1, 2. E miomahia nalawuhe doa mu hak istimewa nuku wuda, ya nala he Surah Rieling dewofang ba doa heimu pi kul hiyeng te?

YEHUWA ba ”adiy ya buku Paneni” bangsa-bangsa ba tei-tei mia de hehalal hedosama iya pati ba ember mia wuda. (Mazmur 115:15; Yesaya 40:15) Heiwuda haba, Mazmur 145:18, 19 dewofang, ”Ama Yehuwa mihor Yehuwa de hopa hamina mia, ama dotafuda ba nal hiyeng rofi homi mia. Ama ba Yehuwa hiyena funa nala he domaha de paneng mihadasama, ya de mihor ba homong de womahia, ya de hado hiring amoni.” Opi kul-kul hak istimewa nuku ba popa! Yehuwa, de nal karikarnuku Paneni domaha pi mihadap ya domaha pi doa de womahia. Rofi, doa mu hak istimewa, namati nalkang nuku wuda ba Yehuwa de miy ama nunuku hedi.

² Haba pi doa ba Yehuwa he domaha wuda doa hedi de womahia. Pi lateiur mipaneng? Mie pi hehalal doa hei nala he Surah Rieling dewofang.

3. Nalawuhe e berdoa ba miy Yehuwa mihadasama?

³ Yehuwa domaha e berdoa namati e hadabesar. Pi lateiur hiyeng? Mie Filipi 4:6, 7 mihalal. Tiyenabei ba sadafalasing opi wotanut. Yehuwa homi kul pidatoka ya domaha pi tanut ya nala he pi hadatareu pi wohokafang.

4. Lateiur te leng kopang pi berdoa miy Yehuwa mihadasama ba Yehuwa ya pinaisena de rumai diy?

 ⁴ Doa de pomong pi Yehuwa hemokeni kang diy. Ama ba de mokeni kang, leng kopang de tanut, nala he de hadatareu, ya nala he homi mia dilia dadabesar iti dilia danaisena de rumai. Doa ba Yehuwa mihadasama bay hamo heiwuda. Surah Rieling homi mia Allah de tanut ya nala he homi mia de wopokafang, ya nala ba ariy falaka de mipaneng bay de wopidabesar. Edi bay nala he e tanut rumang mia leng kopang e wohadabesar kang. Heiopi e mipaneng iti, Yehuwa rilia rinaisena dekul rumai diy.​—Yakobus 4:8.

5. Pi lateiur hiyeng ba Yehuwa dewal doa dotafuda womahia na?

⁵ Na doa dotafuda Yehuwa de womahia? Walna. Nabi Yesaya he masa mia, Yehuwa de ama Israel wei wohokafang, ”Leng kopang ri berdoa bay ri doa ne wal womahia  na, ritang mu weya womidi.” (Yesaya 1:15) Hare pi wal pi aleling na, nal-nal ba Yehuwa dohoaiy he pi mipaneng pi doa Yehuwa dewal womahia na.

6. Nalawuhe worumai mu kul penting? E worumai e lateiur wotiyeng diy?

⁶ Hare pomaha pi doa Yehuwa de womahia temati pi worumai te. (Markus 11:24) Rasul Paulus de he falaka wofang, ”Hare worumai walna, ama Allah homi hado kang beka, heimu ama ba Allah mihamang de kul-kul worumai ba Allah mu hadoa ya ama ba kul-kul hei tahai de oweni her.” (Ibrani 11:6) Haba pi wofang ba pi worumai mani mu dar beka. Leng kopang pi worumai pi he falaka wotiyeng diy ba pi Yehuwa heluk iti.​—Mihalal Yakobus 2:26.

7. (a) Pi berdoa ba Yehuwa her mu nalawuhe tomi damasing ya heluk te? (b) Pi lateiur wotiyeng diy ba pomi rofi puna berdoa?

⁷ Pi doa ba Yehuwa her mu pi tomi damasing ya pi heluk te. Nalawuhe? Pi leng hadoa ba pi lei namati presiden hadabesar ko pi tomi damasing ya pi besar mu pi kul heluk. Yehuwa mu Allah ba Kuasa Midaliela hare pi hadabesar mu pi kul heluk ya pomi damasing te. (Kejadian 17:1; Mazmur 138:6) Pidi bay pi berdoa miy Yehuwa mihadasama mu pi kul-kul pomi rofi he puna, pi wala piwa he yera nuku puna mibesar-mibesar na.​—Matius 6:7, 8.

8. Pi nal nuku wo doa nala he pi wai mipaneng te?

⁸ Herofi mu pi nal nuku wo doa, pi pak pi paneng bay pi mifik ba doa hedi dosama te. Hedosama, leng kopang nala he pi wobutuh pi berdoa miy Yehuwa her heimu pi awang te, doma pi la rama ba Yehuwa he rowa ba de nal karikarnuku mipir. Haba pi tukai awang ba awang nala he pi mipaneng kang mati pi mipaneng te. (Matius 6:11;  2 Tesalonika 3:10) Namati pi berdoa ba Yehuwa hafang ba de pomong ba pi pak pi paneng ba beka wopirang, nal ba tomi hol mu pi hiyeng takiy te. (Kolose 3:5) Yala mie hetatangar kabei ba doa hei pi wosakolah.

