1, 2. Со ваљани секој амендар те пучел пе, хем соске адава тано важно?

ПРОУЧИНДОР и Библија, ту халиљан кај бут мануша со вакерена кај служинена е Девлеске, керена или сикавена буќа со мрзинела о Девел (2. Коринќаните 6:17). Адалеске, о Јехова заповединела аменге те икљова тари ховавни религија „о Баро Вавилон“ (Откровение 18:2, 4). Со ка кере ту? Секој амендар ваљани те биринел со ка керел хем те пучел пе: „Дали мангава те служинав е Девлеске ко начин сар со мангела ов, или те служинав леске сар со служинава леске сине англедер?“

² Ако веќе откажинѓем амен тари ховавни религија, адалеа анѓем шукар одлука. Ама хор ки аменде шај панда иси несаве навике хем адетија тари ховавни религија кола со мангаја те кера лен. Те дикха сар о Јехова дикхела ко несаве таро акала навике хем адетија, хем соске тано важно амен да аѓаар те дикха.

3. а) Соске некаске шај те овел пхаро те на користинел слике кеда обожавинела е Девле? б) Спрема и Библија, дали ваљани те користина слике те обожавина е Девле?

³ Несаве мануша бершенцар користинена сине слике или јавера предметија те обожавинен е Девле. Ако ту да кереа сине адава, тегани шај те овел туке чудно или погрешно те обожавине е Девле бизи ленде. Ама, о Јехова сикавела амен сар ваљани те обожавина ле. И Библија јасно пхенела кај о Јехова на мангела те користина слике кеда обожавинаја ле. (Читин 2. Мојсеева  20:4, 5; Псалм 115:4-8; Исаија 42:8; 1. Јованово 5:21.)

4. а) Соске на ваљани те трудина амен те угодина е муленге? б) Соске о Јехова вакерѓа пле народоске кај на ваљани те пробинен те керен лафи е муленцар?

⁴ Несаве мануша трошинена бут време хем сила џикоте трудинена пе те угодинен адаленге со муле. Ола делинена хајбе башо муло хем керена несаве адетија. Ама, амен сиклилем кај о муле нашти те поможинен аменге или те поврединен амен. Ола на продолжинена те живинен негде јавертхе. Адалеске тано опасно кеда мангаја те кера лафи е муленцар, соске секова гласо со мислинаја кај авела лендар, тано таро демонија. О Јехова заповединѓа е Израелцонге те на пробинен те керен лафи е муленцар или те мешинен пе ко нешто јавер сој поврзимо е демоненцар (5. Мојсеева 18:10-12). (Дикх и 26 фуснота хем 31 фуснота.)

5. Со ка поможинел аменге те на користина слике кеда обожавинаја е Девле, или те на молина амен е муленге?

⁵ Со ка поможинел аменге те на користина слике кеда обожавинаја е Девле, или те на молина амен е муленге? Ваљани те читина и Библија хем те размислина сар дикхела о Јехова ко акала буќа. Олеске тане акала буќа „одвратна“ или гадна (5. Мојсеева 27:15). Ваљани те молина амен е Јеховаске секова диве те поможинел амен те дикха ко буќа сар со дикхела ов хем те обожавина ле ко исправно начин (Исаија 55:9). Шај те ова сигурна кај о Јехова ка дел амен сила те цида таро амаро живото са сој поврзимо е ховавне религијаја.

6. Соске сине биримо те славинел пе е Исусескоро бијандо диве ко 25 декември?

⁶ Ко цело свето, о Божико тано јекх таро најпопуларна празникија хем бут мануша мислинена кај  тегани славинена о бијандо диве е Исусескоро. Ама, акава празнико тано поврзимо е ховавне религијаја. Јекх енциклопедија вакерела кај о римска пагања ко 25 декември славинена сине о бијандо диве е кхамескоро. О пагања тане мануша кола со обожавинена сине бут девела хем и природа. Е црквакере водачија мангена сине повише пагања те овен христијања, адалеске ола одлучинѓе те славинен е Исусескоро бијандо диве ко 25 декември, иако о Исус на бијандило ко адава диве (Лука 2:8-12). Е Исусескере ученикија на славинена сине акава празнико. Ко јекх лил пишинела кај 200 берша пало е Исусескоро бијандипе, „никој на џанља кога точно сине бијамо ов, хем хари манушен интересинела лен сине адава“ (Sacred Origins of Profound Things). О мануша почминѓе те славинен о Божико отприлика 300 берша пало е Исусескоро мерибе.

