1, 2. Soangen peidek dah kan me ele ke anahne pein idek rehmw, oh dahme kahrehda met kesempwal?

SANG ni omw onop Paipel, ke sukuhlkier me aramas tohto kin kose me irail kin kaudokiong Koht ahpw ni mehlel re kin padahngki de kin wia soahng kan me Koht ketin kalahdeki. (2 Korint 6:17) Ihme kahrehda Siohwa ketin kehkehlingkihong kitail en pedoisang kaudok likamw, ‘Papilon . . . lapalap.’ (Kaudiahl 18:2, 4) Dahme ke pahn wia? Emenemen kitail anahne wiahda pilipil, oh kitail anahne pein idek rehtail, ‘Ia duwe I men kaudokiong Koht ni ahl me e ketin kupwurki ong ie, de I men kaudokiong ih ni ahl me I kin kalapw wia?’

² Ma ke kohkohlahsangehr de kihsangehr edomw nan kaudok likamw, met mwahu. Ahpw nan loalomw ele mie soangen wiewia kan de tiahk en kaudok likamw kan me ke kin perenkihte wia. Kitail pahn koasoiapene ekei soangen wiewia kan oh tiahk kan oh kilang dahme kahrehda e inenen kesempwal kitail en kilangwohng mepwukat duwehte Siohwa eh kin ketin kilangwohng mepwukat.

3. (a) Dahme kahrehda ekei diarada me e apwal en uhdihsang doadoahngki sansal nan arail kaudok? (b) Dahme Paipel padahngki duwen doadoahngki sansal kan pwehn kaudokiong Koht?

³ Ekei aramas kin doadoahngki sansal kan de kisin  wasahn kaudok ehu nan imwarail pwehn kaudokiong Koht sounpar tohto. Ma met mehlel ong uhk, ele e pahn ehusoahng de sapwung ong uhk en kaudokiong Koht ma mepwukat sohte mi rehmw. Ahpw tamataman, Siohwa ketin padahkihong kitail ia mwomwen atail pahn kaudokiong ih. Oh ni sansal Paipel padahkihong kitail me Siohwa sohte ketin kupwurki kitail en doadoahngki sansal kan nan atail kaudok.​—Wadek Eksodus 20:4, 5; Melkahka 115:4-8; Aiseia 42:8; 1 Sohn 5:21.

4. (a) Dahme kahrehda kitail en dehr kaudokiong atail peneinei kan me melahr? (b) Dahme kahrehda Siohwa ketin mahsanihong sapwellime aramas akan en dehr song en koasoiong me melahr kan?

⁴ Ekei aramas ele pahn doadoahngki ahnsou laud oh kehl pwehn song en kaperenda arail peneinei me melahr kan. Ele re pahn kakete kaudokiong irail. Ahpw kitail sukuhlkier me irail kan me melahr sohte kak sewese kitail de kamedekeikitailla. Irail sohte wie momour ehu wasa tohrohr. Ni mehlel, e keper en song en koasoiong irail pwehki ngihl kan me pahn pwarada me dene e kohsang rehn kisehmw kan me melahr uhdahn pahn kohsang ngehn suwed kan. Ihme kahrehda Siohwa ketin kehkehlikihong mehn Israel ko en dehr song en koasoiong me melahr kan de iang pidada soahng kan me kohsang ngehn suwed kan.​—Deuderonomi 18:10-12; menlau kilang Ire kan 26 oh 31.

5. Dahme kak seweseiuk en uhdihsang doadoahngki sansal kan ong kaudokiong Koht oh uhdihsang kaudokiong omw peneinei me melahr kan?

⁵ Dahme kak seweseiuk pwehn uhdihsang doadoahngki  sansal kan ong kaudokiong Koht de en uhdihsang kaudokiong omw peneinei me melahr kan? Ke anahne wadek Paipel oh medewe ni keneinei ia duwen Siohwa eh kin ketin kilangwohng soahng pwuko. E kin ketin “kalahdeki” de kasautki mepwukat. (Deuderonomi 27:15) Kapakapki sapwellimen Siohwa sawas rahn koaros pwe ken kilangwohng soahng kan duwehte me e kin ketin wia oh kapakapki sawas en kaudokiong ih ni ahl me e ketin kupwurki. (Aiseia 55:9) Ke kak kamehlele me Siohwa pahn ketikihong uhk kehl me ke anahne pwehn kihsang soahng kan nan omw mour me kin pidada kaudok likamw.