9. Pi berdoa mu mahe pi her? Doa heimu nala he Yohanes 14:6 dewopidasakolah?

⁹ Pi doa mu mahe pi her? Yesus de demurid wei wohadasakolah ba doa miy ”Nima ba mar surga mia”. (Matius 6:9) Dedi bay dewai wofang, ”Ne nedi lela hiyeng rofi ya birang hei. Mbeimu ama nuku ne Nema hopa siye ne napiet beka.” (Yohanes 14:6) Hare pi berdoa mu Yehuwa hu her, ya Yesus hana he pi puna. Doa ba Yesus hana puna he arti mu nala? Hare pomaha pi doa Yehuwa de womahia awang ba Yehuwa de miy Yesus heri mu pi heluk te, hedosama pong wosakolah wuda, Yesus de buku taha mi siye mu hasalah ya mong tanitang de tadoa hiring amoni. (Yohanes 3:16; Roma 5:12) Yehuwa bay de Yesus hatang fahuni ba de Imam Lea ya Hakim.​—Yohanes 5:22; Ibrani 6:20.

10. Pi berdoa mu na pipo pi ya au nuku hareng te? He falaka wobesar.

¹⁰ Pi berdoa mu na pipo pi mi au nuku hareng te pi berdoa? Walna, Yehuwa dewal pi fang ba pi balaibuku nasiy, miti, namati natea te berdoa. Surah Rieling dewopidasakolah ba pi Yehuwa hadabesar mu pipo pi lateiur bay pi heluk te. (1 Tawarikh 17:16; Nehemia 8:6; Daniel 6:10; Markus 11:25) Kul penting ba Yehuwa mihadasama mu wala pipo tei hareng he de hehalal na, haba pomi he de hehalal. Pi berdoa mu pimau puna kang, pomi hu mia bay kang, ya tei he mia, ariy re akuni bay wal dowuda na. Pi berdoa ba Yehuwa mihadasama mu,  ama woreya re walna pi worumai pi doa hedi Yehuwa de womahia.​—Nehemia 2:1-6.

11. Nala-nala he pi Yehuwa wohadabesar kang?

¹¹ Nala he pi wo doa kang? Nala he Yehuwa hedomaha pi wo doa kang. Surah Rieling dewofang, ”Nala he pi fang ba hedomaha mia de womahia.” (1 Yohanes 5:14) Na, nal ba pi pribadi hei bay pi wo doa kang? Rofi. Doa ba Yehuwa her mu hedosama pi mokeni kang hadabesar wuda. Nala he pi tanut ya pomi mia pi doa puna Yehuwa wohadabesar kang. (Mazmur 62:8) Pi berdoa Yehuwa hafang ba de simoi rieling de mipir ba pomong pi kang mipaneng. (Lukas 11:13) Pidi bay pi Yehuwa he hafang ba de tanut daliela mipir ba pi heminuku ba kang he pi miy kang, ya pi berdoa ba rumai baharing fang ba de pomong pi bekatafiela woheikang. (Yakobus 1:5) Pidi bay pi Yehuwa hafang ba pi hasalah mu dewodafang. (Efesus 1:3, 7) Ama afena bay pi doa mihadasama kang, hanaisena mia pi tofa homi mia ya pi mokeni ba sidang mia.​—Kisah 12:5; Kolose 4:12.

12. Pi doa homi mia mu nala kul penting?

¹² Pi doa homi mia mu nala he kul penting? Yehuwa ya hedomaha hei. Nala he Yehuwa de paneng mipidasama pomi rofi puna hekang wofang te. (1 Tawarikh 29:10-13) Nal opi pi hiyeng mbeimu Yesus de dara buku taha mia lateiur berdoa mu de demurid wei wohadasakolah. (Mihalal Matius 6:9-13.) Dewofang ba nal ahola mia ba de wo doa mu Allah hana hado rieling te. Hewohaluol Yesus dewotiyeng diy ba pi berdoa ba Kerajaan Allah dosiye, ya Allah hedomaha de buku opi tau dalek. Nal-nal ba kul penting hedi wei pong wo doa kani maice hewohaluol pi pribadi hei pi wai doa. Yehuwa ya hedomaha hei pi doa ahola miwofang heimu dewotiyeng  diy ba Yehuwa ya hedomaha mu kul penting ba mipidasama.

13. Pi berdoa mu he lunga yeng?

¹³ Pi berdoa mu he lunga yeng? Surah Rieling dewal wofani na. Pi doa mu buiy re lohi heimu pi keadaan he mia. Hedosama po siyeng ne pi doa buiy wofang, haba doa lohi wofang heimu pi bekatafiela hadatareu pi Yehuwa wohokafang, namati pi Yehuwa hekang hehamol  wofang. (1 Samuel 1:12, 15) Pi wal pomaha ba pi doa lohi wofang ba ama homi hafik wuhe na, hedosama Yesus he masa mia amakang faring de paneng wuda. (Lukas 20:46, 47) Doa heiwuda mu wal Yehuwa homi hafik na. Tomi rofi puna ba berdoa mu kul penting ba Yehuwa mihadasama.

