1, 2. Ni mafumbo wuli agho tikwenera kujifumba? Chifukwa wuli tikwenera kujifumba mafumbo agha?

MWATI mwasambira Baibolo, mwamanya kuti ŵanthu ŵanandi awo ŵakuti ŵakusopa Chiuta, ŵakusambizga panji kuchita vinthu ivyo Chiuta wakutinkha. (2 Ŵakorinte 6:17) Lekani Yehova wakutiphalira kuti tifumemo mu chisopa chautesi, icho ni “Babuloni Mukuru.” (Chivumbuzi 18:2, 4) Kasi muchitenge wuli? Waliyose wakwenera kusankha, ndipo wakwenera kujifumba kuti, ‘Kasi nkhukhumba kusopa Chiuta mu nthowa iyo wakuzomerezga, panji mu nthowa iyo nili kuzgoŵera?’

² Para muli kufumamo kale mu chisopa chautesi panji muli kulayira, muli kuchita makora chomene. Kweni panji pachali tuvigomezgo na tumaluso tunyake twa chisopa chautesi uto muchali kutemwa. Tiyeni tiwone tuvigomezgo na tumaluso utu ndiposo chifukwa icho tikwenera kutuwona nga umo Yehova wakuwonera.

3. (a) Chifukwa wuli ŵanyake vingaŵasuzga kuleka kugwiliskira ntchito vikozgo pakusopa? (b) Kasi Baibolo likuti wuli pa nkhani ya kugwiliskira ntchito vikozgo pakusopa?

³ Kwa vyaka vinandi, ŵanthu ŵanyake ŵakuŵa na vikozgo na tunthu tunyake mu nyumba zawo ndipo ŵakuvigwiliskira ntchito pakusopa. Para ndivyo namwe mukazgoŵera, mungawona kuti ntchachilendo panji ntchiwemi yayi kusopa Chiuta kwambura vinthu ivi. Kweni kumbukani kuti Yehova wakutisambizga umo tingamusopera. Kweniso Baibolo likutiphalira mwakupulikikwa makora kuti Yehova wakukhumba yayi kuti tigwiliskirenge ntchito vikozgo pakumusopa.—Ŵerengani Ekisodo 20:4, 5; Salimo 115:4-8; Yesaya 42:8; 1 Yohane 5:21.

4. (a) Chifukwa wuli ntchiheni kusopa ŵapapi ŵithu awo ŵali kufwa? (b) Chifukwa wuli Yehova wakakanizga ŵanthu ŵake kuyowoya na ŵakufwa?

 ⁴ Ŵanthu ŵanyake ŵakutaya nyengo na nkhongono zawo kuti ŵakondweske ŵapapi ŵawo awo ŵali kufwa. Ŵanyake ŵakuŵasopa. Kweni tili kusambira kuti ŵakufwa ŵangatovwira yayi panji kutipweteka. Ŵali na umoyo ku malo ghalighose yayi. Nakuti ntchakofya chomene kuyezga kuyowoyeskana nawo chifukwa uthenga uliwose uwo tikughanaghana kuti ukufuma kwa iwo, ukufuma ku viŵanda. Lekani Yehova wakaphalira Ŵaisrayeli kuti ŵangayezganga na pachoko wuwo yayi kuyowoyeskana na ŵakufwa panji kusopa viŵanda.—Dotoronome 18:10-12; wonani Mazgu Ghakuumaliro 25 na 30.

5. Ntchivichi chingamovwirani kuti muleke kugwiliskira ntchito vikozgo pakusopa Chiuta kweniso kusopa ŵapapi awo ŵali kufwa?

⁵ Ntchivichi chingamovwirani kuti muleke kugwiliskira ntchito vikozgo pakusopa Chiuta panji kuti muleke kusopa ŵapapi ŵinu awo ŵali kufwa? Muŵerengenge Baibolo na kughanaghanirapo chomene umo Yehova wakuwonera vinthu ivi. Yehova wakuwona kuti kuchita nthena “mbukazuzi” panji kuti nkhwakuseluska. (Dotoronome 27:15) Pempherani kwa Yehova zuŵa lililose kuti wamovwirani kuti muwonenge vinthu umo iyo wakuviwonera ndiposo kuti wamovwirani kuti mumusopenge mu nthowa iyo wakukhumba. (Yesaya 55:9) Para muchitenge nthena, Yehova wamupaninge nkhongono zakutayira chilichose icho chikukolerana na chisopa chautesi.

