1, 2. 1) ¿Kunatsa oracionajj Diosan mä suma regalopajja? 2) Kuntï Bibliajj Diosar mayisiñ toqet yatichki ukjja, ¿kunatsa yatiñasa?

 “ALAJJPACH akapach lurir” Diosatakejja, taqe markanakan jakir jaqenakajj mä uma chʼaqar uñtasitakiwa (Salmo 115:15; Isaías 40:15). Jaqenakajj alajjpachata jan ukajj aka oraqet sipansa wali jiskʼäpkchisa, Salmo 145:18, 19 qellqatajj akham siwa: “[Jehová] Tatitojj artʼasirinakapan jakʼapankaskiwa, taqpach chuymamp jupat artʼasirinakan jakʼapankiwa. Jupar arkirinakan munataparjamaw phoqhe, arnaqasitanakap istʼi, qhespiyaraki” sasa. ¡Uk yatiñajj wali kusiskañawa! Wali chʼamani taqe kun Luriri Jehová Diosajja, jiwasar jakʼachasiñsa oracionanakas istʼañsa wal muni. Cheqansa oracionajj Jehová Diosan mä suma regalopawa, taqeniw oración taypejj jupar jakʼachassna.

² Jehová Diosajja, munañaparjam mayisiñäni ukhakiw istʼistani. Ukatakejja kunsa Bibliajj Diosar mayisiñ toqet yatichistu uk yatjjatañäni.

3. ¿Kunatsa Jehová Diosar mayisiñasa?

³ Jehová Diosajj jupar mayissna ukwa muni. ¿Kunjamatsa uk yattanjja? Mirä amp suma, Filipenses 4:6, 7 qellqat liytʼam. Uka qellqatan kamsisa uk amuytʼam. Alajjpacha, aka oraqe Lurir Diosajj jumat walpun llakisi, kunjamsa jikjjatasta, kuna jan walinakansa uñjasta ukanak jupar yatiyasma ukwa muni.

4. ¿Kunjamsa oracionajj Diosar jukʼamp jakʼachasiñatak yanaptʼistu?

 ⁴ Oracionajj Jehová Diosar jakʼachasiñatakiw yanaptʼistu. Ukatakejj pä amigonakat parltʼañäni. Jupanakajj llakinakapata, kunjamas jikjjatasipjje, kunsa amuyapjje ukanakat sapa kut parltʼasipjje ukhajja, jukʼampiw uñtʼasipjje. Jehová Diosampejj ukhamarakiwa. Diosajja, Biblia toqew kunanaksa amuyi, kunjam Diosasa, kunsa jutïrin lurani ukanak yatiyistu. Jumajj sapa kutiw Diosampejj parltʼasirakisma, kunjamas jikjjatasta uksa yatiyarakismawa. Ukhamtï lurätajja, jukʼampiw Jehová Diosar jakʼachasïta (Santiago 4:8).

5. ¿Jehová Diosajj taqe oracionanakti istʼpacha?

⁵ ¿Jehová Diosajj taqe oracionanakti istʼpacha? Janiwa. Isaías profetajj jakkäna uka tiemponjja, Jehová Diosajj israelitanakar akham sänwa: “Oracionanaka walja lurasipkäta ukapachajj, janiw nayajj istʼapkämati. Amparanakamajj wilararkamakiwa” sasa (Isaías 1:15). Ukhamasti janipuniw kuna jan walinaksa lurañasäkiti.  Ukanakajj Jehová Diosatwa jitheqtayistaspa, janirakiw jupajj oracionanakas istʼjjaspati.

6. 1) ¿Kunatsa Diosar taqe chuyma confiyañajj wakisi? 2) ¿Kunjamsa Diosar confiyatam uñachtʼayasma?

⁶ Jehová Diosajj oracionanakas istʼañap munstan ukhajja, taqe chuymaw jupar confiyañasa (Marcos 11:24). Apóstol Pablojj sänwa: “Maynitejj Diosar jan confiykaspajja, janiw kunäkipansa Diosarojj kusisiykaspati. Khititejj Diosar jakʼachaski ukajja, jupan utjatapsa jupar taqe chuyma thaqerinakar pago churirïtapsa creyiñapawa” sasa (Hebreos 11:6). Ukampis janiw aleqakejj Diosar confiytwa sañasäkiti, jan ukasti Jehová Diosar confiyatasjja jupar sapüru istʼasaw uñachtʼayañasa (Santiago 2:26 liytʼañataki).

