1, 2. Taano ta masasabi mo na espesyal na regalo an pamibi? Taano ta dapat tang maaraman kun ano an itinutukdo kan Bibliya manungod diyan?

SADITON an planetang Daga kumpara sa uniberso. Pag hinihiling ni Jehova an daga, an gabos na tawo sa gabos na nasyon garo sana saditon na turo nin tubig sa balde. (Salmo 115:15; Isaias 40:15) Pero dawa pa saditon kita kumpara sa uniberso, sinasabi kan Salmo 145:18, 19: “Sa gabos na nag-aapod sa saiya harani si Jehova, iyo, sa gabos na sinserong nag-aapod sa saiya. Pinapaniguan niya an mawot kan mga may pagkatakot sa saiya; dinadangog niya an paghagad ninda nin tabang, asin iliniligtas niya sinda.” (NW) Sarong espesyal na pribilehiyo talaga an itinao sato! Si Jehova, an Kaglalang na makakamhan sa gabos, gusto na magin harani sa sato, asin gusto niyang dangugon an mga pamibi ta. Iyo, an pamibi sarong pribilehiyo, sarong espesyal na regalong itinao ni Jehova sa kada saro sa sato.

² Pero dadangugon sana kita ni Jehova kun makikipag-ulay kita sa saiya sa paaging inuuyunan niya. Paano ta iyan magigibo? Aramon ta kun ano an sinasabi kan Bibliya manungod sa pamibi.

3. Taano ta dapat kang mamibi ki Jehova?

³ Gusto ni Jehova na mamibi, o makipag-ulay, ka sa saiya. Paano ta iyan naaraman? Basahon tabi an Filipos 4:6, 7. Isip-isipon an mabuot na imbitasyon na iyan. Interesadong marhay sa saimo an Tagapamahala kan uniberso, asin gusto niyang sabihon mo saiya an mga namamatian asin mga problema mo.

4. Paano nakakatabang an regular na pagpamibi para mas lalo kang magin harani ki Jehova?

 ⁴ Nakakatabang sa sato an pamibi na magin harani ki Jehova. Pag regular na nag-uulay an mag-amigo manungod sa saindang iniisip, problema, asin namamatian, mas nagigin harani sinda sa kada saro. Arog man kaiyan sa pagpamibi ki Jehova. Paagi sa Bibliya, sinasabi niya saimo an saiyang mga kaisipan asin namamatian, saka sinasabi man niya saimo an mga gigibuhon niya sa maabot na panahon. Puwede mong sabihon saiya maski an mga nasa kalaog-laugi kan puso mo paagi sa regular na pakikipag-ulay sa saiya. Kun gigibuhon mo ini, mas lalo kang magigin harani ki Jehova.—Santiago 4:8.

5. Paano ta naaraman na bakong gabos na pamibi dinadangog ni Jehova?

⁵ Gabos daw na pamibi dinadangog ni Jehova? Dai. Kan panahon ni propeta Isaias, sinabi ni Jehova sa mga Israelita: ‘Dawa padakulon nindo an saindong pamibi, dai ako  madangog; pano nin dugo an saindong mga kamot.’ (Isaias 1:15) Kaya kun dai kita mag-iingat, puwede kitang makagibo nin mga bagay na makakaparayo sa sato ki Jehova, asin dai niya dadangugon an satong mga pamibi.

6. Taano ta mahalagang marhay an pagtubod? Paano mo maipapahiling na may pagtubod ka?

⁶ Tanganing dangugon ni Jehova an satong mga pamibi, dapat na magkaigwa kita nin pagtubod sa saiya. (Marcos 11:24) Ipinaliwanag ni apostol Pablo: “Kun mayo nin pagtubod imposibleng mapaugma an Diyos, huli ta an siisay man na minadulok sa Diyos dapat na magtubod na siya nag-eeksister asin na siya an paratao nin balos sa mga maigot na naghahanap sa saiya.” (Hebreo 11:6) Pero kulang an basta pagsabing may pagtubod kita. Dapat tang patunayan nin malinaw an satong pagtubod paagi sa pagsunod ki Jehova aroaldaw.—Basahon an Santiago 2:26.

