1, 2. Yumi mas makim wanem samting long mekim? Na bilong wanem dispela i bikpela samting?

LONG rot bilong stadi bilong yu long Baibel, yu kisim save olsem planti manmeri em ol i tok ol i lotuim God, ol i mekim ol samting em God i no laikim. (2 Korin 6:17) Olsem na Jehova i tokim yumi long lusim lotu giaman, em “Bikpela Babilon.” (Revelesen 18:2, 4) Bai yu mekim wanem? Yumi olgeta wan wan i gat wok long makim samting yumi bai mekim. Olsem na yumi mas makim olsem yumi bai lotuim God long pasin em i laikim, o yumi laik bihainim pasin bilong yumi yet long lotuim em.

² Sapos yu lusim o rausim nem bilong yu pinis long lotu giaman, dispela em i gutpela. Tasol nogut long bel i gat sampela pasin bilong lotu giaman em yu amamas yet long en. Orait nau bai yumi skelim sampela bilong ol dispela pasin na luksave long as na em i bikpela samting long yumi mas i gat wankain tingting olsem bilong Jehova long ol dispela samting.

3. (a) Bilong wanem sampela inap hatwok long lusim pasin bilong mekim wok long ol imis bilong mekim lotu? (b) Baibel i tok wanem long pasin bilong yusim ol imis bilong lotu long God?

³ Sampela i bin yusim ol imis long haus bilong ol bilong lotuim God inap planti yia pinis. Sapos yu save mekim olsem, ating yu pilim olsem i no gutpela na i no stret long lotuim God sapos yu no yusim ol imis. Tasol tingim God yet i tokim yumi long pasin yumi mas lotuim em long en. Na Baibel i kamapim klia olsem Jehova i no laik  bai yumi yusim ol imis long mekim lotu.—Ritim Kisim Bek 20:4, 5; Song 115:4-8; Aisaia 42:8; 1 Jon 5:21.

4. (a) Bilong wanem yumi no ken lotuim ol tumbuna bilong yumi i dai pinis? (b) Bilong wanem Jehova i tokim ol manmeri bilong em long no ken traim long toktok wantaim ol man i dai pinis?

⁴ Sampela manmeri i save lusim bikpela haptaim na strong long mekim ol samting bilong amamasim ol tumbuna bilong ol i dai pinis. Ol inap lotuim ol tu. Tasol yumi kisim save olsem ol man i dai pinis i no inap helpim yumi o mekim nogut long yumi. Ol i no stap laip long sampela narapela hap. Pasin bilong traim long toktok wantaim ol inap nogutim yu, long wanem, tok i luk olsem i kam long wanpela long famili i dai pinis, dispela tok i kam long ol spirit nogut. Olsem na Jehova i tambuim ol Israel long toktok wantaim ol man i dai pinis o long insait long ol wok bilong ol spirit nogut.—Lo 18:10-12; lukim Futnot long pes 221-222 na 223.

5. Wanem samting bai helpim yu long lusim pasin bilong yusim ol imis long lotuim God na long lusim pasin bilong lotuim ol tumbuna?

⁵ Wanem samting inap helpim yu long lusim pasin bilong yusim ol imis long lotu long God o helpim yu long lusim pasin bilong lotuim ol tumbuna? Yu mas ritim na skelim long bel ol tok bilong Baibel i kamapim tingting bilong God long ol dispela samting. Em i lukim ol dispela samting olsem “stingpela samting” long ai bilong em. (Lo 27:15) Beten long Jehova long olgeta de long helpim yu long kisim wankain tingting olsem em na long helpim yu long lotuim em long pasin em i laikim. (Aisaia 55:9) Yu ken bilip tru olsem Jehova bai givim strong long yu long rausim ol samting bilong lotu giaman long i stap bilong yu.

6. Bilong wanem ol i makim Disemba 25 olsem de mama i karim Jisas?

⁶ Long olgeta hap bilong graun, Krismas em wanpela bikpela de, na klostu olgeta manmeri i ting Krismas em i taim bilong tingim de mama i karim Jisas. Tasol Krismas i  insait long lotu giaman. Wanpela buk i stori olsem ol Rom i save mekim betde bilong san long Disemba 25. Ol bikman bilong lotu i laik bai planti haiden i ken kamap Kristen, olsem na maski Jisas i no bon long Disemba 25, ol i kirap mekim bung bilong tingim de mama i karim Jisas long dispela det. (Luk 2:8-12) Tasol ol disaipel bilong Jisas i no bin mekim Krismas. Wanpela buk (Sacred Origins of Profound Things) i stori olsem inap 200 yia bihain long mama i karim Jisas, “i no gat wanpela man i save, na i no gat planti man i tingim liklik, de stret mama i bin karim em.” Pasin bilong mekim Krismas i kirap sampela handet yia bihain long taim Jisas i bin stap long graun.

