1, 2. ¿Ima tapuna ʼruacunayqui tían? ¿Imajchus?

 CKAM Bibliát estudias aprenderanqui ashca persunas nincu Tata Yayát adorasckancunata, pero yachachincu o ʼruancu imastis pay chejnisckanta (2 Corintios 6:17). Chayraycu, Jehová niáysh llulla religiunmanta llojsinayshta, «Atun Babilonia» (Revelación [Apocalipsis] 18:2, 4). Ckam, ¿imátaj ʼrúaj ʼrinqui? Sapa suj nockayshmanta decidinan tían y tapucunan tían: «¿Munani Tata Yayát adorayta imaina pay munan, o adorayta munani imaina cunancama ʼruarani?».

² Si ckam na sackeranqui llulla religiunta o renunciaranqui, allít decideranqui. Pero nacha sonckoyquipi tían huaquin practicas o costumbres llulla religiunmanta, manáraj sackeranqui. Ckaasúysh huaquin chaycunamanta, y astaanpas, imajchus importante can cá imastistas ckaanayshta imaina Jehová ckaan.

3. a) ¿Imajchus huaquin persunáspaj mana chaynalla cayta atin sackeyta santusta utilisayta? b) Biblia, ¿imátaj yachachiáysh santusmanta?

³ Tata Yayát adoranancunápaj, huaquin persunas huasisnincupi apincu santus utulas altarespi ashca huatasmantapacha. Si ckam chayna ʼrúaj caranqui, pensayta atinqui cá santusta mana apispá Tata Yayát adoráypaj mana alli tían. Pero yuyanayqui tían Jehová yachachiáysh imaina munan adoranayshta. Biblia yachachiáysh Jehová mana munan santusta utilisanayshta  payta adoranáyshpaj (Éxodo 20:4, 5 léey; Salmo 115:4-8; Isaías 42:8; 1 Juan 5:21).

4. a) ¿Imajchus familiares huañusckastas mana adoranáysh tían? b) ¿Imajchus Jehová Israelistasta nipucora mana munachuncu huañusckasuan ʼrimayta?

⁴ Huaquin persunas ashca tiempút, ckoshcke y fuersasnincunát dedicapucuncu familiaresnincuna huañusckastas. Hasta adorayta atincu. Pero na aprenderáysh chayta mana ʼruanáysh tían, huañusckas mana yanapaayshta atincu ni dañút ʼruaayshta. Astaanpas, mana suj laupi causasckas tiancu. Y peligrusu can intentayta paycunaan ʼrimayta, mayckan cachun mensaje creéysh suj familiar huañusckamanta amusckanta, demoniusmanta amuncu. Chayraycu Jehová israelitasta nipucora mana munachuncu huañusckasuan ʼrimayta y mana ʼruanancunata ni imátap demoniusuan ckaanan tiasckanta (Deuteronomio 18:10-12; Ckáay Astaan yacháypaj 26 y 31 paginapi 221 y paginapi 223).

5. a) ¿Imaina Jehová ckaan huañusckastas resapuyta o santusta utilisayta? b) ¿Imát ʼruanáysh tían Tata Yayát adoranáyshpaj imaina pay munan?

⁵ ¿Ima yanapasuyta atin sackenayquípaj santusta utilisayta Tata Yayát adoranayquípaj? Bibliát leeyta y pensayta imaina Jehová cá imastistas ckaan. Páypaj ancha mapa can y chejnin túcuy chayta (Deuteronomio 27:15). Túcuy punchaus Jehovát mañápuy yanapasuchun imastistas ckaanayquípaj imaina pay ckaan y adoranayquípaj munasckan ina (Isaías 55:9). Jehová fuersasta ckósoj ʼrin sackenayquípaj ʼruayta pay chejnisckanta.

6. ¿Imajchus ajllarancu 25 Diciembremanta Jíshup huachayninta festejáypaj?

⁶ Navidar can suj fiesta ima túcuy mundupi festejacun, yacka túcuy persunas creencu chá punchau Jishu huachascka casckanta chayraycu festejancu. Pero Navidar  llulla religiunuan ckaanan tían. Suj enciclopedia nin ima paganus Romamanta festéjaj carancu nis 25 Diciembremanta Íntip huachayninta. Líderes religiosos munarancu astaan persunas cristianas ʼruacunancunata. Chayraycu deciderancu 25 Diciembremanta Jíshup huachayninta festejayta, aunque pay mana chá punchau huachachiscka casa cara (Lucas 2:8-12). Jíshup discipulusnin Navidarta mana festéjaj carancu. Imaina nin libru Los orígenes sagrados de las cosas profundas, 200 huatas crusasa carancu Jíshup huañuyninmanta, «mana pipas yachara y huaquincunllát importapúcoj cara aicapchus Jishu huachachiscka casa cara». Navidar festejacuyta ckallarera 300 huatas Jíshup huañuyninmanta chaymanta.

7. ¿Imajchus verdaderus cristianus mana Navidarta festejancu?

