1, 2. Боттарывыска кандыг айтырыгны салыр ужурлуг бис база чүге?

БУРГАНГА бүзүрээр бис дээр хөй-ле улустуң өөредиглери болгаш ажыл-херектери Бурганга таарышпас деп Библиядан билип алган бис (2 Коринфичилерге 6:17). Иегова бисти «Өндүр улуг Вавилондан», азы меге шажындан, үнүп алырын кыйгырып турар (Ажыдыышкын 18:2, 4). А силер болза канчаар силер? Кижи бүрүзү бодунга мындыг айтырыгны салыр ужурлуг: «Мен Бурганга канчаар мөгеерин күзеп турар мен: Ооң күзээни-биле бе азы бодумнуң өөренген аайым-биле бе?»

² Бир эвес меге шажындан үне берген болзуңарза, ол эки-дир. Ындыг-даа болза, меге шажынга хамаарылгалыг ёзу-чаңчылдарны ам-даа сонуургаар чадавас силер. Ол нептереңгей ёзу-чаңчылдарның чамдыызын көрээлиңер база ол чаңчылдарга Иегованың ышкаш хамаарылганы сайзырадып алырының чүге чугулазын сайгарыптаалыңар.

3. а) Дүрзү-хевирлерни ажыглавайн, Бурганга мөгеери чамдык кижилерге чүге берге бооп турарыл? б) Ол дүрзүлерни ажыглаарының дугайында Библияда чүү дээнил?

³ Чамдык улус Бурганга мөгеерде, чурук-дүрзүлерни, шуткаан хевирлерни азы өөнүң дөрүнде  бурганнарын чыл-чылы-биле ажыглап чоруур. Силер база ынчаар кылып чаңчыккан чадавас силер, бо бүгү чокта Бурганга мөгеери чиктиг азы шын эвес ышкаш боор чадавас. Ынчалза-даа мону утпаңар: Бурган Боду Аңаа канчаар шын мөгеерин өөредип турар. Дүрзү-хевирлерни ажыглаарын Ол күзевейн турар деп Библияда чиге сөглээн. (Номчуптуңар: Хосталыышкын 20:4, 5; Ырлар 113:12—16; Исайя 42:8; 1 Иоанн 5:21.)

4. а) Чүге калган өгбелеривиске чүдүвес ужурлуг бис? б) Иегова израильчилерге өлген улус-биле харылзажырын чүге хоруп кааныл?

⁴ Чамдык улус хөй үезин болгаш күжүн калган өгбелериниң «күзелдерин боттандырарынче» чарып турар. Безин оларга чүдүп турар чадапчок. Ынчалза-даа чок апарган улус биске дузалап-даа, хора чедирип-даа шыдавас деп билип алган бис. Олар кандыг-бир черде улаштыр чурттавайн чоруур. Чок апарган улус-биле кандыг-даа харылзаа айыылдыг, чүге дизе олардан келген деп турар медээлер херек кырында буктардан кээп турар. Ынчангаш Иегова израильчилерге өлген улус-биле харылзажырын оралдашпас кылдыр айыткан. Олар караң көрнүр чоруктуң кандыг-даа хевиринден ойталаар ужурлуг турганнар (Ыдыктыг хоойлуну катаптааны 18:10—12; 26, 31 дугаар Капсырылгаларны көрүңер).

5. Чурук-дүрзүлер дузазы-биле Бурганга мөгеер база калган өгбелерге чүдүүр чаңчылдан адырлып алырынга силерге чүү дузалаар?

⁵ Моон алгаш көөрге, Бурганга мөгеер дээш, чурук-дүрзүлерни ажыглаары база калган өгбелерге чүдүүрү шын эвес. Ынчаарга ындыг чаңчылдан  канчап адырлып алырыл? Библияны номчуңар база Иегованың ындыг мөгейиишкинге хамаарылгазының дугайында боданыңар. Бурган ону чүдек-бужар чүүл деп санаар (Ыдыктыг хоойлуну катаптааны 27:15). Шак ындыг көрүштүг болур дээш база Бурганга шын кылдыр мөгеер дээш, Аңаа хүннүң-не мөргүп, Оон дузадан дилеңер (Исайя 55:9). Иегова силерге меге шажын-чүдүлге-биле холбаалыг шупту чүүлдерден адырлып алырынга күштү бээр.

