1, 2. Haʼátʼíí naʼídíkid shı̨́ı̨́ baa nitsíníkees doo, éí haʼátʼíí biniyé?

DIYIN BIZAAD biiʼdę́ę́ʼ díí baa íhwiiniłʼą́ą́ʼ. Éí ląʼí diné God bikʼeh ádaʼiilʼı̨́, daaní. Ndi bee nidazhʼnitinígíí índa ádajooníiłgi éí God yijoołxá. (2 Corinthians 6:17) Doo tʼáá aaníí oodląʼ ádaatʼéii “Bábilan ayóó átʼéii,” bitsʼą́ąjįʼ chʼíhóhkááh, nihiłní Jiihóvah. (Revelation 17:5; 18:2, 4) Áko haa díínííł? Ádííníiłgi nihidáahgi silá. Áko díí baa nitsíikees, ‘God bikʼeh óʼoolʼįįłígíísh bikʼeh áníshtʼée doo, doodaiiʼ tʼáá ałkʼidą́ą́ʼ eʼeshʼínę́ʼígíísh eʼeshʼı̨́į doo?’

² Tʼáá íídą́ą́ʼ éí oodląʼ ádaatʼéii bitsʼéíníyáago doodaiiʼ churchdóó nízhiʼ hadoodzoh diníigo naaltsoos íinilaago éí yáʼátʼéhígi íinidzaa doo. Ndi, ląʼígóó bibee ádaʼoolʼįįłii yę́ę tʼahdii bíninidlı̨́. Éí díí ádaʼoolʼįįłii baa nídíítʼįįł, áádóó Jiihóvah yaa nitsíkeesígi átʼéego haʼátʼíí biniyé ílı̨́įgo baa nitsíikees doo.

3. (a) Edaʼalyaaii chodayoołʼı̨́įgi niʼádayiiłʼįįhgo, haʼátʼíí biniinaa nanitłʼah yileeh? (b) Edaʼalyaaii chooʼı̨́įgi éí Diyin Bizaad haʼátʼíí ní?

³ Ląʼí nááhai edaʼalyaaii ádaatʼéii yichʼįʼ nidahałáago hoolzhish. Ní ałdóʼ ákónítʼı̨́ı̨́ ńtʼéeʼgo, edaʼalyaaii tʼáágééd God bichʼįʼ nahadláago doo nił ákótʼée da shı̨́ı̨́. Jiihóvah bikʼeh óʼoolʼįįłii yínanihiniłtin. Diyin Bizaad ání, edaʼalyaaii chooʼı̨́įgi Jiihóvah dooda ní.​—Exodus 20:4, 5 yíníłtaʼ; Psalm 115:4-8; Isaiah 42:8; 1 John 5:21.

4. (a) Diné éí haʼátʼíí hádaatʼı̨́įgo béeso yąąh ádeiłdįįh? (b) Haʼátʼíí biniinaa díí báhádzid?

 ⁴ Diné éí hózhǫ́ǫgo shił hasʼą́ą doo danízin. Áko ałʼąą ádaatʼéégóó á sohodizin hádaatʼı̨́įgo béeso yąąh ádeiłdįįh. Éí bee achʼįʼ nidahwiiʼnánígíí, ąąh dahazʼą́, níłchʼi doo yáʼádaashóonii, dóó iiníziin ádaatʼéii bitsʼąą ádaa áháyą́ biniyé áhátʼı̨́. Díí éí níłchʼi yáʼátʼéehii bitsʼą́ą́dóó hwiindzin, ndi báhádzidgo átʼé, háálá éí Séítan dóó demons dabitsʼą́ą́dóó. Baa íhwiilʼą́ąʼgo, Séítan dóó demons éí diné yóóʼiiniiʼaahgo yindaʼaloʼ. Éí diyingo ndaalʼaʼí nidahalingo ádadilʼı̨́. (2 Corinthians 11:14) Nihíká iijeeh yeeʼ índa Jiihóvah doo bá daʼííníidlı̨́į da doo, dadíníidzįįł danihóʼní. Díí biniinaa Jiihóvah éí Ízrel dineʼé kwíidííniid, demon bił ahídadéétʼiʼii tʼáadoo baa nídaatʼíní.—Deuteronomy 18:10-12 yíníłtaʼ; Endnotes 26 dóó 31 níníłʼı̨́.