7. (a) Taano ta dapat kitang magin mapakumbaba asin magalang pag namimibi ki Jehova? (b) Paano ta maipapahiling na sinsero kita pag namimibi?

⁷ Dapat na magin mapakumbaba saka magalang kita pag namimibi ki Jehova. Taano? Kun makikipag-ulay kita sa sarong hadi o presidente, siguradong mataram kita nin magalang. Si Jehova an Diyos na Makakamhan sa Gabos, kaya bako daw na mas dapat na magin magalang asin mapakumbaba kita pag nakikipag-ulay sa saiya? (Genesis 17:1; Salmo 138:6) Dapat man kitang mamibi ki Jehova nin sinsero asin hali sa puso, imbes na pagparauruutruhon na sana an mga sinasabi ta.—Mateo 6:7, 8.

8. Pag may ipinapamibi kita, ano pa an dapat niyatong gibuhon?

⁸ Panghuri, pag may ipinapamibi kita, dapat tang gibuhon an satong pinakamakakaya na humiro kauyon kan ipinapamibi ta. Halimbawa, kun ipinapamibi ta ki Jehova na itao an satong mga pangangaipo sa aroaldaw, dai kita dapat maghinugak na nag-aasa na lang na itatao ni Jehova an gabos maski kaya ta man na magtrabaho. Dapat magin mahigos  kita saka akuon an ano man na trabahong kaya ta. (Mateo 6:11; 2 Tesalonica 3:10) O kun ipinapamibi ta ki Jehova na tabangan kitang mapundo an paggibo nin sarong bagay na sala, dapat tang likayan an ano man na sitwasyon na puwedeng makatentar sa sato. (Colosas 3:5) Pag-ulayan ta ngunyan an mga parating ihinahapot manungod sa pamibi.

9. Kiisay kita dapat mamibi? Ano an itinutukdo sa sato kan Juan 14:6 manungod sa pamibi?

⁹ Kiisay kita dapat mamibi? Tinukduan ni Jesus an saiyang mga parasunod na mamibi sa satong ‘Ama na nasa langit.’ (Mateo 6:9) Sinabi man niya: “Ako an dalan asin an katotoohan asin an buhay. Mayo nin makakaduman sa Ama kun bakong paagi sa sako.” (Juan 14:6) Kaya ki Jehova sana kita dapat mamibi paagi ki Jesus. Ano an buot sabihon kan pagpamibi paagi ki Jesus? Tanganing akuon ni Jehova an satong mga pamibi, dapat tang igalang an espesyal na papel na itinao ni Jehova ki Jesus. Arog kan naaraman ta, nagdigdi si Jesus sa daga para iligtas kita sa kasalan asin kagadanan. (Juan 3:16; Roma 5:12) Pinili man ni Jehova si Jesus bilang Halangkaw na Saserdote asin Hukom.—Juan 5:22; Hebreo 6:20.

10. May partikular na posisyon daw na kaipuhan sa pagpamibi? Ipaliwanag.

¹⁰ May partikular na posisyon daw na kaipuhan sa pagpamibi? Mayo man. Mayong sinasabi si Jehova na kaipuhan tang magluhod, magtukaw, o magtindog pag namimibi. Itinutukdo sa sato kan Bibliya na puwede tang kaulayon si Jehova ano man an posisyon ta basta nagpapahiling iyan nin paggalang. (1 Cronica 17:16; Nehemias 8:6; Daniel 6:10; Marcos 11:25) An pinakamahalaga ki Jehova, bako an satong posisyon sa pagpamibi, kundi an pakikipag-ulay ta sa saiya nin magalang asin hali sa puso. Puwede kitang mamibi nin makusog o silensiyo, sain man kita asin ano man na oras,  aga man o banggi. Pag namimibi kita ki Jehova, makakapagtiwala kita na madadangog niya kita dawa mayo nin ibang nakakadangog sa sato.—Nehemias 2:1-6.

