1, 2. (1) ¿Kʼãrẽa bʉa krĩchabʉ dayi yiwidʼira Daizezeba diadata? (2) ¿Kʼãrẽa yibia kʼawuaita Daizeze Bedʼeaba kʼasea jarabʉta yiwidʼi ʉ̃rʉ?

DAYIRÃ drʉara biode wĩkakĩrʉ. Maʉ̃ba ẽbẽra mama edabʉra Jeowaitara jõma ẽbẽra naʉ̃ drʉadebʉra kueta zake kĩrãkʼabʉ (Salmo 115:15; Isaías 40:15). Dayirã drʉa wikakĩrʉmina, Daizeze Bedʼeaba jarabʉ: «Jeowara jõma iyi jʉrʉbʉ kʼawabʉ, jõma wãrĩnu soiduba jʉrʉbʉ kʼawa. Jõma aripe oyi iyi wawiabʉba widibʉra akʉza ũrĩñi kʼareba widibʉ bedʼeara akʉza ẽdrʉbiyi» (Salmo 145:18, 19). Kʼãrẽaba sobiapanʉ, Jeowa nekʼãrẽ jõma odata, dayirã neũdukʼawua bakĩrãbʉ baera akʉza ũrĩkĩrãbʉ baera dayirã yiwidʼita. Maʉ̃ba Jeowabara dayirã aba abakaʉʼa iduaribibʉ kʼãrẽ dayirã yiwidʼibamarẽã.

² Jeowabara ũrĩñi iya kãgabʉde yiwidʼidara. Mawũẽra, ¿sãwũã yiwidʼibara? Atia kʼawuadaya Daizeze Bedʼeaba kʼasea jaradiabʉta dayi yiwidʼi ʉ̃rʉ.

3. ¿Kʼãrẽa yiwidʼibara Jeowaʼa?

³ Jeowabara kãgabʉ bʉra iyaʼa yiwidʼimarẽã. ¿Maʉ̃ra sãwũã kʼawuapanʉ? Maʉ̃ra Daizezeba nama jarabʉ Filipenses 4:6, 7de (akʉra). Jeowa nekʼãrẽ jõma odabara bʉta mejãcha krĩchabʉ akʉza jaramarẽãbʉ bʉ sãwũã krĩchabʉta adewara bʉ bedʼea zromata.

4. Jeowaʼa badua yiwidʼibʉbʉrʉ, ¿kʼãrẽta ũduseabʉ?

 ⁴ Dayirã Jeowaʼa yiwidʼibʉbara kʼarebabʉ audre iyi neũdukʼawuarabaita. Neũdukʼawua biara badua bedʼeapanʉ baera, kʼawuapanʉ sãwũã krĩchabʉta, kʼãrẽba krĩcha zroma obʉta, maʉ̃ba audre neũdukʼawuara bia bapanʉ, maʉ̃ kĩrãkʼabʉ Jeowa neũdukʼawuarabaita, maʉ̃ kʼarea diabʉ kʼãrẽ iyi Bedʼeata, mama jarabʉ, iyi sãwũã krĩchabʉta akʉza sãwũãbʉta, adewara jarabʉ kʼãrẽta weita ʉ̃ra zeide. Dayirã Jeowaʼa yiwidʼibʉrʉdera dayi sode pʉabʉra jõma jaraseabʉ. Badua yiwidʼibʉbʉrʉ, bʉra iyi neũdukʼawuarabayi (Santiago 4:8).

5. ¿Sãwũã kʼawuapanʉ Jeowabara jõma ũrĩ ẽãta dayirã yiwidʼibʉra?

⁵ ¿Jeowabara jõma ũrĩbʉka dayirã yiwidʼibʉra? Jõma ũrĩ ẽ. Propeta ewaribaside, Jeowaba jarasi israelitara: «Mara ʉ̃ta juwa ewara yiwidʼibʉrʉdera, mʉ̃  dabʉra mirʉbʉ mara kʼarea, maraba mejãcha yiwidʼinʉmʉbʉsida ũrĩ ẽ mʉ̃ara, mara juwara birasi baera waba» (Isaías 1:15). Dayirãta jʉra kʼawuabʉ ẽ bʉrʉ, aduaseabʉ Jeowa neũdukʼawuarabaita. Mawũã berabarira, Jeowabara ũrĩ ẽ bayi bʉ bedʼeara.

