1, 2. Ngumuphi umbuto lokufanele utibute wona futsi kubaluleke ngani?

USACHUBEKA nekudadisha liBhayibheli, kungenteka unakile kutsi bantfu labanyenti labatsi bakhonta Nkulunkulu bafundzisa baphindze bente tintfo Nkulunkulu latenyanyako. (2 Khorinte 6:17) Kungako Jehova asitjela kutsi siphume enkholweni yemanga, ‘iBhabhulona Lenkhulu.’ (Sembulo 18:2, 4) Utawukhetsa kwenta njani wena? Sonkhe kufanele sikhetse futsi kudzingeka sitibute, ‘Ngiyafuna yini kukhonta Nkulunkulu ngendlela lafuna ngimkhonte ngayo noma ngifuna kuchubeka ngendlela lebengisolo ngimkhonta ngayo?’

² Nangabe sewuyishiyile inkholo yemanga nome sewuvalelisile esontfweni, wente kahle kakhulu. Kodvwa kungenteka kutsi kusenemasiko nemikhuba leyentiwa yinkholo yemanga losayitsandza. Ase sicoce ngaleminye yalemikhuba, sibone kutsi kubaluleke ngani kutsi siyitsatse ngendlela Jehova layitsatsa ngayo.

3. (a) Yini lengenta labanye bakutfole kumatima kukhonta Nkulunkulu bangasasebentisi titfombe? (b) Litsini liBhayibheli ngekukhonta Nkulunkulu sisebentisa titfombe?

³ Sekuphele iminyaka leminyenti bantfu basebentisa titfombe nobe tithico nabakhonta Nkulunkulu emakhaya abo. Nangabe bewutisebentisa kungahle kube lukhuni kukhonta Nkulunkulu ngephandle kwato. Kodvwa khumbula kutsi Jehova nguye losifundzisa indlela yekumkhonta. LiBhayibheli likwenta kucace kutsi Jehova akafuni simkhonte  sisebentisa titfombe.​—Fundza Eksodusi 20:4, 5; Tihlabelelo 115:4-8; Isaya 42:8; 1 Johane 5:21.

4. (a) Yini lesenta singawakhonti emadloti? (b) Yini leyenta Jehova watjela bantfu bakhe kutsi bangetami kukhuluma nebantfu labafile?

⁴ Labanye bantfu bacitsa emandla abo nesikhatsi lesinyenti betama kujabulisa emadloti. Ngalesinye sikhatsi baze bawakhonte. Kodvwa-ke sesifundzile kutsi bantfu labafile ngeke basilimate nobe basisite. Abaphili kulenye indzawo. Ecinisweni, kuyingoti kakhulu kwetama kuchumana nabo ngobe noma ngumuphi umlayeto lesicabanga kutsi uchamuka esihlotjeni lesifile usuke ubuya emadimonini. Nguleso sizatfu lesenta Jehova watjela ema-Israyeli kutsi angakhulumi nebantfu labafile nobe etame kwenta nobe ngumuphi umkhuba lohambisana nebudimoni.​—Dutheronomi 18:10-12; Fundza liphuzu 26 na-31 ngephasi kwesihloko lesitsi Imininingwane Lesekugcineni.

5. Yini lengakusita kutsi ungatisebentisi titfombe nawukhonta Nkulunkulu futsi uyekele kukhonta emadloti?

⁵ Yini lengakusita kutsi uyekele kusebentisa titfombe nawukhonta Nkulunkulu nobe kutsi uyekele kukhonta emadloti? Kufanele ufundze liBhayibheli bese uyacabangisisa ngembono waJehova ngaleto tintfo. Utsi tiyenyanyeka nobe ‘tisinengiso’ kuye. (Dutheronomi 27:15) Thantaza kuJehova onkhe malanga umcele akusite ube nemcondvo lofana newakhe ngaletintfo uphindze umcele akusite umkhonte ngendlela lafuna kukhontwa ngayo. (Isaya 55:9) Ungaciniseka kutsi Jehova utakunika emandla ekulahla nome ngumuphi umkhuba wenkholo yemanga.