6. Dahme kahrehda December 25 pilipilda en wia rahnen kasarawi ipwidi en Sises?

⁶ Sampah pwon, Krismas iei ehu kasarawi me kalapw wiawi, oh pali moron en aramas kin medewe me iei kasarawien ipwidien Krais. Ahpw ni mehlel Krismas kisehn kaudok likamw. Ehu dikseneri kawehwehda me irail kan me kin iang pelien lamalam teikan nan Rom kin kasarawi ipwidien ketipin ni December 25. Kaunen pelien lamalam kan kin men irail kan me sohte wia Kristian kan en wiahla Kristian kei, eri mendahki Sises sohte ketin ipwidi ni December 25, irail koasoanehdier en kasarawi eh ipwidi rahno. (Luk 2:8-12) Sapwellimen Sises tohnpadahk ko sohte kin kasarawi Krismas. Ehu pwuhk kawehwehda me sounpar 200 mwurin ipwidi en  Sises, “sohte aramas emen ese, oh aramas malaulau keite me kin men ese iahd me e ketin ipwidi.” (Sacred Origins of Profound Things) Kasarawien Krismas tepida sounpar epwiki kei mwurin Sises eh ketiket sampah.

7. Dahme kahrehda Kristian mehlel kan sohte kin kasarawi Krismas?

⁷ Aramas tohto ese me Krismas tepisang pelien lamalam me kaidehn Kristian, oh irail pil ese tiahk kan en kasarawi wet me duwehte kamadipw oh kawiliali kisakis. Karasepe, mie ehu ahnsou me Krismas kin keinapwidi nan England oh ekei wasa kan nan Amerika pwehki kasarawi wet tepisang pelien lamalam me kaidehn Kristian. Mehmen me pahn wia kasarawio pahn kalokolok. Ahpw kedekedeo aramas akan tepida pwurehng kasarawi Krismas. Dahme kahrehda Kristian mehlel kan sohte kin kasarawi Krismas? Pwehki re men kaperenda Koht ni soahng koaros me re kin wia.

8, 9. Dahme kahrehda tepin Kristian kan sohte kin kasarawi ipwidi kan?

⁸ Pil ehu kasarawi me aramas kin kalapw wia iei rahnen arail ipwidi. Ia duwe, konehng Kristian kan en kasarawi ipwidi? Ihte koasoipen kasarawien ipwidi me pwarada nan Paipel iei ipwidi en irail ko me sohte kin kaudokiong Siohwa. (Senesis 40:20; Mark 6:21) Kasarawi ipwidi kin wiawi pwehn kawauwih koht likamw kan. Ihme kahrehda tepin Kristian akan “kin wiahki kasarawi en ipwidi tiahk en irail  kan me kin iang pelien lamalam teikan.”​—The World Book Encyclopedia.

⁹ Mehn Rom oh Krihk en mahs kamehlele me mie ngehn emen kin iang mi ni ahn aramas emen eh ipwidi oh me ngehn menet pahn pere aramaso erein eh mour. Ehu pwuhk kawehwehda: “Ngehn menet kin ehuong koht emen me ahneki rahnen ipwidi me duwehte en aramaso.”​—The Lore of Birthdays.

10. Dahme kahrehda Kristian kan rahnwet sohte kin kasarawi ipwidi?

¹⁰ Ia duwe, ke medewe me Koht ketin kupwurki kasarawi kan me kisehn kaudok likamw? (Aiseia 65:11, 12) Soh, e sohte kupwurki. Ihme kahrehda kitail sohte kin kasarawi ipwidi kan de rahnen kasarawi teikan me kisehn kaudok likamw.