7. Bilong wanem ol Kristen tru i no save mekim Krismas?

⁷ Planti manmeri i save olsem ol haiden i as bilong Krismas na ol pasin ol i save mekim long dispela de, kain olsem mekim pati na givim presen i go i kam. Olsem, long Inglan na long sampela hap bilong Amerika ol i bin tambuim Krismas, long wanem, ol haiden i as bilong en. Sapos wanpela i mekim Krismas, ol i save mekim save long em. Tasol i no longtaim ol man i kirap mekim bung bilong Krismas gen. Bilong wanem ol Kristen tru i no save mekim Krismas? Long wanem ol i laik amamasim Jehova long olgeta samting ol i mekim.

8, 9. Bilong wanem ol Kristen bilong pastaim i no bin mekim betde?

⁸ Narapela bung bilong amamas em ol manmeri i save mekim em betde. Olsem wanem? Ol Kristen i mas mekim bung bilong betde? Baibel i stori long betde pati em bilong ol man i no lotuim Jehova. (Stat 40:20; Mak 6:21) Ol i save mekim betde bilong tingim ol god giaman. Olsem na ol Kristen bilong pastaim “i ting pasin bilong tingim betde bilong man i wanpela pasin bilong ol haiden.”​—The World Book Encyclopedia.

 ⁹ Planti man bilong Grik na Rom bilong bipo i bilip olsem wanpela spirit i stap taim mama i karim pikinini na dispela spirit i lukautim dispela pikinini long olgeta de em i stap laip. Wanpela buk (The Lore of Birthdays) i tok: “Dispela spirit i was long pikinini, em i poroman wantaim dispela god i gat betde long seim det olsem pikinini.”

10. Bilong wanem ol Kristen long nau i no save mekim betde?

¹⁰ Yu ting Jehova i orait long ol bung we lotu giaman i as bilong en? (Aisaia 65:11, 12) Nogat, em i no orait long dispela. Olsem na yumi no save mekim betde o insait long bung bilong ol narapela bikpela de em lotu giaman i as bilong en.

11. Bilong wanem sampela manmeri i save insait long ol bung bilong ol bikpela de? Yu mas tingting long mekim wanem?

¹¹ Sampela i save olsem ol haiden i as bilong Krismas na ol narapela bikpela de, tasol ol i wok yet long mekim ol dispela bung. Ol i ting olsem ol dispela bikpela de i opim rot long ol famili i ken bung wantaim. Yu save tingting olsem tu? I no gat rong long lusim haptaim long i stap wantaim famili bilong yu. Jehova i kamapim famili, na em i laik bai yumi stap amamas wantaim famili bilong yumi. (Efesus 3:14, 15) Tasol yumi mas tingting long pas gut wantaim Jehova na i no long amamasim ol famili bilong yumi long rot bilong insait long ol bikpela de em lotu giaman i as bilong en. Olsem na aposel Pol i tok: “Wok yet long skelim gut ol samting em Bikpela i orait long en.”—Efesus 5:10.

12. Wanem samting bai mekim na Jehova i no orait long wanpela bikpela de?

¹² Planti manmeri i ting olsem husat i as bilong ol bikpela de, dispela i no bikpela samting, tasol Jehova i no ting olsem. Em i no orait long ol bikpela de em lotu giaman i as bilong en o ol bikpela de bilong litimapim nem  bilong wanpela man o litimapim wanpela kantri. Olsem, ol Isip i save mekim ol bung bilong tingim ol god giaman bilong ol. Bihain long ol Israel i ranawe lusim Isip, ol i mekim wanpela bung bilong ol na kolim olsem “bikpela bung bilong lotu long Jehova.” Tasol Jehova i mekim save long ol long dispela samting. (Kisim Bek 32:2-10) Olsem profet Aisaia i tok, yumi no ken “tatsim wanpela samting i doti!”—Ritim Aisaia 52:11.

13. Ating bai yu gat wanem ol askim taim yu lusim pasin bilong insait long amamas bilong ol bikpela de?

¹³ Taim yu lusim pasin bilong insait long ol amamas bilong ol bikpela de, ating yu bai i gat planti askim. Olsem: Mi bai mekim wanem sapos ol wanwok i laik save long as na mi no laik insait long pati bilong Krismas wantaim ol? Mi bai mekim wanem sapos wanpela i givim presen long mi? Mi bai mekim wanem sapos poroman marit bilong mi i laik mi insait long bung bilong wanpela bikpela de? Mi ken mekim wanem na bai ol pikinini bilong mi i no ken bel hevi olsem ol i no insait long amamas bilong wanpela bikpela de o betde?

14, 15. Yu ken mekim wanem sapos wanpela i tok Meri Krismas long yu o givim yu wanpela presen?

