1, 2. Giwudziso muni gi vbwetegago gu hi dzi gira, nigu khu ginani si gu sa lisima?

GIHEVBULONI gyago nya Bhibhiliya, u hevbude gu khuwe vathu nya vangi va gu khavo va ngu khozeya Nungungulu, khu lisine va ngu hevbudza mwendro gu gira silo si vengwago khu Nungungulu. (2 Vakorinto 6:17) Khiso si girago gu Jehovha a hi ruma gu duga khomu nya wukhongeli nya malipha, “Bhabhiloni nya Khongolo.” (Gutuledwa 18:2, 4) Ginani u na girago? Moyo ni moyo wathu na ni gilo nyo hathe, nigu gu vbwetega gu hi dzi wudzisa gu khethu, ‘Ina nyi ngu dzina gu khozeya Nungungulu khu ndziya eyi uye a yi vbwetago, mwendro nyo vbweta gu mu khozeya khu ndziya nyi yi olovedego?’

² Wo ba u dugide omu nya wukhongeli nya malipha, u giride gwadi. Ganiolu si ngu kodzega gu ba monyoni gwago gu tshade mavbanyelo ni sihena nyo khaguri nya wukhongeli nya malipha si ngo gu tsakisago. Hongoleni hi ganeye khu mavbanyelo yoyo ni sihena sakona hi bwe hi wona gu khethu khu ginani si gu sa lisima gu hi si wona khu ndziya eyi Jehovha a si wonago khiyo.

3. a) Khu ginani vambe va si wonago na si gu va garadzeya gu diga gu thumisa sifananiso omu nya wukhozeli? b) Yari khiyo ginani Bhibhiliya khu gu thumisa sifananiso gasi gu khozeya Nungungulu?

³ Khu myaga nya yingi, vambe vathu va ngu thumisa sifananiso mwendro malanga nya guage dzindrangani gwawe gasi gu khozeya Nungungulu. Wo ba u giride nuwe isoso, si nga gira u si wona na sa sa olovelega mwendro na si vivbide gu khozeya Nungungulu nya mba thumisa iso. Ganiolu dundruga gu khuwe, khu Jehovha a hi hevbudzago ndziya nyo mu khozeye khiyo. Nigu Bhibhiliya yo hi embeya nya mba siha gilo gu khiyo Jehovha kha vbweti gu khuye hi thumisa  sifananiso omu nya wukhozeli wathu. — Leri Ekisodha 20:4, 5; Dzindzimo 115:4-8; Isaya 42:8; 1 Johane 5:21.

4. a) Khu ginani gu si vbwetegigo gu hi khozeya dzinguluve? b) Khu ginani Jehovha a embedego vathu vaye gu va si zami gu ganeya ni ava va fudego?

⁴ Vathu nyo khaguri va ngu vbedza tepo nyo laphe ni tshivba na va gu zama gu tsakisa dzinguluve dzawe. Si nga girega na va gu dzi khozeya. Ganiolu, hi hevbude gu khethu ava va fudego kha va kodzi gu hi phasa mwendro gu hi gireya guvivba. Kha va vbanyi wulangawo. Khu lisine, mhango gu zama gu ganeya navo kholu ni yavbi mahungu ma wonegago na mata khu ga nongo a fudego ma guta khu ga madhemoni. Khigyo gi nga gira Jehovha a leleteya vaIsrayeli khuye va nga zami gu bhula ni ava va fudego mwendro gu dzi bedzedzeya ni ga levbini lifumbo nya wudhemoni. — Dhewuteronome 18:10-12; wona Tshamuselo 26 ni 31.

5. Ginani gi kodzago gu gu phasa gu diga gu thumisa sifananiso gasi gu khozeya Nungungulu mwendro gu diga gu khozeya dzinguluve?

⁵ Ginani gi kodzago gu gu phasa gu diga gu thumisa sifananiso gasi gu khozeya Nungungulu mwendro gu diga gu khozeya dzinguluve? Gu vbwetega gu u leri Bhibhiliya u bwe u dundrugeya gwadi khu edzi Jehovha a si wonago khidzo silo soso. O si wona nga “manyala,” mwendro silo nyo nyenyeze. (Dhewuteronome 27:15) Gombeya ga Jehovha tshigu ni tshigu gasi a gu phasa gu wona silo khu mawonelo yaye a bwe a gu phasa gu mu khozeya khu ndziya a yi vbwetago. (Isaya 55:9) Tiyisega gu khuwe Jehovha a na gu ninga tshivba yi vbwetegago gasi gu u dzi hambanisa ni satshavo si gimbidzisanago ni wukhozeyi nya malipha womini gwago.

