Yesaya akuti, tufunikalini “kukumya chinthu chilichonse choipishiwa!”—Ŵelengani Yesaya 52:11.

13. Kansi ni makonsho otyani ŵamungankhale nawo keno mwaleka kuchita vikondwelelo va maholide?

¹³ Keno mwewo mwasankha kuleka kuchita vikondwelelo va maholide, payakine mungankhale na makonsho anyinji. Mwachisanzo, payakine mungalikonshe kuti: Kansi ningachite chinji keno ŵanthu ŵanukata nawo ntchito anikonsha chifukwa chake nuchitakolini nawo chikondwelelo cha Khisimisi? Mwa ningachite chinji keno munthu muyakine ofuna kunipasa mphaso ya Khisimisi? Kansi nufunika kuchita chinji keno muyangu wa mu ukwati ofuna kuti nichite naye chikondwelelo cha holide? Kansi ningaŵayavye tyani ŵana ŵangu kuti osati akokwinyilila chifukwa chosachitako vikondwelelo va maholide olo nsiku yovyalika?

14, 15. Kansi mungachite tyani keno munthu muyakine wakuujani mawu akuti holide iweme, olo keno ofuna kukupasani mphaso?

¹⁴ Kuzindikila ni kofunika ngako kuti muziŵe vamungalaŵile komasoti vamungachite pa chochitika chilichonse. Mwachisanzo, keno ŵanthu akuujani mawu akuti holide iweme, mufunikilalini kungoŵasula. Mungangoŵauja tyala kuti, “Zikomo.” Koma keno munthu muyakine ofuna kuziŵa vinyinji, mungamufotokozele chifukwa chake muchitakolini chikondwelelo cha holide. Koma nthawe zonse mufunika kunkhala oleza ntima, aluso komasoti aulemu. Baibolo yunena kuti: “Nthawe zonse mawu ŵanu akonkhala achisomo, aweme  monga kuti mwaŵatila munyu, kuti muziŵe mwamungayankhile muyakine aliyense.” (Akolose 4:6) Payakine mungaŵafotokozele kuti mukonda kutandala na ŵanthu ayakine komasoti kuŵapasa mphaso, koma tyala musankha kuchita vamene ivi pa nthawe iyakine iliyonse osati tyala pa nthawe yamaholide.

¹⁵ Mwa mungachite chinji keno munthu muyakine ofuna kukupasani mphaso? Baibolo yutipasalini mndandanda wa malamulo, koma yutiuja kuti tufunika kunkhala na chikumbuntima chiweme. (1 Timoteyo 1:18, 19) Payakine munthu wamene ofuna kukupasani mphaso oziŵalini kuti muchitakolini chikondwelelo cha holide. Olo payakine angalaŵile kuti, “Nuziŵa kuti mwewo muchitakolini chikondwelelo cha holide, koma nungofuna tyala kukupasankoni mphaso iyi.” Pa vochitka vonse vamene ivi viŵili, mungasankhe kulondela mphaso yamene iyo olo yayi. Koma chosankha chilichonse chamungachite, mufunikila kunkhala wosimikijila kuti mwasunga chikumbuntima chanu chili chiweme. Tufunalini kuchita chilichonse chingaike ushamwali wasu na Yehova pangozi.

16. Kansi mufunika kuchita chinji keno abanja ŵanu ofuna kuchita chikondwelelo cha holide?

¹⁶ Kansi mufunikila kuchita chinji keno abanja ŵanu ofuna kuchita chikondwelelo cha holide? Mufunikilini kukangana nawo. Kumbukilani kuti nawo ali na ufulu wosankha kuchita vinthu vakufuna. Nkhalani aweme ntima, soti lemekezani vosankha vawo monga ni mwamungafunile mwewo kuti nawo alemekeze vosankha vanu. (Ŵelengani Mateyu 7:12.) Lomba keno abanja ŵanu ofuna kuti muzankhale nawo pa holide, kansi mufunika kuchita chinji? Mukaliyechita chinthu chilichonse, mufunika kupemphela kwa Yehova kuti akuyavyeni kupanga chosankha chiweme. Ganizilani ngako za vinthu vikuti vikachitike kwamene uko, soti fufuzani mfundo zingakuyavyeni pa chochitika chamene icho. Kumbukilani kuti, nthawe zonse muwamila kuchita vinthu vukondwelesa Yehova.

17. Kansi mungachite chinji kuti muyavye ŵana ŵanu keno okumbwila ayawo akochita chikondwelelo cha holide?

 ¹⁷ Kansi mungachite chinji kuti muyavye ŵana ŵanu keno okumbwila ayawo akochita chikondwelelo cha holide? Chinthu chiweme chamufunikila kuchita nthawe na nthawe, ni kuŵakonzelako nthawe yakuti akosangalala. Mungaŵagulileko mphaso. Soti mphaso iweme ngako yamungapase ŵana ŵanu ni kupatula nthawe yotandala nawo komasoti kuŵawonesha chikondi chanu.

18. Ndaŵa yanji tufunika kupezeka pa misonkhano ya Chikhilisitu?

¹⁸ Kuti timukondweleshe Yehova, tufunika kufumamo mu chipembezo chawenye, kusiya miyambo yake komasoti maholide okatijana na chipembezo chawenye. Koma tufunikasoti kuchita vinthu vukatijana na kulambila kwachendi. Kansi tingachite tyani vamene ivi? Njila imozi ni kupezeka pa misonkhano ya Chikhilisitu nthawe zonse. (Ŵelengani Aheberi 10:24, 25.) Misonkhano ni mbali yofunika ngako pa kulambila kwachendi. (Salimo 22:22; 122:1) Tingatang’ishane ngako muyake na muyake tikasonkhana pamo.—Aroma 1:12.

19. Ndaŵa yanji ni chinthu chofunika ngako kuujako ayakine va chendi cha m’Baibolo chamwaphunzila?

¹⁹ Njila iyakine yamungaoneshele kuti muchita vinthu mokatijana na kulambila kwachendi ni kuujako ayanu vamwaphunzila kufumila m’Baibolo. Ŵanthu anyinji okondwelalini na vinthu viipa vucitika pano pachalo. Payakine muziŵako ŵanthu ayakine akumvwa teti. Aujeni za chiyembekezo chiweme chamulinacho cha kusogolo. Mukopezeka pa misonkhano ya Chikhilisitu, nouja ayanu va chendi cha m’Baibolo, muwone mweka kuti maganizo ofuna kuchita vinthu vukatijana na chipembezo chawenye na miyambo yake ayambe kusila patontho-patontho. Ziŵani kuti mukochita vamene ivi munkhale osangalala komasoti kuti Yehova adalise voyesa-yesa vanu pamusankha kumulambila mu njila iweme.—Malaki 3:10.