5. Díí báádahadzidii bitsʼąą ániitʼéego, haʼátʼíí níká adoolwoł?

⁵ Díí bádahádzidii bitsʼąą ániitʼéego, haʼátʼíí níká adoolwoł? Diyin Bizaad yíníłtaʼ doo. Jiihóvah yaa nitsíkeesgi hazhóʼó ndiiłkah. Jiihóvah éí díí “tʼóó baaʼihii” átʼéego yinéłʼı̨́. (Deuteronomy 27:15) Áko shí ałdóʼ ákótʼéego níshʼı̨́įgo áshíínísin dóó nikʼehgo óʼoolʼįįłii bikʼeh áníshtʼéego bee shíká anánílwoʼ, diníigo tʼáá ákwii jı̨́ Jiihóvah néiníkąąh doo. (Isaiah 55:9) Doo ákótʼéégóó íʼiiłʼı̨́įgo nahjįʼ kódíílíiłgi éí Jiihóvah bibee adziilii yee níká análwoʼ doo.

6. Haʼátʼíí biniyé Níłchʼitsoh 25 góneʼ Jesus biʼdizhchı̨́ haʼníigo nídiitʼą́?

⁶ Jesus biʼdizhchı̨́ hwiindzingo Késhmish ayóó bóhoneedlı̨́įgo baa nináʼáldah. Késhmish éí Jiihóvah doo yił ahídéétʼiʼ da. Encyclopedia ání, Rome dineʼé  ałkʼidą́ą́ʼ Níłchʼitsoh 25 góneʼ jóhonaaʼéí biʼdizhchı̨́ daaníigo bééhániihgo ádaʼałʼı̨́ı̨́ ńtʼééʼ. Jesus éí Níłchʼitsoh 25 góneʼ doo biʼdizhchı̨́į da ndi, Diyin Bizaad bá hashneʼii nishłı̨́ dajinínę́ę, nihí ałdóʼ daʼniitah doo, dazhdííniid. Éí łaʼ nihinááhidookahgo oodlání dazhdooleeł dazhniizı̨́ı̨́ʼ. (Luke 2:8-12) Jesus bídahoołʼaahii yę́ę tʼáadoo Késhmish ádaʼiilaa da. Naaltsoos łaʼ ání, Jesus biʼdizhchı̨́ı̨́dóó 200 nááhai biiʼ nahalzhiishgo éí “biʼdizhchı̨́ı̨́ góneʼígíí doo łaʼda bił bééhózin da, índa shíísh shikʼehdi danízin ńtʼééʼ.” (Sacred Origins of Profound Things) Jesus tádííyáhádą́ą́ʼ 300 nááhaidóó bikʼijįʼ nahalzhiishgo Késhmish bee hahoolzhiizh.

7. Christ bikʼeh dahółʼínígíí haʼátʼíí biniyé Késhmish doo nídaʼałeeh da?

⁷ Ląʼí diné bił béédahózingo Késhmish índa bił ádaʼoolʼįįłii éí doo oodlání danilínígíí bitsʼą́ą́dóó. Késhmish éí honeeni dóó tʼáadoo leʼé ałchʼįʼ ádeiłʼı̨́įgo yee yaa naakai. Englandi dóó łahdóó America, Késhmish doo bee hazʼą́ą da ńtʼééʼ. Háálá éí doo oodlání danilínígíí bitsʼą́ą́dę́ę́ʼ yitʼih. Áko Késhmish biniinaa atídahoʼdilʼı̨́ı̨́ ńtʼééʼ. Ndi tʼahádóó diné éí Késhmish yaa nínáádiikai. Christ bikʼeh dahółʼínígíí haʼátʼíí biniyé Késhmish doo nídaʼałeeh da? Jó, éí tʼáá ałtsojįʼ ádaaníiłgi God yee yił dahóshǫ́ǫ doo danízin.