⁷ Ashca persunas ʼrejsincu maypi Navidar ckallarera y túcuy tradiciunesninta, imaina tantanacuyta familiaresuan micúypaj y regalustas sujuan sujuan ʼruacúypaj. Astaanpas, suj tiempupi Inglaterrapi mana sackerancu Navidarta festejanancunata y huaquin lugarespi Norteamericamanta, yachasckancunaraycu maymanta chá fiesta amun. Pi chá fiestát festéjaj cara reprendescka canan tiara. Pero chaymanta persunas cutis ckallarerancu Navidarta festejayta. ¿Imajchus verdaderus cristianus Navidarta mana festejancu? Imaraycu túcuy ʼruasckancupi Tata Yayát cusichinaancu.

8, 9. ¿Imajchus huámaj cristianus cumpleañustas mana festéjaj carancu?

⁸ Suj fiesta túcuy mundupi festejancupas, cumpleañus cancu. Cristianus, ¿cumpleañusta festejanancu tían? Biblia ʼrimaáysh fiestas cumpleañusmanta ima festéjaj carancu, persunas mana Jehovát adóraj carancu (Génesis 40:20; Marcos 6:21). Cumpleañuspi llulla diusesta adorácoj cara. Chayraycu huámaj cristianus chá  fiestát ckáaj carancu suj mana alli costumbre ina casckanta festejáypaj (The World Book Encyclopedia).

⁹ Romanus y Griegus ñaupamanta créej carancu suj espíritu tíaj cara sapa persuna huachachiscka captin y chá espíritu túcuy causayninpi persunát protégej ʼrera. «Cá espíritu apera suj relaciun espiritual diusuan huatasta cumplishcasckanta chá quiquin punchau cá persuna huatát cúmplej cara» (The Lore of Birthdays [La tradición de los cumpleaños]).

10. ¿Imajchus cristianus cunan punchau cumpleañusta mana festejancu?

¹⁰ Ckam, ¿creenqui Jehovát gustapun chá fiestas ima ckaanan tiasckanta llulla religiunuan? (Isaías 65:11, 12). Mana a. Chayraycu, cristianus cunan punchau cumpleañusta mana festejáysh y nima fiesta ima ckaanan tían llulla religiunuan.

11. a) ¿Imajchus huaquin persunas fiestas llulla religiunmanta festejancu? b) Ckámpaj, ¿imátaj astaan importante canan tían?

¹¹ Huaquin persunas yachancu maypi Navidar y sujcuna fiestas ckallarerancu, pero igualllát mana festejayta sackencu. Pensancu cá fiestas ocasiuneslla cancu familiaresnincuan tianancunápaj. Ckam, ¿chayna pensanqui? Alli tían munayta familiaresuan tiayta. Jehová familiát ʼruara y munan aillusniyshta allít tratacunayshta (Efesios 3:14, 15). Pero, nockáyshpaj Jehóvap amistarnin astaan importante canan tían y mana familiaresniyshta cusichiyta fiestasta festejas ima ckaanancu tían llulla religiunuan. Chayraycu apóstul Pablu nera: «Aseguracus seguiychis Señor aceptasckanmanta» (Efesios 5:10).

12. ¿Ima laya fiestas Jehovápaj mana allis cancu?

¹² Ashca persunas pensancu mana importasckanta maypi suj fiesta ckallarera o maymanta amun. Pero,  Jehová mana chayna pensan. Páypaj mana allis cancu fiestas amusckancuta llulla religiunmanta, ni maypi persunastas, banderata, o sujcuna imastista honrát ckoncu. Suj ejemplu, Egipcius ashca fiestastas ʼrúaj carancu llullas diusesnincunata honráypaj. Egiptumanta llojsis chaymanta, israelitas suj fiestát ʼruarancu egipciustas yachapias y nerancu «suj fiesta Jehovápaj» can. Pero Jehová piñacora chayta ʼruasckancunaraycu (Éxodo 32:2-10). Nockáysh profeta Isaías nisckanta ʼruanáysh tían: «Ama chamcaychis ni imátap mapa cachun» (Isaías 52:11 léey).

13. ¿Ima tapunas ʼruacuyta atinquiman sackeptiyqui fiestas llulla religiunmanta festejayta?

¹³ Ckam sackeptiyqui festejayta fiestastas llulla religiunmanta, nacha ashca tapunas ʼruácoj ʼrinqui. Por ejemplu, «¿Ima ʼrúaj ʼrini llamcaypi tapuaptincuna ímaj Navidarta mana festejani? ¿Ima ʼruánay tían pillapas suj regalu Navidarmanta ckoaptin? ¿Y si ckósay o huármiy munan festejanayta suj fiesta ima Tata Yaya chejnin? ¿Imaina huaasniyta yanapayta atini mana llaquisckas tianancunápaj mana festejasckancunaraycu suj fiesta o cumpleañusnincunata?

14, 15. ¿Imát ʼruanayqui tían pillapas nisuptin cusisckas fiestas o suj regalút ckosuptin?