6. (1)¿Kʼãrẽa yibia ĩjãita? (2) ¿Sãwũã ũdubidai wãrĩnu ĩjãbʉta?

⁶ Jeowaba dayirã bedʼeata ũrĩmarẽãbʉbʉrʉ, wãrĩnu soiduba ĩjãibara iyita (Marcos 11:24). Apostol Pabloba jarasi: «Daizezeta ĩjãna ẽ bʉrʉ biata oũdubida ẽ bayi. Daizeze orrabʉbara ĩjãibara iyira wãrĩnubʉta akʉza iyi jʉrʉbʉra nebiata diabʉ» (Hebreos 11:6). Mamina bari ĩjãbe ẽ. Dayirãbara ewari jõmaʉ̃nẽ oibara Jeowaba kãgabʉta (akʉra Santiago 2:26).

7. (1) ¿Kʼãrẽa wawiabʉta ũdubibara Jeowaʼa yiwidʼibʉrʉdera? (2) ¿Sãwũã yiwidʼibara Daizezeara?

⁷ Dayirã Jeowa yiwidʼibʉrʉdera, edabʉta krĩchaibara akʉza wawiabʉta ũdubibara. ¿Kʼãrẽa? Krĩchara naʉ̃ta, bʉta nokʼo nãã mawũã ẽ bʉrʉ kabildo nãã bedʼeaibʉrʉ, mʉ̃a kʼawuaita bʉara wawia ũdubiyi maʉ̃me bedʼeaira. Jeowaba nekʼãrẽ jõma oda baera, dayirãbara wawia ũdubibara akʉza iyi eda baibara iyiʉ̃me bedʼeabʉrʉdera (Génesis 17:1; Salmo 138:6). Adewara dayirã yiwidʼibʉrʉdera, soiduba wãrĩnuta jaraibara akʉza iyabaʉ bedʼeata jara ẽ baibara (Mateo 6:7, 8).

8. ¿Dayirã yiwidʼibʉrʉ tẽãra kʼãrẽta oibara?

⁸ Adewara Jeowa yiwidʼibʉrʉdera, daya wididade oita krĩchaibara. Bari jaraita, dayirãba widiyi Jeowaʼa daya nesidabʉta diamarẽã. Mamina nekʼãrẽ oẽã bari dedabayi, jʉ̃ãbayi Jeowaba nejõma weita. Mamina mawũã oẽ baibara, awuarabʉrʉ bʉta trajaseabʉbʉrʉ jʉrʉibara trajʉra akʉza badu trajʉta ũdura trajaibara  (Mateo 6:11; 2 Tesalonicenses 3:10). Adewara dayirãba widira Jeowaʼa dayirã nemitia obada iduaribimarẽã, dayirãbara jʉrʉ ẽ baibara nemitiara, maʉ̃ne eda bae ẽ baita (Colosenses 3:5). Atia kʼawuadaya ẽbẽraba widibʉta dayi yiwidʼibʉ ʉ̃rʉ.

9. (1) ¿Kʼaia yiwidʼibara? (2) ¿Kʼãrẽta jaradiabʉ Juan 14:6dera yiwidʼi ʉ̃rʉra?

⁹ ¿Kʼaia yiwidʼibara? Jesuba iyi kʼaidubemara, kʼãwũã yiwidʼimarẽã jarasi: «Zeze ʉ̃tʉbema» (Mateo 6:9). Maʉ̃ kʼarea Jeowabʉrʉ abapaia yiwidʼibara akʉza Jesuba jarasi: «Mʉta oa, mʉta wãrã, mʉta bʼai jõ ẽãnebema. Mawũẽ miõta mʉ Zezema jũẽ ẽã, awuarabʉrʉ jũẽña mʉneba» (Juan 14:6). Naʉ̃ba dayirãʼa jaradiabʉ yiwidʼibarata Jesudeba. ¿Kʼãrẽa yiwidʼibara Jesudeba? Dayirã yiwidʼita Jeowaba ũrĩmarẽãbʉbʉrʉ wawia ũdubibara, Jeowaba yi Warrata dayirã ẽdrʉbita zokʼasi baera. Daya kʼawuada kĩrãkʼa Jesura zesi naʉ̃ drʉa eda, dayirã kayiruadeba ẽdrʉbita (Juan 3:16; Romanos 5:12). Jeowabara Jesura Nokʼobabisi akʉza saserdote babisi (Juan 5:22; Hebreos 6:20).

