1, 2. Ne a fesili e ‵tau o fesili ifo ne koe, kae kaia e tāua ei a fesili konā?

E AUALA i tau sukesukega ki te Tusi Tapu, ne tauloto koe me e tokouke a tino e fai mai me tapuaki latou ki te Atua, kae tela la, e akoako kae fai ne latou a mea kolā e se fiafia ki ei te Atua. (2 Kolinito 6:17) Tenā te pogai ne fakatonu mai ei a Ieova ke olo kea‵tea tatou mai lotu ‵se, telā ko “Papelonia te Sili.” (Fakaasiga 18:2, 4) Ne a au mea ka fai? E ‵tau o fai ne tatou taki tokotasi se filifiliga, kae e ‵tau o fesili ifo tatou, ‘E mata, e manako au o tapuaki ki te Atua i te auala telā e manako a ia ki ei, io me i te auala telā ko masani au ki ei?’

² Kafai ko oti ne tiaki ne koe se lotu ‵se, se mea ‵lei te mea tenā. Kae i loto i tou ‵kano loto e isi ne faifaiga mo tuu masani a lotu ‵se koi fiafia eiloa koe ki ei. Ke sau‵tala nei tatou ki faifaiga mo tuu masani konā ko te mea ke iloa ne tatou a te tāua ke maua ne tatou te kilokiloga a te Atua ki mea konā.

3. (a) Kaia e faigata ei ki nisi tino ke fakagata te fakaaogaga o tupua i olotou tapuakiga? (e) Ne a pati e fai mai i te Tusi Tapu e uiga ki te fakaaogaga o tupua ke tapuaki ei ki te Atua?

³ Ne fakaaoga ne nisi tino a tupua io me ne mea fakatusa i olotou fale ke tapuaki atu ei latou ki te Atua i se fia tausaga. Kafai ne fai ne koe a te mea tenā, kāti ka fai fakaa‵tea koe io me mafaufau me e sē se mea tonu ke tapuaki atu ki te Atua e aunoa mo mea konā. Ke masaua la, me ne akoako mai ne Ieova ki a tatou te auala ke tapuaki atu ei ki a ia. Kae e manino te mea e fai mai i te Tusi Tapu me e se manako a Ieova ke fakaaoga ne tatou a tupua i ‵tou tapuakiga.—Faitau  te Esoto 20:4, 5; Salamo 115:4-8; Isaia 42:8; 1 Ioane 5:21.

4. (a) Kaia e se ‵tau ei o tapuaki tatou ki ‵tou tupuga? (e) Kaia ne fai atu ei a Ieova ki ana tino ke mo a ma taumafai o fai‵pati ki tino ‵mate?

⁴ E mafai o fakamaumau ne nisi tino a taimi mo malosi e uke ke taumafai o fakafia‵fia olotou tupuga kolā ko oti ne ‵mate. E mafai foki o tapuaki latou ki olotou tupuga. Kae ko oti ne tauloto tatou me e se mafai o fesoasoani io me fakalogo‵mae mai a tino kolā ko oti ne ‵mate ki a tatou. E se ola latou i se isi koga. A te tonuga loa, se mea fakamataku māfai e taumafai koe o fesokotaki atu ki a latou me i so se fekau telā e foliga mai me ne aumai i se tino o te kāiga telā ko mate ne aumai fua mai i temoni. Tenā te pogai ne fakatonu atu a Ieova ki tino Isalaelu ke mo a ma taumafai o fai‵pati ki tino ‵mate, io me aofia i so se mea e isi sena sokoga ki mea fakatemoni.—Teutelonome 18:10-12; onoono ki Fakamatalaga Fakaopoopo i te 26 mo te 31.

5. Ne a mea e mafai o fesoasoani atu ki a koe ke fakagata te fakaaogaga o tupua ke tapuaki atu ki te Atua io me ko te tapuaki atu ki ou tupuga?

⁵ Ne a mea e mafai o fesoasoani atu ki a koe ke fakagata te fakaaogaga o tupua ke tapuaki atu ki te Atua io me ko te tapuaki atu ki ou tupuga? E ‵tau mo koe o faitau ki te Tusi Tapu kae mafaufau faka‵lei ki te kilokiloga a Ieova ki mea konā. Ne kilo atu a ia ki mea konā e pelā me ne mea “fakatakalialia.” (Teutelonome 27:15) ‵Talo ki a Ieova i aso katoa ke fesoasoani atu ke maua ne koe tena kilokiloga ki mea kae ke tapuaki atu koe i te auala telā e manako a ia ki ei. (Isaia 55:9) E mafai o mautinoa i a koe me ka tuku atu ne Ieova te malosi e manakogina ne koe ke tapale kea‵tea mai tou olaga so se mea telā e isi sena sokoga ki tapuakiga ‵se.