6. Yini leyenta December 25 wakhetfwa kutsi abe lilanga lekugubha kutalwa kwaJesu?

⁶ Liholidi laKhisimusi latiwa kakhulu emhlabeni wonkhe, futsi bantfu labanyenti bagubha Khisimusi batitjela  kutsi lilanga Jesu latalwa ngalo. Liciniso likutsi Khisimusi uhambisana nekukhonta kwemanga. Lenye incwadzi iveta kutsi ngaDecember 25 emaRoma labekangamkhonti Nkulunkulu abegubha kutalwa kwelilanga. Baholi benkholo labanyenti bebafuna kutsi bantfu labangamkhonti Nkulunkulu babe ngemaKhristu. Ngako bakhetsa kutsi ngaDecember 25 kugujwe lilanga lekutalwa kwaJesu ngisho nobe lelo kungasilo lilanga latalwa ngalo. (Lukha 2:8-12) Bafundzi baJesu abazange bamgubhe Khisimusi. Incwadzi letsi Sacred Origins of Profound Things ichaza kutsi ngemuva kweminyaka lengu-200 Jesu atelwe, “kute bekati kutsi watalwa nini, futsi bancane kakhulu bantfu lebebanendzaba nako.” Kugubha Khisimusi kwacala ngemuva kwemakhulu lamanyenti eminyaka Jesu abuyele ezulwini.

7. Yini leyenta emaKhristu eliciniso angamgubhi Khisimusi?

⁷ Bantfu labanyenti bayati kutsi Khisimusi usukela emikhubeni yebantfu lebebangamkhonti Nkulunkulu lefaka ekhatsi emaphathi nekuphana tipho. Sibonelo saloko kutsi eNgilandi nakuletinye tindzawo letiseMelika, bantfu bake balelwa kutsi bagubhe Khisimusi ngesizatfu sekutsi usukela kubantfu labangamkhonti Nkulunkulu. Wonkhe umuntfu lobekagubha Khisimusi bekajeziswa. Kepha ngekuhamba kwesikhatsi bantfu baphindze bawugubha. Yini leyenta emaKhristu eliciniso angamgubhi Khisimusi? Kungoba afuna kujabulisa Nkulunkulu kuko konkhe lakwentako.

8, 9. Yini lebeyenta emaKhristu asendvulo angawagubhi emalanga ekutalwa?

⁸ Lomunye umkhosi lowentiwa bantfu labanyenti kugubha lilanga labatalwa ngalo. EmaKhristu kufanele yini aligubhe lilanga latalwa ngalo? Bantfu lokukhulunywa  ngabo eBhayibhelini labagubha lilanga labatalwa ngalo bebangamkhonti Jehova. (Genesisi 40:20; Makho 6:21) Kugujwa kwemalanga ekutalwa bekwentelwa kubonga bonkulunkulu bemanga. EmaKhristu asendvulo “bekatsatsa kugujwa kwelilanga umuntfu latalwa ngalo njengemkhuba webantfu labangamkhonti Nkulunkulu.”​—The World Book Encyclopedia.

⁹ EmaRoma nemaGriki akadzeni bekakholelwa kutsi bekubanemoya lobewuvikela umuntfu kuphila kwakhe konkhe kusukela nakatalwa. Incwadzi letsi The Lore of Birthdays itsi: “Bantfu lebebangemahedeni bebakholelwa kutsi kugubha lusuku lwekutalwa bekutawusita loyo lotelwe kutsi avikelwe bonkulunkulu.”

10. Kungani emaKhristu alamuhla kufanele angawagubhi emalanga ekutalwa?

¹⁰ Ucabanga kutsi Jehova uyayemukela yini imikhosi lesukela enkholweni yemanga? (Isaya 65:11, 12) Cha, akayemukeli. Nguleso sizatfu lesenta singawagubhi emalanga ekutalwa nobe lamanye emaholidi lahlobene nenkholo yemanga.

