1, 2. Ahabw’enki eshara eri ekiconco c’omutano, kandi shi ahabw’enki tushemerire kumanya eki Bibuli eri kugigambaho?

ENSI ni nceya ogigeranisize n’iguru. Yehova ku ari kwetegereza ensi, nareba abantu bona b’omu mahanga gona bari nk’itondo omu ndobo. (Zaaburi 115:15; Isaaya 40:15) N’obu turi bace ogeranisize n’iguru, Zaaburi ya 145:18, 19 negira ngu: ‘[Yehova] ari hihi na bona abamutakira, bona abamutakira omu mazima. Abari kumutina aryabamarira ebi bari kwetenga, kandi aryahurira okutaka kwabo, abajune.’ Ogu ku ni omugisha gutakarebekagaho ogu twine! Yehova, Omuhangi Rukirabona, nayenda kutuhika hihi, kandi nayenda kuhurira okushaba kwitu. Mazima, eshara ni omugisha, kandi ni ekiconco c’omutano eki Yehova yahire buri omwe omuri itwe.

² Konka Yehova aryatuhurira ku turimushaba omu buryo obu ari kwenda kusha. Eco tukakikora tuta? Reka turebe eki Bibuli eri kugamba aha kushaba.

3. Ahabw’enki oshemerire kushaba Yehova?

³ Yehova nayenda ngu omushabe, ninga ogambe na we. Nitukimanya tuta? Nyabura we shoma omu Bafilipi 4:6, 7. Tekateka ahari obwo butumire. Omutegeki w’iguru n’ensi nakufaho munonga kandi nayenda ngu omugambire oku ori kwehurira n’ebizibu ebi oyine.

4. Ni bata oku kugamba na Yehova burijo omu kushaba kiri kugumya obunywani bwanyu?

⁴ Eshara netuma twagira obunywani bugumire na Yehova. Abantu b’abanywani ku bari kugambirana ebi bari  kutekateka, ebizibu byabo n’enyehurira zabo, obunywani bwabo nibukizaho kuguma. Ni co kimwe n’okuguma turi kugamba na Yehova omu kushaba. Nakoresa Bibuli, akugambira ebitekateko byeye n’enyehurira zeye, kandi akugambira ebi arije kukora omu biro by’omu misho. Nangwa nobasa n’okumugambira enyehurira zawe ezisherekire omu mutima, ori kugamba na we burijo omu kushaba. Ku orakore osyo, obunywani bwawe na Yehova buryakizaho kuguma.—Yakobo 4:8.

5. Nitumanya tuta yaba Yehova atari kuhurira eshara zona?

⁵ Mbehi Yehova nahurira eshara zona? Ingaha, ti ko kiri. Omu bwire bw’omuhanuzi Isaaya, Yehova akagambira Abaisraeli ati: ‘N’obu muriguma nimushaba hakehake, tindibahurira; ahabw’okuba engaro zanyu zijwire eshagama.’ (Isaaya 1:15) Obwe rero twaba tutabire misho, nitubasa kukora ekintu ekiri kutuma twaza hare na Yehova, kituma atahurira eshara zitu.

6. Ahabw’enki okwikiriza kwine omugasho? Okayereka ota ku oyine okwikiriza?

 ⁶ Twaba turi kwenda ngu Yehova ahurire okushaba kwitu, tushemerire kumwesiga. (Mako 11:24) Entumwa Paulo akashoborora ati: ‘Otari kwikiriza tari kubasa kumushemeza; aha kuba omuntu wena ori kwija ahari Ruhanga, ashemerire kwikiriza ku ariho, kandi ku aha ebihembo abamusherura.’ (Abaheburaayo 11:6) Konka kugamba kusha ngu twine okwikiriza tikiri kumara. Tushemerire kwereka ku twine okwikiriza turi korobera Yehova burizoba.—Shoma omuri Yakobo 2:26.

7. (a) Ahabw’enki tushemerire kwecureza kandi tukaha Yehova ekitinisa twaba nitumushaba? (b) Tukayereka tuta ku tutine buryarya twaba nitushaba?

