1, 2. Өзүмиздин қандақ соал соришимиз керәк вә бу немә үчүн муһим?

 СИЗ Муқәддәс китаптин оқуп билгиниңиздәк, Алла тәалаға ишинимиз дегән көплигән адәмләрниң ишлиридин вә тәлимлиридин Йәһва Худа нәпрәтлиниду (Коринтлиқларға 2-хәт 6:17). Шу сәвәптин, Йәһва Худа «Бүйүк Бабил», йәни сахта диндин чиқиңлар, дәп буйруқ бериватиду (Вәһий 18:2, 4). Сиз немә қилисиз? Һәрбиримизниң таллаш әркинлиги бар. Шуңа өзүмиздин: «Мән Худаға У халиғандәк ибадәт қиливатимәнму яки илгири үгинип қалған йол билән ибадәт қиливатимәнму?»— дәп соришимиз керәк.

² Сиз сахта диндин чиққан болсиңиз, яхши иш қилған болисиз. Бәлким, сиз сахта динниң бәзи урп-адәтлирини һәм байрамлирини техичә яхши көридиғансиз. Һазир бирнәччә урп-адәтләрни тәтқиқ қилип, Йәһваниң уларға болған көзқаришини билиш немә үчүн бәк муһим екәнлигини көрүп чиқимиз.

3. а) Немә үчүн бәзи адәмләр Худаға бутлар яки сүрәтләрсиз ибадәт қилиш мүмкин әмәс дәп ойлайду? ә) Муқәддәс китапта бутларни ишлитиш һәққидә немә йезилған?

³ Бәзи адәмләр Худаға ибадәт қилиш үчүн нурғун жиллар сүрәтләрни һәм бутларни ишлитип кәлмәктә. Бәлким, сизму шундақ қилишқа үгинип қалғансиз һәм шундақ нәрсиләр болмиса, Худаға ибадәт қилиш сиз үчүн ғәлитә болуп көрүнүши мүмкин. Бирақ есиңиздә болсун, пәқәт Йәһва Өзи Униңға қандақ ибадәт қилишни үгитиду.  Һәмдә Муқәддәс китап ениқ көрситидуки, Йәһваға ибадәт қилғанда, У һәрқандақ сүрәтләрни вә бутларни ишлитишни мәнъий қилиду (Чиқиш 20:4, 5ни оқуң; Зәбур 115:4—8; Йәшая 42:8; Йоһанниң 1-хети 5:21).

4. а) Немә үчүн әрваларға дуа қилиш натоғра? ә) Немә үчүн Йәһва Өз хәлқигә өлгәнләр билән алақә қилишни мәнъий қилған?

⁴ Бәзи адәмләр әрваларни рази қилиш үчүн көп күч чиқириду. Улар һәтта әрваларға дуа қилиду. Бирақ биз билгинимиздәк, әрвалар зиянкәшлик қилалмайду вә ярдәмму берәлмәйду. Улар у дунияда яшимайду. Әрвалар билән алақә қилиш бәк хәтәрлик, сәвәви өлгәнләрдин кәлгән һәрқандақ хәвәр әслидә җинлардин. Шуңа Йәһва Өз хәлқигә өлгәнләр билән алақә қилиштин яки җинлар билән бағлинишлиқ һәрқандақ нәрсиләрдин жирақ туруш керәк дәп әмир қилған (Қанун шәрһи 18:10—12; 26 вә 31-изаһәткә қараң).

5. Худаға ибадәт қилиш үчүн бутларни ишләтмәсликкә яки әрваларға дуа қилмаслиққа немә ярдәм бериду?

⁵ Худаға ибадәт қилиш үчүн бутларни ишләтмәсликкә яки әрваларға дуа қилмаслиққа немә ярдәм берәләйду? Муқәддәс китапни оқуп, мулаһизә қилғанда, Йәһваниң бундақ нәрсиләргә болған көзқаришини биливелиң. Йәһва үчүн шундақ нәрсиләр жиркиничликтур (Қанун шәрһи 27:15). Йәһваға һәр күни дуа қилип, шундақ нәрсиләргә Худаниң көзи билән қараш һәм Униңға лайиқ ибадәт қилиш үчүн ярдәм сораң (Йәшая 55:9). Йәһва сизгә сахта дин билән бағлиниши болған һәрқандақ нәрсиләрдин нери болушқа ярдәм беридиғанлиғиға ишәнчиңиз камил болсун.

