1, 2. Ngaa espesyal gid nga regalo ang pangamuyo, kag ngaa dapat naton hibaluon ang ginatudlo sang Biblia parte sa sini?

GAMAY lang katama ang duta kon ikumparar sa uniberso. Kon magtan-aw si Jehova sa duta, daw tulo lang sa balde ang tanan nga tawo. (Salmo 115:15; Isaias 40:15) Bisan gamay lang kita katama kon ikumparar sa uniberso, ang Salmo 145:18, 19 nagasiling: “Si Jehova malapit sa tanan nga nagapanawag sa iya, sa tanan nga nagapanawag sa iya sa kamatuoran. Ginahatag niya ang handum sang mga nagakahadlok sa iya; ginapamatian niya ang ila pagpangayo sing bulig kag ginaluwas niya sila.” Daku gid ini nga pribilehiyo! Si Jehova, nga labing gamhanan nga Manunuga, gusto mangin suod sa aton, kag gusto niya pamatian ang aton mga pangamuyo. Huo, pribilehiyo gid naton nga makapangamuyo, kag espesyal ini nga regalo ni Jehova sa kada isa sa aton.

² Pero pamatian lang kita ni Jehova kon makig-istorya kita sa iya sa gusto niya nga paagi. Paano naton ina mahimo? Hibaluon naton kon ano ang ginasiling sang Biblia parte sa pangamuyo.

3. Ngaa dapat ka mangamuyo kay Jehova?

³ Gusto ni Jehova nga mangamuyo, ukon makig-istorya, ka sa iya. Ngaa masiling naton ina? Palihug basaha ang Filipos 4:6, 7. Hunahunaa ining matahom nga pangagda. Interesado gid sa imo ang Manuggahom sang uniberso kag gusto niya nga isugid mo sa iya ang imo ginabatyag kag mga problema.

4. Paano ang regular nga pagpangamuyo nagapabakod sang imo pagpakig-abyan kay Jehova?

 ⁴ Makabulig sa aton ang pangamuyo para mangin suod kita kay Jehova. Kon pirme nagaistoryahanay ang mag-abyan sang ila mga ginapensar, ginakabalak-an, kag ginabatyag, nagasuod pa gid sila. Amo man sini kon nagapangamuyo kita kay Jehova. Paagi sa Biblia, ginasugid niya sa imo ang iya ginapensar kag ginabatyag, kag kon ano ang iya himuon sa palaabuton. Puede mo masugid sa iya ang ginakabalak-an mo gid paagi sa regular nga pagpakig-istorya sa iya. Kon himuon mo ini, magabakod pa gid ang inyo pag-abyanay ni Jehova.—Santiago 4:8.

5. Ngaa masiling naton nga indi tanan nga pangamuyo ginapamatian ni Jehova?

⁵ Ginapamatian bala ni Jehova ang tanan nga pangamuyo? Wala. Sang panahon ni propeta Isaias, ginsilingan ni Jehova ang mga Israelinhon: “Bisan ano kadamo ang inyo  pangamuyo, indi ako magpamati; ang inyo mga kamot puno sing dugo.” (Isaias 1:15) Gani dapat kita maghalong kay basi makahimo kita sang butang nga makaguba sang aton relasyon kay Jehova, kag indi na niya pagpamatian ang aton mga pangamuyo.

6. Ngaa importante ang pagtuo? Paano mo mapakita nga may pagtuo ka?

⁶ Para pamatian ni Jehova ang aton mga pangamuyo, dapat magtuo kita sa iya. (Marcos 11:24) Si apostol Pablo nagpaathag: “Kon wala sing pagtuo imposible nga mapahamut-an ang Dios, kay ang nagapalapit sa Dios dapat magpati nga nagaluntad sia kag nagapadya sa mga hanuot nga nagapangita sa iya.” (Hebreo 11:6) Pero indi bastante nga magsiling lang kita nga may pagtuo kita. Dapat naton tumanon si Jehova kada adlaw para ipakita nga nagatuo kita sa iya.—Basaha ang Santiago 2:26.