6. Иисус Христостуң төрүттүнген хүнүн чүге декабрь 25-те демдеглээр апарганыл?

⁶ Делегейде эң сураглыг байырлалдарның бирээзи — Рождество. Ол хүнде улус Иисус Христостуң төрүттүнген хүнүн демдеглеп турар. Ол байырлалдың меге шажын-биле харылзаалыын билир силер бе? Бир энциклопедиядан алырга, Рим империязынга чурттап турган дүрзү-бурганнарга чүдүүр улус декабрь 25-те дээрде хүннүң төрүттүнген хүнүн демдеглеп чораан. Христиан шажын башкарыкчылары дүрзү-бурганнарга чүдүүр улусту христиан шажынны хүлээп алзын дээш, декабрь 25-тиң хүнүн Иисустуң төрүттүнген хүнү кылдыр кылып алган. Херек кырында Иисус ол хүнде төрүттүнмээн * (Лука 2:8—12). Иисустуң баштайгы өөреникчилери Рождествону байырлавайн чораан. Христостуң төрүттүнгениниң соонда, баштайгы ийи чүс чылдарда «ооң төрүттүнген хүнүн кым-даа  херекке албайн чораан; ооң шын төрүттүнген хүнү кижилерге билдинмес турган» деп бир номда бижээн (Sacred Origins of Profound Things). Рождествону Иисустуң өлгениниң соонда, чүгле чүс-чүс чылдар эрткенде, байырлап эгелээн.

7. Алыс шын христианнар Рождествону чүге байырлавайн турар?

⁷ Белектер сөңнежири азы байырлал столун делгээри дээн ышкаш, Рождествога хамаарышкан ёзулалдарны дүрзү-бурганнарга чүдүүр чоннардан келген деп, хөй улус билир *. Ынчангаш ол чылдагаандан Англияга болгаш Американың чамдык кезектеринге Рождествону байырлаарын кезек үеде хоруп каан турган. Ону демдеглээн улусту безин торгаар турган. Ынчалза-даа сөөлзүредир ол байырлалды катап база демдеглеп эгелээн. Алыс шын христианнар Бурганга дыңнангыр болурун күзээр болгаш, Рождествону байырлавайн турар.

8, 9. Чүге баштайгы христианнар төрүттүнген хүннерни байырлавайн чораан?

⁸ Кижилерниң база бир ынак байырлалы — төрүттүнген хүн. Христианнар ол байырлалды эрттирип болур бе? Библияда төрүттүнген хүнүн байырлап турган чамдык кижилерниң дугайында бижээн. Ол улус Бурганның бараалгакчылары турбаан (Эге дөс 40:20; Марк 6:21). Ындыг байырлалдарга кижилер меге бурганнарны алдаржыдар чораан. Ынчангаш  баштайгы христианнар «төрүттүнген хүн байырлаарын дүрзү-бурганнарга чүдүүр ёзулал деп санап чораан» деп бир энциклопедияда демдеглээн (The World Book Encyclopedia).

⁹ Кижи төрүттүнүп кээрге, ооң чанынга ону бүгү назынында камгалаар, каракка көзүлбес чаяалга кады чоруур деп, бурунгу римчилер болгаш гректер бүзүреп чорааннар. Бир номда: «Шак ол каракка көзүлбес чаяалга ол хүнде төрүттүнген бурган-биле харылзаалыг» — деп бижээн (The Lore of Birthdays).

10. Христианнар төрүттүнген хүннерни чүге байырлавас ужурлуг?

¹⁰ Иегова меге шажыннар-биле харылзаалыг байырлалдарга кандыг хамаарылгалыгыл? (Исайя 65:11, 12). Ол ону деткивейн турар. Ынчангаш бис төрүттүнген хүннерни база меге шажын-биле харылзаалыг өске-даа байырлалдарны байырлавайн турар бис.

11. Кижилер байырлалдар эрттиреринге чүге ынак? Биске чүү чүве эң-не чугула?

