1, 2. Xiwutiso muni u faneleko ku ti maha, niku hikuyini zi nga za lisima?

LAHA u nga kari u gonza Biblia, u gonzile lezaku a vanhu vo tala lava va nge va khozela Nungungulu, va gonzisa va tlhela va maha zilo lezi Nungungulu a zi vengako. (2 Va Le Korinte 6:17) Hi zalezo zi mahako Nungungulu aku humani ka wukhongeli ga mawunwa — “Babuloni loyi wa Hombe.” (Kuvululelwa 18:2, 4) U ta maha yini? A munwe ni munwani wa hina i fanele ku ti mahela xiboho ha yece. Hi fanele ku ti wutisa lezi kambe: ‘Nzi lava ku khozela Nungungulu hi lezi a zi lavisako zona ke, ni ku nzi lava ku simama nzi mu khozelisa zezi nzi mahisako zona?’

² Loku makunu u humile wukhongelini ga mawunwa, u mahile khwatsi. Kanilezi, za koteka ku na ka ha hi ni zimaho kutani mikhuwo ya wukhongeli ga mawunwa leyi ya ha ku tsakisako lomu mbilwini ya wena. A hi wone a yo kari ya yona, hi tlhela hi wona lezaku hikuyini zi nga za lisima a ku yi wonisa lezi Jehova a yi wonisako zona.

3. a) Hikuyini a vanwani zi nga ha va karatelako ku tsika ku tirisa zifananiso loku va khozela Nungungulu? b) Zini lezi a Biblia gi zi wulako xungetano hi ku tirisa zifananiso loku hi khozela Nungungulu?

³ A vokari va na ni malembe yo tala na va hi ni zifananiso kutani tindhumba lomu mitini yabye, lezi va zi tirisako kasi ku khozelako Nungungulu hi zona. Loku u hi nazo, zi nga ha ku karatela hambu ku zi wona na zi bihile a ku khozela Nungungulu na u nga tirisi zilo lezo. Kanilezi, alakanya lezaku Jehova hi yena a hi byelako lezi hi faneleko ku mu khozelisa zona. Niku a Biblia gi wula ziku dlunya lezaku Jehova a nga  lavi lezaku hi tirisa zifananiso loku hi mu khozela. — Gonza Eksodusi 20:4, 5; Tisimu 115:4-8; Isaya 42:8; 1 Johani 5:21.

4. a) Hikuyini hi nga faneliko ku phahla kutani ku khozela tinguluve? b) Hikuyini Jehova a nga byela vanhu vakwe lezaku va nga zami ku wulawula ni tinguluve?

⁴ A vanhu vo kari va nga mbheta xikhati xo tala ni ntamu na va zama ku tsakisa tinguluve tabye. Va ngaza va phahla kutani ku ti khozela futsi. Kanilezi, hi gonzile lezaku lava va fileko a va nge hi vuni ne ku hi mahela zo biha. A va hanyi ka wutshamu go kari. Hi lisine, a ku zama ku wulawula navo zi na ni khombo, hakuva ni wahi mahungu ma wonekisako ku khwatsi mata hi ka maxaka ya hina ma fileko, hi lisine mata hi ka madimoni. Hi xigelo lexo Jehova a nga laya vaIsraeli lezaku va nga zami ku wulawula ni tinguluve kutani ku ti nghenisela ni ka lihi lixaka la wudimoni. — Deuteronome 18:10-12; wona Tlhamuselo wa wu 26 ni wa wu 31.

5. Zini zi to ku vuna ku tsika ku tirisa zifananiso loku u khozela Nungungulu ni ku tsika ku khozela tinguluve?

⁵ Zini zi to ku vuna ku tsika ku tirisa zifananiso loku u khozela Nungungulu ni ku tsika ku phahla kutani ku khozela tinguluve? U fanele ku gonza Biblia u tlhela u ehleketa hi lezi Jehova a zi wonisako zona zilo lezo. Jehova i zi wona zi hi “manyala” kutani zilo zo nyenyeza. (Deuteronome 27:15) Kombela Jehova siku ni siku lezaku a ku vuna ku wona zilo kota lezi a zi wonisako zona, ni ku ku vuna ku mu khozelisa lezi a zi lavisako zona. (Isaya 55:9) Loku u maha lezo, tiyiseka lezaku Jehova i ta ku nyika ntamu wu lavekako kasi ku tsawukana ni zontlhe zi yelanako ni wukhozeli ga mawunwa.

