1, 2. Niikoheke makoho heeni? Ni mwaha wa heeni ontthuneyaaya otxentxa makhalelo a okumi?

NYUWO mooxuttera mBiblyani weera atthu antxipale anuupuwela weera annimukokhorela nnene Muluku, nto ohima ekhaikhai atthu awo itthu anxuttihaaya ni anipakaaya ti seiye Muluku sinimunanara. (2 Akorinto 6:17) Tiyeeyo Yehova oninleelaawe weera nikhumemo, “mBabilonia mutokwene.” Eyo tiiyo, ittiini soowotha. (Apokalise 18:2, 4) Vano neereke nyuwo mookhumamo? Nto entthuneya weera mpake eheeni? Atthu ootheene onnatthuneya opaka yoothanla. Nave onnatthuneya wiikoha, ‘keereke kinnamukokhorela Muluku ntoko owo onitthunaawe? Naari kinrowa otthikela ettiini aka yoowotha ni sookhovelela saka?’

² Wakhala weera nyuwo mookhuma ettiini yoowotha, moopaka etthu yooreera. Nave onthuneya tho otxentxa makhalelo a okumi. Mwaha wa heeni? Mwaha wooweera ninlelo pooti woosivelani itthu sa ittiini sowootha. Nave nnoorowa woona sookhovelela seiyo sinimunanara Yehova, ni mwaha wa heeni hiyo otthuneyaaya omutakiha Muluku.

3. (a) Heeni atthu akina anoonaaya ovila ohiya waakokhorela amuluku eethiru? (b) Neereke Biblya onnaakhulela weera atthu yaakokhoreleke aamuluku eethiru yoonaka weera Muluku?

³ Atthu akina khoonasivela omukokhorela Muluku ehikhanlevo amuluku oopatthiwa. Mwaha wooweera atthu awo aakhovelela waakokhorela amuluku eethiru okhuma khalai, ni akina annawara muxiko emaara yootheene. Wakhala weera nyuwo munuupuwela weera khamunwera ohiya, muupuweleke ele  muxuttenraanyu. Nto Yehova oohima moota womukokhorela ni mukhalelo onimusivela. Mene Biblya onithaliha weera Yehova, khantthuna weera atthu yaakokhoreleke amuluku eethiru, eyo tiiyo, itthu soopatthiwa. — Mmusome Ottimula 20:4, 5; Nsalmu 115:4-8; Yesaya 42:8; 1 Yohani 5:21.

4. (a) Heeni ohinitthuneyaaya waavekelela, eyo tiiyo, orehema masina aalipa ookhwa? (b) Mwaha wa heeni Yehova aakhoottihenraawe ana a Israel wuuluma ni alipa ookhwa?

⁴ Atthu akina anninanariha musurukhu muntxipale yaavahaka alipa ookhwa ni yaavekelelaka. Mene mapuro makina, atthu aakhovelela orehema masina, eyo tiiyo, waavekelela alipa ookhwa. Mootteliha murima, hiyo noosuwela weera alipa ookhwa hakhanle nipuro nri poothe. Awo khaniwera onihasula naari onivaha eparakha. Okhuma khalai, Yehova ahakhoottihera ana a Israeli wuuluma naari ovara etthu eri poothe enivarihana ni alipa ookhwa, eyo tiiyo, itthu sinivarihana ni onammunepani. Yehova onahima weera ti woowopiha wuuluma ni alipa ookhwa. Nto wakhala weera mohaalohera alipa okhwa, musuweleke weera minepa soonanara. — Olaleya 18:10-12; Nwehe Enoota 26 ni 31.

5. Eheeni enrowa wookhaviherani ohaakokhorela amuluku oopathiwa, ni waavekelela alipa ookhwa?

⁵ Eheeni enrowa wookhaviherani ohikokhorela miluku soopatthiwa naari orehema masina aalipa ookhwa? Etthu yoopatxera, ori omusoma Biblya ni wiiwexexa yootthuna ya Yehova. Mikhalelo iyo soowavaha yootxa alipa ookhwa, Yehova omunanara. Owo onahima weera opaka itthu iyo eri etthu ‘yoonanara.’ (Olaleya 27:15) Yanaaveli, munvekeleke Yehova mahiku ootheene weera ookhavihereni othanla okokhorela wa ekhaikhai ni onamusivela. (Yesaya 55:9) Nto muroromeleke weera Yehova onimoovahani ikuru weera muhiye itthu sootheene sinvarihana ni ittiini soowotha.

