1, 2. Ano an kinahanglan mo igpakiana ha imo kalugaringon, ngan kay ano nga importante ito?

HA IMO pag-aram ha Biblia, nahibaroan mo nga damu nga tawo nga nasiring nga nagsisingba ha Dios an ha pagkamatuod nagtututdo o nagbubuhat han ginkakangalasan han Dios. (2 Corinto 6:17) Ito an rason nga hi Jehova nagsusugo ha aton nga gumawas ha buwa nga relihiyon, an “Babilonya nga Gamhanan.” (Pahayag 18:2, 4) Ano an imo bubuhaton? An tagsa ha aton kinahanglan magpili ngan magpakiana ha aton kalugaringon, ‘Karuyag ko ba singbahon an Dios ha paagi nga iya karuyag, o karuyag ko hiya singbahon ha paagi nga akon nahiaraan?’

² Kon binaya o inundang ka na ha pagin membro ha buwa nga relihiyon, maopay ito. Pero ha imo kasingkasing bangin nalilipay ka pa ha iba nga buruhaton ngan kustomre han buwa nga relihiyon. Aton hisgotan an pipira hito nga buruhaton ngan kustomre ngan kitaon kon kay ano nga importante nga tagdon naton ito ha paagi han pagtagad hito ni Jehova.

3. (a) Kay ano nga an iba bangin makurian pag-undang ha paggamit hin imahen ha ira pagsingba? (b) Ano an ginsisiring han Biblia mahitungod ha paggamit hin imahen ha pagsingba ha Dios?

³ An iba nagamit hin mga imahen o groto ha ira balay ha pagsingba ha Dios ha sulod hin damu na  ka tuig. Kon ito an imo ginbubuhat, bangin umabat ka nga malain o bangin sayop pa ngani an pagsingba ha Dios nga waray ito. Pero hinumdumi nga hi Jehova nagtututdo ha aton kon paonan-o hiya sisingbahon. Ngan an Biblia klaro nga nagsusumat ha aton nga nadiri hi Jehova nga gumamit kita hin mga imahen ha aton pagsingba.​—Basaha an Exodo 20:4, 5; Salmo 115:4-8; Isaias 42:8; 1 Juan 5:21.

4. (a) Kay ano nga diri naton sadang singbahon an aton mga kaapoy-apoyan? (b) Kay ano nga hi Jehova nagsugo ha iya katawohan nga diri magtesting ha pakiistorya ha mga patay?

⁴ An iba bangin maggahin hin daku nga panahon ngan kusog ha paningkamot nga lipayon an ira patay na nga mga kaapoy-apoyan. Bangin ginsisingba pa ngani nira hira. Pero nahibaroan naton nga an mga patay diri makakabulig o makakagbuhat hin maraot ha aton. Diri hira buhi ha iba nga lugar. Ngani, peligroso an pagtesting ha pakigkomunikar ha ira tungod kay an bisan ano nga mensahe nga baga hin tikang ha usa nga namatay nga paryente ha pagkamatuod tikang ha mga demonyo. Ito an hinungdan nga hi Jehova nagsugo ha mga Israelita nga diri magtesting ha pakiistorya ha mga patay o makigbahin ha bisan ano nga klase hin demonismo.​—Deuteronomio 18:10-12; kitaa an Endnote 26 ngan 31.

5. Ano an makakabulig ha imo nga iundang an paggamit hin mga imahen ha pagsingba ha Dios o an pagsingba ha imo mga kaapoy-apoyan?

⁵ Ano an makakabulig ha imo nga iundang an paggamit hin mga imahen ha pagsingba ha Dios o an pagsingba ha imo mga kaapoy-apoyan? Kinahanglan basahon mo an Biblia ngan hunahunaon hin  maopay kon ano an pagtagad ni Jehova hito nga mga butang. Para ha iya “mangil-ad” ito. (Deuteronomio 27:15) Pag-ampo kan Jehova kada adlaw para buligan ka nga tagdon an mga butang pariho han iya pagtagad ngan singbahon hiya ha paagi nga iya karuyag. (Isaias 55:9) Makakasigurado ka nga tatagan ka ni Jehova han kusog nga imo kinahanglan basi wad-on ha imo kinabuhi an bisan ano nga may kalabotan ha buwa nga pagsingba.