11. Yini leyenta labanye bantfu bagubhe emaholidi? Yini lokufanele ibaluleke kakhulu kuwe?

¹¹ Labanye bantfu bayati kutsi Khisimusi nalamanye emaholidi asukela kubantfu lebebangamkhonti Nkulunkulu, kepha bayachubeka bawagubha. Bacabanga kutsi emaholidi asikhatsi lesikahle sekutsi basicitse nemindeni yabo. Uwasebentisa kanjalo yini nawe? Kukahle kucitsa sikhatsi unemndeni wakho. Jehova nguye lowasungula umndeni futsi ufuna sibe nebudlelwane lobuhle nawo. (Efesu 3:14, 15) Nanome kunjalo, kufanele sinake kakhulu buhlobo betfu naJehova kunekufuna kujabulisa tihlobo tetfu ngekugubha emaholidi langamjabulisi  lavela enkholweni yemanga. Umphostoli Pawula watsi: “Chubekani niciniseka kutsi yini leyemukelekako eNkhosini.”​—Efesu 5:10.

12. Yini leyenta liholidi lingemukeleki kuJehova?

¹² Bantfu labanyenti abawunaki umsuka wemaholidi, kepha Jehova uyawunaka. Akawemukeli emaholidi lasuka enkholweni yemanga, emaholidi ladvumisa bantfu noma ladvumisa live. Sibonelo saloko kutsi bantfu baseGibhithe bebagubha emaholidi lamanyenti abonkulunkulu bemanga. Ngesikhatsi ema-Israyeli asaphumile eGibhithe, agubha umkhosi lowawufana newebantfu baseGibhithe lebebangamkhonti Nkulunkulu futsi awubita ngekutsi ‘sibhimbi sekudvumisa Simakadze.’ Kodvwa Jehova wawajezisa ngaloko. (Eksodusi 32:2-10) Njengobe umphrofethi Isaya asho, kufanele ‘singatsintsi lutfo lolungcolile.’​—Fundza Isaya 52:11.

13. Ngumiphi imibuto longahle ube nayo nangabe uyekela kugubha emaholidi?

¹³ Ungahle ube nemibuto leminyenti nawukhetsa kuyekela kugubha emaholidi. Naku lokunye longahle utibute kona: Yini lokufanele ngiyente nangabe lengisebenta nabo bangibuta kutsi angiwugubhi ngani Khisimusi? Kufanele ngente njani nangabe bangipha sipho saKhisimusi? Kufanele ngente njani nangabe lengishade naye afuna ngigubhe emaholidi? Ngingabasita njani bantfwabami kutsi bangabuva buhlungu nasingawagubhi emaholidi noma lilanga labatalwa ngalo?

14, 15. Yini longayenta nangabe bakufisela liholidi lelihle noma bakupha sipho?

¹⁴ Kubalulekile kutsi sicabangisise kuze sincume kutsi sitawuphendvula sitsini nobe sitawentanjani esimeni ngasinye lesihlangabetana naso. Sibonelo saloko kutsi, nangabe  bantfu bakufisela lokuhle ngeliholide, kute sizatfu sekungabanaki. Ungase ubaphendvule utsi, “Ngiyabonga.” Kodvwa nangabe umuntfu afisa kwati kabanti kutsi yini lesenta singawagubhi emaholidi, ungamchazela sizatfu saloko. Nanobe kunjalo, ngaso sonkhe sikhatsi bani nemusa, umhloniphe futsi ungamcansuli. LiBhayibheli litsi: “Emavi enu akabe nemusa, futsi avangwe ngeluswayi, kuze niyati indlela yekuphendvula umuntfu ngamunye.” (Kholose 4:6) Ungase uchaze kutsi uyakutsandza kucitsa sikhatsi nalabanye bantfu nekubapha tipho kodvwa loko awutsandzi kukwenta ngoba sesikhatsi semaholidi.