7. Соске о чачутне христијања на славинена Божико?

⁷ Бут мануша џанена кај о Божико хем о начин сар славинела пе, на пример и забава со керена хем о поклоња со дена, тане паганска. Ки Англија хем ко несаве тхана ки Америка, несаво време сине забранимо те славинел пе о Божико адалеске со сине паганско. Секој со ка славинел, сине казнимо. Ама, пало несаво време, о мануша палем почминѓе те славинен акава празнико. Соске о чачутне христијања на славинена Божико? Адалеске со мангена ко са те керен е Девлескири волја.

8, 9. Соске о прва христијања на славинена сине пумаро бијандо диве?

⁸ Јавер бути со славинена о мануша тане ленгоро бијандо диве. Ваљани ли о христијања те славинен о бијандо диве? Ки Библија иси само дуј извештаија башо  мануша со славинѓе пумаро бијандо диве. Солдуј на служинена сине е Јеховаске (1. Мојсеева 40:20; Марко 6:21). О мануша славинена сине пумаро бијандо диве те шај те ден чест е ховавне девленге. Адалеске о прва христијања „ко славибе о бијандо диве дикхена сине сар паганско обичај“ (The World Book Encyclopedia).

⁹ Ко пурано време, о Римјања хем о Гркија верујнена сине кај јекх духо тано присутно кеда бијанѓовела несаво мануш, хем кај адава духо заштитинела ле цело лескоро живото. А адава духо тано поврзимо е девлеа сој тано бијамо ко исто диве. Адала со на сине христијања славинена сине пумаро бијандо диве соске мислинена сине кај ако керена адава, ленгере девела ка заштитинен лен.

10. Соске амен на славинаја амаро бијандо диве?

¹⁰ Со мислинеа, дали о Јехова одобринела те славина нешто сој поврзимо е ховавне религијаја? (Исаија 65:11, 12). На, на одобринела. Адалеске амен на славинаја амаро бијандо диве или јавера празникија сој поврзиме е ховавне религијаја.

11. Соске несаве мануша славинена о празникија? Со ваљани те овел аменге најважно?

¹¹ Несаве мануша џанена кај о Божико хем јавера празникија тане паганска, ама палем славинена лен. Ола мислинена кај о празникија тане шукар прилика те овен заедно пле фамилијаја. Дали ту да аѓаар мислинеа? Шукар тано те манге те накхаве време ленцар. О Јехова керѓа и фамилија, хем ов мангела шукар те накха амаре фамилијаја (Ефешаните 3:14, 15). Ама, аменге најважно ваљани те овел те кера е Јеховаскири волја, а на те угодина амаре фамилијаке аѓаар со ка  славина празникија сој поврзиме е ховавне религијаја. О апостол Павле вакерѓа: „Испитинен сој тано прифатливо е Господареске“ (Ефешаните 5:10).

12. Саве празникија на мангела о Јехова?

¹² Буте манушенге нане важно котар авена о празникија, ама о Јехова на мислинела аѓаар. Ов на мангела о празникија сој тане тари ховавни религија или празникија коте со обожавинена пе мануша или национална симболија. На пример, о Египќања славинена сине бут празникија башо пле ховавне девела. Кеда о Израелција иклиле таро Египет, ола леле јекх таро ленгере паганска празникија хем чхивѓе леске анав „празнико башо Јехова“. Ама, о Јехова казнинѓа лен башо адава (2. Мојсеева 32:2-10). Сар со вакерѓа о пророко о Исаија, амен на ваљани „те пипина ништо сој мелало!“ (Читин Исаија 52:11.)

13. Со шај те пуче тут, кеда ка одлучине те на славине празникија?

¹³ Кеда ка одлучине те на славине празникија, шај ка пуче тут несаве буќа. Сар на пример: „Со те керав ако некој таро мле колеге пучена ман соске на славинава ленцар несаво празнико? Со ваљани те керав кеда некој дела ман поклон башо несаво празнико? Со те керав ако мло брачно партнери мангела те славинав леа о празнико? Сар те поможинав мле чхавенге те на овен тажна адалеске со на славинаја несаво празнико или ленгоро бијандо диве?“

14, 15. Со шај те кере кеда некој бахтакерела туке о празнико или дела тут поклон?