6. Йеңи жил байриминиң келип чиқиши қәйәрдин?

⁶ Йеңи жил байрими Муқәддәс китапқа қариму-қарши, сәвәви у бутпәрәсликтин келип чиққан. Бу байрам һәққидә бир қамуста мундақ дейилгән:«Бизниң миладимиздин  илгири 46-жили 1-январь күнини Рим һөкүмрани Юлий Цезарь Йеңи жил байрими дәп бәкиткән. Римлиқлар бу күнни Янус дегән илаһқа беғишлиған вә январь ейиниң намиму мошу илаһтин чиққан. Улар Йеңи жил байримини нишанлисақ, жил бойи бәхитлик болимиз, дәп ишәнгән».

7. а) Норуз байрими қәйәрдин чиққан? ә) Немә үчүн мәсиһийләр Йеңи жил вә Норуз байримини нишанлимайду?

⁷ Баһарда тәбрикләйдиған Норуз байрими һәққидә немә ейтишқа болиду? Бәзи алимларниң ейтишичә, бу байрамниң йилтизи қедимки Месопатамиядин чиққан. Бу байрам тәбиәт күчлиригә чоқунушқа асасланған. Кейинирәк уни отқа чоқинидиған (зороастризм) адәмләр нишанлиған. Норуз отқа чоқинидиған адәмләрниң асасий байрамлириниң бири болуп, қиш билән хошлишип, баһар пәслини қарши елиш вә ата-бовилириниң әрвалирини хошал қилиш билән бағлиқ болған (Е. А. Дорошенко, “Зороастрийцы в Иране”). Немә үчүн мәсиһийләр Йеңи жил вә Норуз байримини нишанлимайду? Чүнки улар һәрбир ишида Худани хурсән қилишни халайду.

8, 9. Немә үчүн Әйсаниң әгәшкүчилири туғулған күнни өткүзмигән?

⁸ Йәнә бир кәң тарқалған байрам — туғулған күн. Йәһва гувачилири туғулған күнни өткүзәмду? Муқәддәс китапта туғулған күнни пәқәт Йәһва Худаға хизмәт қилмиған кишиләрла нишанлиғанлиғи һәққидә йезилған (Яритилиш 40:20; Марк 6:21). Қедимки заманда сахта илаһларни улуқлаш үчүн туғулған күн өткүзүлгән. Бир қамуста, биринчи әсирдики Әйсаниң әгәшкүчилири «туғулған күнни өткүзүш бутпәрәсликкә хас», дәп һесаплиғанлиғи йезилған (The World Book Encyclopedia).

⁹ Қедимки римлиқлар билән греклар адәм туғулғанда  униң йенида бир роһ болиду вә уни өмүр бойи һимайә қилиду, дәп ишәнгән. Шу замандики мәсиһий болмиғанлар бу роһниң қандақту бир илаһ билән бағлиниши бар һәм шу роһ уни өмүр бойи һимайә қилип жүрүши үчүн, у туғулған күнини өткүзүп туруши керәк, дәп ойлиған.

10. Бүгүнки күндә Әйсаниң әгәшкүчилири немә үчүн туғулған күнни өткүзмәйду?

¹⁰ Йәһва сахта дин билән бағлиниши болған байрамларни қобул қиламду? (Йәшая 65:11, 12). Әлвәттә, яқ. Шуңа, биз туғулған күнни вә башқа бир сахта ибадәт билән бағлиниши болған байрамларни нишанлимаймиз.

11. Немә үчүн адәмләр йәнила байрамларни нишанлаватиду? Биз үчүн әң муһим немә болуши керәк?

