1, 2. Mubuzyoonzi ngweelede kulibuzya, alimwi nkaamboonzi nikuyandikana kulibuzya oobo?

CHIINDI nwaakali kwiiya Bbayibbele, wakiiya kuti bantu balyaamba kuti bakomba Leza bayiisya naa kuti bachita zintu Leza nzyatayandi. (2 BaKorinto 6:17) Nchichicho Jehova nchatulayiilila kuti tuzwe mubukombi bwakubeja, “Babuloni Mupati.” (Ciyubunuzyo 18:2, 4) Uyoochitaanzi? Umwi awumwi wesu ulaacheelelo chakulisalila, alimwi tweelede kulibuzya kuti, ‘Ndiyanda kukomba Leza munzila njayanda kuti ndimukombe aayo na, naa kuti ndiyanda kumukomba munzila njindakali kumukomba chiindi?’

² Ikuti kakuli wakabusiya kale bukombi bwakubeja, wakachita chintu chili kabotu. Pesi mukati kako kulakonzya kakuchili zimwi zisyomwa aziyanza zyabukombi bwakubeja nzuchibotelelwa kuchita. Kwalino atwaambuule atala azimwi zisyomwa aziyanza alimwi tubone kaambo nikuyandikana kuti tuzibone munzila Jehova njazibonaayo zintu eezi.

3. (a) Nkaamboonzi nikukonzya kubayumina bamwi kuleka kubelesya mituni mubukombi bwabo? (b) IBbayibbele lityeni atala akubelesya mituni mukukomba Leza?

³ Bamwi bantu kwaminyaka myiingi bacheendelela kababelesya mituni naa zimwi ndawu mumaanda aabo kuti bakombe Leza. Ikuti kakuli boobo kuli nduwe, kulabaanga tazichiti kukomba Leza kuti kazitawo. Pesi yeeya kuti, Jehova utuyiisya nzila njitweelede kumukombaayo. Alimwi iBbayibbele litubuzya chaantanganana kuti Jehova tayandi pe kuti tubelesye mituni mubukombi bwesu.—Bala  Kulonga 20:4, 5; Intembauzyo 115:4-8; Isaya 42:8; 1 Johane 5:21.

4. (a) Nkaamboonzi nituteelede kukomba mizimu? (b) Nkaamboonzi Jehova naakabuzya bantu bakwe kuti teebakeelede kwaambuulaa bakafwa?

⁴ Bamwi bantu babelesya chiindi chilamfu anguzu zyabo kweezya kubotezya mizimu. Balakonzya kwiikomba. Pesi twakiiya kuti bafwide tabakonzyi kutugwasya naa kutuchisa. Taakwe kubusena nkubakkala. Nisimpe, kweezya kwaambuula amizimu kulakonzya kutweetela mapenzi, nkaambo kufumbwa mulumbe uuzwa kawuli muchiimo chawachibbululu wakafwa unooli uzwa kumadimoni. Nchichicho Jehova nchaakalayilila maIsrayeli kuti teebakeelede kweezya kwaambuula aabakafwa naa kuswaanizigwa muzintu zyabudimoni.—Deuteronomo 18:10-12; langa Makani Aakumamanino 26 a 31.

5. Niinzi chinga chilakugwasya kutegwa uleke kubelesya mituni mukukomba Leza akuti uleke kukomba mizimu?

⁵ Niinzi chinga chilakugwasya kuti uleke kubelesya mituni mukukomba Leza naa kuti ukuleke kukomba mizimu yako? Weelede kubala Bbayibbele, alimwi uyeeyesesye atala akuti Jehova uzibona biyeni zintu eezyo. Uzibona kazili ‘zisesemyo.’ (Deuteronomo 27:15) Mazuba oonse kokomba kuli Jehova kutegwa akugwasye kuzibona mbuli mbwazibona alimwi umukombe munzila njayanda kuti umukombe aayo. (Isaya 55:9) Ulakonzya kubaa choonzyo kuti Jehova uyookupa manguzu nguyanda kutegwa utantamuke zintu zyoonse zilaachakuchita abukombi bwakubeja.