7. (a) Ngaa dapat kita mangin mapainubuson kag matinahuron kon nagapangamuyo kay Jehova? (b) Paano naton mapakita nga sinsero ang aton pangamuyo?

⁷ Kon nagapangamuyo kay Jehova dapat kita mangin mapainubuson kag matinahuron. Ngaa? Kon nagapakig-istorya kita sa hari ukon presidente, matinahuron gid kita. Si Jehova ang Labing Gamhanan nga Dios, gani dapat gid nga mas matinahuron kita kag mapainubuson kon nagapakig-istorya kita sa iya. (Genesis 17:1; Salmo 138:6) Dapat sinsero man kita kon nagapangamuyo kay Jehova, nga wala ginasulitsulit ang aton ginasiling sa iya.—Mateo 6:7, 8.

8. Kon may ginapangabay kita sa aton pangamuyo, ano ang dapat naton himuon?

⁸ Kon may ginapangabay kita sa aton pangamuyo, dapat panikasugan naton nga himuon ang aton ginapangamuyo. Halimbawa, kon mangabay kita kay Jehova sang aton kinahanglanon kada adlaw, indi kita dapat magtinamad kag maghulat lang nga ihatag ini ni Jehova bisan pa makasarang  pa kita mag-obra. Dapat kita mangabudlay kag batunon ang bisan ano nga obra nga masarangan naton. (Mateo 6:11; 2 Tesalonica 3:10) Ukon kon mangamuyo kita sing bulig ni Jehova nga mauntatan ang malain naton nga ginahimo, dapat naton likawan ang mga sitwasyon nga madali kita masulay. (Colosas 3:5) Binagbinagon naton ang mga pirme ginapamangkot parte sa pangamuyo.

9. Kay sin-o kita dapat mangamuyo? Ano ang ginatudlo sa aton sang Juan 14:6 parte sa pangamuyo?

⁹ Kay sin-o kita dapat mangamuyo? Gintudluan ni Jesus ang iya mga sumulunod nga mangamuyo sa aton “Amay . . . nga yara sa langit.” (Mateo 6:9) Nagsiling pa sia: “Ako amo ang dalan kag ang kamatuoran kag ang kabuhi. Wala sing makakadto sa Amay kon indi paagi sa akon.” (Juan 14:6) Gani dapat kay Jehova lang kita mangamuyo paagi kay Jesus. Ano ang buot silingon sini? Batunon lamang ni Jehova ang aton mga pangamuyo kon respetuhon naton ang espesyal nga asaynment nga ginhatag ni Jehova kay Jesus. Pareho sang natun-an naton, nagkadto si Jesus sa duta para luwason kita sa sala kag kamatayon. (Juan 3:16; Roma 5:12) Gintangdo man ni Jehova si Jesus bilang Mataas nga Saserdote kag Hukom.—Juan 5:22; Hebreo 6:20.

10. Dapat bala nga may pinasahi gid kita nga posisyon kon nagapangamuyo? Ipaathag.

¹⁰ Dapat gid bala nga may pinasahi kita nga posisyon kon nagapangamuyo? Wala, wala naghambal si Jehova nga dapat kita magluhod, magpungko, ukon magtindog. Ginatudluan kita sang Biblia nga makapangamuyo kita kay Jehova sa bisan ano nga posisyon basta matinahuron ini. (1 Cronica 17:16; Nehemias 8:6; Daniel 6:10; Marcos 11:25) Indi importante kay Jehova kon ano ang aton posisyon kon nagapangamuyo, kundi kon ano ang aton panimuot kon  nagapangamuyo sa iya. Makapangamuyo kita sa iya sing matunog ukon hipos bisan diin man kita kag bisan ano nga oras. Makasalig kita nga kon mangamuyo kita kay Jehova pamatian gid niya kita bisan indi ini mabatian sang iban.—Nehemias 2:1-6.