8, 9. Ałkʼidą́ą́ʼ Christ bikʼeh dahółʼínę́ę biʼdizhchı̨́įjįʼ anéíłkaahgo, haʼátʼíí biniinaa doo ándaʼiilʼįįh da ńtʼééʼ?

⁸ Łaʼ bóhoneedlínígíí éí hoʼdizhchı̨́įjįʼ anáyííłką́ągo baa nináʼáldah. Díísh aniitah doo? Jiihóvah doo daboodlánígíí biʼdizhchı̨́įjįʼ anáyííłką́ągo bá oodą́ą́ʼ, níigo  Diyin Bizaad yaa hanleʼ. (Genesis 40:20; Mark 6:21) Hoʼdizhchı̨́įjįʼ anáyííłką́ągo baa naʼaldeehgo éí doo diyin ádaatʼéii baa haʼniih biniyé baa nináʼáldah ńtʼééʼ. The World Book Encyclopedia éí ałkʼidą́ą́ʼ Oodlání danilínę́ę kwííłní, “Hoʼdizhchı̨́įjįʼ anáyííłką́ągo baa naʼaldeehígíí éí doo oodlání danilínígíí bitsʼą́ą́dóó yitʼihii átʼé.”

⁹ Ałkʼidą́ą́ʼ Rome dóó Gríik dineʼé éí bidiyin tʼóó adahayóigo dayoodlą́ą́ ńtʼééʼ. Éí díí diyin łaʼ biʼdizhchínę́ę góneʼé diné łaʼ biʼdichíihgo éí náánáłaʼ níłchʼi nilı̨́įgo bił hólǫ́ǫ łeh daaníigo dayoodlą́ą́ ńtʼééʼ. Díí níłchʼi nilínígíí haashı̨́ı̨́ yitʼéego diyinígíí yił naalnishgo diné biʼdizhchínígíí yił hólǫ́ǫ doo, daaní. Diné biʼdizhchínę́ęjįʼ anáhwiilzhíishgo ánájilʼįįgo éí níłchʼi nilínígíí bił hólǫ́ǫgo hoolzhish doo, daaní. Doo oodlání danilínígíí díí dayoodlą́ągo yaa ninákah ńtʼééʼ.

10. Hoʼdizhchı̨́įjįʼ anéíłkaahgo álnéehgo, haʼátʼíí biniinaa doo daʼniitah da doo?

¹⁰ Díí kótʼéego woodlą́ągo baa ooldahígíí, Jiihóvah bił yáʼátʼééhísh nínízin? (Isaiah 65:11, 12) Ndagaʼ, tsʼídá doo bił yáʼátʼéeh da. Áko éí biniinaa hoʼdizhchı̨́įjįʼ anéíłkaahgo álnéehgo índa doo Jiihóvah bitsʼą́ą́dóó dadeeztʼiʼii doo daʼniitah da doo.

11. Haʼátʼíí biniyé holiday diné yaa naakai? Diyin Bizaad haʼátʼíí ílı̨́įgo baa nitsíikees doo ní?

¹¹ Késhmish dóó holiday, diné bił béédahózingo éí doo oodlání bitsʼą́ą́dóó yitʼih, ndi tʼahdii atah yaa naakai. Éí ákohgo shaʼáłchíní dóó shikʼéí bił ahínéiishkah daaní. Niísh ákótʼéego baa nitsíníkees? Haʼáłchíní dóó hakʼéí bił ahéézhdiikahgo éí tʼáadoo átʼéhí da. Jiihóvah  éí hooghan nahazʼą́ągo áyiilaa, éí kʼé daʼahidiiʼníi doo nihóʼní. Holiday biniyé nihikʼéí bił ahínéiikahgo bił dahózhǫ́ǫ łeh. Ndi Jiihóvah éí doo baa bił hózhǫ́ǫ́góó ádiilnííł háálá éí doo bí bitsʼą́ą́dóo da. Diyin Bizaad ání: “Bóhólníihii yaa bił hózhǫ́ǫ dooleełii nabídanohtaahgo bídahoołʼaah.”​—Ephesians 5:10.