¹¹ Рождество болгаш өске-даа байырлалдар меге шажындан укталган деп, чамдык улус билир. Ынчалза-даа олар ол байырлалдарны дөмей-ле эрттирип турар. Байырлалдарны олар өг-бүлези-биле кады үе эрттирер арга деп көөр. А силер чүү деп бодаар силер? Чугаажок, өг-бүлези-биле кады үе эрттирери эргежок чугула. Иегова өг-бүлениң үндезилекчизи болганда, өг-бүлелерниң найыралдыг болурун күзеп турар (Эфесчилерге 3:14, 15). Меге шажын-биле холбаалыг кандыг-бир байырлалды  дөргүл-төреливис-биле демдеглээр болзувусса, оларның сеткилин өөртүр чадавас бис. Ынчалза-даа биске эң-не чугула чүүл — Иегова-биле эки хамаарылганы кадагалап арттырары болгай. Аңаа хамаарыштыр Павел элчин мынча дээн: «Дээрги-Чаяакчыга таарымчалыг чүүлдү тодарадып аарын оралдажыңар» (Эфесчилерге 5:10).

12. Иегова кандыг байырлалдарга таарзынмазыл?

¹² Хөй-ле кижилер байырлалдарның кайыын укталганын херекке албас. Ынчалза-даа Иегованың аңаа хамаарыштыр көрүжү бир өске. Меге шажын-биле холбаалыг азы бир-ле кижини алдаржыткан байырлалдарга, база чазактың байырлалдарынга Иегова чүүлзүнмейн турар. Дараазында чижекти көрээлиңер. Египетчилерниң меге бурганнарынга тураскааткан байырлалдары хөй турган. Израильчилер Египеттен үнген соонда, египетчилерниң байырлалдарының бирээзин өттүнүп эрттиргеннер. Олар ол байырлалды «Дээрги-Чаяакчыга тураскааткан» деп турган-даа болза, Иегова ону байырлааны дээш, оларны кезеткен (Хосталыышкын 32:2—10). Библия бисти: «Арыг эвес чүүлге дегбеңер!» — деп кыйгырып турар. (Номчуптуңар: Исайя 52:11.)

13. Байырлалдарны эрттирбес деп шиитпирлеп алган болзуңарза, силерге кандыг айтырыглар тургустунуп кээп болурул?

¹³ Байырлалдарны эрттирбес деп шиитпирлеп алган болзуңарза, силерни мындыг айтырыглар дүвүредип болур чадавас: «Кады ажылдап турар улузум кандыг-бир байырлалды чүге эрттирбейн турарымны  айтыра бээр болза, чүү деп харыылаар мен? Байырлал таварыштыр белектер бээрге, алыр мен бе? Ашаам азы кадайым кады байырлаалы дээр болза, канчаар мен? Ажы-төлүмнүң төрүттүнген хүнүн азы кандыг-бир байырлалды демдеглевейн баарывыска, олар муңгаравас кылдыр чүнү канчап болур мен?»

14, 15. Байырлал таварыштыр силерге белек сөңнээн азы байыр чедирген болза, канчаар силер?

¹⁴ Байдалдар аңгы-аңгы болур. Ынчангаш чүнү чугаалаарын база канчаар алдынарын байдал бүрүзүнде таптыг боданып алыр болза эки. Чижээ, бир кижи силерге байырлал таварыштыр байыр чедирер болза, аңаа четтиргениңерни илередип болур силер. А бир эвес ол чүге байырлавайн турарыңарны билип алыксап турар болза, бодуңарның үзел-бодалыңарны тодазы-биле чугаалап берип болур силер. Улус-биле кезээде чылыг-чымчак чугаалажыңар база оларның сагыш-сеткилин хүндүлеңер. Библияда мындыг сүме бар: «Кижи бүрүзүнге херектиг харыы тудуп шыдаар кылдыр, чугааңар үргүлчү чедингир болгаш чечен-мерген болзун» (Колосчуларга 4:6). Чижээ, мынча деп болур силер: «Эш-өөрүм-биле кады үени эрттиреринге, белектер бээринге ынак мен, ынчалза-даа албан-на байырлал таварыштыр эвес».

