1, 2) Pre save otazki mušines korkoro te odphenel a soske ada hin dvoležito?

IMAR džanes, hoj but manuša, so paťan le Devles, na džanen pal leste čačipen, abo keren oda, so o Del narado dikhel. (2. Korinťanom 6:17) O Jehovas prikazinel, kaj te džas avri andal o „Baro Babilon“, čiže andal o falošno naboženstvo. (Zjavenie 18:2, 4) So tu? Phuč tutar: „Kamav te služinel le Devleske avka, sar ov kamel? Abo leske služinava avka sar dži akana?“

² Te imar omukhľal, abo tut diňal te vipisinel andal o falošno naboženstvo, mište kerďal. Možno hin tuke phares te odsikhľol le zvikendar andal o falošno naboženstvo. Furt rado dikhes inepi (svjatki), so hine leha spojimen. Save zviki? Save svjatki? So pal ada phenel o Jehovas? Odphenela tuke adi kapitola.

3) (a) Soske šaj el varekaske phares te preačhel te použinel sochi, obrazi, abo križi, sar pes modľinel ko Del? (b) So pal ada phenel e Biblija?

³ But manušen hin andro khera sochi, obrazi, križi, abo oltara, kaj pes angle lende te modľinen. A keren ada but berša. Te ada kerehas the tu, asi hin tuke phares te modľinel pes bije ala veci. Ale ko amenge nekfeder phenela, sar pes te modľinel? O Del! E Biblija phenel, hoj o Jehovas na kamel,  kaj amen te el sochi, obrazi, abo križi, sar pes modľinas. (Pregen 2. Mojžišova 20:4, 5; Žalm 115:4–8; Izaiáš 42:8; 1. Jána 5:21.)

4) (a) Šaj mule andal amari fameľija šunen avri amare modlitbi, abo amen chraňinen? (b) Soske o Jehovas phenďa peskere ľudoske, kaj te na skušinen te del duma le mulenca?

⁴ Vareko paťal, hoj pal o meriben mulo papus, muľi baba, abo muľi daj dad šaj furt radisaľon, abo en smutna. Kamel, kaj leskere mulenge, te el mište. Vareko paťal, hoj o mule šunen avri o modlitbi a chraňinen amen. E Biblija phenel, hoj o mule, našťi keren ňič, našťi aven ke amende, našťi den duma amenca. Te vakero zadžiďiľa, hoj leha vakerelas o mulo, čačipen hin, hoj ajse veci hine le demonendar. Vašoda o Del prikazinďa le Izraelčanenge, kaj te na den duma le mulenca, aňi te na kerel vareso, so suvisinel le duchenca, olenca, so vešťinen, abo bosorakenca. (5. Mojžišova 18:10–12; Dikh o poznamki 26 the 31.)

5) So tuke pomožinela, kaj te odsikhľos ale zvikendar?

⁵ Sar šaj odsikhľos ale zvikendar? Gen e Biblija a premišľin uprimňe pal oda, sar o Jehovas dikhel pre ala veci. Andre leskere jakha hin ada „džungaľipen“ (phujipen), čiže vareso odporno. (5. Mojžišova 27:15) Modľin tut ko Jehovas sako ďives, kaj tuke te pomožinel te dikhel pro veci avka, sar ov dikhel a te služinel leske avka, sar ov kamel. (Izaiáš 55:9) Šaj paťas, hoj o Jehovas tut dela zor te odčhivel tire dživipnastar savoro, so hin spojimen le falošne naboženstvoha.

6) Soske pes oslavinel le Ježišoskero naroďeňe 25 decembra?

⁶ Pal calo svetos e karačoňa rado keren but manuša. Varesave peske mišľinen, hoj o Ježiš pes akor naroďinďa. Ale e karačoňa hiňi spojimen le falošne naboženstvoha. Jekh enciklopedija phenel, hoj o rimska  pohana paťanas, hoj pes 25 decembra naroďinďa o kham. O rašaja the pastora kamenas, kaj pes le pohanendar te ačhen tiš kresťana. Džanenas, hoj pes o Ježiš na naroďinďa 25 decembra, ale kaj te pricirden le pohanen andre khangeri, rozhodňinde, hoj pes oslavinela Ježišoskero uľipen (naroďeňe) oda isto ďives. (Lukáš 2:8–12) Le Ježišoskere učeňika na kerenas karačoňa. Jekh kňižka pal o naboženska zviki phenel, hoj imar 200 berš pal oda, sar pes o Ježiš naroďinďa, „ňiko na džanelas, kana pes o Ježiš presňe naroďinďa a but manušenge oda sas jekh“. (Sacred Origins of Profound Things) E karačoňa pes chudňa te kerel až stovki berša pal ada, sar o Ježiš dživelas pre phuv.

