1, 2. Panagkunam, apay nga espesial a regalo ti kararag, ken apay a masapul a maammuantayo no ania ti isursuro ti Biblia maipapan iti dayta?

NAKABASBASSIT laeng ti daga no ikompara iti uniberso. No kumita ni Jehova iti daga, ti amin a tattao iti amin a pagilian ket kasla laeng sangatedted iti sangatimba a danum. (Salmo 115:15; Isaias 40:15) Uray nakabasbassittayo no ikompara iti uniberso, kuna ti Salmo 145:18, 19: “Asideg ni Jehova iti amin nga umaw-awag kenkuana, iti amin nga umawag kenkuana iti kinapudno. Pempennekenna ti tarigagay dagiti agbuteng kenkuana; dengdenggenna ti panagpatulongda ket isalakanna ida.” Anian a nagsayaat dayta a pribilehiotayo! Kayat ti mannakabalin-amin a Namarsua a ni Jehova ti agbalin a nadekket kadatayo ken kayatna a denggen dagiti kararagtayo. Wen, ti kararag ket maysa a pribilehio, espesial a regalo nga inted ni Jehova iti tunggal maysa kadatayo.

² Ngem denggennatayo laeng ni Jehova no makisaritatayo kenkuana iti pamay-an a kayatna. Kasanotayo nga aramiden dayta? Kitaentayo no ania ti ibagbaga ti Biblia maipapan iti kararag.

3. Apay a masapul nga agkararagka ken Jehova?

³ Kayat ni Jehova nga agkararagka, wenno makisaritaka, kenkuana. Apay a maibagatayo a kasta? Pangngaasim ta basaem ti Filipos 4:6, 7. Panunotem dayta a naayat nga awis. Interesado unay kenka ti Agturay iti uniberso ken kayatna  nga ibagam kenkuana ti marikriknam ken dagiti problemam.

4. Kasano a mapatibker ti regular a panagkararag ti pannakigayyemmo ken Jehova?

⁴ Makatulong ti kararag tapno maaddaantayo iti nadekket a pannakigayyem ken Jehova. No regular nga agsarita dagiti aggayyem maipapan iti pampanunoten, pakaseknan, ken rikriknada, tumibker ti panaggayyemda. Kasta met laeng ti panagkararag ken Jehova. Babaen ti Biblia, ibagbagana kenka dagiti pampanunoten ken rikriknana, agraman ti aramidennanto iti masanguanan. Mabalinmo nga ibaga kenkuana uray ti adda iti kaunggan ti pusom babaen ti regular a pannakisarita kenkuana. No aramidem dayta, ad-adda a tumibker ti pannakigayyemmo ken Jehova.​—Santiago 4:8.

5. Apay a maibagatayo a saan a denggen ni Jehova ti amin a kararag?

⁵ Denggen kadi ni Jehova ti amin a kararag? Saan. Idi tiempo ni propeta Isaias, imbaga ni Jehova kadagiti  Israelita: “Uray no mamin-adu nga agkararagkayo, saanak a dumngeg; napno dagiti imayo iti dara.” (Isaias 1:15) Isu a no saantayo a naannad, makaaramidtayo iti bambanag a mangyadayo kadatayo ken Jehova, ket saanna a denggen dagiti kararagtayo.

6. Apay a nagpateg ti pammati? Kasanotayo a maipakita nga adda pammatitayo?

⁶ No kayattayo a denggen ni Jehova dagiti kararagtayo, masapul nga adda pammatitayo kenkuana. (Marcos 11:24) Inlawlawag ni apostol Pablo: “Imposible a naan-anay a maparagsak ti Dios no awan ti pammati. Ta ti asinoman nga umasideg iti Dios ket masapul a patienna nga adda Dios ken isu ti manggunggona kadagidiay napasnek a mangsapsapul kenkuana.” (Hebreo 11:6) Ngem saan nga umdas a basta ibagatayo nga adda pammatitayo. Masapul a paneknekantayo nga adda pammatitayo babaen ti inaldaw a panagtulnog ken Jehova.​—Basaen ti Santiago 2:26.

7. (a) Apay a masapul a napakumbaba ken nadayawtayo no agkararagtayo ken Jehova? (b) Kasanotayo a maipakita a napasnektayo no agkararagtayo?

