1, 2. (a) Che domanda gavemo de farse? (b) Parché l’è importante?

PAR MESO del stùdio dela Bìblia, ti te ghè imparà che tanti i dise adorar a Dio, ma i ze drio insegnar o praticar robe che Dio el òdia. (2 Coríntios 6:17) Par quela, Geovà el ne manda abandonar la religion falsa, “Babilònia la Granda”. (Apocalipse 18:2, 4) Cossa ti te ndarè far? Tuti noantri gavemo de far una scolia e domandarse: ‘Mi vao adorar a Dio dela maniera che Lu el vol o dela maniera che mi go sempre fato?’

² Se ti te ghè belche abandonà la religion falsa, ti te ghè fato pròpio ben. Ma pol esser che a ti ancora te piase arquante pràtiche dela religion falsa. Ndemo considerar arquante de ste pràtiche e capir parché l’è importante veder le robe dal punto de vista de Geovà.

3. (a) Parché par arquanti l’è difìcile assar de doperar imàgini ntela so adorassion? (b) Cossa la Bìblia la dise sora doperar imàgini par adorar a Dio?

³ Par tanti ani, arquante persone le ga doperà imàgini par adorar a Dio. Par lore adorar a Dio sensa le imàgini l’è strànio o fin sbalià. Ma ricòrdate che Geovà el ne insegna come adorarlo. La Bìblia la dise che Geovà no’l vol che doperemo imàgini ntela nostra  adorassion. —Lesi Êxodo 20:4, 5; Salmo 115:4-8; Isaías 42:8; 1 João 5:21.

4. (a) Parché no gavemo de adorar i morti? (b) Parché Geovà el ga proibio el so pòpolo de proar comunicarse coi morti?

⁴ Arquante persone le guasta tanto tempo e le fà tanti sforsi par adorar i morti e farghe oferte. Ma gavemo imparà che quei che i ze morti no i pol giutarne o farne mal e gnanca lori i ze drio viver in nantro posto. Proar parlar coi morti l’è pròpio pericoloso. Par dir la verità, la persona che la fà sta roba la è drio parlar coi demoni. Par quela, Geovà el ga proibio ai israeliti de proar comunicarse coi morti e manco ancora meterse ntel demonismo. —Deuteronômio 18:10-12; vedi la Nota Final 26 e 31.

5. Cossa pol giutarte a no doperar imàgini e gnanca far orassion ai morti?

⁵ Cossa pol giutarte a no doperar imàgini e gnanca far orassion ai morti? Primo, lesi la Bìblia e capissi cossa Dio el pensa sora ste robe. Lu el òdia e el considera questo “una roba detestàbile”. (Deuteronômio 27:15) Secondo, fà orassion a Geovà tuti i di domandando che el te giute a adorarlo dela maniera giusta e a pensar come Lu el pensa. (Isaías 55:9) Te pol esser sicuro che Geovà el te darà la forsa che te ocore par abandonar qual sia la pràtica relassionada cola religion falsa.

6. Parché el 25 de disembre l’è stà scoliesto come el di che Gesù l’è nassesto?

⁶ In tuto el mondo, el Nadal l’è una dele feste pi popolar. In questa data tanti i pensa che i ze drio  selebrar el di che Gesù l’è nassesto. Ma par dir la verità el Nadal l’è relassionà cola religion falsa. Una ­ensiclopèdia la spiega che i Romani pagani i selebrea ntel giorno 25 de disembre el di che el Sol l’è nassesto. I lìderi religiosi i savea che Gesù no l’era mia nassesto el 25 de disembre, ma ancora cossita i ga dessidio selebrar sta data parché i volea che de pi pagani i deventasse cristiani. (Lucas 2:8-12) I dissìpoli de Gesù no i selebrea el Nadal. El libro “Orìgini sacre de robe profonde” (in inglese) el spiega che, intorno de 200 ani dopo che Gesù l’è nassesto, “nissuni i savea, e pochi i se importea, quando esatamente lu l’è nassesto.” La selebrassion del Nadal la ga scominsià sentene de ani dopo che Gesù el ga vivesto qua ntela Tera.

