1, 2. Gini sanahe si aida mo sana tiro na ni, na tipagine duhe ti ni ni nyanyakipa pai?

VURUBE gamo wisigo Baibiri, mo ima wirika gupai nga gu dungu aboro naya i nairiso Mbori nayugo watadu namanga agu apai Mbori asogaha. (2 AKorindo 6:17) Si du nga ndu gupai Yekova aya ti ni ani kuru kusayo rogo ziree pambori nga “Babera [nga] gu bakere bakporo.” (Yugoti 18:2, 4) Ginipai mo nika mangaha? Boro na boro si aida ni mangi siapai, na si naida ani sana tirani nga, ‘Ya mo mi naida ka iriso Yekova ngba gu gene ko aida mi irisiko ngbaha, watadu mi naida ka irisoko kina wai mi naamangaha dedede?’

² Ka si du nga mo aima kura rogo ziree pambori kusayo, si ni wenepai. Ono si rengbe kadu nga mo kindi na nyemu agu asino mangaapai nga ga ziree pambori. Ani sakingo pai awere tipa bete agu asino mangaapai re na ki bi ndu gupai duhe ti ni ni nyanyakipa pai ani naabihe kina wai Yekova abihe.

3. (a) Tipagine duhe ti ni ni mbumbuhe fu kura aboro i mbu mangasunge na kpiahe rogo gayo irisombori yo? (b) Ginipai Baibiri apehe tipa mangasunge na akpiahe tipa ka iriso Mbori?

³ Gu kura aboro ima mangasunge na akpiahe watadu aba-irisombori tipa dungu agarã rogo akpuyo tipa ka iriso Mbori. Ka si du nga wo duhe tipa ro, si ima rengba kadu ni kpakarakpakaraha foro tipa ka iriso Mbori zangaha. Ono mo tingidi gupai nga, Yekova nayugopai furani tipa wai rengbe ani ka irisoko. Na Baibiri nayugo gupai furani ziazia nga Yekova aidanga ani mangisunge na akpiahe rogo gaani iriso yo te.—Mo gedi Gate 20:4, 5; Atambuahe 115:4-8; Yesaya 42:8; 1 Yoane 5:21.

4. (a) Tipagine du si aidanga ani irisi agu atitarani ti ni naima kpiko ya? (b) Tipagine du Yekova aya fu gako aboro ti ni wẽ ka i furanga na kpikpi aboro ya?

 ⁴ Gu kura aboro nadia bakere regbo na ome tipa ka asada ka fu ngbarago fu agu atitayo naima kpiko. Na i ima rengba kaa iriso yo. Ono ani aima wirika gupai nga kpikpi aboro arengbanga ka undo rani watadu ka imisa rani te. I arakanga rogo gu kura ba te. Nirengo, si ni bagbegberẽpai ka asada ka fura nayo mbiko agu apai dunduko si awira wa si naye be gu gumerani naima kpi, si naye nzunzu be adaimona. Si du nga ndu gupai Yekova aza aYisaraere ti ni ti fura na kpikpi aboro watadu ka rimisotise ku rogo sino adaimona.—Pa Fu Rugute ni Ue he 18:10-12; mo bi gu 26 na 31 rukutu kekeapai du ti digido gi buku re.

5. Ginipai rengbe ka undo ro tipa mo mbu mangasunge na akpiahe tipa ka iriso Mbori na ka mbu iriso agu atitaro naima kpi?

⁵ Ginipai rengbe ka undo ro tipa mo mbu mangasunge na kpiahe tipa ka iriso Mbori watadu ka mbu iriso agu atitaro naima kpiko? Si naida mo gedi Baibiri na ki berẽ wenengai tipa wai Yekova abi agu apai re. Ko nabihe ni “kere gbegberẽhe.” (Pa Fu Rugute ni Ue he 27:15) Mo kpari fu Yekova na aˈuru dunduko tipa ko undo ro mo nibi apai kina wai ko abihe na tipa ko undo ro mo irisiko ngba gu gene ko aida na ni. (Yesaya 55:9) Mo rengbe kadu na kido nga Yekova nika fu gu ome afu foro mo aidaha tipa ka kusa agu ahe kusayo rogo gamo raka nga gu du na ngbanya dagbaha na ziree pambori.