¹⁵ Yini lokufanele uyente nangabe bakupha sipho? LiBhayibheli alisiniki imitsetfo kepha liyasho kutsi kufanele sitigcine sinanembeza lomsulwa. (1 Thimothi 1:18, 19) Kungenteka lomuntfu lokupha lesipho akati kutsi awuwagubhi emaholidi. Noma angase atsi, “Ngiyati kutsi awuwagubhi emaholidi kepha ngicela kukupha naku.” Kuto totimbili letimo ungakhetsa kutsi uyasitsatsa yini lesipho noma awusitsatsi. Kunoma ngabe ngukuphi lokukhetsako, ciniseka kutsi nembeza wakho akakulahli. Asifuni kwenta nobe ngabe yini letawulimata buhlobo betfu naJehova.

16. Yini lokufanele uyente nangabe umndeni wakho ufuna kugubha emaholidi?

¹⁶ Yini lokufanele uyente nangabe umndeni wakho ufuna kugubha liholidi? Ungalwi nawo. Khumbula kutsi banelilungelo lekutikhetsela labafuna kukwenta. Bani nemusa utihloniphe tincumo tabo njengoba nawe ufuna batihloniphe takho. (Fundza Matewu 7:12.) Kodvwa yini lokufanele uyente nangabe umndeni wakho ufuna kugubha leliholide kanye nawe? Usengakakhetsi kutsi utawenta njani, thantaza kuJehova umcele akusite ukhetse kahle.  Cabangisisa uphindze ucwaninge ngako. Ungakhohlwa kutsi ufuna kujabulisa Jehova ngaso sonkhe sikhatsi.

17. Yini longayenta kute usite bantfwabakho bangativa balahlekelwa ngulokutsite nangabe labanye bagubha emaholidi?

¹⁷ Yini longayenta kute usite bantfwana bakho nababona labanye bagubha emaholidi? Akube ngumkhuba wakho kubajabulisa. Kujwayele kubapha tipho bangakagadzi. Sipho lesihle kakhulu longasipha bantfwabakho kutsi ucitse sikhatsi nabo futsi ubatsandze.

18. Kubaluleke ngani kuba khona emihlanganweni yebuKhristu?

¹⁸ Kute sijabulise Jehova, kufanele siyishiye inkholo yemanga netintfo letentiwa kuyo nemaholidi langamjabulisi Nkulunkulu. Kufanele sikhonte Nkulunkulu ngendlela layifunako. Singakwenta njani loko? Ngekutsi sibe khona ngaso sonkhe sikhatsi emihlanganweni yebuKhristu. (Fundza Hebheru 10:24, 25.) Lemihlangano ibaluleke kakhulu ekukhonteni Jehova. (Tihlabelelo 22:22; 122:1) Nasindzawonye siyakhona kukhutsatana.​—Roma 1:12.

19. Kubaluleke ngani kutjela labanye ngemaciniso laseBhayibhelini lowafundzile?

¹⁹ Lokunye lesingakhombisa ngako kutsi sikhetsa kukhonta Nkulunkulu ngendlela layemukelako kutsi sishumayele ngalesesikufundze eBhayibhelini. Tintfo letimbi letenteka emhlabeni tiyabakhatsata bantfu. Kungenteka nawe kukhona lobatiko labakhatsatekile. Batjele ngelitsemba lelihle lonalo ngelikusasa. Nawuchubeka uya emihlanganweni futsi utjela labanye ngemaciniso laseBhayibhelini, kancane kancane sifiso lonaso sekuba senkholweni yemanga nekwenta imikhuba yakhona sitawuphela. Ungangabati kutsi Jehova utakubusisa nawuchubeka wetama kumkhonta ngendlela layemukelako futsi utawujabula kakhulu ngesincumo sakho.​—Malakhi 3:10.