1, 2. Hi xihi xivutiso lexi u faneleke u tivutisa xona naswona ha yini swi ri swa nkoka?

LOKO u ri karhi u dyondza Bibele, u dyondze leswaku vanhu vo tala lava vulaka leswaku va gandzela Xikwembu, va dyondzisa ni ku endla swilo leswi Xikwembu xi swi vengaka. (2 Vakorinto 6:17) Hi yona mhaka leyi Yehovha a hi byelaka leswaku hi huma eka vugandzeri bya mavunwa, ku nga “Babilona Lonkulu.” (Nhlavutelo 18:2, 4) Xana u ta endla yini? Un’wana ni un’wana wa hina u fanele a endla xiboho, hi fanele hi tivutisa, ‘Xana ndzi gandzela Xikwembu hi ndlela leyi xi yi lavaka, kumbe ndzi lava ku xi gandzela hi ndlela leyi a ndzi xi gandzela ha yona?’

² Loko se u byi tshikile vugandzeri bya mavunwa, u endle kahle. Kambe ku nga ha va ni swiendlo swin’wana ni mikhuva ya le vukhongerini bya mavunwa leyi wa ha yi rhandzaka ni sweswi. A hi kambisise swin’wana swa swiendlo ni mikhuva leyi kutani hi vona leswaku ha yini swi ri swa nkoka leswaku hi yi languta hi ndlela leyi Yehovha a yi langutaka ha yona.

3. (a) Ha yini van’wana swi nga ha va tikelaka ku tshika ku tirhisa swifaniso loko va gandzela? (b) Bibele yi ri yini hi ku tirhisa swifaniso loko hi gandzela Xikwembu?

³ Vanhu van’wana va tirhise swifaniso ni tindhumbha emakaya ya vona leswaku va gandzela Xikwembu ku ringana malembe yo tala. Loko ku ri hileswaku na wena a wu swi tirhisa, u nga ha vona swi hoxile ku gandzela Xikwembu handle ka swona. Kambe tsundzuka leswaku Yehovha u hi dyondzisa ndlela leyi hi faneleke hi n’wi gandzela ha yona. Bibele yi swi veka erivaleni leswaku Yehovha a nga lavi leswaku hi tirhisa swifaniso  loko hi n’wi gandzela.​—Hlaya Eksoda 20:4, 5; Pisalema 115:4-8; Esaya 42:8; 1 Yohane 5:21.

4. (a) Ha yini hi nga fanelanga hi gandzela vakokwa wa hina lava feke? (b) Ha yini Yehovha a byele vanhu vakwe leswaku va nga ringeti ku vulavula ni lava feke?

⁴ Vanhu van’wana va tirhisa mali yo tala va ringeta ku tsakisa vakokwa wa vona lava feke. Va nga ha tlhela va va gandzela. Kambe hi dyondze leswaku lava feke a va nge swi koti ku hi pfuna kumbe ku hi vavisa. A va hanyi endhawini yo karhi. Entiyisweni, swi ni khombo ku ringeta ku vulavula na vona hikuva rungula rin’wana ni rin’wana leri tikombaka ri huma eka xaka leri feke kahlekahle ri va ri huma eka madimona. Hi yona mhaka leyi Yehovha a leriseke Vaisrayele leswaku va nga ringeti ku vulavula ni lava feke kumbe ku katseka eka swilo leswi fambisanaka ni madimona.—Deteronoma 18:10-12; vona Nhlamuselo ya le hansi 26 na 31.

5. I yini lexi nga ku pfunaka ku tshika ku tirhisa swifaniso loko u gandzela Xikwembu kumbe ku tshika ku gandzela vakokwa wa wena lava feke?

⁵ I yini lexi nga ku pfunaka ku tshika ku tirhisa swifaniso loko u gandzela Xikwembu kumbe ku tshika ku gandzela vakokwa wa wena lava feke? U fanele u hlaya Bibele naswona u anakanyisisa hi vukheta hi ndlela leyi Yehovha a swi langutaka ha yona swilo sweswo. U swi teka swi ri leswi “nyenyetsaka.” (Deteronoma 27:15) Khongela eka Yehovha siku ni siku u kombela leswaku a ku pfuna u languta swilo hi ndlela leyi a swi langutaka ha yona ni ku tlhela a ku pfuna leswaku u n’wi gandzela hi ndlela leyi a lavaka ha yona. (Esaya 55:9) U nga tiyiseka leswaku Yehovha u ta ku nyika matimba lama lavekaka leswaku u lahla swilo hinkwaswo leswi fambisanaka ni vugandzeri bya mavunwa.