11. Ano an mga puwede tang ipamibi ki Jehova?

¹¹ Ano an mga puwede tang ipamibi? Maski ano basta nauuyunan ni Jehova. Sinasabi kan Bibliya: “Ano man na bagay na hagadon niyato kauyon kan saiyang kabutan, dinadangog niya kita.” (1 Juan 5:14) Puwede ta daw ipamibi an personal na mga bagay? Iyo. An pagpamibi ki Jehova garo pakikipag-ulay ta sa sarong dayupot na amigo. Puwede tang sabihon ki Jehova an ano man na nasa isip asin puso ta. (Salmo 62:8) Puwede tang ipamibi saiya na tawan niya kita kan saiyang mapuwersang banal na espiritu para tabangan kita na magibo an tama. (Lucas 11:13) Puwede ta man hagadon ki Jehova na tawan kita nin kadunungan para makagibo nin marahay na mga desisyon saka nin kusog para makayanan an mga problema. (Santiago 1:5) Dapat man na maghagad kita nin tawad ki Jehova sa satong mga nagibong sala. (Efeso 1:3, 7) Saka dapat man na ipamibi ta an iba, kaiba na an satong mga kapamilya asin mga tugang sa kongregasyon.—Gibo 12:5; Colosas 4:12.

12. Ano an dapat na pinakamahalagang sambiton ta sa pamibi?

¹² Ano an dapat na pinakamahalagang sambiton ta sa pamibi? Si Jehova asin an saiyang kabutan. Dapat na udok sa puso ta siyang pasalamatan sa gabos na ginigibo niya para sa sato. (1 Cronica 29:10-13) Naaraman ta iyan ta kan nasa daga pa si Jesus, tinukduan niya an saiyang mga disipulo kun paano mamibi. (Basahon an Mateo 6:9-13.) Sinabi niya na dapat nguna nindang ipamibi na pakangbanalon, o ibilang na sagrado, an pangaran nin Diyos. Dangan sinabi ni Jesus na ipamibi ta man na umabot na an Kahadian nin Diyos asin na mangyari na an kabutan ni Jehova sa bilog na daga. Ipinapahiling diyan ni Jesus na dapat ta ngunang ipamibi an mahalagang marhay na mga bagay na iyan bago an personal na mga pangangaipo niyato. Pag si Jehova saka an  kabutan niya an iniinot ta sa satong mga pamibi, ipinapahiling niyato kun ano an pinakamahalaga sa sato.

13. Gurano dapat kalawig an satong mga pamibi?

¹³ Gurano dapat kalawig an satong mga pamibi? Mayong sinasabi an Bibliya. Depende sa sitwasyon, puwede kitang mamibi nin halipot o halawig. Halimbawa, puwede kitang mamibi nin halipot bago magkakan pero puwedeng huruhalawig pag nagpapasalamat kita ki Jehova o pag sinasabi ta sa saiya an satong mga problema. (1 Samuel 1:12, 15)  Dai kita namimibi nin halawig tangani sanang hangaan kan iba, arog kan ginibo nin ibang tawo kan panahon ni Jesus. (Lucas 20:46, 47) Dai nauugma si Jehova sa mga pamibi nin mga tawong arog kaiyan. An mahalaga ki Jehova iyo na mamibi kita nin hali sa puso.

14. Gurano kaparati kita dapat mamibi, asin ano an itinutukdo kaini sa sato manungod ki Jehova?

¹⁴ Gurano kaparati kita dapat mamibi? Gustong-gusto ni Jehova na regular kitang makipag-ulay sa saiya. Sinasabi sa sato kan Bibliya na “padagos na mamibi,” “magin matiyaga sa pagpamibi,” asin pirmi o “danay na mamibi.” (Mateo 26:41; Roma 12:12; 1 Tesalonica 5:17) Pirming handang magdangog sa sato si Jehova. Puwede ta siyang pasalamatan aroaldaw huli sa saiyang pagkamuot asin pagigin matinao. Puwede man kitang maghagad saiya nin paggiya, tabang, asin kusog nin buot. Kun talagang pinapahalagahan  ta an satong pribilehiyo na mamibi ki Jehova, makikipag-ulay kita sa saiya sa gabos na pagkakataon.