6. Tipagine du i asia Banduru 25 ni uru pumbo batika Yesu ti ni?

⁶ Rogo zegino naabaha, Krisimasi nga nyanyakipa pumbo fu aboro, na dungu aboro naberãha nga si nga pumbo uru batika Yesu. Ono Krisimasi na ngbanya dagbaha na ziree irisombori. Buku sa (encyclopedia) nasakapai nga, ga aRomo apagano anaairiso uru batika uru rogo Banduru ti  rameru 25. Abangbembatayo rogo apambori aaida dungu apagano da ni aKristano, wa vura duhe nga i avunganga Yesu rogo Banduru ti rameru 25 te, i atona ka iriso uru batika Yesu rogo uru nangia ga pumbo batika uru re. (Ruka 2:8-12) Ga Yesu abawiriki anaairisongo Krisimasi te. Buku sa nasakarogo apai yo asakipai nga, fuo agarã 200 tingbafuo batika yo Yesu, “boro ho naini gu uru i abatika ko ti ni te, na kina bete aboro gbua nanaaberãpa gu uru nzunzu i abatika ko ti ni.” (Sacred Origins of Profound Things) Pumbo Krisimasi atona dungu kama agarã kusa fuo raka Yesu auru kpotosende ane.

7. Tipagine ndikidi aKristano amanganga pumbo Krisimasi ti ni ya?

⁷ Dungu aboro ima ino gupai nga apagano naenge mburu Krisimasi na gaha asino mangaapai, wa gu nga manga apumbo gbiati fu agamahe. Ni kpiapai, ringara aNgirisi gbiati gu kura papara Amerika, regbo adu kinaho i arugusi manga pumbo Krisimasi mbiko mburuhe aenge ti apagano. Gu boro naanimangi he ni anigbia mbusa nibasa. Ono niyangaraha, aboro atona ka manga pumbo Krisimasi berewe. Tipagine ndikidi aKristano amanganga pumbo Krisimasi ti ni ya? Bambiko i naida ka sa ngbarago ti Mbori rogo agu apai dunduko i amangaha.

8, 9. Tipagine agu aKristano naadu mbata anaamanganga pumbo uru batika boro ti ni ya?

⁸ Gu kura pumbo dungu aboro namangipa ha gbe nga manga pumbo uru batika boro. Ya mo si naida aKristano irisi pumbo uru batika boro? Gu yangara pumbo uru batika boro du paha rogo Baibiri yo nga kina ga agu aboro naangianga airisi Yekova ya. (Bambata Pai 40:20; Marako 6:21) I anaamanga pumbo uru batika boro tipa irisa ziree ambori. Si nga ndu gupai agu aKristano naadu mbata “anaabi agu aˈuru pumbo batika re ti ni ni sino apagano.”—The World Book Encyclopedia.

 ⁹ Agu aRomo naadu mbata na aGiriki aidi kuti gupai nga ho ya batika boro ni nibasa, toro nadu kinaho, na gu toro re du nika banda ni rogo gani raka yo. Buku sa naya “Gi toro re adu na pagume dagbaha na gu mbori i nabatika gu boro re rogo gu uru i abatika gu mbori re ti ni.”—The Lore of Birthdays.

10. Tipagine si aidanga aKristano nimangi pumbo aˈuru batika ti ni ya?

¹⁰ Ya mo mo naberãha nga Yekova naida na agu apumbo du na ngbanya dagbaha na ziree pambori? (Yesaya 65:11, 12) Oó, ko aidanga na ni te. Si du nga ndu gupai ani amanganga apumbo aˈuru batika boro watadu gu kura aˈuru aongoda du na ngbanya dagbaha na ziree pambori ti ni ya.

