1, 2. ?From wanem prea i wan spesel presen? ?From wanem yumi mas save samting we Baebol i tijim long saed blong prea?

WOL BLONG YUMI i smol nomo, taem yumi skelem wetem ol milian sta long skae. Jehova i luk olgeta man long wol olsem wan drop blong wota nomo long wan baket. (Ol Sam 115:15; Aesea 40:15) Nating se yumi smol olsem, be Ol Sam 145:18, 19 i talem se: ‘Jehova i stap klosap long olgeta we oli krae i go long hem, we oli wantem tru blong hem i givhan long olgeta. Olgeta we oli ona long hem, hem i stap givim ol samting we oli sot long hem, hem i harem krae blong olgeta, mo i sevem olgeta.’ !Yu traem tingbaot! Jehova we i gat olgeta paoa mo i wokem heven mo wol, i wantem stap klosap long yumi, mo i wantem harem ol prea blong yumi. Yes, prea i wan nambawan blesing, wan spesel presen we Jehova i givim long yumi.

² Be sipos yumi wantem se Jehova i lesin long yumi, yumi mas prea long fasin we hem i wantem. ?Olsem wanem blong mekem olsem? Bambae yumi tokbaot samting we Baebol i talem long saed blong prea.

3. ?From wanem yu mas prea long Jehova?

³ Jehova i wantem se yu toktok long hem long prea. ?Olsem wanem yumi save samting ya? Plis ridim Filipae 4:6, 7. Traem tingbaot ol gudfala toktok ya. Bigfala King  blong heven mo wol i intres long yu, mo i wantem se yu talemaot ol problem mo filing blong yu long hem.

4. ?Olsem wanem prea i save mekem se yu fren gud wetem Jehova?

⁴ Prea i save mekem se yu fren gud wetem Jehova. Taem ol fren oli joen wanples oltaem blong tokbaot ol tingting, wari, mo filing blong olgeta, oli kam klosap moa. I sem mak taem yumi prea long Jehova. Long Baebol, hem i talemaot ol tingting mo filing blong hem, mo samting we bambae hem i mekem long fiuja. Sipos yu toktok wetem hem oltaem, bambae i isi blong talemaot ol filing blong yu we maet yu no talem long narafala man. Taem yu mekem olsem, yu kam klosap moa long hem, mo yu fren gud wetem hem.—Jemes 4:8.

5. ?Jehova i stap lesin long prea blong olgeta man? Eksplenem.

⁵ ?Olsem wanem? ?Jehova i stap lesin long prea blong olgeta man? !Nogat! Long taem blong profet Aesea, hem i talem long ol man Isrel se: “Nating we yufala i stap  mekem plante prea, be bambae mi no save lesin, from we han blong yufala i fulap long blad blong man.” (Aesea 1:15) Taswe, yumi mas lukaot gud se yumi no mekem sam samting we Jehova i agensem, nao hem i no moa lesin long ol prea blong yumi.

6. ?From wanem yumi mas bilif long Jehova? ?Olsem wanem blong soemaot bilif ya?

⁶ Sipos yumi wantem se Jehova i lesin long ol prea blong yumi, yumi mas bilif long hem. (Mak 11:24) Aposol Pol i raetem se: “Sipos man i no bilif, hem i no save mekem God i glad long hem, from we man we i wantem kam klosap long God, hem i mas bilif we God i stap, mo we hem bambae i givim pei long ol man we oli stap traehad blong faenem hem.” (Hibrus 11:6) I no naf blong talem nomo se yumi bilif long Jehova. Blong soemaot bilif ya, yumi mas obei long hem oltaem.—Ridim Jemes 2:26.

7. (1) ?From wanem yumi mas mekem tingting i stap daon mo soemaot respek long Jehova? (2) ?Yumi soemaot olsem wanem se ol tok blong yumi i tru?

⁷ ?Taem yumi prea long Jehova, tingting blong yumi i mas stap daon mo yumi toktok wetem respek. ?From wanem? Sipos yumi toktok long wan king no praeminista, bambae yumi soemaot respek. Taswe, i stret we yumi soemaot moa respek long Jehova we i gat olgeta paoa, mo yumi mekem tingting blong yumi i stap daon. (Jenesis 17:1; Ol Sam 138:6) Mo tu, ol tok blong yumi i mas tru mo i kamaot long hat. Taswe, yumi no mas talem sem tok bakegen mo bakegen.—Matiu 6:7, 8.

8. Afta we yumi prea, ?yumi mas mekem wanem?

⁸ Afta we yumi prea, yumi mas wok folem prea blong yumi. Olsem nao, sipos yumi prea blong Jehova i givim samting we yumi nidim evri dei, yumi mas wok from. I nogud yumi les. Yumi mas wok had long enikaen wok  we yumi naf blong mekem. (Matiu 6:11; 2 Tesalonaeka 3:10) Mo tu, sipos yumi prea blong Jehova i givhan long yumi blong lego wan nogud fasin, yumi mas stap longwe long eni samting we i save pulum yumi blong mekem fasin ya. (Kolosi 3:5) Naoia, bambae yumi tokbaot sam kwestin we plante man oli askem long saed blong prea.