6. Kaia ne filifili ei a Tesema 25 ke fakamanatu ei te aso fanau o Iesu?

⁶ A te Kilisimasi se aso malōlō lauiloa i te lalolagi kātoa,  kae mafau‵fau a nisi tino me ko te fakamanatuga o te aso fanau o Iesu. Kae ko te Kilisimasi e isi eiloa sena sokoga ki tapuakiga ‵se. E fai mai se tusi e tasi me ne fakamanatu ne tino Loma fapaupau a te aso fanau o te la i a Tesema 25. Ne ma‵nako a takitaki lotu ke tokouke a tino fapaupau e fai pelā me ne Kelisiano, tela la, e ui eiloa e seki fanau a Iesu i a Tesema 25, ne fakaiku aka ne latou ke fakamanatu te aso fanau o Iesu i te po masina tenā. (Luka 2:8-12) Ne seki fakamanatu ne soko o Iesu a te Kilisimasi. E fai mai se tusi e tasi me i te 200 tausaga mai tua o te fanaumaiga o Iesu, “e seai se tino e iloa ne ia, kae ne nai tino fua ne fia iloa ne latou te taimi tonu ne fanau a ia i ei.” (Sacred Origins of Profound Things) A te fakamanatuga o te Kilisimasi ne kamata aka fua i se fia selau tausaga mai tua o te nofoga a Iesu i te lalolagi.

7. Kaia e se fakamanatu ei ne Kelisiano ‵tonu a te Kilisimasi?

⁷ E iloa ne tino e tokouke te mafuaga fapaupau o te Kilisimasi mo ana faifaiga masani, e pelā mo te faiga o ‵kaiga mo te tukuatuga o meaalofa. E pelā mo Egelani mo nisi vaega o Amelika, e isi se taimi ne fakatapu i ei te fakamanatuga o te Kilisimasi me ne māfua mai i mea fapaupau. So se tino e fakamanatu ne ia e fakasala. Kae fakamuli ifo ne toe kamata o fakamanatu ne tino a te Kilisimasi. Kaia e se fakamanatu ei ne Kelisiano ‵tonu a te Kilisimasi? Me e ma‵nako latou o fakafiafia te Atua i so se mea e fai ne latou.

8, 9. Kaia ne seki fakamanatu ei ne Kelisiano i aso mua a aso fanau?

⁸ A te suā fakamanatuga lauiloa e fai ne tino e tokouke ko olotou aso fanau. E mata, e ‵tau o fakamanatu ne Kelisiano a aso fanau? E lua fua a aso fanau kolā ne faipati ki ei te Tusi Tapu, ko aso fanau o tino kolā e se tapuaki ki a Ieova. (Kenese 40:20; Maleko 6:21) Ne fai sāle a aso fanau ke fakaaloalo atu ei ki atua ‵se. Tenā te pogai e fai ei ne Kelisiano i aso mua “a te fakamanatuga o se aso fanau o se tino e pelā  me se tuu masani fapaupau.”—The World Book Encyclopedia.

⁹ Ne tali‵tonu a tino Loma mo tino Eleni i aso mua me e isi se agaga e nofo atu i so se taimi e fanau ei se tino kae ka puipui ne te agaga tenā a te tino tenā i tena olaga. Ne fai mai te tusi ko The Lore of Birthdays me “ne maua ne te agaga tenei tena ‵mana mai te atua telā i o ia te aso fanau ne fanau ei te tino tenā.”

10. Kaia e se ‵tau ei o fakamanatu ne Kelisiano i aso nei a aso fanau?

¹⁰ E mata, e mafaufau koe me e talia ne Ieova a fakamanatuga kolā e isi se lotou sokoga ki lotu ‵se? (Isaia 65:11, 12) Ikai, e se talia ne ia. Tenā te pogai e se fakamanatu ei ne matou a aso fanau io me ko aso malō‵lo kolā e isi se lotou sokoga ki lotu ‵se.

