1, 2. Ndi mbudziso ifhio ine na fanela u ḓivhudzisa yone nahone ndi ngani zwi zwa ndeme?

MUSI ni tshi guda Bivhili no zwi vhona uri vhathu vhanzhi vhane vha amba uri vha gwadamela Mudzimu vha funza kana u ita zwithu zwine Mudzimu a zwi vhenga. (2 Vhakorinta 6:17) Ndi ngazwo Yehova a tshi ri vhudza uri ri bve kha vhurereli ha mazwifhi kana “Babele Ḽihulu.” (Nzumbululo 18:2, 4) Ni ḓo ita mini? Muṅwe na muṅwe washu u tea u ita phetho nahone ri fanela u ḓivhudzisa uri: ‘Naa ndi ṱoḓa u gwadamela Mudzimu nga nḓila ine a i takalela kana ndi ṱoḓa u mu gwadamela nga nḓila ye nda vha ndi tshi ḓi zwi ita ngayo?’

² Arali no no ṱutshela kana u ḓivhofholola kha vhurereli ha mazwifhi, ndi zwavhuḓi. Fhedzi hu nga kha ḓi vha hu na maṅwe maitele na mikhuvha ya vhurereli ha mazwifhi zwine na zwi takalela. Kha ri haseledze maṅwe a eneo maitele na mikhuvha nahone ri vhone uri ndi ngani zwi zwa ndeme u zwi dzhia nga nḓila ine Yehova a zwi dzhia ngayo.

3. (a) Ndi ngani zwi tshi nga konḓela vhaṅwe u gwadamela Mudzimu vha si na zwifanyiso? (b) Bivhili i ri mini nga ha u gwadamela Mudzimu ri tshi shumisa zwifanyiso?

³ Lwa miṅwaha minzhi, vhaṅwe vhathu vho gwadamela Mudzimu vha tshi shumisa tshifhambano, tshinepe tsha mufunzi kana zwithu zwi fanaho na zwenezwo. Arali zwo tou ralo na kha inwi, ni nga vhona zwi tshi konḓa kana zwo khakhea u gwadamela Mudzimu ni si nazwo. Fhedzi ni songo hangwa uri Yehova u ri gudisa nḓila ine ra fanela u mu  gwadamela ngayo. Bivhili i zwi bvisela khagala uri Yehova ha ṱoḓi ri tshi shumisa zwifanyiso kha vhurabeli hashu.—Vhalani Ekisoda 20:4, 5; Phisalema 115:4-8; Yesaya 42:8; 1 Yohane 5:21.

4. (a) Ndi ngani ri songo fanela u gwadamela vho faho? (b) Ndi ngani Yehova o vhudza vhathu vhawe uri vha songo amba na vhafu?

⁴ Vhaṅwe vhathu vha fhedza tshifhinga tshinzhi na nungo vha tshi khou lingedza u takadza mashaka avho o faho. Vha nga kha ḓi ita na u vha gwadamela. Fhedzi ro guda uri vho faho vha nga si kone u ri thusa kana u ri vhaisa. A vha khou tshila huṅwe fhethu. Zwi re zwone ndi uri zwi na khombo u lingedza u davhidzana navho ngauri mulaedza naho u ufhio une wa vhonala u tshi nga u bva kha shaka ḽo faho, u vha u tshi khou bva kha madimoni. Ndi ngazwo Yehova o vhudza Vhaisiraele uri vha songo amba na vhafu kana u ṱanganela kha mufuda naho u ufhio wa vhudimoni.—Dotoronomio 18:10-12; sedzani Ṱhumetshedzo 26 na 31.

5. Ndi mini tshine tsha nga ni thusa u litsha u shumisa zwifanyiso ni tshi gwadamela Mudzimu na u litsha u gwadamela vho faho?

⁵ Ndi mini tshine tsha nga ni thusa u litsha u shumisa zwifanyiso ni tshi gwadamela Mudzimu kana u litsha u gwadamela vho faho? Ni fanela u vhala Bivhili nahone ni humbule zwavhuḓi nga ha nḓila ine Yehova a dzhia ngayo zwenezwo zwithu. Zwi a mu ‘nengisa.’ (Dotoronomio 27:15) Rabelani Yehova ḓuvha ḽiṅwe na ḽiṅwe uri a ni thuse u dzhia zwithu nga nḓila ine a zwi dzhia ngayo na u mu gwadamela nga nḓila ine a i ṱoḓa. (Yesaya 55:9) Ni nga vha na vhungoho ha uri Yehova u ḓo ni ṋea maanḓa ane na a ṱoḓa uri ni laṱe zwithu zwi tshimbidzanaho na vhurabeli ha mazwifhi.