⁷ Twaba turi kushaba Yehova, tushemerire kwecureza kandi twereka ku nitumuha ekitinisa. Ahabw’enki? Twaba nitugamba n’omukama ninga purezidenti, nitugamba twecurerize. Yehova ni Ruhanga kandi ni Rukirabona; mbwenu shi titushemerire kumuha ekitinisa kandi tukecureza twaba nitugamba na we? (Okutandika 17:1; Zaaburi 138:6) Nambwenu tushemerire kugambisa amazima kandi tushaba Yehova cona ekiri aha mutima, tutari kugenda nitugarukagaruka omu bigambo bimwe.—Matayo 6:7, 8.

8. Twamara kushaba ekintu omu shara, ni enki ekindi eki tushemerire kukora?

⁸ Ekindi kandi, twamara kushaba ekintu, tushemerire kukora oku tubasize kona, tuta omu bikorwa eki twamara kushaba. Ecokureberaho: Twashaba Yehova ngu atuhe ebyokurya by’erizoba, titushemerire kuba aboro rero tutegereza ngu Yehova naza kutuha byona kandi twine emikono. Tushemerire kukora munonga kandi twikiriza omurimo gona ogu turi kubasa kukora. (Matayo 6:11; 2 Abatesalonika 3:10) Ninga shi twashaba Yehova ngu atukwase kureka ekintu kibi, tushemerire kwerinda embera  zona eziri kubasa kutugeza. (Abakolosai 3:5) Hati reka turebe ebibuzo ebi abantu bari kukira kwebuza aha kushaba.

9. Ni oha owu tushemerire kushaba? Omuri Yohaana 14:6 nihatwegesa ki aha kushaba?

⁹ Ni oha owu tushemerire kushaba? Yesu akegesa abakurasi beye kushaba ‘Tata ow’omu iguru.’ (Matayo 6:9) Akongera yagira ati: ‘Ni inye muhanda n’amazima n’amagara. Tihariho oyija ahari Tata atarabire ahari inye.’ (Yohaana 14:6) Obwe rero tushemerire kushaba Yehova wenka turabire ahari Yesu. Mbwenu shi kushaba turabire ahari Yesu nikimanyisa ki? Kugira ngu Yehova ayikirize eshara zitu, tushemerire kwereka ku nituha ekitinisa omwanya mukuru ogu Yehova yahire Yesu. Nk’oku twabyegire, Yesu akija omu nsi kutucungura, akatwiha omu kicumuro n’omu rufu. (Yohaana 3:16; Abarooma 5:12) Nambwenu Yehova akatorana Yesu ngu abe Omutambi Mukuru n’Omucwi w’emanja.—Yohaana 5:22; Abaheburaayo 6:20.

10. Mbehi tushemerire kugira oburyo obu twayemereramu twaba nitushaba? Shoborora.

¹⁰ Mbwenu shi hine oburyo obu tushemerire kwemereramu twaba nitushaba? Ingaha; Yehova tari kutugema ngu tumushabe tufukami, tushitami ninga shi twemerire. Bibuli netwegesa ku turi kubasa kugambana na Yehova omu buryo bwona obu turi kuhurira buri kwereka ku nitumuha ekitinisa. (1 Obusingye 17:16; Nehemia 8:6; Danieli 6:10; Mako 11:25) Ekintu ekine omugasho ahari Yehova, ti oburyo obu twemeriremu twaba turi kumushaba, ahobwe ni okumushaba nk’oku ari kwenda. Nitubasa kumushaba omu iraka rihango ninga shi tumushabira omu mutima, ahu twakuba turi hona, eshaha yona, nyomushana ninga  nyekiro. Twashaba Yehova, nitwesiga ku arije kutuhurira n’obu abandi bakwanga kutuhurira.—Nehemia 2:1-6.