6. Khu ginani gu hathidwego 25 nya Dezembro kha nga litshigu nya guvelegwe ga Jesu?

⁶ Mafuni gwatshavbo, Khisimuso gimwegyo nya  siphitsha si tidwago ngudzu guvbindra satshavbo, nigu vathu nya vangi vo pimisa gu khavo ugogo gudundrugwa nya guvelegwe ga Jesu. Ganiolu, khu lisine la kona Khisimuso yo gimbidzisana ni wukhozeli nya malipha. Ensiklopedya nyo khaguri yo tshamuseya gu khiyo mahedheni ya Roma ma di gu dundruga guvelegwa nya lidambo khu 25 nya Dezembro. Vathangeyi nya tshetshe va di gu vbweta gu khavo mahedheni nya mangi ma khala maKristo, khu kharato, ambari olu Jesu a nga ne gu velegwa khu 25 nya Dezembro, avo va hungide gu dundruga guvelegwa ga Jesu khu litshigu lolo. (Luka 2:8-12) Vapizane va Jesu kha va nga ba va hodza Khisimuso. Yimbe livru nya mitshamuselo yari khiyo ndrani nya 200 myaga hwane nya guvelegwe ga Jesu, “mwalo a nga ba a liti, nigu vathu vadugwana va nga ba va khathala, khu litshigu nya guvelegwe gwaye.” (Sacred Origins of Profound Things) Khisimuso yi phede gu hodzwa mazana myaga nya yingi hwane nya gu ba Jesu a vbanyide mafuni.

7. Khu ginani maKristo nya lisine ma si hodzigo Khisimuso?

⁷ Vathu nya vangi va ngu dziti gu khavo Khisimuso ni sihena sayo, nya nga mibuzo ni gu ningana dzibhofexta so dugeya omu nya wuhedheni. Khu giyeyedzo, yomo tepo eyi Inglatera gumogo ni mambe malanga ya Amerika, gu nga ba gu himbedzedwa gu hodza Khisimuso khu kotani nya olu yi dugeyago omu nya wuhedheni. Ni wevbini a nga ba a yi hodza a di gu tsayiswa. Ganiolu khu guhegisa vathu va pheledzide gu hodza Khisimuso. Khu ginani maKristo nya lisine ma si hodzigo Khisimuso? Kholu ma vbwetago gu tsakisa Nungungulu ga satshavbo ma girago.

8, 9. Khu ginani maKristo nyo pheye ma nga ba ma si dundrugi matshigu nya guvelegwe?

⁸ Gimbe giphitsha gi girwago ngudzu khu vathu nya vangi gu dundruga litshigu nya guvelegwe gwawe. Ina kha si loleyi gu maKristo ma dundruga matshigu nya guvelegwe? Siphitsha nyo dundruge matshigu nya guvelegwe si  khumbugwago omu nya Bhibhiliya si giridwe khu vathu va nga ba va si khozeyi Jehovha. (Genesi 40:20; Marko 6:21) Gu dundruga matshigu nya guvelegwe gu di gu thumisedwa gu zundza vanungungulu nya malipha. Khigyo gi giridego maKristo nyo pheye ma “wona gu dundruga litshigu nya guvelegwe nya muthu kha nga gihena nya wuhedheni.” — The World Book Encyclopedia.

⁹ Varoma ni vaGreki va gale va di gu khodwa gu khavo tepo muthu a velegwago a di gu hakhwa khu muthu nya liphuvbo oyu a nga hadzi gu mu vhikeya womini waye watshavbo. Yimbe livru yo tshamuseya gu khiyo: “Liphuvbo lolo li di gu pwanana, khu ndziya nyo samadzise, ni nungungulu nya litshigu nya guvelegwe ga muthu yoyo.” — The Lore of Birthdays.

10. Khu ginani maKristo muhuno ma si dundrugigo matshigu nya guvelegwe?

¹⁰ Ina Jehovha a ngu dzumeleya siphitsha si yelanago ni wukhongeli nya malipha? (Isaya 65:11, 12) Ne, kha si dzumeleyi. Khigyo gi hi girago hi si dundrugi matshigu nya guvelegwe mwendro ni gevbi giphitsha gi yelanago ni wukhongeli nya malipha.