6. Ndi ngani ho khethiwa ḓuvha ḽa 25 December uri ḽi vhe ḽa u pembelela u bebwa ha Yesu?

⁶ Khirisimusi ndi iṅwe ya holodei dzo ḓoweleaho u mona na shango nahone vhathu vhanzhi vha humbula uri hu  vha hu tshi khou pembelelwa u bebwa ha Yesu. Fhedzi Khirisimusi i tshimbidzana na vhurabeli ha mazwifhi. Iṅwe encyclopedia i ṱalutshedza uri nga dzi 25 dza December vhahedeni vha Vharoma vho vha vha tshi pembelela u bebwa ha ḓuvha. Vharangaphanḓa vha kereke vho vha vha tshi ṱoḓa uri vhunzhi ha vhahedeni vha vhe Vhakriste, lwe naho Yesu a songo bebwa nga ḽa 25 December, vha dzhia phetho ya u pembelela u bebwa ha Yesu nga ḽeneḽo ḓuvha. (Luka 2:8-12) Vhafunziwa vha Yesu a vho ngo pembelela Khirisimusi. Iṅwe bugu yo ṱalutshedza uri kha miṅwaha ya 200 nga murahu ha u bebwa ha Yesu, “ho vha hu si na ane a ḓivha uri o bebwa lini nahone ndi vha si gathi vhe vha vha vha tshi ṱoḓa u ḓivha uri o bebiwa lini.” (Sacred Origins of Profound Things) U pembelelwa ha Khirisimusi ho thoma nga murahu ha miṅwaha ya maḓana o vhalaho musi Yesu o no tshila kha ḽifhasi.

7. Ndi ngani Vhakriste vha ngoho vha sa pembeleli Khirisimusi?

⁷ Vhathu vhanzhi vha a ḓivha vhubvo ha Khirisimusi na zwine zwa itwa nga ḽeneḽo ḓuvha, zwi ngaho zwimima na u ṋeana zwifhiwa. Sa tsumbo, hu na tshifhinga tshee Khirisimusi ya vha yo thivhelwa ngei England na kha zwipiḓa zwa Amerika nga nṱhani ha vhubvo hayo ha vhuhedeni. Muṅwe na muṅwe we a vha a tshi i pembelela o vha a tshi pfiswa vhuṱungu. Fhedzi vhathu vho dovha vha pembelela Khirisimusi. Ndi ngani Vhakriste vha ngoho vha sa pembeleli Khirisimusi? Ndi ngauri vha ṱoḓa u takadza Mudzimu kha zwoṱhe zwine vha zwi ita.

8, 9. Ndi ngani Vhakriste vha u thoma vha songo pembelela ḓuvha ḽa mabebo?

⁸ Zwo ḓowelea kha vhathu vhanzhi u pembelela ḓuvha ḽa mabebo. Naa Vhakriste vha fanela u pembelela ḓuvha ḽa mabebo? U pembelelwa ha ḓuvha ḽa mabebo ho ambiwaho Bivhilini, ho itwa nga vhane vha si gwadamele Yehova. (Genesi  40:20; Marko 6:21) U pembelelwa ha ḓuvha ḽa mabebo ho vha hu tshi itelwa u hulisa midzimu ya mazwifhi. Ndi ngazwo Vhakriste vha u thoma “vho dzhia u pembelela ḓuvha ḽa mabebo hu mukhuvha wa vhuhedeni.”—The World Book Encyclopedia.

⁹ Vharoma na Vhagerika vha tshifhingani tsha kale vho vha vha tshi tenda uri musi muthu a tshi bebwa, hu na tshivhumbiwa tsha muya tshine tsha ḓa nahone tsha tsireledza onoyo muthu vhutshilo hawe hoṱhe. Bugu ine ya pfi The Lore of Birthdays yo ṱalutshedza uri “tshenetshi tshivhumbiwa tsha muya tshi na vhushaka ha tshiphiri na mudzimu une ḓuvha ḽawo ḽa mabebo ḽa fana na ḽa onoyo muthu.”

10. Ndi ngani ṋamusi Vhakriste vha songo fanela u pembelela ḓuvha ḽa mabebo?

¹⁰ Ni vhona u nga Yehova u a takalela u pembelela zwithu zwi tshimbidzanaho na vhurereli ha mazwifhi? (Yesaya 65:11, 12) Hai, ha zwi takaleli. Ndi ngazwo ri sa pembeleli ḓuvha ḽa mabebo kana holodei dzi tshimbidzanaho na vhurereli ha mazwifhi.