7) Soske o prava kresťana na keren karačoňa?

⁷ But manuša džanen, hoj karačoňa the tradiciji (zviki), so suvisinel la karačoňaha aven avri le pohanske inependar (svjatkendar). Napriklad, te kerel oda ďives oslavi a te rozdavkerel oda ďives darčeki. Andre Anglicko the varekhaj andre Amerika, sas zakazimen te kerel karačoňa, bo la hin pohansko povodos. Sako, ko karačoňa kerelas, sas vaš ada potrestimen. Ale beršenca odoj o manuša chudne te kerel karačoňa pale. Soske o prava kresťana na keren karačoňa? Bo kamen te kerel ča oda, so pes pačinel le Devleske.

8, 9) Soske o perša kresťana na kerenas naroďeňini?

⁸ O naroďeňini hine aver oslava, savi o manuša rado keren. Šaj o kresťana keren o naroďeňini? Andre Biblija hin pisimen ča pal ajse naroďeňini, so oslavinenas o manuša, so na služinenas le Jehovaske.  (1. Mojžišova 40:20; Marek 6:21) O naroďeňini pes oslavinenas, kaj te presikaven paťiv le falošne devlenge. O perša kresťana pre ada dikhenas sar pro pohansko zvikos. (The World Book Encyclopedia.)

⁹ Andre phurikaňi doba o Greka the o Rimana paťanas, hoj paš dojekh porodos sas pritomno jekh duchos a sar pes naroďinel o čhavoro, oda duchos les chraňinela calo dživipen. „Ada duchos sas spojimen le pohanske devleha, saves sas naroďeňini andre oda isto ďives, sar ole čhavores.“ (The Lore of Birthdays)

10) Soske o kresťana andre amari doba našťi keren o naroďeňini?

¹⁰ So phenes, pačinel pes le Jehovaske, sar pes kerel vareso, so hin spojimen le falošne naboženstvoha? (Izaiáš 65:11, 12) Na! Vašoda na keras o naroďeňini, abo aver inepos (svjatkos), so avel avri andal o falošno naboženstvo.

11) Soske varesave manuša keren karačoňa, abo aver svjatki? Sar sikavaha, hoj le Devles igen rado dikhas?

¹¹ Varesave manuša džanen, hoj karačoňa, abo aver svjatki hine le pohanendar, ale the avka len furt keren. Phenen, hoj pes ala svjatki lenge pačinen a hoj hine rado akor peskera fameľijaha. A so tu? Nane ňič nalačho pre ada, hoj kamas te el peskera fameľijaha. O Jehovas stvorinďa la fameľija a kamel, kaj pes savore rado te dikhas. (Efezanom 3:14, 15) Ale ajse inepi (svjatki) našťi keras. Možno amara fameľijake ela pharo, ale o Jehovas radisaľola, bo dikhela, hoj na kamas te kerel ňič, so suvisinel falošne naboženstvoha, bo le Devles igen rado dikhas. O apoštol Pavol phenďa: „Furt roden oda, so pes pačinel le Rajeske.“ (Efezanom 5:10)

12) Save oslavi pes na pačinen le Jehovaske?

¹² But manuša phenen, hoj hin jekh,  khatar avle o inepi (svjatki). Le Jehovaske ada nane jekh. Leske pes na pačinen o svjatki andal o falošno naboženstvo, aňi oslavi, paš save presikaven devleskeri paťiv aver manušenge, štatna vlajkake, abo himnake. Napriklad, o Egipťana rado kerenas hosťini, paš save oslavinenas peskere falošne devlen. Sar o Izraelčana gele avri andal o Egipt, napodobňinde jekh le pohanske oslavendar a vičinenas les „hosťina le Jehovaske.“ Ale o Jehovas len vaš ada potrestinďa. (2. Mojžišova 32:2–10) O prorokos Izajaš phenďa: „Ma chuden tumen ňisostar, so hino ňečisto!“ (Pregen Izaiáš 52:11.)

13) Save otazki tut možno ela, te tut rozhodňineha te na kerel o svjatki?

¹³ Te preačheha te kerel o inepi (svjatki), možno tuke avena pre goďi varesave otazki. Napriklad: So kerava, te mandar andre buťi phučena, soske lenca na kerav karačoňa? So kerava, te man vareko dela pre karačoňa darčekos? So kerava, te miri romňi, miro rom kamela, kaj te slavinav varesovo svjatkos? Sar šaj pomožinav mire čhavenge, kaj te na en smutna, hoj na keras karačoňa, abo naroďeňini?