11. Dahme kahrehda ekei aramas kin kasarawi rahnen kasarawi kan? Dahme ke anahne keieu kesempwalki?

¹¹ Ekei aramas ese me kasarawien Krismas oh kasarawien rahn teikan tepisang kaudok likamw, ahpw re kin pousehlahte wia kasarawi pwukat. Re kin pehm me kasarawi pwukat kin wia ahnsou mwahu en kin patehng arail peneinei kan. Ke iang pwungki pepehm wet? E sohte sapwung en kin men patehng omw peneinei. Siohwa me ketin kapikada peneinei kan oh e ketin kupwurki kitail en ahneki nanpwungmwahu rehrail. (Episos 3:14, 15) Ahpw, kitail anahne medemedewehte en ahneki nanpwungmwahu rehn Siohwa laudsang atail  pahn kaperenda kisehtail kan ni atail kin iang kasarawi kasarawien kaudok likamw kan. Ih kahrepen wahnpoaron Pohl koasoia: “Kumwail kin song rapahki dahme Kaun-o kin ketin kupwurperenki.”​—Episos 5:10.

12. Soangen kasarawi dah me sohte pwungohng kupwuren Siohwa?

¹² Aramas tohto medewe me wasa me kasarawi pwukat tepisang ie sohte uhdahn kesempwal, ahpw Siohwa sohte kin ketin kupwurki soangen madamadau wet. E sohte ketin kupwurki kasarawi kan me tepidohsang kaudok likamw de kasarawi me kin kawauwih aramas de kilelepen wehi kan. Karasepe, mehn Isip kan kin wia soangen kasarawi tohto ong arail koht likamw kan. Mwurin mehn Israel kan ar pitsang Isip, irail kin alasang ehu arail kasarawi likamw oh kahdaneki me e wia “sarawi pwe en wauneki KAUN-O.” Ahpw Siohwa ketin kalokei irail pwehki ar wia met. (Eksodus 32:2-10) Nin duwen me wahnpoaron Pohl koasoia, “kumwail dehr sair mehkot samin.”​—Wadek 2 Korint 6:17.

13. Soangen peidek dah kan me ke ele pahn medewehda ni ahnsou me ke pilada en uhdihsang iang kasarawi rahnen kasarawi kan?

¹³ Ele e pahn mie omw peidek tohto ni ahnsou me ke pilada en uhdihsang iang kasarawi rahnen kasarawi kan. Karasepe: Dahme I pahn wia ma iengei tohndoadoahk kan idek rehi kahrepen ei sohte kin iang irail kasarawi Krismas? Dahme I pahn wia ma emen kihong ie kisakis en Krismas? Dahme I pahn  wia ma ei pwoud kasik me I pahn iang kasarawi rahnen kasarawi ehu? Ia duwen ei kak sewese nei seri kan en dehr nsensuwedki ar sohte iang kasarawi rahnen kasarawi ehu de arail rahnen ipwidi?

14, 15. Dahme ke kak wia ma emen rahnmwahwihkin uhk kasarawien rahn ehu de kisikiseiuk?

¹⁴ E kesempwal ken doadoahngki omw koahiek en madamadau ni ahnsou me ke pilada dahme ke pahn nda oh wia nan ehuehu irair kan. Karasepe, ma aramas akan rahnmwahwihkin uhk koasoi kan me duwehte “Merry Krismas!” ke sohte anahne pohnsehse irail. Ke kak ndahte, “Kalahngan.” Ahpw ni ahnsou kan me emen men wehwehki laudsang met, mwein ke kak pilada en kawehwe dahme kahrehda ke sohte kin kasarawi rahnen kasarawio. Ahpw, ahnsou koaros kasalehda kadek, kamantik, oh wahu. Paipel mahsanih: “Amwail koasoi mwohn aramas en katapan oh kansenamwahu; oh kumwail uhdahn pahn ese duwen amwail pahn sapeng koaros ni pwung.” (Kolose 4:6) Mwein ke kak kawehwehiong me ke kin perenki patehng meteikan oh kisikise meteikan ahpw ke piladahier en dehr wia met ni ahnsou me pidada kasarawi en rahno.