⁷ Masapul a napakumbaba ken nadayawtayo no agkararagtayo ken Jehova. Apay? No makisaritatayo iti ari wenno presidente, masapul a nadayawtayo. Mannakabalin-amin a Dios ni Jehova isu a saan kadi nga ad-adda pay koma a napakumbaba ken nadayawtayo no makisaritatayo kenkuana? (Genesis 17:1; Salmo 138:6) Masapul met a napasnek ken naimpusuan nga agkararagtayo ken Jehova. Saantayo koma a basta ulit-uliten dagiti sasaotayo.​—Mateo 6:7, 8.

8. No adda ikararagtayo, ania pay ti masapul nga aramidentayo?

⁸ Kamaudiananna, no adda ikararagtayo, masapul nga aramidentayo ti amin a kabaelantayo tapno masungbatan dayta. Kas pagarigan, no ikararagtayo ken Jehova dagiti inaldaw a kasapulantayo, saantay koma a nasadut wenno ekspektarentayo lattan nga ited ni Jehova ti amin, a ditay pagreggetan dayta. Masapul nga aggaggagettayo ken awatentayo  ti aniaman a trabaho a kabaelantayo nga aramiden. (Mateo 6:11; 2 Tesalonica 3:10) Wenno no ikararagtayo a tulongannatayo ni Jehova a mangisardeng iti dakes nga aramid, masapul a liklikantayo dagiti situasion a mangsulisog kadatayo. (Colosas 3:5) Ammuentayo ita ti dadduma a gagangay a saludsod maipapan iti kararag.

9. Asino ti rumbeng a pagkararagantayo? Ania ti isuro kadatayo ti Juan 14:6 maipapan iti kararag?

⁹ Asino ti rumbeng a pagkararagantayo? Insuro ni Jesus kadagiti pasurotna nga agkararagda iti ‘Amatayo nga adda iti langit.’ (Mateo 6:9) Imbagana pay: “Siak ti dalan ken ti kinapudno ken ti biag. Awan ti makapan iti Ama no saan a magna kaniak.” (Juan 14:6) Isu a masapul nga agkararagtayo laeng ken Jehova babaen ken Jesus. Ania ti kayat a sawen ti panagkararag babaen ken Jesus? Tapno awaten ni Jehova dagiti kararagtayo, masapul a raementayo ti naisangsangayan nga annongen nga inted ni Jehova ken ni Jesus. Kas naadaltayo, immay ni Jesus ditoy daga tapno maisalakantayo manipud iti basol ken ipapatay. (Juan 3:16; Roma 5:12) Inapointaran met ni Jehova ni Jesus kas Nangato a Padi ken Ukom.​—Juan 5:22; Hebreo 6:20.

10. Adda kadi espesial a posision a masapul a surotentayo no agkararagtayo? Ilawlawagmo.

¹⁰ Adda kadi espesial a posision a masapul a surotentayo no agkararagtayo? Awan. Saan nga idawdawat ni Jehova nga agparintumeng, agtugaw, wenno agtakdertayo no agkararagtayo. Isursuro kadatayo ti Biblia a mabalintayo ti makisarita ken Jehova iti aniaman a nadayaw a posision. (1 Cronicas 17:16; Nehemias 8:6; Daniel 6:10; Marcos 11:25) Saan a ti posisiontayo nga agkararag ti kapatgan ken Jehova no di ket ti umiso a kababalintayo no makisaritatayo kenkuana. Mabalintayo ti agkararag  iti napigsa wenno naulimek, sadinoman ti ayantayo ken aniaman nga oras iti aldaw wenno rabii. No agkararagtayo ken Jehova, makapagtalektayo a denggennatayo uray no awan ti dumngeg kadatayo.​—Nehemias 2:1-6.

