1, 2. Ko ni mbvunzo uponi omwe muchadikana kudzibvunza, ndipo ndawa chani kuchita vimwevi nkwakudikana?

PANTHAWE yomwe mwakhala munkupfunzira Baibolo, mwaona kuti wanthu azinji womwe achati achapempherera Mulungu achapfunzisa nakuchita vinthu vomwe iye achavizonda. (2 Akorinto 6:17) Ndipomwapa Yahova ankutilamula kuti tichadekana kubula mu ‘Babulo nkulu’ yemwe ni vipembedzo vabodza. (Chivumbulutso 18:2, 4) Ko imwepo munkubvera lamulo mweyi? Aliyese achadekana kusalula yekha vochita pa nkhani mweyi. Tichadekana kudzibvunza kuti: ‘Ko nichadekana kutumikira Mulungu munjira yomwe iye achabvumiza panango nimbondomutumikira mulimose momwe inepano ninkufunira?’

² Peno mudasiya kuyenda ku chipembedzo chabodza panango mudanemba kalata yonena kuti mwachoka muchipembedzo chanu, dziwani kuti mudachita bwino maninge. Koma vingakwanisike kuti panamiyambo yanango yachipembedzo chabodza yomwe yachakukondweresani. Naboni tikambirane miyambo yanango mwaya kuti tiwone ndawa yake tichadekana kumbayawona ninga momwe Yahova achayawonera.

3. (a) Ndawa chani vingakhale voshupa kwa anango kusiya kuphatisira basa mafano pakutumikira Mulungu? (b) Koma Baibolo ichati chani pankhani mweyi?

³ Wanthu anango akhala ankusunga mafano panango vinthu vinango m’nyumba mwawo kwa magole yazinji nkumbaviphatisira basa pakutumikira Mulungu. Peno imwembo munavo, panango vingakhale voshupa kumbatumikira Mulungu mulibe vinthu vimwevi. Koma kumbukirani kuti Yahova achatipfunzisa njira yakudikana yakumutumikirira. Baibolo ichanena mwakubveka bwino kuti Yahova achadalini kuti  timbaphatisire basa mafano pakumutumikira. ​—Lewengani Ekisodo 20:4, 5; Salimo 115:4-8; Yesaya 42:8; 1 Yohane 5:21.

4. (a) Ndawa chani tichadekanalini kugwadira mizimu ya abereki? (b) Ndawa chani Yahova adalambiza wanthu wake kuti asambayankhule na wanthu womwe adamwalira?

⁴ Wanthu anango achaphatisira basa nthawe yawo na mphanvu zawo pochita vinthu vomwe achaganiza kuti vingakondwerese mizimu ya abereki womwe adamwalira. Wanthu mwawa achatumikira mizimu ya abereki wawo. Koma tapfunzira kuti wanthu womwe adafa angatithandizelini olo kutipweteka. Munthu akafa achakhalalini soti namoyo kunango. Ndipo kumbayankhula na wanthu womwe adafa ninkhani yopasa mantha ndawa ntontholo uliwose wowoneka ninge wochokera kwa wachibale womwe adafa ni wochokera kwa viwanda. Ndipomwapa Yahova adalamula Aizilayeri kuti aleke kumbayankhula na wanthu womwe adamwalira panango kuchita vinthu vobverana na mizimu.​—Deuteronomo 18:10-12; wonani mawu yakumapeto 26 na 31.

5. Ko nchani chingakuthandizeni kuti musiye kuphatisa basa mafano pakutumikira Mulungu nakuti musiye kugwadira mizimu ya makolo?

⁵ Nchani chingakuthandizeni kuti musiye kuphatisira basa mafano potumikira Mulungu panango kuti kusiya kugwadira mizimu ya makolo? Imwepo muchadikana kumbalewenga Baibolo na kuganizira mopfatsa momwe Yahova achaviwonera vinthu mwevi. Iye achawona kuti vinthu vimwevi ni ‘vonyantsa.’ (Deuteronomo 27:15) Mumbapemphere kwa Yahova ntsiku iliyose kuti akuthandizeni kumbawona vinthu momwe iye achaviwonera na kumbamutumikira munjira yomwe iye achada. (Yesaya 55:9) Imwepo muchadikanalini kukayikira kuti Yahova adzakupaseni mphanvu kuti mukwanise kusiyiratu chilichose chosabverana na kupemphera chaiko.

