1–2. Pe sosko pushajipe te gindistu? Sostar trubul kado?

KANA sityilan e Biblia, shaj dikhlan, ke butzhene, kon kodo phenen ke patyivin le Devles, kasave butya keren, thaj sityaren, pe soste xojajvel o Del (2Korintus 6:17). Anda kado phenel o Jehova, te mukhas o xoxamno patyaimo, thaj te zhas avri andar o Baro Babilono (Sikadyimaski 18:2, 4). So keresa? Sakono shaj gindil perdal, so te kerel. Gindin perdal: kade kames te patyivis le Devles, sar voj kamel, vaj kade, sar akanak patyivis les?

² Kodo mishtoj, te mukhlan aba, vaj avri avilan andar o xoxamno patyaimo. De shajke si kasave tradicija ando xoxamno patyaimo, so inke ande tyo jilo si. Vorbinas pe kadala, thaj dikhas, sostar trubul kade te dikhas len, sar o Jehova.

3. a) Sostar si pharo unyizhenenge, te na patyivinen le kipura thaj le xoxamne devlen? b) So phenel e Biblia pa le xoxamne dela?

³ Butzhene aba dulmut rudyinen kaj le kipura vaj kaj le xoxamne dela, thaj si len khere jekh sunto than, kaj so rudyinen. Kana vi tu kade keres, shajke chi fajil tuke, te mukhes kadal, te kames te patyivis le Devles. De te na bistres, ke o Jehova sityarel amenge, sar te patyivinas les. E Biblia uzhes phenel, ke o Jehova chi mukhel, le xoxamne devlen te patyivinas (ginav:  2Mozesh 20:4, 5; Asharimata 115:4–8; Izaiash 42:8; 1Janosh 5:21).

4. a) Sostar te na patyivinas amare mulen? b) Sostar phendas o Jehova peske niposke, te na vorbin le mulenca?

⁴ Ande bute thema inkren jekh baro dyes le mulenge. Si manusha, kon but vrama thaj zor bolden pe kodo, lasho te keren penge mulenge. Shajke kasavi patyiv den len, sar le Devles. De aba vorbindam pe kodo, ke le mule chi zhanen chi te zhutin, thaj chi te azban. Chi trajin kaver thaneste. Thaj sama trubul te las, te na vorbinas le mulenca. Shajke kade dichol, ke von vorbin, de le demonura aven ande lengo than. Anda kado phendas o Jehova le biboldenge, te na zumaven te vorbin le mulenca, thaj te na keren khanchi demonizmushi (5Mozesh 18:10–12; dikh: Informaciovo 26, Demonizmushi (spiritizmushi) thaj Informaciovo 31, Demonura).

5. So shaj zhutil tut ande kodo, te na bandyos tele angla le kipura, angla le xoxamne dela, thaj angla tyire mule?

⁵ So shaj zhutil ande kodo, te na patyivis kipon, xoxmne devlen, thaj tyire mulen? Ginav e Biblia, thaj gindintu pe kodo, sar dikhel o Jehova kadala butya. Gracolpe kathar kadal (5Mozesh 27:15). Sako dyes mang le Jehovas, te zhutil tut kade te dikhes kadala butya, sar voj, thaj kade te patyivis les, sar voj kamel (Izaiash 55:9). Shaj patyas, ke del tut pashe zor, te zhanes te mukhes sakofelo, so kathar o xoxamno patyamo si.

6. Sostar po decemberi 25 inkren le Jezushesko rakhadyimo?

⁶ O krechuno jekh baro dyes si mashkar le manusha, pe intrego luma. But manusha kodo gindinen, pe kado  dyes rakhadyilas o Jezush. De o chachimo kodoj, ke o krechuno andar o xoxamno patyaimo avel. Jekh enciklopedia kodo phenel, ke po decemberi 25 le bidevlenge romaicka kodo dyes inkerde, ke kerdyilas o kham. Le rashaja kodo kamenas, majbut manusha te aven kristianura mashkar le bidevlenge manusha. Anda kadi avri rakhle po decemberi 25, ke atunchi kerdyilas o Jezush, te shaj inkren o baro dyes. De o Jezush na atunchi kerdyilas (Lukach 2:8–12). Le Jezusheske sityarde chi inkerde o krechuno. Jekh ginadyi kodo phenel, ke pala le Jezushesko meripo 200 bershenca, „khonyik chi zhanelas uzhes, kana kerdyilas o Jezush, thaj cerra manusha gindinaspe pe kado” (Sacred Origins of Profound Things). O krechuno but shela bershenca pala kodo inkerde, pala soste o Jezush pe phuv sas.