9. ?Yumi mas prea long hu? ?Jon 14:6 i tijim yumi long wanem samting long saed blong prea?

⁹ ?Yumi prea long hu? Jisas i tijim ol man blong hem blong oli prea se: “Papa blong mifala long heven.” (Matiu 6:9) Mo tu, Jisas i talem se: “Mi nao rod ya, mo mi nao trutok ya, mo mi nao laef ya. I no gat man i save kam long Papa blong mi, sipos hem i no pas long mi.” (Jon 14:6) Taswe, yumi mas prea i go long Jehova long nem blong Jisas. ?I minim wanem se yumi prea long nem blong Jisas? I min se yumi luksave spesel wok we Jehova i givim long Jisas. Olsem we yumi lanem finis, Jisas i kamdaon long wol blong tekemaot yumi long sin mo ded. (Jon 3:16; Rom 5:12) Mo tu, Jehova i putumap Jisas olsem Hae Pris mo Jaj.—Jon 5:22; Hibrus 6:20.

10. Taem yumi prea, ?yumi mas nildaon? Eksplenem.

¹⁰ Taem yumi prea ?yumi mas nildaon? Jehova i no talem olsem. Baebol i tijim yumi se yumi save sidaon, stanap, nildaon, no bodaon. (1 Kronikel 17:16; Nehemaea 8:6; Daniel 6:10; Mak 11:25) Samting we i impoten long Jehova, se yumi prea wetem respek mo wetem fulhat blong yumi. Yumi save prea wetem voes blong yumi no long hat blong yumi, long dei mo long naet, mo long eniples we yumi stap long hem. Yumi save bilif strong se Jehova bambae i harem prea blong yumi, nating se narafala i no harem.—Nehemaea 2:1-6.

11. ?Yumi save prea from wanem samting?

 ¹¹ ?Yumi save prea from wanem samting? Yumi save prea from eni samting we i laenap wetem tingting blong Jehova. Baebol i talem se: “Nomata wanem samting yumi askem long hem, mo sipos i laenap wetem samting we hem i wantem, hem i harem yumi.” (1 Jon 5:14) ?Olsem wanem? ?Yumi save tokbaot ol samting long laef blong yumi? Yes. Yumi toktok long Jehova long sem fasin we yumi toktok long wan gudfala fren. Yumi save talemaot evri samting we i stap long tingting mo hat blong yumi. (Ol Sam 62:8) Yumi save prea from tabu spirit, blong yumi naf blong mekem samting we i stret. (Luk 11:13) Yumi save askem waes blong mekem ol gudfala desisen, mo paoa blong stanap strong taem yumi kasem trabol. (Jemes 1:5) Mo tu, yumi askem long Jehova blong i fogivim ol sin blong yumi. (Efesas 1:3, 7) Yumi save prea tu, from ol narafala man, famle blong yumi, mo ol brata mo sista long kongregesen.—Ol Wok 12:5; Kolosi 4:12.

12. ?Yumi mas prea from wanem samting fastaem?

¹² ?Yumi mas prea from wanem samting fastaem? Yumi mas tokbaot Jehova mo ol samting we hem i wantem. Yumi talem tangkiu wetem fulhat blong yumi, from evri samting we hem i mekem long yumi. (1 Kronikel 29:10-13) Jisas i soemaot samting ya, taem hem i tijim ol disaepol blong hem blong prea. (Ridim Matiu 6:9-13.) Hem i talem se, fastaem yumi prea blong nem blong God bambae i tabu, i min se, i stap klin mo tabu oltaem. Afta, yumi prea blong Kingdom blong God i kam, mo blong samting we Jehova i wantem i kamtru long fulwol. Afta long ol impoten samting ya, yumi save prea from ol samting we yumi nidim long laef blong yumi. Taem yumi tokbaot ol samting we Jehova i  wantem fastaem, yumi soemaot se ol samting ya oli impoten tumas long yumi.

13. ?Ol prea blong yumi oli mas longfala? Eksplenem.

¹³ ?Ol prea blong yumi oli mas longfala? Baebol i no talem. Yumi save talem prea we i sot no i longfala, i dipen long samting we yumi wantem tokbaot. Bifo we yumi kakae, maet yumi talem wan sot prea nomo. Be taem yumi talem tangkiu long Jehova from evri samting, mo yumi tokbaot ol wari blong yumi, maet prea  blong yumi i longfala. (1 Samuel 1:12, 15) Yumi no olsem samfala long taem blong Jisas, we oli talem ol longfala prea blong ol man oli leftemap olgeta. (Luk 20:46, 47) Jehova i no glad long ol prea olsem. Samting we i impoten long Jehova, hemia se yumi prea wetem fulhat blong yumi.