11. Ania dagiti mabalintayo nga ibaga ken Jehova?

¹¹ Ania ti mabalintayo nga ikararag? Mabalintayo nga ikararag ti aniaman nga akseptaren ni Jehova. Kuna ti Biblia: “Uray ania ti dawatentayo maitunos iti pagayatanna, denggennatayo.” (1 Juan 5:14) Mabalintayo kadi nga ikararag dagiti personal a bambanag? Wen. Ti panagkararag ken Jehova ket kas iti pannakisarita iti nadekket a gayyem. Maibagatayo ken Jehova ti aniaman nga adda iti panunot ken pusotayo. (Salmo 62:8) Mabalintayo nga ikararag nga ikkannatayo iti nabileg a nasantuan nga espirituna a tumulong kadatayo a mangaramid iti umiso. (Lucas 11:13) Mabalintayo met ti dumawat iti sirib tapno makaaramidtayo iti nasayaat a desision, ken mabalintayo nga ikararag ti bileg a kasapulantayo tapno maibturantayo dagiti pakarigatan. (Santiago 1:5) Masapul a dawatentayo ken Jehova a pakawanenna dagiti basoltayo. (Efeso 1:3, 7) Masapul met nga ikararagantayo ti dadduma, agraman ti pamiliatayo ken dagiti kakabsattayo iti kongregasion.​—Aramid 12:5; Colosas 4:12.

12. Ania koma ti kapatgan kadagiti kararagtayo?

¹² Ania koma ti kapatgan kadagiti kararagtayo? Ni Jehova ken ti pagayatanna. Rumbeng a naimpusuan nga agyamantayo iti amin nga inaramidna para kadatayo. (1 Cronicas 29:10-13) Ammotayo dayta ta idi immay ni Jesus ditoy daga, sinuruanna dagiti adalanna no kasano ti agkararag. (Basaen ti Mateo 6:9-13.) Imbagana nga ikararagtayo nga umuna a masantipikar koma, wenno matrato a sagrado wenno nasantuan, ti nagan ti Dios. Kalpasanna, impakita ni Jesus a masapul nga ikararagtayo nga umay koma ti Pagarian ti Dios ken maaramid koma ti pagayatan  ni Jehova iti intero a daga. Kalpasan a maikararagtayo dagitoy a nakapatpateg a bambanag, imbaga ni Jesus nga ikararagtayo dagiti personal a kasapulantayo. No iyun-unatayo iti kararagtayo ni Jehova ken ti pagayatanna, ipakpakitatayo no ania ti kapatgan kadatayo.

13. Kasano koma kaatiddog dagiti kararagtayo?

¹³ Kasano koma kaatiddog dagiti kararagtayo? Awan ti ibaga ti Biblia. Mabalin nga ababa wenno atiddog ti kararagtayo, depende iti situasion. Kas pagarigan, mabalin nga ababa laeng ti kararagtayo sakbay a mangantayo ngem  at-atiddog ti kararagtayo no agyamyamantayo ken Jehova wenno no ibagbagatayo dagiti pakaseknantayo. (1 Samuel 1:12, 15) Saantayo a paatiddogen ti kararagtayo tapno laeng agbilib ti sabsabali, kas iti ar-aramiden ti dadduma idi tiempo ni Jesus. (Lucas 20:46, 47) Saan a maragsakan ni Jehova kadagiti kasta a kararag. Ti naimpusuan a kararagtayo ti kapatgan ken Jehova.

14. Mamin-anotayo koma nga agkararag, ken ania ti isuro daytoy maipapan ken Jehova?

¹⁴ Mamin-anotayo koma nga agkararag? Aw-awisennatayo ni Jehova a regular a makisarita kenkuana. Kuna ti Biblia a masapul nga ‘itultuloytayo ti agkararag.’ (Mateo 26:41; Roma 12:12; 1 Tesalonica 5:17) Kanayon a nakasagana ni Jehova a dumngeg kadatayo. Mabalintayo ti inaldaw nga agyaman kenkuana gapu iti ayat ken kinaparaburna. Mabalintayo met a dawaten ti panangidalan, bileg, ken panangliwliwana.  No talaga nga ipatpategtayo ti pribilehio nga agkararag ken Jehova, kanayontayo a gundawayan ti makisarita kenkuana.