6. Chifukwa wuli chisopa chautesi chikasankha kuti chikumbukirenge kubabika kwa Yesu pa 25 Disembala?

⁶ Khisimasi ntchikondwelero chakutchuka chomene pa charu chose. Ndipo ŵanthu ŵanandi ŵakughanaghana kuti ŵakukumbukira zuŵa ilo Yesu wakababikira. Kweni chisopa chautesi ndicho chili kwambiska Khisimasi. Buku linyake likuti Ŵaroma ŵambura kusopa Chiuta ndiwo  ŵakakumbukiranga kubabika kwa chiuta zuŵa pa 25 Disembala. Ŵaliska ŵa matchalitchi ŵakakhumbanga kuti ŵanthu ŵambura kusopa Chiuta aŵa ŵazgoke Ŵakhristu. Icho ŵakachita ntchakuti, nangauli ŵakamanyanga kuti Yesu wakababika pa 25 Disembala yayi, kweni ŵakaŵika zuŵa ili kuti ndakukumbukira kubabika kwa Yesu. (Luka 2:8-12) Ŵasambiri ŵa Yesu ŵakachitanga yayi Khisimasi. Buku linyake likuti, vyaka 200 kufuma apo Yesu wakafwira, “palije uyo wakamanyanga, panji kuŵikako mahara ku zuŵa ilo Yesu wakababikira.” (Sacred Origins of Profound Things) Ŵanthu ŵakamba kuchita Khisimasi pati pajumpha vyaka vinandi chomene kufuma apo Yesu wakafwira.

7. Chifukwa wuli Ŵakhristu ŵaunenesko ŵakukondwelerako yayi Khisimasi?

⁷ Ŵanthu ŵanandi ŵakumanya kuti chisopa chautesi ndicho chikambiska Khisimasi na tumaluso uto tukuchitika pa Khisimasi nga ni mapate na kupana vyawanangwa. Mwachiyelezgero, nyengo yinyake ku England na vigaŵa vinyake vya ku America, ŵakakanizga kukondwelera Khisimasi chifukwa ŵakatenge nja ŵanthu ŵambura kusopa Chiuta. Uyo wakondwelera ŵakamupanga chilango. Kweni nyengo yikati yajumphapo, ŵanthu ŵakambaso kukondwelera Khisimasi. Chifukwa wuli Ŵakhristu ŵaunenesko ŵakukondwelerako yayi Khisimasi? Chifukwa ŵakukhumba kukondweska Chiuta pa chilichose icho ŵakuchita.

8, 9. Chifukwa wuli Ŵakhristu ŵakwambilira ŵakakondweleranga yayi mazuŵa ghakubabikira?

⁸ Kukondwelera zuŵa lakubabikira nako nkhwakutchuka chomene. Ndivyo ŵanandi ŵakuchita. Kasi Ŵakhristu ŵaunenesko ŵakukondwelera mazuŵa ghakubabikira? Yayi. Chifukwa vikondwelero vya zuŵa lakubabikira ivyo vikuzunulika mu Baibolo, ŵakachitanga mbanthu ŵambura kusopa Yehova. (Genizesi 40:20; Mariko 6:21) Ŵanthu aŵa ŵakakondweleranga  mazuŵa ghakubabikira kuti ŵachindike ŵachiuta ŵawo. Lekani Ŵakhristu ŵakwambilira “ŵakawonanga ŵanthu ŵambura kusopa Chiuta ndiwo ŵakukondwelera zuŵa lakubabikira.”—The World Book Encyclopedia.

⁹ Ŵaroma na Ŵagiriki ŵakagomezganga kuti para munthu wakubabika, mzimu ukuŵapo ndipo mzimu uwu ndiwo ukumuvikilira pa umoyo wake wose. Buku linyake likuti ŵanthu awo ŵakaŵa Ŵakhristu yayi ŵakakondweleranga mazuŵa ghakubabikira chifukwa ŵakaghanaghananga kuti para ŵachita nthena, ŵachiuta ŵawo ŵavikilirenge munthu uyo ŵakukondwelera zuŵa lake lakubabikira.—The Lore of Birthdays.