6. Nkaamboonzi December 25 naakasalwa kuti bube buzuba bwakusekelela kuzyalwa kwaJesu?

⁶ Kkisimusi ndiimwi zuba lyakulyookezya lizibikene loko abantu munyika yoonse, alimwi biingi bayeeya  kuti nkusekelela kuzyalwa kwaJesu. Pesi Kkisimusi kwaamba choonzyo ulisweenene abukombi bwakubeja. Ibbuku limwi lyaEncyclopedia lipandulula kuti bantu bakuRoma bakatamuzi Leza bakali kusekelela buzuba bwakuzyalwa kwazuba muDecember 25. Mpawo beendelezi bazikombelo bakayanda kuti bantu bakatamuzi Leza babe maKristu, aboobo nikuba kuti Jesu taakazyalwa muDecember 25, bakasala kusekelela buzuba bwakuzyalwa kwaJesu mubuzuba oobo bwaDecember 25. Basikwiiya baJesu taakwe nibakali kubusekelela pe buzuba bwaKkisimusi. Ibbuku limwi lipandulula makani aachiindi lyaamba kuti muminyaka iili 200 Jesu kali wazyalwa, “taakwe muntu wakazi, alimwi mbache loko bakali aandaba akuti bazibe buzuba bwachoonzyo mbwaakazyalwa Jesu.” (Sacred Origins of Profound Things) Kuzwa chiindi, buzuba bwakusekelela Kkisimusi bwakatalika kwaminyaka myiingi kuzwa Jesu naakaponede aanyika.

7. Nkaamboonzi maKristu bakasimpe nibatasekeleli Kkisimusi?

⁷ Bantu biingi balizi atala aKkisimusi aziyanza zichitwa abantu batakombi ziswaanizya mapobwe akupana zipo kuti zyakazwa kuli. Muchikozyano, kuEngland akuli zimwi zibeela zyaku America, kwakali chimwi chiindi nibakakasidwe kusekelela Kkisimusi akaambo kanzila njiyakatalikaayo. Kufumbwa muntu wakali kusekelela pobwe eeli wakali kusubulwa. Pesi bantu bakeendelela kabalisekelela lubo pobwe eeli. Nkaamboonzi maKristu bakasimpe nibatasekeleli Kkisimusi? Nkaambo bayanda kubotezya Leza muzintu zyoonse nzibachita.

8, 9. Nkaamboonzi maKristu aakusanguna nibatakali kwaasekelela mazuba aakuzyalwa?

⁸ Limwi pobwe lizibikene loko abantu mazuba aano ndyamazuba aakuzyalwa. Makristu beelede kwaasekelela  na mazuba aakuzyalwa? Mapobwe ngituzi alikke aambidwe muBbayibbele akachitwaa babo bakatali kukomba Jehova. (Matalikilo 40:20; Marko 6:21) Kusekelela mazuba aakuzyalwa kwakali kuchitilwa kulumbayizya baleza bakubeja. Nchichicho maKristu aakusanguna “nchibakali kubona kusekelela mazuba aakuzyalwa kachili chiyanza chabantu batakombi.”—The World Book Encyclopedia.

⁹ MaRoma amaGiriki bachiindi, bakali kusyoma kuti kuli muuya uliiwo chiindi muntu naazyalwa akuti muuya wakwe ulakonzya kumukwabilila mubuumi bwakwe. Ibbuku litegwa The Lore of Birthdays lipandulula kuti, “Muuya ooyu ulaabweenzuma aleza wabuzuba mbwaakazyalwaabo.”

10. Nkaamboonzi maKristu mazuba aano nibateelede kusekelela mazuba aakuzyalwa?

¹⁰ Uyeeyaanga Jehova ulaatambula na mapobwe alaachakuchita abukombi bwakubeja? (Isaya 65:11, 12) Peepe, tawatambuli pe. Nchichicho katutasekeleli mazuba aakuzyalwa naa mazuba aakulyookezya aajisini abukombi bwakubeja.