14. Pi berdoa mu mi yeng waha, ya Yehuwa hei, nala he nal opi dewopidasakolah?

¹⁴ Pi berdoa mi yeng waha? Yehuwa de pi yenabei ba leng kopang pi hadabesar iti. Surah Rieling dewofang ba pi kul ”berdoa iti te”, ”wotabalaibuku nasiy ba berdoa”, ya ”berdoa miharang na”. (Matius 26:41; Roma 12:12; 1 Tesalonika 5:17) Yehuwa mu de wolela ba pi doa womahia. Ariy kopang Yehuwa de mipiyena ya de kang paneng  mipidasama mu pi hekang hehamol wofang te. Pi hadou Yehuwa hafang ba de tapong puna, rumai baharing pir, ya tomi mihakang. Doa ba miy Yehuwa mihadasama mu pi kul-kul heluk, leng kopang pi Yehuwa hadabesar kang.

15. Nalawuhe doa hewosik pi ”amin” wofang?

¹⁵ Nalawuhe doa he wosik mu pi ”amin” wofang? ”Amin” mbeimu ”kul heiur” namati ”heiur midalek”. Pi heiur doa miwofang heimu dewotiyeng diy ba tomi rofi puna ba berdoa. (Mazmur 41:13) Surah Rieling bay dewobesar ba pi fal lea mia ama nuku de berdoa pi ”amin” wofang tomi he mia re tawa tau furai dewotiyeng diy ba nala he ama hedi dewofang pomaha.​—1 Tawarikh 16:36; 1 Tawarikh 14:16.

16. Na Yehuwa de kul-kul pi doa womahia? He falaka wobesar.

¹⁶ Pi doa mu Yehuwa de kul-kul wohawai rena? Rofi. Surah Rieling dewofang ba ”De doa womahia”. (Mazmur 65:2) Ama jutaan ba domi rofi puna doa Yehuwa de womahia, ya de lela faring puna ba wohawai.

17. Lateiur Yehuwa de malaikat ya hehui hefatil ba buku taha mia puna ba pi doa wohawai?

¹⁷ Yehuwa de malaikat ya hehui hafatil ba buku taha mia puna ba pi doa wohawai. (Ibrani 1:13, 14) Pengalaman faring hadoa ba ama doa ba nal hiyeng rofi ba Surah Rieling homi mia de hiyeng ya wal mi lunga na Saksi Yehuwa nuku de hopa siye. Surah Rieling dewofang ba malaikat wei bay de ”maring kang” ruli dolea mi wobesar. (Mihalal Penyingkapan 14:6.) Wai afena, mi faring nala he pi hadatareu namati nala he pi wobutuh pi doa puna Yehuwa wohokafang, ya hewohaluol pi  mokeni ba sidang mia wei de pomong.​—Amsal 12:25; Yakobus 2:16.

18. Lateiur Yehuwa de simoi rieling ya Surah Rieling puna ba pi doa wohawai?

¹⁸ Yehuwa de simoi rieling puna ba pi doa wohawai. Pi berdoa ba bekatafiela ba pi hadatareu woheikang Yehuwa de simoi rieling puna ba tapong puna ya rumai baharing mipir. (2 Korintus 4:7) Yehuwa bay de Surah Rieling puna pi doa wohawai ya pomong ba tealeling ba heminuk miy kang. Pi Surah Rieling mihalal ko ayat ba de pomong kang pi hiyeni. Yehuwa bay de pi mokeni nuku puna ba teitoluol mia miwobesar ba mipidasama, namati penatua nuku teitoluol mia pokok ba Surah Reiling mia de miwobesar ko hadou mipidasama kang.​—Galatia 6:1.

19. Nalawuhe pi doa mu pi woreya Yehuwa de dara wohawai na?

¹⁹ Haba minunuk ko pi mitatangar, ’Nalawuhe ne doa Yehuwa de dara wohawai na?’ Woamunang, yani ya lateiur e doa dewohawai Yehuwa de hiyeng. Nala he pi wobutuh de hiyeng. Minunuk pi kul berdoa iti, heimu wotiyeng diy ba nala he pi wo doa mu pi kul-kul wo butuh wuhe, ya pi wotiyeng diy ba pi kul-kul Allah worumai. (Lukas 11:5-10) Mani, Yehuwa de pi doa wohawai mu wal pi tanut mia na. Hedosama, nala ba pi hadatareu kul beka pi berdoa bekatafiela hedi dewal hanau na, haba de pomong ba rumai baharing mipir ba pi wopibalaibuku nasiy kang.​—Mihalal Filipi 4:13.

20. Nalawuhe leng kopang pi berdoa miy Yehuwa mihadasama te?

²⁰ Doa ba Yehuwa mihadasama mu kul hak istimewa lea nuku! Pi worumai kang ba de pi doa womahia. (Mazmur 145:18) Ya leng kopang pomi rofi puna berdoa miy Yehuwa mihadasama Yehuwa pokari pi naisena de kul rumai diy.