CAPÍTULO 16
Kakakninani Dios chuna la xla lakaskin
1, 2. ¿Tuku talakaskin nalaksakaw chatunu chatunu akinin?
XTACHUWIN Dios makgtayanitan nakatsiya pi lhuwa latamanin wankgo pi kakninanikgo Dios, pero uma nixlikana xlakata masiyakgo chu tlawakgo tuku xla xkajni (2 Corintios 6:17). Wa xlakata, Jehová kinkawaniyan pi kataxtuw niku masiyakan tuku nixaxlikana, nema lilakgapaskan «XaLanka Babilonia» (Apocalipsis 18:2, 4). ¿Tuku natlawaya wix? Chatunu akinin talakaskin nalaksakaw tuku natlawayaw chu nalilakpuwanaw: «¿Kkakninaniputun Dios chuna la xla lakaskin o kkakninaniputun chuna la klismaninit?».
2 Komo wix taxtunitata niku ni masiyakan tuku xaxlikana, lu tlan tuku tlawanita. Pero max wi akgtum talismanin tuku lakgatiyaku, nema Dios ni lakgati. Kalichuwinaw makgapitsi chu tuku xlakata lu xlakaskinka naʼakxilhaw chuna la akxilha Jehová.
MAKLAKASKINKAN TAMAKANITLAW CHU KALAKAPASTAKKAN TIKU NIKGONITA
3. 1) ¿Tuku xlakata max makgapitsi latamanin tuwa namakgkatsikgo nialh namaklakaskinkgo tamakanitlaw xlakata nakakninanikgo Dios? 2) ¿Tuku masiya Biblia xlakata limaklakaskinkan tamakanitlaw akxni kakninanikan Dios?
3 Lhuwa latamanin wilikgonit kxchikkan tamakanitlaw o laktsu pusantu xlakata lakpuwankgo pi chuna kakninanikgo Dios. Komo wix chuna tlawaya, max nalakpuwana pi ni xlilat nakakninaniya Dios komo ni namaklakaskinaw akgtum tamakanitlaw. Pero kalakapastakti pi Jehová kinkamasiyaniyan la xla lakaskin nakakninaniyaw. Chu Biblia liwana kinkawaniyan pi Jehová ni lakaskin nalimaklakaskinaw tamakanitlaw xlakata nakakninaniyaw (kalikgalhtawakga Éxodo 20:4, 5; Salmo 115:4-8; Isaías 42:8; 1 Juan 5:21).
4. 1) ¿Tuku xlakata ni nakakakninaniyaw tiku nikgonita? 2) ¿Tuku xlakata Jehová kawanilh israelitas pi ni xkatachuwinamputunkgolh tiku nikgonita?
4 Klhuwa kachikinin tlawakan talismanin xlakata kalakapastakkan tiku nikgonita. Max makgapitsi latamanin limaxtukgo lhuwa kilhtamaku xlakata nakalakapastakkgo xtalilakgapasnikan tiku nikgonita. Chu asta max nakakninanikgo. Pero chuna la katsinitaw akinin nichuna kilitlawatkan, xlakata tiku nikgonita nila kinkamakgtayakgoyan chu nila kinkatlawanikgoyan tuku nitlan. Chu ni ankgo latamakgo alakatanu. Biblia masiya pi lu nitlan komo nakatachuwinamputunaw, xlakata akxni nalakpuwanaw pi kinkatachuwinaman tiku ninita ni xlikana, wata wa demonios kinkatachuwinamakgon. Wa xlakata, Jehová kawanilh israelitas pi ni xtachuwinamputunkgolh tiku xnikgonita chu xlakgmakgankgolh talismanin nema tatalakxtumi demonios (Deuteronomio 18:10-12). (Kaʼakxilhti nota 26, niku wan «Taskuwan chu demonios» chu nota 31, niku wan «Demonios»).