6. Mwaha wa heeni opatxenraaya wupuweleliwa oyariwa wa Yesu nihuku na 25 a Dezembro?

⁶ Efesta ya Natale yootepa osuweliwa elapo yootheene. Atthu  akina anuupuwela weera nihiku ayariwaiye Yesu. Nto Natale khahiyono nihuku ayariwaiye Yesu. Ebuukhu ya esiclopediya, enithaliha weera, mapakawu a khalaai yaatxa efesta ya ophattuwa wa nsuwa nihuku na 25 a Dezembro. Muhoolo mwaya ahooleli a ittiini, yaawo yiisoona okhala makristu, yaasuwela weera Yesu khaayarinwe nihiku na Natale, eyo tiiyo, 25 a Dezembro. Naamwi yaasuwenle, awo annatxa efesta ya nihiku na 25 a Dezembro ehimaka weera naari nihiku ayariwaiye Yesu. Mwaha wooweera yaatthuna weera atthu akina ekhale makristu. (Luka 2:8-12) Mene oohusera oopatxera a Yesu khayaamutxa Natale. Mwa ntakihero, ebuukhu ya Origens Sagradas de Coisas Profundas ya enkelexi, enahima weera saavira iyaakha 200 Yesu ‘arwiyeene elapo ya vathi ni atthu ehisuwelaka nihiku ayariwaiye, mwaha wooweera atthu khiyapwattha-pwattha osuwela nihuku ayariwaiye.’ Mweekhaikhai efesta ya Natale, epatxenre sivinreene iyaakha soweeraka 300 Yesu akhwiiyeene.

7. Mwaha wa heeni makristu ekhaikhai ahimmutxaaya Natale?

⁷ Atthu akina aasuwela weera Natale ni ifesta ikina sinipakiwa nihuku na 25 a Dezembro khahiyono sa ekristu. Mwaanisuwela weera mapuro makina khalai yaanikhottihiwa omutxa Natale? Mwa ntakihero, wInglatera ni mapuro makina a wAmerika do Norte. Muttu amutxa Natale mapuro awo, annaphukiwa mulatthu ni olivihiwa. Mooripiha murima, ilapo sene seiya atthu aatthikela omutxa Natale. Nto makristu ekhaikhai khammutxa Natale mwaha wooweera antthuna omuhakalaliha Muluku.

8, 9. Mwaha wa heeni makristu akhalai yahaatthapelaaya nihuku nooyariwa?

⁸ Itthu ikina sinaasivela atthu ori otthapela nihiku mutthu oyariwaiye. Neereke ti woonanara? Biblya onuluma paahi ifesta piili sa oyariwa. Yaari atthu yahaamukokhorela Yehova. (Ephattuwelo 40:20; Marko 6:21) Atthu yaannitthapela efesta ya nihuku nooyariwa yattittimihaka amulukwaya eethiru. Tiyeyo makristu  oopatxera “yoonaya efesta ya oyariwa okhala yamaapakawu naari yookhovelela ya ittiini.” — Ebuukhu Enciclopedia Delta Universal.

⁹ AGrego ni aRoma yuupuwela weera otthapela nihiku nooyariwa, Muluku aammukhavihera ole onipakeliwa efesta eyo. Awo yahima weera wookhala munepa wamoona mutthu owo ayariwaka ni onamukhavihera ekumi yoothene.

10. Mwaha wa heeni makristu eekhaikhai a mahikwaano, ahintthapelaaya nihiku nooyariwa, neere aniversaariyu?

¹⁰ Yehova khanaakhulela otxa ifesta sinivarihana ni ittiini sowootha. (Yesaya 65:11, 12) Nave tiyeeyo tho eneereya mahikwaano, makristu ekhaikhai khaanthapela nihiku nooyariwa, eyo tiiyo, aniversario naari ifesta sinivarihana ni ittiini sowootha.

