1, 2. Ni kibuuzo ki eki oshemereire kwebuuza, kandi ahabw’enki eki kiri kikuru?

OBWIRE bwona obu omazire nooyega Baibuli, oyegire ngu abantu baingi abarikugira ngu nibaramya Ruhanga, nibeegyesa nari bakora ebintu ebi atarikusiima. (2 Abakorinso 6:17) Niyo nshonga ahabw’enki Yehova naaturagiira kuruga omu diini z’ebishuba, “Orurembo Orukuru Babulooni.” (Okushuuruurwa 18:2, 4) Noija kukora ki? Buri omwe ahariitwe aine kucwamu, kandi twine kwebuuza tuti: ‘Niinyenda kuramya Ruhanga omu muringo ogu arikusiima, nari niinyenda kumuramya nk’oku ntwire nimmuramya?’

² Ku oraabe waarugire omu diini y’ebishuba, ekyo ni kirungi. Kwonka noobaasa kuba okiine emigyenzo n’ebikorwa by’ediini y’ebishuba ebi okirikukunda. Ka tushwijume emwe aha migyenzo n’ebikorwa, reero tureebe ahabw’enki kiri kikuru kubireeba nk’oku Yehova arikubireeba.

3. (a) Ahabw’enki abamwe nikibagumira kurekyera aho kukoresa ebishushani omu kuramya? (b) Baibuli neegamba ki aha kukoresa ebishushani omu kuramya Ruhanga?

³ Abantu abamwe baine ebishushani nari obuju bw’emandwa omu maka gaabo ebi batwire nibakoresa omu kuramya kumara emyaka mingi. Ku oraabe otwire noobikoresa, noobaasa kuteekateeka ngu tikirikubaasika kushaba Ruhanga otabiine. Kwonka ijuka ngu Yehova naatwegyesa oku twine kumuramya. Baibuli neetworeka butunu ngu Yehova tarikwenda tukorese ebishushani omu kumuramya.—Shoma Okuruga 20:4, 5; Zaaburi 115:4-8; Isaaya 42:8; 1 Yohaana 5:21.

4. (a) Ahabw’enki tutashemereire kuramya baatatenkuriitwe abaafiire? (b) Ahabw’enki Yehova yaaragiire Abaisraeli okutateeraho kugamba n’abafu?

 ⁴ Abantu abamwe nibabaasa kumara obwire bwingi barikuteeraho kushemeza baishenkurubo abaafiire. Nibabaasa n’okubaramya. Kwonka twegire ngu abafu tibarikubaasa kutuhwera nari kutukora kubi. Tihaine ahu barikuba bari. Buzima, n’eky’akabi kuteeraho kuhurizana nabo, ahakuba obutumwa bwona oburikureebeka nk’oburikuruga aha mukundwa waawe owaafiire, buzima nibuba niburuga ahari baadaimoni. Niyo nshonga ahabw’enki Yehova yaaragiire Abaisraeli kutagamba n’abafu, nari kwejumba omu bikorwa bya baadaimoni eby’emiringo yoona.—Eky’Ebiragiro 18:10-12; reeba Ebirikukiraho 26 na 31.

5. Niki ekiraakuhwere kurekyera aho kukoresa ebishushani omu kuramya n’okutaramya abaafiire?

⁵ Niki ekirikubaasa kukuhwera kurekyera aho kukoresa ebishushani omu kuramya Ruhanga nari okutaramya baashwenkuru abaafiire? Oine kushoma Baibuli, kandi okateekateeka munonga aha ku Yehova arikutwara ebintu ebyo. Ebi n’ebintu ebi ‘arikwangira kimwe,’ nari ebi arikunuga. (Eky’Ebiragiro 27:15) Shaba Yehova buri izooba kukuhwera kugira emiteekateekyere nk’eye, akuhwere n’okumuramya nk’oku arikwenda. (Isaaya 55:9) Hatariho kubanganisa Yehova naija kukuha amaani agu orikwetenga, kubaasa kweihaho ekintu kyona ekiine akakwate n’okuramya kw’ebishuba.