¹⁴ Бут тано важно мудро те постапине хем љубезно те кере лафи ки било сави ситуација. На пример, кеда о мануша ка бахтакерен туке о празнико, на ваљани те избегине лен. Шај те вакере ленге: „Овен састе“. Ама, ако мангља некој те џанел соске на славинеа, тегани  шај те објаснине леске. Секогаш ов љубезно, тактично хем сикав поштовање. И Библија вакерела: „Сар о лон со керела о хајбе вкусно, аѓаар тумаро лафи секогаш те овел љубезно те шај те овел пријатно е јаверенге, те џанен секаске те одговоринен сар со ваљани“ (Колошаните 4:6). Шај те вакере леске кај ту мангеа те дружине тут хем те де поклон некаске ама адава на мангеа те кере кеда иси празникија.

¹⁵ Со ваљани те кере ако некој дела тут поклон? Ки Библија нане списако коте со иси правилија со те кера ки секоја ситуација, него ој вакерела аменге кај ваљани те овел амен чисто совест (1. Тимотеј 1:18, 19). Шај адава со дела тут поклон на џанела кај ту на славинеа о празнико. Или шај те вакерел туке: „Џанава кај на славинеа о празнико, ама мангава те дав тут акава поклон“. Ко солдуј ситуацие, ту ваљани те одлучине дали ка ле о поклон или на. Било сави одлука те ане, ваљани те овел тут чисто совест пало адава. На мангаја те кера нешто со ка руминел амаро амалипе е Јеховаја.

16. Со ваљани те кере кеда тли фамилија мангела те славинел празнико?

¹⁶ Со ваљани те кере кеда тли фамилија мангела те славинел празнико? На ваљани те акоше тут ленцар. Ма бистре, лен иси лен право те одлучинен со ка керен. Ов љубезно хем сикав кај поштујнеа ленгере одлуке, исто сар со мангеа ола те поштујнен тле. (Читин Матеј 7:12.) Со ваљани те кере ако тли фамилија мангела те ове ленцар кеда керена о празнико? Англедер те одлучине со ка кере, молин тут е Јеховаске те поможинел тут те ане исправно одлука. Размислин баши ситуација, роде советија ки Библија хем ко библиска публикацие. Ма бистре, најважно тано те кера адава со мангела о Јехова.

17. Сар шај те поможине тле чхавенге те на осетинен пе кај пропуштинена нешто адалеске со на славинена празникија?

 ¹⁷ Сар шај те поможине тле чхавенге те на осетинен пе кај пропуштинена нешто адалеске со на славинена празникија? Понекогаш, шај те организирине нешто посебно ленге. Исто аѓаар, шај те кине ленге поклон. Хем јекх таро најшукар поклонија со шај те де е чхавенге тано те накхаве време ленцар хем те сикаве ленге кај мангеа лен.

18. Соске ваљани те џа ко состанокија?

¹⁸ Ако мангаја те кера е Девлескири волја, ваљани те икљова тари ховавни религија хем те на кера о празникија хем о адетија сој поврзиме лаја. Исто аѓаар, ваљани те служина е Девлеске ко исправно начин. Сар шај те кера адава? Јекх бути со ваљани те кера тани те џа ко состанокија со икерена е Јеховаскере сведокија. (Читин Евреите 10:24, 25.) О состанокија тане бут важна ако мангаја те служина е Девлеске ко исправно начин (Псалм 22:22; 122:1). Ки ленде шај те охрабрина амен јекх јекхеа (Римјаните 1:12).

19. Соске тано важно те вакере е јаверенге башо адава со сиклиљан тари Библија?

¹⁹ Исто аѓаар, важно тано те вакера е јаверенге адава со сиклилем тари Библија, соске аѓаар служинаја е Девлеске ко исправно начин. Буте манушенге тано пхаро кеда дикхена о лошна буќа со овена ко свето. Шај пенџареа некас со осетинела пе аѓаар. Вакер леске башо шукар буќа со ка овен ки иднина. Кеда џаја ко состанокија хем кеда вакереа е јаверенге баши Библија, ка дикхе кај нане те манге повише те ове ки ховави религија хем те кере лакере адетија. Тегани сигурно ка ове бахтало хем о Јехова ка поможинел тут џикоте трудинеа ту те служине леске ко исправно начин (Малахија 3:10).