10. ¿Sãwũã kõbepe yiwidʼibara? Jara ũrĩbira.

¹⁰ ¿Sãwũã kõbepe yiwidʼibara? Jeowabara jara ẽ dayirã sãkokode kõbe kʼãrãpe yiwidʼimarẽã akʉza jara ẽ piradrʉ edaʉ nʉmaita mawũã ẽ bʉrʉ jebedabaita. Daizeze Bedʼeabara jarabʉ dayirãra yiwidʼiseabʉta daya kãgabʉde, mamina iyita wawia ũdubibarata (1 Crónicas 17:16; Nehemías 8:6; Daniel 6:10; Marcos 11:25). Jeowaita audre yibia, dayirãba soiduba iyaʼa yiwidʼita, mawũã dayi sãwũã kõbepe yiwidʼibʉta akʉ ẽ.  Adewara dayirãra yiwidʼiseabʉ nemi jĩgʉa maʉ̃ta neẽ bʉrʉ krĩchade yiwidʼiseabʉ, adewara yiwidʼiseabʉ badu ewaride, diamasi akʉza ewaride. Dayirã yiwidʼibʉrʉdera ĩjãibara Jeowaba ũrĩta dayirãba widibʉra, wuabemaraba ũrĩna ẽ mina (Nehemías 2:1-6).

11. ¿Kʼãrẽ ʉ̃rʉ yiwidʼiseabʉ?

¹¹ ¿Kʼãrẽ ʉ̃rʉ yiwidʼiseabʉ? Dayirãbara widiseabʉ Jeowaba kãgabʉde. Daizeze Bedʼeaba jarabʉ: «Iyitara kʼãrẽ ẽãta dayirãba widibʉra, iya jarabʉ kĩrãkʼa odara mawũãra iyara ũrĩbʉ» (1 Juan 5:14). Mamina, ¿dayi sãwũã berabarinʉmʉta jaraseabʉka? Jõma jaraseabʉ. Jeowaʉ̃me bedʼeabʉrʉdera dayi neũdukʼawuaʉ̃me bedʼeabʉ kĩrãkʼabʉ. Dayirãbara jõma jaraseabʉ dayi sãwũã krĩchabʉta akʉza sãwũãbʉta (Salmo 62:8). Adewara dayirãbara widiseabʉ iyi jaure zarea diamarẽã nebia oita (Lucas 11:13). Akʉza biga dayirãba widita, krĩcha bia diamarẽã, mawũã bedʼea zroma zebʉrʉde biʼia ara oita (Santiago 1:5). Yiwidʼibara Jeowaʼa dayirã nemitia obʉta kĩrãduamarẽã (Efesios 1:3, 7). Adewara dayirãra yiwidʼibara wuabema ẽbẽra kʼareabida, dayirã mebẽrã ʉ̃rʉ akʉza mebẽrã kongregasion nebema ʉ̃rʉbida (Hechos 12:5; Colosenses 4:12).

12. ¿Kʼãrẽ ʉ̃rʉ audre yiwidʼibara dayirãra?

