1،‏ 2.‏ توانوں اپنے آپ کولوں کیہڑا سوال پچھنا چاہی دا اے تے ایہہ سوال پچھنا ضروری کیوں اے؟‏

پاک کلام توں پتہ چلدا اے کہ بوہت سارے لوک خدا دی عبادت کرن دا دعویٰ تے کردے نیں پر اصل چ اوہناں دی تلیم تے کماں توں خدا نُوں نفرت اے۔‏ (‏2-‏کُرنتھیوں 6:‏17‏)‏ ایس لئی خدا نے حکم دِتا اے کہ اَسی بابلِ‌عظیم یعنی جھوٹھے مذہب چوں نکل آئیے۔‏ (‏مکاشفہ 18:‏2،‏ 4‏)‏ ایس بارے تواڈا فیصلہ کیہہ اے؟‏ اپنے آپ توں پچھو کہ کیہہ مَیں خدا دی عبادت اوہدی مرضی مطابق کرنا چاہنا واں یاں فیر اونویں ای کرنا چاہنا واں جیویں مَیں اَج تک کردا آیا واں؟‏

² جے تُسی پہلاں توں ای جھوٹھے مذہب چوں نکل آئے او تے ایہہ بڑی چنگی گل اے۔‏ پر شاید توانوں ایہدیاں کجھ رسماں حالے وی چنگیاں لگدیاں ہون۔‏ آؤ فیر کجھ رسماں تے تہواراں تے غور کریئے تے ویکھئے کہ ایہناں بارے یہوواہ خدا دی سوچ کیہہ اے۔‏

3.‏ ‏(‏الف)‏ کجھ لوکاں نُوں تصویراں یاں بُتاں دے بغیر خدا دی عبادت کرنا صحی کیوں نئیں لگدا؟‏ (‏ب)‏ پاک کلام چ تصویراں یاں بُتاں دے ذریعے عبادت کرن بارے کیہہ دَسیا گیا اے؟‏

³ کجھ لوک کئی سالاں توں تصویراں یاں بُتاں دے ذریعے خدا دی عبادت کر رہے نیں۔‏ جے تُسی وی اِنج کر رہے او تے فیر ایہناں دے بغیر خدا دی عبادت کرنا شاید توانوں صحی نہ لگے۔‏ پر یاد رکھو کہ یہوواہ خدا نے سانوں سکھایا اے کہ سانوں اوہدی عبادت کیویں کرنی چاہی دی اے۔‏ اوہدے کلام چ دَسیا گیا اے کہ اوہنوں ایہہ گل بالکل پسند نئیں کہ اوہدی عبادت لئی تصویراں یاں بُتاں نُوں استمال کیتا جائے۔‏—‏خروج 20:‏4،‏ 5 نُوں پڑھو؛‏ زبور 115:‏4-‏8؛‏ یسعیاہ 42:‏8؛‏ 1-‏یوحنا 5:‏21‏۔‏

4.‏ ‏(‏الف)‏ سانوں مُردیاں لئی دُعاواں کیوں نئیں کرنیاں چاہی دِیاں؟‏ (‏ب)‏ یہوواہ خدا نے بنی‌اِسرائیل نُوں مُردیاں نال رابطہ کرن توں منع کیوں کیتا؟‏

 ⁴ کجھ لوک اپنے مرے ہوئے عزیزاں دِیاں روحواں نُوں خوش کرن لئی بوہت ساریاں رسماں تے دُعاواں کردے نیں۔‏ ایس کم چ اوہ بوہت سارا وقت تے پیسہ خرچ کردے نیں۔‏ کجھ لوک تے اپنے مرے ہوئے عزیزاں کولوں اپنے مسئلے حل کرن لئی مدد وی منگدے نیں۔‏ پر اَسی سکھ لیا اے کہ مُردے کسے ہور جہان چ زندہ نئیں۔‏ اوہ نہ تے ساڈی کوئی مدد کر سکدے نیں تے نہ ای سانوں کوئی نقصان پونچا سکدے نیں۔‏ اوہناں نال رابطہ کرنا بوہت خطرناک ہو سکدا اے کیونکہ اوہناں وَلّوں مِلن والا پیغام اصل چ بُرے فرشتیاں وَلّوں ہوندا اے۔‏ ایسے لئی یہوواہ خدا نے بنی‌اِسرائیل نُوں مُردیاں نال رابطہ کرن یاں ایہو جیہا کوئی وی کم کرن توں منع کیتا سی جدا تعلق بُرے فرشتیاں نال ہووے۔‏—‏اِستثنا 18:‏10-‏12‏؛‏ کتاب دے آخر چ نکتہ نمبر 26 تے 31 نُوں ویکھو۔‏