10. Chifukwa wuli Ŵakhristu mazuŵa ghano ŵakukondwelerako yayi mazuŵa ghakubabikira?

¹⁰ Kasi mukughanaghana kuti Yehova wangakondwa na vikondwelero ivyo visopa vyautesi vikambiska? Yayi. (Yesaya 65:11, 12) Lekani tikukondwelerako yayi mazuŵa ghakubabikira panji maholide ghalighose agho visopa vyautesi vikambiska.

11. Chifukwa wuli ŵanthu ŵanyake ŵakuchita vikondwelero? Kasi chakuzirwa chomene ntchivichi?

¹¹ Ŵanthu ŵanyake ŵakumanya kuti ŵanthu ŵambura kusopa Chiuta ndiwo ŵakambiska Khisimasi na vikondwelero vinyake, kweni ŵakulutilira kukondwelerako. Ŵakuwona kuti vikondwelero ivi vikuŵapa mwaŵi wa kuchezga na banja lawo. Kasi namwe mukuwona nthena? Ntchiheni yayi kuchezga na banja linu. Yehova ndiyo wakambiska banja ndipo wakukhumba kuti tikhalenge makora na banja lithu. (Ŵaefeso 3:14, 15) Kweni kuŵa paubwezi na Yehova ndiko nkhwakuzirwa chomene kuluska kukondweska ŵabali ŵithu. Lekani mpositole Paulosi wakati: “Lutilirani kusanda icho ntchakuzomerezgeka kwa Fumu.”—Ŵaefeso 5:10.

12. Kasi tingamanya wuli usange holide njiwemi panji yayi?

 ¹² Ŵanthu ŵanandi ŵakuwona kuti umo maholide ghakambira vilije ntchito, kweni Yehova wakuwona nthena yayi. Wakukondwa yayi na vikondwelero ivyo vili kufuma ku visopa vyautesi panji ivyo vikuchindika ŵanthu, ndembera, panji vimanyikwiro vinyake vya charu. Mwachiyelezgero, Ŵaeguputo ŵakachitanga vikondwelero vinandi kuti ŵakumbukire ŵachiuta ŵawo. Ŵaisrayeli ŵakati ŵafuma mu Eguputo, ŵakatolerako vikondwelero vya ŵachiuta ŵatesi ivi na kuvichema kuti “chiphikiro cha Yehova.” Kweni Yehova wakaŵalanga chifukwa cha kuchita nthena. (Ekisodo 32:2-10) Lekani ntchimi Yesaya yikati, “mungakhwaskanga chinthu chakufipirwa chara!”—Ŵerengani Yesaya 52:11.

13. Ni mafumbo wuli agho mungaŵa nagho para mukukhumba kuleka kuchitako vikondwelero?

¹³ Mungaŵa na mafumbo ghanandi para mukukhumba kuleka kuchitako vikondwelero vinyake. Mungajifumba kuti: Kasi ningachita wuli para awo nkhugwira nawo ntchito ŵanifumba chifukwa icho nkhuchitirako yayi Khisimasi? Kasi ningachita wuli para munthu wanipa chawanangwa pa Khisimasi? Kasi ningachita wuli para mfumu panji muwoli wane wakukhumba kuti tichitirenge lumoza chikondwelero chinyake? Kasi ningachita wuli kuti ŵana ŵane ŵaleke kudandawura chifukwa chakuti nkhuchitako yayi vikondwelero vinyake, panji kukondwelera mazuŵa ghawo ghakubabikira?

14, 15. Kasi mungachita wuli para munthu wakumukhumbirani viwemi panyengo ya chikondwelero chinyake panji wakumupani chawanangwa?

¹⁴ Ntchiwemi kuŵa ŵamahara kuti timanye ivyo tingayowoya panji kuchita pa nkhani iyi. Mwachiyelezgero, para munthu wakumukhumbirani viwemi panyengo ya chikondwelero chinyake, mungamuzerezganga waka yayi. Mungamuzgora waka kuti, “Nawonga.” Kweni para mukuwona kuti wakukhumba kumanya vinandi, mungamulongosolera chifukwa  icho mukulekera kuchitako chikondwelero icho. Kweni nyengo zose muchitenge vinthu mwamahara, mwalusungu, ndiposo mwantchindi. Baibolo likuti: “Ivyo mukuyowoya viŵenge vyakukondweska nyengo zose, vyakulungika na mchere, mwakuti mumanye umo mukwenera kuzgolera waliyose.” (Ŵakolose 4:6) Panji mungaŵaphalira kuti mukutemwa chomene kuchezga na ŵanyinu na kupana vyawanangwa, kweni muli kusankha kuleka kuchita nthena panyengo ya vikondwelero ivi.