5. ¿Tuku namakgtayayan xlakata nialh namaklakaskina tamakanitlaw chu nialh natlawaya talismanin xlakata kalakapastakkan tiku nikgonita?
5 Komo wix chuntiyaku maklakaskina tamakanitlaw chu tlawayaku talismanin xlakata kalakapastakkan tiku nikgonita, ¿tuku namakgtayayan xlakata namakgxtakga umakgolh talismanin? Talakaskin nalikgalhtawakgaya Biblia chu nalilakpuwana la akxilha Jehová uma. Xla «ni [...] akxilhputun» chu lu lixkajnit akxilha (Deuteronomio 27:15). Ankgalhin kaskini Jehová pi kamakgtayan naʼakxilha uma chuna la xla akxilha chu nakakninaniya chuna la xla lakaskin (Isaías 55:9). Jehová namaxkiyan litliwakga xlakata tlan nalakgmakgana putum tuku tatalakxtumi nixaxlikana takanajla.
¿XLILAT NATLAWAYAW TALAKGATANKUWIT O NAVIDAD?
6. ¿Tuku xlakata laksakka 25 xla diciembre natlawakan Talakgatankuwit?
6 Talakgatankuwit o Navidad wa akgtum paskua nema lu lakgapaskan xlikalanka katiyatni, chu makgapitsi latamanin lakpuwankgo pi akxni lakachilh Jesús. Pero Talakgatankuwit anta lakatsukunit knixaxlikana takanajla. Maktum enciclopedia lichuwinan pi romanos tiku ni xkanajlanikgo Jesús xtlawakgo paskua 25 xla diciembre xlakata xwankgo pi akxni xlakachin chichini. Tiku xpulalinkgo nixaxlikana takanajla xlakaskinkgo pi tiku xkgalhikgo uma talismanin xmakgtapakgsikgolh kxtakanajlakan. Wa xlakata lakkaxwilikgolh pi 25 xla diciembre xtlawakgolh Talakgatankuwit maski Jesús ni lakachilh ama kilhtamaku (Lucas 2:8-12). Kstalaninanin Jesús ni xtlawakgo Talakgatankuwit. Chuna la wan libro Los orígenes sagrados de las cosas profundas, akxni xtitaxtunita 200 kata lata xlakachinit Jesús, «niti xkatsi chu ni lu xlakaskinka xʼakxilhkan tukuya kilhtamaku xlakachinit Jesús». Nachuna, Talakgatankuwit tsukuka tlawakan akxni xtitaxtunita 300 kata lata xninit Jesús.
7. ¿Tuku xlakata kstalaninanin Cristo ni tlawakgo Talakgatankuwit?
7 Lhuwa latamanin katsikgo niku lakatsukulh Talakgatankuwit chu amakgapitsi talismanin, la komo akxtum nalatawayan chu nalamaxki akgtum tamaskiwin. Milh kilhtamaku nialh tlawaka Talakgatankuwit anta kʼInglaterra chu makgapitsi kkachikin xla Norteamérica xlakata uma paskua lakatsukulh knixaxlikana takanajla. Putum tiku xtlawa Talakgatankuwit xmalakgaxokgekan. Pero titaxtupa kilhtamaku tsukuparakgolh tlawakgo Talakgatankuwit. ¿Tuku xlakata kstalaninanin Cristo ni tlawakgo Talakgatankuwit? Xlakata makgapaxuwaputunkgo Dios.
¿XLILAT NATLAWAYAW PASKUA AKXNI MAKGATSIKAN KATA?
8, 9. ¿Tuku xlakata xapulana kstalaninanin Cristo ni xtlawakgo paskua akxni xmakgatsikan kata?