7. Sostar chi inkren o krechuno le chache kristianura?

⁷ Butzhene zhanen, ke o krechuno, thaj so atunchi keren, sar voja keren, den variso jekhaveres, kadal dulmut le bidevlikane manusha kerenas. Ande Anglia thaj ande Amerika sas thana, kaj chi mukhenas te inkren o krechuno, ke bidevlikanoj. Krisi shinde pe kodo, kon inkrelas les. De na butara pale inkerde o krechuno. Sostar chi inkren o krechuno le chache kristianura? Ke kodo kamen, ke sakofelo so keren, lossh te anel le Devleske.

8–9. Sostar chi inkerde le anglune kristianura le rakhadyimasko dyes?

⁸ Jekh kaver dyes, so butzhene kamen, le rakhadyimasko dyes si. Inkren les le kristianura? Ande Biblia feri kasave manusha inkerde pengo rakhadyimasko  dyes, kon chi kamenas le Jehovas (1Mozesh 40:20; Marko 6:21). Le rakhadyimaske dyesa le xoxamne devlenge inkrenas. Ande kado sas, ke le anglune kristianura „te inkren varikasko rakhadyimasko dyes, kade dikhle, sar bidevleski butyi” (The World Book Encyclopedia).

⁹ Le dulmutane romaicka, thaj gricka kodo patyande, ke kana rakhadyol jekh manush, kothe si jekh duxo, kon sama lel pe leste pe lesko intrego trajo. Jekh ginadyi kado iskiril: „Kado duxo kethane sas kodole devlesa, pe kasko dyes o manush rakhadyilas” (The Lore of Birthdays).

10. Sostar chi inkren akanak le kristianura le rakhadyimasko dyes?

¹⁰ Sar gindis, o Jehova kamel jekh baro dyes, kana andar o xoxamno patyaimo avel? (Izaiash 65:11, 12). Nichi, nashtig. Ande kado chi inkras le rakhadyimasko dyes, thaj khanchi baro dyes, so andar o xoxamno patyaimo avel.

11. Sostar chi inkren unyizhene le bare dyesa? So trubul o angluno t’avel ando amaro trajo?

¹¹ Si kasave, kon zhanen, ke o krechuno, thaj kaver bare dyesa andar le bidevlikane butya aven, de inke inkren len. Kade gindin, ke le bare dyesa lashej pe kodo, kethane t’aven penga familijasa. Vi tu kade gindis? Khanchi nasul naj ande kodo, kethane te kamas t’avas amara familijasa. O Jehova kerdas la familija, thaj kodo kamel, ke zurales te inkren kethane (Efezush 3:14, 15). De majangluno trubul t’avel, so o Jehova kamel, sar amare niposa te inkras jekh xoxamno baro  dyes. Ande kado phendas o Pal: „Te na tordyon tele pe kodo, te roden so fajil le Rajeske” (Efezush 5:10).

12. Sostar si chi fajil jekh baro dyes le Jehovaske?

¹² Butzhene kade gindin, sajekh si kathar avel jekh baro dyes. O Jehova na kade gindil. Chi fajin leske kasave bare dyesa, save andar o xoxamno patyamo aven, vaj manushen, thaj niponge simbolumura patyivin. Le edyiptomicka but bare dyesa inkrenas penge xoxamne devlenge. Pala kodo, kana le izraeliti avri avile andar o Edyiptomo, vi von inkerde le bidevlikano baro dyes, thaj le Jehovaske dyeseske phenenas les. De o Jehova krisi shindas pe lende ande kado (2Mozesh 32:2–10). Kado phendas vi o Izaiash: „kaj khanchi biuzho te na unzon!” (Ginav: Izaiash 52:11!)

13. Soske pushajipe shaj aven opre ande tute, kana kade gindis, ke chi inkres majbut le bare dyesa?

¹³ Kade te gindis, ke aba chi inkres le bare dyesa, shajke but pushajipe aven opre ande tute. „So avla, te pushena kodol kasa butyi kerav, ke sostar chi inkrav lenca o krechuno? So te kerav, kana varikon del man variso po krechuno? So avla atunchi, kana muro rom vaj muri romnyi kodo zhukarel mandar, te inkrav jekh baro dyes? Sar zhanos te zhutinav mure shavorenge, te na aven brigake, anda kodo ke chi inkras jekh baro dyes, thaj lengo rakhadyimasko dyes?”