14, 15) So šaj keres, te tuke vareko vinšinel bacht sasťipen (zdravje) pre kračoňa, abo tut kamel te del darčekos?

¹⁴ Kampel, kaj te aves pripravimen pre ala otazki te odphenel a kaj goďaha te džanes, so te kerel. Te tuke vinšinen bacht sasťipen (zdravje) pre karačoňa, na mušines  tut lendar te odcirdel. Šaj phenes šukares: „Paľikerav.“ Te vareko kamel pes te dodžanel buter, šaj leske ada višvetľines. Furt av jileskero, lačho a presikav paťiv avrenge. E Biblija phenel: „Tumaro vakeriben (tumari duma) mi el lačho, sar... chaben le loneha.“ (Kolosanom 4:6 NZ) Šaj lenge phenes, hoj tu sal rado avrenca a rado des darčeki, ale hoj ada keres akor, sar tu kames, na akor, sar hin karačoňa, abo aver svjatki.

¹⁵ So kereha, te vareko kamela te del tut darčekos? Prileha ada darčekos, abo na? Dvoležito hin, so phenel tiro svedomje. (1. Timotejovi 1:18, 19) Možno oda manuš na džanel, hoj ada na oslavines. Abo tuke šaj phenel: „Me džanav, hoj ada na oslavines, ale the avka tuke ada kamav te del.“ Zaležinel pre tute. Ale rozhodňin tut avka, kaj tut paľis te el lačho svedomje. Na kamas te kerel ňič, sostar amen uľahas (avľahas) nalačho svedomje anglo Jehovas.

16) So šaj keres, te tiri fameľija kamel te slavinel vareso, so tu na keres?

¹⁶ So kereha, te tiri fameľija kamela te slavinel vareso, so tut na keres? Ma vesekedin (halasin, doker) tut lenca. Hin len pravo te rozhodňinel pes, so kerena. Ma av choľamen. Ma braňin lenge. Tiš na kames, kaj on tuke te braňinen. (Pregen Matúš 7:12.) Ale, so kereha, te kamena, kaj akor te aves lenca? Modľin tut ko Jehovas, kaj tuke te pomožinel te kerel lačho rozhodnuťje. Zvažin, savo svjatkos ada hin a so tutar užarena, hoj kereha. Rode biblicka radi. Ma ker ňič, sostar uľahas (avľahas) o Jehovas smutno.

17) Sar šaj pomožines tire čhavenge, kaj lenge te na el pharo, sar dikhen, hoj aver manuša oslavinen vareso, so tumen na keren?

 ¹⁷ Sar šaj pomožines tire čhavenge, kaj lenge te na el pharo, hoj na keren o svjatki, save keren aver čhave? Buterval andro berš šaj keres prekal lende vareso, kaj pes te zabavinen. Tiš šaj len des darčekos chockana andro berš. Ale nekfeder darčekos, savo šaj des tire čhaven, hin tiro časos the tiri laska.

18) Soske mušinas te phirel pro kresťanska zhromažďeňa?

¹⁸ Kereha radišagos le Jehovaske, te omukheha o falošno naboženstvo, o zviki the inepi (svjatki), so hin aleha spojimen. Ale so kampel mek te kerel? Služba le Devleske hin tiš oda, te sako kurko phiras pro zhromažďeňa. (Pregen Hebrejom 10:24, 25.) Ala zhromažďeňa amenge kampel, kaj te služinas le Devleske, avka sar ov kamel. (Žalm 22:22; 122:1) Odoj šaj das zor peskere lavenca avren. (Rimanom 1:12)

19) Soske kampel te del duma avrenge pal o biblicko čačipen?

¹⁹ Le Jehovaske služines tiš avka, hoj deha duma avrenge pal oda, so tut sikaďal andal e Biblija. But manušen dukhal o jilo, sar dikhen, savo nalačhipen pes kerel pre phuv. Prindžares ajse manušen? Phen lenge, savo šukar dživipen amen užarel. Phir pro kresťanska zhromažďeňa a vaker avrenge pal o biblicko čačipen a tiro jilo tut imar na cirdela andro falošno naboženstvo, aňi imar na kameha te doľikerel leskere zviki. Aveha bachtalo! O Jehovas tut igen žehňinela, bo leske keres radišagos. (Malachiáš 3:10)