11. Khu ginani vambe vathu va girago mibuzo khu dziferiyadhu? Ginani gi vbwetago gu u gi khathaleya ngudzu?

¹¹ Vambe vathu va ngu dziti khavo Khisimuso ni dzimbe dziferiyadhu dzo dugeya omu nya wuhedheni, ganiolu va ngo simama gu si landriseya. Vo pimisa gu khavo dziferiyadhu matshigu nya yadi basi gasi gu hagana ni valongo vawe. Wo dzipwa nuwe kharato? Kha sa vivba gu vbweta gu hagana ni valongo vago. Jehovha khuye a vangidego gilongo, nigu o vbweta gu khuye hi pwanana gwadi nagyo. Ambari ulolo, gu vbwetega gu hi vega gupima gwathu avba nya gupwanane nya gwadi ni Jehovha guvbindra gu tsakisa valongo vathu khu gu dundruga dziferiyadhu nya wukhongeli nya malipha. Khu kharato, mupostoli Pawulo ganede khuye: “Dzi garadzeni khu guti esi si tsakisago Pfhumu.” — Vaefeso 5:10.

12. Ginani gi girisago feriyadhu yi si dzumelegi ga Jehovha?

 ¹² Vathu nya vangi kha va khathali khomu dziferiyadhu dzi tago khumo, ganiolu Jehovha a ngu khathala khiso. Uye kha dzumeleyi dziferiyadhu dzi tago khomu nya wukhozeli nya malipha mwendro dzi zundzago vathu mwendro litigo. Khu giyeyedzo, vaEgipito va di gu gira ngudzu siphitsha nyo zundze vanungungulu vawe nya malipha. Hwane nya gu ba vaIsrayeli va tutumide Egipito, anavo va di gira gimwegyo nya siphitsha soso nya wuhedheni va bwe va gi rana pwani i “buzo nya gurungudze PFHUMU Nungungulu.” Ganiolu Jehovha va tsayiside kholu va giridego isoso. (Ekisodha 32:2-10) Kha nga a ganedego muprofeti Isaya, hi “nga kuhi ni gimwegyo gilo nya gunyenyeze.” — Leri Isaya 52:11.

13. U nga garadzega khu siwudziso muni tepo u hungago gu diga gu landriseya dziferiyadhu?

¹³ Tepo u hungago gu diga gu landriseya driferiyadhu, si nga gira u manega ni siwudziso nya singi. Khu giyeyedzo: Ginani nyi na girago nyo wudziswa khu sithumi-khwathu gu khiso khu ginani nyi si hodzigo Khisimuso gumogo navo? Ginani nyi na girago nyo ningwa bhofexta? Ginani nyi na girago go ba guri gu mwangadzi mwendro mwama wangu o vireya gu khuye nyi patega avba nya buzo nya feriyadhu? Nyi nga phasa kharini sanana sangu gu mba vbisega kholu hi si girigo gilo khu feriyadhu mwendro matshigu yaso nya guvelegwe?

14, 15. U nga gira ginani wo embedwa bhofexta mwendro wo ningwa bhofexta?

¹⁴ Gwadi gu ninganiseya tepo u hungago esi u na ganeyago ni gu gira ni ga gevbi giemo. Khu giyeyedzo, wo embedwa bhofexta, khandri tepo yatshavbo u na digago gu theya kota khiso. U nga ganeya basi khuwe, “Nyi bongide.” Ganiolu ga giemo nya gu muthu na a tsakeya guti simbe, u nga hatha gu mu tshamuseya egi gi gu girago u si hengeyi navo giphitshani gyogyo. Ambari ulolo, yeyedza wuwadi,  githawo ni guninganiseya tepo yatshavbo. Bhibhiliya yari khiyo: “Mabhuloni gwanu ganelani mahungu nya gusalalegise, mu gu kodza gu ninga phindrulo nya guenele muthu ni muthu.” (Vakolosi 4:6) Adzina u nga tshamuseya gu khuwe u ngu tsakeya gu hungata ni vakwanu ambari gu ninga siningwa vambe ganiolu khu tsakeyi gu gira isoso khu dziferiyadhu dzodzo.