11. Kaia e fakamanatu ei ne nisi tino a aso malō‵lo? Se a te mea telā e ‵tau o tāua malosi ki a koe?

¹¹ E iloa ne nisi tino a te mafuaga fapaupau o te Kilisimasi mo nisi aso fakamanatu, kae tumau loa latou i te fakamanatuga o aso konā. E mafau‵fau latou me i aso malō‵lo se avanoaga gali ke ‵kau fakatasi mo kāiga. E mata, e penā foki koe? E sē se mea masei ke fakamaumau a taimi mo tou kāiga. Ne kamata ne Ieova a te kāiga, kae e manako a ia ke maua ne tatou se fesokotakiga ‵lei mo latou. (Efeso 3:14, 15) Kae e ‵tau o ‵saga tonu atu tatou ki te mauaga o se fesokotakiga ‵lei mo Ieova i lō te fakafiafiaga o ‵tou kāiga mai te fakamanatuga o aso malō‵lo fakalotu a lotu ‵se. Tenā te pogai ne fai mai ei te apositolo ko Paulo: “Ke fakamautinoa aka faeloa ne koutou a mea kolā e talia ne te Aliki.”—Efeso 5:10.

12. Se a te mea e fai ei ke se talia ne Ieova se aso malōlō?

¹² E ma‵natu aka nisi tino me e se tāua ke iloa te mafuaga o se aso malōlō, kae e se penā loa lagonaga o Ieova. E se talia  ne ia a aso malō‵lo kolā e māfua mai i lotu ‵se io me kolā e fakamaluga aka i ei a tino io me ko fakailoga o fenua. E pelā mo tino Aikupito, e uke ‵ki a fakamanatuga e fai ne latou ki olotou atua ‵se. Mai tua o te ‵saoatuga a te kau Isalaelu mai Aikupito, ne fakamanatu ne latou se aso fakamanatu fapaupau a tino Aikupito kae taku ne latou me “se ‵kaiga fiafia ki a Ieova.” Kae ne fakasala ne Ieova latou ona ko te mea tenā. (Esoto 32:2-10) E pelā eiloa mo pati a te pelofeta ko Isaia, e se ‵tau mo tatou o “fakapa‵tele ki se mea sē ‵ma!”—Faitau te Isaia 52:11.

13. Ne a fesili kāti ka ‵sae aka māfai ko fakaiku aka ne koe ke se fakamanatu a aso malō‵lo?

¹³ Kafai ko fakaiku aka ne koe ke se fakamanatu a aso malō‵lo, kāti ka uke ‵ki au fesili. E pelā me se fakaakoakoga: Ne a aku mea e ‵tau o fai māfai e fesili mai a tino e ga‵lue tasi mo au me kaia e se fakamanatu ei ne au te Kilisimasi fakatasi mo latou? Ne a aku mea e ‵tau o fai māfai e tuku mai ne se tino se meaalofa Kilisimasi ki a au? Ne a aku mea e ‵tau o fai māfai e manako taku avaga ke fakamanatu se aso malōlō? E fesoasoani atu pefea au ki aku tama‵liki ke mo a ma fanoa‵noa me ko se fakamanatu ne latou se aso malōlō io me ko olotou aso fanau?

14, 15. Ne a mea e mafai o fai ne koe māfai e fakamanuia atu se tino i te Kilisimasi io me tuku atu se meaalofa ki a koe?

¹⁴ E tāua ‵ki ke fakaaoga faka‵lei ‵tou mafaufau māfai ko filifili aka au pati mo au mea ka fai i tulaga takitasi konā. E pelā me se fakaakoakoga, kafai e fai mai se tino “Ke manuia te Kilisimasi,” e se fakauiga i ei me e se ‵tau o saga atu koe ki a ia. E mafai fua o fai atu koe, “Fakafetai.” Kae kafai e isi se tino e manako ke iloa ne ia a mea e uke atu, e mafai o fakamatala atu ne koe te pogai e se fakamanatu ei ne koe se aso malōlō. Kae e ‵tau o fai penā i se auala atafai, apo kae āva.  Muna a te Tusi Tapu: “Ke fai faeloa otou pati ke ‵tagi ‵lei, faka‵kona ki te masima ko te mea ke iloa ne koutou te auala e ‵tau ei o tali atu ki tino taki tokotasi.” (Kolose 4:6) Kāti e mafai o fakamatala atu koe me e fiafia koe o ‵kau fakatasi mo nisi tino kae tuku atu a meaalofa kae ne fakaiku aka ne koe ke se fai penā i aso malō‵lo konei.