¹² ¿Kʼãrẽ ʉ̃rʉ audre yiwidʼibara dayirãra? Jeowa ʉ̃rʉ akʉza iya kãgabʉ ʉ̃rʉ. Dayirãbara Jeowaʼa soiduba biga diaibara iya dayirã nekʼãrẽ mejãcha diasi baera (1 Crónicas 29:10-13). Jesuba iyi kʼaidubemara yiwidʼi jaradiasidera, jarasi saʉ̃ ʉ̃rʉ audre yiwidʼibarata (akʉra Mateo 6:9-13). Jesuba widimarẽã jarasi, Jeowa trʉ̃ta neneẽã bamarẽã. Maʉ̃ tẽã jarasi, widimarẽã Daizeze Nokʼota wemarẽã akʉza iya kãgabʉta omarẽã  naʉ̃ drʉade. Maʉ̃ jõma jarada tẽã, jaraseabʉ dayirãba nesidabʉta. Dayirã yiwidʼibʉrʉde Jeowaba kãgabʉ ʉ̃rʉ widira, maʉ̃ba ũdubibʉ saʉ̃ta audre yibiata dayirãitara.

13. ¿Kʼãrẽaba yiwidʼibara?

¹³ ¿Kʼãrẽaba yiwidʼibara? Daizeze Bedʼeabara jara ẽ, kʼãrẽaba yiwidʼibarata. Bari jaraita, dayirã nekobʉrʉdera dããra yiwidʼinʉmabe ẽ, mamina dayirã bedʼea zroma erbʉta Jeowaʼa jarabʉrʉdera dããra bedʼeaseabʉ  (1 Samuel 1:12, 15). Dayirã yiwidʼibʉta jõmaʉ̃ba ũdumarẽã dããra yiwidʼinʉmabe ẽ, Jesu ewaribaside obada kĩrãkʼa (Lucas 20:46, 47). Jeowabara mawũã yiwidʼibʉra akʉ ẽ. Iya kãgabʉ dayirãba soiduba widimarẽã.

14. (1) ¿Audre ẽãne yiwidʼibaibaraka? (2) ¿Kʼãrẽta jaradiabʉ naʉ̃ba Jeowa ʉ̃rʉ?

¹⁴ ¿Audre ẽãne yiwidʼi bʼaibaraka? Jeowabara kãgabʉ dayirã audre ẽãne yiwidʼibamarẽã. Daizeze Bedʼeaba jarabʉ: «zhiwidʼiudua wãẽãna ẽbaita» «baridua zhiwidʼiudua» (Mateo 26:41; Romanos 12:12; 1 Tesalonicenses 5:17). Jeowabara ewari jõmaʉ̃nẽ ũrĩbʉ dayirã bedʼeara. Jeowaʼa biga diaibara iya dayirã ũdubibʉ baera kãgabʉta akʉza sobiata. Adewara dayirãbara widiseabʉ, dayirãʼa zarea diamarẽã akʉza kʼarebamarẽã.  Dayirãta yiwidʼikĩrãbʉbʉrʉ, Jeowaʉ̃me ewariza bedʼeapanañi.

15. ¿Kʼãrẽa jaraibara «amen» dayi yiwidʼibʉrʉ tẽãra?

¹⁵ ¿Kʼãrẽa jaraibara «amen» dayi yiwidʼibʉrʉ tẽãra? Bedʼea «amen»bara jarabʉ, «bedʼea abarikabʉta». Maʉ̃ba daya amen abʉrʉdera, ũdubibʉ daya soiduba widibasita (Salmo 41:13). Daizeze Bedʼeaba dayirãʼa jaradiabʉ, jõmaʉ̃ra daidu yiwidʼibʉrʉdera bigata «amen» jaraita, nemi jĩgʉa jaraita mawũã ẽ bʉrʉ dayibitabai jaraibʉsida. Dayirãba maʉ̃ta mawũã jaradara ũdubidayi, bedʼea abarikabʉta yi ẽbẽra yiwidʼidaʉ̃me (1 Crónicas 16:36; 1 Corintios 14:16).

16. ¿Panʉbʉka Daizezebara dayirã yiwidʼibʉra? Jara ũrĩbira.

¹⁶ ¿Wãrĩnu panʉbʉka Daizezebara dayirã yiwidʼibʉra? Panʉbʉ. Daizeze Bedʼeabara jarabʉ, dayi yiwidʼibʉ ũrĩbarita (Salmo 65:2; Isaías 30:19). Jeowabara ũrĩbʉ ẽbẽra naʉ̃ drʉa jõmaʉ̃nẽ iyaʼa soiduba yiwidʼibʉ bedʼeata.