¹⁴ Ancha importante can allít pensayta decidiptíysh imata nej ʼríysh, imátaj ʼrúaj ʼríysh chá tapunasta ʼruaaptíysh. Por ejemplu, pillapas nisuptin cusisckas fiestas, respetuoso canayqui tían y ninayqui tían «gracias». Y, pillapas astaan yachayta munaptencka, ckam nipuyta atinqui ímaj mana chá fiestasta festejanqui. Pero, amable y prudente cay, y respetuan ʼrímay. Biblia niáysh: «ʼRimaptiyqui siempre gracia apichun, cachian cachiyascka cachun, yachanayquíshpaj imaina  sapa sujta suj respuestát ckonayquísh tían» (Colosenses 4:6). Nipuyta atinqui gustasusckanta sujcuna persunasuan tantanacus tiayta y regalustas ckoyta, pero mana ʼruanqui regalusta chá fiestasuan ckaanan tiaptin.

¹⁵ ¿Imát ʼruanayqui tían pillapas suj regalút ckosuptin? Biblia mana apin suj lista maypi nin imát ʼruanáysh tían, pero niáysh suj alli conciencia apináysh tían (1 Timoteo 1:18, 19). Chá persuna suj regalút ʼruasuyta munan mana yachan, ckam chá fiestasta mana festejanqui. O nisuyta atin: «Yachani mana cay fiestát festejanqui, pero igualllát cá regalút ckosuyta munani». Sapa ocasiunpi, ckam decidinayqui tían si chásquej ʼrinquichu chá regalút o mana. Pero ckaanayqui tían decidisckayquian concienciayqui alli cutichun. Mana ni imátap ʼruayta munáysh dañút ʼruachun amistarniyshta Jehovaan.

16. ¿Imát ʼruanayqui tían si familiayqui munan festejayta suj fiesta llulla religiunmanta?

¹⁶ ¿Imát ʼruanayqui tían si familiayqui suj fiestát llulla religiunmanta ʼruayta munan? Ama paycunaan discutiychu. Yúyay derechu apincu decidinancunápaj ʼrúaj ʼrisckancunata. Chayraycu amable cay y paycuna decidisckancunata respétay, imaina ckampas munanqui paycuna respetasuchuncu decidisckayquipi (Mateo 7:12 léey). Pero, ¿si familiayqui munan ckam paycunaan fiestasnincupi tianayquita? Manáraj decidiptiyqui Jehovát mañápuy yanapasuchun alli tiasckanta ʼruanayquípaj. Pénsay, imaina Tata Yaya ckaan cá imastista, chaymanta informaciunta máscay Bibliapi, revistaspi y libruspi maypi ʼriman chá fiestasmanta, chayna suj alli respuesta ckonayquípaj. Ama ckonckaychu; ckam Jehovát cusichiyta munanqui.

17. ¿Imát ʼruayta atinqui huaasniyqui mana creenancunápaj súmaj imastismanta chincachicusckayquita?

 ¹⁷ ¿Imát ʼruayta atinqui huaasniyqui mana creenancunápaj súmaj imastismanta chincachicusckayquita sujcunasta ckaas festejayta fiestas llulla religiunmanta? Huaquin cutis suj súmaj tantacuna paycunápaj ʼrúay. Astaanpas, cusichicuyta atinqui suj regalút ʼruapucus. Astaan súmaj regalu ima ʼruapucuyta atinqui can tiempuyqui y munayniyqui ckocus.

18. ¿Imajchus tantacunasman Jehóvap testigusninmanta ʼrináysh tían?

¹⁸ Jehovát cusichiyta munaspá, llulla religiunta sackenáysh tían y túcuy costumbresninta y tradiciunesninta. Nátaj, verdadera religiunta practicanáysh tían. ¿Imaina? Túcuy tantacunasman Jehóvap testigusninmanta ʼrinayqui tían (Hebreos 10:24, 25 léey). Tantacunasman ʼriyta suj parte ancha importante can verdadera adoraciunmanta (Salmo 22:22; 122:1). Chaypi sujuan sujuan animanacúysh (Romanos 1:12).

19. ¿Imajchus alli can ckam sujcunasta ʼrimapucunayquita Bibliapi aprendesckayquimanta?

¹⁹ Verdadera religiunta practicáypaj, ckam Bibliapi aprendesckayquimanta sujcuna persunasuan ʼrimanayqui tían. Ashca persunas usus tiancu sajras imastis mundupi sucedesckancunaraycu. Ckam debenqui ʼrejsiyta huaquin chá persunasmanta. Chaypachá, ʼrimapúcuy súmaj suyanamanta apisckayquita ámoj pachápaj. Y tantacunasman ʼrispá y sujcunasta Bibliamanta ʼrimapucuspá, ckáaj ʼrinqui na mana munasckayquita seguiyta llulla religiunpi ni costumbresnincupi. Seguro tiayta atinqui cusiscka caj ʼrinqui y Jehová bendícej ʼrin afanes ʼruasckayquita adoráypaj imaina pay munan (Malaquías 3:10).