¹⁵ Ginani u na girago wo ningwa bhofexta? Bhibhiliya kha yi ningi sasamedzo nya milayo yi gimbidzisanago ni silo soso, ganiolu yari khiyo gu vbwetega gu hi sayisa livhalo li agidego. (1 Thimoti 1:18, 19, NM) Yimbe tepo muthu a gu ningago bhofexta kha dziti gu khuye uwe khu landriseyi dziferiyadhu. Adzina a nga khuye, “Nyi ngu dziti gu kheni khu hodzi fexta yeyi, ganiolu nyo vbweta basi gu gu ninga egi.” Ni ga gevbini giemo, u nga hunga gu khuwe u na dzumeya gu hakha giningwa gyogyo mwendro ahihi. Ganiolu ni gevbini u na gi hungago, tiyisega gu khuwe u ngu gi gira khu livhalo li agidego. Kha hi vbweti gu gira ni gevbini gi na ghohago gupwanana gwathu ni Jehovha.

16. Ginani u na girago a bari gu ndrangani gwanu vo vbweta gu gira gilogyo gasi gu dzi tsakisa khu dziferiyadhu?

¹⁶ Ginani u na girago a bari gu ndrangani gwanu va ngu vbweta gu gira gilogyo khu feriyadhu nyo khaguri? U nga dwanisani navo. Dundruga gu khuwe anavo va ngu kodza gu hatha esi va vbwetago gu gira. Yeyedza wuwadi ni githawo khu guhatha gwawe kha nga anuwe u vbwetago gu khuwe va gira sasimweso gwago. (Leri Matewu 7:12.) Ganiolu a bari gu ndrangani gwago vo vbweta gu khavo anuwe u hengeya avba nya giphitsha gyogyo, ginani u na girago? Na u si hungi esi u na girago, gombeya ga Jehovha gasi a gu phasa gu hunga makungo nya yadi. Dundrugeya khiso, u bwe u gevisisa mahungu ma na gu phasago gu ninga phindrulo nya wadi. Dundruga gu khuwe tepo yatshavbo wo vbweta gu tsakisa Jehovha.

17. Ginani u kodzago gu gi gira gasi gu phasa sanana sago gu si si dzipwi na si gu luza gilogyo tepo vambe va dzi tsakisago khu dziferiyadhu?

 ¹⁷ Ginani u na girago gasi gu phasa sanana sago tepo si wonago vambe na va gu dzi tsakisa khu dziferiyadhu? Gira kharati, oloveya gu khu mambe matshigu uta na u va dongiseleya gilogyo nyo hathege. U nga va ninga siningwa va sa si vireyago. Nigu gimwegyo nya siningwa nya lisima ngudzu u kodzago gu ninga sanana sago, tepo yago ni lihaladzo lago.

18. Khu ginani gu vbwetegago gu hi manega mitshanganoni nya wuKristo?

¹⁸ Gasi gu tsakisa Jehovha, gu vbwetega gu hi duga omu nya wukhongeli nya malipha hi bwe hi diga sihena si yelanago nawo gumogo ni gu landriseya dziferiyadhu. Ganiolu, gu vbwetega gambe gu hi khozeya khu ndziya nya lisine. Hi nga si gira kharini? Mweyo nya dzindziya gu manega mitshanganoni nya wuKristo tepo yatshavbo. (Leri Vahebheru 10:24, 25.) Mitshangano gipandre nya lisima ngudzu nya wukhozeli nya lisine. (Dzindzimo 22:22; 122:1) Hi na tiyisana khu gyathu tepo hi tshanganago. — Varoma 1:12.

19. Khu ginani si gu sa lisima ngudzu gu bhuleya vambe khu lisine u li hevbulago?

¹⁹ Gimbe gipandre nya wukhozeli nya lisine khu gu bhula ni vambe maningano ni esi u si hevbulago omu nya Bhibhiliya. Vathu nya vangi va ngu vbisega khu kotani nya silo nyo vivbe si dugeleyago mafuni. Adzina u nguti vambe va dzipwago kharato. Va bhuleye khu guvireya nyo tsakise u gu nago khu mindru wa tshigu. Tepo u manegago mitshanganoni nya wuKristo u bwe u bhuleya vambe khu lisine nya Bhibhiliya, u na tugula gu khuwe kha wu na nga dogoreya gambe gu gira gipandre nya wukhongeli nya malipha gumogo ni sihena sawo. Tiyisega gu khuwe u na mana gutsaka nigu Jehovha a na kategisa ngudzu gudzigaradza gwago kholu u hathago gu mu khozeya khu ndziya nya lisine. — Malakiya 3:10.