1, 2. Antoy nepeg ya itepet mod sarilim, tan akin et importante itan?

DIAD panaaral moy Biblia, naaralan mo ya dakel manaya ed saramay mangibabagan mandadayew ed Dios so mangibabangat odino manggagaway aglabay na Dios. (2 Corinto 6:17) Kanian igaganggan nen Jehova ya onekal tayo ed palson relihyon, say “Makapanyarin Babilonia.” (Apocalipsis 18:2, 4) Antoy gawaen mo? Kaukolan tayon amin so mandesisyon, tan nepeg tayon tepetan so sarili tayo, ‘Kasin labay kon dayewen so Dios diad paraan ya labay to, odino labay kon dayewen diad paraan ya abangonan ko?’

² No pinmaway o inmekal ka lad palson relihyon, maong so ginawam. Balet ompan diad pusom et wala ni ray selebrasyon tan kustombre na palson relihyon ya tatalaranan odino labalabay mo ni. Pantongtongan tayo so pigara ed saratan ya selebrasyon tan kustombre, tan nengnengen tayo no akin ya importantin ipasen tayo iratan a singa ed pangipapasen nen Jehova.

3. (a) Akin et naiirapan so arum ya itunda so pangusar na imahen diad panagdayew da? (b) Antoy ibabaga na Biblia ed pangusar na imahen diad panagdayew ed Dios?

³ Wala ray abaybayag lan manguusar na imahen odino altar diad abung da pian dayewen so Dios. No ontan so gagawaen mo, ompan singa agka apasal odino say pakaliknam et aliwan duga no mandayew kad Dios ya anggapo iratan. Balet tandaan, ibabangat itayo nen Jehova no  panon tayon dayewen. Tan malinew ya ibabaga na Biblia ya aglabay nen Jehova a mangusar tayo na imahen diad panagdayew tayo.​—Basaen so Exodo 20:4, 5; Salmo 115:4-8; Isaias 42:8; 1 Juan 5:21.

4. (a) Akin et agtayo nepeg ya dayewen iray inatey lan kakanayon tayo? (b) Akin et ingganggan nen Jehova iray totoo to ya agda sasalien so mitongtong ed saray inaatey?

⁴ Wala ray totoo ya uusaren day dakel a panaon tan biskeg da pian napaliket da kuno iray inatey lan kakanayon da. Dadayewen da ni ra ingen. Balet naaralan tayo la ya saray inaatey et agda tayo natulongan odino nasakitan. Ag-ira manbibilay ed arum ya pasen. Mapeligro no salien moy mitongtong ed sikara ta diad tua, antokaman ya mensahe ya singa manlalapud sikara et nanlapud saray demonyo. Kanian ingganggan nen Jehova iray Israelita ya agdan balot sasalien so mitongtong ed saray inaatey odino mibiang ed anggan anton paraan na demonismo.​—Deuteronomio 18:10-12; nengnengen so Kaaruman ya Impormasyon 26 tan 31.

5. Antoy makatulong pian nitundam so pangusar na imahen tan pandayew ed saray inatey lan kakanayon?

⁵ Antoy makatulong pian nitundam so pangusar na imahen ed panagdayew mod Dios odino pian nitundam so pandayew ed saray inatey lan kakanayon mo? Kaukolan mon basaen so Biblia tan isipen mon maong no antoy pangipapasen nen Jehova ed saratan. Parad sikato et “makapadimla” iratan. (Deuteronomio 27:15) Ipikasim ed si Jehova ya inagew-agew to kan tulongan pian magmaliw ya mipara so panagnonot mo ed panagnonot to tan tulongan to kan mandayew ed sikato diad paraan ya labay to. (Isaias 55:9) Makaseguro ka ya ikdan ka nen Jehova na biskeg pian nitundam so amin ya walay koneksion tod palson panagdayew.

6. Akin et Disyembre 25 so apilin agew ya panselebra na birthday nen Jesus?

⁶ Diad interon mundo, say Krismas et sakey ed saray kabkabat ya holiday, tan iisipen na dakel a totoo ya selebrasyon itan na inkiyanak o birthday nen Jesus. Balet diad tua, say Krismas et walay koneksion to ed palson panagdayew. Impaliwawa na sakey ya encyclopedia ya seselebraan na saray paganon Romano so birthday na agew kada Disyembre 25. Labay na saray lider na simbaan ya mas dakel nin pagano so magmaliw a Kristiano, kanian anggano aliwan Disyembre 25 so inkiyanak nen Jesus, nandesisyon iran selebraan so birthday nen Jesus ed satan ya petsa. (Lucas 2:8-12) Balet agnanselebra na Krismas iray disipulo nen Jesus. Impaliwawa na sakey a libro ya 200 taon kayari na inkiyanak nen Jesus, “anggapoy makaamta tan dagdaiset so interesado no kapigan so eksakton inkiyanak to.” (Sacred Origins of Profound Things) Anggapo lay Jesus diad dalin tan nilasus taon lay linmabas nen ginmapo so panagselebra na Krismas.