5.‏ تُسی کیہہ کر سکدے او تاکہ تُسی خدا دی عبادت لئی بُتاں نُوں استمال کرنا تے مُردیاں لئی رسماں تے دُعاواں کرنا چھڈ سکو؟‏

⁵ جے تُسی خدا دی عبادت لئی بُت استمال کردے او یاں فیر مُردیاں نُوں خوش کرن لئی طرحاں طرحاں دِیاں رسماں تے دُعاواں کردے او تے تُسی ایہناں کماں نُوں چھڈن لئی کیہہ کر سکدے او؟‏ پاک کلام نُوں پڑھو تے ایس گل تے غور کرو کہ ایہناں کماں بارے خدا دی سوچ کیہہ اے۔‏ اوہنوں ایہناں کماں توں سخت نفرت اے۔‏ (‏اِستثنا 27:‏15‏)‏ ہر روز یہوواہ خدا کولوں دُعا کرو تاکہ تُسی وی ایہناں کماں توں نفرت کر سکو تے اوہدی مرضی دے مطابق اوہدی عبادت کر سکو۔‏ (‏یسعیاہ 55:‏9‏)‏ یقین منو کہ یہوواہ خدا توانوں ہر اوس کم نُوں چھڈن دی طاقت دَوے گا جدا تعلق جھوٹھے مذہب نال اے۔‏

6.‏ لوک یسوع مسیح دی سالگرہ 25 دسمبر نُوں کیوں مناؤن لگ پئے؟‏

⁶ دُنیا دے بوہت سارے مُلکاں چ کرسمس بڑی دھوم‌دھام نال منایا جاندا اے۔‏ لوکاں دا خیال اے کہ کرسمس یسوع مسیح دی سالگرہ دا تہوار اے۔‏ پر اصل چ ایہدا تعلق جھوٹھے مذہب نال  اے۔‏ اِک کتاب دے مطابق کجھ رومی لوک سورج دی پوجا کردے سن۔‏ اوہ 25 دسمبر نُوں اپنے سورج دیوتا دی پیدائش دی سالگرہ مناؤندے سن۔‏ چرچ دے رہنما چاہندے سن کہ ایہہ لوک وی مسیحی بنن۔‏ ایس لئی اوہناں نے 25 دسمبر نُوں یسوع مسیح دی پیدائش دی سالگرہ مناؤنی شروع کر دِتی بھانویں کہ یسوع مسیح ایس تریخ تے پیدا نئیں ہوئے سن۔‏ (‏لُوقا 2:‏8-‏12‏)‏ یسوع مسیح دے شاگرد یسوع دی سالگرہ نئیں مناؤندے سن۔‏ اِک ہور کتاب چ دَسیا گیا اے کہ یسوع مسیح دے پیدا ہون توں 200 سال بعد تک کسے نُوں وی اوہناں دی تریخ پیدائش دا پتہ نئیں سی تے ایہدے بارے جانن دا شوق وی بوہت گھٹ لوکاں نُوں سی۔‏ کرسمس دا تہوار یسوع مسیح دے اسمان تے جان توں تقریباً 300 سال بعد شروع ہویا۔‏