11. Tipagine du kura aboro nairiso aˈuru ongoda ti ni? Ginipai si aida mo bihe na nyanyakipaha?

¹¹ Gu kura aboro ima ino gupai nga Krisimasi na gu kura aˈuru ongoda aenge ti apagano, ono i nandu kindi kumbatayo kaa manga agu apumbo re. I nabihe nga aˈuru ongoda nga wene momu tipa ka sungo sa na agumeyo. Ya mo wo du duhe tipa ro? Anga si ni gbegberẽpai tipa mo di regbo na agumero te. Yekova du naenge mburu ramukporo, na ko naida ani du na wene pagume na agumerani. (AEfeso 3:14, 15) Ono tie, si naida ani moiberãrani tipa kadu na wene pagume na Yekova angianga kaa fu ngbarago fu agumerani ni manga ani apumbo aˈuru aongoda ya. Si nga ndu gupai gu mokedi nangia Pauro aya ti ni wẽ: “Oni nikpária pa gu he ngba ti Gbia.”—AEfeso 5:10.

12. Ginihe rengbe ka sa aˈuru ongoda si du ni gbegberẽhe bangiri Yekova?

¹² Dungu aboro abingo pa enga mburu aˈuru ongoda ni gupai du na nyanyakipaha te, ono Yekova abingo ho tigako wo te. Ko aidanga na agu aˈuru ongoda mburuhe aenge ti ziree pambori watadu agu aˈuru ongoda nakiisopa aboro watadu du tipa aringara te. Ni kpiapai, aEzipeto anaamanga  dungu apumbo fu gayo ziree ambori. Fuo kura aYisaraere Ezipeta yo, i atona ka manga ga apagano apumbo na i ki yambu he nga “pumbo fu Yekova.” Yekova aima fu mbusa fuyo tipa gupai i amangi he re. (Gate 32:2-10) A wa gu nebi nangia Yesaya agumbaha nga ka ani “zádi nga birikobiriko he wa sa ya!”—Mo gedi Yesaya 52:11.

13. Gini asanahe rengbe kadu berãro yo ka mo diberã tipa ka mbu manga aˈuru ongoda?

¹³ Ho mo adiaberã ni ka mbu manga apumbo aˈuru ongoda, mo rengbe kadu na dungu asanahe berãro yo. Ni kpiapai: Ginipai mi nika mangaha ka gimi abadiasunge sana re tipa ndu gupai mi amanganga pumbo Krisimasi ti ni ya? Ginipai mi ka mangaha ka si du nga boro fu gu gamahe fere nga ga Krisimasi? Ginipai mi nika mangaha ka si du nga gimi badiarogatise naida mi mangi aˈuru ongoda? Wai du rengbe mi ka undo awire ka rago gberẽnga tiyo tipa zanga yo manga aˈuru ongoda watadu tingidapa uru batikayo ya?

14, 15. Ginipai si aida mo mangihe ka boro ya foro wene uru ongoda watadu ka fu gamahe foro?

¹⁴ Si ni banyanyakipa pai mo ini gupai rengbe mo ka pehe na ki mangihe tipa ngbatunga agu apai re ni basasa. Ni kpiapai, ka boro ya foro wene uru ongoda foro, si aidanga mo ongo aonga kungba ni te. Mo rengbe arengba ka ya gbua wẽ, “Tambuahe.” Ono ka boro aida ka ino gu kura pai, mo ima rengba ka saka ndu gupai funi mo naamanganga aˈuru ongoda ti ni ya. Ono tie, si naida mo fura dedede wenengai, rogo birĩ yo na rogo iriso yo. Baibiri naya: “Oni fúra na undahe dedede, si ki hii na tikpo, si du oni ka ina ti ni ya wãi oni ka karaga ha fu akuaroni.” (AKorosaio 4:6) Isoke mo rengbe ka sakaha fu ni nga, mo naagbia ngbarago agbia ti dia regbo na kura aboro na kaa fuka agamahe fuyo ono mo  diberã nga mo aidanga ka mangaha ti regbo agi aˈuru ongoda re te.