¹¹ Бәзи адәмләр Йеңи жилниң вә башқа байрамларниң келип чиқишини билсиму, йәнила уларни нишанлайду. Улар байрамларни нишанлаш аилә билән биллә вақит өткүзүшниң яхши мүмкинчилиги дәп һесаплайду. Сизму шундақ ойламсиз? Әлвәттә, аилә билән биргә вақит өткүзүшниң һеч ямини йоқ. Аилиниң асасини Йәһва Худа Өзи салған, шуңа У аилә әзалиримиз билән яхши мунасивәттә болушимизни халайду (Әфәсликләргә 3:14, 15). Сахта дин билән бағлинишлиқ байрамларға қатнишип, йеқинлиримизниң көңлидин чиқиштин көрә, Йәһва Худаниң көңлини хурсән қилиш нәқәдәр муһим! Шуңа әлчи Паул: «Тохтимай Худаға яқидиған нәрсиләргә көз йәткүзүңлар»,— дәп ейтқан (Әфәсликләргә 5:10).

12. Йәһва қандақ байрамларни яқтурмайду?

¹² Көплигән адәмләр байрамларниң келип чиқиши муһим әмәс, дәп ойлайду. Сахта динлардин чиққан вә инсанни яки вәтәнни улуқлайдиған байрамларни Худа яқтурмайду. Мәсилән, мисирлиқларниң ялған илаһларға  аталған байрамлири көп болған. Исраиллар Мисир қуллиғидин азат болғандин кейин, мисирлиқларниң бир байрамини өткүзүп, уни «Йәһваға беғишланған байрам», дәп атиған. Амма, буниң үчүн Йәһва уларни җазалиған (Чиқиш 32:2—10). Муқәддәс китапта: «Напак нәрсигә әнди тәккүчи болмаңлар»,— дәп йезилған (Коринтлиқларға 2-хәт 6:17ни оқуң).

13. Сиз байрамларни нишанлашни тохтитишни қарар қилсиңиз, қандақ соаллар пәйда болуши мүмкин?

¹³ Сиз байрамларни нишанлашни тохтитишни қарар қилсиңиз, сиздә бирнәччә соал пәйда болуши мүмкин. Мәсилән: «Хизмәтдашлирим Йеңи жилни немә үчүн өткүзмәйсән, дәп сориса немә дәп җавап беримән? Яки бири Йеңи жилға соға бәрсә, немә қилимән? Өз җүптүм униң билән биргә байрамни өткүзүшүмни халисичу? Балилиримниң туғулған күнгә яки башқа байрамларға қатнашмиғанлиғи түпәйли көңли йерим болмаслиғи үчүн немә қилсам болиду?»

14, 15. Сизни бирси байрам билән тәбриклисә яки соға бәрсә немә қилсиңиз болиду?

¹⁴ Һәр бир вәзийәттә немә ейтиш һәм немә қилиш үчүн қарар чиқарғанда зерәк вә пәм-парасәтлик болуш керәк. Мәсилән, бир киши сизни байрам билән тәбриклисә, униңға: «Рәхмәт»,— дәп ейтишқа болиду. Билгүси кәлгән адәмгә немә үчүн бу байрамға қатнашмайдиғанлиғимни чүшәндүрүш әвзәл. Бирақ җавап бәргәндә меһрибанлиқ, хуш муамилә һәм һөрмәт билән сөзләш муһим. Муқәддәс китапта: «Гепиңлар дайим йеқимлиқ һәм тетимлиқ болсун, шуниң билән силәр һәрқандақ адәмгә қандақ җавап беришни билидиған болисиләр»,— дәп йезилған (Колосилиқларға 4:6). Мәсилән, йеқинлириңизға улар билән биргә  вақит өткүзүп, соғиларни беришни яхши көридиғанлиғиңизни ейтиң. Бирақ соғиларни байрамни нишанлаш үчүн қилмиғанлиғиңизни уларға чүшәндүрсиңиз болиду.