8 Atanu paskua nema tlawakgo latamanin wa akxni makgatsikan kata. ¿Xlilat natlawakgo paskua kstalaninanin Cristo akxni makgatsikan kata? Biblia kalichuwinan makgapitsi latamanin tiku tlawakgolh akgtum paskua akxni makgatsikgolh xkatakan pero umakgolh latamanin ni xkakninanikgo Jehová (Génesis 40:20; Marcos 6:21). Akxni makgatsikan kata kamalankikan nixaxlikana dioses. Wa xlakata, xapulana kstalaninanin Cristo «xliʼakxilhkgo pi umakgolh talismanin anta lakatsukukgolh knixaxlikana takanajla» chu ni xtlawakgo (Las cosas nuestras de cada día).
9 Makgasa, romanos chu griegos xkanajlakgo pi akxni xlakachin chatum lataman na akxni xmakgatsi xkata chatum dios. Xlakpuwankgo pi chatum espíritu nema xtalalin uma dios anta xwi akxni xlakachin uma lataman. Tiku xmakgtapakgsikgo knixaxlikana takanajla xkanajlakgo pi xlakata xkuentajtlawaka uma lataman xtalakaskin natlawanikan xpaskua akxni xmakgatsilh xkata.
10. ¿Tuku xlakata kstalaninanin Cristo xala uku ni tlawakgo paskua akxni makgatsikan kata?
10 ¿Lakpuwana wix pi Jehová tlan akxilha paskua nema kilhtsukucha knixaxlikana takanajla? (Isaías 65:11, 12). Xlikana pi nitlan akxilha. Wa xlakata kstalaninanin Cristo xala uku, ni xlitlawatkan paskua akxni makgatsikan kata chu nipara atanu paskua nema kilhtsukucha knixaxlikana takanajla.
¿XLAKASKINKA NAKATSIYAW NIKU KILHTSUKUCHA?
11. 1) ¿Tuku xlakata makgapitsi latamanin tlawakgo paskua nema kilhtsukucha knixaxlikana takanajla? 2) ¿Tuku tlakg xlakaskinka miliʼakxilhat?
11 Makgapitsi latamanin tiku katsikgo niku kilhtsukucha Talakgatankuwit chu amakgapitsi talismanin, chuntiyaku tlawakgo. Lakpuwankgo pi umakgolh paskua tlawa pi akxtum nakatatawilakgo xfamiliajkan. ¿Nachuna lakpuwana? Nitu wamputun akxtum nakatatawilaya mifamilia. Jehová malakatsukilh familia chu xla lakaskin pi tlan nakatalalinaw tiku kintalilakgapasnikan (Efesios 3:14, 15). Pero tuku tlakg xlakaskinka wa la talalinaw Jehová nixawa nakamakgapaxuwaputunaw kifamiliajkan akxni katatlawayaw paskua nema kilhtsukucha knixaxlikana takanajla. Wa xlakata apóstol Pablo lichuwinalh: «Chuntiya kakatsitit komo tuku tlawayatit tlan o nitlan xpalakata Malana» (Efesios 5:10).
12. ¿Tukuya paskua nitlan akxilha Jehová?
12 Lhuwa latamanin lakpuwankgo pi nitu wamputun niku kilhtsukucha akgtum paskua. Pero Jehová nichuna lakpuwan. Xla nitlan akxilha paskua nema lakatsukukgolh knixaxlikana takanajla nipara nema kalimalankikan latamanin, akxni kakninanikan bandera o kachikinin. Akgtum liʼakxilhtit, egipcios xtlawakgo lhuwa paskua nema xlimalankikgo nixaxlikana xdioseskan. Akxni xtaxtukgonita kʼEgipto, israelitas nachuna tlawakgolh akgtum paskua nema xtlawakgo egipcios chu limapakuwikgolh «xpaskua Jehová». Pero Jehová kamalakgaxokgelh xlakata tuku tlawakgolh (Éxodo 32:2-10). Akinin kilitlawatkan chuna la wa palakachuwina Isaías: «Ni kaxamatit tuku xalixkajni» (kalikgalhtawakga Isaías 52:11).