6. Kay ano nga an Disyembre 25 an ginpili nga petsa ha pagselebrar han katawo ni Jesus?

⁶ Ha bug-os nga kalibotan, an Pasko usa han pinakapopular nga selebrasyon, ngan kadam-an an naghuhunahuna nga selebrasyon ito han katawo ni Jesus. Pero ha pagkamatuod, an Pasko konektado ha buwa nga pagsingba. Usa nga ensayklopidya an nagsasaysay nga an mga Romano nga pagano nagselebrar han birthday han adlaw ha Disyembre 25. Karuyag han mga lider han singbahan nga damu pa nga pagano an magin Kristiano, salit bisan kon hi Jesus waray matawo ha Disyembre 25, nagdesisyon hira nga igselebrar an katawo ni Jesus hito nga petsa. (Lucas 2:8-12) An mga disipulo ni Jesus waray magselebrar han Pasko. Usa nga libro an nagsasaysay nga ha sulod hin 200 ka tuig katapos ig-anak hi Jesus, “waray usa nga maaram, ngan gutiay la nga mga tawo an interesado ha eksakto nga petsa han iya katawo.” (Sacred Origins of Profound Things) An mga selebrasyon han  Pasko nagtikang pipira ka gatos ka tuig an naglabay katapos mabuhi hi Jesus ha tuna.

7. Kay ano nga an tinuod nga mga Kristiano diri nagsiselebrar han Pasko?

⁷ Damu an maaram han pagano nga gintikangan han Pasko ngan han mga tradisyon hito, sugad han pagkaada hin mga parti ngan panhatag hin regalo. Pananglitan, ha England ngan ha iba nga lugar ha Amerika, may panahon nga igindiri an pagselebrar han Pasko tungod han pagano nga gintikangan hito. An bisan hin-o nga nagselebrar hito ginsirotan. Pero ha urhi, an mga tawo nagtikang na liwat pagselebrar han Pasko. Kay ano nga an tinuod nga mga Kristiano diri nagsiselebrar han Pasko? Tungod kay karuyag nira lipayon an Dios ha ngatanan nga ira ginbubuhat.

8, 9. Kay ano nga an siyahan nga mga Kristiano diri nagsiselebrar hin birthday?

⁸ Usa pa nga popular nga selebrasyon para ha damu nga tawo amo an ira birthday. Sadang ba igselebrar han mga Kristiano an birthday? An mga selebrasyon han birthday nga gin-uunabi ha Biblia ginselebrar la han mga diri nagsisingba kan Jehova. (Genesis 40:20; Marcos 6:21) An mga selebrasyon han birthday hadto ginagamit ha pagpasidungog ha buwa nga mga dios. Ito an rason nga ginhunahuna han siyahan nga mga Kristiano nga “pagano nga kustomre an pagselebrar han katawo han bisan hin-o.”​—The World Book Encyclopedia.

⁹ An mga Romano ngan mga Griego ha kadaan nga  panahon natoo nga may usa nga espiritu nga presente ha katawo han kada tagsa ngan ini nga espiritu nagpuproteksyon han indibiduwal ha iya bug-os nga kinabuhi. “Ini nga espiritu may-ada misteryoso nga relasyon ha dios nga ha iya birthday igin-anak an indibiduwal,” siring han libro nga The Lore of Birthdays.

10. Kay ano nga an mga Kristiano yana diri sadang magselebrar hin birthday?

¹⁰ Ha imo hunahuna, gin-uuyonan ba ni Jehova an mga selebrasyon nga konektado ha buwa nga relihiyon? (Isaias 65:11, 12) Diri. Ito an rason nga diri kita nagsiselebrar hin birthday o bisan ano nga selebrasyon nga konektado ha buwa nga relihiyon.