11. Ni biha bintu bimwe na bimwe ebi turi kubasa kushaba Yehova?

¹¹ Ni enki eki turi kubasa kushaba? Nitubasa kushaba buri kintu cona eki Yehova ari kwikiriza. Bibuli negira ngu: ‘Ku tushaba ekintu cona nk’oku akunda, atuhurira.’ (1 Yohaana 5:14) Mbwenu shi nitubasa kushaba n’ebi turi kwenda? Yego. Tushemerire kugamba na Yehova omu kushaba nk’oku turi kugamba na munywani witu. Nitubasa kugambira Yehova buri kintu cona ekiri omu bwenge bwitu n’omu mutima gwitu. (Zaaburi 62:8) Nitubasa kumushaba kutuha omwika gweye oguri kwera ngu gutukwase kukora ebirungi. (Luka 11:13) Nambwenu nitubasa kushaba Yehova ngu atuhe obwenge tubase kusharamu ge twaza kukora ekintu, kandi nitubasa n’okumushaba ngu atukwase kwehanganira ebizibu. (Yakobo 1:5) Tushemerire kushaba Yehova ngu atusasire ebicumuro byitu. (Abaefeso 1:3, 7) Tushemerire n’okushabira abandi, harimu abagizire eka yitu na benetata na banyanyazi b’omu kibina.—Ebyakozirwe 12:5; Abakolosai 4:12.

12. Ni enki eki tushemerire kuta omu mwanya g’okubanza omu kushaba kwitu?

¹² Ni kiha kintu ekikuru eki tushemerire kuta omu mwanya g’okubanza omu kushaba kwitu? Ni Yehova n’ebi akunda. Tushemerire kumusimira ebi yatukorire byona tubyihire aha mutima. (1 Obusingye 29:10-13) Eco nitukimanya aha kuba obu Yesu yabire ari omu nsi, akegesa abegi beye kushaba. (Shoma omuri Matayo 6:9-13.) Akagamba ku bashemerire kubanza kushaba ngu izina rya Ruhanga ryezibwe, ni okugamba kurikwata nk’eriri kwera. Bwanyima akereka ku tushemerire kushaba ngu Obukama bwa Ruhanga bwije kandi ebi Yehova ari kukunda bikorwe omu nsi. Yesu ku yamazire kugira ngu tushabe ebyo bintu by’omugasho, akagamba ku tushemerire kushaba n’ebyitu  ebi turi kwetenga. Twabanza Yehova n’ebi ari kukunda omu kushaba kwitu, nituba twayereka ekine omugasho ahari itwe.

13. Eshara zitu zishemerire kumara obwire buri kwingana ki?

¹³ Eshara zitu zishemerire kumara obwire buri kwingana ki? Tihine eki Bibuli eri kukigambaho. Eshara zitu nizibasa kuba ndingwa ninga shi ngufu ahabw’embera. Ecokureberaho: Nitubasa kushaba eshara ngufu twaza kurya konka tushaba eshara ndingwa twaba turi  kusima Yehova ninga shi turi kumugambira ebizibu byitu. (1 Samueli 1:12, 15) Titushemerire kushaba eshara ndingwa kugira ngu tutangaze abantu, nk’oku abantu bamwe babire bari omu bwire bwa Yesu. (Luka 20:46, 47) Oburingwa bw’eshara ti co kikuru ahari Yehova. Ekikuru ahari Yehova ni okumushaba tubyihire aha mutima.

14. Tushemerire kushaba emirundi ingahe, kandi shi eco nikitwegesa ki ahari Yehova?

¹⁴ Tushemerire kushaba emirundi ingahe? Yehova nayenda ngu tumushabe burijo. Bibuli netugambira ku tushemerire kuguma ‘turi kureba, tukashaba,’ ‘tukagumizamu kushaba,’ kandi ‘tukashaba obutosha.’ (Matayo 26:41; Abarooma 12:12; 1 Abatesalonika 5:17) Yehova naba ayetegwire kuhurira kushaba kwitu. Tushemerire kumusima burijo ahabw’okutukunda n’okutufaho. Nitubasa n’okumushaba  obuhabuzi, amani, n’okuhumurizibwa. Mazima, twamanya omugisha ogu twine g’okugamba na Yehova omu kushaba, nikituma twakoresa buri mugisha gona ngu tugambe na we.