11. Ndi ngani vhaṅwe vhathu vha tshi pembelela holodei? Ndi mini zwine zwa fanela u vha zwa ndeme vhukuma kha inwi?

¹¹ Vhaṅwe vhathu vha a ḓivha uri Khirisimusi na dziṅwe holodei zwi bva kha vhuhedeni, fhedzi vha bvela phanḓa vha tshi zwi pembelela. Vha vhona u nga holodei ndi tshibuli tshavhuḓi tsha u ṱwa na miṱa yavho. Naa ni ḓipfa nga yeneyi nḓila? A zwo ngo khakhea u ḓiṋea tshifhinga tsha u ṱwa na muṱa waṋu. Yehova ndi ene muthomi wa muṱa nahone u ṱoḓa uri ri vhe na vhushaka havhuḓi nawo. (Vhaefesa 3:14, 15) Naho zwo ralo, ri fanela u livhisa ṱhogomelo kha u vha na vhushaka havhuḓi na Yehova nṱhani ha u takadza mashaka ashu nga u pembelela holodei dza vhurereli ha mazwifhi. Ndi ngazwo muapostola Paulo o ri: “Dzulani ni tshi ṱolisisa uri ndi zwifhio zwine zwa takadza Murena.”—Vhaefesa 5:10.

12. Ndi mini zwine zwa ita uri Yehova a si ṱanganedze holodei?

 ¹² Vhathu vhanzhi vha vhona u nga vhubvo ha holodei a vhu na ndavha, fhedzi Yehova ha ḓipfi nga yeneyo nḓila. Ha takaleli holodei dzine dza bva kha vhurabeli ha mazwifhi kana dzine dza hulisa vhathu kana zwiga zwa lushaka. Sa tsumbo, Vhaegipita vho vha vha tshi itela midzimu yavho ya mazwifhi vhuṱambo vhunzhi. Musi Vhaisiraele vha tshi ponyoka Egipita, vho edzisa vhuṅwe vhuṱambo ha vhuhedeni ha lwonolwo lushaka nahone vha vhu vhidza “vhuṱambo ha Yehova.” Fhedzi Yehova o vha pfisa vhuṱungu nge vha ita zwenezwo. (Ekisoda 32:2-10) Samusi muporofita Yesaya o amba, a ro ngo fanela u “fara tshithu tshi re na tshika.”—Vhalani Yesaya 52:11.

13. Ndi mbudziso dzifhio dzine na nga vha nadzo musi ni tshi litsha u pembelela dziholodei?

¹³ Musi ni tshi litsha u pembelela dziholodei, ni nga kha ḓi vha na mbudziso nnzhi. Sa tsumbo: Ndi fanela u ita mini arali vhane nda shuma navho vha mmbudzisa uri ndi ngani ndi sa pembeleli Khirisimusi navho? Ndi fanela u ita mini arali muṅwe muthu a nṋea tshifhiwa tsha Khirisimusi? Ndi fanela u ita mini arali mufarisi wanga wa mbingano a lavhelela uri ndi pembelele holodei? Ndi nga thusa hani vhananga uri vha si ṱungufhale nga nṱhani ha u sa pembelela holodei kana ḓuvha ḽavho ḽa mabebo?

14, 15. Ni nga ita mini arali muṅwe muthu a ni vhudza uri ni vhe na holodei yavhuḓi kana a ni ṋea tshifhiwa?

¹⁴ Ndi zwa ndeme u shumisa vhuṱali musi ni tshi khetha zwine na nga amba na zwine na nga ita kha vhuimo vhuṅwe na vhuṅwe. Sa tsumbo, arali vhathu vha ni vhudza uri ni vhe na holodei yavhuḓi, ni songo fhumula. Ni nga kha ḓi sokou ri: “Ndo livhuwa.” Fhedzi kha vhuimo vhune muthu a nga ṱoḓa u ḓivha zwo engedzeaho, ni nga kha ḓi mu ṱalutshedza uri ndi ngani ni sa pembeleli holodei. Naho zwo  ralo, tshifhinga tshoṱhe ivhani na vhuthu, ni shumise vhuṱali nahone ni ṱhonifhe. Bivhili i ri: “Zwine na amba tshifhinga tshoṱhe, ni zwi ambe nga vhuthu, zwi nge zwo shelwa muṋo, uri ni kone u ḓivha nḓila ine na ḓo fhindula ngayo vhathu vhoṱhe.” (Vhakolosa 4:6) Khamusi ni nga ṱalutshedza uri ni takalela u fhedza tshifhinga na vhaṅwe na u ṋea zwifhiwa, fhedzi a ni zwi iti nga tshifhinga tsha dziholodei.