7. Akin et agmankri-Krismas iray tuan Kristiano?

⁷ Amta na dakel a totoo ya nanlapud pagano so Krismas pati saray gagawaen no Krismas, singa say panhanda tan paniiteran na regalo. Singa bilang, diad England tan arum ya parte na America, walay panaon ya insebel so pan-Krismas lapud pagano so nanlapuan na satan. Siopaman ya manselebra et nadusa. Balet, kalabas na panaon, nan-Krismas lamet iray totoo. Akin et agmankri-Krismas iray tuan Kristiano? Lapud labay dan paliketen so Dios ed amin ya gagawaen da.

8, 9. Akin et agnanselebra na birthday iray Kristiano nen inmunan siglo?

⁸ Say sakey nin seselebraan na totoo et say birthday. Nayari  kasin manselebra na birthday iray Kristiano? Say abitla labat ed Biblia ya nanselebra na birthday et saray agmandadayew ed si Jehova. (Genesis 40:20; Marcos 6:21) Seselebraan so birthday pian pagalangan iray palson dios. Kanian saray Kristiano nen inmunan siglo et “impasen [dan] paganon kustombre so panselebra ed inkiyanak na anggan siopa.”​—The World Book Encyclopedia.

⁹ Panisiaan na saray Romano tan Griego nensaman ya no iyanak so sakey a too, walay akabantay ya espiritu tan satan so manprotekta ed sikato legay bilay to. “Sayan espiritu et walay misteryoson pikonektaan tod dios ya say inkiyanak to et miparad inkiyanak na sakey a too,” so impaliwawa na libron The Lore of Birthdays.

10. Akin et agmanseselebra na birthday iray Kristiano natan?

¹⁰ Kasin ayos labat ed si Jehova iray selebrasyon ya walay koneksion tod palson relihyon? (Isaias 65:11, 12) Andi. Atan so rason no akin ya agtayo manseselebra na birthday odino anggan anton holiday ya walay koneksion tod palson relihyon.

11. Akin ya manseselebra na holiday so arum? Antoy nepeg ya sankaimportantian ed sika?

¹¹ Wala ray totoo ya amta ray paganon nanlapuan na Krismas tan arum nin holiday, balet siansia nin seselebraan da iratan. Parad sikara et pankanawnawa itan pian nakaiba iray kapamilya da. Ontan met kasi so iisipen mo? Aliwan mauges so pilimog ed pamilya. Si Jehova so angiletneg na pamilya, tan labay ton nawalaan tayo na maong ya relasyon ed sikara. (Efeso 3:14, 15) Balet kaukolan tayoy manpokus ed pakawalaan na maong a relasyon ed si Jehova, imbes ya diad pamaliket ed saray kakanayon diad panselebra na saray holiday na palson relihyon. Atan so rason no akin ya imbaga nen apostol Pablo: “Itultuloy  yon seguroen no antoy makapaliket ed Katawan.”​—Efeso 5:10.

12. Antoy rason no akin ya ag-aabobonan nen Jehova iray holiday?

¹² Iisipen na dakel a totoo ya agla importante no iner so nanlapuan na saray holiday, balet aliwan ontan so labay nen Jehova. Agto aabobonan iray holiday ya nanlapud palson relihyon odino mangidadayew ed totoo odino simbolo na nasyon. Singa bilang, saray taga Ehipto et dakel so selebrasyon da parad saray palson dios da. Kapaway na saray Israelita ed Ehipto, inalig day sakey ed saratan ya paganon selebrasyon tan tinawag da ya “piesta parad si Jehova.” Balet dinusa ira nen Jehova lapud satan. (Exodo 32:2-10) Singa imbaga nen propeta Isaias, nepeg ya ‘agtayo didiwiten iray marutak!’—Basaen so Isaias 52:11.

13. Anto ray nayarin nitepet mo no nandesisyon kan itunda la so panselebra na saray holiday?

¹³ No nandesisyon kan itunda la so panselebra na saray holiday, nayarin amayamay so nitepet mo. Singa bilang: Antoy gawaen ko no tepetan ak na saray katrabahok no akin ya agak la mankri-Krismas? Antoy gawaen ko no walay manregalo ed siak no Krismas? Antoy gawaen ko no labay na asawak ya manselebra ak na holiday? Antoy gawaen ko pian agmaermen iray ananak ko no agkami la manselebra na holiday odino birthday da?