6. Ahabw’enki abantu baatooraine Okwaikumi-n’abari ebiro 25 kukurizaho okuzaarwa kwa Yesu?

⁶ Omu nsi yoona, Noiri ni kimwe aha biro bikuru ebirikumanywa munonga, kandi abantu baingi nibateekateeka ngu nibaba nibakuza okuzaarwa kwa Yesu. Kwonka Noiri buzima eine akakwate n’okuramya okw’ebishuba. Ekitabo kimwe ekirikwetwa encyclopedia nikishoboorora ngu  Abarooma abakaafiire bakaba bakuza okureebeka kw’eizooba omu Kwaikumi-n’abari ebiro 25. Abeebembezi b’ediini ahabw’okwenda ngu abakaafiire baingi baije omu diini yaabo, bakacwamu kukuza okuzaarwa kwa Yesu aha biro 25 by’Okwaikumi-n’abiri, n’obu Yesu araabe atarazairwe aha biro ebyo. (Luka 2:8-12) Abeegi ba Yesu bakaba batarikukuza Noiri. Ekitabo Sacred Origins of Profound Things nikishoboorora ngu omu myaka 200 Yesu aherize kuzaarwa, “tihariho n’omwe owaabaire naamanya obu Yesu yaazaarwa, kandi abantu bakye nibo baabaire nibafayo kumanya obu yaazaarwa.” Okukuza Noiri kukatandika bwanyima y’emyaka mingi Yesu aherize kuruga omu nsi.

7. Ahabw’enki Abakristaayo ab’amazima batarikukuza Noiri?

⁷ Abantu baingi nibamanya ngu Noiri n’ebikorwa byayo nk’emikoro n’okuha abantu ebiconco, nibikomooka omu bakaafiire. Nk’eky’okureeberaho, omuri England n’ebicweka ebimwe ebya America, hariho obu baazibira okukuza Noiri ahabw’okugira ngu ekakomooka omu bukaafiire. Weena owaabaire akuza Noiri bakaba bamufubira. Kwonka bwanyima, abantu bakagaruka baatandika kukuza Noiri. Ahabw’enki Abakristaayo ab’amazima batarikukuza Noiri? N’ahabw’okuba nibaba nibenda kushemeza Ruhanga omu buri kimwe eki barikukora.

8, 9. Ahabw’enki Abakristaayo aba ira baabaire batarikukuza ebiro by’okuzaarwa?

⁸ Ekindi eki abantu barikukira kukuza n’ebiro by’okuzaarwa. Mbwenu shi Abakristaayo bashemereire kukuza ebiro by’okuzaarwa? Ebiro by’okuzaarwa byonka ebirikugambwaho omu Baibuli, bikakuzibwa abo abaabaire batarikuramya Yehova. (Okutandika 40:20; Mako 6:21) Abantu bakaba bakuza ebiro by’okuzaarwa kuhimbisa baaruhanga b’ebishuba. Egi niyo  nshonga ahabw’enki ekitabo World Book Encyclopedia nikigira ngu Abakristaayo aba ira “bakaba nibatwara okukuza okuzaarwa kw’omuntu nk’omugyenzo gw’ekikaafiire.”

⁹ Abarooma n’Abagriika aba ira bakaba nibaikiriza ngu buri muntu yaaba naazaarwa nihaba hariho omwoyo, kandi ngu omwoyo ogwo nigurinda omuntu ebiro by’amagara ge byona. Abatari Bakristaayo ab’obwire obwo bakaba bakuza ebiro by’okuzaarwa barikuteekateeka ngu ekyo nikiija kureetera baaruhanga baabo kurinda omuntu ou barikukuza okuzaarwa kwe.

10. Ahabw’enki Abakristaayo hati bataine kukuza ebiro by’okuzaarwa?

¹⁰ Nooteekateeka ngu Yehova naasiima emikoro eine akakwate n’ediini z’ebishuba? (Isaaya 65:11, 12) Ngaaha, tarikugisiima. Niyo nshonga ahabw’enki tutarikukuza ebiro by’okuzaarwa nari ekiro kikuru kyona ekiine akakwate n’ediini y’ebishuba.

