1, 2. a) ¿Imara tapurina angui? b) ¿Imarasha shina tapurina angui?

CAN BIBLIARA estudiasha intindishcangui ashca runauna Diosta adurani nisha rimasha, pai chijnishcara ruranun, yachachinun (2 Corintios 6:17). Chiraigu Jehová Dios panda religionda, “Atun Babilonia” nishcamanda llucshichi riman (Ricuchina 18:​2, 4). Can ¿ima rurana angui? Caran shuj ajllasha tapurina an: “¿Munanichu Dios munashca cuinta adurangaj o ñuca munashca cuinta adurangaj?”.

² Can panda religionda ña saquisha, alira rurashcangui. Shinajpi camba shungüi chara munanguichari cai panda religionmanda yachaigunara, ruraigunara rurasha catingaj. Cai tunu rashcaunamanda mas yachasha, ricushun imarasha Jehová ricushca cuinta ricunara mas valishcami.

3. a) Santogunara adurana saquinaga ¿imarasha huaquingunajca shinzhi an? b) ¿Imara Bibliaga yachachin santogunahua Diosta aduranamanda?

³ Diosta adurangahua, maican runauna paiguna huasiunai santogunara, altargunaras ashca huatauna charinushca. Can shina ruraj asha, chi santogunahua Diosta mana adurasha manali sintiringuichari. Shinajpi iyari, Jehová Dios yachachin imasna paita adurana munashcara. Bibliaga alirami yachachin Jehová Dios mana munanzhu  cai santogunahua paita aduranuchu (leapai Éxodo 20:​4, 5; Salmo 115:​4-8; Isaías 42:8; 1 Juan 5:21).

4. a) ¿Imarasha huañushcaunara mana adurana anchi? b) ¿Imarasha Jehová Dios israelitagunara huañushcaunahua ama cuintarinuchu mandaca?

⁴ Ashca llactaunai huañushcaunara iyaringahua istaunara rurarianun, o shuj partiunai huañushcaunara aduranun. Huaquin runauna ashca timpura pasanun huañushcaunara cushiyachingaj. Shinajpi ña yachashcanchi, huañushcauna alira, manalira rurangaj mana ushanunzhu. Shuj lugarbi causasha mana catinunzhu. Shinallara paigunahua cuintaringaj mana alichu an. Ñucanchi huañushca ailluunahua cuintarisha, supaigunahuami cuintarij ashcanchi. Chiraigumanda Jehová Dios israelitagunara mandacami ama huañushcaunahua cuintarinuchu nisha, astaun supaiguna rurashcaunamanda anzhurinuchu (Deuteronomio 18:​10-12; nota 26, 31 ricungui).

5. ¿Imara yanapanga santogunahua Diosta aduranara, huañushcaunara aduranaras saquingahua?

⁵ ¿Imara yanapanga santogunahua Diosta aduranara, huañushcaunara aduranaras saquingahua? Bibliara leasha, Jehová imasnara caita ricushcara intindisha. Paihua ñaupajpi cai tunu rashcauna “irusmi”, ismushca cuintami an (Deuteronomio 27:15). Tucui huras Jehová Diosta mañai pai munashca cuinta rurangahua, paita adurangahuas (Isaías 55:9). Jehová Dios canda ursara cungami mana ali aduranara saquingahua.

6. ¿Imarashara cai 25 de diciembre punzhara, Jesús pagarishcara iyaringaj ajllanuca?

⁶ Navidadga intiru mundui shu atun istami an, ashca runauna quirinun chi ista Jesús pagarishcara  iyarichin. Navidad istaga panda religiongunamanda yachachishcami ashca. Shu enciclopedia nishca ricuchin mana quirij romanoguna 25 de diciembre punzhai, indi pagarishca istara rurajcunami anuca. Panda religiongunamanda pushajcuna munanucami, mana quirijcuna Jesusta catijcuna tucunuchu. Chiraigumanda 25 de diciembre punzha Jesús pagarishcara iyaringaj ajllanuca, pai chi punzhai mana pagarishca ajllaira (Lucas 2:​8-12). Jesusta catijcuna Navidadta mana ruranucachu. Shinallara shu libroga yachachin 200 huatauna Jesús huañushca huasha, mana pis yachanuca, astaun mana munanuca yachangaj Jesús ima punzha pagarishcara (Los orígenes sagrados de las cosas profundas). Astaumbas Navidad istaga callaricami 300 huatauna Jesús huañushca huasha.