14–15. So shaj keres, kana „baxtalo krechuno” phenen tuke, vaj varikon del tu variso po krechuno?

¹⁴ Godyi trubul pasha kodo, te zhanas so te keras, vaj so te phenas, kana pe bare dyesa si vorba. Phenas varikon „baxtalo krechuno” phenel tuke, chi trubul kashuko  kan te keres. Shaj najisares. De kana varikon kamel te shunel tut, kade shaj gindis, ke phenes leske, sostar chi inkres kodo baro dyes. Av karing lende drago, thaj patyivales vorbin. E Biblia kado phenel: „Tumare vorbi lashe, londyarde te aven, te zhanen kaske sar trubul vorba te den” (Kolosse 4:6). Shaj phenes, ke losshas kana kethane san kaverenca, thaj des len variso, de na pe kado baro dyes kames kado te keres.

¹⁵ So te keres, kana den tut variso po krechuno? E Biblia chi iskiril tele, so shaj keres, vaj so na. De pe kodo vorbil, te las sama, uzho te ashel amaro jilo (1Timoteus 1:18, 19). Shajke kodo, kon del tut variso, chi zhanel, ke chi inkres kodo baro dyes. Shajke kado phenel: „Zhanav ke chi inkres kado baro dyes, de mangav tut, le mandar kado!” Kana kasavo si, gindin perdal, ke les lestar variso, vaj nichi. De pe kodo le sama, uzho te ashel tyo jilo. Khanchi chi kamas te keras, sosa azbasas le Jehovas.

16. So te keres, kana tyi familija kamel te inkrel jekh baro dyes?

¹⁶ So te keres, kana tyi familija kamel te inkrel jekh baro dyes? Chi trubul te xastu lenca. Na bister, shaj keren so kamen. Av drago, thaj patyivin kodo, so kamen te keren, sar vi tu kodo kamesas, te patyivinas so tu kames te keres. (Ginav: Mate 7:12!) Thaj so si atunchi, kana tyi familija kodo kamel, t’aven kethane po baro dyes? Angla soste keres variso, rudyin karing o Jehova, thaj mangles, te zhutil mishto te gindistu. Gindin perdal, so gindil o Del, thaj rode ande publikaciovura. Kodo t’avel angla tye jakha, ke mindig lossh te anes le Jehovaske!

17. Sar shaj zhutis tye shavorenge, kana dikhen, ke kavera inkren le bare dyesa?

 ¹⁷ Sar shaj zhutis tye shavorenge, te na hatyarenpe nasules, kana dikhen, ke kavera inkren le bare dyesa? Butivar shaj keres lenge variso, vaj shaj ingres len varikaj, kaj mishto hatyarenpe. Shaj kines lenge variso, kana chi zhukaren. O majbaro pale kodoj lenge, kana vrama boldes pe lende, thaj but kamipe des len.

18. Sostar t’avas kothe pa le kristianicka programura?

¹⁸ Te kamas lossh te anas le Jehovaske, trubul te mukhas o xoxamno patyaimo, leske tradicija thaj leske bare dyesa. Thaj kade trubul te patyivinas le Jehovas, sar voj kamel. Sar shaj keras kado? Kade, ke kothe sam pa le kristianicka programura. (Ginav: Heberenge 10:24, 25!) Le programura trubun pasha kodo, chachikanes te patyivinas le Devles (Asharimata 22:22; 122:1). Kana maladyuvas jekhavresa, zuraras jekhavres (Roma 1:12).

19. Sostar trubul te phenes kaverenge, so sityilan andar e Biblia?

¹⁹ Te kamas chachikanes te patyivinas le Devles, vi kodo trubul, te vorbinas kaverenge pa kodo, so sityilam andar e Biblia. Butzhene nasules hatyarenpe, kana dikhen, soski nasul si e luma. Shajke vi tu pinzhares kasave manushen. Vorbin lenge pe kodo, soski shukar luma zhukares. Kana kothe san pe le programura, thaj vorbis kaverenge, ke so sityarel e Biblia, kodo lesa sama, ke aba chi kames pasha xoxamno patyaimo te ashes. Thaj chi kames te inkres leski tradicija. Shaj patyas, ke vojako avesa, thaj o Jehova but aldashi dela tut, t’avel tut zor, chachikanes te shaj patyivis les! (Malakiash 3:10).