11. Ano ang puede naton ipangamuyo kay Jehova?

¹¹ Ano ang puede naton ipangamuyo? Bisan ano basta batunon ni Jehova. Ang Biblia nagasiling: “Bisan ano ang ipangamuyo naton suno sa iya kabubut-on, magapamati sia sa aton.” (1 Juan 5:14) Puede bala ipangamuyo ang personal nga mga butang? Huo. Ang pagpangamuyo kay Jehova pareho lang sa pagpakig-istorya sa imo suod nga abyan. Puede naton masugid sa iya ang tanan naton nga ginapensar kag ginabatyag. (Salmo 62:8) Puede naton ipangamuyo nga hatagan niya kita sang iya gamhanan nga balaan nga espiritu para buligan kita nga mahimo ang insakto. (Lucas 11:13) Puede man kita mangabay kay Jehova sing kaalam para makadesisyon sing maayo, kag sing kusog nga maatubang ang mga problema. (Santiago 1:5) Dapat mangabay kita kay Jehova nga patawaron niya ang aton mga sala. (Efeso 1:3, 7) Dapat man naton ipangamuyo ang iban, lakip ang aton pamilya kag ang aton kauturan sa kongregasyon.—Binuhatan 12:5; Colosas 4:12.

12. Ano dapat ang pinakaimportante sa aton pangamuyo?

¹² Ano dapat ang pinakaimportante sa aton pangamuyo? Si Jehova kag ang iya kabubut-on. Dapat naton sia pasalamatan sa tanan niya nga ginhimo para sa aton. (1 Cronica 29:10-13) Nahibaluan naton ini kay sang ari pa si Jesus sa duta, gintudluan niya ang iya mga disipulo kon paano mangamuyo. (Basaha ang Mateo 6:9-13.) Nagsiling sia nga dapat anay nila pakabalaanon ang ngalan sang Dios, ukon kabigon ini nga sagrado. Dayon nagsiling si Jesus nga dapat naton pangabayon nga magkari ang Ginharian sang Dios kag matuman ang kabubut-on ni Jehova sa bilog nga duta.  Nagsiling si Jesus nga unahon naton pangamuyo ining importante nga mga butang, kag dayon ang aton personal nga mga kinahanglanon. Kon ginauna naton si Jehova kag ang iya kabubut-on sa aton pangamuyo, ginapakita naton kon ano gid ang pinakaimportante sa aton.

13. Daw ano dapat kalawig ang aton pangamuyo?

¹³ Daw ano dapat kalawig ang aton pangamuyo? Wala sing ginasiling ang Biblia. Mahimo nga lip-ot lang ini ukon malawig, depende sa sitwasyon. Halimbawa, mahimo  malip-ot lang ang aton pangamuyo antes magkaon, pero kon nagapasalamat kita kay Jehova ukon nagasugid sang aton mga kabalaka sa iya mahimo nga malawig ang aton pangamuyo. (1 Samuel 1:12, 15) Wala kita nagapangamuyo sing malawig para dayawon kita sang iban, pareho sang ginhimo sang pila sang panahon ni Jesus. (Lucas 20:46, 47) Wala nalipay si Jehova sa sina nga mga pangamuyo. Ang importante sa iya amo ang aton sinsero nga pangamuyo.

14. Pila ka beses kita dapat mangamuyo, kag ano ang ginatudlo sini sa aton parte kay Jehova?

¹⁴ Pila ka beses kita dapat mangamuyo? Nagsiling si Jehova nga dapat kita mangamuyo sa iya sing regular. Nagsiling ang Biblia nga dapat magpadayon kita sa pagpangamuyo. (Mateo 26:41; Roma 12:12; 1 Tesalonica 5:17) Handa gid pirme si Jehova nga mamati sa aton. Puede naton sia pasalamatan kada adlaw sa iya pagpalangga kag kaalwan. Puede  man naton sia pangabayon nga giyahan kita, hatagan sing kusog, kag paumpawan. Kon ginaapresyar naton ang pribilehiyo nga makapangamuyo kita kay Jehova, mapahulag pa gid kita nga istoryahon sia kada adlaw.