11. Kay ano nga an iba nga mga tawo nagsasaurog hin mga selebrasyon? Ano an sadang magin importante gud ha imo?

¹¹ An iba maaram han pagano nga gintikangan han Pasko ngan han iba pa nga mga selebrasyon, pero padayon nga ginsiselebrar nira ito. Para ha ira, an mga selebrasyon usa nga maopay nga oportunidad para makaupod an ira pamilya. Sugad ba liwat hito an imo inaabat? Diri sayop an paghingyap nga makaupod an imo pamilya. Hi Jehova an naglarang han pamilya, ngan karuyag niya nga magin maopay an aton relasyon ha ira. (Efeso 3:14, 15) Pero kinahanglan magpokus kita ha pagkaada maopay nga relasyon kan Jehova imbes nga lipayon an aton mga paryente pinaagi ha pagsaurog hin mga selebrasyon han buwa nga relihiyon. Ito an rason nga hi apostol Pablo nagsiring:  “Padayon nga siguroha kon ano an kinakarawat han Ginoo.”​—Efeso 5:10.

12. Ano nga mga selebrasyon an diri gin-uuyonan ni Jehova?

¹² Para ha damu nga tawo diri importante an gintikangan han usa nga selebrasyon, pero diri sugad hito an panhunahuna ni Jehova. Diri niya gin-uuyonan an mga selebrasyon nga nagtikang ha buwa nga pagsingba o nagpapahitaas hin mga tawo o mga simbolo han nasud. Pananglitan, an mga taga-Ehipto may damu nga selebrasyon para ha ira buwa nga mga dios. Katapos pumalagiw han mga Israelita tikang ha Ehipto, ira ginsubad an usa han pagano nga mga selebrasyon han mga taga-Ehipto ngan gintawag ito nga “piyesta para kan Jehova.” Pero ginsirotan hira ni Jehova tungod han pagbuhat hito. (Exodo 32:2-10) Sugad han ginsiring ni propeta Isaias, diri kita sadang ‘kumapot hin bisan ano nga mahugaw!’​—Basaha an Isaias 52:11.

13. Ano nga mga pakiana an bangin igpakiana mo kon magdesisyon ka nga umundang pagsaurog han mga selebrasyon?

¹³ Kon magdesisyon ka nga umundang pagsaurog han mga selebrasyon, bangin damu an imo mga pakiana. Pananglitan: Ano an sadang ko buhaton kon an akon mga katrabaho magpakiana kon kay ano nga diri ako nagsiselebrar han Pasko kaupod nira? Ano an sadang ko buhaton kon may maghatag ha akon hin regalo ha Pasko? Ano an sadang ko buhaton kon karuyag han akon bana o asawa nga igsaurog ko an usa nga selebrasyon? Paonan-o ko mabubuligan an akon  mga anak nga diri masubo tungod han diri pagsaurog han usa nga selebrasyon o han ira birthday?

14, 15. Ano an puydi mo buhaton kon may magsiring ha imo hin “Malipayon nga Pasko” o maghatag ha imo hin regalo?

¹⁴ Importante an maopay nga pagturotimbang kon nagdidesisyon ka kon ano an igsisiring ngan bubuhaton ha tagsa nga sitwasyon. Pananglitan, kon an mga tawo magsiring ha imo hin “Malipayon nga Pasko!” diri mo hira kinahanglan igbalewaray. Puydi ka man sumiring hin “Salamat.” Pero ha mga sitwasyon nga karuyag han indibiduwal nga mahibaro hin dugang pa, puydi mo igsaysay kon kay ano nga diri ka nagsasaurog han usa nga selebrasyon. Kondi pirme magin buotan, mataktika, ngan matinalahuron. An Biblia nasiring: “An iyo mga pulong magin makaruruyag pirme, sugad hin tinimplahan hin asin, basi mahibaro kamo kon paonan-o kamo sadang bumaton ha tagsa nga tawo.” (Colosas 4:6) Bangin puydi mo igsaysay nga nalilipay ka paggahin hin panahon kaupod han iba ngan paghatag hin mga regalo pero diri mo karuyag nga buhaton ito ha panahon hito nga mga selebrasyon.