17. ¿Sãwũã panʉbʉ Jeowabara angeleraneba akʉza iyi nezokʼaraneba dayirã yiwidʼira?

¹⁷ Jeowabara panʉbʉ angeleraneba akʉza iyi nezokʼara nama egorodebemaneba, ẽbẽraba widibʉra (Hebreos 1:13, 14). Ẽbẽra bioʉba Daizezeʼa yiwidʼibʉ kʼarebamarẽã, Daizeze Bedʼeade jarabʉta audre ũrĩta, maʉ̃ audre ẽãne Jeowa ʉ̃rʉ Kʼawuabipanʉrãta jʉ̃ẽpanʉ iyi akʉde. Naʉ̃ba dayirã ũdubibʉ, sãwũã angeleraba kʼarebabʉta Daizeze Bedʼea jaradiaita, naʉ̃ drʉa jõmaʉ̃nẽ (akʉra Apocalipsis 14:6). Adewara Jeowa ʉ̃rʉ Kʼawuabipanʉrãsida Jeowaʼa yiwidʼipanʉ, ãyi bedʼea  zroma erpanʉne, maʉ̃ra Jeowabara panʉbʉ mebẽrã kongregasioneba (Proverbios 12:25; Santiago 2:16).

18. ¿Daizezebara panʉbʉka dayirã yiwidʼibʉra iyi Bedʼeadeba akʉza jaure zareadeba?

¹⁸ Jeowabara dayirã yiwidʼibʉra, panʉbʉ iyi jaure zareadeba. Adewara dayirãba Jeowa kʼareba widibʉrʉdera bedʼea zroma erbʉ kʼarea, Jeowabara iyi jaure zareaba kʼarebaseabʉ akʉza zarea diaseabʉ (2 Corintios 4:7). Jeowabara dayirã yiwidʼira panʉbʉ iyi Bedʼeadeba dayirã krĩcha bia diaita, maʉ̃ba dayirãba akʉbʉrʉde ũduseabʉ dayi kʼarebaseabʉta akʉza ãba yi jurebʉrʉde mebẽrãba bedʼea jarabʉba kʼarebaseabʉ. Maʉ̃ta neẽ bʉrʉ zõrãrã kongregasionebemaba, Daizeze Bedʼea akʉ kʼãrãpe jaradiabʉrʉde kʼarebaseabʉ (Gálatas 6:1).

19. ¿Kʼãrẽa krĩchaseabʉ Jeowabara panʉ ẽãta daya widibʉra?

¹⁹ Ewari abaʉde Jeowaba bʉa wididata panʉ ẽ bʉrʉ, kĩrãbera iyabʉrʉ kʼawuabʉta kʼãrẽ ewaride panʉita. Jeowabara biʼia kʼawuabʉ kʼãrẽta waebʉta dayirãitara. Mamina ewariza widi bʼaibara Jeowaʼa dayirãba ũdubita wãrĩnu nesidabʉta akʉza soiduba ĩjãbʉta (Lucas 11:5-10). Edaʉde Jeowabara dayirãba wididara panʉbʉ, dayirãba kʼawua ẽãne. Bari jaraita, dayirã Jeowa yiwidʼiseabʉ bedʼea zroma ara obe ẽ kʼarea, mamina Jeowabara maʉ̃ bedʼea zromara waña taʉbi ẽ, awuarabʉrʉ bʉa zarea diayi (akʉra Filipenses 4:13).

20. ¿Kʼãrẽa yiwidʼibaibara audre ẽãne?

²⁰ Dayirã yiwidʼi bʼaira audre yibia. Jeowaba iduaribibʉ kʼare baera iyiʉ̃me bedʼeaita. Maʉ̃ kʼarea dayirãbara wãrĩnu ĩjãibara iya ũrĩta (Salmo 145:18). Dayirãta soiduba audre ẽãne iyaʼa yiwidʼibʉbʉrʉ, audre yi neũdukʼawuabayi.