6. Ko ndawa chani atsogoleri wa vipembedzo adasalula kuti ambakondwerere kubadwa kwa Yesu pa 25 Dezembro?

⁶ Khisimisi ni ibodzi ya maphwando yakudziwika maninge  padziko yapasi, ndipo wanthu azinji achati pantsiku mweyi achakondwerera kubadwa kwa Yesu. Koma Khisimisi idachokera ku chipembedzo chabodza. Bukhu inango idalewa kuti wanthu waku Roma angakondwerera kubadwa kwa dzuwa. Atsogoleri wa matchetchi ambafuna kuti wanthu azinji wachikunja ayambe chikhrisitu, podiya kuti Yesu alibe kubadwa pa 25 Dezembro, iwo adasalula kuti ambakondwerere kubadwa kwa Yesu pantsiku mweyi. (Luka 2:8-12) Wopfunzira wa Yesu ambachitalini Khisimisi. Bukhu inango idanena kuti kwa magole 200 Yesu wabadwakale, ‘palibe yemwe angadziwa ntsiku chaiyo-iyo yomwe iye adabadwa,’ ndipo vakuti Yesu adabadwa nthawe yanyi enzebe navo basa. (Origens Sagradas de Coisas Profundas, ya Inglês) Mwambo wa Khisimisi udayamba piyadapita magole yazinji Yesu wabwerera kale kudzulu.

7. Ko ndawa chani Akhrisitu chaiwo achachitanawolini Khisimisi?

⁷ Wanthu azinji achadziwa kuti Khisimisi na miyambo yomwe yachachitika ntsiku mweyi, vidachokera kuchipembedzo chabodza. Miyambo yatinkunena ni kupasana mphaso na kuchita phwando. Mwakulinganiza, kale-kale ku Inglaterra na madziko yanango ya ku América, malamulo yambalambiza kuti wanthu achite Khisimisi ndawa ni mwambo wochokera ku chipembedzo chabodza. Aliyese akachita Khisimisi ambatambira chilango. Koma nkupita kwa nthawe, wanthu m’madziko mwaya adayamba kumbachitambo Khisimisi. Koma Akhrisitu chaiwo achachita nawolini Khisimisi ndawa achada kumbachita vinthu vomwe Mulungu achakondwera navo.

8, 9. Ko ndawa chani Akhrisitu woyambirira ambakondwereralini ntsiku yomwe adabadwa?

⁸ Wanthu azinji achakonda kukondwerera ntsiku yadabadwa. Ko Akhrisitu achadikana kumbakondwerera ntsiku yomwe adabadwa? Vikondwerero vokumbukira ntsiku yakubadwa vomwe vichanenewa mu Baibolo, ni va wanthu womwe angatumikiralini Yahova. (Genesis 40:20; Maliko 6:21) Wanthu angakondwerera ntsiku yomwe adabadwa kuti alemekeze milungu yabodza. Ndipomwapa Akhrisitu woyambirira  ‘ambawona kuti kukondwerera ntsiku yomwe munthu adabadwa ni mwambo wachikunja.’​—Enciclopédia Delta Universal.

⁹ Aroma na Agiriki angakhulupirira kuti panthawe yomwe munthu ankubadwa, pangabwera mzimu munango ndipo mzimu muyo ungamunyang’anira munthu pamoyo wake wose. Bukhu inango idanena kuti: ‘Mzimu muyo ungakhala pachibale na mulungu yemwe adabadwambo pantsiku mwiyo,’ idalewa teno bukhu yakuti: O Lore dos aniversários.

10. Ndawa chani Akhrisitu ntsiku zino achakondwereralini ntsiku yomwe munthu adabadwa?

¹⁰ Ko imwepo munkuwona kuti Yahova achakondwa na vikondwerero vobverana na kupemphera kwabodza? (Yesaya 65:11, 12) Neye, achakondweralini navo. Ndipomwapa, isembo tichakondwereralini ntsiku yomwe tidabadwa panango kuchita nawo maphwando yaliyose yomwe niyochokera ku chipembedzo chabodza.