12. Haitʼéhígíí holiday Jiihóvah doo bił yáʼátʼéeh da?

¹² Holiday bitsʼą́ą́dóó yitʼihii diné doo bidaʼdiiłʼáágóó atah yaa naakai, ndi Jiihóvah éí biʼdiiłʼá. Hakéyah bá agháʼáhizhdeezı̨́įgi índa ałʼąą ádaatʼéii bá hodílzingo doodaiiʼ łaʼda bééhániih biniyé ahínáʼiildah, díí tʼáá átʼé Jiihóvah doo bił yáʼátʼéeh da. Ííjip dineʼé dabidiyin ląʼí ałʼąą ádaatʼéego yá ahínéiikahgo yichʼįʼ ninádahałáá ńtʼééʼ. Ízrel dineʼé éí Ííjipdę́ę́ʼ chʼínátʼéezhgo áádóó bibee ádaʼoolʼįįłii yę́ę yeedaʼiidlaa. Éí Jiihóvah ‘bichʼįʼgo hodílzingo áłah náʼádleeh,’ deiłníigo dayíízhiʼ. Díí biniinaa Jiihóvah atíhoolaa. (Exodus 32:2-10) Aizéíyah ánínę́ęgi átʼéego, “chin bąąh hólóonii bidadoołchííd” lágo.​—Isaiah 52:11 yíníłtaʼ.

13. Holiday niʼádeeshłííł ninzı̨́įʼgo, haʼátʼíí bínaʼídíłkid doo?

¹³ Holiday anítah ńtʼéeʼgi niʼádeeshłííł ninzı̨́įʼgo, naʼídíkid nee hólǫ́ǫ doo. Bił nanilnishígíí łaʼ áníi doo, haʼátʼíí biniyé Késhmish doo náʼíłeeh da? Łaʼda shichʼįʼ áʼiilaago, haa deeshnííł? Shichʼooní, holiday nihił áʼdíílííł, níigo haa deeshnííł? Shaʼáłchíní biʼdizhchı̨́įjįʼ anáhoolzhiizhgo doodaiiʼ holiday tʼáadoo ádaʼíilyaagóó, haitʼéego bił dahózhǫ́ǫgo íínísin doo?

14, 15. Yáʼátʼééh Késhmish nidiʼníigo índa łaʼda nichʼįʼ áʼiilaago, haa díínííł?

¹⁴ Bee hadíídzihgi dóó ádííníiłgi áłtsé baa tsídidííkos.  Yáʼátʼééh Késhmish hodiʼníigo éí doo tʼóó bitsʼą́ąjįʼ ániitʼée da doo. Tʼóó ahéheeʼ didiiʼniił. Łaʼda haʼátʼíí lá biniyé holiday doo anítahígi shił bééhodoozįįł nízingo hazhóʼó bił hodíílnih. Neʼajoobaʼ, ił ídlı̨́ índa saad hazhóʼó bee hadíídzih. Diyin Bizaad ání: “Ajoobaʼ saad éí áshįįh halnihígi átʼéego bee yádaałtiʼ, ákódaahtʼı̨́įgo diné tʼááłáʼí nítínígo bichʼįʼ tʼą́ą́ʼ hááʼdoodzihgi nihił béédahózin doo.” (Colossians 4:6) Łaʼ bił ahínéiishkahgo ałchʼįʼ ádaʼiilʼı̨́įgo bídaniidlı̨́įgo átʼé. Ákondi, holiday bił ndaaztʼiʼgo éí doo bee aniitah da.

¹⁵ Łaʼda nichʼįʼ áyiilaago, haa díínííł? Diyin Bizaad éí áʼdoolníiłgi doo nihá ałkʼééʼ yisnil da, ndi nihíniʼ siláagi bee ádá hazhóʼó nitsíikees. (1 Timothy 1:18, 19) Łaʼda nichʼįʼ áʼiilaaígíí holiday doo anítahígi, doo shı̨́ı̨́ bił bééhózin da. Doodaiiʼ kóníida dooleeł, “Shił bééhózingo holiday doo anítah da, ndi díí naa deeshʼááł nisin.” Ndi, nichʼįʼ ályaaígíí ádíílíiłgi tʼáá ní bee níhólnííh. Áko háájí shı̨́ı̨́ íinidzaaígíí, tʼáá ní hazhóʼó bee baa tsídidiikos. Háálá Jiihóvah nizhónígo bił kʼé ahidiiʼníigi baa siitiʼ.