7. ¿Imarasha cierto Jesusta catijcuna Navidad istara mana ruranun?

⁷ Ashca runauna yachanun Navidad ista panda religionmanda shamushcara, chi istamanda rurashcaunas imasna ailluunapura tandarisha micuna, regaloguna cuyana. Inglaterra llactai, shinallara Norteamérica huaquin partiunai shu timpuulla chi istara ama ruranguichi nisha mandanuca panda religionmanda shamushcaraigu. Tucui chi istara rurasha castigashca tucuca. Shinajpi ansa huasha runauna cuti Navidadta rurangaj callarinuca. ¿Imarasha cierto Jesusta catijcuna Navidadta mana ruranun? Diosta tucuibi cushiyachingaj munashcamanda.

8, 9. ¿Imarasha cumpleaños istara, punda Jesusta catijcuna mana ruraj anuca?

⁸ Cumpleaños istara ashca runauna ruranun. Jesusta catijcunaga ¿cumpleaños istara rurana anun? Bibliai tiaj  cumpleaños istamanda rimashca nin Jehovara mana adurajcuna ruranuca (Génesis 40:20; Marcos 6:21). Cumpleaños istai yanga diosgunara ahuayachijcunami anuca. Punda Jesusta catijcunaga “maicans pagarishca punzha iyarinara, panda religionmanda shamushcara ricunujmi anuca” (The World Book Encyclopedia).

⁹ Ñaupa punzhaunai romanoguna, griegogunas quirij anuca, caran runara shu espíritu cumpañaj aca, pagarishcamanda huañungagama cuirasha. Chi timpui mana quirij runauna, cumpleaños istara ruraj anuca, paiguna diosguna pagarij runara yanapanga nisha iyashcamanda.

10. ¿Imarasha cunan timpui Jesusta catijcuna cumpleaños istara mana ruranun?

¹⁰ ¿Iyaringuichu Jehová Dios panda religionhuaj istaunara chasquishcara? (Isaías 65:​11, 12). Mana, pai mana chasquinzhu. Chiraigu, cunan Jesusta catijcuna cumpleaños istara, o shuj panda religionhuaj istaunara mana ruranchichu.

11. a) Huaquingunaga ¿imarashara panda religionhuaj istaunara ruranun? b) ¿Imara cambaj causaibi mas valishca ana an?

¹¹ Huaquin runauna Navidad o shuj istauna panda religionmanda shamushcara yachashas, rurasha catinun. Iyarinun cai istaunaga shu timpu familiahua tandarisha pasanallami an nisha. ¿Shinachu can iyaringui? Familiahua pasangaj ali anmi. Jehová Diosga familiara ruraj asha, paigunahua cushi causanuchu munanmi (Efesios 3:​14, 15). Shinajpi ñucanchi familiahua panda religionhuaj istaunara rurana randimanda, Jehová Dioshua amigo ana mas valishcami. Chiraigu apóstol Pablo nicami: “Dios munashcara ricsichichi” (Efesios 5:10).

12. ¿Ima tunu istaunara Jehová Diosga mana chasquin?

 ¹² Ashca runauna iyanunmi shu istaga maimanda shamushcara mana imaschu nisha, shinajpi Jehová Dios mana shina iyanzhu. Símbolos patrios o nacionales nishca, runaunara mas atunyachij istaunara Dios mana chasquinzhu. Shu ejemplo ricushun, israelitaguna Egipto llactamanda llucshishca huasha, egipciogunahuaj rurashca istara catisha shu “ista tiangami Jehovahuaj” ninuca. Shinajllaira Jehová Dios chi rurashcamanda castigacami (Éxodo 32:​2-10). Ñucanchi profeta Isaías rimashcara rurana anchi: “Mana imas irusta llangaichichu” (leapai Isaías 52:11).

13. Panda religionhuaj istaunara saquishaga, ¿imara tapuringuichari?

¹³ Can panda religionhuaj istaunara saquishaga tapuringuichari. “Ñuca tarbanai cumpañajcunaga, Navidad istara imarasha mana rurangui nijpi ¿imara rurana ani? ¿Imara rurana ani ñucara Navidadmanda regalora cujpi? ¿Ñuca cari o ñuca huarmi Dios mana chasquishca istara rurachu munajpi? ¿Imasna rashara ñuca churiunara yanapana ushani paiguna ama llaqui sintirinuchu maican istara o paiguna cumpleañosgunara mana rurashcamanda?”.