¹⁵ Ne a au mea e ‵tau o fai māfai e tuku atu ne se tino se meaalofa ki a koe? E se tuku mai i te Tusi Tapu se fakasologa o mea e ‵tau o fai, kae e fai mai i ei me e ‵tau o tausi ne tatou ‵tou loto lagona ke ‵lei. (1 Timoteo 1:18, 19) Kāti e se iloa ne te tino ne tuku atu ne ia te meaalofa me e se fakamanatu ne koe te aso malōlō tenā. Io me kāti ka fai atu a ia, “E iloa ne au me e se fakamanatu ne koe a te aso malōlō tenei, kae e manako eiloa au o tuku atu te meaalofa tenei.” I tulaga kese‵kese konā, e mafai o filifili aka koe me talia ne koe te meaalofa io me ikai. Kae faitalia me se a te fakaikuga e fai ne koe, taumafai o tausi eiloa tou loto lagona ke ‵lei. E se ma‵nako tatou o fai se mea telā ka pokotia ei ‵tou fesokotakiga mo Ieova i se auala sē ‵lei.

16. Ne a au mea e ‵tau o fai māfai e ma‵nako tou kāiga ke fakamanatu se aso malōlō?

¹⁶ Ne a au mea e mafai o fai māfai e ma‵nako tou kāiga ke fakamanatu se aso malōlō? E se ‵tau o kinau atu koe ki a latou. Ke masaua, me maua ne latou te saolotoga ke fai te mea telā e ma‵nako latou ki ei. Ke atafai kae āva ki olotou filifiliga e pelā eiloa mo te mea e manako koe ke fai ne latou ki a koe. (Faitau te Mataio 7:12.) Kae kafai e ma‵nako tou kāiga ke ‵kau fakatasi koe mo latou i te aso malōlō tenā, ne a au mea e ‵tau o fai? Koi tuai o fai tau fakaikuga, ‵talo ki a Ieova ke fesoasoani atu ke fai ne koe se fakaikuga ‵lei. Mafaufau ki te tulaga tenā, kae fai ne sukesukega e uiga ki ei. Masaua, e manako koe ke fakafiafia faeloa a Ieova.

17. Ne a au mea e mafai o fai ke fesoasoani atu ki au tama‵liki ke mo a e ma‵natu aka me fakaa‵lofa latou i te taimi e fakamanatu ei ne nisi tino a aso malō‵lo?

 ¹⁷ Ne a au mea e mafai o fai ke fesoasoani atu ki au tama‵liki māfai ko lavea ne latou a nisi tino e fakamanatu a aso malō‵lo? E mafai o fakatoka ne koe ke fai se mea fakapito mō latou i taimi kese‵kese. E mafai o tuku atu ne koe ne meaalofa mō latou. Kae ko te ‵toe meaalofa sili e mafai o tuku atu ne koe ki au tama‵liki ko tou taimi mo tou alofa.

18. Kaia e ‵tau ei o ‵kau tatou ki fakatasiga Kelisiano?

¹⁸ Ko te mea ke fakafiafia atu ki a Ieova, e ‵tau o tiaki ne tatou a lotu ‵se e pelā foki mo tuu masani mo aso malō‵lo kolā e isi se lotou sokoga ki ei. Kae e ‵tau foki mo tatou o ‵kau ki te tapuakiga tonu. E pefea la? A te auala e tasi ko te kau atu faeloa ki fakatasiga Kelisiano. (Faitau te Epelu 10:24, 25.) A fakatasiga ne vaega tāua ‵ki o te tapuakiga tonu. (Salamo 22:22; 122:1) E mafai o fakatau fakamalosi ne tatou a tatou eiloa māfai ko maopoopo fakatasi.—Loma 1:12.

19. Kaia e tāua ei ke fai atu ki nisi tino a muna‵tonu mai te Tusi Tapu ne tauloto ne koe?

¹⁹ A te suā auala e mafai o kau katoatoa atu koe ki te tapuakiga tonu ko te faipati atu ki nisi tino e uiga ki mea ne tauloto ne koe mai te Tusi Tapu. E mafatia a tino e tokouke i mea ma‵sei e ‵tupu i te lalolagi. Kāti e iloa ne koe a nisi tino penā. Fai atu ki a latou a mea uiga ki tou fakamoemoega gali i aso mai mua. I te taimi e kau atu ei koe ki fakatasiga Kelisiano kae fai atu ki nisi tino e uiga ki muna‵tonu mai te Tusi Tapu, ka iloa aka ne koe me ko seai se manakoga i a koe ke aofia i se vaega o lotu ‵se mo ana faifaiga masani. E mafai o mautinoa i a koe me ka fiafia koe kae ka fakamanuia malosi eiloa ne Ieova au taumafaiga e fai ke tapuaki atu ki a ia i te auala tonu.—Malaki 3:10.