16. Nighan hazʼą́ą́dóó holiday daʼdiidleeł, daniłníigo haa díínííł?

¹⁶ Nighan hazʼą́ą́dóó holiday daʼdiidleeł, daniłníigo haa díínííł? Hazhóʼó bił baa nídíítʼįįł. Ádaʼdoolíiłgo tʼáá bí bee bídahólnííh. Jiiníbaʼ, tʼáá bí ádaʼdoolíiłgi nił nilı̨́įgo bá baa nitsíníkees, áko bí ałdóʼ nichʼįʼ tʼáá ákódaatʼée doo. (Matthew 7:12 yíníłtaʼ.) Holiday baa nídahwiilzhishgo, nihił honílǫ́ǫ doo danízingo, haitʼéego baa tsídidííkos? Tʼah doo lą́ íłeehgóó áłtsé Jiihóvah bichʼįʼ sodidíílzįįł, shíká anílyeed, bididííniił. Kótʼéego  nił hooʼaʼgo éí hazhóʼó ádoolníiłgi ndiiłkah. Tʼáá áłahájįʼ Jiihóvah bił honiilzhǫ́ǫ doo niidzin.

17. Naʼáłchíní éí holiday binááł baa ooldahgo, doo shééhániih da nízingo, haitʼéego bíká adiilwoł?

¹⁷ Naʼáłchíní éí holiday binááł baa naʼaldeehgo, haitʼéego bíká adiilwoł? Tʼáá ahą́ą́h tʼáadoo leʼé bóhoneedlı̨́įgo bá ánáʼiilʼįįh. Éí doodaiiʼ tʼáadoo nayolíhí ałchʼįʼ ádaalʼínígíída bichʼįʼ ánéiinilʼįįh. Naʼáłchíní bił honílǫ́ǫgo índa neʼayóóʼóʼóʼniʼ éí aláahdi átʼéego baa díílééł.

18. Áłah nádleehgi, haʼátʼíí biniyé néiidáah doo?

¹⁸ Jiihóvah bił hózhǫ́ǫgo ííníilzin doogo, éí doo bí bitsʼą́ą́dóó ádaʼoolʼįįłii índa holiday yóóʼahididiitʼááł. Jiihóvah bikʼeh óʼoolʼįįłii bikʼeh ániitʼée doo. Éí haitʼéego? Jiihóvah Yá Dahalneʼé áłah nádleehgi tʼáá ahą́ą́h néiidáah doo. (Hebrews 10:24, 25 yíníłtaʼ.) Ákweʼé niheʼoodląʼ Jiihóvah baa dahwiiʼniih biniyé néiitʼaah. (Psalm 22:22; 122:1) Áádóó ahidiníłnáago tʼááłáʼí oodlą́ bee hadaʼahííníilní.​—Romans 1:12.

19. Diyin Bizaad baa nahólneʼgo, haʼátʼíí biniyé ílı̨́įgo átʼé?

¹⁹ Náánáłaʼ Jiihóvah bikʼeh óʼoolʼįįłii éí Diyin Bizaad biiʼdę́ę́ʼ bíhwiiniłʼą́ʼígíí diné bee bił hwiilneʼ doo. Tʼóó baaʼihgo baa ooldahii ląʼí diné yikʼee yínííł nidaakai. Łaʼ shı̨́ı̨́ kótʼéego nidaakaigo yíníʼı̨́. Náasdi baa hózhǫ́ǫ dooleełígíí bee bił dahólneʼ. Jiihóvah Yá Dahalneʼé áłah nádleehgi nánídáahgo dóó Diyin Bizaad tʼáá aanínígi yee naʼnitinígíí baa nahólneʼgo, éí Jiihóvah yikʼijįʼ nidaʼnitinígíí índa bibee ádaʼoolʼįįłii doo nínízin da doo. Jiihóvah bikʼeh ániitʼéego éí ayóó átʼéego akʼihojidlíii nihikʼijįʼ yeideeshnił nihiłní, áko nił hózhǫ́ǫ doo.​—Malachi 3:10.