¹⁵ Силерге белек бээр болза, канчаар силер? Маңаа хамаарыштыр Библияда тода дүрүм чок, ынчалза-даа ында арын-нүүрүвүс арыг артар ужурлуг деп бижээн (1 Тимофейге 1:18, 19). Силерге белек сөңнеп турар кижи силерниң байырлалдарга  хамаарыштыр үзел-бодалыңарны билбес бооп чадавас. Азы: «Сени бо байырлалды демдеглевес деп билир мен, ынчалза-даа сеңээ белек бериксеп тур мен» деп болур. Кайы-даа байдалда белекти алыр-албазын боттарыңар шиитпирлээр силер. Эң-не кол чүүл — арын-нүүрүңер арыг болзун. Иегова-биле хамаарылгавыска шаптыктай бээр чүүлдерни кылырын күзевес-ле болгай бис.

16. Өг-бүлеңер кандыг-бир байырлалды эрттириксээр болза, канчаар силер?

¹⁶ Өг-бүлеңер кандыг-бир байырлалды эрттириксээр болза, канчаар силер? Маргышкан ажыы чок, кижи бүрүзүнүң бодунуң шиитпири турар деп утпаңар. Бодуңарныы-биле турбаңар, чоок улузуңарның шиитпирин хүндүлеңер. Силерниң шиитпирлериңер хүндүлээрин база күзээр болгай силер. (Номчуптуңар: Матфей 7:12.) Өг-бүлеңер байырлал үезинде силерни оларның-биле кады турарын күзээр болза, бирги ээлчегде Иеговага мөргүңер. Шын шиитпир хүлээп алыр дээш, Оон дузадан дилеңер. Ол байырлалдың дугайында хөйнү билип алыңар. Шиитпир хүлээп тургаш, эң-не кол чүүл — Иегованы өөртүрү деп утпаңар.

17. Чамдык байырлалдарны эрттирбейн турарыңар дээш, ажы-төлүңер муңгаравас кылдыр, чүнү канчап болур силер?

¹⁷ Байырлалдар эрттирбейн турарыңар дээш, ажы-төлүңер муңгаравас кылдыр, чүнү канчап болур силер? Үе-үе болгаш-ла, оларга хөглүг ужуражылгаларны эрттирип, оларның манавааны белектерни сөңнеп болур силер. Ажы-төлүңерге  эң-не эки белектерниң бирээзи — силерниң үеңер болгаш ынакшылыңар-дыр.

18. Христиан чыыштарже баары чүге чугула?

¹⁸ Иегованың сеткилин өөртүр дизе, меге шажындан үнгеш, ооң-биле холбаалыг ёзу-чаңчылдарны болгаш байырлалдарны демдеглевес болзувусса эки. Ынчалза-даа чүгле ону кылыры эвээш, Бурганга шын мөгейип эгелээри чугула. Ону канчаар кылырыл? Чижээ, христиан чыыштарже доктаамал баар ужурлуг бис. (Номчуптуңар: Еврейлерге 10:24, 25.) Чыыштар дээрге Бурганга мөгейиишкинивистиң чугула кезээ-дир (Ырлар 21:23; 121:1). Оон аңгыда чыыштарга бот-боттарывысты деткижип болур бис (Римчилерге 1:12).

19. Библиядан билип ап турар билиглериңерни өскелерге чугаалаары чүге чугула?

¹⁹ Оон ыңай Библиядан билип ап турар билиглериңерни өскелерге чугаалаары эргежок чугула. Делегейде хилинчек-човалаңның көвүдээнин көргеш, дыка хөй улус дүвүреп чоруур. Таныыр улузуңарның аразында ындыг байдалда турар улус бар бооп чадавас. Келир үеге хамаарышкан кайгамчык идегелдиң дугайында оларга чугаалап бериңер. Христиан чыыштарже барып база Библиядан билип алган билиглериңерни өскелер-биле үлежир болзуңарза, меге шажын-биле кандыг-даа харылзаа тударын күзевейн баар силер. Иеговага шын кылдыр мөгеер болзуңарза, Ол силерге хөй өөрүшкүнү болгаш йөрээлдерни бээр! (Малахия 3:10).