6. Hikuyini ku nga hlawuliwa a 25 ka Dezembro kota siku ga ku tsakela kupswaliwa ka Jesu?

⁶ A Khisimuso munwe wa mibuzo yi tivekako nguvu misaveni yontlhe, niku a vanhu vo tala va alakanya lezaku a Khisimuso mubuzo wa ku tsakela siku ga kupswaliwa ka  Jesu. Kanilezi, a xo tiya hi lezaku a Khisimuso gi yelana ni wukhozeli ga mawunwa. A bhuku go kari gi tlhamusela lezaku hi 25 ka Dezembro, a mahedeni ya vaRoma ma wa maha mubuzo wa ku tsakela kupswaliwa ka gambo. Hambu lezi ka ku Jesu a nga pswaliwangi hi 25 ka Dezembro, a varangeli va tichechi va lo sangula ku vumela ku a maKristu maga Khisimuso hi ku lava ku a mahedeni yo tala ma maha maKristu. (Luka 2:8-12) A vapizani va Jesu va wa ngagi Khisimuso. A bhuku go kari gi wula lezaku nzeni ka 200 wa malembe anzhako ka kupswaliwa ka Jesu, “a ku na munhu a nga zi tiva, niku vatsongwani va nga khatalela ku zi tiva a ku [Jesu] i pswalilwe rini.” (Sacred Origins of Profound Things) A Khisimuso gi sangulile ku giwa loku ku hunzile malembe yo tala nguvu anzhako ka ku Jesu a hanyile laha misaveni.

7. Hikuyini a maKristu ma kalako ma ngagi Khisimuso?

⁷ A vanhu vo tala va zi tiva lezaku a Khisimuso ni mikhuwo ya gona yontlhe — yo kota mibuzo ni ku nyikana zinyikiwo — zi tumbulukele ka wuhedeni. Hi xikombiso, le Inglaterra ni ka matiko manwani ya América, kuve ni xikhati lexi zi nga beletelwa a kuga Khisimuso hi kota ya lezi gi tumbulukeleko wuhedenini. Ni wihi a ngaga Khisimuso, i wo tsayisiwa. Kanilezi, hi kufamba ka xikhati a vanhu va lo tlhela va sangula kambe a kuga Khisimuso. Hikuyini a maKristu ma kalako ma ngagi a Khisimuso? Hi lezaku ma lava ku tsakisa Nungungulu ka zontlhe ma zi mahako.

8, 9. Hikuyini a maKristu yo sangula ma nga kala ma nga mahi mubuzo wa kutsakela siku ga kupswaliwa ka munhu?

⁸ A mubuzo wunwani wu tiviwako nguvu hi vanhu mubuzo wa ku tsakela siku ga kupswaliwa ka munhu. Xana a muKristu i fanele ku maha mubuzo lowo? A mibuzo ya tshamela legi yi kumbukiwako lomu ka Biblia, yi mahilwe hi vanhu va nga kala va nga khozeli Jehova. (Genesisi 40:20; Marku 6:21) A mibuzo  ya ku tsakela siku ga kupswaliwa ka munhu yi wa mahelwa ku dumisa vanungungulu va mawunwa. Hi xigelo lexo a maKristu yo sangula ma nga kari ma “wona a mubuzo wa kutsakela a siku ga kupswaliwa ka munhu kota mukhuwo wa wuhedeni.” — Ku wula bhuku The World Book Encyclopedia.

⁹ A vaRoma ni vaGreki va kale va wa kholwa lezaku ka siku legi a munhu ni munhu a pswaliwako, ku na ni xivangwa xa moya xi wonelelako a kupswaliwa ka munhu loye, xi gumesa xi mu vikela wutomini gakwe gontlhe. A bhuku go kari gi tlhamusela lezi: “A xivangwa lexo xa moya xi wa yelana hi tlhelo ga wungoma ni nungungulu loyi a siku ga kupswaliwa kakwe gi nga kotlana ni ga munhu loye.” — Ku wula bhuku The Lore of Birthdays.

10. Hikuyini a maKristu inyamutlha ma nga faneliko ku maha mubuzo wa kutsakela siku ga kupswaliwa ka munhu?

¹⁰ Hi mawonela ya wena, Jehova wa yi tsakela a mibuzo yi yelanako ni wukhongeli ga mawunwa ke? (Isaya 65:11, 12) Ahihi, a nga yi tsakeli. Hi xigelo lexo hi nga mahiko mibuzo ya kutsakela siku ga kupswaliwa ka munhu kutani feriado yinwani yi yelanako ni wukhongeli ga mawunwa.

