1, 2. ¿Imatam tapukunayki hinaspa imanasqa?

BIBLIATA estudiaspaykim yacharunki Diosta yupaychaq tukuq runakunapa ruwasqankuqa utaq yachachisqankuqa Diospa chiqnisqan kasqanta (2 Corintios 6:17). Chaymi Jehova Diosqa kamachiwanchik ‘hatun Babiloniamanta’ utaq pantay religionmanta lluqsikunanchikpaq (Apocalipsis 18:2, 4). Imata ruwananchikpaq tanteaspapas, kaynatam tapukunanchik: “¿Diospa munasqanman hinachu yupaychayta munani, icha ñuqapa munasqayman hinachu?”, nispa.

² Pantay religionmanta lluqsikuruspaykiqa, allintam tanteakurunki. Chaywanpas, ichapas hinallaraq sunquykipi kachkan pantay religionpa ruwasqan wakin costumbrekuna. Wakin costumbrekunamanta yachasunchik chaynataq Jehova Dios hina imanasqa chaykunata qawananchikmantapas.

3. (1) ¿Imataq wakin runakunapaq sasa kanman? (2) ¿Imatam biblia nin Diosta yupaychaspa taytacha-mamachakunata servichikuymanta?

³ Wakin runakunaqa Diosta yupaychanankupaqmi achka watakuna wasinkupi taytacha-mamachakunata  waqaycharqaku. Chayta manaña ruwaptikiqa, ichapas hukman rikchakusunki chaykunata mana servichikuspa Diosta yupaychasqaykiqa. Ichaqa Jehova Diosmi yachachiwanchik paypa munasqanman hina yupaychananchikpaq. Bibliaqa sutillatam niwanchik taytacha-mamachakunata mana servichikuspa yupaychananchikta Jehova Dios munasqanmanta (qaway Exodo 20:4, 5; Salmo 115:4-8; Isaias 42:8; 1 Juan 5:21).

4. (1) ¿Yupaychanachu wañusqakunata? ¿Imanasqa? (2) ¿Imatam Jehova Diosqa Israel runakunata kamachirqa? ¿Imanasqa?

⁴ Ichapas wakin runakunaqa anchata tiempochakunku hinaspa kallpanchakunku wañuqkunapaq tukuy imata ruwanankupaq. Wakinpiqa wañuqkunatam yupaychanku. Ichaqa yachamurqanchikmi chayta mana ruwanapaq, wañuqkunaqa manam yanapawanchikmanchu nitaq imanawanchikmanchu. Manataqmi wañuqkunaqa maypipas kawsankuñachu. Wañuqkunawan rimayqa manam allinchu. ¿Imanasqa? Wañukuq ayllunchikwan rimasqanchikta piensaspapas demoniokunawanmi rimachkanchik. Chaymi Jehova Diosqa Israel runakunata kamachirqa wañuqkunawan mana rimanankupaq nitaq layqa ruwaqkunawanpas mana hukllawakunankupaq (Deuteronomio 18:10-12; qaway 26, 31 kaq willakuykunata).

5. ¿Imataq yanapasunkiman taytacha-mamachata utaq wañuqkunata mana yupaychanaykipaq?

⁵ ¿Imataq yanapasunkiman taytacha-mamachata mana servichikuspa utaq wañuqkunata mana  yupaychaspa Diosta yupaychanaykipaq? Bibliata ñawinchasqaykim hinaspa Jehova Dios chaykunata imayna qawasqanpi yuyaymanaymi. Diospaqqa ‘millakuypaqmi’ mana allinkuna ruwayqa (Deuteronomio 27:15). Jehova Diosta sapa punchaw mañakuy paypa chiqnisqankunata chiqninaykipaq hinaspa munasqanman hina yupaychanaykipaq (Isaias 55:9). Jehova Diosqa kallpatam qusunki pantay religionpa imapas ruwasqankunata saqinaykipaq.

6. Diciembre killapa 25 punchawninta, ¿imanasqam Jesuspa nacesqanta yuyarinankupaq akllarurqaku?

⁶ Yaqa enteron allpa pachapim navidad fiestataqa ruwanku, runakunaqa piensankum chay punchaw Jesus nacesqanta. Ichaqa chay ruwayqa pantay religionmantam hamun. Huk riqsisqa qillqam nin diciembre killapa 25 punchawninpiqa Roma nacionpi runakuna intipa nacesqanta yuyarisqankumanta. Religionkunapi punta apaqkunaqa munarqakum chay runakuna Diostaña yupaychanankuta. Chaymi diciembre killapa 25 punchawninpi Jesuspa nacesqanta yuyarinankupaqña akllarurqaku, chay punchawpi Jesus mana nacechkaptinpas (Lucas 2:8-12). Jesuspa qatiqninkunaqa manam navidadtaqa ruwarqakuchu. Huk qillqapas ninmi: “[Jesuspa wañukusqanmanta 200 watakuna qipataqa] manam pipas yacharqachu nitaq yachaytapas munarqakuchu haykapi  Jesuspa nacesqantaqa”, nispa (Los orígenes sagrados de las cosas profundas). Navidadtaqa ruwayta qallaykurqaku Jesuspa wañukusqanmanta yaqa 300 wata qipatañam.