¹⁵ Ni fanela u ita mini arali muṅwe muthu a ni ṋea tshifhiwa? Bivhili a i ṋei mutevhe wa milayo, fhedzi i amba uri ri fanela u vha na luvalo lwavhuḓi. (1 Timotheo 1:18, 19) Khamusi muthu ane a khou ni ṋea tshifhiwa ha zwi ḓivhi uri a ni pembeleli holodei. Kana a nga kha ḓi ri: “Ndi a zwi ḓivha uri a ni pembeleli holodei, fhedzi ndi ṱoḓa u ni ṋea hetshi tshifhiwa.” Kha honoho vhuimo, ni nga khetha arali ni tshi ṱoḓa u ṱanganedza tshifhiwa kana hai. Fhedzi hu sa londwi phetho ine na i dzhia, itani vhungoho ha uri ni dzula ni na luvalo lwavhuḓi. A ri ṱoḓi u ita tshithu tshine tsha nga kwama vhushaka hashu na Yehova nga nḓila i si yavhuḓi.

16. Ni fanela u ita mini arali muṱa waṋu u tshi ṱoḓa u pembelela dziholodei?

¹⁶ Ni fanela u ita mini arali vha muṱani waṋu vha tshi ṱoḓa u pembelela holodei? Ni songo lwa navho. Ni songo hangwa uri vha na ndugelo ya u ita zwine vha funa. Ivhani na vhuthu nahone ni ṱhonifhe phetho dzavho samusi na inwi ni tshi ṱoḓa vha tshi ṱhonifha dzaṋu. (Vhalani Mateo 7:12.) Fhedzi arali muṱa waṋu u tshi ṱoḓa uri ni ṱwe nawo nga holodei, ni fanela u ita mini? Musi ni sa athu u dzhia phetho, rabelani uri Yehova a ni thuse u ita phetho yo teaho. Humbulani nga ha honoho vhuimo nahone ni ite ṱhoḓisiso. Ni humbule uri ni tea u takadza Yehova tshifhinga tshoṱhe.

17. Ni nga ita mini uri vhana vhaṋu vha si vhone u nga vha khou ṱahelelwa nga u sa pembelela dziholodei?

¹⁷ Ni nga ita mini u itela u thusa vhana vhaṋu musi vha  tshi vhona vhaṅwe vha tshi khou pembelela dziholodei? Ni nga vha dzudzanyela zwiṅwe zwithu zwo khetheaho nga zwiṅwe zwifhinga. Ni nga kha ḓi ita na u vha ṋea zwifhiwa vha songo zwi lavhelela. Tshiṅwe tsha zwifhiwa zwa ndeme zwine na nga zwi ṋea vhana vhaṋu ndi tshifhinga tshaṋu na lufuno.

18. Ndi ngani ri tshi fanela u ya tshivhidzoni tsha Ṱhanzi Dza Yehova?

¹⁸ Arali ri tshi ṱoḓa u takadza Yehova, ri fanela u ṱutshela vhurereli ha mazwifhi, mikhuvha na holodei dzine dza tshimbidzana naho. Fhedzi ri fanela u dovha ra tshila u tendelana na vhurabeli ha ngoho. Nga nḓila-ḓe? Iṅwe nḓila ndi nga u ya tshivhidzoni tsha Ṱhanzi Dza Yehova tshifhinga tshoṱhe. (Vhalani Vhahevheru 10:24, 25.) U ya tshivhidzoni ndi tshipiḓa tsha ndeme vhukuma kha u shumela Yehova. (Phisalema 22:22; 122:1) Ri nga ṱuṱuwedzana musi ri tshi kuvhangana.—Vharoma 1:12.

19. Ndi ngani zwi zwa ndeme u vhudza vhaṅwe nga ha ngoho ye na i guda Bivhilini?

¹⁹ Iṅwe nḓila ya u khetha vhurabeli ha ngoho ndi u amba na vhaṅwe nga ha zwe na zwi guda Bivhilini. Vhathu vhanzhi vha ḓipfa vho tsikeledzea nga zwithu zwivhi zwine zwa khou itea kha ḽifhasi. Khamusi ni ḓivha vhaṅwe vhane vha ḓipfa nga yeneyo nḓila. Vha vhudzeni nga ha fhulufhelo ḽaṋu ḽavhuḓi ḽa vhumatshelo. Musi ni tshi ya tshivhidzoni tsha Ṱhanzi Dza Yehova nahone ni tshi vhudza vhaṅwe nga ha ngoho ya Bivhili, ni ḓo ṱhogomela uri a ni tshe na lutamo lwa u vha tshipiḓa tsha vhurereli ha mazwifhi na mikhuvha yaho. Ni nga vha na vhungoho ha uri ni ḓo takala nahone Yehova u ḓo fhaṱutshedza vhuḓidini haṋu arali na khetha u mu gwadamela nga nḓila yo teaho.—Maḽeaxi 3:10.