14. ?Yumi mas prea hamas taem evri dei? ?Samting ya i soemaot wanem long saed blong Jehova?

¹⁴ ?Yumi mas prea hamas taem evri dei? Jehova i wantem se yumi toktok long hem oltaem. Baebol i talem se: “Yufala i mas prea oltaem.” (Matiu 26:41; Rom 12:12; 1 Tesalonaeka 5:17) Samting ya i soemaot se Jehova i rere oltaem blong lesin long yumi. Evri dei, yumi save talem tangkiu long hem, from we hem i lavem yumi mo i givim plante samting long yumi. Mo tu, yumi save askem long hem blong i lidim yumi, i givim paoa long yumi,  mo i leftemap tingting blong yumi. Sipos yumi tingbaot prea olsem wan bigfala blesing, bambae yumi tekem evri janis blong toktok long Jehova.

15. ?From wanem yumi talem “amen” long en blong prea?

¹⁵ ?From wanem yumi talem “amen” long en blong prea? Tok ya “amen” i min se, “i tru” no “i olsem nao.” Hemia i soemaot se ol tok we yumi talem long prea blong yumi oli tru, mo oli kamaot long hat blong yumi. (Ol Sam 41:13) Mo tu, Baebol i tijim yumi se, taem narafala i prea, i gud yumi talem “amen” wetem voes blong yumi no long tingting blong yumi, blong soemaot se yumi agri long ol tok we hem i talem.—1 Kronikel 16:36; 1 Korin 14:16.

16. ?Jehova i stap ansa long ol prea blong yumi? Eksplenem.

¹⁶ ?Olsem wanem? ?Jehova i stap ansa long ol prea blong yumi? Yes. Baebol i talem se: “Yu stap ansa long ol prea blong mifala.” (Ol Sam 65:2) Jehova i harem mo i ansa long ol prea we oli kamaot long hat blong plante milian man. Hem i ansa long plante defren rod.

17. ?Olsem wanem Jehova i yusum ol enjel mo ol man blong hem, blong ansa long prea?

¹⁷ Blong ansa long ol prea blong yumi, Jehova i stap yusum ol enjel mo ol man blong hem long wol. (Hibrus 1:13, 14) Plante taem, wan man i prea blong kasem save long Baebol, nao hem i sek se wan Witnes blong Jehova i kam kamaot long hem. Samting ya i soemaot se ol enjel oli stap lidim wok blong talemaot “gud nius” long fulwol. (Ridim Revelesen 14:6.) Mo tu, samtaem yumi tokbaot wan problem no wan nid blong yumi long prea, nao wan Kristin brata no sista i kam givhan long yumi, stret olsem we yumi nidim.—Ol Proveb 12:25; Jemes 2:16.

18. ?Olsem wanem Jehova i save yusum tabu spirit mo Baebol, blong ansa long prea?

 ¹⁸ Jehova i save yusum tabu spirit blong ansa long prea blong yumi. Taem yumi tokbaot wan problem long Jehova, hem i save yusum tabu spirit blong lidim yumi mo givim paoa long yumi. (2 Korin 4:7) Mo tu, Jehova i save yusum Baebol blong ansa long prea, mo blong givim help we yumi nidim blong mekem ol waes desisen. Taem yumi ridim Baebol, yumi faenem plante vas we oli save givhan long yumi. Mo tu, taem wan brata no sista i givim ansa long miting, Jehova i save pulum hem blong i talem samting we i stret long nid blong yumi. No hem i save pulum wan elda blong i tokbaot wan tingting blong Baebol wetem yumi.—Galesia 6:1.

19. ?Maet Jehova i ansa olsem wanem long prea blong yu?

¹⁹ Be maet yu askem se: ‘?From wanem Jehova i no ansa yet long prea blong mi?’ Yu mas tingbaot se, Jehova i save stret taem mo stret rod blong ansa long prea blong yu. Hem i save samting we yu nidim. Maet yu mas prea bakegen mo bakegen from wan samting, blong soemaot se tingting blong yu i stap strong long samting ya, mo blong soemaot long Jehova se yu trastem hem fulwan. (Luk 11:5-10) Samtaem yu save ting se Jehova i no ansa long prea blong yu, be maet hem i ansa long wan fasin we yu no tingbaot. Ating hem i no tekemaot problem ya we yu prea from, be hem i givim paoa long yu blong yu stanap strong.—Ridim Filipae 4:13.

20. ?From wanem yu mas prea oltaem long Jehova?

²⁰ !I wan bigfala blesing blong prea long Jehova! Yu save bilif strong se bambae hem i lesin long yu. (Ol Sam 145:18) Sipos yu prea oltaem wetem fulhat blong yu, bambae yu fren gud wetem Jehova.