7.‏ سچے مسیحی کرسمس کیوں نئیں مناؤندے؟‏

⁷ بوہت سارے لوکاں نُوں پتہ اے کہ کرسمس تے ایہدیاں رسماں جیویں کہ تحفے دین تے پارٹیاں کرن دی شروعات جھوٹھے مذہب توں ہوئی سی۔‏ ایسے لئی اِک زمانے چ اِنگلینڈ تے امریکہ دے کجھ علاقیاں چ کرسمس مناؤن تے پابندی لا دِتی گئی سی۔‏ اوہدوں جیہڑ‌ا وی کرسمس مناؤندا سی اوہنوں سزا دِتی جاندی سی۔‏ پر ہولی ہولی لوکاں نے فیر کرسمس مناؤنا شروع کر دِتا۔‏ پر سچے مسیحی کرسمس کیوں نئیں مناؤندے؟‏ کیونکہ اوہ یہوواہ خدا نُوں خوش کرنا چاہندے نیں۔‏

8،‏ 9.‏ پہلی صدی دے مسیحی سالگرہ کیوں نئیں مناؤندے سن؟‏

⁸ اَج کل پوری دُنیا چ بوہت سارے لوک سالگرہ نُوں بڑی دھوم‌دھام نال مناؤندے نیں۔‏ کیہہ سچے مسیحیاں نُوں سالگرہ مناؤنی چاہی دی اے؟‏ پاک کلام چ سالگرہ دِیاں جیہڑ‌یاں دعوتاں دا ذکر کیتا گیا اے اوہ اوہناں لوکاں نے کیتیاں جیہڑ‌ے یہوواہ خدا دی عبادت نئیں کردے سن۔‏ (‏پیدایش 40:‏20؛‏ مرقس 6:‏21‏)‏ اصل چ پرانے زمانے چ لوک جھوٹھے دیوتاواں نُوں خوش کرن لئی سالگرہ مناؤندے سن۔‏ ایسے لئی اِک مشہور کتاب دے مطابق پہلی صدی دے مسیحی ایہہ من دے سن کہ سالگرہ مناؤنا بُت‌پرست لوکاں دا رواج اے۔‏

 ⁹ پرانے زمانے چ روم تے یونان دے لوک من دے سن کہ ہر بندے دی پیدائش کسے دیوتا دی پیدائش والے دن ہوندی اے۔‏ اوہ کہندے سن کہ ہر بندے دی پیدائش تے اِک روح موجود ہوندی اے جیہڑ‌ی ساری زندگی اوہدی حفاظت کردی اے۔‏ اِک کتاب چ دَسیا گیا اے کہ ایہہ روح اوس دیوتا وَلّوں ہوندی سی جدی پیدائش والے دن اوہ بندہ پیدا ہوندا سی۔‏ ایس لئی اوس بندے نُوں سالگرہ مناؤنی پیندی سی تاکہ اوہ دیوتا خوش ہووے تے اوہ روح اوہدی حفاظت کردی رہوے۔‏

10.‏ اَج کل مسیحیاں نُوں سالگرہ کیوں نئیں مناؤنی چاہی دی؟‏

¹⁰ کیہہ یہوواہ خدا ایہو جہے تہواراں تے ایہو جہیاں رسماں نُوں پسند کردا اے جنہاں دا تعلق جھوٹھے مذہب نال اے؟‏ (‏یسعیاہ 65:‏11،‏ 12‏)‏ بالکل نئیں۔‏ ایسے لئی اَسی سالگرہ یاں کوئی وی ایہو جیہا تہوار نئیں مناؤندے جدا تعلق جھوٹھے مذہب نال اے۔‏

11.‏ ‏(‏الف)‏ کجھ لوک تہوار کیوں مناؤندے نیں؟‏ (‏ب)‏ ساڈی نظر چ سب توں ضروری گل کیہڑی ہونی چاہی دی اے؟‏