LIWANA KAKAWANI AMAKGAPITSIN TUKU KANAJLAYA
13. ¿Tukuya takgalhskinin max nalilakpuwana akxni nialh natlawaya paskua nema kilhtsukukgocha knixaxlikana takanajla?
13 Akxni wix nialh natlawaya paskua nema kilhtsukukgocha knixaxlikana takanajla, max nalilakpuwana lhuwa takgalhskinin. Max nalakpuwana: «¿Tuku naktlawa komo tiku kkataskuja nakinkgalhskinkgo tuku xlakata ni kmakgtlawa Talakgatankuwit? ¿Tuku naktlawa komo wi tiku nakimaxki akgtum tamaskiwin uma kilhtamaku? ¿Chu komo kinchixku o kimpuskat lakaskin pi kaktlawalh akgtum paskua nema Dios ni lakgati? ¿La nakkamakgtaya kinkamanan xlakata ni nalipuwankgo xlakata ni ktlawayaw makgapitsi paskua o akxni makgatsikan kata?».
14, 15. ¿Tuku natlawaya komo wi tiku nawaniyan «kalipaxuwa uma kilhtamaku» o namaxkiyan akgtum tamaskiwin?
14 Lu xlakaskinka liwana nalilakpuwana tuku natlawaya chu tuku nawana akxni chuna natatakgsa. Akgtum liʼakxilhtit, komo wi tiku nawaniyan «kalipaxuwa uma kilhtamaku», kajwatiya tlan nawaniya «paxtikatsinilh». Pero akxni wi tiku tlakg katsiputun, tlan nawaniya tuku xlakata ni makgtlawaya uma paskua. Ankgalhin liwana kakawani chu xatapaxuwan katlawa. Biblia wan: «Putum kilhtamaku tlan katakgaxmatli mintachuwinkan, xtachuna la xlimakgamitit matsat, xlakata nakatsiyatit chuna la nakakgalhtiyatit chatunu chatunu lataman» (Colosenses 4:6). Max tlan nakawaniya pi lakgatiya akxtum katatawilaya amakgapitsin latamanin chu kamaxkiya tamaskiwin, pero ni chuna tlawaya akxni tlawamaka akgtum paskua nema kilhtsukucha knixaxlikana takanajla.
15 ¿Tuku natlawaya komo wi tiku namaxkiyan akgtum tamaskiwin? Biblia ni limin akgtum lista xlakata tuku kilimakgantaxtitkan, pero kinkawaniyan pi xlakaskinka nakgalhiyaw akgtum xatlan talakapastakni (1 Timoteo 1:18, 19). Max tiku maxkiputunan akgtum tamaskiwin ni katsi pi wix ni makgtlawaya uma paskua. O max nawaniyan: «Kkatsi pi wix ni tlawaya uma, pero maski chuna kmaxkiputunan uma tamaskiwin». Wix nalaksaka komo namakglhtinana akgtum tamaskiwin o ni. Pero talakaskin pi tuku nalaksaka ni nasakgali mintalakapastakni. Ni tlawaputunaw tuku max nalaktlawa la talalinaw Jehová.
LA NAKATACHUWINANAW KIFAMILIAJKAN
Xlakskujnin Jehová paxuwakgo
16. ¿Tuku natlawaya komo mifamilia tlawaputunkgo akgtum paskua nema kilhtsukucha knixaxlikana takanajla?
16 ¿Tuku natlawaya komo mifamilia tlawaputunkgo akgtum paskua nema kilhtsukucha knixaxlikana takanajla? Ni kakatataʼakglhuwi. Kalakapastakti pi xlakan na tlan nalaksakkgo tuku natlawakgo. Tlan kakalikatsini chu kakamaxki kakni tuku nalaksakkgo, chuna la wix lakaskina pi namaxkikana kakni (kalikgalhtawakga Mateo 7:12). Pero, ¿chu komo mifamilia lakaskinkgo pi akxtum nakatatawilaya kʼuma paskua? Akxni nina laksaka tuku natlawaya kaskini xtamakgtay Jehová xlakata natlawaya tuku xaʼakgstitum. Kalilakpuwanti chu kalakputsanani kkilikgalhtawakgakan xlakata uma. Ankgalhin kalakapastakti pi wix makgapaxuwaputuna Jehová putum kilhtamaku.