7. 1) ¿Kunatsa Diosar wali respetompi humilde chuymampi mayisiñasa? 2) ¿Kunjamsa Diosar mayisiñasa?

⁷ Diosarojj respetompi humilde chuymampiw oración mayisiñasa. ¿Kunatsa? Ukatakejj mä reyirusa jan ukajj mä presidenterus parlir sarksna ukham amuytʼañäni. Jupanakarojj respetompiw parltʼsna. Jehová Diosajj Taqe Chʼaman Diosawa. Ukhamasti juparojj wali respetompi, humilde chuymampiw parlañasa (Génesis 17:1; Salmo 138:6). Maysa toqetjja, pachpa arunakampi sapa kuti mayisiñat sipansa, kunjamtï parlasktan ukhamwa Diosarojj taqe chuyma mayisiñasa (Mateo 6:7, 8).

8. Diosar yanaptʼap mayisisajja, ¿kunamp lurañas wakisi?

⁸ Jehová Diosar yanaptʼap mayisiñäni ukhajja, ukarjam sarnaqañatakiw chʼamachasiñasa. Sañäni, kunanakatï jakasiñatak munaski ukanak Jehová Diosar mayisiñäni ukhajja, janiw ukhamak jan kun lurasa qheparañasäkiti ni jayrañasäkisa. Janirakiw Diosaw taqe kunsa sapüru churaskitani sasajj amuyañasäkiti. Jan ukasti jan qarjasaw trabajiñasa, trabajo jikjjatasasa taqe  chuymaw trabajiñasa (Mateo 6:11; 2 Tesalonicenses 3:10). Jan walinak jaytañatak yanaptʼita sasin Diosar mayisiñäni ukhajja, uka mayisitasarjamaw sarnaqañasa, kunanakatï juchar purtʼasiykistaspa ukanakatsa jitheqtañasawa (Colosenses 3:5). Jichhajja kuna jisktʼanakas Diosar mayisiñ toqet utjaspa ukanakat yatjjatañäni.

9. 1) ¿Khitirus orañasa? 2) ¿Kunsa Juan 14:6 qellqatajj oracionat yatichistu?

⁹ ¿Khitirus orañasa? Jesusajj ‘alajjpachankir Awkiruw’ mayisipjjañama sasaw discipulonakapar yatichäna (Mateo 6:9). Ukatjja akham sarakïnwa: “Nayätwa thakisa, cheqasa, jakañasa. Naya taypikiw Awkin ukar puriñajj utji” sasa (Juan 14:6). Ukhamasti, Jehová Diosarukiw mayisiñasa, uksti Jesús taypiwa jan ukajj Jesusan sutipjjaruw lurañasa. ¿Kunatsa Jesús taypejj Diosar mayisiñasa? Jehová Diosajj oracionanakas istʼañapatakejja, kuna luräwinaktï Jesusajj katoqki ukaruw respetañasa. Kunjamtï Biblian yateqktanjja, Jesusajj jaqenakar juchampita jiwañampita salvañatakiw aka oraqer jutäna (Juan 3:16; Romanos 5:12). Jehová Diosajja, Jesusaruw Jilïr Sacerdotëñapatakisa Juezañapatakisa uttʼayi (Juan 5:22; Hebreos 6:20).

10. ¿Killptʼatapunit Diosar orañasa? Uk qhanañchtʼam.

¹⁰ ¿Killptʼatapunit Diosar orañasa? Janiwa. Jehová Diosajja, janiw kunjamsa jupar mayisiñasa uk siskistuti. Maynejj altʼatasa, killptʼatasa, saytʼatasa, qontʼatasa mayisispawa (1 Crónicas 17:16; Nehemías 8:6; Daniel 6:10; Marcos 11:25). Kunjamas mayisiñäni ukajj janiw Jehová Diosatakejj wakiskirïkiti, jan ukasti kunjam chuymampis mayisiñäni ukaw jukʼamp wakiskirejja. Diosarojja jachʼatsa, chuyma manqhatsa, kawkjansa, kuna horasansa,  urusa, arumasa mayisiskaksnawa. Mayiskañäni ukhajj janis khitis istʼkchistanejja, Diosajj istʼitaniwa sasaw confiytanjja (Nehemías 2:1-6).

11. ¿Kunanakatsa Jehová Diosar mayissna?