7. Parché i veri cristiani no i selebra el Nadal?

⁷ Tante persone le sa che la festa de Nadal e le so tradission, come darse regali, no le ze de orìgine cristiana. Par esémpio, ntela Inglatera e in arquante parti dela Amèrica, chi selebrea el Nadal l’era castigà parché l’era una festa pagana. Ma col tempo le persone le ga scominsià a selebrar el Nadal nantra volta. Parché i veri cristiani no i selebra el Nadal? Parché lori i vol far sempre la volontà de Dio.

8, 9. Parché i primi cristiani no i selebrea el di che se fà i ani?

⁸ Par tante persone, selebrar el di che se fà i ani l’è normal. Sarà che par i cristiani l’è giusto selebrar sto di? La Bìblia la mensona che sol le persone che no le adorea a Geovà le selebrea questo di. (Gênesis 40:20; Marcos 6:21) Queste selebrassion le era fate in onor ai falsi dèi. Par quela, i primi cristiani  “i considerea pagana far la selebrassion del di che se fà i ani.” —The World Book Encyclopedia.

⁹ Ntel passà, i romani e i grechi i credea che la selebrassion del di che se fà i ani la faria un spìrito proteger la persona par tuta la vita. Lori i pensea che un spìrito el vedea el di che la persona la era nassesta, e lu ndea insieme e el protegea sta persona par tuta la vita.

10. Parché i veri cristiani no i selebra el di che se fà i ani?

¹⁰ Geovà no l’è d’acordo cole selebrassion che le ze relassionade cola religion falsa. (Isaías 65:11, 12) Par quela, i veri cristiani no i selebra el di che se fà i ani e gnanca altre feste relassionade cola religion falsa.

11. (a) Parché arquante persone le seita far ste selebrassion? (b) Cossa ga de esser pi importante par ti?

¹¹ Arquante persone le cognosse le orìgini pagane del Nadal e dele altre feste, ma le seita far ste selebrassion. Lore le pensa che ste feste le ze bone oportunità par star insieme cola fameia. E ti, cossa te pensi? No l’è mia sbalià star insieme cola fameia. Geovà el ga creà la fameia e Lu el vol che la sìpia unida e felice. (Efésios 3:14, 15) Ma la nostra relassion con Geovà la è pi importante che selebrar feste dela religion falsa sol par contentar quei dela nostra fameia. Par quela, el apòstolo Paolo el ga dito: “Seité farve sicuri de quel che el Signor el aceta.” —Efésios 5:10.

12. Che tipo de festa Geovà no’l aceta?

¹² Tante persone le pensa che le orìgini  dele feste no le ze mia tanto importanti, ma Geovà no’l pensa cossita. Lu no’l aceta gnanca una festa che la vien dala adorassion falsa e che la esalta una nassion o un umano. Par esémpio, i abitanti del Egito i fea tante selebrassion par i so falsi dèi. Dopo de scampar via dal Egito, i israeliti i ga imità una de queste selebrassion e i la ga ciamada “una festa par Geovà”. Ma Geovà li ga castigà par via de questo. (Êxodo 32:2-10) Come el profeta Isaia el ga dito, no gavemo de “tocar gnente che l’è impuro”! —Lesi Isaías 52:11.

13. Che domande fursi ti te ndarè farte quando ti te dessidi no selebrar pi le feste?

¹³ Quando ti te dessidi no selebrar pi le feste, fursi ti te ghè tante domande da far. Par esémpio: ‘Cossa posso dir ai me coleghi de laoro se i me domanda parché mi no selebro el Nadal? Cossa posso far se qualchedun me dà un regalo de Nadal? Cossa posso far se el me sposo o la me sposa vol che mi vao selebrar una festa? Come posso giutar i me fioi a no restar tristi par via che no i selebra una festa o el di che se fà i ani?’