11. a) Hikuyini a vanhu vo kari va mahako mibuzo ya masiku ya tiferiado? b) Zini hi faneleko ku zi nyika nguvu lisima?

¹¹ A vokari va zi tiva lezaku a Khisimuso ni tiferiado tinwani zi ntumbulukile ka wuhedeni, kanilezi a va tsiki ku patseka ka zona. Va wona mibuzo leyo kota xikhati xi nene xa ku tshama ni mingango yabye. Wenawu u zi wonisa lezo ke? Kunene, a zi bihangi a ku a mingango yi mbheta xikhati na yi hi zinwe. Jehova hi yena mutumbuluxi wa ngango, niku i lava lezaku hi hanya hi kuzwanana ni maxaka ya hina. (Va Le Efesusi 3:14, 15) Hambulezo, hi fanele ku nyika nguvu lisima a wuxaka ga hina na Jehova ku hunza ku tsakisa maxaka ya hina hi ku patseka ka tiferiado ta wukhongeli ga mawunwa. Hi xigelo lexo  mupostoli Paule a ngaku: “Hlolani mu tiva lezi zi tsakisako Hosi.” — Va Le Efesusi 5:10.

12. Xini xi mahako lezaku a feriado yo kari yi nga mu tsakisi Jehova?

¹² A vanhu vo tala a va na mhaka hi lomu a tiferiado to kari ti nga tumbulukela kona. Kanilezi, Jehova a nga zi wonisi lezo. A nga ti tsakeli a tiferiado ti tumbulukeleko ka wukhozeli ga mawunwa ni leti ti dzunzako vanhu kutani matiko. Hi xikombiso, a vaGipite va wa hi ni mibuzo yo tala leyi va nga mahela vanungungulu vabye va mawunwa. A xikhati lexi a vaIsraeli va nga huma le Gipite, va lo pimanyisa a munwe wa mibuzo leyo va wu vitana ku “mubuzo wa Jehova.” Kanilezi, Jehova i lo va tsayisa hi kota ya mubuzo lowo. (Eksodusi 32:2-10) A kufana ni lezi muprofeti Isaya a nga wula, a hi faneli ku ‘khumba ni xilo xinwe xi nga hlazekangiko!’ — Gonza Isaya 52:11.

13. Zini u nga lavako ku zi tiva loku u tsika ku maha mibuzo yi nga mu tsakisiko Jehova?

¹³ Laha u tsikako ku maha mibuzo leyo, u nga ti wutisa zotala. U nga ha ti wutisa lezi: Nzi ta va byela yini a vatiri-kuloni loku va nzi wutisa ku hikuyini nzi kalako nzi ngagi Khisimuso? Loku a wokari a nzi nyika xinyikiwo ke, nzi fanele ku maha yini? Ahati loku a sati kutani nuna wa mina a lava lezaku hiva zinwe ka mubuzo wo kari wu nga basangiko ke? Nzi nga va vunisa kuyini a vana va mina kasi va nga xukuvali hi ku kala va ngagi Khisimuso, kutani loku hi nga mahi mubuzo loku va tlhanganyisa malembe ke?

14, 15. Zini u nga mahako loku a wokari a ku wutisa ku u taga yini a Khisimuso legi, kutani loku a ku nyika xinyikiwo?

¹⁴ Za lisima a ku ranga hi ku ehleketa khwatsi kasi u tiva xo wula ni xo maha ka xiyimo xinwe ni xinwani. Hi xikombiso, loku va tshuka va ku wutisa a ku u taga yini a Khisimuso legi, u nga ha va byela lezaku a nzi longiselangi nchumu. Hambulezo, ka xiyimo lexi a wokari kuzilava a tsakelako ku tiva zinwani, u nga ha mu tlhamusela a ku hikuyini u kalako u nga  mahi a mibuzo leyo. Kanilezi, xontlhe xikhati tlhamusela a xiyimo xa wena khwatsanyana, u tlhela u kombisa xichawo ni wunene. A Biblia gi ngalo: “Ngha kuwulawula ka nwina ku hi ni tipswalo xontlhe xikhati, na ku lungilwe hi munyu, lezaku mu fela ku tiva lezi mu ta nga hlamulisa zona ka munwe ni munwani.” (Va Le Kolosi 4:6) Kuzilava u nga va tlhamusela lezaku wenawu wa tsaka hi ku maha mibuzo ni ku nyikana zinyikiwo, kanilezi u zi wona zi hi chukwana ku zi maha hi xikhati xinwani.