15. Ngaa dapat kita maghambal sing “amen” sa tapos sang pangamuyo?

¹⁵ Ngaa dapat kita maghambal sing “amen” sa tapos sang pangamuyo? Ang “amen” nagakahulugan sing “pat-od gid” ukon “kabay pa.” Ang pagsiling sini nagapakita nga sinsero gid kita sa aton pangamuyo. (Salmo 41:13) Ginatudluan man kita sang Biblia nga ang pagsiling sing “amen,” sing hinay man ukon matunog, pagkatapos mangamuyo sang isa sa publiko nagapakita nga nagaugyon kita sa iya ginsiling.—1 Cronica 16:36; 1 Corinto 14:16.

16. Ginasabat gid bala ni Jehova ang aton mga pangamuyo? Ipaathag.

¹⁶ Ginasabat gid bala ni Jehova ang aton mga pangamuyo? Huo. Ginatawag sia sang Biblia nga “Manugpamati sang pangamuyo.” (Salmo 65:2) Ginapamatian kag ginasabat ni Jehova ang sinsero nga pangamuyo sang minilyon, kag ginahimo niya ini sa sarisari nga paagi.

17. Paano ginagamit ni Jehova ang mga anghel kag ang iya mga alagad sa duta para sabton ang aton mga pangamuyo?

¹⁷ Ginagamit ni Jehova ang mga anghel kag ang iya mga alagad sa duta para sabton ang aton mga pangamuyo. (Hebreo 1:13, 14) Madamo sing halimbawa sang mga tawo nga nangamuyo nga buligan sila nga maintiendihan ang Biblia kag wala lang gid madugay nag-abot ang mga Saksi ni Jehova. Ginapakita sang Biblia nga nadalahig ang mga anghel sa pagsugid sang “maayong balita” sa bilog nga duta. (Basaha ang Bugna 14:6.) Kag madamo man sa aton nga sang nangamuyo kita kay Jehova parte sa aton problema ukon  kinahanglanon, nabaton naton ang bulig paagi sa aton Cristiano nga kauturan.—Hulubaton 12:25; Santiago 2:16.

18. Paano ginagamit ni Jehova ang iya balaan nga espiritu kag ang Biblia para sabton ang aton mga pangamuyo?

¹⁸ Ginagamit ni Jehova ang iya balaan nga espiritu para sabton ang aton mga pangamuyo. Kon mangamuyo kita sang iya bulig para maatubang ang aton mga problema, mahimo niya gamiton ang iya balaan nga espiritu para hatagan kita sing giya kag kusog. (2 Corinto 4:7) Ginagamit man ni Jehova ang Biblia para sabton ang aton mga pangamuyo kag buligan kita nga makadesisyon sing maalamon. Kon magbasa kita sing Biblia, may mabasahan kita nga makabulig sa aton. Mahimo man pahulagon ni Jehova ang isa nga nagakomento sa miting nga isiling kon ano gid ang kinahanglan naton ukon ang isa ka gulang sa kongregasyon para magsugid sa aton sing punto sa Biblia.—Galacia 6:1.

19. Ngaa kon kaisa daw kadugay sabton ni Jehova ang aton mga pangamuyo?

¹⁹ Pero kon kaisa, nagapamangkot kita, ‘Ngaa wala pa ginasabat ni Jehova ang akon mga pangamuyo?’ Dumduma nga nahibaluan niya kon san-o kag kon paano sabton ang aton mga pangamuyo. Nahibaluan niya ang aton kinahanglanon. Mahimo kinahanglan padayon kita nga mangamuyo para ipakita nga sinsero kita kag nagatuo kita sa iya. (Lucas 11:5-10) Kon kaisa makibot kita sa paagi ni Jehova sa pagsabat sa aton mga pangamuyo. Halimbawa, ginpangamuyo naton ang aton mabudlay nga sitwasyon, pero imbes nga dulaon ang aton problema, mahimo niya kita hatagan sing kusog nga mabatas ini.—Basaha ang Filipos 4:13.

20. Ngaa dapat pirme kita mangamuyo kay Jehova?

²⁰ Daku gid nga pribilehiyo nga makapangamuyo kita kay Jehova! Makasalig kita nga pamatian niya kita. (Salmo 145:18) Kag nagabakod pa gid ang aton pagpakig-abyan sa iya kon pirme kita nagapangamuyo sa iya.