¹¹ ¿Kunanakatsa Diosar mayissna? Kunanakatï Dios nayraqatan walïki ukanakwa jupar mayissna. Biblianjja akham siwa: “Jiwasatï munañaparjam kunsa mayiñäni ukhajja, jupajj istʼistaniwa” sasa (1 Juan 5:14). Ukhamajj ¿kunanakatï llakisiykistu ukanakat mayissnati? Jïsa. Mä munat amigosampis parltʼasksna ukhamwa Jehová Diosampejj parltʼasiñasa. Kunanaktï amuyktan, kunanakatï chuymasan utjki ukanakwa jupar yatiysna (Salmo 62:8). Espíritu santopsa mayisiraksnawa, ukaw kunatï cheqapäki uk lurañatakejj yanaptʼistani (Lucas 11:13). Suma amtanakar puriñatakisa, jan walinakar saykatañatakisa yatiñapwa Diosar mayisiraksna (Santiago 1:5). Juchanakas perdonañapatakisa mayisiñasarakiwa (Efesios 1:3, 7). Familiasatakisa, congregacionankir jilat kullakanakatakisa mayiñasarakiwa (Hechos 12:5; Colosenses 4:12).

12. ¿Kuna toqenakatsa nayraqat mayisiñasa?

¹² ¿Kuna toqenakatsa nayraqat mayisiñasa? Jehová Diosan sutip jachʼañchasiñapataki, munañap phoqasiñapatakiw mayiñasa, ukaw jukʼamp wakiskirejja. Kunanaktï Diosajj jiwas layku lurawayki ukanakatsa yuspärañasarakiwa (1 Crónicas 29:10-13). Jesusajj aka oraqenkkäna ukhajja, kunjamsa mayisipjjañapa ukwa discipulonakapar yatichäna (Mateo 6:9-13 liytʼañataki). Jupajja, Diosan sutipajj jachʼañchatäñapataki, mä arunjja santot uñjatäñapatakiw nayraqat mayipjjäta sasaw säna. Ukatjja, Diosan Reinopajj jutañapataki, munañapajj aka oraqen lurasiñapatakiw mayipjjarakïta sasaw sarakïna. Ukjjaruw kunanaktï munapkta ukanak mayisipjjasma sasaw säna. Diosan sutip jachʼañchasiñapataki, munañap  phoqasiñapataki nayraqat mayktan ukhajja, kunas jiwasatak jukʼamp wakiskirejj ukwa uñachtʼaytanjja.

13. ¿Qhawqha tiempos mayisiñasa?

¹³ ¿Qhawqha tiempos mayisiñasa? Bibliajj janiw uka toqet kamskisa. Kunjamsa, kawkjansa jikjjatastan ukarjamaw jayasa jan ukajj jukʼa tiempos mayissna. Amuytʼañataki, janïr manqʼaskasajj inas jukʼa tiempok mayissna, ukampis Jehová Diosar yuspärañataki, jan ukajj llakinakar saykatañataki mayisiñ munstan ukhajj  jaya tiempow mayisiraksna (1 Samuel 1:12, 15). Janiw mayninakamp sum uñjayasiñ laykukejj jaya tiempo orañasäkiti. Jesusajj aka oraqenkkäna ukhajja, ukhamwa yaqhepajj lurapjjerïna (Lucas 20:46, 47). Jehová Diosajj janiw ukham mayisiñas munkiti, antisas chuymatpach jupar mayissna ukwa muni.

14. ¿Qhawqha kutis mayisiñasa, kunsa ukajj Jehová Diosat yatichistu?

¹⁴ ¿Qhawqha kutis Diosar mayisiñasa? Jehová Diosajj sapa kuti jupamp parltʼasiñatakiw invittʼistu. Biblianjja, ‘oración jan jaytas lurasipkakim’, “oración lurapjjapunim” sasaw qhanañchi (Mateo 26:41; Romanos 12:12; 1 Tesalonicenses 5:17). Jehová Diosajj oracionanakas istʼañatakejj jankʼakiwa. Munasiñapatsa khuyaptʼayasirïtapatsa sapüruw Diosar yuspärañasa. Yanaptʼsa, chʼamsa mayisiñasarakiwa, chuymachtʼita sasinsa mayisiraksnawa.  Jiwasatakitï oracionajj wali wakiskirïchejja, sapa kutiw Jehová Diosar mayisiñäni.

15. ¿Kunatsa oración tukuyarojj “amén” sañasa?