¹⁵ Dahme ke pahn wia ma emen kihong uhk kisakis? Paipel sohte kihda kosonned kan, ahpw e mahsanih me kitail anahn kolokol kadeikpen loalatail me mwakelekel. (1 Timoty 1:18, 19) Mwein aramaso me kihong uhk kisakiso sehse me ke sohte kin iang kasarawi rahnen kasarawio. De e kakete nda, “I ese me ke sohte kin iang kasarawi rahn  wet. Ahpw I men kihong uhk met.” Sohte lipilipil rehn irair riau pwukat, ke kak pilada ma ke pahn ale kisakiso de soh. Ahpw sohte lipilipil dahme ke pilada, kanahieng pwe ken kolokolete omw nsenmwakelekel. Kitail sohte pahn men wia mehkot me pahn kak kauwehla atail nanpwungmwahu rehn Siohwa.

16. Dahme ke pahn wia ma omw peneinei men kasarawi rahnen kasarawi kan?

¹⁶ Dahme ke pahn wia ma omw peneinei men kasarawi rahnen kasarawi ehu? Ke sohte anahne akamaikihong irail. Tamataman me irail ahneki pwuhng en pilada dahme irail men wia. Ken kasalehda kadek oh wauneki arail pilipil kan duwehte omw men ren wauneki omw pilipil kan. (Wadek Madiu 7:12.) Ahpw ma omw peneinei men ken patehng irail erein rahnen kasarawio, dahme ke pahn wia? Mwohn omw pahn pilada dahme ke pahn wia, kapakapki sapwellimen Siohwa sawas pwe ken wiahda pilipil me pwung. Medewe duwen irairo, oh wia omw roporop. Tamataman me ke men ahnsou koaros kaperenda Siohwa.

17. Dahme ke kak wia pwehn sewese noumw seri kan en dehr ahneki pepehm me re katihasang mehkot mwahu ni ahnsou me meteikan kin kasarawi rahnen kasarawi kan?

¹⁷ Dahme ke kak wia pwehn sewese noumw seri kan ni ar kilang meteikan kasarawi rahnen kasarawi kan? Ele, ekei ahnsou, ke kak koasoanehdi mehkot tohrohr ong irail. Ke pil kak kaluskinirail ekei kisakis kan. Oh pil ehu kisakis me keieu mwahu me ke kak  kihong noumw seri kan iei omw ahnsou oh omw limpoak.

18. Dahme kahrehda kitail anahne iang towehda mihting en Kristian kan?

¹⁸ Pwehn kaperenda Siohwa, kitail anahne kesehla kaudok likamw iangahki tiahk kan oh kasarawi kan me tepisang kaudok likamw. Ahpw kitail pil anahne wia kaudok mehlel. Ia duwen? Ehu ahl iei kaukaule iang towehda mihting en Kristian kan. (Wadek Ipru 10:24, 25.) Mihting kan wia kisehn kaudok mehlel me uhdahn kesempwal. (Melkahka 22:22; 122:1) Kitail kak kangoange emenemen ni ahnsou me kitail kin tuhpene ni mihting kan.​—Rom 1:12.

19. Dahme kahrehda e kesempwal en padahkihong meteikan duwen padahk mehlel kan en Paipel me ke sukuhlkier?

¹⁹ Pil ehu elen pilada kaudok mehlel iei en koasoiaiong meteikan duwen dahme ke sukuhlkihsang Paipel. Aramas tohto kin pwunodki duwen soahng suwed kan me kin wiewiawi nin sampah. Mwein mie ekei me ke ese me kin ahneki soangen pepehm wet. Padahkihong irail duwen koapworopwor kaselel me ke ahneki ong ni ahnsou kohkohdo. Ni omw kin iang towehda mihting en Kristian kan oh padahkihong meteikan duwen padahk mehlel en Paipel, ke pahn diarada me ke solahr kin inengieng wia kisehn kaudok likamw oh eh tiahk kan. Ke kak kamehlele me ke pahn nsenamwahu oh me Siohwa pahn ketin kapaiada omw nannanti en pilada kaudokiong ih ni ahl me pwung.​—Malakai 3:10.