11. Heeni atthu akina anvirelelaaya otxa ifesta sinimunanara Yehova? Nto eheeni eri yootthuneya wa nyuwo?

¹¹ Naari atthu akina esuwelaka weera Natale ni iferiyado sinikhuma wa ittiini sowootha, awo annavirelela otthapela ifesta iyo. Atthu awo anuupuwela weera mahuku awo a iferiyado, mahiku ophwanelela otthekula ni amusi aya owaani. Neereke nyuwo nave munupuwela hiiho? Ekhaikhai weera khonikhoottihiwa oviriha nihiku ni amusi. Tiyeeyo Yehova opankaawe emusi, ni ontthuna weera, emusi eyo ekhaleke yoowiwanana ni yoohakalala. (Aefeso 3:14, 15) Nave Yehova ontthuna weera hiyo nikhaleke oowiiwelela, tiyeeyo nihintxahu ifesta seiyo sihinamusivela Muluku, mwaha wooweera khanintthuna omutthekela Yehova mwaha wa efesta. Nto vano, etthu yootthuneya opaka okhaleke omuhakalaliha Yehova. Ni tiyeeyo ahimmaawe murummwa Paulo: “muthanlaka yeyo enàsivela Apwiya.” — Aefeso 5:10.

12. Neereke yookhala eferiyado Yehova onaakhulelaawe?

¹² Mprofeti Yesaya ahimme weera muloko wa Muluku khonitthuneya ovara itthu sa mwiikho. Atthu akina anihima weera,  khoontthuneya osuwela enkhummayawo eferiyado. Mene Yehova khohiyono onuupuwela hiiho. Khiyaavo eferiyado yovarihana ni ittiini sowootha onaakhulelaawe Yehova, nave ifesta seiyo sinaattittimihera atthu naari elapo. Nkawehani etthu yaakhumelenle khalai. Ehuhu ya khalai, atthu a Wiixipitu yannipaka ifesta soowavuwiha amuluku aya. Nto ana a Israeli ekhumakaru Wiixipitu, awo yaakuxa musapo ene yoowo woopaka ifesta. Emaara yaapakaya ifesta iyo, yaahima weera waari “onvuwiha Yehova”. (Ottimula 32:2-10) Nto mwaha wooweera etthu ele yaapankaaya yaari yoottheka, Yehova ahattharuxa ana a Israeli. — Mmusome Yesaya 52:11.

13. Mwahiya otxa ifesta sinimunanara Muluku, pooti wiikoha makoho heeni?

¹³ Mohihovela, emaara muneeraanyu muthanle oheerela empari ifesta, nyuwo munimwikoha makoho mantxipale. Mwa ntakihero,pooti wiikoha: Kinrowa waalela hayi atthu ale kinvarakano muteko weera miyo nkimutxa Natale? Kinrowa weera eheeni wakhala weera koovahiwa nihuta mwaha wa efesta? Kinrowa ohima eheeni wa ole kithelannakano naari anamwanaka, naari ale kinkhalakano weera nkintxa iferiyado? Vano wakhala weera mwa mulipa ooyara, munrowa waakhavihera hayi anamwaniinyu weera ehikhaleke ooripiwa murima mwaha woohitxa ifesta vamoha ni efesta ya aniversariyu?

14, 15. Nto nyuwo munrowa opaka eheeni wakhala weera moheereliwa muhakalale Natale naari mwavahiwa nihuta?

¹⁴ Mukhalelo anyu wooreera onimookhaviherani osuwela etthu yoohima emaara munikohiwaanyu etthu eri poothe. Mwa ntakihero, wakhala weera ookhala oweerenleni, muhakalale efesta ya Natale ni omala wa eyaakha. Nto nyuwo khoontthuneya ohima etthu ohikhanle paahi weera asantte. Mene akhala weera ookhala mutthu ontthuna osuwela mwaha wa heeni muhintxanyu  ifesta, nyuwo ontthuneya weera mmuleeleke ni nttittimiho. Mwaha woowera Biblya onahima weera, ‘Nulumo nanyu nikhale kwekwe nosivela, nowèleliwa, wera musuwele mota heeni munaphwanelanyu omwàkhula mutthu ti mutthu.’ (Akolosi 4:6) Nave mwaaleleke weera nyuwo onnoosivelani otthuvela naari ovaha etthu, mene nihikhanle nihiku na efesta.