14, 15. Antoy gawaen mo no walay mangibagad sika na “Merry Christmas!” odino walay manregalo ed sika?

¹⁴ Importante ya usaren moy pakatebek no antoy ibagam tan gawaen mo ed kada situasyon. Singa bilang, no walay mangibagad sika na “Merry Christmas!” sarag mo met ya ebatan diad pangibagam labat na “Salamat.” Balet no labay ton naamtaan so rason no akin ya agka manseselebra  na holiday, sarag mon ipaliwawa ed sikato. Balet, mansiansia kan makaaro, mataktika, tan marespeto. Ibabaga na Biblia: “Naynay komon a maabig iray salita yo, ya atimplaan na asin, pian amta yo no panon so nepeg yon iyebat ed kada too.” (Colosas 4:6) Nayarin ipaliwawam ya labalabay moy miulop ed arum tan mangiter na regalo, balet agmo labay ya ibana itan ed saratan ya holiday.

¹⁵ Antoy gawaen mo no walay manregalo ed sika? Anggapod Biblia so espisipikon listaan na saray nayari tan agnayarin gawaen, balet akasulat ditan ya kaukolan tayon pansiansiaen ya malinis so konsiensia tayo. (1 Timoteo 1:18, 19) Ompan samay manregalo ed sika et agto amta ya agka manseselebray holiday. Odino ompan ibaga tod sika ya, “Amtak ya agka manseselebray holiday, balet labay kon iter iya ed sika.” Anggan dinan ed saratan ya situasyon, sikay mandesisyon no awaten mo so regalo odino andi. Balet antokaman so desisyon mo, nepeg mon seguroen ya napansiansiam a malinis so konsiensiam. Agtayo labay so manggaway antokaman ya maneral na relasyon tayod si Jehova.

16. Antoy gawaen mo no labay na pamilyam so manselebray holiday?

¹⁶ Antoy gawaen mo no labay na pamilyam so manselebray holiday? Agmo kaukolan ya ipilit ed sikara so papanisiaan mo. Tandaan, walay kanepegan dan mandesisyon no antoy labay dan gawaen. Mansiansia kan kalmado tan respetom so desisyon da, no panon ya labay mon respetoen da ka met. (Basaen so Mateo 7:12.) Balet panon to no labay da kan nakaiba no holiday, antoy gawaen mo? Antis kan mandesisyon, manpikasi ka nid si Jehova ya tulongan to kan mandesisyon na duga. Isip mon maong so  situasyon, tan man-research ka nipaakar ed satan. Tandaan, labay mon napaliket ya lanang si Jehova.

17. Antoy gawaen mo pian agmakakaibeg iray ananak mo no nanengneng day arum ya manseselebra na holiday?

¹⁷ Antoy gawaen mo pian agmakakaibeg iray ananak mo no nanengneng day arum ya manseselebra na holiday? Sagpaminsan et sarag moy manggawa na panliketan da. Sarag mo ran surprisaen na regalo. Tan say sakey ed saray sankaabigan ya niregalom ed ananak mo et say panaon tan panangarom.

18. Akin et kaukolan tayoy onatendi ed saray Kristianon pantitipon?

¹⁸ Pian napaliket tayoy Jehova, kaukolan tayon taynanan so palson relihyon pati saray kustombre tan holiday ya walay koneksion tod satan, tan kaukolan tayo so mibiang ed dugan panagdayew. Panon? Say sakey ya paraan et diad iyatendi ed saray Kristianon pantitipon. (Basaen so Hebreo 10:24, 25.) Saray pantitipon et importantin kabiangan na dugan panagdayew. (Salmo 22:22; 122:1) Napaseseg tayoy sakey tan sakey no mantitipon tayo.​—Roma 1:12.

19. Akin et importante ya ibagam ed arum iray katuaan ya nanaaralan mod Biblia?

¹⁹ Say sakey nin kabiangan na dugan panagdayew et say pangibaga ed arum nipaakar ed saray nanaaralan mod Biblia. Dakel ya totoo so napapagaan ed saray mauges ya nagagawad mundo. Ompan wala ray kabat mo ya ontan so nalilikna ra. Ibagam ed sikara so balibalin ilalo ed arapen. Legan kan onaatendi ed saray Kristianon pantitipon tan ibabagam ed arum iray katuaan ya walad Biblia, naliknam ya agmo la labay ya pawilen so palson relihyon pati saray kustombre na satan. Makaseguro ka ya magmaliw kan maliket tan bendisyonan nen Jehova iray pansasagpot mo legan mon dadayewen diad paraan ya labay to.​—Malaquias 3:10.