¹¹ بوہت سارے لوکاں نُوں پتہ اے کہ کرسمس تے دُوجے تہواراں دا تعلق جھوٹھے مذہب نال اے پر فیر وی اوہ ایہہ تہوار مناؤندے نیں۔‏ اوہناں لئی تہوار اپنے خاندان نال وقت گزارن دا موقع ہوندے نیں۔‏ کیہہ تواڈا وی ایہو ای خیال اے؟‏ خاندان نُوں وجود چ لیاؤن والا خدا اے تے اوہ چاہندا اے کہ گھر دے جیاں دا اِک دُوجے نال چنگا رشتہ ہووے۔‏ (‏اِفسیوں 3:‏14،‏ 15‏)‏ پر ساڈی نظر چ سب توں ضروری گل ایہہ ہونی چاہی دی اے کہ اَسی یہوواہ خدا نُوں خوش کریئے نہ کہ جھوٹھے مذہب نال تعلق رکھن والے تہوار منا کے اپنے رشتےداراں نُوں خوش کریئے۔‏ پولس رسول نے کہیا سی کہ ایہہ معلوم کردے رہوو کہ مالک نُوں کیہڑے کم پسند نیں۔‏—‏اِفسیوں 5:‏10‏۔‏

12.‏ یہوواہ خدا نُوں کیس طرحاں دے تہوار پسند نئیں؟‏

¹² بوہت سارے لوک سوچدے نیں کہ ایس گل توں کوئی فرق نئیں پیندا کہ کسے تہوار دی شروعات کتھوں ہوئی سی۔‏ پر ایس معاملے بارے خدا دی سوچ بالکل فرق اے۔‏ خدا نُوں اوہ تہوار  بالکل پسند نئیں جنہاں دا تعلق جھوٹھے مذہب نال اے یاں جیہڑ‌ے کسے انسان یاں ملک دی وڈیائی کرن لئی منائے جاندے نیں۔‏ مثال دے طور تے مصر دے لوک اپنے دیوی دیوتاواں نُوں خوش کرن لئی بوہت سارے تہوار مناؤندے سن۔‏ جدوں بنی‌اِسرائیل مصر دی غلامی چوں نکلے تے اوہناں نے مصریاں دے اِک تہوار دی نقل کردے ہوئیاں اِک تہوار منایا تے اوہنوں یہوواہ لئی عید دا ناں دِتا۔‏ پر یہوواہ نے اوہناں نُوں ایہدی سزا دِتی۔‏ (‏خروج 32:‏2-‏10‏)‏ سانوں یسعیاہ نبی دی ہدیت تے عمل کرنا چاہی دا اے تے کسے ناپاک چیز نُوں ہتھ نئیں لاؤنا چاہی دا۔‏‏—‏یسعیاہ 52:‏11 نُوں پڑھو۔‏

13.‏ جدوں تُسی ایہہ فیصلہ کردے او کہ تُسی کوئی تہوار نئیں مناؤ گے تے تواڈے ذہن چ کیہڑے سوال آ سکدے نیں؟‏

¹³ جدوں تُسی ایہہ فیصلہ کردے او کہ تُسی کوئی تہوار نئیں مناؤ گے تے شاید تواڈے ذہن چ کجھ سوال آؤن جیویں کہ جے میرے نال کم کرن والے لوک مینوں پچھن کہ مَیں کرسمس کیوں نئیں مناؤندا تے مَیں کیہہ کہواں گا؟‏ جے کوئی مینوں کرسمس دا تحفہ دَوے گا تے مَیں کیہہ کراں گا؟‏ جے میرا جیون ساتھی مینوں کوئی تہوار مناؤن لئی کہوے تے مَیں کیہہ کراں گا؟‏ مَیں کیہہ کر سکنا واں تاکہ میرے بچے ایس گلوں دُکھی نہ ہون کہ مَیں اوہناں نال تہوار یاں اوہناں دی سالگرہ نئیں مناؤندا؟‏

14،‏ 15.‏ جے کوئی توانوں کسے تہوار تے مبارک‌باد یاں کوئی تحفہ دَوے تے تُسی کیہہ کرو گے؟‏