¹⁵ ¿Kunatsa oración tukuyatarojj “amén” sañasa? Amén arojj “ukhamäpan” sañ muni. Ukham sasajj kuntï sisktan ukajj taqe chuymätap uñachtʼaytanjja (Salmo 41:13). Maynitï walja jaqenak nayraqatan oración lurañ tukuyani ukhajja, jachʼatsa jan ukajj jiskʼatsa “amén” sañasawa sasaw Biblian yatichistu. Ukham sasajja, kunatï oracionan arsusiwayki ukajj jiwasatak walikïtapwa uñachtʼaytanjja (1 Crónicas 16:36; 1 Corintios 14:16).

16. ¿Diosajj cheqapunit oracionanakas istʼpacha? Uk qhanañchtʼam.

¹⁶ ¿Diosajj cheqapunit oracionanakas istʼpacha? Bibliajj Jehová Diosat akham siwa: “Jumajj mayisitanakar istʼirïtawa” sasa (Salmo 65:2). Jupajj walja millón millón jaqenakan taqe chuyma mayisitanakap istʼiwa. Diosajj kunaymanitwa mayisitanakasar jaysaspa.

17. ¿Kunjamsa Jehová Diosajj mayisitanakas jaysistu?

¹⁷ Jehová Diosajj angelanakapampi, aka oraqenkir servirinakapampiw yanaptʼistaspa, ukhamatwa mayisitanakas istʼatap yatsna (Hebreos 1:13, 14). Sañäni, walja jaqenakaw Biblia sum amuytʼañatak Diosar mayisipjjatayna, uka qhepatjja Jehová Diosan Testigonakapaw jupanakar visittʼapjjatayna. Ukham experiencianakajj waljaw utji. Biblianjja, angelanakaw aka oraqpachan ‘suma yatiyäwinak’ yatiyasiñapatakejj yanaptʼasipki sasaw qhanañchi (Apocalipsis 14:6 liytʼañataki). Awisajj jan walinakan uñjasktan ukhaw Diosar yanaptʼa mayistanjja, ukapachajj jilat kullakanakasampiw yanaptʼistu, ukhamatwa jupajj mayisitanakasar jaysistu (Proverbios 12:25; Santiago 2:16).

18. ¿Kunjamsa Jehová Diosajj espíritu santopampisa Bibliampisa oracionanakas jaysaspa?

 ¹⁸ Jehová Diosajj espíritu santop toqerakiw oracionasar jaysaspa. Mä jan waltʼäwin uñjasisajj Diosar yanaptʼa mayistan ukhajja, Jupajj espíritu santopampiw uka jan waltʼäwit mistuñatakejj yanaptʼistaspa, chʼamañchtʼarakistaspa (2 Corintios 4:7). Jehová Diosajj Biblia taypiw oracionasar jaysarakispa. Biblia liyisajj yanaptʼir textonakwa jikjjattanjja, ukanakaw suma amtanakar puriñatak yanaptʼistu. Maysa toqetjja, Jehová Diosajj mä jilataru jan ukajj kullakaruw chʼamañchtʼkiri arunak tantachäwin arstʼañapatakejj yanaptʼaspa. Jan ukajja, mä jilïr irpiriw Bibliat mä qellqat liytʼarapistaspa, ukhamatwa Diosajj oracionanakas jaysarakispa (Gálatas 6:1).

19. ¿Kunatsa janis Diosajj oracionanakas istʼkaspa ukham amuysna?

¹⁹ Ukampis inas awisajj akham jisktʼassna: “¿Kunatsa Jehová Diosajj oracionanakaj jan istʼkpacha?” sasa. Ak amtañamaw wakisi, Jehová Diosakiw kunapachasa, kunjamsa mayisitanakasar istʼani uk yati. Jupajj kunanaksa muntan uksa yatiwa. Inas kuntï munktan uka toqet Diosar mayisiñajj wakisiskakchini, ukhamatwa kuntï mayktan uk cheqapun munatasa, jupar taqe chuyma confiyatasa uñachtʼayañäni (Lucas 11:5-10). Awisajja, Diosajj janiw kunjamtï munktan ukarjamajj oracionas jayskaspati. Amuytʼañataki, inas mä jan waltʼäwit mistuñataki mayissna, ukampis uka jan waltʼäwi chhaqtayañat sipansa, aguantañatakejj chʼam churistaspa (Filipenses 4:13 liytʼañataki).

20. ¿Kunatsa Diosarojj sapa kuti mayisiñasa?

²⁰ Jehová Diosar mayisiñajj ¡wali kusiskañawa! Jupajj mayisitanakasar istʼapuniniwa (Salmo 145:18). Jehová Diosarutï taqe chuyma, sapa kuti mayisiñäni ukhajja, jukʼampiw juparojj jakʼachasiñäni.