6. Ha yini ku hlawuriwe siku ra ti-25 ta December leswaku ku tlangeriwa siku ra ku velekiwa ka Yesu?

⁶ Emisaveni hinkwayo, Khisimusi i yin’wana ya tiholideyi  leti tolovelekeke naswona vanhu vo tala va anakanya leswaku i siku ra ku tlangela ku velekiwa ka Yesu. Kambe Khisimusi yi fambisana ni vugandzeri bya mavunwa. Encyclopedia yin’wana yi hlamusela leswaku vahedeni va le Rhoma a va tlangela ku velekiwa ka dyambu hi ti-25 ta December. Vafundhisi a va lava leswaku vahedeni vo tala va va Vakreste, hambileswi Yesu a nga velekiwangiki hi ti-25 ta December, va endle xiboho xo tlangela ku velekiwa ka Yesu hi siku leri. (Luka 2:8-12) Vadyondzisiwa va Yesu a va yi tlangelanga Khisimusi. Buku yin’wana ya tinhlamuselo leyi nge Sacred Origins of Profound Things yi hlamusela leswaku endzhaku ka malembe ya 200 Yesu a velekiwile, “a nga kona loyi a a tiva lomu a velekeriweke kona, naswona vo tala a va nga ri na mhaka nileswaku u velekeriwe kwihi.” Ku va vanhu va tlangela Khisimusi swi sungule endzhaku ka malembe yo tala Yesu a file.

7. Ha yini Vakreste va ntiyiso va nga yi tlangeli Khisimusi?

⁷ Vanhu vo tala va swi tiva leswaku masungulo ya Khisimusi ma sekeriwe eka mikhuva ya vuhedeni, yo tanihi ku endla minkhuvo ni ku nyikela tinyiko. Hi xikombiso, eNghilandhi ni le swiphen’wini swin’wana swa le Amerika, ku ve ni nkarhi lowu a swi nga pfumeleriwi ku tlangela Khisimusi hikwalaho ka leswi yi sunguriweke hi vahedeni. Un’wana ni un’wana loyi a yi tlangela a xupuriwa. Kambe vanhu va tlhele va sungula ku yi tlangela. Ha yini Vakreste va ntiyiso va nga yi tlangeli Khisimusi? Hikuva va lava ku tsakisa Xikwembu eka swilo hinkwaswo leswi va swi endlaka.

8, 9. Ha yini Vakreste vo sungula va nga ma tlangelanga masiku ya ku velekiwa?

⁸ Vanhu vo tala va tlangela siku leri va velekiweke ha rona. Xana Vakreste va fanele va tlangela siku leri va velekiweke ha rona? EBibeleni ku boxiwa ntsena minkhuvo ya ku tlangela masiku ya ku velekiwa leyi tlangeriweke hi vanhu lava a va nga n’wi gandzeli Yehovha. (Genesa 40:20; Marka 6:21) Minkhuvo  ya ku tlangela masiku ya ku velekiwa a yi endleriwa ku gandzela swikwembu swa mavunwa. Hi yona mhaka leyi Vakreste vo sungula “a va teka ku tlangela siku ra ku velekiwa ka munhu wo karhi ku ri mukhuva wa vuhedeni.”—The World Book Encyclopedia.

⁹ Varhoma va khale ni Magriki a va tshemba leswaku ku ni moya lowu a wu fika loko munhu a velekiwa nileswaku moya wolowo a wu ta n’wi sirhelela vutomi byakwe hinkwabyo. Buku yin’wana leyi nge The Lore of Birthdays, yi ri: “Vanhu lava nga riki Vakreste va le nkarhini wolowo a va tlangela masiku ya ku velekiwa hikuva a va ehleketa leswaku mukhuva lowu a wu ta endla leswaku swikwembu swa vona swi sirhelela loyi ku nga siku rakwe ro velekiwa.”

10. Ha yini Vakreste va nga ma tlangeli masiku ya ku velekiwa namuntlha?

¹⁰ Xana u ehleketa leswaku Yehovha u tsakisiwa hi minkhuvo leyi fambisanaka ni vukhongeri bya mavunwa? (Esaya 65:11, 12) Doo! Hi yona mhaka leyi hi nga ma tlangeriki masiku ya ku velekiwa kumbe holideyi yin’wana ni yin’wana leyi fambisanaka ni vukhongeri bya mavunwa.