¹⁵ Ahati loku a wokari a ku nyika xinyikiwo ke, zini u faneleko ku maha? A Biblia a gi xaxameti milayo ya lezi u faneleko ku maha. Kanilezi, gi wula lezaku hi fanele ku maha lezi zi to hi siyela livalo li basileko. (1 Timote 1:18, 19) Kuzilava loyi a ku nyikako xinyikiwo lexo a nga zi tivi a ku a wu hlengeli ka mubuzo lowo. Kutani a nga ha wula lezi: “Nza zi tiva lezaku a wu hlengeli ka mubuzo lowu. Hambulezo, nzi lava ku ku nyika lezi.” Ka xiyimo xinwe ni xinwani, u fanele ku ti mahela xiboho xa ku u ta teka ke. Kanilezi, ni xihi xiboho u to xi maha, xi fanele ku ku siyela livalo li basileko. Hi wa nga ta tsakela ku maha nchumu wu nga wa ta onha wuxaka ga hina na Jehova.

16. Zini u faneleko ku maha loku a maxaka ya wena ma lava ku maha mubuzo wo kari?

¹⁶ Ahati loku a maxaka ya wena ma lava ku maha mubuzo wo kari? A zizi zi lava ku u holovisana nawo. Alakanya lezaku munhu ni munhu i fanele ku hlawula ha yece lezi a lavako ku ti mahela. Kombisa xichawo ni wunene. U nga kurumeti a mawonela ya wena, a ku fana ni lezi wenawu u lavako ku va nga ku kurumeti mawonela yabye. (Gonza Mateu 7:12.) Makunu, ahati loku va lava ku wenawu uva navo ka mubuzo lowo ke? Na u nga se maha xiboho, ranga hi ku kombela Jehova lezaku a ku vuna ku maha xiboho xa xi nene. Ehleketa khwatsi hi xiyimo lexo u tlhela u kambisisa lomu ka  mabhuku ya hlengeletano. U nga rivali lezaku xontlhe xikhati u fanele ku tsakisa Jehova.

17. Zini u nga mahako kasi ku vuna vana va wena lezaku va nga tizwi na va luza xokari loku va wona vanwani na va maha mibuzo hi masiku ya tiferiado?

¹⁷ U nga va vunisa kuyini a vana va wena loku va wona vanwani na va maha mibuzo yi nga tsakisiko Jehova? A xa xi nene, ku ta na u va mahela zilo zo hlawuleka. U ngata na u va nyika zinyikiwo zo kari. Niku a xinwe xa zinyikiwo za zi nene lezi u nga nyikako vana va wena, ku ti nyika xikhati xa ku tshama navo ni ku va ranza.

18. Hikuyini hi faneleko kuya mitlhanganweni ya wuKristu?

¹⁸ Kasi ku tsakisa Jehova, hi fanele ku huma wukhongelini ga mawunwa hi tlhela hi tsika tiferiado ni mikhuwo yontlhe yi yelanako ni wukhozeli ga mawunwa. A hi lezo ntsena, hi fanele ku hanya hi wukhongeli ga lisine kambe. Hi nga zi mahisa kuyini? A yinwe ya tindlela, kuya mitlhanganweni ya wuKristu hi kukhanzakanya. (Gonza Maheberu 10:24, 25.) A mitlhangano i nchumu wa lisima nguvu wukhozelini ga hina. (Tisimu 22:22; 122:1) Loku hi hi mitlhanganweni leyo, ha tiyisana.— Va Le Roma 1:12.

19. Hikuyini zi nga za lisima a ku bhulela vanwani a lisine leli u li gonzako lomu ka Biblia?

¹⁹ A ndlela yinwani ya ku hanya hi wukhozeli ga lisine, ku bhulela vanwani lezi u zi gonzako lomu ka Biblia. Ku na ni vanhu vo tala va karatekako hi kota ya wubihi legi gi nga kona laha misaveni. Kuzilava va kona u va tivako va ti zwisako lezo. Va bhulele zilo za zi nene lezi u zi rinzelako xikhatini xi tako. Laha u yako mitlhanganweni ya wuKristu u tlhela u bhulela vanwani a lisine la Biblia, u nga ta ha navela wukhongeli ga mawunwa ni mikhuwo ya gona yontlhe. Tiyiseka lezaku u ta tsaka u tlhela u katekisiwa nguvu hi Jehova laha u ti karatelako ku mu khozela kota lezi a zi lavisako zona. — Malaki 3:10.