¹⁵ Kasi mungachita wuli para munthu wamupani chawanangwa pa nyengo ya vikondwelero? Baibolo lindatilembere malango gha umo tingachitira, kweni likutiphalira waka kuti tiŵenge na njuŵi yituŵa. (1 Timote 1:18, 19) Panji uyo wakumupani chawanangwa wakumanya yayi kuti mukuchitako yayi chikondwelero icho. Panji munyake wangamuphalirani kuti, “Nkhumanya kuti mukuchitako yayi chikondwelero ichi, kweni nkhukhumba kumupani nipera chawanangwa.” Para vyaŵa nthena, mungasankha mwekha kuti mupoke panji yayi. Mukwenera kuwona mwekha usange njuŵi yimusuzganinge panji yayi para mungapoka. Tikukhumba yayi kuchita chilichose icho chingananga ubwezi withu na Yehova.

16. Kasi mungachita wuli para banja linu likukhumba kuchita chikondwelero icho mukuwona kuti ntchiheni?

¹⁶ Kasi mungachita wuli para banja linu likukhumba kuchita chikondwelero icho imwe mukuwona kuti ntchiheni? Kulimbana nawo yayi. Kumbukani kuti ŵali na wanangwa wa kusankha ivyo ŵakukhumba. Imwe mukukhumba kuti ŵachindikenge ivyo mukukhumba, ipo namwe ŵaghanaghanirani na kuchindika ivyo ŵasankha. (Ŵerengani Mateyu 7:12.) Kweni mungachita wuli para banja linu likuti namwe muŵepo pa chikondwelero icho? Pambere mundasankhe chakuchita, pempherani kwa Yehova kuti wamovwirani kuti musankhe mwamahara. Wonani umo vinthu viliri, ndipo  penjerezgani fundo zinyake zakukhwaskana na chikondwelero icho. Kumbukani kuti nyengo zose mukukhumba kukondweska Yehova.

17. Kasi mungachita wuli kuti ŵana ŵinu ŵaleke kudokera para ŵanyawo ŵakuchita vikondwelero?

¹⁷ Kasi mungachita wuli kuti ŵana ŵinu ŵaleke kudandawura para ŵakuwona ŵanyawo ŵakuchita vikondwelero? Nyengo zinyake mungachita nawo vinthu vinyake vyakukondweska. Mungaŵapa vyawanangwa panyengo yinyake yiliyose. Ndipo chawanangwa chikuru chomene icho mungaŵapa ŵana ŵinu ntchitemwa na kuchezga nawo.

18. Chifukwa wuli tikwenera kuluta ku maungano gha Ŵakhristu ŵaunenesko?

¹⁸ Kuti tikondweske Yehova, tikwenera kuleka chisopa chautesi ndiposo maluso na vikondwelero vyose ivyo chisopa chautesi chikuchita. Kweni tikwenera kusopa munthowa iyo wakukhumba. Kasi tingachita wuli? Nyengo zose tilutenge ku maungano gha Ŵakhristu ŵaunenesko. (Ŵerengani Ŵahebere 10:24, 25.) Maungano agha ngakuzirwa chomene ku Ŵakhristu ŵaunenesko. (Salimo 22:22; 122:1) Para tikuwungana pamoza, tikukhozgana.—Ŵaroma 1:12.

19. Chifukwa wuli ntchakuzirwa kuphalirako ŵanyinu ivyo mukusambira mu Baibolo?

¹⁹ Chinyake icho mungachita kuti mulongore kuti mwasankha chisopa chaunenesko nkhuphalirako ŵanyinu ivyo mwasambira mu Baibolo. Ŵanthu ŵanandi ŵakudagha panji kuti kusuzgika na vinthu viheni ivyo vikuchitika mu charu. (Ezekiyeli 9:4) Panji mukumanyapo ŵanyake awo ŵakusuzgika. Ŵaphaliraniko vinthu vyakukondweska ivyo vili kunthazi. Para mukuluta ku maungano na kuphalirako ŵanyinu ivyo mukusambira mu Baibolo, mulekenge kudokera chisopa chautesi na tumaluso uto chikuchita. Muŵenge ŵakukondwa ndipo Yehova wamutumbikaninge apo mukuyezgayezga kumusopa munthowa iyo wakukhumba.—Malaki 3:10.