14. ¿Imara rurana ushangui, canda “Feliz Año Nuevo” o “Feliz Navidad” nijpi?

¹⁴ Caran huraspi alira iyarisha yachashun ima ruranara o rimanara. Maicambas canda “Feliz Año Nuevo” o “Feliz Navidad” nijpiga, “pagarachu” nisha rimana ushangui. Shinajpi maicans mas yachanara munajpi, imarasha chi istara mana rurangui intindichina ushangui. Tucui huras llaquihua, respetohua rimangui. Biblia nin: “Canguna rimashca shimiuna ali iyaihua rimashca  anauchu tucui huras, cachihua mishquiyachishca cuinta, canguna caran duiñura imasna cutipana ashcaras yachangaj” (Colosenses 4:6). Maicambi intindichina ushangui shuj runaunahua timpu pasangahua o regaloguna cuyangahua gustashcara, shinajpi cai tunu istaunara mana rurana ushanichu nisha.

15. ¿Imara rurana ushangui cumpleaños o Navidad istaunamanda canda shu regalora cujpi?

¹⁵ ¿Imara rurana ushangui cumpleaños o Navidad istaunamanda canda shu regalora cujpi? Biblia mana charinzhu shu lista cuinta imara rurangaj o mana rurangaj, shinajpi yachachin ali rashca iyaihua saquirinami anchi (1 Timoteo 1:​18, 19). Canda regalora cuj runaga mana yachangachari chi istara can mana ruraj ashcara. Huaquimbi ninga: “Ña yachani cai istara mana rurangui, shinajpis cai regalora cuyana munani”. Chibiga can iyarinami angui chi cuyashcara apina o mana. Shinajpi can ajllashcahua ali sintirina angui. Mana munanchi ñucanchi rurashcara Jehovamanda caruyachichu.

16. ¿Imara rurana angui camba familia panda religionhuaj istara rurana munajpi?

¹⁶ ¿Imara rurana angui camba familia panda religionhuaj istara rurana munajpi? Paigunahua ama piñarichu. Paiguna ima tunu ruranaras ajllana ushanun. Paiguna ajllashcaunara respetana angui, imasna can munangui paiguna can ajllashcaunara respetanuchu (leapai Mateo 7:12). Shinajpi camba familia chi istai can pasachu munajpi ¿imara rurana angui? Manara ajllashallara, Jehovara mañangui alira rurangahua. Shinallara chi ista maimanda shamushcara ali ricuna angui. Ama cungaringuichu: can Jehová Diosta cushiyachingaj munangui.

17. Shujcunara mana ali istaunara rurashcara ricusha camba huahuauna ama llaquirinuchu ¿imara rurana angui?

 ¹⁷ Shujcunara mana ali istaunara rurashcara ricusha camba huahuauna ama llaquirinuchu ¿imara rurana angui? Maican huraspi camba churiunahua ima gustashcaras rurangui. Shinallara shu regalora cuyana ushangui. Shinajpis mas atun regalomi an, camba huahuaunahua pariju pasana.

18. ¿Imarasha Jesusta catijcunaj tandarinaunama rina anchi?

¹⁸ Jehová Diospa ñaupai ali ricuringahua, panda religiongunara, paihua yachaigunara, paihua rurashcaras saquinami anchi. Astaumbas ali religionda catinami anchi. ¿Imasnara? Jesusta catijcunaj tandarinaunama tucui semanaguna risha (leapai Hebreos 10:​24, 25). Tandarinaunama rinara Diosta ali adurangahua ministishcami an (Salmo 22:22; 122:1). Chi tandarinaunai tucuigunapura animarinchi (Romanos 1:12).

19. ¿Imarasha ministishca an, can Bibliai yachaushcara shujcunara cuintachu?

¹⁹ Ali religionda catingahua, can Bibliai yachaushcara shujcunara rimana angui. Ashca runauna turmindarishca tianun cai mundui mana ali cosasguna pasaushcamanda. Maicambi cai tunu problemara charijcunara ricsingui. Paigunahua cuintari imasna gustu causai charingaraunchi shamuj punzhaunai. Can tandarinaunama shamushcara catisha, shujcunahua Bibliamanda cuintarisha, intindinguichari panda religiombi, paihua rurashcaunai ña mana catina munashcara. Cierto pacha cushi causangaraungui, astaun Jehová Dios can ursarishcaunara pai munashca cuinta adurangaj bendiciangami (Malaquías 3:10).