¹⁴ Em i bikpela samting long yu mas bihainim gutpela tingting taim yu makim ol samting yu bai mekim na tok yu bai mekim. Sapos wanpela i tok ‘Meri Krismas!’ i no olsem yu mas abrusim ol tasol. Yu ken tok, ‘Tenkyu.’ Tasol sapos wanpela i laik save long as na yu no insait long bung bilong wanpela bikpela de, orait yu ken stori long dispela. Tasol oltaim yu mas toktok long gutpela pasin. Baibel i tok: “Oltaim tok bilong yupela i mas gutpela, olsem yupela i putim sol long en, na bai yupela inap save long wanem tok i stret long bekim long olgeta man wan wan.”  (Kolosi 4:6) Yu ken kamapim klia olsem yu save amamas long bung wantaim ol narapela na givim ol presen, tasol yu no laik mekim olsem long taim bilong ol bikpela de.

¹⁵ Olsem wanem sapos wanpela i laik givim presen long yu? Baibel i no kamapim wanpela lista bilong ol lo long dispela, tasol em i tok yumi mas mekim ol samting we maus bilong bel bai i no gat tok. (1 Timoti 1:18, 19) Ating man i givim yu presen i no save olsem yu no save insait long amamas bilong ol bikpela de. O, em inap tok: “Mi save yu no save tingim dispela bikpela de, tasol mi laik givim dispela presen long yu.” Long kain taim olsem, yu yet i mas wokim disisen olsem yu bai kisim presen o nogat. Tasol wanem disisen yu mekim dispela disisen i no ken mekim maus bilong bel bilong yu i gat tok. Yumi no laik mekim wanpela samting we bai bagarapim pasin pren bilong yumi wantaim Jehova long samting i nogut.

16. Yu mas mekim wanem sapos famili bilong yu i laik insait long wanpela amamas bilong ol bikpela de?

¹⁶ Yu mas mekim wanem sapos famili bilong yu i laik insait long amamas bilong wanpela bikpela de? No ken tok pait wantaim ol. Tingim, ol i gat rait long wokim disisen long samting ol i laik mekim. Toktok gut long ol na rispektim tingting bilong ol, wankain olsem yu laik bai ol i rispektim tingting bilong yu. (Ritim Matyu 7:12.) Tasol yu mas mekim wanem, sapos famili bilong yu i laik bai yu lusim sampela haptaim long stap wantaim ol long taim bilong tingim bikpela de? Paslain long yu wokim disisen, beten long Jehova i ken helpim yu long mekim stretpela disisen. Tingim ol samting bai kamap na mekim wok painimaut long en. Tingim, oltaim yu laik mekim ol samting i amamasim Jehova.

17. Yu ken mekim wanem na bai ol pikinini bilong yu i no pilim olsem ol i lus long sampela gutpela samting taim ol i lukim ol narapela i amamas long ol bikpela de?

 ¹⁷ Yu ken mekim wanem bilong helpim pikinini bilong yu taim ol i lukim ol narapela i insait long amamas bilong ol bikpela de? Long narapela narapela taim, yu ken stretim rot bilong mekim sampela spesel samting bilong ol. Yu ken givim ol presen long ol long taim ol i no tingim. Wanpela gutpela presen tru yu inap givim long ol pikinini, em taim bilong yu na pasin bilong yu long laikim tru ol.

18. Bilong wanem yumi mas i go long ol miting Kristen?

¹⁸ Bilong amamasim Jehova, yumi mas lusim lotu giaman, ol pasin bilong en, na ol amamas bilong ol bikpela de i insait long en. Na yumi mas bihainim lotu i tru. Olsem wanem yumi inap mekim olsem? Wanpela rot em long go oltaim long ol miting Kristen. (Ritim Hibru 10:24, 25.) Ol miting i bikpela samting long lotu i tru. (Song 22:22; 122:1) Yumi ken strongim narapela narapela taim yumi bung wantaim.—Rom 1:12.

19. Bilong wanem em i bikpela samting long tokim ol narapela long tok i tru bilong Baibel em yu bin lainim?

¹⁹ Narapela rot bilong bihainim lotu i tru, em pasin bilong tokim ol narapela long ol samting yu lainim long Baibel. Planti manmeri i bel hevi long ol pasin nogut i kamap long graun. Ating yu save long sampela i pilim olsem. Tokim ol long ol gutpela samting yu bilip na wetim bai kamap bihain. Taim yu go long ol miting Kristen na tokim ol narapela long tok i tru bilong Baibel, bai yu lukim olsem laik bilong yu long insait long ol samting bilong lotu giaman na ol pasin bilong en bai pinis. Yu ken save olsem yu bai amamas na Jehova bai givim yu planti blesing long ol hatwok yu mekim bilong lotuim em long pasin em i laikim.—Malakai 3:10.