15. Apay a masapul nga ibagatayo ti “amen” iti ngudo ti kararag?

¹⁵ Apay a masapul nga ibagatayo ti “amen” iti ngudo ti kararag? Ti sao nga “amen” kaipapananna ti “sigurado” wenno “sapay koma.” Panangipakita dayta a serioso, wenno napudnotayo, kadagiti inkararagtayo. (Salmo 41:13) Isursuro ti Biblia a nasayaat met nga ibagatayo ti “amen,” iti napigsa wenno iti naulimek a pamay-an, iti ngudo ti publiko a kararag tapno ipakitatayo nga umanamongtayo iti naibaga.​—1 Cronicas 16:36; 1 Corinto 14:16.

16. Talaga kadi a sungbatan ni Jehova dagiti kararagtayo? Ilawlawagmo.

¹⁶ Talaga kadi a sungbatan ni Jehova dagiti kararagtayo? Wen. Isu ket inawagan ti Biblia a “Managdengngeg iti kararag.” (Salmo 65:2) Denggen ken sungbatan ni Jehova ti napasnek a kararag ti minilion a tattao, ket sungbatanna dayta iti nagduduma a pamay-an.

17. Kasano nga us-usaren ni Jehova dagiti anghel ken dagiti adipenna ditoy daga tapno sungbatanna dagiti kararagtayo?

¹⁷ Us-usaren ni Jehova dagiti anghel ken dagiti adipenna ditoy daga a mangsungbat kadagiti kararagtayo. (Hebreo 1:13, 14) Nakaad-adu ti pagarigan dagiti tattao a nangikararag iti tulong tapno maawatanda ti Biblia ket dagus nga adda simmarungkar kadakuada a Saksi ni Jehova. Ipakita ti Biblia a karaman dagiti anghel iti pannakaipakaammo ti “naimbag a damag” iti intero a daga. (Basaen ti Apocalipsis 14:6.) Maysa pay, adu kadatayo ti nangikararag ken Jehova iti espesipiko a problema wenno kasapulan, ket naawattayo ti tulong a kasapulantayo manipud iti maysa a kabsat.​—Proverbio 12:25; Santiago 2:16.

18. Kasano nga us-usaren ni Jehova ti nasantuan nga espirituna ken ti Biblia tapno sungbatanna dagiti kararagtayo?

 ¹⁸ Us-usaren ni Jehova ti nasantuan nga espirituna tapno sungbatanna dagiti kararagtayo. No ikararagtayo a tulongannatayo a mangsango iti maysa a problema, mabalinna nga usaren ti nasantuan nga espirituna tapno idalan ken pabilgennatayo. (2 Corinto 4:7) Us-usaren met ni Jehova ti Biblia tapno sungbatanna dagiti kararagtayo ken tulongannatayo nga agaramid iti nainsiriban a desision. No basaentayo ti Biblia, posible a makabiroktayo kadagiti teksto a makatulong kadatayo. Mabalin met a tignayen ni Jehova ti maysa nga agkomento iti gimong a mangibaga iti kasapulantayo a mangngeg wenno maysa a panglakayen iti kongregasion a mangibaga kadatayo iti maysa a punto iti Biblia.​—Galacia 6:1.

19. Apay a kasla saan a sungsungbatan ni Jehova dagiti kararagtayo?

¹⁹ Ngem mabalin a mapanunottayo no dadduma, ‘Apay a saan pay a sinungbatan ni Jehova ti kararagko?’ Laglagipem, ammona no kaano ken kasano a sungbatanna dagiti kararagtayo. Ammona ti kasapulantayo. Baka masapul nga ikararagtayo pay dayta iti sumagmamano a tiempo tapno maipakitatayo a napudnotayo iti imbagatayo kenkuana ken adda pammatitayo kenkuana. (Lucas 11:5-10) No dadduma, sungbatan ni Jehova ti kararagtayo iti pamay-an a ditay namnamaen. Kas pagarigan, mabalin nga ikararagtayo ti narigat a situasion, ngem imbes nga ikkatenna ti problema, mabalin a pabilgennatayo tapno maibturantayo dayta.​—Basaen ti Filipos 4:13.

20. Apay a masapul a kanayontayo nga agkararag ken Jehova?

²⁰ Anian a nagsayaat a pribilehio ti agkararag ken Jehova! Masiguradotayo a denggennatayo. (Salmo 145:18) Ken no kanayon a naimpusuan nga agkararagtayo ken Jehova, ad-adda a tumibker ti pannakigayyemtayo kenkuana.