15. Taano ta dapat kitang mag-“amen” pagkatapos nin pamibi?

¹⁵ Taano ta dapat kitang mag-“amen” pagkatapos nin pamibi? An tataramon na “amen” nangangahulugan na “iyo nanggad” o “mangyari lugod.” An pag-“amen” nagpapahiling na seryoso asin sinsero kita sa mga sinabi ta sa pamibi. (Salmo 41:13) Itinutukdo sa sato kan Bibliya na marahay man na mag-“amen,” silensiyo man o makusog, pagkatapos nin sarong pampublikong pamibi tanganing ipahiling na uyon kita sa mga sinabi sa pamibi.—1 Cronica 16:36; 1 Corinto 14:16.

16. Sinisimbag daw talaga ni Jehova an satong mga pamibi? Ipaliwanag.

¹⁶ Sinisimbag daw talaga ni Jehova an satong mga pamibi? Iyo. Inaapod siya kan Bibliya na “Paradangog nin pamibi.” (Salmo 65:2, NW) Dinadangog ni Jehova an sinserong mga pamibi nin milyon-milyon na tawo, asin sinisimbag niya iyan sa iba-ibang paagi.

17. Paano ginagamit ni Jehova an mga anghel asin an mga lingkod niya digdi sa daga para simbagon an satong mga pamibi?

¹⁷ Ginagamit ni Jehova an mga anghel asin an mga lingkod niya digdi sa daga para simbagon an satong mga pamibi. (Hebreo 1:13, 14) Halimbawa, dakul an namibi na tabangan sindang masabutan an Bibliya asin pagkatapos may nagdalaw tulos sa sainda na Saksi ni Jehova. Ipinapahiling kan Bibliya na kaiba an mga anghel sa pagpapaabot kan “maugmang bareta” sa bilog na daga. (Basahon an Kapahayagan 14:6.) Dakul man sa sato an namibi ki Jehova manungod sa sarong espesipikong problema o pangangaipo, asin pagkatapos, may sarong tugang na nagtao kan tabang na kaipuhan ta.—Talinhaga 12:25; Santiago 2:16.

18. Paano ginagamit ni Jehova an saiyang banal na espiritu asin an Bibliya para simbagon an satong mga pamibi?

 ¹⁸ Ginagamit man ni Jehova an saiyang banal na espiritu para simbagon an satong mga pamibi. Pag namimibi kita para sa tabang na makayanan an sarong problema, puwede niyang gamiton an saiyang banal na espiritu tanganing giyahan kita asin pakusugon. (2 Corinto 4:7) Ginagamit man ni Jehova an Bibliya para simbagon an satong mga pamibi asin tabangan kitang makapagdesisyon nin tama. Pag binabasa ta an Bibliya, posibleng makakua kita nin mga teksto na makakatabang sa sato. Puwede man na pahiruon ni Jehova an sarong nagkokomento sa pagtiripon para sabihon an kaipuhan tang madangog o an sarong elder para magsabi sa sato nin sarong punto hali sa Bibliya.—Galacia 6:1.

19. Taano ta garo baga dai sinisimbag ni Jehova kun minsan an satong mga pamibi?

¹⁹ Pero kun minsan, tibaad maihapot niyato, ‘Taano ta dai pa sinisimbag ni Jehova an mga pamibi ko?’ Tandaan, aram niya kun nuarin asin kun paano sisimbagon an satong mga pamibi. Aram niya an satong mga pangangaipo. Tibaad kaipuhan tang padagos na ipamibi iyan tanganing ipahiling na talagang sinsero kita sa satong pakiulay sa saiya asin na talagang nagtutubod kita sa saiya. (Lucas 11:5-10) Kun minsan, puwedeng simbagon ni Jehova an satong mga pamibi sa paaging dai ta inaasahan. Halimbawa, tibaad ipamibi ta an manungod sa sarong problema, pero imbes na halion an problema, puwedeng tawan niya kita nin kusog para makayanan iyan.—Basahon an Filipos 4:13.

20. Taano ta dapat na parati kitang mamibi ki Jehova?

²⁰ Sarong espesyal na pribilehiyo talaga an mamibi ki Jehova! Makakasigurado kita na dadangugon niya kita. (Salmo 145:18) Asin pag mas parati kitang namimibi ki Jehova nin udok sa puso, mas lalo man na magigin harani kita sa saiya.