11. Nkaamboonzi bamwi bantu nibasekelela mazuba aakulyookezya? Niinzi chiyandikana loko kulinduwe?

¹¹ Bamwi bantu balizi kuti Kkisimusi amazuba aakulyookezya akatalikwa abantu batakombi Leza, pesi balaasekelela. Babonaanga mazuba aakulyookezya alikabotu nkaambo abapa chiindi chakuliswaanizya ampuli zyabo. Mbuyeeya na ayebo? Takuli kubi pe kubaa chiindi chili kabotu abamumpuli yako. Jehova nguwe wakabamba mpuli, alimwi uyanda kuti mpuli zibe abweenzinyina buli kabotu anguwe. (BaEfeso 3:14, 15) Alubo, tweelede kubikkila maanu kuba abweenzinyina buli kabotu aJehova ikutali kubotezya nzubo zyesu naa zibbululu kwiinda mukusekelela mazuba aakulyookezya. Nchichicho mwaapostolo Paulo nchaakati: ‘Amusinizye, kuti muzibisye zintu ziboteezya Mwami.’—BaEfeso 5:10.

12. Niinzi chipa kuti mazuba aakulyookezya atatambuliki kuli Jehova?

 ¹² Bantu biingi tabakwe ndaba pe kuti buzuba bwakulyokezya bwakatalika biyeni, pesi Jehova teembayeeya pe. Taatambuli mazuba aakulyookezya aazwa kubukombi bwakubeja. Muchikozyano, bantu bakuEgepita bakalaa mapobwe miingi loko akusekelela baleza babo bakubeja. Kuzwa chiindi maIsrayeli nibakazwa muEgepita, abalabo bakatobelezya bukombi bwakubeja alimwi bakayita buzuba oobo kuti ‘ndipobwe lyaJehova.’ Pesi Jehova wakabasubula nkaambo kamichito yabo. (Kulonga 32:2-10) Mbubonya mbuli musinsimi Isaya wakaamba kuti, “mutaampi cintu niciba cimwi cisofwede!”—Bala Isaya 52:11.

13. Mibuzyoonzi njunga ulabaayo chiindi nusala kutasekelela mapobwe aakulyookezya?

¹³ Chiindi nusala kuleka kusekelela mazuba aakulyookezya, ulakonzya kubaa mibuzyo miingi. Muchikozyano: Nga ndilachita biyeni kuti mbindibelekaabo bandibuzya kaambo kandipa kutasekelela Kkisimusi ambabo? Nga ndilachita biyeni kuti umwi muntu wandipa chipo akaambo kakuti niKkisimusi? Nga ndilachita biyeni kuti ngundikwetene aawe kalangilila kuti ndisekelele zuba lyakulyookezya? Nga ndilabagwasya biyeni bana bangu kuti batatyompwi akaambo kakusekelela zuba lyakulyookezya naa mazuba aabo aakuzyalwa?

14, 15. Niinzi nchunga ulachita kuti umwi muntu wakwaambila kuti ubaazuba lyakulyookezya lili kabotu naa kuti wakupa chipo?

¹⁴ Kulayandikana kubelesya maanu kuziba nzitweelede kwaamba akuchita mubukkale boonse. Muchikozyano, ikuti bantu baamba kuti ube azuba lyakulyookezya bbotu toyelede kubawuunduluzya pe. Ulakonzya kwaamba kuti, “Ndalumba.” Pesi muli zimwi ziindi umwi muntu nga ulayanda  kuziba ziingi, ulakonzya kumupandulwida kaambo nchutasekeleli buzuba bwakulyookezya. Nikuba boobo, chiindi choonse weelede kubaa luse, bupampu, akutondeezya bulemu. IBbayibbele lyaamba kuti: “Kwaamba kwanu kulweezegwe amunyo wakulumba, kuti mube abusongo bwakutyaba kabotu kubantu boonse bamubuzya makani.” (BaKolose 4:6) Amwi ulakonzya kupandulula kuti ulabotelwa kubaa chiindi abamwi akupa zipo pesi kutali kuti uzichita akaambo kakuti ndizuba lyakulyookezya.