14, 15. Cossa ti te pol far se qualchedun el te dise “Bone feste” o el te dà un regalo?

¹⁴ El bon senso el te giutarà a saver cossa dir o cossa far in cada situassion. Par esémpio, se le persone le te dise “Bone feste”, te pol dir “Gràssie”. Ma se qualchedun el vol saver de pi, ti te pol spiegar el parché dela to dessision. Ti te ghè de parlar sempre de maniera gentile e rispetosa. La Bìblia la dise: “Assé che le vostre  parole le sìpia sempre grassiose, consade con sal, cossita valtri ndaré saver come risponder a cada persona.” (Colossenses 4:6) Te pol spiegar che a ti te piase star insieme coi altri e dar regali, ma che ti te ghè scoliesto no farlo nei giorni dele feste.

¹⁵ Cossa ti te pol far se qualchedun el te dà un regalo? La Bìblia no la dà una lista de règole, ma la dise che gavemo de mantegner una bona cossiensa. (1 Timóteo 1:18, 19) Fursi la persona che la te dà el regalo no la sa mia che ti no te selebri la festa. O anca se la sa la to opinion, la dise che ancora cossita la vol darte el regalo. Te pol dessider acetar o nò el regalo, ma l’è importante che ti te mantegni una bona cossiensa. No volemo far gnente che podaria rovinar la nostra relassion con Geovà.

16. Cossa ti te ghè de far se la to fameia la vol selebrar le feste che a Dio no’l ghe piase?

¹⁶ Cossa ti te ghè de far se la to fameia la vol selebrar le feste che a Dio no’l ghe piase? No te ocore barufar con lori. Ricòrdate che lori i ga el dirito de dessider quel che i vol far. Alora, sii gentile e rispeta le so dessision cossita come ti te vol che lori i rispeta le toe. (Lesi Mateus 7:12.) Ma cossa te ghè de far se la to fameia la vol che ti te resti insieme a lori nel di dela festa? Vanti de dessider, fà orassion a Geovà par giutarte a far la dessision giusta. Pénseghe sora e va in serca par catar de pi informassion. No stà mia desmentegarte che ti te vol sempre far la volontà de Geovà.

17. Cossa ti te pol far par giutar i to fioi a no pensar che i ze drio perder qualcossa par no selebrar le feste?

 ¹⁷ Cossa ti te pol far par giutar i to fioi quando i vede altri selebrar le feste? Te pol farghe una sorpresa o qualcossa de spessial in nantra data e te pol dar­ghe regali. El meio regalo che te pol darghe l’è el to tempo e el to amor.

18. Parché gavemo de assister ale riunion cristiane?

¹⁸ Par far la volontà de Geovà, gavemo de abandonar la religion falsa, le pràtiche e le feste relassionade con ela. Anca gavemo de praticar la vera adorassion. Come? Una maniera la è assister ale riunion cristiane. (Lesi Hebreus 10:24, 25.) Le riunion le ze pròpio una parte importante dela vera adorassion. (Salmo 22:22; 122:1) Noantri se incoraiemo un al altro quando stemo insieme. —Romanos 1:12.

19. Parché l’è importante parlar ai altri sora le verità bìbliche che te sì drio imparar?

¹⁹ Fà parte dela vera adorassion parlar ai altri sora quel che te sì drio imparar dela Bìblia. Le persone le ze belche stufe de veder tante robe rugne suceder qua ntela Tera. Ti te cognossi qualchedun che l’è drio sentirse cossita? Alora, parla a sta persona sora la to maraveiosa speransa par el futuro. Quanto de pi te assisti ale riunion e te parli ai altri sora la Bìblia, tanto de pi ti te volerè abandonar la religion falsa e le so pràtiche. Te pol esser sicuro che ti te sarè felice e che Geovà el benedirà tuti i to sforsi par adorarlo dela maniera giusta. —Malaquias 3:10.