¹⁴ توانوں ایہہ فیصلہ بڑی سمجھ‌داری نال کرنا پوے گا کہ تُسی کیہہ کہوو گے یاں کیہہ کرو گے۔‏ مثال دے طور تے جے لوک کسے تہوار تے توانوں مبارک‌باد دین تے اوہناں توں کنی نہ کتراؤ۔‏ تُسی بس اوہناں نُوں شکریہ کہہ سکدے او۔‏ پر جے کوئی تواڈے کولوں پچھدا اے کہ تُسی فلاں تہوار کیوں نئیں مناؤندے تے تُسی اوہنوں ایہدی وجہ دَس سکدے او۔‏ پر ہمیشاں نرمی،‏ پیار تے سمجھ‌داری نال جواب دَوو۔‏ پاک کلام چ لکھیا اے کہ تواڈیاں گلاں ہمیشاں دل نُوں چنگیاں لگن والیاں تے نمک وانگوں مزےدار ہون تاکہ توانوں پتہ ہووے کہ لوکاں نُوں کیویں جواب دینا اے۔‏ (‏کُلسّیوں  4:‏6‏)‏ تُسی ایہہ وی دَس سکدے او کہ توانوں دُوجیاں نال وقت گزارنا تے تحفے دینا چنگا لگدا اے پر تُسی ایہہ سب کجھ کسے تہوار تے نئیں کردے۔‏

¹⁵ پر جے کوئی کسے تہوار تے توانوں کوئی تحفہ دَوے تے تُسی کیہہ کرو گے؟‏ پاک کلام چ ایہدے بارے کوئی قانون یاں حکم نئیں دِتا گیا پر ایہہ ضرور دَسیا گیا اے کہ اَسی جو کجھ وی کریئے ساڈا ضمیر صاف رہنا چاہی دا اے۔‏ (‏1-‏تیمُتھیُس 1:‏18،‏ 19‏)‏ شاید جنہے توانوں تحفہ دِتا اے اوہنوں نئیں پتہ کہ تُسی اوہ تہوار نئیں مناؤندے۔‏ یاں شاید اوہ کہوے کہ مینوں پتہ اے کہ تُسی ایہہ تہوار نئیں مناؤندے پر فیر وی مَیں توانوں ایہہ تحفہ دینا چاہنا واں۔‏ دونواں صورتاں چ فیصلہ تواڈا ہوئے گا کہ تُسی اوہ تحفہ لینا اے یاں نئیں۔‏ فیصلہ جو وی ہووے بس ایس گل دا خیال رکھو کہ تواڈا ضمیر صاف رہوے۔‏ اَسی کوئی وی ایہو جیہا کم نئیں کرنا چاہواں گے جدی وجہ توں خدا نال ساڈی دوستی خراب ہووے۔‏

16.‏ جے تواڈے گھر دے جی کوئی تہوار مناؤنا چاہندے نیں تے تُسی کیہہ کرو گے؟‏

¹⁶ جے تواڈے گھر دے جی کوئی تہوار مناؤنا چاہندے نیں تے تُسی کیہہ کرو گے؟‏ توانوں اوہناں نال لڑن دی لوڑ نئیں۔‏ ایہہ اوہناں دا حق اے کہ اوہ جو چاہن کر سکدے نیں۔‏ تُسی اوہناں نال پیار نال پیش آؤ۔‏ جیویں تُسی چاہندے او کہ اوہ تواڈے فیصلے دا احترام کرن اونویں ای تُسی وی اوہناں دے فیصلے دا احترام کرو۔‏ ‏(‏متی 7:‏12 نُوں پڑھو۔‏)‏ پر جے اوہ چاہندے نیں کہ تُسی بس اوہناں نال تہوار والے دن وقت گزارو تے تُسی کیہہ کر سکدے او؟‏ یہوواہ کولوں دُعا کرو تاکہ اوہ ایس بارے صحی فیصلہ کرن چ تواڈی مدد کرے۔‏ ایس گل تے سوچ‌وچار کرو کہ ایس تہوار بارے خدا دی سوچ کیہہ اے۔‏ نالے بائبل توں تیار کیتیاں گئیاں کتاباں تے دُوجیاں کتاباں چوں ایس تہوار دی شروعات بارے پڑھو۔‏ تواڈے لئی سب توں ضروری گل ایہہ ہونی چاہی دی اے کہ تُسی یہوواہ خدا نُوں خوش کرو۔‏