15. Ahabw’enki tushemerire kugamba ngu ‘amina’ aha muheru gw’eshara?

¹⁵ Ahabw’enki turi kugamba ngu ‘amina’ aha muheru gw’eshara? Ekigambo ‘amina’ nikimanyisa ngu “mazima” ninga “kibe kisyoya.” Ni oburyo bw’okwereka ku nitwikiriza eki twagamba omu shara, kandi ku byaturuga aha mutima. (Zaaburi 41:13) Bibuli netwegesa ku tushemerire kugamba ngu “amina” aha muheru gw’eshara eyagambwa omu misho ga bona, turi kwereka ku twayikiriza ebyagambwa omu shara.—1 Obusingye 16:36; 1 Abakorinso 14:16.

16. Mbehi Yehova nagarukamu okushaba kwitu? Shoborora.

¹⁶ Mbehi Yehova nagarukamu okushaba kwitu? Yego. Bibuli nemweta “Ohurira okushaba.” (Zaaburi 65:2) Yehova nahurira kandi agarukamu eshara z’abantu bingi abari kushaba babyihire aha mutima, kandi nabagarukamu omu buryo butari kushushana.

17. Ni bata oku Yehova ari kukoresa ba marayika n’abahereza beye omu kugarukamu eshara zitu?

¹⁷ Yehova nakoresa ba marayika n’abahereza beye abari omu nsi omu kugarukamu eshara zitu. (Abaheburaayo 1:13, 14) Hariho ebyokureberaho byingi eby’abantu abashabire Ruhanga ngu abakwase kushoborocerwa Bibuli kandi ku hahwire akanya kace bakatayayirwa n’Abahamya ba Yehova. Bibuli neyereka ku ba marayika na bo bari kwekwatanisa omu kugamba “engiri” y’Obukama omu nsi yona. (Shoma omu Kushuuruurwa 14:6.) Nambwenu, abingi omuri itwe tukashaba Yehova turi kumugambira  ekizibu eki twine ninga obuyambi obu turi kwetenga, rero twareba Omukristo mutahi witu yija kutuyamba.—Enfumu 12:25; Yakobo 2:16.

18. Ni bata oku Yehova ari kukoresa omwika oguri kwera na Bibuli omu kugarukamu eshara zitu?

¹⁸ Yehova nakoresa omwika gweye oguri kwera omu kugarukamu okushaba kwitu. Twamushaba obuyambi bw’okwehanganira ebizibu, nabasa kukoresa omwika gutuhabura kandi gutuha amani. (2 Abakorinso 4:7) Nambwenu Yehova nakoresa Bibuli ari kugarukamu okushaba kwitu, n’okutoranamu ge. Ku turi kushoma Bibuli, nitushangamu ebyahandikirwe ebiratukwase. Nambwenu Yehova nabasa kukoresa omuntu omu materaniro agarukamu ekintu eki waba noyetenga ninga shi akoresa omuzehe atwereka orunyiriri rw’omuri Bibuli oruri kutukwataho.—Abagalatia 6:1.

19. Ahabw’enki turi kubasa kutekateka ngu Yehova tiyagarukamu okushaba kwitu?

¹⁹ Konka hine obu turi kubasa kwebuza ngu: ‘Ahabw’enki Yehova atakagarukiremu eshara zange?’ Yijuka ngu, namanya obwire obu aragarukiremu eshara zitu n’oku arazigarukemu. Namanya byona ebi turi kwenda. Nitubasa kushaba emirundi myingi atakatugarukiremu kugira ngu twereke ku nitwendera kimwe eki turi kumushaba, kandi ku turi kumwesiga. (Luka 11:5-10) Hine n’obu Yehova ari kugarukamu okushaba kwitu omu buryo obu tubire tutari kutekatekaho. Ecokureberaho: Nitubasa kushaba twahika omu mbera zigumire, konka omu mwanya g’okutwihiraho eco kizibu, atuha amani g’okwehangana.—Shoma omu Bafilipi 4:13.

20. Ahabw’enki tushemerire kushaba Yehova emirundi myingi?

²⁰ Ku twine omugisha gw’amani g’okushaba Yehova! Nitwesigira kimwe ku natuhurira twamushaba. (Zaaburi 145:18) Ku turiguma nitushaba Yehova tubyihire aha mutima, obunywani bwitu na we buryakizaho kuguma.