7. ¿Imanasqam Diospa chiqap yupaychaqninkunaqa mana ruwankuchu navidad fiestata?

⁷ Wakin runakunaqa yachankum navidad fiesta maymanta rikurimusqanta hinaspa chay punchaw ayllunkuwan kuska mikusqankuta hinaspa regalokunata qunakusqankutapas. Chaymantapas achka watakunam Inglaterra nacionpi hinaspa Norteamerica lawpipas navidadta mana ruwanankupaq harkakurqaku. Pipas chay fiestata ruwaqqa castigasqam karqa. Ichaqa watakuna pasasqanman hinam kaqmanta chay ruwayta qallaykurqaku. ¿Imanasqam Diospa chiqap yupaychaqninkunaqa mana ruwankuchu navidad fiestata? Tukuy ima ruwasqankupi Diosta kusichiyta munasqankuraykum.

8, 9. ¿Imanasqataq ñawpaq tiempopi Diosta yupaychaqkunaqa mana santokuqkuchu?

⁸ Yaqa llapallan runakunam santokunku. ¿Imanasqataq Diosta yupaychaqkunaqa mana santokunchikchu? Bibliam willakun Jehova Diosta mana yupaychaqkunalla santokusqankumanta (Genesis 40:20; Marcos 6:21). Santokusqanku punchawpiqa pantay dioskunatam hatunchaqku. Chaymi ñawpaq tiempopi Jesuspa qatiqninkunaqa nirqaku “runakunapa nacesqanta yuyariyqa  pantay yachachikuymanta hamusqanta” (Las cosas nuestras de cada día).

⁹ Roma hinaspa Grecia nacionpi runakunaqa piensarqakum pipas naceptin chaypi huk espiritu kasqanmanta hinaspa chay runata wañukunankama waqaychasqanmanta. Chay tiempopi Diosta mana yupaychaq runakunaqa, piensarqakum santokuptinku chay dioskuna waqaychananmanta.

10. ¿Imanasqataq kunanpas Diosta yupaychaqkunaqa mana santokunchikchu?

¹⁰ Diosta yupaychaqkunaqa manam santokunchikchu nitaq ruwanchikchu pantay religionwan tupaq imapas fiestakunataqa. ¿Jehova Diosqa chaskinchu pantay religionwan tupaq fiestakunata? Manam (Isaias 65:11, 12).

11. (1) ¿Imanasqam wakin runakuna Diospa chiqnisqan fiestakunata hinalla ruwanku? (2) ¿Imataq qampaqqa aswan allin kanan?

¹¹ Wakin runakunaqa yachankum navidad hinaspa huk fiestakuna imayna rikurisqanta, ichaqa hinallam Diospa chiqnisqan fiestakunata ruwanku. Ninkum chay fiestakunaqa ayllunkuwan huñunakunankupaq kasqanta. ¿Chaynatachu qampas ninki? Allinmi ayllunchikwan kuska kananchikpaq tiempochakuyqa. Jehova Diospas unanchawaqninchik kasqanraykum munan ayllunchikwan hawka kananchikta (Efesios 3:14, 15). Ichaqa Jehova Dioswan kuyachikuymi aswan allinqa, ayllunchikta kusichinanchikrayku Diospa chiqnisqan fiestakunata  ruwaymantaqa. Chaymi apostol Pablo nirqa: “Hinallayá yachaychik señorninchikpa munasqanman hina imakuna kasqanmanta”, nispa (Efesios 5:10).

12. ¿Ima fiestakunatam Jehova Diosqa mana chaskinchu?

¹² Achka runakunam ninku: “Manam imananchu fiestakuna imayna rikurimusqanqa”, nispanku. Ichaqa manam chaynatachu Jehova Diosqa piensan. Payqa manam chaskinchu pantay religionmanta hamuq fiestakunataqa nitaq banderakunata, gobiernokunata hinaspa runakunata hatunchaq fiestakunatapas. Ñawpaq tiempopim, Egipto nacionpi fiestakunata ruwaqku pantay dioskunata hatunchanankupaq. Egiptomanta lluqsiramuspankum, Israel runakunapas paykunata qatipakuspanku mana allin fiestata Diospaq ruwapurqaku. Ichaqa Jehova Diosmi chay fiestata ruwasqankumanta castigarurqa (Exodo 32:2-10). Ñuqanchikqa Diosmanta willakuq Isaiaspa nisqantam ruwananchik, paymi nirqa: ‘[Diospa] millakusqan kaqkunata ama hapispayá lluqsikuychik’, nispa (qaway Isaias 52:11).

13. Diospa chiqnisqan fiestakunata saqispaykiqa, ¿imakunatam tapukuwaq?

¹³ Diospa chiqnisqan fiestakuna ruwayta saqispaykiqa, ichapas kaynakunata tapukunki: “¿Imatam ruwanay navidadta mana ruwasqaymanta llamkaqmasiykuna tapuwaptin? ¿Imatam ruwanay  navidadpi pipas regalota quwaptin? ¿Imatam ruwanay qusay utaq warmichay Diospa chiqnisqan fiestata ruwayta munaptin? ¿Imaynatam churiykunata yanapayman fiestata utaq santonta mana ruwaptiyku llakisqa mana kanankupaq?”, nispa.