17. ¿Tuku tlan natlawaya xlakata minkamanan ni nalakpuwankgo pi wi tuku makgatsankgakgo akxni akxilhkgo pi amakgapitsin tlawakgo paskua nema kilhtsukucha knixaxlikana takanajla?
17 ¿Tuku tlan natlawaya xlakata minkamanan ni nalakpuwankgo pi wi tuku makgatsankgakgo akxni akxilhkgo pi amakgapitsin tlawakgo paskua nema kilhtsukucha knixaxlikana takanajla? Ni xmakgasni wi tuku kakatlawani nema tlan nalipaxuwakgo. Na tlan kaj xalan nakamaxkiya akgtum tamaskiwin. Pulaktum tamaskiwin nema tlan nakamaxkiya wa minkilhtamaku chu mintapaxkit.
KAKAKNINANI DIOS CHUNA LA XLA LAKASKIN
18. ¿Tuku xlakata naʼanaw kxtamakxtumitkan kstalaninanin Cristo?
18 Xlakata tlan namakgapaxuwayaw Jehová talakaskin namakgxtakgaw nixaxlikana takanajla chu talismanin nema anta takilhtiyakgonit. Nachuna, talakaskin namakgtapakgsiyaw kxaxlikana takanajla. ¿La natlawayaw? Naʼanaw putum ktamakxtumit nema tlawakgo xaxlikana kstalaninanin Cristo akgatunu semanas (kalikgalhtawakga Hebreos 10:24, 25). Tamakxtumit lu xlakaskinka litaxtu kxaxlikana takanajla (Salmo 22:22; 122:1). Anta lamakgpuwantiniyaw chatunu chatunu (Romanos 1:12).
19. ¿Tuku xlakata lu xlakaskinka nakalitachuwinana amakgapitsin tuku katsinipat kBiblia?
19 Xlakata nalilatapaya xaxlikana takanajla, wix na tlan nakalitachuwinana amakgapitsin latamanin tuku katsinipat kBiblia. Lhuwa latamanin lu lilakgaputsakgo tuku nitlan lama kkakilhtamaku. Max wix kalakgapasa makgapitsi latamanin tiku chuna makgkatsikgo. Komo chuna, kakalitachuwinanti takgalhkgalhin nema wix kgalhiya xlakata kilhtamaku nema aku mima. Akxni napina ktamakxtumit chu akxni nakalitachuwinana amakgapitsin xlakata tuku wan Biblia, nakatsiya pi nialh tlawaputuna tuku tlawakgo chu xtalismaninkan nixaxlikana takanajla. Liwana kakatsi pi napaxuwaya chu Jehová nasikulunatlawayan xlakata wix liskuja nakakninaniya chuna la xla lakaskin (Malaquías 3:10).
You May Also Like
DOCUMENTARIES
Putum kinatalankan xlikalanka katiyatni
¿La makxtum tawilakgo xtatayananin Jehová kʼuma kakilhtamaku niku latamanin xakstu kapaxkikan?
DOCUMENTARIES
Xtatayananin Jehová: tuku kamatlawilh xtakanajlakan. Pulaktiy: Maxkgakganankgo
Jesús mapakgsinalh “nakamasiyanikan xlipaks akgmakgat chixkuwin”. Akxni xtitaxtukgonita lhuwa taʼakglhuwit xLikgalhtawakgananin Biblia liwana akgatekgskgolh tuku xkilhchanima nalimaxkgakganankgo xaxlikana.