¹⁵ Vano nkha mwatthuveliwa nihuta weera mmutxe Natale! Apaale ale yoovanheni nihuta nne, khaasuwenle weera nyuwo khamummutxa Natale? Atthu akina pooti woovahani weera eweerereni, naari esuwelaka weera khamummutxa Natale. Vano nyuwo ontthuneya weera mpake yoothanla. Waakhela naari okhotta, mwaha wooweera, Biblya khanihima etthu yoopaka. Etthu yootthuneya tiila, muthanleke etthu eneera yoohiyeeni ni muupuwelelo wooreera. (1 Timotheyo 1:18, 19) Khontthuneya opaka etthu enamunanara Yehova.

16. Munrowa opaka eheeni wakhala weera amusi anyu annitthuna otxa ifesta seiyo simmunanara Muluku?

¹⁶ Vano ankha amusi anyu yaatthunaka omutxa Natale, naari iferiyaado seiyo nyuwo musuwenlanyu weera sinnimunanara Muluku? Nyuwo hoontthuneya waanyemela amusi anyu. Mwaahiyeke ethanleke etthu antthunaaya opaka. Ekhaikhai ti weera nyuwo muntthuna weera atthu aawo ettittimiheke soothanla sanyu. Nave nyuwo tho ontthuneya weera muttittimiheke soothanla saya. (Mmusome Matheyo 7:12.) Nto hai wakhala weera ahoowopani ni antthuna weera muhootxele okhalavo nihiku anrowaaya otxa efesta eri poothe enimunanara Muluku? Muhinakuve waakhulela nwopelo owo, ontthuneya weera munvekele Yehova nikhavihero, weera nwere opaka soothanla sooreera. Nto ontthuneya tho wuupuwelela itthu sinrowa weereya ofestani iwo. Ni mwiilipihere waasasa mathipelo a mwaha ntoko owo. Etthu yootepa otthuneya tiila, mpakeke soothanla sinrowa omusivela Yehova Muluku.

17. Muniipake eheeni weera anamwaniinyu, ehiripiweke murimwa mwaha woohitxa ifesta simmunanara Muluku?

 ¹⁷ Mwaakhavihereke anamwaniinyu weera ehikhaleke ooripiwa murima mwaha woohitxa ifesta. Munrowa opaka moota heeni? Emaara ekina, mwaapakeleke aniinyu efesta weera muhakalele vamoha. Ni emaara ekina pooti watthuvela aniinyu etthu yoowasivela. Nto ntthuvelo ntokotoko mukhanlaanyu owavaha anamwaniinyu, ori oviriha ehuhu mwatxekettaka.

18. Heeni oraaya wootthuneya orowela mithukumano sa makristu?

¹⁸ Ntoko monnaanyu, weera nimusivelihe Yehova ontthuneya ohiya ittiini sowootha ni oherela empari ifesta sinimunanara Yehova. Mene ontthuneya weera nimukokhoreleke ntoko owo ontthunaawe. Mwa ntakihero, Yehova ontthuna weera muloko awe othukumaneke. Nto onnatthuneya orowela mithukumano sootheene simpakiwa. (Mmusome Aheberi 10:24, 25.) Mithukumano sahu empari yootepa otthuneya wa omukokhorela wahu Yehova. (Nsalmu 22:23 [22:22 NM]; 122:1) Omuthukumanoni ninnakhaviherana mukina ni mukhwaawe. — Aroma 1:12.

19. Mwaha wa heeni ontthuneyaaya waalela atthu akina itthu munxuttenraanyu mBiblyani?

¹⁹ Yehova nave ontthuna weera mwalaleereke atthu akina, itthu munxutteenranyu mBiblyani. Atthu antxipale ari oripiwa murima mwaha wa itthu soonanara sinkhumelela elapo yootheene. Ookhala mutthu mmusuwenlaanyu onkumana ni mahooxo? Aakhanlene, mpatxereke omulela itthu Biblya onahimaawe sa muholo. Mwiilipiheraka orowa omuthukumanoni ni waaleela atthu akina ele munxutteraanyu mBiblyani, onimookhaviherani okhootta sookhovelela sinvarihana ni ittiini sowootha. Muthanle omukokhorela Yehova ntoko owo ontthunaawe. Moohihovela Yehova onooreliha wiilipihera wanyu nave nyuwo munoophwanya ohakalala. — Malakhiya 3:10.