¹⁵ Ginipai rengbe mo ka mangaha ka boro fu gamahe foro? Baibiri atangaranga arugute tipa gi pai re te, ono si naya si naida ani banda wene sangbakpotoseyo. (1 Timoteo 1:18, 19) Si rengbe kadu nga gu boro nafu gu gamahe re foro ni ainongo gupai nga mo naamanganga pumbo aˈuru ongoda te. Watadu ni rengbe ka ya, “Mi ima inoho nga mo naamanganga pumbo aˈuru ongoda te, ono mi naida aida ka fu gi he re foro.” Rogo agi abangiri aba re, mo rengbe ka diaberã singia ka dia gu gamahe re watadu ka zanga diaha. Ono ka mo vura manga kina gini diaberã vurũ, mo banda wene sangbakpotoseyo. Ani aidanga ka manga gupai nika gbarasapa gaani pagume na Yekova wagusa te.

16. Ginipai si adia mo mangihe ka si du nga gamo aborokporo naida ka manga pumbo aˈuru ongoda?

¹⁶ Ginipai rengbe mo ka mangaha ka si du nga gamo aborokporo naida ka manga pumbo uru ongoda? Si aidanga mo so kina vura na yo te. Mo tingidi gupai nga, i na rengo beyo tipa ka sia ka manga gupai i aidaha. Mo du wenengai na yo na kidu na irisa kuti gayo siapai kina wai mo aida i niirisi gamo asiapai a. (Mo gedi Matayo 7:12.) Ono ka gamo aborokporo aida mo di regbo na yo ti regbo uru ongoda, ginipai rengbe mo ka mangaha? Mbata fu dia mo berã tipa gupai rengbe mo ka mangaha, mo kpari fu Yekova tipa ko undo ro mo mangi wene diaberã. Mo berẽkurii gipai re, na ki wetekepai tipaha. Mo tingidi gupai nga, si naida mo nisa ngbarago ti Yekova ti aregbo dũ.

17. Wai du rengbe mo ka undo awiro ka i bingoho nga wenepai kinaho i azangaha ti zanga manga pumbo aˈuru ongoda baraho akurayo amangaha ni ya?

¹⁷ Ginipai rengbe mo ka mangaha tipa ka undo awiro ho i  abi akurayo ni i nimangi pumbo aˈuru ongoda? Sidu, si naida mo ni mangi wiri kparakpara mbakadapai tipa yo dedede. Mo ima rengba ka tunguo yo na agamahe ti gu kura aregbo. Na gu wene gamahe rengbe mo ka fuhe fu awiro nga gamo regbo na nyemuse.

18. Tipagine si aida ani naandu tipa agu adunguratise nga ga akristano ti ni?

¹⁸ Tipa ka sa ngbarago ti Yekova, si naida ani mbu ziree pambori kodihe na gaha asino mangaapai na agu apai du na ngbanya na aˈuru ongoda. Ono si naida ani mangi ndikidi irisombori a. Rogo gini gene? Gene sa nga kaa ndu tipa agu adunguratise nga ga aKristano dedede. (Mo gedi AEbere 10:24, 25.) Adunguratise nga nyanyakipa papara ndikidi iriso Mbori. (Atambuahe 22:22; 122:1) Ani nanyakasa tirani na akuarani ho ani adungura tirani ni sa.—ARomo 1:12.

19. Tipagine duhe ti ni ni nyanyakipa pai mo gumbapa gu rengo nga ga Baibiri mo nawirikihe fu kura aboro?

¹⁹ Gu kura pai berewe rengbe ka yugoho nga mo ima sia ndikidi irisombori nga kaa fura fu kura aboro tipa agu apai mo nawirikihe rogo Baibiri yo. Gu kura aboro ni fudifudiyo ni bakerehe be gu gbegberẽ mangaapai namanga auru kpotosende. (Yezekere 9:4) Si rengbe kadu nga mo ima ino gu bete aboro du ni fudifudiyo. Mo gumbapa gu wene maabangirise du mo na ni tipa kumbatayo. Wa mo nikaa ndu kupati agu adunguratise nga ga aKristano na kini pepa agu arengo nga ga Baibiri fu kura aboro, mo nika bi gupai nga mo berewe na nyemu kadu ni papara ziree pambori na gaha asino mangaapai te. Mo rengbe arengba kadu na kido nga mo nika du adu na ngbarago na kidu na kido nga Yekova nika fu bakere maku kurii gamo asadatise wa mo nasia ka irisoko ngba ruru gene.—Maraki 3:10.