17.‏ جے تواڈے بچے دُوجیاں نُوں تہوار مناؤندیاں ویکھ کے دُکھی ہو جان تے تُسی اوہناں لئی کیہہ کر سکدے او؟‏

¹⁷ جدوں تواڈے بچے دُوجیاں نُوں تہوار مناؤندیاں ویکھدے نیں تے شاید اوہ سوچن کہ اوہ  تہوار کیوں نئیں مناؤندے۔‏ تُسی کیہہ کر سکدے او تاکہ اوہ ایس وجہ توں دُکھی نہ ہون؟‏ تُسی اوہناں لئی کوئی خاص پروگرام بنا سکدے او۔‏ شاید تُسی اوہناں نُوں سیر تے کھڑ سکدے او،‏ اوہناں دی پسند دا کوئی کھانا بنا سکدے او یاں اوہناں نُوں کوئی تحفہ دے سکدے او۔‏ سب توں ودھیا تحفہ جیہڑ‌ا تُسی اپنے بچیاں نُوں دے سکدے او،‏ اوہ تواڈا وقت تے پیار اے۔‏

18.‏ سانوں یہوواہ خدا دے بندیاں نال مِل کے عبادت کیوں کرنی چاہی دی اے؟‏

¹⁸ یہوواہ خدا نُوں خوش کرن لئی ضروری اے کہ اَسی جھوٹھے مذہب تے ایہدے نال جُڑیاں ہوئیاں رسماں تے تہواراں نُوں چھڈ دئیے۔‏ پر صرف ایہناں ای کافی نئیں۔‏ سانوں خدا دی مرضی دے مطابق اوہدی عبادت وی کرنی چاہی دی اے۔‏ اَسی ایہہ کیویں کر سکنے آں؟‏ ایہدا اِک طریقہ تے ایہہ وے کہ اَسی یہوواہ خدا دے بندیاں نال مِل کے عبادت کریئے۔‏ ‏(‏عبرانیوں 10:‏24،‏ 25 نُوں پڑھو۔‏)‏ ایہہ عبادتاں سچے خدا یہوواہ دی وڈیائی کرن دا خاص ذریعہ نیں۔‏ (‏زبور 22:‏22؛‏ 122:‏1‏)‏ نالے ایہناں عبادتاں تے اَسی اِک دُوجے دا حوصلہ وی ودھا سکنے آں۔‏—‏رومیوں 1:‏12‏۔‏

19.‏ ایہہ کیوں ضروری اے کہ تُسی لوکاں نُوں اوہناں سچائیاں بارے دَسو جیہڑ‌یاں تُسی پاک کلام چوں سکھیاں نیں؟‏

¹⁹ یہوواہ خدا دی مرضی دے مطابق عبادت کرن چ ایہہ وی شامل اے کہ اَسی دُوجیاں نُوں اوہ گلاں دَسیئے جیہڑ‌یاں اَسی پاک کلام چوں سکھیاں نیں۔‏ اَج لوک بھیڑے حالاتاں دی وجہ توں بوہت پریشان نیں۔‏ شاید تُسی ایہو جہے کجھ لوکاں نُوں جان دے ہووو۔‏ ایہناں لوکاں نُوں دَسو کہ پاک کلام دی تلیم حاصل کرن نال توانوں اِک شان‌دار مستقبل دی امید ملی اے۔‏ جدوں تُسی یہوواہ خدا دے بندیاں نال مِل کے عبادت کرو گے تے دُوجیاں نُوں بائبل چ پائیاں جان والیاں سچائیاں دَسو گے تے توانوں جھوٹھے مذہب چوں نِکلن دا حوصلہ ملے گا۔‏ نالے تواڈے دل چوں جھوٹھے مذہب نال جُڑے تہوار مناؤن دی خواہش وی ختم ہو جائے گی۔‏ جدوں تُسی صحی طریقے نال یہوواہ خدا دی عبادت کرن دا فیصلہ کرو گے تے اوہ توانوں برکت دَوے گا۔‏ اِنج تُسی خوشیاں بھری زندگی گزارو گے۔‏—‏ملاکی 3:‏10‏۔‏