11. Ha yini vanhu van’wana va tlangela tiholideyi? Hi wihi nchumu lowu faneleke wu va wa nkoka swinene eka wena?

¹¹ Vanhu vo tala va swi tiva leswaku Khisimusi ni tiholideyi tin’wana swi sunguriwe hi vahedeni, kambe va ya emahlweni va swi tlangela. Va vona onge tiholideyi ti va nyika nkarhi lowunene wo va ni mindyangu ya vona. Xana na wena u titwa hi ndlela yoleyo? A swi bihanga ku lava ku va ni ndyangu wa wena. Yehovha u vumbe ndyangu naswona u lava leswaku hi va ni vuxaka lebyinene ni mindyangu ya hina. (Vaefesa 3:14, 15) Hambiswiritano, hi fanele hi tiyimisela ku va ni vuxaka lebyinene na Yehovha ematshan’weni yo tsakisa maxaka ya hina hi ku tlangela tiholideyi ta vukhongeri bya mavunwa. Hi yona mhaka leyi muapostola Pawulo a vuleke a ku: “Hambetani mi tiyiseka hi leswi amukelekaka eHosini.”—Vaefesa 5:10.

12. I yini lexi endlaka leswaku Yehovha a nga ti amukeli tiholideyi?

 ¹² Vanhu vo tala va anakanya leswaku a swi na mhaka leswaku tiholideyi ti sungule kwihi, kambe Yehovha a nga titwi hi ndlela yoleyo. A nga ti amukeli tiholideyi leti humaka eka vukhongeri bya mavunwa kumbe leti vangamisaka vanhu kumbe mimfungho ya tiko. Hi xikombiso, Vaegipta a va endlela swikwembu swa vona swa mavunwa minkhuvo yo tala. Endzhaku ka loko Vaisrayele va hume aEgipta, va tekelele wun’wana wa minkhuvo ya vuhedeni ya Vaegipta kutani va wu vitana “nkhuvo wa Yehovha.” Kambe Yehovha u va xupurile hikwalaho ka sweswo. (Eksoda 32:2-10) Hilaha muprofeta Esaya a vuleke hakona, hi fanele hi nga “khumbi nchumu lexi nga basangiki.”—Hlaya Esaya 52:11.

13. Hi swihi swivutiso leswi u nga ha vaka u ri na swona loko u endla xiboho xo tshika ku tlangela tiholideyi?

¹³ Loko u endla xiboho xo tshika ku tlangela tiholideyi, u nga ha va u ri ni swivutiso swo tala. Hi xikombiso: Ndzi fanele ndzi endla yini loko vatirhikulorhi va ndzi vutisa leswaku ha yini ndzi nga tlangeli Khisimusi? Ndzi fanele ndzi endla yini loko un’wana a ndzi nyika nyiko ya Khisimusi? Ndzi fanele ndzi endla yini loko munghana wa mina wa vukati a lava leswaku ndzi tlangela holideyi? Ndzi nga va pfuna njhani vana va mina leswaku va nga khunguvanyeki hileswi va nga tlangeliki holideyi kumbe siku ra ku velekiwa ka vona?

14, 15. U fanele u endla yini loko munhu un’wana a ku navelela leswaku u tiphina hi holideyi kumbe a ku nyika nyiko?

¹⁴ I swa nkoka leswaku u tirhisa vutlhari loko u endla xiboho xa leswi u faneleke u swi vula ni leswi u nga ta swi endla eka xiyimo xin’wana ni xin’wana. Hi xikombiso, loko vanhu va ku navelela leswaku u tiphina hi holideyi yo karhi, a wu fanelanga u va papalata. U nga ha ku, “Ndza nkhensa.” Kambe eka swiyimo leswi munhu a lavaka ku tiva leswi engetelekeke, u nga ha hlawula ku hlamusela xivangelo lexi endlaka leswaku  u nga tlangeli holideyi. Hambiswiritano, minkarhi hinkwayo vana ni musa, vuxiyaxiya ni xichavo. Bibele yi ri: “Marito ya n’wina a ma ve ni nsovo nkarhi hinkwawo, ma lungiwe hi munyu, leswaku mi tiva ndlela leyi mi faneleke ku hlamula un’wana ni un’wana ha yona.” (Vakolosa 4:6) Kumbexana u nga ha hlamusela leswaku wa swi tsakela ku heta nkarhi ni van’wana ni ku va nyika tinyiko kambe u hlawula ku endla tano hi nkarhi wun’wana lowu nga fambisaniki ni tiholideyi.