¹⁵ Сизгә бирси соға бәрсә, немә қилисиз? Муқәддәс китапта һәр бир вәзийәт үчүн қаидиләрниң тизими йоқ, бирақ вижданимизни пак сақлишимиз керәклиги ейтилған (Тимотийға 1-хәт 1:18, 19). Сизгә соға бәргән адәм сизниң байрамни нишанлимайдиғанлиғиңизни билмәслиги мүмкин. Башқа бирси: «Мән сизниң байрамни нишанлимайдиғанлиғиңизни билимән, амма бәри бир сизгә соға қилмақчимән»,— дәп ейтиши мүмкин. Бу икки вәзийәттә соғини елиш яки алмаслиқни өзүңиз қарар қилсиңиз болиду. Бирақ қандақ қарар чиқармаң, вижданиңизни пак сақлаш муһим. Биз Йәһва билән мунасивитимизни бузидиған һәрқандақ нәрсидин нери болушимиз керәк.

16. Аилиңиз байрамни өткүзмәкчи болса, немә қилсиңиз болиду?

¹⁶ Аилиңиз байрамни өткүзмәкчи болса, немә қилсиңиз болиду? Улар билән җедәл-маҗира чиқармаслиқ керәк. Унтумаң, һәр бир адәмниң қарар қилиш һоқуқи бар. Әгәр улар сизниң көзқаришиңизни һөрмәтлишини халисиңиз, сизму уларниң көзқаришини һөрмәтләң (Мәтта 7:12ни оқуң). Амма аилиңиз байрам күнини сиз билән вақит өткүзмәкчи болса, немә қилсиңиз болиду? Тоғра қарар қилиштин бурун, Йәһваға дуа қилиң. Кейин бу байрам һәққидики Муқәддәс китапқа асасланған мәлуматни издәп, Йәһваниң көзқаришини биливелиң. Әң муһими — Йәһвани хурсән қилиш.

17. Башқилар байрамларни өткүзгәндә балилириңиз бойнини қисип қалмаслиғи үчүн немә қилсиңиз болиду?

¹⁷ Башқилар байрамларни өткүзгәндә балилириңиз  бойнини қисип қалмаслиғи үчүн, немә қилсиңиз болиду? Бәзи вақитларда уларниң көңлини көтириш үчүн алаһидә олтурушларни өткүзүң. Уларға соғиларни берип, хошал қилсиңиз болиду. Балилириңиз үчүн чиқарған вақтиңиз билән меһир-муһәббитиңиз — әң қиммәт соғидур.

18. Немә сәвәптин учришишларға берип турушимиз керәк?

¹⁸ Йәһвани хурсән қилиш үчүн сахта дин вә униң билән бағлиниши болған байрамлар һәм урп-адәтләрдин ваз кечишимиз керәк. Амма бу йетәрлик әмәс. Биз Худа халайдиған усулда Униңға ибадәт қилишимиз керәк. Қандақ қилип? Мүмкинчиликләрниң бири — Йәһва гувачилириниң учришишлириға дайим берип туруш (Ибранийларға 10:24, 25ни оқуң). Сәвәви, бу учришишлар пак ибадәтниң муһим бир қисми (Зәбур 22:22; 122:1). Биргә җәм болғинимизда, бир-биримизни илһамландуралаймиз (Римлиқларға 1:12).

19. Немә үчүн Муқәддәс китаптин алған тәлимлиримизни башқилар билән бөлүшүш муһим?

¹⁹ Худа қобул қилидиған ибадәт қилишниң йәнә бир мүмкинчилиги — Муқәддәс китаптин алған тәлимләрни башқилар билән бөлүшүш. Көплигән адәмләр йәрдә болуватқан рәзилликләрни көрүп азап чәкмәктә. Бәлким сиз шундақ адәмләрни билидиғансиз. Уларға келәчәктә болидиған әҗайип бәрикәтләр һәққидә ейтип бериң. Җамаәт учришишлириға берип, үгәнгәнлириңизни башқилар билән бөлүшкәнсири, сахта дин вә униң билән бағлиниши болған һәрқандақ урп-адәтләрдин мунасивитиңизни үзгиңиз келиду. Әгәр сиз Йәһваға тоғра ибадәт қилсиңиз, чиқарған күчиңиз үчүн У сизни чоқум бәрикәтләйду (Малаки 3:10).