11. Ko ndawa chani anango achachitanawo mapwando? Ndipo ko chinthu chakufunika kwa imwepo chichadikana kukhala chani?

¹¹ Wanthu azinji achakondwerera basi Khisimisi na wanthu anango podiya kuti achadziwa kuti vidachokera ku chipembedzo chabodza. Iwo achawona kuti maphwando yachawapasa mwayi wombacheza na mabanja yawo. Ko imwepo muchawonambo chibodzi-bodzi? Nkuphonyalini kukhala na nthawe yocheza na banja yanu. Yahova ndiye adayambisa banja ndipo iye achada kuti timbakhale wakukondwa na azibale wathu. (Aefeso 3:14, 15) Tichadikana kudziwa kuti chakudikana maninge ni kukhala pawushamwali wabwino maninge na Yahova kusiyana na kumbakondwa na azibale wanthu pakuchita vikondwerero vomwe nivochokera kuvipembedzo vabodza. Ndipomwapa ntumi Paulo adanena kuti: ‘Nthawe zose mubatsimikizire kuti chobvumizika kwa Ambuya n’chiponi.’​—Aefeso 5:10.

12. Ko nchani chingachitise kuti phwando ikhale yosakondweresa Mulungu?

¹² Wanthu azinji achawona kuti viribe basa kuti mwambo munango  udayamba tani, koma Yahova achawonalini teno. Iye achakondweralini na maphwando yomwe yadachokera kuchipembedzo chabodza chomwe chakulinga chake nkumbatamanda wanthu panango vizindikiro va m’madziko. Mwakulinganiza, Aiguputo angachita vikondwerero vosiyana-siyana pakumbatumikira milungu yawo yabodza. Aizirayeli padachoka ku Iguputo, adatengera mwambo munango wachikunja wa Aiguputo mwawo ndipo adawupasa dzina yakuti ‘chikondwerero cha Yahova.’ Koma Yahova adawalanga ndawa yochita vimwevi. (Ekisodo 32:2-10) Mwakubverana na malangizo yomwe Yesaya adanena, tichadekanalini kuguntsa ‘chinthu chilichose chopsipiziwa.’​—Lewengani Yesaya 52:11.

13. Ko wanthu womwe adasiya kuchita nawo maphwando yanango, achakhala na mibvunzo yaponi?

¹³ Peno imwepo mwasiya kuchita nawo maphwando mwaya, panango mukali na mibvunzo m’maganizo yanu. Mwakulinganiza, mungambadzibvunze kuti: Ko ningachitetani peno anzangu wakubasa ankunibvunza ndawa wake nichakondwereralini nawo Khisimisi? Ko ningachitetani mwamuna panango nkazi wangu akafuna kuti nichite nawo phwando? Ko nichadekana kuchita chani kuti wana wangu aleke kumbawona kuti ankumaniwa vinthu vinango ndawa yakuti achachitalini nawo maphwando panango ntsiku yomwe iwo adabadwa?

14, 15. Ko mungachite tani peno munthu munango ankunena kuti phwando yabwino, panango achada kukupasani mphaso?

¹⁴ Tikabvunziwa panango munthu watikumbira kuti tichite nawo vinthu vinango tingawone mwatingadawirire mobverana na momwe vinthu viriri pamwapo. Mwakulinganiza, munthu akakuwuzani kuti phwando yabwino, nibwinolini kundomusiya. Mungamuwuze kuti ‘mwaphata basa.’ Koma peno munthu munango achada kudziwa vizinji mungamufotokozere ndawa yake muchakondwereralini phwando mwiyo. Koma, nthawe zose muchadikana kumbafotokoza mokoma moyo, mwaluso na mwawulemu. Baibolo ichati: ‘Nthawe zose  mawu yanu yambakhale yokoma ninge mwayaikha munyu, kuti mudziwe mwamungadawirire munthu aliyese.’ (Akolose 4:6) Panango mungawafotokozereko kuti muchakondwa maninge kucheza na wanthu na kupasa vinthu, koma kundoti mungachite vimwevi panthawe inango osati nthawe ya phwando mweyo.