11. Ahabw’enki abamwe nibakuza ebiro bikuru, kwonka iwe niki eki oine kutwara nka kikuru?

¹¹ Abamwe nibakimanya ngu ebiro bikuru nka Noiri n’ebindi, nibikomooka aha bakaafiire, kwonka nibagumizamu kubikuza. Nibateekateeka ngu ebiro bikuru nk’ebi, n’obwire burungi bw’okubaho n’ab’amaka gaabo. Iwe nikwo orikuteekateeka? Ti kigwire kugira obwire okabaho n’ab’eka yaawe. Yehova niwe yaatandikireho eka, kandi naayenda ngu tugire omukago murungi n’ab’amaka gaitu. (Abaefeso 3:14, 15) Kwonka, twine kuta omutima aha kugira omukago murungi na Ruhanga omu mwanya gw’okuta omutima aha kushemeza abanyabuzaare, turikukuza ebiro bikuru by’ediini z’ebishuba. Niyo nshonga ahabw’enki entumwa Paulo yaagizire ati: “Mwetegyereze ebirikusiimwa Mukama.”—Abaefeso 5:10.

12. Niki ekirikubaasa kureetera omukoro kutasiimwa Yehova?

 ¹² Abantu baingi nibateekateeka ngu obukomooko bw’ebiro bikuru ti bwine nshonga, kwonka Yehova tikwo arikuteekateeka atyo. Tarikusiima ebiro bikuru ebirikukomooka omu kuramya kw’ebishuba, ebirikuhimbisiriza omuntu nari obumanyiso bw’eihanga. Nk’eky’okureeberaho Abanyamisri bakaba baine emikoro mingi ya baaruhanga baabo ab’ebishuba. Abaisraeli ku baarugire Misri, bakatooreza gumwe aha mikoro y’ekikaafiire, reero baagweta “obugyenyi bw’ekiro kikuru kya” Yehova. Kwonka Yehova akabafubira ahabw’ekikorwa ekyo. (Okuruga 32:2-10) Nk’oku nabi Isaaya yaagizire, titushemereire kukwata “aha kintu kyona ekitashemeire!”—Shoma Isaaya 52:11.

13. Noobaasa kwebuuza bibuuzo ki waacwamu kurekyera aho kukuza ebiro bikuru?

¹³ Waacwamu kurekyera aho kukuza ebiro bikuru, noobaasa kutandika kwebuuza ebibuuzo bingi. Nk’eky’okureeberaho, noobaasa kwebuuza oti: Nshemereire kukora ki abakozi bagyenzi bangye baambuuza ahabw’enki ntarikukuza Noiri nabo? Nshemereire kukora ki omuntu yaampa ekiconco kya Noiri? Nshemereire kukora ki ou ndi nawe omu bushwere yaaba naayenda ngu nkuze ekiro kikuru nawe? Nimbaasa kuhwera nta abaana bangye kutahurira kubi ahabw’okutakuza ebiro bikuru nari ebiro by’okuzaarwa?

14, 15. Noobaasa kukora ki baakwendeza ebiro bikuru birungi, nari baakuha ekiconco aha kiro kikuru?

¹⁴ Ni kikuru kukoresa okwetegyereza kucwamu oku oraagarukyemu n’eki oraakore omu buri mbeera. Nk’eky’okureeberaho, abantu baakwendeza ebiro bikuru birungi, tikirikumanyisa ngu oine kubeehuzya. Noobaasa kugarukamu ngu, “yebare.” Kwonka omuntu yaaba naayenda kumanya  ebirikukiraho, noobaasa kucwamu kumushoboororera ahabw’enki otarikukuza ebiro bikuru. Kwonka, butoosha ba omunyambabazi, koresa okwetegyereza, kandi ohe abandi ekitiinisa. Baibuli neegira eti: “Ebigambo byanyu bigume biri eby’embabazi, nk’ebirimu omwonyo, mubone kumanya oku mushemereire kugarukamu omuntu weena.” (Abakolosai 4:6) Obundi noobaasa kushoboorora ngu nookunda okuba hamwe n’abandi n’okuha ebiconco, kwonka torikwenda kukikora omu bwire bw’ebiro bikuru ebi.