¹⁵ Ano an sadang mo buhaton kon may maghatag ha imo hin regalo? An Biblia waray maghatag hin listahan han mga surundon, pero nasiring ito nga sadang naton tipigan an maopay nga konsensya. (1 Timoteo 1:18, 19) Bangin an naghahatag ha imo han regalo diri maaram nga diri ka nagsasaurog han usa nga selebrasyon. O bangin sumiring hiya, “Maaram ako nga diri ka nagsasaurog hini nga selebrasyon, pero karuyag ko la gihapon ihatag ini ha imo.”  Hain man hini nga mga sitwasyon, puydi ka magdesisyon kon kakarawaton mo an regalo o diri. Pero anoman an imo magin desisyon, siguroha nga matipigan mo an maopay nga konsensya. Diri naton karuyag nga magbuhat hin bisan ano nga magkakaada maraot nga epekto ha aton relasyon kan Jehova.

16. Ano an sadang mo buhaton kon karuyag han imo pamilya nga magsaurog hin mga selebrasyon?

¹⁶ Ano an sadang mo buhaton kon karuyag han imo pamilya nga igsaurog an usa nga selebrasyon? Diri mo kinahanglan makiaway ha ira. Hinumdumi nga may katungod hira nga magdesisyon kon ano an karuyag nira buhaton. Magin buotan ngan irespeto an ira karuyag sugad la nga karuyag mo nga irespeto nira an imo karuyag. (Basaha an Mateo 7:12.) Pero kon karuyag han imo pamilya nga umupod ka ha ira ha panahon han selebrasyon, ano an sadang mo buhaton? Antes ka magdesisyon kon ano an bubuhaton, pag-ampo kan Jehova para buligan ka nga makahimo hin husto nga desisyon. Hunahunaa an sitwasyon, ngan pagsaliksik mahitungod hito. Hinumdumi nga karuyag mo nga pirme lipayon hi Jehova.

17. Ano an puydi mo buhaton basi buligan an imo mga anak nga diri maawa kon an iba nagsasaurog hin mga selebrasyon?

¹⁷ Ano an puydi mo buhaton basi buligan an imo mga anak kon nakikita nira an iba nga nagsasaurog hin mga selebrasyon? Aw, ha panapanahon, puydi ka maghikay hin espesyal nga pagturotarampo para ha ira. Puydi mo liwat hira surprisahon hin mga regalo. Ngan usa han pinakamaopay nga mga regalo nga imo  maihahatag ha imo mga anak amo an imo panahon ngan gugma.

18. Kay ano nga sadang kita tumambong ha Kristiano nga mga katirok?

¹⁸ Basi mapalipay hi Jehova, kinahanglan bumaya kita ha buwa nga relihiyon pati na ha mga kustomre ngan mga selebrasyon nga may koneksyon hito. Pero kinahanglan liwat naton buhaton an tinuod nga pagsingba. Paonan-o? Usa nga paagi amo an regular nga pagtambong ha Kristiano nga mga katirok. (Basaha an Hebreo 10:24, 25.) An mga katirok importante gud nga bahin han tinuod nga pagsingba. (Salmo 22:22; 122:1) Madadasig naton an usa kag usa kon natambong kita ha mga katirok.​—Roma 1:12.

19. Kay ano nga importante nga isumat ha iba an mga kamatuoran ha Biblia nga imo nahibabaroan?

¹⁹ Usa pa nga bahin han pagbuhat han tinuod nga pagsingba amo an pagsumat ha iba han imo nahibabaroan tikang ha Biblia. Damu nga tawo an nasusubo ha magraot nga mga nahitatabo ha kalibotan. Bangin may mga kilala ka nga sugad hito an inaabat. Sumati hira han imo makalilipay gud nga paglaom ha tiarabot. Samtang natambong ka ha Kristiano nga mga katirok ngan nagsusumat ha iba han kamatuoran ha Biblia, aabaton mo nga diri ka na maghihingyap nga magin bahin han buwa nga relihiyon ngan han mga kustomre hito. Makakasigurado ka nga magigin malipayon ka ngan hura nga bibendisyonan ni Jehova an imo mga paningkamot samtang imo ginpipili nga singbahon hiya ha husto nga paagi.—Malakias 3:10.