14, 15. ¿Imatam ruwawaq pipas santoykipi abrazaykusuptiki utaq regalota quykusuptiki?

¹⁴ Sapakamam allinta tanteakunanchik imata ninanchikpaq hinaspa imata ruwananchikpaqpas. Santoykipi pipas abrazaykusuptikiqa, ama wischupakuspalla chaskikuy. Imanasqa mana santokusqaykimanta pipas astawan yachayta munaptinqa, willawaqmi imanasqa mana ruwasqaykimanta. Ichaqa kuyakuywan hinaspa sumaqllatam ninayki. Bibliam nin: “Rimasqaykichikpas sumaqllañayá kachun kachiwan kachichasqa hina, chaynapim yachankichik sapakamaman imayna kutichiyta”, nispa (Colosenses 4:6). Ichapas willawaq iñiqmasikikunawan huñunakusqaykita hinaspa regalokunatapas qunakusqaykichikta, niwaqtaqmi chaykunataqa imay punchawpas ruwasqaykita.

¹⁵ ¿Imatam ruwawaq pipas regalota quykusuptikiqa? Bibliaqa manam ninchu imata ruwanaykimantaqa, ichaqa ninmi sunquykipi hawka kanaykipaq (1 Timoteo 1:18, 19). Ichapas regalo qusuqniki runaqa mana yachanchu chay fiestata mana ruwasqaykita. Utaq nisunkiman: “Yachanim kay fiestata mana ruwasqaykita, ichaqa munanim kay regalo quyta”, nispa. Chayna kaptinqa, qanmi  tanteanayki chay regalota chaskikunaykipaq utaq manapas. Ichaqa sunquykipim hawka tarikunayki. Manamá munanchikchu imatapas ruwaspa Jehova Dioswan kuyachikusqanchikta chinkarachiytaqa.

16. ¿Imatam ruwanayki Diospa chiqnisqan fiestata aylluyki ruwayta munaptinqa?

¹⁶ ¿Imatam ruwanayki Diospa chiqnisqan fiestata aylluyki ruwayta munaptinqa? Manam paykunawanqa atipanakunaykichu. Paykunapas tanteakunmankum imapas ruway munasqankuta. Imaynam qampas munanki imapas tanteasqaykita respetanankuta, chaynam qampas respetanayki (qaway Mateo 7:12). Ichaqa, ¿imatam ruwawaq aylluyki qanwan kuska imapas fiestapi kayta munaptinkuqa? Manaraq imatapas tanteachkaspayki, Jehova Diospa yanapakuyninta mañakuy allin kaqta ruwanaykipaq. Imayna kutichinaykipaq yuyaymanay hinaspa qillqanchikkunapi yanapakuykunata maskay. Kaytam mana qunqanaykichu: Qamqa Jehova Dios kusichiytam haykapipas munachkanki.

17. ¿Imatam tayta-mamakuna ruwananku churi-wawanku mana llakikunankupaq?

¹⁷ ¿Imatam ruwawaq Diospa chiqnisqan fiestata hukkuna ruwaptinku churi-wawaykikuna mana llakikunankupaq? Allinmi kanman wakinpi imatapas paykunapaq ruwapuyniki hinaspa ima  regalotapas quyniki. Huk kaqnin allin regaloqa kanmanmi paykunapaq tiempochakuyniki hinaspa kuyayniki.

18. ¿Imanasqam huñunakuykunaman rinanchik?

¹⁸ Jehova Diosta kusichiyta munaspanchikqa, pantay religionmantam lluqsikunanchik hinaspa imapas ruwasqankuta saqinanchik. Chaymantapas, chiqap religionpa ruwasqantañam ruwananchik. Chaypaqqa, sapa semanam huñunakuykunaman rinanchik (qaway Hebreos 10:24, 25). Huñunakuykunapim Diosta yupaychanchik (Salmo 22:22; 122:1). Chaypitaqmi kallpanchanakunchik (Romanos 1:12).

19. ¿Willakunaykichu bibliapi yachasqaykikunata huk runakunaman? ¿Imanasqa?

¹⁹ Chiqap religionpa ruwasqantaña ruwanaykipaqqa, bibliamanta yachasqaykikunatam huk runakunaman willakunayki. Runakunaqa kay pachapi mana allinkunawanmi ñakarichkanku. Ichapas riqsinki chayna tarikuq runakunata. Chaynaqa, paykunaman willakuy musuq pachapi sumaq kawsakuymanta. Huñunakuykunaman rispaykiqa hinaspa Diosmanta willakuspaykiqa, chayllam musyakunki pantay religionta hinaspa imapas ruwasqankuta manaña ruway munasqaykimanta. Manam iskayrayawaqchu kusisqa kanaykimantaqa, hinaspa Diospa munasqanman hina yupaychanaykipaq kallpanchakusqaykita Jehova Dios bendecinanmantaqa (Malaquias 3:10).