¹⁵ Kandi shi omuntu ku yaakuba naayenda kukuha ekiconco? Baibuli terikuha omushororongo gw’ebiragiro, kwonka neegira ngu tushemereire kuguma twine omutima murungi ogutarikutushinja. (1 Timoseo 1:18, 19) Shana obundi orikukuha ekiconco tarikumanya ngu torikukuza ebiro bikuru. Nari naabaasa kugira ati: Nimmanya ngu torikukuza ekiro kikuru, kwonka nabwo niinyenda kukuha ekiconco eki.” Omu mbeera zombi, noobaasa kucwamu kwikiriza ekiconco nari kutakiikiriza. Kwonka eki oraacwemu kyona, hamya kureeba ngu waaguma oine omutima murungi ogutarikukushinja. Titurikwenda kukora ekintu kyona ekirikubaasa kushiisha omukago gwaitu na Yehova.

16. Noobaasa kukora ki ab’eka yaanyu baaba nibenda kukuza ekiro kikuru?

¹⁶ Noobaasa kukora ki ab’eka yaanyu baaba nibenda kukuza ekiro kikuru? Toine kurwana nabo. Ijuka ngu baine obugabe bw’okwecweramu eki barikwenda kukora. Ba omunyambabazi aharibo kandi ohe ekitiinisa ebi barikucwamu, nk’oku orikwenda ngu bahe ekitiinisa ebi orikucwamu. (Shoma Matayo 7:12.) Kandi shi ab’eka yaanyu baaba nibenda ngu obe ori nabo baaba nibakuza ekiro kikuru, oine kukora ki? Otakacwiremu eky’okukora, shaba Yehova kukuhwera kucwamu gye. Teekateeka aha mbeera, kandi  ocondooze. Ijuka ngu butoosha nooba nooyenda kushemeza Yehova.

17. Noobaasa kuhwera ota abaana baawe kutahurira kubi baareeba abandi nibakuza ebiro bikuru?

¹⁷ Noobaasa kukora ki kuhwera abaana baawe, baareeba abandi nibakuza ebiro bikuru? Nikiba kiri kirungi obumwe n’obumwe kuguma nootebeekanisiza abaana baawe ekintu ky’omutaano. Noobaasa n’okubaha ebiconco omu bwire obundi. Ekiconco ekirikukirayo oburungi eki orikubaasa kuha abaana baawe n’obwire bwawe na rukundo.

18. Ahabw’enki oine kuza omu nteerane z’Ekikristaayo?

¹⁸ Kubaasa kushemeza Yehova, oine kuruga omu diini ey’ebishuba kandi okareka n’emigyenzo yaayo n’ebiro bikuru byayo. Kandi nabwo oine kuza omu kuramya okw’amazima. Mu muringo ki? Omuringo gumwe n’okuteeranira hamwe n’Abakristaayo bagyenzi baawe otarikwosha. (Shoma Abaheburaayo 10:24, 25.) Enteerane ni nkuru munonga omu kuramya okw’amazima. (Zaaburi 22:22; 122:1) Nitugumyana twaza omu nteerane.—Abarooma 1:12.

19. Ahabw’enki kiri kikuru kugambira abandi aha mazima agu oyegire?

¹⁹ Ekindi ekirikutwarirwa omu kuramya okw’amazima n’okugambira abandi ebi oyegire omu Baibuli. Abantu baingi baine amaganya ahabw’ebintu bibi ebirikubaho omu nsi. (Ezekieli 9:4) Obundi haine abantu abu orikumanya abaine amaganya. Bagambire aha matsiko gaawe ag’ebiro by’omumaisho. Waagumizamu nooteeranira hamwe n’Abakristaayo ab’amazima, kandi orikugambira abandi amazima g’omu Baibuli, noija kureeba ngu tokiine kyetengo ky’okuguma omu diini y’ebishuba n’emigyenzo yaayo. Gira obwesigye ngu noija kushemererwa, kandi Yehova naija kukuha emigisha waacwamu kumuramya omu muringo oguhikire.—Malaki 3:10.