¹⁵ U fanele u endla yini loko un’wana a ku nyika nyiko? Bibele a yi xaxameti milawu, kambe yi vula leswaku hi fanele hi tshama hi ri ni ripfalo lerinene. (1 Timotiya 1:18, 19) Swi nga ha endleka leswaku munhu loyi a ku nyikaka nyiko a nga swi tivi leswaku a wu tlangeli holideyi. Kumbe a nga ha ku, “Ndza swi tiva leswaku a wu tlangeli holideyi, kambe nilokoswiritano ndzi lava ku ku nyika leswi.” Emhakeni yoleyo, u nga ha endla xiboho xo yi amukela kumbe xo ka u nga yi amukeli. Kambe eka xiboho xin’wana ni xin’wana lexi u xi endlaka, tiyiseka leswaku u tshama u ri ni ripfalo leri baseke. A hi lavi ku endla nchumu lowu nga ta khumba vuxaka bya hina na Yehovha hi ndlela yo biha.

16. U fanele u endla yini loko ndyangu wa wena wu lava ku tlangela holideyi?

¹⁶ U fanele u endla yini loko ndyangu wa wena wu lava ku tlangela holideyi? A wu fanelanga u lwisana na wona. Tsundzuka, wu ni mfanelo yo endla leswi wu swi lavaka. Vana ni musa u tlhela u xixima leswi wu hlawulaka ku swi endla hilaha na wena u lavaka leswaku wu xixima swiboho swa wena. (Hlaya Matewu 7:12.) Kambe loko ndyangu wa wena wu lava leswaku u heta nkarhi na wona hi holideyi yo karhi, u fanele u endla yini? Emahlweni ko va u endla xiboho xa leswi u nga ta swi endla, khongela eka Yehovha a ku pfuna leswaku u endla xiboho lexinene. Anakanya hi xiyimo xexo kutani u  endla ndzavisiso hi mhaka yoleyo. Tsundzuka leswaku minkarhi hinkwayo u lava ku tsakisa Yehovha.

17. U fanele u endla yini leswaku u pfuna vana va wena leswaku va papalata ku titwa onge va kayela swin’wana loko va vona van’wana va ri karhi va tlangela tiholideyi?

¹⁷ U fanele u endla yini leswaku u pfuna vana va wena loko va vona van’wana va ri karhi va tlangela tiholideyi? Nkarhi na nkarhi, u nga va endlela swilo swo hlawuleka. Nakambe u nga ha va nyika tinyiko. Nyiko yin’wana ya nkoka swinene leyi u nga yi nyikaka vana va wena i nkarhi swin’we ni rirhandzu ra wena.

18. Ha yini hi fanele hi ya eminhlanganweni ya Vukreste?

¹⁸ Leswaku hi tsakisa Yehovha, hi fanele hi tshika vukhongeri bya mavunwa swin’we ni mikhuva ni tiholideyi leti fambisanaka na byona. Hi fanele hi hanya hi vugandzeri bya ntiyiso. Njhani? Ndlela yin’wana i ku va kona nkarhi na nkarhi eminhlanganweni ya Vukreste. (Hlaya Vaheveru 10:24, 25.) Minhlangano i xiphemu xa nkoka swinene xa vugandzeri bya ntiyiso. (Pisalema 22:22; 122:1) Loko hi hlangana swin’we ha khutazana.—Varhoma 1:12.

19. Ha yini swi ri swa nkoka ku byela van’wana hi ntiyiso wa Bibele lowu u wu dyondzeke?

¹⁹ Xiphemu xin’wana xa vugandzeri bya ntiyiso i ku vulavula ni van’wana hileswi u swi dyondzeke eBibeleni. Vanhu vo tala va titwa va tshikilelekile hi swilo swo biha leswi endlekaka emisaveni. Kumbexana u tiva vanhu van’wana lava titwaka hi ndlela yoleyo. Va byele hi ntshembo wa wena wo tsakisa hi vumundzuku. Loko u ri karhi u ya eminhlanganweni ya Vukreste ni ku byela van’wana hi ntiyiso wa Bibele, u ta swi xiya leswaku a wa ha swi lavi ku va xiphemu xa vukhongeri bya mavunwa swin’we ni mikhuva ya byona. U nga tiyiseka leswaku u ta va ni ntsako nileswaku Yehovha u ta ma katekisa swinene matshalatshala ya wena yo hlawula ku n’wi gandzela hi ndlela leyinene.—Malakiya 3:10.