¹⁵ Niinzi nchunga ulachita kuti umwi muntu wakupa chipo? IBbayibbele talitupi milongo yamilawu, pesi litubuzya kuti tweelede kuba amanjezeezya aali kabotu. (1 Timoteo 1:18, 19) Kulakonzya kuti muntu uukupa chipo tazi pe kuti tusekeleli pe mazuba aakulyookezya. Amwi ulakonzya kwaamba kuti, “Ndilizizi kuti tusekeleli pe mazuba aakulyookezya, pesi ndiyanda kukupa chipo eechi.” Mubbazu limwi, ulakonzya kusala kuti ulachitambula na chipo eecho naa kuti tuchiyandi pe. Kufumbwa kusala nkuchita, baachoonzyo kuti ulaamanjezezya aali kabotu. Tatuyandi pe kuchita chintu chibi chinga chilakonzya kunyongania bweenzuma bwesu aJehova.

16. Niinzi nchunga ulachita kuti bamumpuli yako bayanda kusekelela buzuba bwakulyookezya?

¹⁶ Niinzi nchunga ulachita kuti bamumpuli yako bayanda kusekelela zuba lyakulyookezya? Toyelede kulwanaabo pe. Pesi weelede kuyeeya kuti balaacheelelo chakulisalila nzibayanda kuchita. Weelede kubaa luse alimwi ulemeke kusala kwabo mbuli mbuyanda kuti ayebo bazilemeke nzusala. (Bala Matayo 7:12.) Niinzi nchunga ulachita kuti bamumpuli yako bayanda kuti ubaa chiindi ambabo mubuzuba bwakulyookezya? Kotanasala zyakuchita, komba kuli Jehova kutegwa akugwasye kuchitila kuti usale kabotu. Weelede kuyeeya atala achiimo nchubede, alimwi  uyanduulisisye atala amakani aaya. Alimwi weelede kuyeeya kuti uyanda kubotezya Jehova.

17. Niinzi nchunga ulachita kutegwa ugwasye bana bako chiindi bamwi nibasekelela mazuba aakulyookezya?

¹⁷ Niinzi nchunga ulachita kutegwa ugwasye bana bako aawo nibabona bamwi kabasekelela mazuba aakulyookezya? Chiindi achiindi, ulakonzya kubachitila chimwi chintu chibotu nchibayandisya. Alimwi ulakonzya kubapa zipo kabatayeeyeli pe. Chimwi chipo chibotu loko nchunga ulabapa bana bako nkukkalaabo akubatondeezya luyando.

18. Nkaamboonzi nitweelede kunjila miswaangano yabuKristu?

¹⁸ Kuti tubotezye Jehova, tweelede kusiya bukombi bwakubeja buswaanizya ziyanza amazuba aakulyookezya ayeendelanaa mbubo. Alimwi tweelede kutobelezya zichitwaa bukombi bwakasimpe. Pesi biyeni? Imwi nzila njakunjila miswaangano yabuKristu chiindi choonse. (Bala BaHebrayo 10:24, 25.) Miswaangano njiinzila yabukombi bwakasimpe iiyandikana loko. (Intembauzyo 22:22; 122:1) Tulakonzya kusungwaazyania chiindi nituswaanana aamwi kumiswaangano.—BaRoma 1:12.

19. Nkaamboonzi nikuli kabotu kubuzya bamwi atala akasimpe kamuBbayibbele nkwaakayiiya?

¹⁹ Imwi nzila yakusala bukombi bwakasimpe nkubuzya bamwi atala azezyo nzwaakayiiya muBbayibbele. Bantu biingi balimvwa kabakataazikana atala azintu zibi ziliikuchitika munyika. Kulakonzya kuti kuli mbuzi balimvwa oobo. Babuzye atala abulangilizi bubotu buli kunembo. Mbuya bunjila miswaangano yabuKristu akubuzya bamwi atala akasimpe kamuBbayibbele, uyoojana kuti tuchiyandi pe kuba kulubazu lwabukombi bwakubeja alimwi aziyanzya zyambubo. Uyoobaa choonzyo kuti uyoojana kubotelwa akuti Jehova uyoolongezya kweezya kwako kwakusala kumukomba munzila iili njiyo.—Malaki 3:10.