¹⁵ Manje mungatani peno munthu wakupasani chinthu? Baibolo iribe ndandanda ya malamulo yomwe munthu angambatewedze pankhani iriyose, koma ichatiwuza vinthu vomwe vingatithandize kukhala na chikumbumtima chabwino. (1 Timoteyo 1:18, 19) Panango munthu yemwe akukupasani mphaso ankudziwalini kuti imwepo muchakondwereralini maphwando yatene. Panango iye anganene kuti: ‘Ninkudziwa kuti imwepo muchakondwereralini maphwando mwaya, koma nindofuna kukupasani mphaso mweyi.’ Pavochitika vose viwiri mwevi, mungasalule kutambira mphaso mweyo panango neye. Koma muchadikana kuwonesesa kuti mwasalula vinthu vomwe vingakuchitisenilini kumbandodziyimba mulandu. Tichadekanalini kuchita chilichose chomwe chingadzonge ushamwali wathu na Yahova.

16. Ko mungachitetani peno azibale wanu achada kuchita phwando?

¹⁶ Ko mungachite tani peno azibale wanu achada kuchita phwando? Lekani kulimbana nawo. Kumbukirani kuti iwo anaufulu wochita vomwe achada. Muchadekana kuwaganizira na kuwapasa ulemu pa vomwe asalula, ninga momwe imwepo mungafunire kuti ambalemekeze vomwe muchasalula. (Lewengani Mateyu 7:12.) Koma ko vingakhale tani peno azibale wanu achada kuti imwepo mukhale nawo paphwando? Mukalibe kusalula vochita muchadikana kupemphera kwa Yahova kuti akuthandizeni kusalula vinthu mwanzeru. Muchadikana kukumbukira na kufufudza vinthu vomwe vikachitike paphwando mweyo. Mumbakumbukire kuti nthawe zose muchadekana kumbasalula vinthu vomwe vichakondweresa Yahova.

17. Ko imwepo mungachitetani kuti wana wanu asambakhumbire wanthu akambachita maphwando yosiyana-siyana?

 ¹⁷ Ko imwepo mungachitetani kuti wana wanu asambakhumbire wanthu akambachita maphwando? Imwepo muchadikana kumbachita maphwando nthawe na nthawe. Mumbawagulire vinthu vakudikana panthawe iliyose. Mphaso yabwino maninge yomwe mungawapase ndiyo kupatula nthawe nkumbacheza nawo na kuwawonesa chikondi ndipo ichaposha mphaso iliyose.

18. Ko ndawa chani tichadekana kumbagumanika pamisonkhano yachikhrisitu?

¹⁸ Kuti tikondwerese Yahova, tichadekana kubula mu chipembedzo chabodza na kusiya miyambo yose ya vipembedzo. Tichadekana soti kumbachita vinthu vomwe wanthu omwe ali muchipembedzo chaicho achadikana kuchita. Ko vinthu vake ni viponi? Chibodzi cha vinthu mwevi ni kugumanika pamisonkhano yachikhrisitu nthawe zose. (Lewengani Aheberi 10:24, 25.) Misonkhano ni yakudikana maninge kwa wanthu womwe ali muchipembedzo chaicho. (Salimo 22:22; 122:1) Tikambasonkhana tichalimbikisana.​—Aroma 1:12.

19. Ko ndawa chani muchadikana kuwuza wanthu anango vinthu vomwe munkupfunzira m’Baibolo?

¹⁹ Chinthu chinango chakudikana ndicho kuwuza anango vomwe tinkupfunzira mu Baibolo. Wanthu azinji achakhala wosakondwa ndawa ya vinthu voyipa vomwe vinkuchitika mu dziko. Panango imwepo munkudziwa wanthu anango womwe ankubonera na mabvuto mwaya. Muchadikana kuwawuza vinthu vakukondwesa vomwe tinkuvidikhirira kutsogolo. Mukambayesesa kugumanika pamisonkhano na kumbawuza anzanu ntontholo wa m’Baibolo, mudzakhale mulibe shungu yochita miyambo ya muchipembedzo chabodza. Dziwani kuti mukambachita vimwevi, mudzakhale wakukodwa maninge ndipo Yahova adzakudaliseni ndawa yakuti mwasalula kumutumikira munjira chaiyo.​—Malaki 3:10.